☆Mr. BAD(ZAWLAIDI NEITUPA)☆ - 20 By Dingdi Pachuau

☆Mr. BAD(ZAWLAIDI NEITUPA)☆ - 20 By Dingdi Pachuau

Chuta țang chuan U Valpuia hmêl ka hmu ngai ta lo va, a chanchin lam rêng rêng pawh ka hre ngai ta lo. Mampuii ka zâwt ngai lo va, ani pawhin min rawn hrilh ngai bîk lo, ka țhianteho hnên ațangin kan khaw lam chanchin chu ka hre reng reng a, Hruaii leh Pa Zuia pawh an la inzui chho tluang zël e. Tleirãwl hawklak rual mai mai kan ni tawh bîk hlawm lo va, pasal nei rual kan nih ve tawh hlawm avàngin a țha nghah nâna ngaihzâwng neih pawh hi a hun tawh lo, Hruaiite pawh hi nakin lawkah chuan an inneih duh mai ka ring rilru deuh a, ka han fiam deuh hi chuan a nui mai a, mi dang lah hian," A farnu nuthlawi pahnihte hi an lal êm mai a, pasal an neih ve ve hnuah chauh anni chu an innei ve thei chauh ang," an lo ti țhìn. Kei pawh Mala nèn kan inkawp nghetah an ngai hmiah tawh a, min fiam ve fo bawk. Hruaii ang deuhin ka nui ve mai a, hetiang hunah hian ka duh dàn ni miah lovin U Valpuia ka hre chhuak ziah bawk. A reh ta vang vang mai si a, ngaihtuahna a kal thui deuh châng hi chuan 'Ka lo ti deuh mah mah a ni ang a' tiin ka ngaihtuah lêt leh țhìn a; mahse, chu ngaihtuahna chu ka paih bo leh vat țhìn. Rilru kil khatah awm ve reng mah se ka sawi chhuak ngai lo va, ka duh ang taka kal ta a ni a, inchhìr emaw amah ngaihtuah viau anga a chanchin ngaihven emaw ka duh lo a ni.

Mala pawh a vànnei a, written-ah a tling a, interview pawh a nei tawh a, result erawh kârleh lamah a chhuak tawh ang. A tlin ngei ka ring a, a phû a, ka duhsak êm êm bawk a ni, ani hi 'aw' ka la pawh hauh lo va, U Valpuia bulah kha chuan amah ka hnar theih nân bialpa nei angin ka insawi mai kha a nia, hna a thawk țha viau bawk a nih hi. Mala hi ka chungah a fel a, min ngaihtuah a, a ngainatawm êm êm bawk; mahse, mak deuh maiin ka bialpa ang tùra ka dah hian U Valpuia ka hre chhuak zêl a, heti chung hian Mala hi bialpa angin ka en thei ang em ka ti țhìn a,  thutlûkna han siam tùr pawhin ka rilru a buai, harsa ka tih phah țhìn a ni.

Tĕțani pawh a rai ve leh tawh a, nakkum February thlaah khian a nei dâwn a ni àwm e. Pasal neiho hi chu han rai zung zung se, fa hmêl țha pui pui hi han hring chhuak zung zung bawk se, Mizo kan pun belh zêl tihna a nia, a nei thei hi chuan nei zung zung mai teh se. Pathian zâra kan dam chho zêl a niha pasal kan la hmu zo vete a nih chuan keini pawhin kan hring ve thuai thuai ang a, ram tân thil țha kan ti a ni mai, tih theih kan neih loh êm hi maw.

Mala chu CEO a ni dâwn ta. Tling zîngah a ti țha ber pâwl a ni nghe nghe a, ka lawmpui takzet a ni. A.phû ka ti a, hlawhtling tlâk hliah hliah ka ti bawk a, thinlung takin ka lo lãwm ve hi a ni tawp mai. Keini, a țhiante ngei pawhin 'Ka pu' kan tih hun a lo thleng ve dâwn ta si a, thil hi chu a lo mak thei ngawt mai. Ani hi zawng tladah takin a thawk ngai lo ang tih ka hria a, khawi district-ah pawh thawk se, a hnuaia thawkte pawhin hrawn nuam an ti ngeiin ka ring bawk. 

