☆KA TÂNA RUAT☆ - 36 By Dingdi Pachuau

☆KA TÂNA RUAT☆- 36 By Dingdi Pachuau

"Fîmkhur ta che maw le! I intina țêp a nih kha," tia pakhat a țawng chhuah chuan ka inher ta vat a, Joel-a hnaih bera țhu ber chuan Joel-a kut chu a lo ensak mêk a, engtizia nge? Thisen ka hmuin ka hre lo va, chhuatah erawh a thil tih tlâk keh ni ngei ni tùr dârthlalang keh them a darh nuai thung. Eng thil nge a tih keh le? 

"Engah nge i bân i vai duai a? Hmuh pawh i hmu lo rêng rêng em maw ni?" Chu pa vêk chuan a ti a," I intina lo hlauh, fîmkhur ve deuh tawh rawh," a ti leh a, kei chuan va pan hnai vatin," Eng thil nge ni? I intina lo tak tak maw?" ka ti a, tray ka la chawi reng avàng chuan Joel-a kut pawh chu ka zu vuan thei lo, ani erawh chuan melh pawh min lo melh lo hrim hrim, a kut chu a en vang vang ringawt a. A bula țhu a țhianpa vêk chuan," Na lo hlauh, a tlaw ve êm a ni," a lo ti leh a, tho chhuakin chhuata glass keh nuai chu a chhar kháwm zui a, chutia a tih tâkah chuan a bula țhu pakhat pawh chu rawn tho ve nghâlin," A che thei lo ber hian min chêttîr ve ziah lehnghâl a, ninawm tak tak!"a rawn ti zui nang nang a, glass keh chhar tuma a kûn chu Joel-a chuan," I chhar a ngai lo ang, i duh chuan i haw vang vang thei! Lo kal kher pawh a ngai tawh lo ang," bung zet hian a lo ti a, ka hre thiam chiah lo deuh a, an thil sawi dàn leh awm dàn vél hre thiam lo ru angreng takin an pahnih chuan ka melh tawn dùn ralh ralh a.

"In ho êm mai, ngawi mai mai teh u. Chhar thuai thuai ang, rah palh a hlauhawm," Glass keh chhartuin a rawn tih chuan kawngkhàr bul bera țhu chuan,"  Che thei lo ber hian țawngkam a la thlahdah ber zui! Nêp sazu êm mai! Caleb, haw ang," a rawn ti ve leh a, room ațanga a chhuak tùr chu Caleb-a ni ngei tùr chuan a ûm zui a, kawng pawh a khãr na țhuai țhuai e.

"A va ho tak aw!! Naupang ang mai, thinchhe leh hlawm lutuk!! In ho thei êm.. mai!" Pakhatin a tih chuan Joel-a chuan," Haw a châk tawh a nih kha," a lo ti bung vut a, a țhiante pahnih an chêt lai pawh chuan kei nu ber chu ka la ding reng a, an che vêl chu ka en kual vêl a nih ber chu. 

*******

Tunah chuan Naom-i pawh a exam a hnai ta takzet. A u a zia ve zêl ta bawk a, ani pawh ka rilruah a awm ve leh thei ta, a pass chhia ang tih ka hlau a, ka țawngțainaah ka hre reng a, a bîk takin ka dìlsak ziah. An sir ka biakin Joel-a chanchin chu ka hrilh a, ani hian Naom-i a hrilh ve leh dáwn a ni. Naom-i erawh ka be thei lo va, biak phal a ni tlat rih lo, naupang rilru phãwklèk an hlau a, chu vàng chuan biak an remti lo a ni.

