☆MIN EN LA☆ - 30 By Dingdi Pachuau

 MIN EN LA☆ - 30 By Dingdi Pachuau

"I naute an awm ve reng tih chu ka hre tho; mahse, ka kianga kâr tàwp hmang tùrin a nia ka rawn hruai che, chu vàng chuan hmun danga awm kha chu a theih loh a ni tawp mai, nang pawhin tum buai duh ting suh," a ti leh sup sup a, hmun dang en lovin ka mitah tak chuan min en reng a, chhàn tumin ka âng zuau a; mahse, amah vêk chuan," Min hnial tùrin ka duh lo che," a lo ti leh vut a, ka âng zuau pawh chu ka chîp leh daih, kan piah lawk lawkah mi an chàwl ve tho sia, hnial ka duh rih lo. Nakinah, kan la sawi fel ang chu, tunah hi chuan a thu han âwih rih phawt ila.

Ei tùr kan chah a rawn thleng a, ani chuan làwmthu sawia phun sup pah hian ka ei tùr plate chu ka hmaah min rawn chhawpsak zui zat a," Ei nghâl rawh le, i ril a țâm tawh ang, thil dang pawh kan la lam belh zêl dâwn nia," a ti sup a, rawn kûn hnai deuhin a meng sawr sawr a.

"I ei ve dâwn lo'm ni?" ka tih chuan," Ka ril pawh a țâm ve lêm lo, ei ai chuan i thil ei lai lo en che ka duh zâwk mah, ka en theih lai che hi chuan en reng mai che ka duh a," a lo ti leh mai a, a fiamthu a nih ka ring a, min fiam zah a tum nia ringin ka han en a; mahse, che lova min lo en tâk reng ka hmuh tâkah chuan lai deuh hian ka nui ringawt a.

Ka thil ei min en reng lai chuan," Engtin maw Singapore-ah chuan kekawrbùl chhîng tei tawi chu i han ha ve maw? Thlalâk i la kawl țha em?" a han ti a, ka thil ei chu ka hâk lo chauh a ni! Chûng teh daih rawn sawi chhuah, kei pawhin ka ngaihtuah chhuak ngai tawh hleinem le.

"Kawl lo, bâkah, ka phone ka thlâk a," ka tih chuan," Khawi maw i phone mi lo pe lawk teh," a lo ti leh zat a, eng atân ti chu ni maw ti rilru chung chuan ka bag-a ka dah chu phawrhin ka pe ve mai bawk a. A en nuap nuap a, min pe lêt lehin lock chu ka han hawng leh phawt a, a la lêt leh a.

"Thlalâk ka kawl lo," ka lo ti leh a, a en loh phah chuang lo. A khawih chhunzawm leh a, chutah, a phone phawrh chhuakin a han khawih zawk a, ka phone chu a ring ta, ka en nghâl vat a, a hmêl nûr deuh chu ka hmu zui nghâl bawk. Ka phone chu min rawn entîrin," Ka hming hi Choâk maw ni a?! Save țha nghâl teh," a rawn ti a, a hming kha 'Ka pu hlui' tiin ka save lo hrim hrim, ka tih der mai mai kha a nia, 'Choâk' tiin a ni ka save ni.

'Jakob' tia ka save chuan," A hma lamah khân Darling tih dah belh teh," a ti leh a, sawi buai lovin ka dah ve mai bawk. Nakinah a la siam țhat leh theih tho alawm ka ti a, ka hming a save dàn chu min hmuh ve thung a," Dâwt ka sawi ve hleinem, ka naute i nia, ka nupui i nih hunah erawh chuan 'Honey' tiin ka thlâk ang," a ti leh sup sup a. Lài ru viau mah ila a rûk tak chuan nuam ka ti a; mahse, a țawng chu mi dangin an lo hre pha ang tih erawh ka hlau thung. 'Ka naute' tia min save vàng hian Polite-i pawh khân min hre lo ang a, tu nge ka nih hriat a duh vàngin min rawn zâwt a ni ngei ang chu.