Lawmpuina thu chu ka story-ah ka hmang a, ţhiante'n an lo hmu ve lo thei lo va, min rawn fiam sap sap mai. *Nang zawng CEO nupui i ni luah mai dâwn si a, kan be ngam tawh dâwn lo che a nih hi*   te an rawn ti vêl, an va nghal tak! Ka hnial kual vêl peih lo, an duh duhin lo sawi vêl mai mai teh se.

A hlawhtling lawmna hun an siamah pawh chuan kal duh ve viau mah ila ka hman thei tawh bîk lo. Min rawn phût der ve viau nain ka thu thuin ka awm thei bîk si lo va, lawmpuina thilpêk erawh Ruatsaka kal tlangin ka pe a, hmuh pawh a lo hmu ngei. Min rawn bia a," Min lawmpui tih ka hria a, chu chu ka tân a tâwk êm êm a ni, thilpêk hi a ngai ve kher lo, ka lungawi lo mai dâwn asin?" a rawn ti a, kei erawh chuan," Awi mai teh se, ka rawn kal hman si lo va, kha tal kha chu ka tih ve ngei a ngai a ni," ka ti ve thung a.

Zanriah ei tùr ka siam laiin ka nuin min rawn bia a, an țhat leh țhat loh chungchâng zâwtin vawiin lamah eng nge an tih tihte ka zâwt a, ka khaw lam chanchinte pawh ka zâwt pah bawk. Ani chuan," Tûnlai chu kan khuaah hian damlohna neuh neuh a tam riau mai, hunpui inthlâk tùr vàng pawh hi a ni maithei a ni. Mampuii fanu pawh kha a damlo a ni àwm e, i lo hre tawh em?" a rawn ti a, kei chuan," Hre nâng, a damlo maw? A na viau em? Engtik ațangin maw?" ka lo ti vat a, vawiin lamah pawh kan țhianho group-ah kan titi reng sia, Mampuii pawhin sawi ve àwm a nia.

"A, ka va hre chiang ta mai lo ve, a sawi reng sia. Naktûk hian Lunglei panpui a tumin ka hria, naupang lamah hian damlohna chu a tam a, puitling lam hi chu kan vànnei rih deuh viau. Pi Lali tunu, Sangzuala fanu, mual vênga mi pawh kha damdawi inah a awm a; mahse, a zia viau tawh a ni àwm e, han damloh hi chuan damdawi in pan ran hi a țha ber mai," ka nu chuan a rawn ti leh a, an damloh ve ka hlauh êm avàng chuan lo inenkawl țha tùr leh fîmkhur tùrin ka chah mawlh mawlh a, ka pa pawh feh vak lo tùra hrilh tùr chuan ka ti a.

Ka nu nèn kan inbiak zawh veleh Mampuii ka be zui nghâl a, ka han chhuahchhàl zui nghâl deuh ngawt bawk a. Ani chuan," A, ni e, damloh hi sawi sawi hi a nuam lo ve a, thu làwmawm lam a ni bawk si lo va," a rawn ti a, an awm dàn tùrte zâwtin kan inbe rei angreng a, naute țap deuh țhat țhat ni àwm tak ka hriat tâkah chuan," Aw le, duh táwk ang, ngaihven rawh, ka lo la be leh dâwn nia," ka ti ta a.

