☆KA TÂNA RUAT☆ - 1 By Dingdi Pachuau

☆KA TÂNA RUAT☆ - 1 By Dingdi Pachuau

"School ațanga i hlawh ni lo, hmun dang ațanga sum hmuhna dang hlâwk tâwk i neih tâk ațang hian i induh deuh sawtin ka hria, tiraw?" nui chunga a rawn tih chuan ka melh rawlh a, a rûk tak erawh chuan ka nuih a za ngei mai. A fiamthu tih ka hria a, a dik lo hulhual tih hretu kan ni ve ve bawk. Kan pahniha inkârah hi chuan fiamthu hian hmun a luah sâng a, fiam pawh kan infiam nasa țhìn viau rêng a, thutak sawi pawh hian fiamthu sawiah kan inngaihsak fo a, hei erawh thil țha tak chu a ni lëm lo.

"I duh duh han sawi la, ka leisak vek ang che," tiin, a hnu deuhah chuan uang tak hian ka chhâng lét a, nui hmêl pu duh miah lovin chapo hmèl tak hian ka'n dâk zui deuh vah a, ani lah chuan," Yess...!! Tak tak aw, Zarda pân ka ei châk tawh lutuk! Chu chu ni leh rih mai rawh se," a lo ti vat a, min rawn kheuh zauh pah hian a meng sawr sawr a, ka lama rawn thle phei deuhin," My name-a a rawn lang e," a ti zui sap a.

Rawn thleng thar chu en kher a ngai lo, a rim ațangin tu nge tih ka hre chiang êm a ni, a rimtui ngainat țhin tak a pianchama ka pêk ngei khân a rawn inkâp rim tui leh miau alawm. A duh ve hlarh hlarh bawk a, amah pawhin," Min pêk ațang khân hei lo hi chu rimtui dang ka hmang tawh ngai lo," a ti hial rêng a, a hmang zo leh țêp tawh ang chu.

"A lo thleng ta bawk a, ka kalsan nghâl mai ang che u, inhau lo ula," ka țhiannu Chhani chuan a ti sap a, a thil sawi tàwp ber avàng chuan ka melh rum zui a, ani erawh a lo nui sûng a, min bye bye zauhin a kal zui ta nghâl a. Chhana nèn kan inhau ngai lo tih a hre ve kur sia; chutia inhau țhìn ni àwm taka min han sawi kher chu, ka ngei ru sêng sûng tak tak a ni.

Ka bag ah lai rawn kêu sawt sawtin chhang pack khat hi a dah lût zui a," Keini pawh kan kal nghâl mai dâwn em ni ang?" a ti zui zat a," Boss-i'n i tih te chuan," ka lo ti ve vat a, melh chhoin ka nuih sak bawk a, 'Boss' ka tih vàng chu a ni lehpek ang, a nui var var mai!

"Ka haw pahin ka rawn lam kual leh ang che aw, min lo nghâk ang a, a nih loh pawhin i hman hunah min lo be mai ang a tiraw?" tiin, lìrthei a hùnna lam pan chuan kan inzui phei ta nghâl a.

Kan tlãn chhuak chu a ngai têin chak takin min tlànpui leh ta a, min phurh țantirh chuan ka hlau viau nghe nghe a; mahse, a khalh thiam ve tâwk a, a inring ve tâwk a ni tih ka hre chiang tawh a, hlauh enah pawh ka en tawh lo. Kan thleng thuai mai rêng a, "A nih aw, i hman hunah min rawn bia la," a ti a, a tlãn chhuak zui leh nghâl zat a.

