☆MIN EN LA☆ - 31 By Dingdi Pachuau

 ☆MIN EN LA☆ - 31 By Dingdi Pachuau

"Vawiin chu tihian khumah kan inawm heuh heuh mai dâwn em ni ang?"

A hrawk bâwk źàwi tê têa chùlsak pah chuan," Tih chi nâng, Zoteite ka tlawh a ngai ve ang chu, Lungleia ka awm thu pawh ka la hrilh hauh lo a nia, min dem ngawt ang chu!" ka ti sap a, ani chuan," Nimin kan thlen hnu khân ka hrilh tawh alawm, lo ngaihtuah lo tùr chein ka ti a," a lo ti sup a.

Rilru ka neih lohzia leh ngaihtuah ka neih tlêmzia ka ngaihtuah a, dik tak chuan Zoteite chu Lungleia ka phei thu kha ka hrilh ngam lo a ni zâwk mah a, hetah ka riak ta bawk si nèn, eng angin nge min ngaih ang aw tih pawh ka ngaihtuah ngam lo hial zâwk. Kei ngei pawhin Polite-i kha heta riak tùr khân ka ring țhìn a, keini mu dùn anga an mut dun lah ka ring ngai hek lo, chutiang chiah chuan mi zawng zawngin, Jivan-a tiamin khum khata mu dùna nupa nun pawh hmang dùnah riak min ngai ngei ang, kei ngei pawhin chutiang chuan Polite-i riah te khân ka ngai a nia...

"Eng nge i ngaihtuah?" tiin ka chal a rawn fâwp zauh a, kei chuan," Ka thawh a ngai, eirawng ka bàwl loh chuan," ka lo ti sap a, ani erawh chuan," Ni rih lo ve, Jivan-a a awm alawm," tiin ka kawr chu rawn zenin ka hnung lam taksa lâwng chu a kut lum zet chuan a han chûl kual ruai a, kei erawh chuan," Nizàna a thil siam i ei tlèmzia kha ka hmu reng alawm, ka awm chhûng na nâ nâ chuan ei tùr siamsak che ka duh a ni, khatiang lek i ei kha chuan thâ i nei thei nâng," ka lo ti thung a.

A phal lo chung chu ka tho lui ta tho a, rawn thawh ve nghâl a tum zet a; mahse, ka phalsak tâk lohah chuan a mu țha leh ta a,  Jivan-a biak ka duh vàngin a rawn thawh ve nghâl kha chu ka duh lo a ni.

Ka inphih fai hnua choka lama ka phei chuan Jivan-a chu a lo tho tawh chiang a, chawhmeh a lo siam dâwn mêk a, min lo hmuh veleh chuan," Thingpui i duh em, ka pi?" a lo ti vat a, chutianga min ko chu nuam lo ka ti nasa," Jivan, chutiang chuan min ko suh, i pi ka ni lo a nia, Rêngpuii kha ka la ni reng," tiin ka han nuih a, ani chuan," Ka puin min hrilh tawh kha, tui lum i duh em?" a lo ti leh a.

Thil awmzia chu ka han hrilh fiah ve thuak thuak a, ani chuan," A nih tak chu, i haw hnu ațang khân a thin a chhe ta lutuk a, eng emaw hlekah min vìn leh ringawt zêl a, ka hna hi ka bànsan daih dâwn em maw ni aw tih te ka ngaihtuah hial țhìn," a lo ti ve malh malh a, chutia a han sawi ve koh koh mai chu ka khawngaih reuh khawp mai.

"Innei r'u aw, i bulah chuan a hlim tih a hmêl ațangin ka hria a ni. I awm loh hnua a thinchhe ta viau pawh kha tunah chuan ka hre thiam ta, pu hi a sual hran miah lo, a duh loh zâwnga awm palh hlauh erawh chuan a hlauhawm thei chu ka ti a; mahse, i bulah chuan chutiang chu a ni lo ang," a ti leh malh malh a.