Kan tlàn leh hnu chuan," Choâk tia ka number i save chhan kha a awmzia min han hrilh teh," a rawn ti chhuak sup a, a lo ngaihtuah reng a ni ngei ang chu. Kei chuan," Rawng dum i ngainain i inthuamna rêng rêng pawh a dum lam hlîr a ni si a, chu vàng chu maw le, i hua em?" ka ti zui zat a.

"Nang chu ni kher lo la chuan ka haw maithei a ni."

Rang zet hian," Haw lo ang, tunah phei chuan ka thlâk daih tawh tho kha, nakinah chuan 'Țhuro' ti pawhin ka thlâk leh maithei a ni, i fel sia, i zaidam bawk sia," ka tih chuan a lo nui hawk a," Khatiang zâwng kha chuan min fiam lo mai teh aw," a lo ti sup a, a hmel chu ka enin ka thil sawi chu a haw lo tih ka hmu thiam ve reng a, chu vàng chuan ngam deuh hian," Mahse, lêrh hi ka ngaithei lo va, entîr nân, kawp lai nei reng chunga mi dang kawp hreh chuang lo leh bànsan chuang lote," ka ti leh a.

"Chutiang mi chu 'I ni e' min tihna a ni thei ang em?" a rawn tih chuan," Ni ka tih loh chu, ka ngaithei lo tih ka sawi mai a nih chu," thutak zet hian ka lo ti a, a rawn nui hawk a," Warning min pe deuh tihna a ni maw?" a rawn ti leh a, min rawn melh zawk bawk a. Kei erawh chuan," Pêk i ngai hleinem, nang chu i fel a," ka ti leh a.

A nui leh hawk a," Țawng ngaihna pawh min hriattîr dâwn hleinem le!" a ti sup phawt a, chutah, min rawn en lehin a han meng sawr sawr a," Zanin chu ka phûr tawh tak zet a ni," a ti zui leh zat a, a thil sawi dàn ațang chuan a thil suangtuah tùr ka hriat chian êm avàng chuan," Khatiang kha suangtuah hauh suh, inneih hma hmaa lo chêtsual lah ka duh hek lo, ka nu remtihna thlapa kal ka nih kha, thil sual ti thei kan ni hleinem," thutak zet hian ka lo ti thung a.

"I ngai urhsùn lutuk a nih kha, thil sual kan ti dâwn hleinem, mut dun hi thil sual a ni lo, pâwngsual erawh thil sual a ni thung," a lo ti leh mai a, chutah," Kan titi chuan rawn en pah che ka duh zêl si a, hla ngaithla daih ang aw," tiin hla chu a'n play zui nghâl daih a, pawi pawh ka ti chiah lo, kan thil sawi kha, a nuam lêm lo.

A vei lamin ka kut a vuan pah ràn a, kei pawhin ka hnial chuang lo. A kut lum thar thar vawn chu nuam ka ti a, him bîk riaua inhriatna ka nei tlat bawk. Kan hla ngaihthlâk chu ka hriat zâwng pawh a ni lo va; mahse, Mizo hla a ni a, ngaihthlâk nuam ka ti tho. Car chhûng a lum nuam bawk si a, kan țawng bawk si lo va, kan hla ngaihthlâk chuan min àwi ka ti mai, ka mut a chhuak selh selh a; mahse, muthilhsan daih chu ka duh lo va, ka intiharh lui.hrâm hrâm a.

"I mut a chhuak a ni maw? Muhìl rawh," a rawn tih chuan tlêmin ka harh leh deuh a," Muthilhsan che ka duh lo alawm," ka tih chuan," Ka naute duat tak hi chu aw..!! Ka bulah țhuin i kut ka vuan reng tho a, ka khua a har lo tùrah ngai ang, i theih phawt chuan muhìl rawh," a lo ti a, ka kut chu a vuan nghet salh salh a, ka intiharh lui ve hrâm hrâm tak nain a hnuah chuan ka insûm thei tawh lo, ka muthilh lai tak pawh hre lo chuan ka muhìl ta daih a.