Kan inbiak zawh hnu chuan ka han ngaihtuah lêt a, a rilru a hrehawm tawh sa àwm nèn, kei lah khân ka'n la chhuahchhàl zui a, ka va mãwl thei tak! A fanu damloh ka hriat loh vànga inthiam lova thupha chawia hnèm mawlh mawlh tùr zâwk ka nih zâwk tehlul nèn, ka mãwl lutuk chu ka han inhau leh rih a. Damdawi ina awmpui a lo ngaih hlauh phei chuan va tlawh ve ngei a ngai ang, a rilru a hahin a hlauthãwng ve dâwn êm asin.

Mala pawh Kolasib lamah a thawk dâwn a ni àwm e. Ka lawmpui rualin a awmna a hla tawh dâwn reuh lutuk chu ka khawngaih angreng a, amah phei chuan," Hna ţha tak mah ni se kan inhlat zual sawt dâwn si a, ka huphurh," a rawn ti a, kei erawh chuan," E, chutiang sawi mah ta che, i mawhphurhna a sàn tawh êm kha, țha takin i zu thawk ang a, dam têin kan awm ang a, damte chuan hunte chu a ral zung zung mai alawm," tiin ka hnèm ve a, a thim zâwngin ka sawipui duh lo. A ka ațanga a huphurh thu chhuak kha inhmeh lo ka ti a, a duapkai zâwnga sawipui kha țha ka ti lo a ni.

Mampuiite inentîr chu an lo admit tak tak a, inring saa kal an ni bawk a, harsatna an nei lo. A khawsik a sâng reuh a, ina inenkawl ngawt ai chuan damdawi inah chuan doctor leh nurse an hnai a, țha ka tihpui viau a ni; mahse, Mampuii ka khawngaih reuh, a rilru a hrehawm ngawt ang. Naktûk hi Zirtàwpnî a ni a, tlaiah hna bànah tlãn phei ve ila a țha ang, a mangang dâwn êm mai a, ka hmêl a hmuh chuan tlëmin a chhâwk ve deuh thei mahna!

A tûk tlaiah scooty chuan ka phei ta a, Tĕțanite inah pawh innghat khawtlai lovin ka tlawh nghâl a, ka rin ang ngeiin min hmu chu a lo lãwm khawp mai a, min hmuh a inrin loh êm avàng chuan a lãwm bawk si, rilru hrehawm bawk si chu a mittui a tla hial nia! Kei pawhin ka khawngaih nufa lutuk a, ka mittui a tling ve kul kul tho. Naute chu a mu thei meuh lo va, a âwm a na viau mai lehnghâl nèn, a thaw ri hrep hrep ngaihthlâk chu a hrehawm ka ti, a entîr har mah mah a nih dâwn hi; mahse, ka sawi chhuak lo. Ka riahpui theih dâwn avàngin Tĕțanite inah ka kal leh rih a, chaw ka bâr hlek a, ka thuamhnawte dahin damdawi in lam chu ka pan leh ta a.

Zàn kan mu țha lo, naute khawsik a reh hlei thei tlat lo va, a sa vur reng a, a țah țhat țhat reng avàngin a khuh nasa lo thei lo bawk a, rilru a hrehawm duh hle mai. Mampuii'n a pua a, kei chu min duh ve lo hrim hrim a, ka lâksak thei lo. Zàn khat mut țhat loh mai mai chu engah vak ka ngai lo nain naute khawsik reng mai, mu țha thei lo leh țap țhat țhat reng mai bula tlaivàr chu rilru a mangangin rilru a hek duh ka ti mai, tih theih neih a châkawm a, puitling angin nâ an sawi ve thei ve bawk si lo lai tak hi a buaithlâk zual lai chu a ni.

Khawvàr hnuah erawh chuan zàn thim thiltihtheihnain min kiansan ta bawk a, rilru a zãng ta deuh. Zàn thimah hi chuan natnate hi a zual duh bîk a, boruak hi a hrehawm bîk bawk. Naute pawhin a hre ve deuh a ni ang, dâr 6 vêl ațangin a muhìl pângngai thei ta deuh a, rilru pawh a zãng ta sawt sawt e. A nuin a la paw reng tho a; mahse, a țap tawh lo thung, a țap lo ringawt pawh chu a zia tawh tho tho.