"A nih, Jivan, ka awm loh chhûng khân tu nge lo lêng țhìn? A țhianteho nèn chawte an eiho leh em?" tiin pehhêl deuh tak chuan ka han zâwt a,  'Polite-i a lo kal țhìn em?' tia han zawh dawt chu ka hreh ve deuh a ni. Ani chuan," Aw, vawi khat chu an eiho ngei a, rawn lêng hi chu a khât tâwk hi chuan an awm ve zauh zauh reng thung," a lo ti mai a, ka zawh chhan ber erawh a rawn sawi lang bîk lo.

Eirawng chu ka bâwl ta zâwk a, min lo puih ve chu a'n tum ngial a; mahse, lo hnialin kawt phiat tùr chuan ka ti ta daih a, a kal ve nghâl mai bawk a, Polite-i ngaihtuah rilru pah chuan chaw ka han chhuang a, ka lo ngaihtuah mûk deuh nge ni, ka hnung lam ațanga min rawn kuah chuan ka phu deuh zawk mai!

"Hmmm... tihian awm lawk ang," a rawn ti sup a, a thu ka âwih ve mai bawk a, rei vak lo hnuah chuan," Tukin chu eng nge min hmehpui dâwn?" a ti leh sup a, kei chuan," I duh deuh deuhho maw le, chaw pawh i ei țeuh dâwn nia, tui lum in rawh aw," ka ti a, min chhâng lêm lo chuan sîr lama rawn thlèin min kuah dâk deuh a, min fawh vawng vawng hnuah chuan," Tui lum chu min han thlit la?" a ti leh sup a.

Kan hun hman dàn chu ka rin ai daihin nuam ka ti a, innei tawh ang hialah te ka inchan thùl. Ngaihzawng neih hi a lo nuam a nih chiah hi ka ti ta, Jakob-a lahin min duhin min duat thiam si, kei lahin hmêl țha ka tih leh ka duh rúk ngawih ngawih kha a lo ni bawk nèn, khuavêl hi a pâr chhing chheng ni berin ka hria.

Chaw ei khamah muangchângin kan inkhalh chhuak a, inah Zotei a lo awm a, min hmuh chuan min lo nuih var var a, chawhmeh rêp ka nuin a thawnte chu ka pe a, min en ang hê hâwin," Nupa in nih tak tak duh hmêl reuh lutuk! In inhmeh ka ti tawp che u," a han ti pek a, zak deuh hlek chung chuan Jakob-a chu ka han en vat a, a lo nui deuh suk ka hmuh chuan," Kan inhmeh tak tak maw?!! Kan vênga mite lah khân 'putar' min tihsak bawk sia," nui chung hian ka han ti a, a lungawi loh deuh ka han ring a nia; mahse," Lo ti ve mai mai ang hmiang, an hre lo chiang êm mai," a lo ti duh chauh a.

Rei kan awm lo va, kan chhuah chuan Zotei pawh chuan thil lei tùr a neih ve tho avàng chuan min zui chhuak ve a. Mâma dàwr nghahna lama kal ve rêng rêng ka duh avàng chuan chu lam chu kan pan a, a neitunu ni àwm tak nèn an lo nghâk a, Mâma pawhin nui sângin min lo chhàwn a. Jakob-a chuan Zotei hnênah chuan," Han ît deuhte i nei em?" a han ti a, ani chuan rang zet hian," Nei lo ve, tlereuh ka inbel ngai lo," a lo ti vat a, zungbun intlar dal chu kâwkin," Hêngte hi?" tiin Zotei chu a han en leh a, ani lah chuan lu a lo thing nasa mai.