Joel-a chu a nuin a rawn kan zauh zauh a, khami zàna thil thleng kha ka hre chiang lo va, thil awm dàn dik tak ka hre lo, sawi chhuah a awm ngai si lo nèn, ngaihtuahnain ka riruat kual vêl mai mai. Khami zàn ațang khân Joel-a chu a ngawichawi zual ta khawp mai a, a pain a biak pawhin "Aw" emaw "Aih" emaw ti bâkin a chhâng ngai lo, a țhiante pawh khân an rawn kan ta miah lo. A nu erawh a rawn kal zing hlê a; mahse, ani pawh chuan a be țawng thui thei bîk lo nge ni ang, a fapa room-ah chuan a awm rei ngai lo, in hnuaiah a rawn chhuk a, ka bulah a rawn âng ta țhìn a ni. Min àn khum chhan ber nia lang chu Joel-a chu ka ngaihtuah tâwk lo min ti a, ka chunga a lungawi loh vàng leh hrehawm a tih vàngin țawng pawh a țawng duh lo niin a sawi. A ni ve lah tak a, a lo kal lai hian Joel-a room-ah ka lo awm ngai lo va, ani ngaih chuan ngaihtuah lo chan ka chang ve dáwn êm mai a, a àwm ve tho mai. Mahse, ka ning ve det. Mi dang hmai a zah lo hrim hrim nge, fa pahnih lai nei tawh mah ni se naupang hriata han àn maite hi a sim hlei thei lo a ni ang, nge keimah ka nih vàng chauha min àn khum a ni nge ka hre lo. A lian vak bîk si lo va, min àn khum reng mai leh a duh duh a sawi phiar phiar țhìn hi chu țha ka ti lo khawp a, dik tak chuan ka cho ve chiang si a, a duh duh sawia a han âng chiam chiam țhìn hi chu ka hnê ve thlâwt tawh a ni, inhmuh apianga min àn khum leh min sawisêl reng mai hi; mahse, naupangte (fate) vàngin ka insùm ve hrâm hrâm țhìn a, ka insùm theihna erawhin a tlin lo teuh țhìn khawp mai. U Rintea awm hun laia rawn kal ngam hlei lo, a awm loh veleha rawn lang chhên hi ka ning ngawih ngawih.

Inrinni a ni a, U Rintea leh Nonoi an chhuak lawk a, Sabrina(Joel-a cousin) a rawn lèn avàngin kei chu ka chhuak ve lo. Joel-a ei tùr ka siamsak chu Sabrina-i chuan a han pe a, thuamhnaw ka sûkte chu ka zár chhuak bawk a, khua a țha ar ar bawk a, in chunga ni lum ài pawh chu a nuam viau mai.

U Rintea'n min rawn biain a ute in lama a pèn lawk tùr thu min rawn hrilh a, in chunga ka awm lai a nia, ka chhuk peih lawk lo. Ni lum ài chu nuam ka ti a, hahdamthlâk vawng vawng ka ti bawk nèn, ka țhu deuh reng nghe nghe, heti khawp hian a lo nuam a ni tih ka lo hre ngai miah lo. 

Țawng ring deuh tak ka hriat avàng chuan ka ding chhuak nghâl a, tu tak ni ang maw tiin in hnuaiah chuan ka chhuk a, Pi Mawitei țawng làwng láwng ri chu ka hre zui ta nghâl a, tháwk ka la hawk nghe nghe. Ka ning ve tawh takzet he nu hi, ka tum êm êm pawh ni lovin chhûngril lamah ka țang nghâl țùng mai.