Ka han harh chuan ka awmna chu ka hai lek lek a ni! A quarter kawtah kan lo ding reng tawh a, kan thlenna a rei tawh nge pawh ka hre lo, a kut lum nuam tak chuan ka biangah lo chûlin min lo thlîr reng tawh a! Mit khap sak saka ka en chuan a lo nui suk a," Motor chhûngah hian zàn kan riak tawh mai dâwn a nih hi ka lo ti mai asin," a ti a, a kut chu la sawn chuang lo chuan ka biang chu a la chûl reng tho a. Kei chu ka han hawi chhuak a, khua a lo tlai viau tawh tih ka hmuh chuan," E khai, a va tlai tawh àwm ve! Min kaih thawh tùr che alawm! Kan thlenna a rei tawh em?" ka ti ta chung a, mahni inthiam lohna ka nei zui nghâl a.

"Tui taka i muhìl lai i hmèl țhatzia kha, ka kai harh phal teuh lo che! Kaih harh ai che chuan car chhûnga zàn riah mai kha ka duh zâwk a!" a lo ti thung a, min en reng avàng chuan ka zak deuh a, nui sakin ka meng hnuai raih a, ka muthilh hlànin ka chil te hi a lo uai duah duah mai lo ang maw tih ngaihtuahna ka nei thut a, ka intuai nghâl vat bawk.

A lo nui hawk a," I chilthlì a uai duah duah a, ka hrûk faisak che a nih kha, a mak duah duah lutuk a!" a tih chuan ka en chho leh vat a; mahse, min fiam a ni tih ka hriat chuan," Kan chhuak tawh mai dâwn em ni?" ka ti ve ta thung a, ani chu rawn kûn hniamin min rawn fâwp zoh a, a che sawn zui ta nghâl a.

Jivan-a nèn kan han inhmu chu nuam ka ti viau nain nuam tih lohna deuh ka nei ve tho a, ani lah chuan kan chanchin chu a la hre lo a nih hmèl," I lo thawk leh tawh dâwn a ni ang maw?" hlim hmêl tak hian a lo ti vat a, a pu chuan," Jivan..!!" a lo ti țhawt a, ani chuan hlauh hmèl zet hian," Aw ka pu?" a ti vat a, ani chuan awka vîn deuh hlek hian," Motor-ah sâwn thil lâk tùr a awm, va la nghâl rawh," a lo ti a, rang zet hian a chhuak zui ta nghâl a.

"I hlauhawm lutuk! Khatia vin kher kha a ngai hleinem," a kawr bâna vuan pah hian dam thlap hian ka ti a, ani chuan," Khatia zah lo taka a biak che kha ka duh lo," a lo ti nghut thung a, kei chuan," Zah lo pawh a nih chiah loh kha, ani nèn chuan kan innêl a, a hmaa kan inlaichìnna kha ngaihtuah la, a àwm ve reng asin, thinrim mai lo la," ka ti leh a, a thin a rim tak tak chu ka hlau ve tho; mahse, Jivan-a hlau hmêl hmuh leh a awka vîn hriat hi ka duh lo a ni.

"Hmêl țha an thinrim ngai lo aw," a kawr bân pawh chêt zauh paha ka tih leh chuan za lo tih hriat zet hian a nui suk a, chutih lai chuan Jivan-a chu kawng laka kan thil lei khaiin a rawn lût a, a pu chu hlauh hmèl tak hian a melh zak zak a, nuam lo ka ti, ka khawngaih reuh bawk a.

Jivan-a'n ei a lo rèl fel vek tawh avàng chuan buai ve a ngai lo va, kawngah balhna tùr a awm loh avàngin ka inbual peih lo khawp mai a; mahse, zàna inbual ai chuan tiin ka inphuhtîr zawk ta tho a, sitting room-a ka luh phei chuan Jakob-a pawh a lo țhu vàng tawh a, a, a fai ser sawrin hmuh a nuam, a shower gel hman rim chu a lo la nam ram ram a.