"A inbel ngai lo, a duh chuang lo ang," ka lo ti ve a," A nih nangin?" a rawn tih ve chuan," Ka mamawh lo ni mai teh se," nui chung hian ka lo ti a, a neitunu chuan," Ni e, tlereuh in ngainat loh hmèl êm mai; mahse, hêng hi chu inbel kher loh pawhin neih hi chu a țha ve asin, sum khâwlna a nih bâkah eng emaw thutah hralh leh mai theih kha a nia, a hlutna lah a hniam tak tak thei chuang lo bawk nèn," a lo ti ve a; mahse, kan lei lo, a țûl ka ti lêm lo. Kan têt tê ațanga harsatna kâra sei lian kan ni a, ei ve țâwk țâwkin kan leikãng chho ve a, hetiang thil hlû lei thei leh lei phâk hian kan awm ngai hek lo, chu vàng chuan, han ît deuh emaw han awh deuh vawng vawng pawh ka nei ngai hek lo, min pe dâwn se chuan ka duh tho ang a, pawisa tam taka lei tùr tho ai chuan pawisa kha bank-a dah ka duh zâwk mai, a bo thei lo zâwk ang.

Zotei slipper kan leipui a, a remti lo chung chu Jakob-a chuan a man a pêksak a, a rûkin Zotei chuan pawisa chu min pêk a tum a," U, hei hi lo pe mai teh, a tizahthlâk êm mai, a man chu ka inring ve reng a," a ti sar sar a; mahse, kei chuan," Min pe suh, ka neih sa ațangin ka lo pe mai ang, mamawh dang i nei em?" ka han ti a, a neih loh thu min hrilh hnu chuan Jakob-a chuan chawlh a rawt a, min hruaina lamah chuan kan kal leh rih a.

Tlai lam leh zànah pawh chuan Polite-i chu a rawn lang miah lo! Mak ka ti ru viau a, a damlo a nih te ka han ring deuh ngawt a, ngaihtuah ngai lêm lo chu ka ngaihtuah kual vak vak a, han zawh deuh dawt lah chu ka hreh deuh si, rawn lang se ka ti ru khawp mai a, a rawn lan hlauh chuan an inkâr zawhna hun țha tak a ni dâwn si a ka ti a ni.

Ka naute hnêna riah phei ve mai ka duh tawh thu ka hrilh chuan a lo remti lo nasa," I riah sawn ka remti hauh lo, bâkah, i naute inah pawh mutna tùr a awm loh kha, hetah lah a awm țeuh a," a ti tlat a, kei erawh chuan," Ka riah ve tal loh chuan an ngaih pawh a țha lo ang, thil mawi pawh a ni lo, engtin awm lo mah ila," ka lo ti ve thung a, ani lah chuan," A ho mai mai," a ti deuh tlat a, naupang chhia ang maiin ka kal hlauin min vêng deuh tlat a, ka kalna apiangah min la zui zui, ka nuih a.

"Putar i nih tawh kha, hetiang hian awm lo teh!" ka tih chuan min pawm kãng lawp a," Putar ka nih leh nih loh chu han test chiah ila," tiin a room lam min panpui zui nghâl a, kei erawh chuan," A ngai lo, ka hria alawm, putar i ni lo, kan khaw mite tih dàn ka sawi ve mai mai a nih kha," ka ti ta chûl a, min thlah duh chuang lo. Khuma min nghah thlâk rual chuan min rawn bawh zui nghâl a, kei ka lo tê chùl thung.

"Ni lo, ka sawi ve mai mai ka tih tawh kha, min ngaidam rawh," ka tih vawn vawn chuan," Ngaihdam dâwn chuan vawi khat min fawh a ngai," a lo ti thung a, " Aw le, ka fâwp ang che, chuan, tho phawt la, i rit si," ka ti leh chùl a, chal intauh rùn chuan min rawn en chhuk a, chutah, tho chhuakin min kai tho zui nghâl a.