"Hetiang thil tui lo lutuk leh hmin țha lo hi engti tiha ei nge i nih? Kha nu khân ei tùrin a ti che a ni maw? Ngawi tak rawh! A hre khawp ang!" tiin a lo âng tùn tún mai a, eng tak ni maw ka ti rilru a, Joel-a room kawngkhàr a lo inhawn avàng chuan a țawng ri chu a hriat loh theih loh a ni. Ka phei ve nghâl a, min lo hmuh veleh chuan tìmna awm hauh lo hian," Hetiang thil țenghneng leh changkâng lo lutuk, mi retheite ei àwm tâwk lek, hel bawk si hi ka fapa i lo eitîr ngam a maw? I zak em? Nangmah khân ei la, i inhmeh tâwk chiah. A pumte na ta se, engtin nge i tih ang? Nâ se i ti a ni zâwk ang chu, i rilru lah hi a chhe tuiêk sia maw. Ka fapa ei atân lo siamsak tawh hauh suh, i hria maw? In ina in thil ei ang țhing lutuk hi hetah ka fate ei tùr atân rawn chhawm lût suh!" a ti ta hlawih hlawih mai a, suji ka dahna bowl tê chu chhuatah a hnáwl thla nghâl rawp a, hmeichhe țê deuh țhat ri ka hriat chuan Sabrina-i a lo la awm ve reng a ni tih ka hre chhuak chiah. Joel-a'n," Nu..!!" a lo ti țhat a, ani lah chuan," Hetia ka tih châkna hi a rei tawh lutuk! Hetia tih hi a phû, hmâna in têt laia tuition class a pék che u lai ațang daih tawh khân nu ber dinhmun, ka dinhmuna din kha a lo tum daih tawh tih hriat reng!" a ti leh phiar phiar a. A chêt dàn leh a thil sawi chu mak ka ti a, min tihrilhhai deuh hlek bawk nèn, che lovin ka ding ngawi rih tawp a, rei lo tê chu; mahse, rei ka ding ta bîk lo.

"Min àn khum leh min hmusit reng tùr hi chuan lo kal tawh lo teh, Joel-a kan tùr chuan i lo kal thei reng; mahse, min àn khum kher tawh suh, ka hnê ve ngawih ngawih tawh a nia," thinrim tak hian ka ti ve ta a, ka awki erawh ka sàn hran lo, a ngai lêm lo, a hre vek thei tho si a.

"Nang hian min khak ve ngam a maw?!! Eng mihring nge maw i nih reuh le? Zahna i lo nei miah lo takzet a lo nih hi. Ka fapa kan tùr hian tu phalna mah ka lâk a ngai lo va, ka la lo bawk ang. Vai dumka hmêl chhe lutuk tak nèna in fanu, dum tliang hnûm zet nèn khân inawm ula, in inhmeh tâwk chiah! Fanu i nei ngo piak piak bawk a, khawlaia i chhuahpuite hian i zahpui țhìn hian a nia ka rin ni!" a rawn ti ve leh ta kher a, ka fanu chanchin a rawn sawi dàn chuan ka thin a khei ta zak mai.

"Ka fanu zahpuina chhan tùr ka nei hauh lo, ka zahpui ngai hek lo ang. A tân nu ka ni a, ka tân fanu a ni, vawi khat té mah ka la zahpui ngai lo, ka chhuang êm êm zâwk a ni tih i lo hre tawh dâwn nia," ka ti lêt leh ta salh a, ka awki a ring lo ka tih tawh kha, awka ring tak ai chuan hetia awki hniam deuh raiha chhàn lêt hian a thinlung a dek zâwk ang tih ka ring a, ka rin ang ngeiin a thawk ta chiah bawk.

"Mi tenawm leh hur lutuk!!" tih leh min rawn pan a rual a, min rawn ben a tum tih ka hria, ka hlau bîk teuh lo mai! Mi hur ka ni lo va, mi tenawm lah ka ni bîk lo. A ngam ngam ka ngam, tunah tak hi chuan thihchilh dâwn pawh ni ila ka ngam sak! A chanchin țha lo taka a sawi ka fanu tân chuan eng pawh ka ngam a ni tawp mai, chutiangin ka fate dang Naom-i leh Joel-a tân pawh.

Min rawn hnaih viau ta maw tihah tu emaw hian a rawn kuai her sawk a, țê deuh țhatin a tlu țhelh nghe nghe. Joel-a chuan," Nu!! Duh tâwk la, haw mai teh!" a  ti a, a awka chhuak chu a sehchilh deuh nak a, a hmêl ka en vat nghe nghe. Nâ a tuar a ni tih a hriat reng, a insehruh viau nain a țhen deuh sawk sawk a. Khati khawpa ranga a nu bul rawn thleng tùr chuan... a na ngei ang. Engtik lai khân nge a nu bul kha a rawn thlen hman rêng rêng ni?

