☆MIN EN LA☆ - 29 By Dingdi Pachuau

 ☆MIN EN LA☆ - 29 By Dingdi Pachuau

Rilru nawm lohna hlîrin ka khat a, ka thin a rim pah țún bawk. Engtin nge kha nu khân 'Tu nge aw' a rawn tih theih? Jakob-a hian a phone-ah ka hming a save miah lo tihna em ni? A phone chu lo kalsan pawh ni se engati nge kha nu khân min rawn chhàn ve ngawt? Polite-i a ni ngeiin ka hria a, an la inkawp reng tihna a ni ngei ang, a inah pawh a la kal dâwk dâwk chu.

Tui lo leh thatho lo zet chuan eirawng chu ka bàwl chhunzawm leh a, ka rilruah erawh nichin lawk thil kha a awm reng thung. Eng nge tunah hian an tih ang? Hnaih deuhah ințhutin an indût leh ang em? Jakob-a'n zei tak leh duhthawh taka min fawh ang chiah khán a fáwp ve ang em? Nge khumpui lam an kai zâwk ang? He khawvêlah hian an awm ve a ni tih ka hriat hma leh ka awm ve a ni tih an hriat hma pawha lo inchûlnêl tawh an ni a, an inthlah mai mai thei kher lo ang. Hetiang a nih chuan lo innei thei pawh ni ila eng kan ni chuang nâng, rilru hahna leh hrehawmna hlîr mai ka hmaah a awm dâwn asin.

Ka thin chu a rim tù tú mai a, chutih rual erawh chuan thil hre chiang hlei lova thinrim nghâl viau chu a fuh ber lo tih pawh ka ngaihtuah tel tho bawk a; mahse, thil awmze dik tak a sawi ve erawh ka phût ang, ka lakah palai meuh a rawn tîr ve tawh a, hmeichhe dang lakah chuan han indah sâng fâl ve deuh thei tùr chu ka niin ka inhria, bâkah, a bialnu ka ni tawh alawm.

Ka phone nawn duh ta miah lo va, zànriah ei khamah amah zâwkin min rawn be ta a, ka thin a rim deuh tlat avàng chuan min biakna chu a rùl tâwk chauhin ka chhâng zêl a, a lo man thiam nasa.

"Lungawi lohna i nei a ni maw? Ka chungah a nih ngei ka ring bawk," a rawn ti ta chiah a, " Nei chiang e, engtin nge Polite-i khân ka phone call kha a rawn chhàn ve ngawt a? In awm dùn a ni maw? Min fawh ang khân i fâwp ve em? In mu dùn em?" han tih phiar phiar mai chu ka châk lutuk a; mahse, chutiang lo deuh hlek chuan," I ring dik a nih chu, a chhan pawh i hre ngei ang chu," ka ti ta zâwk a.

"Eng thil nge ni ta? Ka naute hian ka chungah eng lungawi lohna nge a lo neih ang aw...? Ka rawn biak har deuh vàng che hi a ni thei mai ang em?" 

A hre lo der mai mai a ni, phone check se, received calls-ah ka hming a hmu ngei ngei ang, min save chuan.

"I phone-ah khân engtin nge ka hming i save ka va hre châk?" ka ti ta daih a, ani chuan," Ka naute i nia, 'Ka naute' tiin ka save bawk che, a nih nangin le? Min han hrilh ve teh," a rawn ti zat a, kei chuan," 'Ka pu hlui' tiin maw le," a ngei deuh tùr chuan ka'n ti a, a rawn chek hluk ta rêng a," Hrem hmabâk!" a ti sup zui a, chutah," I luhlul dàn hi ka lawm zâwng tak a ni ka tih tawh kha,  chuan, i lungawi lohna chhan chu han sawi tawh la?" a ti leh daih a.

"Ngaihtuah ve mai rawh," ka tih sap chuan," Min hrilh mai la, mawh, ka zâwt che alawm, ka naute i nia, i lungawi loh hi ka duh hleinem," a rawn ti ve thung a,  a hre lo tak tak a nih hmel.

"Vawiin tlai khân tu nèn nge in awm a?" ka ti ta nge nge a, ani chuan," Ka inah hian maw? Jivan-a leh Makimi nèn kan pathumin kan awm," a rawn ti ve mai bawk a, a zêp hauh lo.

