☆MIN EN LA☆ - 28 By Dingdi Pachuau

☆MIN EN LA☆ - 28 By Dingdi Pachuau

 Eng mah sawi tawh lo chuan kan infâwp mawlh mawlh reng a, a lothlàwna kan hun khawhral tâk zawng zawng ai kha hnawh khah kan tum a ni ang ka ti mai, min tih dàn ang ang chuan ka awm a, ka hnial rêng rêng lo. Hnial ahnêkin phûr takin ka lo chhâng lêt ve zêl a, duhthawh viau e ti lo chuan min fâwp bawrh bawrh chuang bawk si lo va, min fawh dàn tâwk a thiam ka ti mai. 

 "Palai hi lo tirh țhat leh mai ka duh!" 

 Ka nui sak a, a rilru tùr àwm chu ka hre thiam ve deuh hlek tlat. Palai a rawn tirh hma kha chuan kan induh tawn a ni tih kha kan inhre tawn chiah lo a, kei phei chuan min duh ka ring lo, ka taksa erawh chu a duh kha ka ring tho a, keimah tak hi chu min duh ka ring pha lo. 

 "Awmzia a awm chuang lo ang, kan nghah mai a ngai a ni, ka nu hian a ti mai mai ngai lo a nia," ka ti sap a, kei hian a nia rei chu ti dâwn ni, kan awmna a inang tawh lo lehnghâl a; mahse, kum khat mai mai chu ka nghâk thei ang, ka duh êm êm tawh avàngin rei lo tê ang chauha ngaih ka tum ang, kum khat hnuah chuan kan awm dùn thei reng tawh dâwn asin. Ani hi chu mipa niin a lung pawh a lêng ve tak tak lo ang, bâkah, a lunglèn hnèm turin a bulah hmeichhia a nei bawk a, hei hi chu nakinah ka la zâwt ang, tunah tak hi chuan kan boruak nuam tak hi thil dangin a pawlh buai ka hlau.

 Rei ve tâwk tak car chhûnga kan induhna kan lantîr hnu chuan inah kan chhuk a, upa ve tawh viau e ti lo chuan ka nu hmuh chu a hreh deuh tlat pek a! Mahse, ka sâwm lui tlat a, haw leh nghâl mai tùr chuan khua a vâwt si a, bâkah, kan induh thar ve chauh a, a haw nghâl mai kha ka phal bîk lo, chuan, ka khawngaih bawk a. 

 Ka nuin a lo hmuh chuan pângngai takin a lo be ve mai a, a zah a hlau ve pawh a ni mahna! Zotei pawhin nui sângin a lo bia a, Mâma erawh chuan be lêm lovin a lo en zauh thung. Zoteite unau hnih pawh hi kârleh lamah chuan Lungleia an phei ngei ngei a ngai tawh a, Mâma phei hi chu a phei thuai a ngai zual, hetia a rawn kal tâk rau rauah chuan naktûk lamah a rual hian phei dùn ve nghâl daih se a țha ngawt tak ang, remchànna zawn ve zêl a ngai. 

 Khum ken kan tumin a duh tlat lo va, țhutthlèngsei lah chu a tân chuan a sei lo bawk si nèn, chhuatah a mutna tùr ka phahsak ta ngawt a, a vâwt viau maithei a ni, sin tùr erawh chu ka dah chhuahsak țeuh thung a, vâwt a tih ka hlauhpui vàng a nia. Ani lah chuan," Sin tùr kha a tam mah mah a nih kha," a lo ti sup a, kei chuan," Vâwt i tih ka hlau alawm, lei chhuat a ni bawk sia," ka lo ti thung a. Ka nu pawh chuan," Ni e, a vâwt ang, dah chhuah țeuh kha a sualna a awm lo, sin tùr na nâ nâ chu kan nei ve alawm," a lo ti ve a. 

 Men fàlpui rei chi a ni si lo va, la ui ru tak chung chuan chhûngte mut rualin ka mu ve a, phone-ah erawh kan in-text chhunzawm a. Vâwt a ti ang tih ka hlau ber, a inah nuam takin a mu thei si a, hrehawm a ti viau ang chu. 