"Joel..?!!" hlauthãwng ru tak chuan ka ti a, a nu pawh ngaihtuah chang lo chuan ka pan nghâl a, ka vuan hman hrãm a ni. Kan pahnih chuan kan tlu ta nghâl a; mahse, vànneihthlâk lutukin a chhuatphah chhah zet chungah kan tlu hlauh a, kei chu ka insawh na lo, ani pawh a nat loh beisei ang.

"A nâ em? I tlu nâ em?" tiin ka tho vat a, ani chuan," Ka ke.." a lo ti sap a, hlauthãwng tak chuan a ke chu ka en ringawt a. Sabrina-i rawn țhu hnai nghâlin," Joel, eng tin nge i awm? Hawh, din tum chhin teh," a rawn ti ve nghâl a, a awah chuan hlauhthàwnna a lang chhuak chiang viau. Kei pawh ding ve lehin kan pahnih chuan Joel-a chu kan kuah ding a; mahse, a ke pakhat zâwk chu a rap ngam ta miah lo mai, kan tlûkna lamah khân a tinâ ngéi a nih hi.

A khuma kan muttîr lai chuan Pi Mawitei chuan," Nangmah vàng liau liauin ka fapa ke chu a nat phah leh ta a, tlêmin inthiam lohna i nei ve em? Rin aia a lo pawi vaih chuan i châk lo ang," a rawn ti leh chher chher a, ka va ning tak êm!! Joel-ate nu chu ni lo se chuan aw...!! Rilru hah lai laiin!! A thinrim hmêl chu ka thlêk deuh reng a, he nu hi a awmzia hriat thiam har ka ti ta deuh tlat. Eng emaw ruih a nei a ni zâwk lo maw le te ka ti, a țawngkam leh chezia hi a mak, ni dang a ang lo.

"Nu, ka pa lo haw hma ngei hian haw teh phawt!!" Joel-a'n a tih tâkah chuan," Bawiha, nâ chu i nei em? Damdawi inah kan tlãn nghâl mai dâwn em ni ang?" a rawn ti leh ta záwk a, a aw pawh a dam nghál vek, thinrim awka pawh kha a lang tawh lo rêng rêng.

U Rinteate an rawn thlen chuan ani pawh a haw hman tawh a, a fapain haw tùrin a tur nasa êm a, a haw ta chauh niin ka hria. A hmêl țha tak țhìn kha tunah chuan a lo zûr ve ta deuh a, a inenkawl țha viau tho chuan ka ring a; mahse, a upa ve ta tih a lang, chubâkah, zu a in țhìn a nih ka ring, a hmêlah a hriat țan deuh tlat tawh.

Thil thleng kha ka sawi chhuak miah lo a nia; mahse, U Rintea chuan a lo hre tho! Min zâwt a, pehhêl deuh takin ka hrilh ve mai a. Engtin tak hria ni maw? Joel-a'n a hrilh a ni ang ti ila Sabrina-i pawh a ni thei tho a, a tu emaw záwk zâwkin lo hrilh pawh ni se thiam loh ka pe lêm lo.

Joel-a chu doctor-ah kan kalpui leh a; mahse, vànneihthlâk takin a ke lamah eng pawi mah a lo thlen lo hlauh a, a tlûkna lama a mawng a sawh kha a ni deuh mai. Engkimah ka buaipui zak zak lo thei si lo va, eng emaw chânga inbiakte a lo ngai a, ani tân lah ka biakna leh ka zawhnate chhàn loh theih ni țhìn hek lo le, ka be țawng ta zauh zauh mai rêng a, hei hi ka thil tum pakhat a ni. Țûl êm êm ni lovah pawh ka be lui zêl a, min chhâng lo thei bîk si lo, a hnuah phei chuan," Ka ning a nia, min biak țawng i duh vàngin thil țûl vak lo sawiin min be chiam kher suh," a ti ta rêng a, kei pawhin huatah pawh ka chãng lo. Ka nuih a," Aw... khatianga ka tih loh chuan biak țawng i har êm a ni," ka ti a, ka rin loh deuhin a nui vei suk a.