Pi Mawitei fapa Joel-a, Class ix zirlai chu Mathematics tuition class ka pe a, chumi pah chuan a nau Naom-i, class vi pawh ka vil tel bawk a, Naom-i hi chuan a thiam thei viau a, Joel-a tak hi a buaithlâk a ni. A man lo thei lutuk a, a inti tlangvâl chho ve tawhin tleiràwl luhlul hun lai a ni chho bawk nèn, thla khat chuang ka kalpui tawh a nia, a sâwtpui fahran lo a ni tih hriat tak hian kâr kaltaa class test an neihah pawh a la rawn fail leh tho a, Pi Mawitei hmaizah a na duh khawp mai; mahse, ani erawh chuan," A, a la sak ve rih a nih hi, a la man thiam êm êm ang," a lo ti thĕn a, beidawn mai a tum lo, kalpui zêl tùrin min ti a, hei kan la ti rih zêl chu a nih hi.

Ka zirtîr lai chuan Pi Mawitei chuan thingpui min rawn pe leh a, a hmeh nèn; a tih ziah dàn a nia, a rûk tak chuan nuam lo ka ti țhìn alawm, a tìrah khân ka hnial a; mahse, ani erawh chuan," Kan thiam ve loh kan fate i zirtîr a, duat i ngai alawm," a ti ve tlat a, ka chunga a fel ém avàng hian kei pawhin țhahnemngai takin Joel-a leh Naom-i hi ka zirtîr ve țhìn rêng a ni.

Ni khat atân 'dárkár khat' tih hi kan inbiak dàn a ni a, vawiin chu an thil zir an man thiam dùn viau a, nuam pawh ka ti, Joel-a pawh chu a tûm búr tawh lo va, Naom-i phei chuan," Ka thiam vek tawh sia, kan test leh hunah chuan mark ka hmu sâng ber tawh chiang ngawt ang," a ti barh barh a, kei pawh chuan," Kei pawh i hmuh sàn ber ka ring," ka lo ti ve a, Joel-a erawh a ngawi reng thung a.

Gate pâwna ka chhuak chiah chu pa ber a lo haw ve chiah tih hriat tak hian gate-ah chuan car var a rawn inkhalh lût ve leh chiah a, ka thlêk deuh nain a khalhtu ka hmu thei lo, an inah hian ka kal ngun ve ta viau a nia, chuti chung chuan pa ber hi ka la hmu hauh lo va, Pi Mawitei hi a la upat viau loh avàngin pa ber pawh hi a la upat vak bîk ka'n ring lo teh ngawt a!

"Dàwrah kual chho lawk ang aw, thil ka lam pah lawk duh a," tlãn paha Chhana'n a tih chuan," Aw le, Boss; mahse, rei lo ila aw, zanin inkhâwm zàn a ni sia, ka la inbual si lo," ka lo ti vat a, ani chuan," Rei dâwn nâng, thil lam zawk a ni mai," a lo ti leh a, an dàwr lam pan chuan min phit chhohpui zui nghâl a.

Dàwra thil a lam zawk hnuah kan in lam panin min tlànpui leh vang vang a, in bul kan thlen chuan lêng ve rih tùrin ka sâwm khawmawi a; mahse, ani chuan lo hnialin," Inbual i ngaih kha, inkhâwm bàn lamah ka rawn lêng zâwk ang e," a ti a, mawi ka tih țhin dàn deuhin a mit chu min siai pah zauh a, ka lo nuih sak thung. A han hawi kual deuh a, chutah, ka biangah chuan rawn fâwp thutin a inla hrang zui nghâl a," Zanin ka rawn lèn hma chu min daih thei mai ang chu maw," a ti zui sap a, kei erawh chu miin a thil tih kha an lo hmu ang tih hlauin ka hawi kual nasa mai, vànneihthlâk takin tu mah ka hmu lo hlauh.

Ka inbual chu ka zai pah rât rât a, ka  hun tawn mêkah hian ka hlim ve êm a ni. Chhana hi ka phû loh a ni tih chu hre mah ila min duh thiam ve êm êm a, min ngainain min thlahlel tih pawh ka hria. A tìrah kha chuan ka duhna ka tilang ngam ngai lo va; mahse, zêp nei lova min duhnate chêtzia mai ni lo, țawngka ngeia min hrilh min hrilh tâk hnuah chuan ka duhna pawh ka thup sêng ka bîk lo va, tûn thleng hian kan inkawp ve ta zêl chu a nih hi, kum khat a chuang ve tawh nghe nghe. Ka nu leh ka u Mama pawhin kan induh tawn tih hriain eng mah an sawisêl lo va, fîmkhur tùr erawh chuan min chah reng thung. A chhan pawh ka bialpa a nih vàng ngawtin ka pasal a ni ang tihna a ni lo va, hmeichhia phei chu nulât tlangvàl kawngah hming a chhe awl bîk si a, a daih rei bawk si, fîmkhur a ngaih nasatzia min hrilh fo țhìn a ni.