 *Vâwt i tih loh hrâm ka beisei, sin thuah țeuh mai la, a vâwt lo mai ang* tiin ka text a, min rawn chhâng vat a, *Vâwt ka ti maithei, ka lo ti ta a nih chuan i bulah ka rawn mu mai ang* tiin. Text mai mai mah ni se zah avàngin ka hmai a sa ham ham thei hial mai.  

*I ti lo tùrah ngai ang, naktûkah chuan chaw ei khamah haw la tiraw?* tiin thil dang chu ka sawipui ta daih a, ani lah chuan *Haw pawh ka lo tum tawh hleinem, bákah, awm hlen ve nghâl tùra min sàwm ka lo ring zâwk a*  a lo ti thung a, min fiam zah hi a tum ve hrim hrim a ni ngei ang.

 *Chaw ei khamah haw chauh ang che, ka eirawng bàwl i ei leh thei dâwn tihna a ni dáwn a, i lãwm em?* 

 Meng love pawp sticker 5 lai a rawn thawn a,  chumi pah chuan *Mother-in-law-i hnênah inhriat chian lehzual nân ka hnêna awm leh tùrin ka dîl dâwn che, kar dàn tùr țha deuh ka hria*  a rawn ti leh a, kar dàn tùr nia a sawi chu hre châk viau mah ila ka zâwt duh bîk lo va. 

 Zàn rei tak thleng kan in-text a, thu pângngai tak erawh kan inthawn lo dùn khawp a, a hnuah phei chuan *Muhìl tawh rawh, a tlai tawh*  ka ti ta ringawt a, ani lah chuan *Ka piah lawkah i mu reng tih hre kura muthilh tum chu har ve tak a ni, ka kuah phâk reng che tih hre mah ila ka kuah thei si lo che a, hei vàng tak hian châk viau mah ila riah ka hreh deuh rùn a ni*  a rawn ti duah a. 

 A tûkah chuan ka tho hma ve viau a; mahse, ka nu chu zíng țawngțai inkhâwm tùrin a lo chhuak leh daih tawh a, Jakob-a pawh a lo la tho lo nain a harh tawh tih ka hria, a in chu ni se chuan tlãn tùrin a chhuak daih tawh àwm si a, mut chu a ning ve ngawtin ka ring.  

"Morning!" 

 "Morning, i mu țha thei meuh nange? A vâwt em?" tia ka zawh chuan," Vawt lo ve, mut erawh ka mu țha vak lo," ţhen deuh sak hian a lo ti a, min rawn en pah reng bawk a, a thil sawi dàn chu a awmzia ka hre reng si a, ka sawi chhunzawm duh lo va, bâkah, ka naute an rawn harh palh ang a, kan thil sawi an rawn hre palh ang.

 A rawn tho ve thuai a, a inphih fai hnu chuan naute an la rawn tho lo bawk a, ka nu lah a la rawn haw lo bawk nèn, ka bulah rawn kalin hnung lam ațangin min rawn kuah a, tui lum a in tùra ka thlitsak chu ka kawh hmuh a. Ani erawh chuan ka biang fawh zauh pah chuan," Hetiang hian i bulah zîng tin tho thei ila ka ti tawh kher mai!" a ti sup a, kal sawn mai duh lo chuan min kuah hlè hlé a, ka beng bul maiah a țawng bawk si a, ka za chiai chiai maiin ka hria. Chutianga awm chu nuam ka ti a, a thil sawi lah chuan min tihlim ru veng veng a; mahse, ka chhûngten min rawn hmuh erawh ka hlau hle thung. 

 Țawng rin ngam ni hek lo," Tui lum hi in rawh," ka ti a, ani erawh chuan min thlah mai chu a la tum loh hmèl khawp a, min kuah ngheh sauh pah chuan," Nizàna ka kuah theih loh ai che," zàwi sup hian a ti a, a kut pawh chu a fet țan ta lek lek mai, țawng chhuah rin ngam ni si lo, a kut chu ka dansak a, phelhsak erawh ka tum bík lo, mi hriatpui hauh lo chuan kan kut chu a insual deuh bat bat a, bengchhen ngam ni tawh bawk si lo, a buaithlâk a nia. 