Hetia min tih ațang hian kan inpawh sawtin ka hre tlat pek a! Ka be țawng thei leh min sawisêl ngam kha ka làwm êm a ni. Ei tùr ka siam pawh ka phûr sawt a, ni dang aiin ka lo phûr deuh a ni ang," Hmuh țha i hmu em ni? I phûr thar riau ka ti tûnlai chho vêl hian?" U Rintea pawhin a ti hial rêng a, kei erawh chuan," Chutiang a awm pawh ka hre lo, ka phûr reng țhìn alawm, ni lo'm ni?" ka ti mai a.

Nonoi rawn kal chu," Novi, vawiin chu Ânu hian eng nge kan ei atân a siam ang aw? Au Joel-a tân hian ei tùr tui tâwk tâwk a siam tlut tlut a, keini pafa chuan tlêm bâk kan ei leh thei àwm si lo va tiraw?" tia biain a lo pawm a, ani lah chuan," Âpa, Ânu hian nanau tùr nei tawh se ka ti leh tawh dáwn em?" a lo ti ve thung a. Ka thil tih lai chàwlin an pafa chuan ka melh tawn a, U Rintea chu a lo nui suk suk duh chauh a.

Joel-a nèn kan inkâr a zia deuh ațang leh a nu a rawn lan tâk loh ațang chuan nun hi a nuam zual ka ti a, ka hlim a, ka hmêlah leh cheziaah pawh a lang chhuak lo thei lo. Zàna nupa nun kan hman pawhin ka phûr thei sârh sârh viau, kan pahniha fa ngei pawm a duhzia leh a awhzia ka hre chiang a, chumi tihlawhtling thei tùr chuan ka che sauh sauh țhìn rêng a ni.

"Bawiha'n fel a tih thu che a sawi tak asin!" 

A thil sawi chu ka hre sual emaw ka ti a! A hmêl enin ka inher vat a, a hmêlah leh mitmengah erawh fiamthu hmêl a lang lo. A thil sawi hi tak tak em ni? Engtik laiin nge a lo hrilh ang? Dâwt a sawi lo tak tak maw?

"Engtikah? Eng maw a sawi?" ka ti vat a, ka hre nawn leh duh. Ani chuan min rawn en zawk a, ka lo en kar mai thung.

"Nizàna a room-a ka luh lai khân maw le, in inawm nasa bawk a, a hre chiang zual ta che a, a zêp thei tawh bîk lo a nih dâwn hi ka ti mai a," a ti leh mai a. A thil sawi chu ka la ring ngam lo deuh, fel min tih thu a lo sawi ve maw, a pa bulah hian? Hriat ve ka va châk tak!

A office kal tùr ka thlìr liam lai pawh chuan Joel-a thil sawi nia a sawi hlîr mai chu ka rilruah a awm a, tak tak a nih teh chuan... ka thil tum hi ka hlawhtling chho a ni mai lo'ng maw? Lalpa, thlen diktîr lul rawh aw.

Ka che vêl pawh ka phûr sârh sârh viau mai. Vawiin phei chu Joel-a ei tùr ka siam pawh chu ka uluk zual a, zâi rât râtin phûr takin ka siam a, a thil sawi nia ka hriat tlar khat lek pawhin min tihhlim theihzia leh min tihphùr theihzia hi hria se chuan aw...

Nonoi'n," Ânu, À-u room-ah ka han kal dâwn aw," a rawn tih tâkah chuan ka harh chhuak zawk a, ka hlim êm vàngin ka fanu pawh ka lo hrechang lo lek lek a lo ni.

"Han kal la, ninhlei lo la aw, a thu âwih la?" tiin ka hrilh zui a, Nonoi hi naupang harh tak a ni lo nain a u chu a han tibuai ang tih ka hlau a, ka hrilh ve hrim hrim a ni.