Bialnu thîkthu chhe zet mai nih ka duh loh avàng chuan," A nih tak chu, Makimi chuan eng nge a rawn tih a?" tiin pângngai thei ang ber chuan ka zâwt a, ani chuan," A rawn lêng ve mai mai maw le, heta i awm lai pawhin a rawn lèn fo kha, engati nge ani chanchin chu kan sawi daih a?!! Ani chanchin sawi mai mai tùr chuan kan hun hi a hlu lutuk! I chanchin sawi zâwk ang, ka hmu leh châk tawh hlê mai che," a rawn ti duah a.

"I bialnu a ni țhìn miau a," ka ti ve thung a,  ani erawh chuan," Nang bâk bialnu ka nei lo," a rawn ti ve leh a, hetiang hian a sawi ve ziah, a hma pawhin bialnu a nei lo ni khân a insawi țhìn a nih kha; mahse, tuin nge a bialnu ni miah lo chu fâwp ngai ni? An inkárah eng emaw chu a awm chiang alawm.

"Mi dang ka mamawh lo, tunahte hian ka kiangah awm la ka ti hlê a ni, ka rawn riah leh hunah chuan mahni chauha mut kha chu ka duh tawh miah lo ang."  Polite-i chungchâng lam chu a sawi lang duh tawh lo rêng rêng, tunah sawi duh rih lo mah se ka la zâwt leh tho ang. Kan inbiak tàwp lamah chuan," I phone kha mi dang lo chhàntîr tawh suh aw, hmeichhia hlauh phei chu," ka'n tih hrãm kha, ka nute an awm ve bawk sia, ka țawng ring ngam chiah lo, kan țawng a lo hriat chuan ka nuin ngaihțhat lohna a nei palh ang.

Ni khatah vawi khat chu pelh hauh lovin min rawn bia ti ila a dik ber ang chu, min ngaihsak a, min ngai a, min rawn be ve reng ta chu ka tân pawh lungawi loh khum theih a ni bîk lo va, ka naute pahnih lah chu tlawhin chaw eiah a sâwm zauh zauh bawk a, inlâk mark țhat a tum nge ni pawh ka hre thiam chiah lo. 

Mami phûr pheng lah hian min rawn be ve zut a, tunah hi chuan Adonis-a chungchâng pawh min rawn hrilh hmasa ngai tawh lo, kan chanchin min rawn zâwt a, min sawisa a, a nui leh chiam țhìn. A chângin," In inhmeh reuh ngawt ang!" a rawn ti a, a chângin," In inupat hleih reuh sia, in inneih hunah rai vat i tum dâwn nia," te a ti thùl, kan hma lam hun tùr hi a suangtuah chiam chiam țhìn pek a, a hlimna ber lah chu a ni lawi a.

"Zêp chi pawh a ni chuang lo va, a nupui boral nî ațang kha chuan a hlim hmêl hmuh tùr a awm tawh lo va, hetia ka țhiannu ber a han duh thei ta mai che hi ka phûr lo thei lo a ni, ka lawmpui che a, amahe ka lawmpui bawk a, hlim taka in inneih theih ngei ka beisei bawk a ni. A nih leh, pasal neih chu i duh tawh hrim hrim em?" tiin min rawn zâwt ta khauh a.

Han chhàn mai dàn tùr ka hre ta hauh lo, pasal neih ka duh tawh leh tawh loh lam ka lo la ngaihtuah ngai miah lo tih ka hre chhuak a, tunah tak hian pasal nei dâwn ta ila ka inpeih tawh em ka hre miah lo!

"Min zâwt thut a, ka lo la ngaihtuah ngai lo tih ka hre chhuak chiah," tia ka chhàn chuan," Ka lo rin dàn a dik chiah a nih chu. Pasal han nei vut duh tùr êm chuan ka la suangtuah ngai miah lo che, kei erawh chu min sâwmtu an awm vàng khân ka ngaihtuah zeuh zeuh tawh zâwk a. Ngaihzâwng pawh nei ngai si lovin pasal neih thut i duh kha chu ka ring lo hrim hrim," a rawn ti barh barh a.

A hnu deuha,"Chuan, en teh, Makimi nèn khán an inkawp ve deuh khân ka hre sia, ka lo hlimin ka lo duhsak ve êm êm bawk kha a nia, an lo inkawp miah lo tihna em ni ta?" a rawn tih leh chuan," Ka hre bîk lo, i unaua zâwt chhin la?" ka lo ti vat a, ani hian han zâwt chhin se keia zawh ai chuan a mawi zâwk ang, ka hre châk a, Mami hi chuan a zâwt tluk tluk ang a, kan hre chhuak vat mai ang.