Pneumonia niin a benvawn lo chauh tawh a lo ni a, ka khawngaih reuh tak tak a ni. Mampuii chuan," Kan in hi chu zial zu mi deuh hlîr kan awm si a, mi lo lêng an awm lahin 'naute tân a ťha lo ang e' tih lam hi a lang tawh lo, an khu luih luih zêl si a, a ngaihna a awm lo a ni," a ti sap sap a. Ni e, thingtlângah hi chuan hna thawk mi kan ni a, țhenawmte inah leh mi inah kan lêng kháwm dur dur a, mite tân hnawksak ka ni thei a ni tih lam ngaihtuah lo hian zial kan zu khu luih luih zêl mai si a, mi hian min sawisêl ngam si lovin a rûk hian min lo ngaithei lo viau thei ang tih lam pawh hi kan ngaihtuah pha lo țhìn niin ka hria a, heti lamah hian hma kan sâwn a ngai hlêin ka hre bawk.

Tĕțanite in ațangin Mampuii ei tùr chaw ka la a, kei chu inah ka ei nghâl daih a. Dâr 11 vêlah naute chu a khawsik vàngin a rawn harh leh a, damdawite pein ka han paw ve lâwp lâwp a, ka puaksak thei chu ka lãwm. Mampuii a hahin a taksa a na dâwn tawh si a, rei lo tê chhûng chauh ka chhâwk thei pawh chu ka lãwm a ni.

Vànneihthlâk takin zàn dâr 7-a a khawsik leh bâk chu zànkhuain a sik ta lo va, mut pawh a mu țha thei a, keini pahnih pawh thinthî chuan mu thei lo mah ila kan chhîng ve thei a, a tihzia khawp mai. Țhiante leh chhûngte'n chanchin min rawn zâwt ve reng a, min lo țawngțaipui reng bawk a, chu vàng pawh chu a ni ngêi ang.

"Hetiang a nih chuan kan chhuak thuai thei dâwn e," Mampuii chuan hlim tak hian a ti hliai a, kei pawh chuan," Ni e, Pathian zârah a sik chhunzawm tawh lo tùrah ngai ila, in haw thuai thei tùrah ngai ang," ka lo ti ve a, a hmêl chu phelh phang mah se a mitmengah hlimna ka hmu thei tawh a, nuam ka ti veng veng tawh mai. A rilru a hrehawm dâwn tih chu hre mah ila hrehawm a tih dàn tùr tak kha ka zuk hriat thiampui phâk lo va, nuin a rîla rah fa a hmangaiha a ngaihtuah dàn tùr rilru tak kha fa ka la neih ve miau loh avàngin ka la hre thiam ve phâk lo a ni.

"I chunga ka làwmzia hi sawi ngaihna pawh ka hre lo. Keimah chauhin ni ta ila hrehawm ka tih dàn tùrzia hi... " a tih sap sap pawh chuan hre thiam takin ka lu ka lo bu nghat nghat a," Țhiante chu inpuih hun a awm țhìn a, làwm thu inhrilh a ngai lo, rilru hrehawm lai taka inpui thei leh inhnèm theia kan awm hi a làwmawm, ka hman hun a lo ni hlauh a, a vànneihthlâk," ka lo ti ve a.

Doctor pawhin damdawi in ațanga an chhuah theih thuai tùr thu chu a hrilh a; mahse, damdawia an insèn ve deuh hlek avàngin bill erawh an awm rei loh ang aiin an chawi tam dâwn a ni. Private hospital a ni a, a àwm ve tho mai. An nufa tân hian thil ka la tihsak mang lo va, hei hi chu ka kal hma ațang tawh khân ka kutah ka dah sa hmiah a, Mampuii'n min hnial ngei pawh ring mah ila ka pêksak tho ang.