Ka nu nèn kan inkhâwm ta ngei a, bàn hnuah Chhana pawh a rawn lêng leh ngei bawk. A dàn ngai tein Apple min rawn ken leh a, ka nuih leh sak ringawt. Ka nu leh U Mama'n TV an en mai mai a, keini pahnih erawh thlang lam veranda-ah țhuin kan vêng ràl lehlam êng pe un mai chu kan thlìr dùn a, kan țawng lêm lo nain kan kut erawh a insual dùn zauh zauh thung. A kut dah fet a tum țhìn a, chu chu keiin ka lo dang țhìn a ni.

"Uikawm viau țhìn lo teh, a hek lo ka tih tawh kha, ral thei pawh ni hlei lo," a tih sap chuan ka nuih chu a za ru ve deuh reng a; mahse, a hriata nui ri duh lo chuan," Fet tum bîk lo la," thutak deuhin ka lo ti ve thung a, a chêt fet hret chuan inngaizâwng kan nihnaah mipa leh hmeichhia, inhìp tawnna nei kan ni si a, thil a kal thui palh ang tih ka hlau tawh a ni. A hmain mite fiamthu 'kâwng achin chung lam hi chu ui viau hran loh tùr, bialpate chu khawihtîr ve mai mai a pawi lo, ' tia an sawi țhin chu vawi khat ka apply ve zauh tawh a; mahse, a lo țha lêm lo, induh tawn awm dùn ta chu, kâwng achin chung lam chauh duh táwk lohna, a bâk duhna a rawn awm a, tlêma tlêmah kan chesual lo chauh a ni, ka hnial nasain ka țang nasa êm a, a kutah hial ka sehsak ta kha a nia, chutah chiah chuan min thlah thei ta chauh a ni. Thil thleng thei ka hre chiang tawh a, a kut fet deuh taka dahtîr pawh chu ka duh tawh lo a ni.

A lêng rei lutuk lo va, a haw dâwn chuan," Naktûk tlai chu ka thlah hman ta lo che a nih pawhin lungawi loh âwih loh aw, ka tih tùr i hriat tawh kha," a ti a, kei pawh chuan," Ka hre thiam che alawm, țha deuhin awm la, i nu leh pa thu âwih takin awm ang che," ka lo ti ve ngei a, a nitei damlo kan tùrin Lêngpui lamah a nu leh pa nèn an kal dâwn a, zanriah an ei nghâl hmèl si a, an ei lo thut thei tho bawk a; mahse, an ei a ring zâwk.