"Zâwt chhin ang; mahse, khatih lai ațang tawh khân hmanrua-ah mai mai a lo hmang zâwk em maw ni le tih ka ngaihtuah leh thut, inkawp tak tak ni se hetianga ranga mi dang a pansan vut chu ka ring lêm lo," a rawn ti leh a. Ni e, a sawi hi a dik maithei, ti ila ka phone lo chhângtu kha Polite-i kha a ni tlatin ka hria a, ka hmu phâk tawh si lo va, a lo la thlah chiangkuang lo pawh a ni maithei tho. A khawhar lunglêng chu hnèmin a duh engkim a pe thei àwm si a, Jakob-a tân pawh han thlah tawp chu har deuh mai tùr asin, kan inhriat hma ațanga lo inhria an ni tawh si a.

Polite-i mawlh chu ka rilruah awmin  ka hre rauh rauh reng a, Jakob-a'n ka hnênah palai a rawn tîr tih a hre tawh ang em? Jakob-a hian a hrilh tawh em? Lo hre tawh ta ang se la, Jakob-a hi a la beisei fo tihna em ni ang? A hmeichhia zâwkin a zar renga a beisei reng chuan a mipa tân chuan inthiar fihlìmsan a har duh ngawt ang.

Ka nu chuan hun remchângah min zilh leh malh malh țhìn a," Mipa tân hmeichhiate hi siam kan ni a, Jakob-a tâna siam pawh chu i lo ni ve maithei, kan la hre hauh lo va; mahse, fîmkhur la, engkim Pathian kutah hlàn la, țawngțai tam la, i tân a ruatsak che a nih phawt chuan eng mahin in inkâr hi a dãl thei lo ang. A naupang chhe zawk zawk tawh lo va, nang erawh chu i la upa lo va; mahse, chutih rual chuan hmeichhia chu kan vul lai a rei lo thung, hma taka pasal neih a țhat loh ang bawkin upat deuh hnua neih pawh a fuh ber chuang lo. In induh tawna inneih in duh a nih phawt chuan hnial ka tum rêng rêng lo; mahse, mihring nupaa insiam tùr chuan induh tawnna ngawt hi a tâwk zo lo va, inhmangaih tawn a ngai a ni," a ti dap dap a, ngun takin ka lo ngaithla kar a, min zilhtu tùr leh hmangaiha min enkawltu nu ka la nei hi ka vànnei tak zet a ni.

"Kan chhûngkaw dinhmun a inchen lo va, anni chu khîta an awm laiin keini chu khútah kan awm thung a, nupa dinhmun inchen lo lutuk hi inkawp rem a har țhìn, chêt dàn phung a inang lo va, nun dàn pawh chuti tho chu. Hei vàng hian a nia Jakob-a palaite pawh khatiang khân ka lo chhàn ni, ka chhàn dàn avàng khân ka inchhîr miah lo a nia; mahse, in inhmangaih tawna inneih in duh tlat a nih chuan kum khat hnu lamah chuan ka hnial tawh hauh lo ang. In chanchin min hrilh ațanga ka ngaihtuah chu induh tawnna chu in lo nei a ni maithei, tisa thil tak pawhin in lo inhîp a ni ang; mahse, chu ngawt chu nupaa insiam nân chuan a dawrâwm si a, a innghah tlâk si loh a ni. Han inhre chiangin han induh tawn ula, in duh zâwngte han inzir tawn phawt ula, kum khat hnuah palai a rawn tîr leh a nih ngat zawngin a fel thluam tawh mai ang," a ti leh kalh kalh a, ka nu thil sawi chu dik ka ti lutuk! Jakob-a nèn hian kan inkârah inhìp tawnna riau hi chu a awm a, kan induh tawn ni pawhin ka hria; mahse, inhmangaihna tak hi chu ka hre ta lo a ni, kei ngei pawh hian tunah hian ka hmangaih em ka hre lo, ani pawhin a hre bîk lo tawp ang.

Mami chuan a lo zâwt ngei a ni ang, Jakob-a chuan," I țhiannu Carolene-i tak hi chu aw...!! Ani nèn hian inanna in nei hauh si lo va, heti chung chung hian in inkàwm ngeih ve phian chu a ni bawk si a,"  a ti nang nang a,  ka nui ringawt. Ni e, Mami nèn hian kan inang lo chiang tih ka hria; ani hi chu hlim thei leh lu zo veh vawh tak a ni a, a felin a țawng duh viau bawk. Kei chu Mami opposite ka ni mai, kan inanna chu Singapore-ah kan kal ve ve a, hmeichhia kan ni ve ve a, ka best friend a ni a, a best friend ka nih ve ngei pawh ka ring.