Pathianni chu zah viau mah ila ka haw phei mai loh chuan... Hna ka kal a ngai dâwn si a, Thawhțanni zînga ka phei chuan ka kal hman lo ang, ka tlai dâwn lutuk si a, hnaa tlai hi ka tih ngai loh thil a ni a, ka duh lo. Hna chu a hniam emaw a sâng emaw pawh ni se rinawm taka thawha tlai miah loh hi ka duh dàn leh ka tum a ni a, hetia hna ka thawh ve hnu hian ka la tlai miah lo bawk.

Mala'n min rawn biak avàngin ka chhâng leh rih a," Naute chu a khua a sik chhunzawm tawh lo maw? A țhat hlauh chu, a tihzia hle mai, ka rilruah a awm ve reng a," a rawn ti a, naute chhuah theih hun tùr leh ka haw hun tùrte min zâwt leh a," Ka hmu chãk khawp mai che, rawn zin lawk pawh ka châk; mahse, tih tùr a tam lutuk a, ka hman ngang si lo," a rawn ti leh dap dap a. Kei chuan," Kan dam ang a, hman hun a la awm mai ang, dam hi han hauh phawt mai ila," ka ti ve thung a.

Chhùna thingpui kan in lai chuan," Mala nèn khân in inkawp tak tak tawh em ni?" tiin Mampuii chuan min zâwt a, ka lu ka lo thing mai a, ani chuan," In inkawp lo maw?!! In inkawp emaw kan tih vek si," a ti leh a, kei chuan," Ni rêng e, engah nge inkawpa min lo ngaih ngawt ni," nui chung hian ka ti ve thung a.

"Engati nge, i duh lo em ni? A fel êm kha, hna țha tak a nei tawh zui a!! A duh hmèl viau che khân ka hre bawk a," a tih leh chuan," Fel e, mi fel tak a ni, sawisèlna tùr ka hre lo, keimah hian ka phû lo a ni. Ani kha kawp tlâk ka ni lo, țhian țha tak leh rin tlâk ngawih ngawih ang bâkin ka en lo," ka lo ti a.

"Chuti a nih chuan, U Valpuia nèn in lo inkawp leh tawh em ni zâwk? Mahse, ka ring chiah lo deuh bawk si a, a chanchin min zawh ngai loh bâkah amah U Valpuia tak pawh hi tlêm lai deuh ațang khân a reh ta riau, hmuh pawh a khât, vawi khat erawh kan inhmu zuai a, khami hnuah phei kha chuan khuaah a awm lo em maw ni chu aw ka ti hial a ni, in ni...em?" a ti leh sap sap a, kei chuan," U Valpuia nèn maw?  Ni teuh nâng! Anite chuan min duh tawh hleinem," ka lo ti mai a, nui deuh chung hian ka en a, ka rilru natna ka hmêlah a lan loh hrâm erawh ka beisei.

"A duh che kha, ka bulah pawh a sawi alawm; mahse, in inkâr hi ka hre thiam thei chiah lo va, ințhen chung hian in inhnaih riau țhìn hian ka hre leh bawk a. In ințhen hnu khân mipa dang i buaipui lo viau nain Mala nèn hian in inzui deuhah ka ngai a, ani a lo fel bawk nèn, țha pawh ka tihpui lutuk che, i duh phawt chuan. Innghahna tlâk tak niin nu leh pa tak takte kâra sei lian leh hmangaihna kâra țhang lian a nih vàng hian rilru baihvàina ti mai ang, khatiang pawh kha a nei dâwn lo va," a ti leh duah a.

Thâwk ka la phawt a, chumi hnu chuan," Hmangaihna hi zawng a lo mak êm a lo nih hi," ka ti ringawt a, sawi thui vak pawh ka tum lo. Thil kal tawh chu a siam țhat theih tawh loh a, sawi sawi hian awmzia a nei tawh dâwn chuang bawk lo, Pathian hian ka tâna ruat a nei ve chêk ang a, a lo thlen hunah chuan ka hre ve mai ang chu maw.