Mutnaah chuan kan pahniha chanchin chu ka ngaihtuah zui vang vang a, kan inngaihzàwn chhoh dàn chu ka suangtuah lêt a, min duh a ni tih ka hriat hnuah pawh khân kei chuan kan dinhmun a inan loh vàng khân chhàn lét tinah ka tin ngai lo a nih kha; mahse, min zar reng ta chu, ka duh rûk ve tho kha a ni si a, kan han inkawp chho ve ta a, amah lo duhtu hmeichhe dang hnên ațangin țawng khum leh hmuhsitna ka han dawng nghâl zat a, zahthlâk ka tiin hrehawm kha ka ti khawp a, Chhana kha țhen leh nghâl mai kha ka duh hial a nih kha. Min țawng khum dàn lah a dik ve viau lawi bawk si, anmahni angin kan awmthei ve lo miau mai a. Ka nuin bazàr tûkah chawhmeh a zuar ve țhìn a, U Mama ni tin inhlawhin a chhuak a, kei pawh hun ãwl ka neih chângin mi in tifaiin ka inhlawh ve bawk, khawsak dinhmun ațanga teh chuan ka bialpate nèn hian kan inthlàu ve lulai êm mai a, min hmuhsit duh tân zawng kan hmuhsitawm ve êm bawk a, a àwm ve tho mai. Kan in luah lai hi mi in ni lovin kan in a ni hlauh zâwk a, chuti chu ni lo phei se chuan kan chêt hi a harsa ve țhìn ngawtin ka ring. Nikum kum țantìr lam khân Private School pakhatah inhlawhna ka hmu ve ta hlauh zâwk a, hlawh chu tam viau lo mah se lãwm takin ka thawk nghâl a, ka inhlawh ve tâk hnuah chuan hlawh a tlêm emaw a tam emaw thla tina pawisa ka la lût ve thei ta hrim hrim chu ka lãwm tak zet a ni, tunah phei chuan tuition ka pêkna pawisa a lo tel ve leh ta bawk nèn, hah deuh hlek mah ila ka hlim êm êm tho, a bo a bãng awm lova ka nu ka han pe chu ani pawh a lãwm thiam viau a ni. A hma ațang tawha tuition pêk tùr ka lo zawng ngai lo kha mãwl ka inti ru ta hial nghe nghe, thil harsa tak a ni si lo va.

Chhana hian a thîkthu a pe chhe ve țhìn khawp a, naupang ni lo mipa tawh phawt ka kalpui a hmuh hi chuan a thin hi a lo rim ve hman ziah a; mahse, min rawn be hmasa ziah thung. Tu nge ka kalpui chu tiin min rawn zâwt ziah a, kei pawhin ka lo hrilh fiah a, ka thawhpuite an nih thu ka hrilh hi chuan," Kalpui kher lo la, mipa dang nèn hmuh dun che ka duh lo a ni, ka phal lo," a rawn ti kher zêl a, lehlamah ho ka tih viau rualin lehlamah erawh min duh vàng a ni tih ka hre tel tho a, ka thinrim thei ngai lo. A thîkthu a chhiat vàng hian a theih hrâm chuan ka thawhpui mipate chu țûl tàwpah lo chuan ka hnaih duh lo țhìn rêng a ni. Heti chen kan inkawp chhûng hian vawi thum chu kan intihtauh khum tawh a, hêng pawh hi a chhan chu a thîkthu vàng vek a ni. Inbe lovin kâr khat chuang kan awm hnuah amah hian min rawn be hmasa leh hrut hrut țhìn a, a rilru a la naupan chhiat ve êm avàng hian ka hre thiam mai zêl, an unau zînga naupang ber leh an duat rawn a nih vàngah ka puh deuh mai. Kan kum erawh a inrual chiah a; mahse, ani hi zawng, nu leh pa la neiin, a u palite lah hna țha tak tak thawk vek an ni a, a pa ni se sawrkâr zêm zen a ni a, a nuin dàwr a nghâk bawk, sum lamah an buai ve lo, thawk kher lova duh duh nei thei a ni a, a tân va thawh ve kher a ngai lo pawh a ni ang chu, tunah pawh hna a la nei lo rêng a ni. Ka tân ui a nei lo va, a theih tâwk hi chuan min duat ve bawk niin ka hria, ei tùr, chhang leh thei chi hrang hrang hi a rawn lèn châng leh kan inhmuh châng hian min pe fo, han hnial dera lâksak duh loh dâwn lah hian a thin a rim dâwn zêl a," Ka pêk che i la duh lo a nih chuan i ten a ni ang," a tih loh leh," I tân hi chuan ui ka nei lo tih hria la ka duh alawm," a ti a, a thinrim ai chuan tiin ka la leh nge nge țhìn.