"Hmuh i nuam hle mai!"

A lo nui suk a, a bula țhutna chu bêng thakin," Sawi hmasa tùr zâwk ka ni asin le, i ril a țâm tawh em?" a lo ti a, newspaper a chhiar lai ni àwm tak chu dawhkànah a dah zui nghâl a. A bula țhut pah chuan," Țâm lêm lo ve, nangmah kha a țâm tawh a ni maw?" tiin ka han nuih sak a, ani chuan min lo kuahin ka nghâwngah chuan a fâwp zauh a," I rim a tui vang vang hle mai, ka duh chi tak!" tiin ka nghâwng chu a seh zauh a, zâ tiin ka tawm chãih mai.

"Awm țha teh," ka tih hlak chuan," Hetia tih che hi ka châkna a rei tawh!" tiin a lam hawi tùrin min kuai a, rawn kûn hniam nghâl zatin duhthawh tak hian min fâwp zui nghâl a, lo hnial ka tum bík chuang  lo, kei pawhin ka châk ve tho sia.

Chaw tak chu kan ei har deuh hlek a, țâm deuh hnâpa ei a ti tlat si a ni, ei tùr eng eng emaw kan ei nual tho a, kan inchhawp bawk a, ril chu a țâm mawh kher asin; mahse, ei loh a țha lo ka tih tlat vàngin kan ei tho a, Jivan-a ei siam tui vak lohzia chu ka hre ve chiah. Jakob-a'n ka ei siam a lo ti kher zêl pawh kha a lo àwm viau a nih hi ka tih phah ta. 

"Jivan..?"

"Aw ka pu?" tiin kan chaw eina bulah chuan a rawn kal vat a, ka lo nuih sak nain min en tlat lo, a nuam ti lo hmêl chu ka hmu reng, a pu chu a en kal a, a pu chuan," Tun ațang chuan Rêngpuii hi i pî tawh tùr a ni ang, zah takin be tawh ang che," a han ti a, ani chuan," Aw le, ka pu," a lo ti vat a, kei erawh chuan chutia a ti kher chu țûl lo ka ti khawp mai a; mahse, lo inrawlh erawh ka tum rih lo, nakinah ka la hrilh fiah ang chu.

Jakob-a chaw ei tlèmzia ka hmuh chuan naktûk ni vat vat se ka ti kher mai, a duh zâwng taka ei siama eitîr țeuh ka duh. A chaw ei tlèmzia han hmuh chiah chuan lo tla deuh kâwk lo chi a ni lo tawp tih ka hre tlat a, ka chàm chhûng chuan eirawng ka bàwlsak char char ang tih chu ka rilrua ka ngaihtuah ber a ni.

A puin a hrilh vàng kha nge ni, Jivan-a chuan ka chêt ve a phal ta hauh lo mai a, nuam ka ti lo hial zâwk. A pu a hlau tih a lang reng mai si a, han chétpui tum viau pawhin amah zãwkin nuam a ti lo tih ka hriat sî avàng chuan ka chétpui duh ta lo va; mahse, chêt àwm tâwk chu ka che tho.

Tih tùr awm hek lo le, TV enin news kan en a, sofa-ah chuan kan țhu dùn ràn a, blanket lum nuam zet a rawn lâk chhuah chu insin țâwmin a kut erawh a hlei ru zêk a, blanket hnuaiah chuan a kut chu ka vawnsak ràn mai.