"Tah sâwn ding rawh le." A sawi ang chuan a kawhna laiah chuan ka va ding ve mai a," Sexy deuhin rawn kal phei rawh le," a tih chuan," Sexy deuha kal dàn ka hre hleinem," ka lo ti ve thung a, ani lah chuan," I hriat ang angin, i kal dàn apiang kha a sexy a ni mai, chuan, hetah hian," tiin a hmui chu a han tawk pah zauh a.

"Phakar suh!" ka ti a, ka nui a, a nui ve suk nain a awmnaah chuan min lo nghâk reng si a, kal mai dàn tùr ka hre lo. Chutah, high school kan kal lai, class - ix kan zir laia teacher's day-a fancy dress kan tih kha ka ngaihtuah chhuak a, kan kal dàn ang chiah chuan a lam pan chuan ka kal phei a, a bul ka thlen chuan zak duh bîk lovin a biang tawn tawnah ka chelh a, a hmui chu ka fawhsak ta a. Ka thlah dâwn chuan ka kâwngah kuahin amah si chêta min pawm betin duhthawh zet hian min fâwp a, kei pawhin ka lo chhâng lêt ve leh mai bawk.

Mikhual room-ah ka mu ve e ka tia, a lukham nèn a rawn insuan lût zui zat a, riah hran chu a tum loh hmèl kher asin. Khum lah chu mi pahnih tân chuan a lian lo ve si a, a tàwpah chuan a room lamah kan insuan phei leh ta nge nge a, a la nui suk suk zui.

A tûk Pathiannî a ni a, inkhâwm tùr chuan ka sâwm ve a, ani lah chuan," Ka inkhâwm ngai lo," a ti mai a, kei chuan," I inkhâwm ang a, i inkhâwm ngai a ni mai ang chu," ka ti ve thung a; mahse, kan inkar chhuak lo ve chiang khawp mai. Chutah, thil ngaihtuah chhuakin," Biak inah chuan hmêl hriat hlui pawh ka hmu mial mahna! Țhiante pawh ka neih ve nual tak kha maw le, ka hmuh lohna pawh a lo rei ve deuh ta," ka han ti a, ani chuan," Mipa an nih chuan be hmasa miah suh, tu nge kha pa kha? Kha phei kha chu i hmuh pawhin hmu lo der tlat ang che," a rawn ti hmuk a.

Min hruai thlap a, ka kalsan dâwn pawh chuan," Mipa chu be miah suh aw," a ti zui leh hrãm a, ka nuih a tiza ru khawp mai. Patling ve tawh si, tleirãwl tê ngaihzâwng nei hlimte ang maia han inhauh êm êmte chu, mawi pawh a mawi lo, biak phal lo mah se min lo biak hmasak tlat chuan engtin nge ka tih chuan ang?

Kan inkhâwm bâng ka chhuak chiah tihah chuan Nunhlima ka hmu ta chat mai! Hmuh ka inring hauh lo, a bulah chuan amah luhkhungtu, a bialnu hlui ni ngei tùr chu a lo ding ve bawk a, hmuh loh der tumin awmzia a nei lo, kan inhmu tlat si a. Ka lài ru viau a, keimah ang thovin Nunhlima pawh chu a lài ve thoin ka hria. Lài tihah kei chuan amahah feelings ka neih loh lutuk vàngin hrehawm ka ti zâwk a, hetia Jakob-a nèn kan han inzui tâk ațang phei hi chuan ka lo theihnghilh hmin dèr tawh si a, ka inthiam lo lek lek a ni zâwk mah.

"I dam maw?" Min en țha ngam hauh lo. Hrehawm a ti ru viauin ka ring, min hmuh a inrin loh hmèl bawk si a, chutiangin kei pawhin hmuh chu ka inring viau bîk lo.

"Dam alawm, in dam zâwk maw? Hei hi em ni in nu chu?" tiin ka han nuih sak a, a chanchin hre lo anga lan ka tum lo, an nu chuan min lo chhâng vatin," Aw, ni e, nang hi tu nge i nih ve?" a rawn ti a, a aw chhuak chu a zãng vah mai a, a aw chhuak ang chiahin amah pawh a chhe lo viau bawk.