 Pâwn lamah thãwm rawn awmin step-a rawn kal thla ri a rawn awm ta a, ka nu a nih ngei ka ring, țawng ring ngam lo chuan," Ka nu a rawn haw a nia," ka ti sap a, ani pawh chuan a hre ve chiang, min thlah hma chuan a full-in ka hmuiah a rawn fâwp leh phawt a, min thlah fel chiah tihah chuan kawngkhàr a rawn ri nghâl zat a, min rawn hmu hman teuh mai mai asin! 

 "Jakob-a chu, i va tho hma ve! I mu țha thei meuh nange?" a rawn hmuh chuan a rawn ti nghâl a, ani chuan," Mu thei e, ka mu thei mah mah zâwk a ni, thawh ka hai țêp zâwk a," tiin a lo chhâng ve duah a, ka nu hnêna a thil sawi leh ka hnêna a sawi dàn chu a inang lo lutuk a, ka nuih a tiza ru khawp mai. Ka nu awm ve tâk hnuah chuan ka bulah a awm ta hauh lo, ka bul hnaiah pawh a awm tawh lo, ka naute an rawn tho a, nizàn lama ka lo suangtuah ang deuh khân Jakob-a chuan Mâmate chu a ruala Lungleia phei ve nghâl tùrin a sâwm ta hlauh a, ka nu chuan," A țha hlauh tak ang a! A remchâng dâwn lutuk tlat, i tân pawh a khawharthlâk lo deuh ang a," a lo ti vat a. Zotei chuan," Nu hi, nula dang phurh phei tùr pawh a lo hual lâwk maithei asin," nui chung hian a lo ti zauh a, ani chuan," Ka lo hual lâwk che a, ka sâwm che u," dang duh hauh lo hian a lo ti a, kan lo nui hak a, amah Zotei ber chu a lài ta zâwk daih a. 

 A ina chawhmeh tui tui ang kha hetah chuan siam ve tùr kan nei lo va, ka chawhmeh siamho erawh ka theihtâwpin ka uluk a, tui a tih ngei tùrin ka țang bawk. Kan han ei chuan," A tui hlê mai, i ei siam ka ei lohna a lo rei ta viau bawk a nih hi," a ti ta sup rëng a, min rawn en pah bawk a, ka lo nuih deuh sak nain tlêmin nuam tih loh deuhna, mahni inthiam lohna erawh ka nei deuh, ka ei siam tui a tih theih ţhinzia ka ngaihtuah chhuak bawk.

 Chaw ei khamah muangchângin thingpui hâng a in leh tê tê a, Mâmate pawh an insiam peih at tawh a, ka nuin chawhmeh tur thil rêp a fùnsak leh nual a, Jakob-a chu pêk ve a han tum a, ani erawh chuan," A ngai lo, Jivan-a'n a siam ve thiam chuang lo ang," a lo ti tlat a, kei pawh chuan lo hnialpui vein," Nu, khatiang kha chu a ei ve ngai lo," ka lo ti vat a, a pe lui ta bîk lo. 

 An thlen chin chu Zotei'n min rawn hrilh zêl a, hna ka thawk lo. Kan mutbu țhen țhen ka su a, a țhen ni sâah ka pho bawk a, nizàn lama Jakob-a sin pawh chu phoin ka han hnìm chhin a, a rim pawh a la nam hialin ka hria, ka ngai nghâl veng veng thei hial! Ka ngai rei dâwn mang tak e, kum khat zet kan nghah a la ngai si a. 

 An kal tùr kawnga kan han thlah kha min lo hmu an awm lehpek niin, min lo hmu mah se pawi pawh ka ti chuang lo a; mahse, min lo sawi zui leh pek niin; mahse, chu pawh chu engah mah ka ngai peih tawh lo, an duh duhin min lo sawi ve mai mai teh se, tunah zawng ka rilru a hlim tawh a, engah mah ka ngai peih tawh lo, ka hlimna dãltu atân ka hmang duh teuh lo mai. 

 Tunah zawng thil a danglam zo ta. A hun ãwl neih apiangin min rawn be ãwl lo va, text erawh a țûl tàwpah a nih loh chuan min rawn thawn ngai lo. Kei chuan inbiak ai chuan in-text hi nuam ka tiin țawngkam pawh ka thiam zâwkin sawi tùr pawh ka hre deuh zâwk ka ti a, ka huaisen zâwk bawkin ka hria a, țawngkaa ka sawi chhuah ngam loh deuh pawh hi ka text-ah hi chuan ka telh zauh zauh bawk. Ngai viau mah ila tunah chuan ka hlim tawh a, va be hmasatu nih erawh ka la hreh tlat pek a, min rawn biak har deuh châng phei hi chuan ka phone hi ka tuai rauh rauh țhìn, a online leh online lohte hi ka check ru dâwk dâwk țhìn.