"Ninhlei lo teh, chanchin thar ka hre mumal thei lo a nia," ka tih chuan," Ka țawngin ka bengchheng hauh lo aw," a lo ti mai a, a la nui sûng zui. A kut a rawn chêt leh dâwn chuan," I ninhlei leh chuan naktûkah ka haw daih ang, a nih loh pawhin Zoteite hnênah ka kal ang," tiin ka han vau khar khar a, ani chuan," Ka ninhlei tawp si lo. Chanchin thar ngaithla duh si i țawng i țawng a, ngaithla ta che," a ti leh mai a, hneh zeta min kuah betin," Awm țha mai mai teh, engtin mah ka tih loh tawp che hi," a ti leh a.

Mikhual room-a mu tùra ka kal dâwn chuan a phal tlat lo pek a, min pawm käng nawlhin a room lam min panpui ta nghâl a, kei chuan," Min thlah teh," tiin a hnung chu ka han chùm a, ani lah chuan," Engtin nge mikhual room-ah ka riahtîr theih ang che le?! Ngaihtuah pawh i ngaihtuah mak êm mai," a lo ti sup thung a, a room chu tlawh hawngin a han kalh zui rap a, a khum dûp nuam takah chuan min nghat thla a, amah pawh chuan min rawn delh zui nghâl a.

"Jakob, thil theih a ni lo! Nupa pawh kan la nih loh hi!" ka lo ti vat a, ani chuan nghet zeta min kuah pah chuan," Nupa ni kher lo pawhin a mut dun theih tho alawm," a lo ti mai a, kei chuan," Ni lo, chutiang chu ka duh ve lo, Pathian a zahawm bâkah ka nuin engtin nge min ngaih ang? A phalna thlapa zin ka nia, i hriat kha, a duh loh dàna ka awm leh si chuan ka nu chu ka hmu ngam tawh nâng," ka ti leh țâwk țâwk a.

A thaw hawk a, țawng lo leh che lo chuan min kuah ngawt ngawt a, a chêt loh avàng chuan kei pawh ka che sawn bîk lo, chutah," Ka room ațanga riah sawn chu tum buai duh ting lo la, hetah hian kan mu dùn ang; mahse, i duh loh angin ka che lo thung ang, chu chu a țha em?" a ti ta sup sup a.

"Mahse, mut dun chu--"

"Ka room ațang hian i riak chhuak dâwn lo, i duh loh angin ka che lo ang ka tih tawh kha," a lo tih leh vut avàng chuan ka țawng chhunzawm ta lo va, min riah chhuahtîr a tum loh hmèl si a, zanin chauh chu a duh angin a room-ah hian ka riak poh a ni ang chu; mahse, ramri kân a tum chuan khum ațangin ka tlawh thla tawp ang.

Ha nâwtin hmai kan phih dùn a, a peih lo chungin a nia a hmai hi ka phihtîr ni. Ka hmai chu night cream ka han hnawih a, a duh lo chungin a hmai pawh chu ka hnawihsak ve a," Ka hnawih loh che chuan i room-ah ka riak bîk lo ang," tiin ka vau fiam a, " I va sual reuh tak! Khatiang kha mipa inhnawih chi pawh va ni suh," a ti hmuk a; mahse, ka hnawihsak lui tho.

"Tikhân, i vun a no sawr sawr dâwn alawm," ka tih chuan," Mipain vun no sawr sawr kan mamawh lo," a lo ti leh hmuk a, a lungawi lo hmêl leh țawng hmuk hmuk chuan ka nuih a tiza tlat a, ka nuih vak vak erawh chuan a thin a rim ka hlau ve tho si a, nuih vak duh lo chuan," Mamawh ve tho e, hnawih zauh zauh tùr," ka ti phawt a, sawi zawm lehin," Tak tak chuan, vawi khat inhnawih ringawt te chu a thawk hman teuh lo mai! Bâkah, no sawr sawrna pawh a ni lo, hmai vun a ro êm a, ka hnawih mai a nia, lung lohah lâk âwih loh aw, Darling?" ka ti a.