Ei in tùr ka han dah lai chuan a u khumah a lo mu ve zar a, Joel-a chuan phone a lo entîr niin, a lo țawng ve zat zat a, ka lût min lo hmuh veleh," Ânu, ka ninhlei lo, À-uin phone min entîr a," tiin min lo hrilh nghâl a, kei pawh chuan," A țhat hlauh chu! I fel lutuk e. Ninhlei loh tùr a nia, A-u ke kha a la dam țha lo va, i tlawhsak palh hlauh ang e," ka ti ve a.

Awm rei ka tum lo va, in hnuai lamah eng eng emaw tih tùr ka la nei a. Ka chhuah dâwn chuan," Nu, ka lãwm e," ti sap ri ka hriat avàng chuan ka ding leh rih a, "Nu.." a ti! "Ka lãwm e," a ti zui bawk! Ka hre sual lo ang, tuna ka aw hriat kha Joel-a aw ngei a ni.

Nilêngin ka hlim a, ka awm dàn chu ka sawi fiah thiam lo, kan têt laia thil thar kan nei kan hlim lutuk ang deuhah khân ka inngai a; mahse, a inang chuang miah si lo. Inang miah lo mah se rilru a nawm dàn leh rilru a zàn dàn erawh kha chu a inang deuh tlat a ni. Tunah chuan U Rintea thil min hrilh pawh kha ka âwih lutuk tawh tlat! Tuna ka rilru hlimna hi eng thil nèn mah inthleng ka phal lo ang.

Naom-i exam pawh a chanchin kan hre reng a, a zir nasa mah mah a, zàna a meng rei țhìn pawh an sir-in a khap deuh tihte ka hriat phei chuan ka ngaihtuah khawp mai a. A hrisèlnain a tuar ang tih ka hlau, a pa pawhin an sir hnênah chuan Naom-i chu biak a dîl ta ringawt nghe nghe a ni. A ti țha êm êm ang tih chu hre mah ila a hrisèlnain tuarin a taksain a tuar nasa ang tih kan hlau a ni.

Min ngaih thu a rawn sawi kûr nguai a. "Nu, ka ngai tawh lutuk che u, Âpa pawh, Nonoi pawh, À-u pawh. In vaiin ka ngai tawh che u, kan in pawh ka ngai tawh,, kan ina awm zawng zawng pawh kha ka ngai tawh," a rawn ti duah a, ka ei siam ngei mai ei a châk tawh thu leh a rawn haw hunah naute thar tùr chanchin hriat ngei a inbeisei tih thu a sawi chuan kan nui ringawt. He nau tak hi chu, zêp hi a nei si lo va, a duh duh hi a sawi pawp pawp mai zawng a nih hi, min tihlim thei a nia.

Ka nun hlimna tibelhchhah tùrin U Mama'n Chhani lakah palai a tîr ve ta, nupui neih a tum ve ta a nih chu, nuam ka va ti tak! Ka țhiani hi a chhûngte'n an duat a, a duh hi chu neihtîr ngei an phal bawkin ka ring, han innei ngei tawh teh se.

Lalchhani chuan min rawn be ãwt ãwt a," Pasal ka han nei ang a, fa ka neih khalh dáwn che," nui uar uar chung hian a rawn ti a," I chhe mai a nih chu! I nute ka bia ang, lo remti lo tùrin," ka han ti ve zat a. Ani lah chuan la nui reng pah chuan," Han ti chiah la, i u a buai viau a ni mai, ka ru chhuak mai dâwn a," a rawn ti leh ham ham mai, ani hi zawng han chhàn dan theih hi a ni hlawl lo, a zak lo thiam bawk si.

Naom-i exam zawh nî-ah kan inah a pual liau liauin chawhlui kan buatsaih a, chawhmeh chi hrang hrang kan siam a, pa ber phûr lutuk chuan a talent a rawn phawrh bawk a, a nuam dangdai viau. Bawngsa a siam a, a siam dàn tak ka hre lo nain a rim han tui êm êm dàn ațang chuan a tui dâwn tih a hriat mai! Kei takngial pawhin ka ei châk thei a nia! A rimin min koh êm avàng chuan a siamna bulah chuan ka tei ka tei a, rawn kal apiang lah chuan," A va rim tui! Ka ril a ti țâm," an ti zêl a, a tui dâwn chiang alawm, bàwlhlo rêng a telh chikim êm mai.