 Zan khat chu Mami'n min rawn bia a," Nang nu hi hi, ka va ngei tak che! I rilru a hrehawm ve lo em ni?!! A hrehawm ngei ang. Engah nge min hrilh ve loh?!! Țhian kan ni emaw ka lo ti char char a! Hetiang thu lian tham hi chu ka lakah i zêp duh pawh ka lo ring hleinem! " tiin a rawn vui nghâl nang nang a, a unaua nèn kan chanchin a hre chhuak ta a ni ngei mai tiin inthiam lo ru tak chung chuan," Nia... ka thiam loh a ni, ka hrilh ngam chiah lo che a ti ila nuam ka ti chiah lo a ti zâwk ang, min ngaidam hrâm mai teh," ka ti a, ani chuan," A pawi ka tihpui viau na chein i tãna țha tùr zâwk a ni ngei ang. Chuan, lungngai miah suh aw, mipa zawng an tam êm mai," a rawn ti leh a, a thil sawi chu ka hre thiam lo țan ta deuh. Eng nge a thil rawn sawi hi a awmzia?!! 

 "I thil sawi awmzia hi--" ka tih lai chuan," Aw, ka hre thiam lutuk che, kei pawh ka nih ve tho kha, a la țantir deuh bawk a, min hrilh ve lo kha ka han dem dâwn dâwn che a; mahse, ka ti ve mai mai a nih kha aw, rilru hrehawm phah nân hmang miah suh, theihnghilh tum daih rawh," a rawn ti leh a, ka bo telh telh mai! Eng thil nge a hriat hi ni ang?!! A mak êm asin!

 "Eng thil nge i sawi hi ka hre thiam miah lo a nia!" ka ti ta nge nge a, ani chuan," I sawi hreh ang tih chu ka hre ve tho a; mahse, țhian țha kan nia, kan inkârah chuan sawi hrehawm awm lo tùrah ka ngai, sawi hmiah rawh, i rilru a hrehawm ngei ang tih pawh ka hria; mahse, ka sawi tawh kha, mipa hi chu an tam lutuk!"a rawn ti leh barh barh a, a thil sawi chu ka hre thiam lovin ka bo telh telh mai ka ti. 

 "Min hrilh chiang teh, ka hre thiam lo tak tak!" ka ti leh a, a thil sawi hian a unaua nèna kan chanchin lam chu a hawi hauh si lo va, keiin a hre chhuak ta emaw ka ti ve thung kha a nia, a lo ni miah lo tih chu ka hre thiam ve tawh.

 "Englo, Nunhlimate kha, i hriat reng kha," a rawn tih leh chuan," Eng nge Nunhlima chu? Engtin nge a awm?!" tiin ka zâwt nghâl vat a, a chanchin chu sawi loh, a hming takngial pawh ka lo ngaihtuah chhuak ngai tawh mang lo tih chu ka hre chhuak thar chiah a! Zahthlâk zâwk hian. 

 "I hre lo tak tak maw?!! Engtin nge i hriat loh chu keiin ka lo hriat si a!!" a ti phawt a, chutah," A bialnu hluiin a luhkhung an tia, Aizawla awmin ka lo hre daih mai a nia, nang a bialnu zâwkin i hre lo thei chu a mak ka ti hle mai! Tak tak chu a ni bawk si a," a rawn ti leh a, a thil sawi chu kei pawhin mak ka ti ngang mai, bialnu hlui a lo nei maw?!! A bialnu chu ka la ni chiah lo nain ka inpeih hun min nghah a tum thu chu a sawi a nih kha. 

 "I sawi a, ka hre ve chiah! Tak tak a ni em? Engtik khân nge a bialnu chuan a luhkhung a?" tiin ka zâwt lêt hé háw a, ka rilru a nat pawh ka hre lo; mahse, mak ka ti a, a tak a nih chuan thil hi a lo mak thei hlê a ni ngei ang. 