Min rawn hnaih ruakin," Eng maw han sawi țha leh teh," a rawn ti a, kei erawh chuan hai der lui tlatin," Eng thil maw?" ka lo ti tlat thung a," Mawh, han sawi leh teh, vawi khat chiah min han ko leh teh?" a ti leh a, kei chuan," Engtin vak nge ka koh che a, Darling?" ka ti leh a, nui hawkin min pawm kãng thut a, ka au țhat a, tlâk hlauin ka kuah țâwk țâwk zui a.

"Jakob, ka tla dâwn!" 

"I tlâk ka phal i ring a maw?!! Teuh lo mai, i tla hauh lo ang," tiin min pawm dàn chu insiam remin kei pawhin a nghâwngah ka kuah thei ta a, ka sam chu min pawm kual vêlnaah chuan a inphelh a, a darh niai mai.

Kan mit a intawng a, a tukkhum sam chu țhàmsak pah hian a hmuiah chuan ka fawhsak zauh a, a lo duh khawp lo nasa niin, kan duh tâwka kan han infawh meuh chuan lu pawh a hai chhak thei mai!

Khumah chuan dìm tê hian min nghat riai riai a, ani pawhin min rawn bawh thuah nghâl zat a, min rawn fâwp zui leh zat bawk a, kei lahin ka lo chhâng lêt leh bawk a, innin tih rêng a awm thei lo, a boruak chuan min chènchilh lutuk a ni ang, ka chiang lo riai tawh mai.

"I kawr lum hi a hnawk a nih hi," ti supin ka kawr tlâng lam ațang chuan a rawn tawm chho a, kei pawhin lum ka tih deuh tho avàng chuan hlîp thei tùrin ka lo insiam rem ve nghâl zat a, a hnuaiah kawrbah thêmhlêm tak chauh ka ha tih pawh ka ngaihtuah chhuak tawh lo. Min hlihsak hnu chuan min rawn fâwp zui leh zatin ka khabeah, ka bekah, ka beng kâwmah leh ka nghâwngah, chutiang chuan a fâwp thla zêl a, nuam ka tih vàng chuan ka lo thaw hak hak a, ka thinphu pawh phu dut dut tawh mai a, a hre chiang ngawt ang, chil lem khalh khalh pah chuan a lu chu ka tuaisak ruai a.

Ka han meng chhuak thut a, eng vàng nge pawh ka hre lo, light chu a lo la êng uarh a, khum piah chiaha dâthlalang lian puia kan thla lo lang chu ka va hmu zui nghâl chiah bawk a, ka kawchhûng lam chu a vâwt nghâl rawih rawih maiin ka hria!

"Jakob, hetiang hian kan awm thei lo!" tiin ka han tãl nghâl a, ani pawhin kawr a lo ha tawh hauh lo niin, kei pawh chu ka taksa chung lamah kawrhnuai chauh ka lo ha tawh a, kan lo kal thui tak tak hman teuh kher mai.

"Rêngpui... !!"

A awka chhuak avàng chuan che ngam lovin ka tàwp chawih a, ani pawh chuti tho. Minute khat dâwn che lova kan awm hnuah chuan tho vutin," Lo kal sawn miah suh," a ti sup a, bathroom-ah chuan a lût zui ta nghâl a, eng nge a tih dâwn ka hre hauh lo. A thu erawh ka lo âwih a, a room chu ka chhuahsan miah lo; mahse, bathroom ațanga a rawn chhuah chuan kawrbah erawh ka lo ha diam tawh thung.

Light chu off-in dim light a chhi thung a, ka mutnaah êng ka chhi ngai lo va, hei hi chhit a tum a nih teh chuan ka muhìl thei hauh lo ang le. 

"I off dâwn nange?"

"Thim i hlau lo maw?!!"

A off leh ta daih a, pâwn lam ațanga êng riai ruai rawn lût a awm avàng chuan a thim lutuk hran lo va, mut pawh a nuam tâwk chauh ang.