A tûk tlaiah chuan a hman lo ta ngei a, kein ka kal ta țauh țauh a; mahse, ka thleng hran har lo. Min hruai ziah țhin avàng erawh chuan ka ngai ve ram ram a, hah pawh ka hah phian mai. Joel-a  chu a dàn ngai têin a ngawi ràn a, Naom-i erawh chu hlim tak hian a țawng barh barh a, min nêl ve tawh a," U Ruatpui," ti pawhin min ko duh lo," Au Ruatpui," min ti deuh ngat a ni.

Kan inzirtîr leh mawlh mawlh a, bung thar ka kàipui si a, ka hrilh fiahna chu a man thiam leh thiam loh Joel-a chu ka han zâwt a, a lu a bu nghat ringawt. He nau tak hi chu aw...  A râwlthar chho ve tawh a, tilpàwr aw thûm chher deuh hlek a neih hi a zahpui deuh țhìn nge, min nêl lo hrim hrim ni, a țawng țha duh lo khawp mai a," Aw," tih emaw, "Aih," tih emaw lu bûk nghut emaw bâk hian min chhâng ngai lo. Tih tùr ka pêk chu a han ti ve chhin a, pakhatna chu a ti dik ve ta mai a, ka han fak leh rih," Kha, i thiam lutuk tlat, a har lo a nia, huphurh miah lo la, i hriat thiam loh deuh leh kan sawi fiah leh ang a," ka ti sauh sauh a, ani pawh chu a tìr ațanga a tih dik vàng nge ni, ning deuh hmêl a pu lo deuh chuan ka hria.

Pi Mawitei'n thingpui leh a hmeh min rawn pe leh a, a rawn nui leh sâng bawk. He nu hi chu aw... a fel hi chu thuhran, a chhe lo chiang a ni. A zeihawi bawk si, a inenkawl uluk tih lah hi a hriat ngawih ngawih bawk a,  a vun màm leh nalh dànte hi, a sam rawng ni se coffee rawng deuh hian a uk kharh a, a hmáwr lam a ti kir kàwi deuh a, a mawi ka tiin sexy ka tih zâwng tak a nia. A thuam inbel ni se a inhmeh êm êm zêl a, a màwipui bîkin a hâk tùr liau liaua an siam chhuah ni àwm tak a ni zêl, mi vànnei tak chu a ni, kei a hmeichhiatpui pawhin chhe lo ka ti êm êm chu a ni si a. Fapa tlangvâl lek lek tawh nei a ni tih pawh a hriat loh, a la nula bawk si a, kei pawhin hre sa lo ila chuan nu a ni tawh tih ka âwih kher lo ang.

Tih tùr ka pêk an tih mawlh mawlh lai chuan," Au Ruatpui, school-ah teacher i ni maw?" Naom-i chuan a rawn ti ta a, kei chuan," Aw, ni e," ti pahin ka en vat a, engtin nge maw a lo hriat ve reuh ni. Min nêl ve tawh ka tih kha, min biaka min titipui hi a châk țhìn tih pawh ka hria. "Eng nge in school hming?" a rawn ti leh a, ka sawi chuan," Ka hre miah lo a nih chu. School naupang an tam ve tho em?" a ti leh a, ka nui hak mai, a țawng duh reuh a, a dîlchhût ve reuh bawk sia, ngei ahnêkin a lawmawm reuh ka ti a ni. Anni hi an unauin Aizawla school țha leh lãrah an kal a, an school-a naupang an tam angin keia thawhna school-ah zawng naupang an tam ve hauh lo mai; mahse, a nuam tâwk ve viau chuan ka hria.

A zawhna ka chhàn hnu chuan a ngawi deuh vang vang a, a thil tih lai chàwl meuha min rawn enin," A nih leh, teacher mipa an awm ngei ang a, an zîngah chuan bialpa i nei em?" a rawn ti leh a, Joel-a chuan," Naom..!!" a lo ti țhat a, ani hi chu a fing ve tawh a, a nau la ã phuang mai zawhna chu àwm lo a ti a ni ang chu, thîp zet hian a nau chu a en pah bawk a, Naom-i erawh chuan a u a en tlat loh avàng chuan a u meng thîp zet chu a hmu hauh lo ang.