 "Zanin hi a zàn ngana chiah a ni, i hre lo tak tak maw?!! I rilru a nâ em?" a rawn ti leh chuan," I sawi a, ka hre ve chiah! Mak ka ti hlê mai! A bialnu ka ni lo va, engah nge ka rilru a nat ngawt ang? Chu zawng ai chuan mak ka ti a ni, bialnu hlui a nei tih ka lo hre miah lo va," ka ti ve leh a. "In ni lo maw?!!" "Ni nâng aw... ka bulah chuan min duh thu a sawi ngei a; mahse, ngaihzâwng nei thei ka la nih loh thuin ka chhâng a," ka tih chuan," A nih tak chu, in ni reng emaw ka lo ti char char asin. An chanchin ka hriat theihna chhan pawh Fifii min hrilh a nia, kan dàwr piah chiaha building neitute fanu Fifii kha, kha mi cousin kha a nia Nunhlima bialnu hlui chu, an inah pawh a rawn riak ve fo ni àwm a ni, kan dàwrah pawh a rawn kalpui tawh nghe nghe," a rawn ti ve leh a, han âwih lo dâwn ila a sawi chiang angreng si a, âwih loh ngawt theih pawh a ni lo. 

 "A hmêl țha em?" tia ka zawh chuan," A chhe hran lo, zeihawi chi kha a ni ve a, phaiah pawh a zu awm ve reng țhìn nghe nghe a ni àwm e. Nunhlima kha a zàwiawi ve hmèl sia, an inhmeh àwm lo mang e te ka lo ti mai mai a, ka lo suangtuah thui tiraw?" tiin a rawn nui a, ka nui ve ringawt bawk a. A mak ka ti lo thei lo. Lehlamah chuan ka thaw a veng deuh huai bawk, a chhan chu min nghah theih tùr thu kha a sawi sia, tunah lah heti hi ka ni ta si a, hmuh leh hunah sawi tùr a vâng dâwn êm mai a, hetia a bialnu hluiin a luhkhung ta rau rau a nih chuan ka fihlîm ta lel a ni mai, inthiam lohna leh rilru nawm lohna ka nei dâwn lo tihna a ni mai a, a țha daih zâwk ti mai ang. 

A tükah min rawn phone leh a," Nizàn khân eng nge min hrilh loh i neih? 'Ka thiam loh a ni, ka hrilh ngam lo che a' tih i sawi kha eng thil nge? Min hrilh miah lo a nia, ka mut hmunah ka ngaihtuah chhuak a," a rawn ti ta pek a nih chu! Nizàn lam khân kei pawhin ka ngaihtuah zui reng kha a nia, min zâwt zui lo kha ka lo lãwm ru viau a nih kha, hrilh nge nge chu a ngai dâwn a nih awm hi, ka hreh ve asin, ka hrilh lo rei sia, min ngei dâwn tih ka hria. Nizàn lawkah min khawngaih a, nakin lawkah min ngei leh dâwn si. 

 "Ama'n a hrilh lo che em ni?" ka ti teh ngawt a, ani lah chuan," Tuin maw?!!" a lo ti hû a, hrilh chu ka hreh khawp mai," Englo a nia, ih... " ka ti phawt a, chutah thih leh thih tiin," I unaua nèn khân kan induh a... min hau miah suh, hrilh loh che ka tum pawh a ni lo," ka han ti dêk dêk a, a thin a rim dâwn chiang sa si a, min rawn àn khum ringin ka phone chu ka beng ațangin ka dah hla deuh nghâl a. 

 "Eng maw?!!!" "Ka sawi i hriat reng kha," ka ti ve thung a, ani chuan," Jalianchhûnga maw i sawi!! Engtin nge... in induh maw!! Lalpa leh!! Min hrilh miah lo a nia..!!" a rawn ti ta chiah a, kei chuan," Hrilh che ka tum reng a; mahse, ka sawi hreh deuh a, min hauh ka hlau pah deuh bawk a," ka ti leh dêk dêk a, ka inhûm ruh pah a. A duh leh min hau mai teh se, a na lo êm mai, kan awmna lah a inhlat a, min rawn bêng phâk dâwn lo chiang tih lah ka hre chiang nasa. 