"Rêngpuii a nih hi," Nunhlima'n a tih chuan," A nih tak chu, kan pa țhian hlui hi i ni ang maw? Ka la hmu ngai miah lo che a nih hi, khawiah nge i awm a?" an nu chuan a rawn ti leh bawrh bawrh a, hmeichhe țawng duh tak chu a nih dâwn hi a.

Chhàn ka tum lai takin ka kâwngah tu emawin min rawh kuah chat a,  min rawn kuahtu lam chu ka hawi nghâl vat bawk, khawi ațangin nge a rawn inlàr ni, inkhâwm bâng chuan min kal pèl zut zut a, min rawn en deuhte pawh an awmin ka hria! Chûngho chu engah mah ngai lo tih hriat taka min rawn en chhuk pah hian," Ka lo nghâk reng che a," a ti sup a," Kan kal nghâl mai dâwn em ni ang?" a ti zui leh zat a, kei pawh chuan," Nia..." ka ti a, Nunhlimate lam chu enin," Kan kal tawh mai ang, hei kan hmanhmawh deuh sia," ka ti a, ani chu a țawng lo, an nu zâwk chuan," Aw le, kan la inhmu leh țhìn ang chu," a rawn ti a, kan kalsan zui nghâl a.

"Motor-ah min lo nghâk reng tihna  em ni?" kal pah chuan ka ti a, ani chuan," Ka lo nghâk lo ang che tih a hlauhawmzia kha," a lo ti thung a, kei chuan," Ka lâwm e, i lo ning ngawt lo maw? Kan rei angreng si a," ka ti leh a, kan kalsan chiah tâkte chungchâng lam chu ka sawi chhuak duh bîk hauh lo.

"Mipa be lo tùr khân ka hrilh che kha."

A lungawi lo awka chu ka hre lo der tlat a," Min rawn be hmasa si a, hai der ringawt theih leh hmuh loh der ngawt theih ni hek lo le," ka ti ve thung a. Car a khalh dàn aťang chuan a lung a awi lo tih a lang reng a; mahse, hre lo der tlatin," Khatianga min lo nghah dâwn tho te chuan inkhâwm ve mai tùr a nia, i inchhîr àwm tawp si lo va," ka ti leh barh barh a, a lungawi lohna lam chu sawi chhuah ka tum bau lo.

"Ka inkhâwm ngai lo," a lo ti leh hmuk a.

"Inkhâwm ngai lo tih ngawt hi chu a fuh ber lo asin, ringtu nih chuan kan tih tùr a nia, kan inkhâwm ang a, kan țawngțai ang a, Pathian thute pawh kan ngaithla bawk ang a," ka tih chuan," Chutiang chu a țhatna leh țangkàina ka hre ve hauh lo," a ti leh ta mauh mai!

A buaithlâk teh e, engtin nge maw ka tih dâwn ni? Ka nuin a hriat ve hunah phei chuan inneih pawh a remti ngût dâwn em ni? Ani angin ka rinna a chak ve si lo, kei hian Jakob-a hi  Biak ina inkhâwm ve tùrin ka hruai thei ngût pawhin ka ring lo e a.

Inbe tawh lo chuan kan tlãn haw a, a quarter gate bul kan thlena gate nghènga lo ding nula chhiat loh hmèl zet ka hmuh chuan ka meng phâwk deuh hrá a, a hnung lam ațang mai chuan tu nge ka hre thei lo, chutah, kan thãwm hriaa a rawn hawi tâkah chuan Polite-i i ni tih ka hre chiah, a sam a lo tidanglam daih a lo nih hi.

*HLIM TÙRIN MI INLAICHÌNNA VA NEIHPUI KHER A NGAI LO, NANGMAH KHA INHRE CHIANGIN INHRIAT THIAM TUM ZÂWK RAWH*