"Nei lo tlat," nui chung hian ka lo ti ve thung a, Naom-i vêk chuan," An va mãwl ve!! I hmêl țhat tehlul nèn," a lo ti leh a, pâwl ruk lek la zir tân chuan a thil sawi chu a mak ka ti, min ti lài lek lek bawk. Joel-a chuan," Naom, duh tâwk rawh! Țawng țawng lo khân i tih tùr kha ti rawh," tiin a lo khap leh a, ani lah chuan," A ninawm ve rih alawm, minute nga tal break nei ve țhìn ang u," te chu a la ti tak deuh deuh a, a ner deuh nâng bawk a.

An nin dàn tùr lam ka lo ngaihtuah ngai miah lo tih ngaihtuah chhuak zawkin," Aw le, minute thum zâwkin aw ni ang, minute thum chawlh kan nei țhìn tawh dâwn nia," ka ti ve ta a, minute thum chawlh zawk chu a pawi lo ang, dârkâr khat aia tam hret ka kalpui ziah tho alawm le.

"Yes...!! Ka room-ah ka'n kal zawk teh ang," tiin a tho zui nghâl a, Joel-a erawh chu a la țhu reng thung. A rawn lang har lo va, eng emaw hi a hnung lamah a rawn thukru lût țât țât a," School bàn veleh khân ka siam a," a ti ringawt a," Pêk che ka duh a; mahse, nakinah i haw dâwn hunah chauh ka hmuh ang che," a ti leh a, a lehkhabu kârah chuan a dah țha zui a.

"A ni maw? Ka va lãwm àwm ve?!!" tiin ka nuih a, Joel-a chuan," A ho ngawt ang!" a lo ti hmuk a, ani lah chuan," A ho lo, youtube ka en ațanga siam dàn ka thiam chhuah liau liau asin, a mawi lutuk!" a lo ti ve thung a, Joel-a chu a chek tlak tlak ta ringawt a, chhàn lêt dàn tùr a hre tawh lo a ni ngei ang.

In ka thlena Naom-i thil min pêk ka en chuan ka nui hak a, colour paper ațanga a pangpâr siam hi a lo ni a,  ani ang rual kut chhuak atân chuan a mawi tâwk viau mai, a kuthnu mãn thlarh lo mah se a uluk ve viau ang tih pawh a hriat, chu zawng ai chuan min pêk duhna rilru chu ka duh ber mai, ka lãwm viau bawk a ni. Ka khum bul dawhkàn chunga bottle te reuh têah chuan ka khawi zui nghâl a. 

Kár tàwpah erawh tuition class ka kalpui ngai bîk lo, in ka ti fel a, ni tin ka chhuah țhìn avàngin Inrinni hi chuan inah awmin in ka ti fel ve ziah. Ka nu bazárah a awm a, U Mama inhlawhin a chhuak thung, vawiin chu a rawn haw hma deuh ang. Ka insûk zawh hnuah chhuat ka nâwt a, kan furniture neih ang ang pawh uluk takin ka nâwt vek a, tukverh dârthlalang nèn. Thingpui ka in zawha sana ka han en chuan a lo tlai duai tawh tih ka hmu nghâl a,  fridge-a vawksa chu la chhuak vatin kan tùrin ka siam zui nghâl a, zànah ka nuin inkhâwm a duh leh ngei dâwn si a, lo inbàwl lâwk sa hi a țha.  

Ka nu a rawn haw a, U Mama erawh a la rawn haw lo. A rawn haw hma ve ka rin tehlul nèn, ka nu bula ka sawi chuan ani pawh chuan," Ni e; mahse, an hna a laklawh deuhte pawh a ni ang chu, puitling a nia, a lo thleng țêp tawh ang," a lo ti a, rei vak lo hnuah U Mama chu a rawn thleng a," In va thawk rei êm êm! I hah ngawt lo maw?" ka lo ti vat a; mahse, a rawn bãi lût suih suih a ni tih ka hmuh tâkah chuan," Engati nge?!" tiin ka pan nghâl vat a.