 "Aw Lalpa! Eng thu nge ka hriat tâk hi! J-a, mi luhlulpa nèn khân in induh tak tak maw! Âwih harsa ka va ti tak! Engtin nge, engtik ațangin nge, engkim min hrilh nghâl vek teh, ka hre chiang duh!" ka rin loh deuh chuan a rawn ti chùl a, chutah," A mak e! A bul rêt ațangin min hrilh vek rawh, min lo bum reng manah min hrilh vek a ngai ang," a rawn tih chhunzawm leh a. 

 Ka sawi laklawh laite chuan," A mak e!" a rawn ti leh țhìn a, ni e, mak chu a ti ve khawp ang. Kei pawhin mak ka la ti ve deuh tho, ani ang hi ka duh phâk ka rin loh bâkah min duh ve hi ka ring phâk lo hrim hrim, tunah pawh hian mumang lam a ang ka ti hial asin, he khawvêlah hian thil mak tak tak hi a thleng fo a, kan chunga thil thleng pawh hi chûng thil mak zîngah chuan a tel ve thei hialin ka ring!

 "Chuan, palai a rawn tîr bawk a; mahse, ka nuin min duh tak tak a nih chuan amah belhchian nân kum khat min nghâk tùrin a ti a, palai a rawn tirh hnuah chauh alawm kei pawhin kan induh tawn tih ka hriat chian tâk chauh ni, a hma pawh khân ka duh tawh reng a; mahse, ka tilang ngam lo, bialnu a nei ni khân ka hria a, min duh ve lah ka ring phâk lo hrim hrim bawk a," ka ti leh sar sar a, ani chu a lo khêk rãih a. "Awii, a mak ka la ti tàwp thei lo! A mak a ni tawp mai! Ka lawmpui hlë che u ni teh se, a bîkin unaua chu ka lawmpui zual, ka rin loh lam thil daih a nia, ka hlim viau rualin in mak hi ka ti lo thei lo! Ka lungphû pawh a dik lo nuai tawh maiin ka hria!" a rawn ti nawk nawk a, a thinrim ka rin tehlul nèn, min lawmpui thu a sawi daih a nia! Chutiang thu chu min hrilh ka beisei phák hauh lo asin, ka țhiannu nge nge hi chu aw... 

 Chhùnah chhùn chawlh laiin Jakob-a chuan min rawn bia a," Tunah tak hian ngaih mêk i ni a, suangtuah mêk i ni bawk aw," a rawn ti sup a, kei pawh chuan," Ka ngai ve tho che aw," ka ti lêt ve a, ka beng bul maia a aw hniam deuh ruih mai, mipa aw dik tak ka han hre leh hian ka ngaih a tizual, ka mitthlà chhin a, thuamhnaw dum vekin a inthuam leh ngeiin ka ring a, a dawhkàn lian angreng tak kha amah chauhin a kîl ngei ang le. 

"Chokaa ka luh apiangin hmuh che inringin i chêttlatna lai vêl kha ka en ziah a, i awm dâwn lo tih hre reng mah ila office ațanga ka haw veleh ka lût ziah a, zîng ka thawh lahin ka lût ziah bawk a, ka ngai viau che a ni ngei ang," a rawn ti leh dût dût a, ka mitthlain ka hmu leh rauh rauh mai. A sawi ang tak hian min ngai ve tak tak se ka ti, ka ring deuh tho bawk, kei pawhin ka ngai alawm, ka sawi chhuak chhên lo mai a ni, sawi sawi mah ila awmzia a awm dâwn chuang si lo va. 

 "Rei viau dâwn mah se kum khat chu ka nghâk thei alawm, chumi hnuah erawh chuan ka kiangah i awm reng tawh ang a, ka hlatah i awm tawh hauh lo ang," a rawn ti leh sup sup a, chu hun chu thleng tawh se tiin ka nghâkhlel tawh tak zet a ni, ințhen a ngai tawh lo ang, chumi hunah chuan a nupui ka ni tawh ang a, ani pawh ka pasal a ni tawh bawk ang a, mitmei vèn pawh a ngai tawh lo ang, duh tâwkin kan induhna pawh kan lan chhuahtîr thei tawh ngei ang.