Chaw ei dâwnah ka nuin hun tãwi tê hmangin, hun hlànin a țawngțai a, pa berin Video-in a lo la char char bawk a, Naom-i lah chuan nuam a ti nasa. Amah vànga chawhlui buatsaih kan ni bawk a, a changtunun ber a ni. Nula ve ûr tawh mah se, a rilru a la naupangchhia a, chaw ei kham lama 'kan zavaia làm vek' a duh thu a sawi mauh pek a, a pa chuan," I u a kè a la na sia, kei  chuan in lâm lai ka lo cover char char ang che u," a ti a, ani erawh chuan," Aih, À-u chu ka ngaidam mai ang a, nang chu Ânu nèn in làm dun ngèi a ngai ang, làm loh chu a theih loh," a lo ti thung a.

"Làm ka thiam si lo va," ka lo tih chuan," Ka zirtîr ang che u, Nonoi pawh a lâm dâwn alawm, exam kan zo tawh bawk a, làm ka zirtîr char char thei tawh ang," a lo ti awlsam leh thĕn a, hnial dàn tùr a vâng ta riau.

Chawhmeh a tui bawk a, ka va puar mai mai tak! Pa ber sa siam chu tui kan ti tlâng a ni, a bãng pawh a tlêm viau mai. Naom-i lah chuan," Kumina ka puar ber țum a la ni," a ti deuh reng a, a pum chu a chûl a chûl mai bawk a, mi dang pawhin an lo sawi ve sap sap a, kan puar tlâng niin a lang.

A hnu lama kan boruak chu a hot tak a ni. Kan hlim a, kan nui nasa a, Joel-a tih loh chu kan lâm vek, Nonoi leh Naom-i'n nuam an ti fâl a, an lâm reng mai a ni, hah pawh an hah ve lo niin a lang.

*******

"Nu, Nonoi hi Àpi hnênah riah a tum tlat a nia," tia Naom-i'n min rawn biak chuan," Riak lo mai se, zaninah damdawi ei tùr a neih kha, ka lo be dâwn em ni ang?" ka ti a, ani chuan," Aw, be rawh, ka thu chu a âwih duh tlat lo," a rawn ti leh a, phone chu a nau a pe nghâl a ni ang," Àpiin min ngai sia," Nonoi chuan a rawn ti nghâl a. 

A nau tùr ka pai mêk a, ka hring țêp tawh nghe nghe. Hei vàng hian tlêmin a inla hrang deuh a, ka nei thuai tawh dâwn tih hriain a lãwm viau tho nain kan duat thei tawh dâwn lovin a hre deuh nge, a pi a lam ta deuh reng a. School a kal bàn hian a u hian a va hruai zauh zauh a, a pi lah hian a lo duat țhìn si. Ka dul a lo puar ve nasa tawh nèn, a pi hnên lam hi a àwn ta tlat a ni.

"Bawihte, chaw ei kham veleh damdawi i ei a ngai a," ka han ti a, ani chuan," Ânu, min rawn pe mai la?" a rawn ti reuh a, rawn haw a tum loh hmèl êm avàng chuan," Aw le, Âpain a rawn pe dâwn che nia aw. Àpi a khawhar i hlau a ni maw? Keimahni pawh kan khua a har ve dâwn tho asin,  lo haw mai la? Min khawngaih lo em ni?" ka ti leh a.

"Àpi a khawhar zâwk ang. Nang chu Âpa nèn in awm a, À-u pawh, À-u pawh," a rawn ti leh zat zat a, ka thlêmthlu zo dâwn lo tih ka hre chiang ta hlê mai, chuvàng chuan," Aw le, aw le, i riak dâwn nia. Damdawi pawh Âpain lo dah phei se la tiraw? Àpi khawhar chu i lo hnèm leh poh a niang chu, i fel hnûp hnûp bawk sia," ka ti a, ani pawh chuan," Aw... Àpi chuan min duat a, chaw pawh min hlùm țhìn a," a rawn teh daih a.