"Mami chuan eng thil nge a zawh che a?" hriat loh hmèl zeta en pah hian ka ti a, min chhànna ka hre châk zek zek. Ani chuan," Hmeichhe chungchâng maw le, mi lah chu a han zâwt chîk khawp mai a, nang tih loh hmeichhe dang chanchin hi chu ka sawi peih fahran lo tih ka hrilh kha," a lo ti leh mai a.

"Tu hmeichhe chanchin nge a zawh che a?" ka ti ve leh thung a, vawiin chu biak pângngai lovin min rawn video-call a, video- call-a inbiak hi châk viau țhìn mah ila ka ngam ngai lo, tunah erawh amahin a rawn ti hmasa ta si a, lài ru tak leh hlim ru tak siin ka chhâng ve zêl a ni.

"Sawi tawh lo teh ang, eng chawhmeh nge i siam dâwn a?" a rawn ti daih. Polite-i chanchin hi sawi chhuah a hreh ni ve berin ka hria, a thil min zawh hi a àwm lo miah lo, kei lahin dawhkànah ka chawhmeh siam tùr chu ka chap darh nuai a.

"Thil tui tak a ni mai!"

A rûm nghut a," I ei siam ka ei leh châk tawh ngawt mai!" a ti sup a, sawi zawm lehin," Ngawi teh, tih dàn ka hria, kár tàwp chawlh Lungleia hmang tùrin ka rawn hruai ang che aw,  a țhain a hlimawm dâwn tlat, ka quarter-ah hian chaw ei siamin i naute pawh kan sâwm ang a," a rawn ti dût dût a. A kawr chu hlìm pah hian," I awm loh ațang khân ka chêr rawk rawk ni berin ka hria, i ti ve lo maw? Thil ei châkna ka nei lo a ni ber ang chu; mahse, in inah khân ka ei tam leh viau a, i eirawng bàwl ngei a nih vàng a ni ngei ang," a rawn ti leh a.

Kâr tàwp lamah rawn kalin ka nu hnênah chuan kâr tàwp chawlh Lunglei lama hman phei chu min dìlsak ka ti mai, ka nu hriatpuina leh rem tihna thlapin Lunglei lam pan chuan kan tlän dùn ta vang vang a, kâr tàwp a ni bawk a,  tunah tak hi chuan ka hlim leh viau tawh a, kan inhmu theiin tu mitmei mah vèn a ngai lo bawk a, kan innghèngin kan ininbelhbawm lo chauh chu a ni!! Kan inngai a, kan inthlahlel a, kan kut ni se a inbelhbawm ta emaw tih mai tùr a ni. Kawng laka kan chawlh pawhin ka kut chu a thlah duh lo réng a, mi min hmuh leh phun sap țhìn chu engah mah a ngai ve lo, kei erawh chu ka kun deuh hlek thung.

"Hawi sâng vah rawh, he laiah hian nang aia hmêl țha an awm miah lo tih hria la, induh viau rawh, ka nupui i nih hunah phei chuan..." tiin a sawi chhunzawm duh lo va, dawhkàn chungah ka kut chu dahin a la vuan reng tho, ei tùr a lam fel tawh a, a rawn thleng thuai mai ang.

"Engati nge ka ngaih viau che le! Kum heti chen ka lo dam ve tawh a, mihring dam lai, tung chhoa kal zîngah chuan ka ngaih ber chu i ni chiang alawm," tia phun sup supin ka kut chu a tuai hauh hauh a, kei pawhin lák sawn ka tum bîk lo. Min duhna leh min thlâkhlelhna a tilang ve ni maiah ka ngai. 

"Zanin chu ka bula i riah ngei a ngai ang aw, hmun dang a pan theih loh bur!"

Chhâng lovin phâwk zetin ka en ringawt.

*MITE NGAINAT NIH LEH I BULA AWM NUAM AN TIH THEIH DÀN TÙR CHU, A HMASA BERAH CHUAN NUI LA, I BULA AWM KHA HAN NGAIHVEN ÊM ÊM LA, A CHANCHIN ZÂWTIN A THU SAWI NGAITHLA NGUN VIAU RAWH*