 Mami hnêna kan chanchin ka hrilh thute chu ka hrilh ve a, ani chuan," A va tawrhhlelhawm dâwn êm!! Zàn lamah min rawn chhuahchhàl mawlh mawlh dâwn tihna a ni tak si a, Carolene-i hi zawng, min ngam si a, a duh duh a rawn sawi leh ringawt mai ang," a ti a, Mami a sawi dàn chu a nih duh hmèl bawk sia, ka nuih a tiza angreng khawp mai. 

 Kan khuaah chuan min sawi duh viau tih hre mah ila inkhâwm ka țhulh ngai lo va, min sawina vàng mai maia chauh chhiat ka tum hauh lo, khawlaiah erawh ka tam lo khawp mai a, țhian kawm leh chhûngte ina lèn ai chuan ina awm melh melh emaw rama hna thawh daih emaw ka duh zâwk, mi min sawina hi ka hre peih lo va, mi chanchin sawi pawh ka peih chuang lo. 

Vànneihthlâk takin ka ti dâwn nge ni, Zuii a rawn haw hlauh mai a, a rawn rai puar haw nghe nghe a ni àwm e. Mi min sawina chu a tàwp hmak kher lo maithei; mahse, Zuii chanchin sawi lam chu an tui leh ta zâwk a ni ngei ang chu, an sawi leh huai huai mai a, a fa pa lah chu puh tùr ber a hre si lo va, ka chanchin sawi chhuak peih pawh an awm leh tawh lo a niang, ka hre tawh rih lo, kawng lehlamah chuan Zuii chu a khawngaihthlâk reuh ka ti, a vànduai ka ti a, kan khuaa mite lah hian sualna, dai pelh leh chet chhiatna nei ve ngai miah lo ang mai hian mi chêt sualna hi an sawi duh si a, an rêl phâr lo chauh tak tak a ni. Nuho phei hi chuan chaw tui berah an nei ka ti mai, inkháwm bàn hian an țhu khâwm lët lêt a, min melh relh relh a, rilru nuam lo rawihin min siam ka ti mai, a zahthlâk duh viau. 

******* 

 "Jalianchhûnga chu ka va àn khum hrep kha!" 

 "Jalianchhûnga ti ve ziah tawh lo teh, a mawi lo si, a khawngaihthlâk, khatiang khân sawi tawh miah suh," ka lo ti vat a, a ko nawmnah lutuk chu ka lo khawngaih a ni. 

"Hmmm...vël a che aw, i'n țan nghâl êm êm a nia, a thu hnuaiah i va kûn dâwn chiang tak!" tiin Mami chu a rawn phun nang nang a, kei chuan," Hming mawi tak a nei reng a, a hming pângngai chuan ko ve mai la," ka ti leh a, a rawn nui uar uar a.

 "Tenawm dùn viau s'u, ka va biakin ani lah chuan a lo hauh hlur che a, rèl tum che pawhin a theih loh! In inneih hma ațangin in ințan a nia, in inneih hnuah phei chuan... sawi pawh ka sawi peih lo!" a ti deuh hmak hmak a, a țawngkam hman chuan ka nuih a tiza angreng. 

 "Țan ve bawk ang chu!" 

 A vawi khat nân tlai khat chu ka va phone hmasa ve chhin a, a la thei lawk lo zui, ka tih nawn leh hnuah chuan a la ve ta țáwk a,"Min chhâng har sia, i buai viau a ni maw?" ka han ti a, lehlam ațang chuan," Bathroom-ah a lût a, ka rawn chhànsak tawp mai, tu nge aw?" hmeichhe aw ngei mai chuan a rawn ti ta, a aw chhuak ațang chuan Polite-i aw ngei kha niin ka hria. Eng nge a quarter-ah chuan a tih ve ang le? An la inkawp reng tho em ni? Jakob-a ka hmuh phãk lohah a awm a, induh tawn mah ila hmeichhe dangin kan chanchin an hriat loh chuan a hma ang tho kha a ni ngei ang. 

 *MI FING CHUAN HRINGNUNA NAWMNA HI A NGAIHLU A, A EN LIAM MAI MAI LO, HÊNG THIL HIAN DAM HLIMNA A THLEN TIH A HRIA A; MAHSE, INSALBEHTÎR AWLSAMZIA ERAWH HRIAIN RILRU FÎM TAKIN NAWMNA CHU A CHÈN MAI ZÂWK ȚHÌN*