U Mamate nupa phai lamah inentîrin an kal a, ka nu chauh a awm a, kan in lama lo phei ve tùra kan sàwm lahin a duh bîk si lo va, Nonoi hian a awmpui ta deuh ber rih a ni. U Mamate nupa lahin an duat nasa mai si a, fa an pai nghâl bîk lo nèn, an naute neihchhun angah an ngai a, Nonoi pawh hian an rawn lèn ve châng pawh hian a zui haw leh daih țhìn a ni.

*******

Nau nei tùra damdawi ina ka luh zànah Chhani'n min awmpui a, ka inzo lo êm mai a, U Rintea pawhin min ngaihtuah hlê tih ka hria; mahse, eng êm ka ti bík lo tùrah ka ngai a, Pathian zârah tluang taka ka neih theih ngei ka beisri. Ka vawi khatna a nih avàng erawh chuan ka hlauthãwng ve deuh hlek a, a nat dàn tùr la hre thiam rih lo mah ila a na lutukkkk ang tih erawh ka ring tho.

Nonoi leh Naom-i'n min rawn bia a, an lunglèn thu leh min ngaih thu an rawn sawi leh nghâl a, an over hret maithei; mahse, kei pawh ka lung a lêng ve deuh tho nia!! Damdawi in hi ka ngaina lo va, Pathian zârah ka dam țha ve țhìn bawk nèn, ka lût khât ve êm a ni.

Dâr 10 pelh hnuah Naom-i phone call bawk a rawn kal leh a, Nonoi a muhìl thei lo a nih ringin ka han chhâng a; mahse, ka rin loh lam daihin a nu chêtsual thu min rawn hrilh ta thung a, a hriat ang ang chuan min hrilh ve a, a rilru a hrehawmin a aw chhuak chu a mangan hmèl reuh sia, ka khawngaih reuh tak tak! A u Joel-a pawh a nu awmna lamah a kal a ni àwm e.

A hnuah chuan Pathian thil rèl dàn ka ngaihtuah chho a, ka hun hman chhoh dànte ngaihtuah kai zêlin ka tún hun thlengin. Min hruaina zawng zawngah hian vui thei ka nih lohzia ka hria a, a malsàwmna ka dawn nasatziate ka ngaihtuah chhuak zêl a. Pasal țha tak leh hrin loh fa țha tak tak min pe a, min duat a, min angaih a, kei pawhin ka hmangaih êm êm vek a ni. Tuna ka fa lo piang tùr pawh hi anni aia ka hmangaih chuan bîk ka ring chuang lo, han hmangaih leh chuan dàn tùr ka hre thiam lo a ni.

Pi Mawitei pawh ka khawngaih phâk ni lo mah se a nun hman chhoh dàn ka ngaihtuah a, ka khawngaih ru tho. Hmangaih taka enkawltu a pasal fanaute hnâwlin tlangvâl dang a thlang a,  a nun kawng a chîrî chho a, a dai pelh chho zêl a, tuna a chêtsual dàn lah ruih vàng an la ti zui a, phal loh damdawi a phur chu an ûm zui a, a chêtsual zui phah ta a ni si. Aw, mihring hian kan hma lam hun hi kan va hre lo tehlul êm! Dìm tak, fîmkhur taka kan kal hi a ngai rêng asin, hma lamah eng boruakin nge min lo hmuak dâwn tih kan hre si lo. Kei chu ka la vànnei zêl rih a, ka nu min enkawlna leh min țawngțaisakna rah ka ti lo thei lo, Pathianah a innghat tlat a, Pathiana innghat tlatte nun kawng hi chu tluang purh lo mah se a dik țhìn a, a tàwpah Pathian hian malsàwmna a vûr nge nge țhìn a lo ni.

*A TÀWP TA*