Min rawn kuah leh tho a; mahse, tûn țum chu amah si chêta min kuah bâk chu a tum lo a ni ang, engtia chêt zui mah a tum lo tih ka hriat hnu chuan ka inthlah dul ve hret hret a; mahse, a lam hawi chuan ka inher ngam chuang lo.

"I mut a chhuak tawh viau ang, thlamuang tak khân mu rawh le."

Chhùn lama ka mut hlek vàng nge ni, ka mut chu a chhuak fahran lo khawp mai a, ka rilru pawh a la harh kar mai; mahse, amah zâwk a chauh ka hlauh vàng chauh chuan ka mut a chhuah loh thu pawh chu ka sawi duh lo va.

"Jakob?" ka han ti sap a, ani chuan," Umm..?" tiin ka nghâwng chu a rawn fâwp zauh a," Ih maw, Jivan-a kha vìn tawh lo la tiraw? A hlauh hmèl êm che kha, keimah vànga vin a tâwk kha hrehawm ka ti, khawngaihin vìn tawh suh aw?" tiin min kuahna bân chu ka chùlsak hoh hoh a.

"Ka vìn em ni?"

"Vìn vak chuang lo ve, a țawng dàn ațang khân kan inkâr hi a hre ve lo a nih hmèl a, a hriat loh miau chuan a thil sawi kha thil àwm lo a ni miah lo a ni, a fel viau a, kan inkàwm ngeih viau bawk a--" ka tih lai mêk chuan," A inrawlh lohna tùra a lo inrawlh chuan ka dìm lo ang," a lo ti sup a, ka thaw huai a," Aw le, thil awmzia ka hrilh fiah ang a, a lo inrawlh miah lo ang," ka ti ve ta a, ani lah chuan," Ani chungchâng chu sawi tawh lo teh ang, tún ang huna sawi atân chuan a ho êm mai," a ti leh nghut a, a thu âwih tak chuan," Aw le, muhìl tawh rawh, i chau palh ang," tiin a bân chu ka chûl hliau hliau a, ani chuan," He lam hawiin rawn inher phawt la?" a rawn ti leh a, hnial lovin ka inher ve mai a," Ka naute duat hi ka van duh reuh tak! Ka thu a âwih bawk si," tiin ka chalah chuan a fâwp zauh a, ka hmuia a fawh leh hnu chuan," Muhìl tawh rawh le, mut tui," a ti leh sup a, a âwm nghènga min kuahin a mal sei pui chuan min khan zui zat a, hetiang hian ka muthilh theih pawh ka ring lo, ka mut vawi khatna a ni si a.

Mahse, ka lo muhìl thei chiang a lo ni tih a tûk zînga ka harh chuan ka hre chiang ngang mai. Min kuah mai duh tâwk lo chuan a mal pahnihin min lo la kherh bet tlat a, ka mut dàn nuam tak chu thawhsan ka huphurh ve khawp mai, a lum nuam bawk si a.  Ka han tãl deuh chuan," La tho lo ang, hetia mut hi ka la kham lo," a rawn ti sup a, thawh la tum lo tih hriat taka min kuah ngheh sauh sauh pahin rizai chuan min la vûr sauh sauh bawk a.

"I harhna a rei tawh em?"

"Rei lo ve, minute 10 vêl chauh a la ni ang," a tih chuan," Exer lain i chhuak dâwn lo tihna a ni maw?" ka ti leh a, ani lah chuan," Ka kianga i mut chuan ka thawhsan phal teuh lo mai che!" a lo ti leh a, a țawng zâwng leh chil a lem zâwnga a hrawk bâwk che leh ralh ralh țhìn chu ka chalin a tawk pha deuh a, maimichhîng reng chung chuan ka nui sak a, a hnuah phei chuan ka han khawihsak ta nghe nghe a.

*I PÂWN LAM LAN DÀN AI KHÂN I CHHÛNGRIL LAM KHA CHEI ULUK TEH AW, PÂWN LAM ȚHATNA CHU REI LO TÊAH A CHUAI MAI ȚHÌN SI A*