A ke chu a hna thawhpui pakhatin lungin a lo delhtîr palh a ni àwm e. Ka nu nèn chuan kan buaipui nghâl vat vat a, ani lah chuan," A na viau lo, min ngaihtuah lutuk a nih kha," a ti a; mahse, a na ngei ang, a pilh lo nain a duk deuh rui mai a, a chêt zâwng pawh chuan a țhen ru deuh sak sak tih ka hmu reng. 

A thawhpuite chu an lo fel phian a, an inthiam lo vete pawh a ni ang, an rawn lêng a, chanchin an rawn ngaihven ve a ni. Ka nu a inkhâwm daih avàngin keiin ka awmpui a, an sawi dàn chuan damdawi ina kalpui an tum a; mahse, U Mama'n ngai lo a ti tlat a, a duh loh tlat avàng chuan an kalpui ta lo a ni. In bul thleng an rawn thlah a, an rawn lût ngam lo a lo ni àwm e. An va ho mai mai tak! Mahse, an la naupan ve hmèl a, a àwm tihna chin ka nei leh tho.

Damdawi in pan ngai a ti tlat si lo va, ni tinin inah a awm ta mai. Hna thawk thei a ni rih si lo va, ka nuin a lo awmpui țhìn. Chhani Doctor hriat hnai ve deuh kan râwn a, ani chuan a nat dàn chu en a duh khawp mai a; mahse, U Mama hian a duh bau lo a ni tawp mai, damdawi ina kal hi thih hrehin a hreh ni berin ka hria. A ruh a tliak lo tih kan hria a, chu chu a ni mai. Ka nuin a thiam tâwkin a enkawlpui a, kei pawhin damdawi leh a tâna țha tùr nia ka hriat chu ka lei hawsak țhìn. Chhana pawhin a ngaihtuah ve khawp mai a, an chhûng hnai doctor a ràwnsak hial a, an in-video call zar zar nghe nghe, doctor chuan ka u ke awm dàn vêl chu hmuh a duh miau si a.

"I fel ngawt mai! I hriat tawh sa mah ni se mi fel tak i ni, kan chhûngkaw tân hian i hlû ngawih ngawih, ka u min ngaihtuahpui vàng hian ka lãwm a, ka bialpa i nih vàng pawh hian ka lãwm e," tiin làwm thu ka hrilh a, ani chu hlim hmêl tak hian a lo nui var var a," I chhûngte chu ka chhûngte tho an nia, ka ngaihtuah an ngai alawm, nangin i ngaihtuah chu ka ngaihtuah lo thei bîk nâng," a lo ti ve a," A dam thuai mai ang, i rilru ti hrehawm lo la," tiin min hnèm zui leh zat a.

Sawrkâr chawlh a lo thlen hi chuan ka lãwm thei tawp. School ka chàwl ve thei a, bâkah, tuition ni se ka pêk a ngai lo bawk a, ka hlawh tùr lah a kiam phah dâwn chuang si lo, a nî zâwng ni lova thla bîa min chhawr miau avàngin, ka thawh țan hma khân kan sawi fel sa vek a ni. 

Vawiin pawh chawlh a ni a, Chhana nèn chawhma lamah kan lêng chhuak ve a, hun ãwl hi kan nei dùn khât ve êm mai a, inhmuh hi chu kan inhmu khât hran lo, Chhana hian hun thâwl tak neih dun hi a châk ve țhìn a, min hruai chhuah a duh ve țhìn a ni. Chu vàng tak chuan nizàn lama a sawi ve sup sup pawh khân ka hnial buai duh lo rêng a, chawhnu lamah erawh zàn lama kan hna tùr kuhva rah thel tùr phur tùrin kan kal thung, romantic lo ve thei bawk sia maw!! U Mama'n a lo be lâwk vek tawh a, kan va rei lo. 'Hna thawka ka chhuah theih loh chhûng chu in lama ka inhlawh ve theihna a ni dâwn a, engtia rei nge ka chhuah theih dâwn loh lah hriat va ni suh' a ti tlat a, ka nu nèn erawh țûl kan ti lêm lo a nia; mahse, amah berin a inthlahrun avàngin a ti a ni tih kan hria a, a rilru nawmna tùr a nih dâwn phawt chuan 'a pawi lo mai' kan ti leh ta a ni.