"Ni e, a mak a, a ropui bawk a; a châng erawh chuan thinlung tinatu mai a lo ni leh a, a hna thawh dàn hi a inang lo thei khawp a ni," tiin a han ngawi leh rih a, thingpui a dùt hlak hnuah chuan," U Valpuia hi chu a khawngaihthlâk hnuang hnuang asin, a hma khân ka ti lo a nia, in inkawp tâk loh hnu hian a ni ka tih ni. In ințhen.. ni leh lo, a țhen che khân ka ngei lutuk a, Au Vid-a nèn a room-a an titi laiin ka àn khum hrep nghe nghe. Ani lah chuan a duh rêng vànga țhen che a nih loh thu a la sawi zui a, ka thin a tirim tak tak a ni; mahse, tûn hnu, a pa thih hnu lawk ațang khân a ni ang chu, ka hre thiam ta deuh a," a ti leh sap sap a.

"Duh rêng vànga min țhèn a nih loh chuan duh loh rêng vàngin min lo țhen a ni ang maw?" tiin ka nui hak a," Bum che a tumna hmanrua a nih kha, ka hre chiang tawh a, ka man chhuak chiang tawh a, thu pawh a tàwp chiang tawh alawm," ka tih leh chuan," Eng maw?!! I man chhuakin i hre chhuak vek tawh maw? A thurûk kha?" a rawn ti leh a.

"Aw, sum vàngin min hnaih leh te a tum mai mai a, a rin loh deuhin a ni ang chu, bialpa dang ka neih tawh thu ka hrilh a, hnâra khawn ang hlauhin a lêt vang vang mai a ni," tiin ka nui leh hak a, ka nuihzat vàng erawh a ni lo, ka thinlung nat vànga nui ka ni zâwk, a hun lai kha ka ngaihtuah kîr leh a, ka natna kha a rawn thar leh lo thei lo a ni.

"Ni lo, chûng ka sawi lo. Sum vàngin a hnaih che niin i ngai maw? Hna i neih hnu hian maw? Chutiang chuan a sawi em ni?" a ti leh a, kei chuan," Sawi kher a ngai hleinem, a hriat vek alawm. Ka thinlung a nat êm vàngin dâwt ka hrilh ve ta thung a, ti ila dáwt pawh a ni chiah lo thei tho bawk a," ka ti ve leh a.

Min rawn en vang vang a," Ani pawh a thinlung a na ve tho asin, min hrilh a, ani aia țha daih zâwk nei tùrin a duhsak che tih pawh min hrilh. I hlim phawt chuan ani pawh a hlim tùr thu thlengin. A duh ve tak tak che a ni," a tih leh chuan," Min duh tak tak se min țhen nâng! A, sawi tawh lo teh ang, engkim theihnghilh vek hi ka duh tawh a ni," ka ti a, thâwk ka la zui hak a.

"Ni lo, a țhen chhan che kha a duh loh vàng che a ni lo a ti alawm. A àwm ve tho bawk a, a ruih chhoh lai vêl kha a nia, thil a ngaihtuah thui lo va," a tih leh pawh chuan," A chhuanlam a nih chu, min rinawm lohsanin hmeichhe dang a la tawmpui zui!! A nei leh duh tak tak chuang si lo, a awm dàn hi a ngeiawm zâwk asin," ka ti ve tlat a, chutah," I țan ve hrim hrim, kei i țhiannu ai pawh hian i țan daih zâwk a nih kha," ner nâng chung hian ka ti leh a. Chutah chuan a rawn nui ta hawk hawk a.

*KAN MI HMANGAIHTE CHU AN CHHIATNA TÙR KAN DUH NGAI LO, AN TÂNA ȚHA TÙR DUHIN AN TÂN KAN DING TLAT ȚHÌN*