Zanriah ei kham ațangin kan thel țan ta char char a, Chhana rawn lêng pawhin min thelpui ve hmak bawk a, kut rual ta chuan dârkár chanve vêl chauh hnuah pawh chuan kan thel tam hman khawp mai. Ka nu chuan," Chhana chu i kut a na vek tawh ang a..? Bawihi hi, i lo chhawr ve nghâl ringawt a, a kut pawh a na tawh ang, Chhana, dah tawh rawh. Bawihi, thingpui va lum leh tawh nghe nghe teh," a ti a, kei pawh chuan," Ni dâwn tak! Chhan, dah tawh la, a na viau tawh tak ang,"  ka ti a, ka tho zui nghâl bawk.

Pathian zârah ka dam țhat phawt hi chuan eng hna mah hi thawh hreh ka nei ngai bîk lo va, kan dinhmun vàng pawh hi a ni mahna, U Mama hian min khawngaih țhìn, nula ka ni ve a, school-a ka thawh hma khân mi in tifaiin ka inhlawh lâwp lâwp a, hna thawh tùr ka hmuh remchàn apiang kha ka thawk a ni mai, zàn lamah lah ka nu black-wire hmer ka pui leh a, kut thapin pawr duh viau țhìn mah se a hlâwk ve riau a, tha rum hmang leh thlan tlaa thawh a ngai mang si lo, U Mama khân phal lo viau țhìn mah se ka nuin a ti tho si a, ka pui lo thei lo a ni. Awm mai mai aiin a lo hlâwk bawk si a, amah ngei pawhin a lèn chhuah loh chuan min tihpui ngei ngei tho bawk, kan nufa thum hi chu kan țang rual dial dial thei țhìn asin.

Tunah erawh zawng khâng hun lai ai khân kan khawsak a zia chho ve viau tawh a, mite an țha a, U Mama pawhin inhlawhna a hmu thei hlê a, ka nu lahin a chawhmeh zawrh a hralh țha thei a, kei lah tam lua lo mah se thla tina hlawh nei ka ni ve ta a, in luah man a ngai si lo, kan ni tin ei in man tùr kan thawk chhuak a, kan hlim tâwk ve viau a ni. Mite angin neih nei tamin sum tam va nei ve lo mah ila kan khawsak a sàn loh avàngin rilru hrehawmna, mi neih ang va neih ve phét tumna kan nei lêm lo. Ka nu hian bungraw țha neih lam ai chuan sum vawn țhat hi a ngai pawimawh zâwk a, 'Nakina in tã tùr tho a ni' a tih loh leh 'Kan hma lam hun tùr kan hre lo, mihring kan ni a, natna emaw harsatna eng emaw tak pawh tâwk thut thut thei kan ni, kan theih tâwka ni tina hetia kan lo inkhâwl ve bek bekte hi a țha êm êm a ni' a ti țhìn. U Mama hian hmãn deuh kha chuan zial a zu ve țhìn ngei mai a; mahse, tlêm deuh lai ațang khân a nghei ta thut a, ka nu nèn mak kan ti deuh nghe nghe. 'Mi zînga awmin a zahthlâk duh êm mai, kan zûkin an tân harsatna kan siam bâkah zial zu mi zawng, khawi hmunah pawh kan chêp tlat tawh'  a ti a, kuhva rah leh lawngpâr erawh a pai ve reng a, ka tui lo leh ka rim chhe vèn nân tiin a ak ve reng țhìn.

*I HLIM NÎIN RIMAWI HI MAWI TIIN I HLIMPUI ȚHÌN A, I LUNGNGAIH NÎ-AH ERAWH A HLA THU LAM NGAIHVENIN I HRE THIAM ȚHÌN THUNG*