☆MIN EN LA☆ - 32 By Dingdi Pachuau

☆MIN EN LA☆ - 32 By Dingdi Pachuau

Ani pawh chuan a hmu ve tih hriat tak hian a han phun sup a, a sawi erawh ka hre hauh lo, chutah, ka lam rawn hawiin," La chhuak rih suh," a ti sup a, a ngaihna hre lo takin a chhuak chu ka en zui ringawt a, Polite-i lam a pan mai dâwn emaw ka tih lai chuan gate chu a han hawng phawt a, rawn lêt lehin car chu a khalh lût a, kawtah chuan dingin a chhuak vat a, ka țhutna lamah rawn kal kualin ka chhuah nân kawng min rawn hawnsak ta a nih chu, a kut ka chelh theih nân ka lamah a rawn phar zui a! Ka en hau a, a kut chu vuan tùrin mi'n mitmei ralh a, ka vuan ve ta chauh a ni. Hetiang hi chu movies lamah ka hmu ve tawh țhìn ngei mai; mahse, tuna ka hun tawn mêk hi movie chu a ni miah lo.

"I awmna a rei tawh em?" tiin Polite-i chu a'n be zui a, ani chuan," Rei lo ve, kha Rêngpuii chu hetah i rawn lêt leh tawh tihna em ni? I awm loh chuan a reh teh mai asin," nui sâng chung hian a ti a, ka chhàn hma chuan Jakob-a chuan," A rawn zin lawk a nih hi, nakkum lamah chuan hotunu ber nia awm nghet charh tawh tùrin palai kan tîr leh ang chu!" a lo ti vut a, ka kâwngah chuan a'n kuah zui nghâl zat bawk a. Nuam lo ti ru viau mah ila nuam ka ti veng veng nia, a bialnu hlui bulah ngei, a hmuh lai ngeia min kuah leh a hriat lai ngeia chutiang thu a han sawi chu ka tân chuan a nuam êm asin!

"A ni maw?!! Ka lawmpui che u, in inhmeh dâwn bawk si," ka rin lo deuha nui sâng chunga a rawn tih chuan ka en deuh reng phawt a, a hnuah erawh ka nui ve sak a, Jakob-a chuan," Kan lãwm e," a lo ti sup a, min rawn en chhukin a nui suk bawk a, hmêl țha ka va ti tak! Polite-i chu awm lo na se chuan ka fâwp chawrh chiang ngawt ang chu!

An inkârah hian ka ngaih ang boruak kha a awm tawh lo a ni maithei a ni, Jakob-a lahin a cheziaah boruak eng emaw a la awm em tih eng mah a tilang miah lo, tihlan ahnêkin min ngaihsakin ka bulah ka si chêt deuhthawin a awm zêl a, Polite-i ni se hlim takin a nui var var reng a, min han thîk emaw min ngaihtheih lohna lam emaw amahah hmuh tùr a awm miah lo; mahse, a rûkin ka lo chîk leh reng țhìn thung. A mitmeng ka chîk a, a melhna lam ka chhui ru zêl a, han rinhlelh viauna tùr erawh ka hmu lo; mahse, ka ngaih a țha tak tak chuang lo.

Jivan-a a awm loh avàngin chhùna thingpui in tùr leh a hmeh chu ka siam a, Jakob-a chuan a remti lo viau nain ka siam ngei eitîr ka duh tlat thung a. Polite-i chuan puih ka ngaih leh ngaih loh chu min han zâwt ve ngial a; mahse, ka lo hnar a, ren nei lêm lova ka duh tâwka ka han siam, ka siam zo chu kei ngei pawhin tui ka ti ve khawp mai, ka siam lai chuan Jakob-a chu rawn lang deuh chhênin, min han fâwp thuak thuak reng a, țawng ring ngam vak si lo hian ka han hau bawk a, ka bula awmtîr reng chu duh viau mah ila Polite-i'n nuam lo a lo ti ang tih ka hlau ve tho a, ka tîr phei leh țhìn, thil mawi ka zawng ve a nih ber chu.

Ka chow siam chu a la thar țha bawk a, an han ei chuan anni pahnih pawh chuan tui an ti ve khawp mai. Polite-i chuan," I siam thiam hlê mai, a tui lutuk ringawt!" a ti a, Jakob-a chuan min enin," Ka chhuang asin, ei siam thiam si, hmel țha bawk, fel bawk, ka nupui ni mai tùr bawk," a ti duah a, a bialnu hlui bula chutiang teh kêlha min han fak ta chu nuam ti viau tho mah ila nuam loh tihna chin ka nei ve deuh tho. Chu vàng tak chuan," Thingpui kha a sat lai khân in r'u, chow pawh kha a daih chuan a tui miah lo ang," ka lo ti daih thung a, titi vak lovin ei mawp mawp ila ka duh.

Polite-i chu a lêng rei lutuk lo ve. A haw dâwn chuan Jakob-a chuan kawt thleng a thlah a, min phût tel ve tlat nain ka chhuak ve lo. In chhûng ațang chuan an chhuak chu ka en zui deuh reng a, Polite-i'n Jakob-a a en deuh vang vang chu ka hmu reng a, chhuak ta mai lo chuan gate bulah chuan Polite-i chu a'n tàwi khawmuang deuh a, Jakob-a hma chhawn chuan a ding a, thil sawi an nei, eng nge an sawi phei chu ka hre pha lo. Ka chhuak ve ta lo chu ka inchhîr ru kher asin, eng nge an sawi Jakob-a chu ka zâwt khawp ang.

A rawn lût chu ka lo en duh miah lo a, ka lo ngaihsak vak lo a nih ber chu, min rawn kuahin," Rawng bàwl nân a la hma si a, kan mu lum mai mai dâwn em ni ang?" ka beng bulah chuan a rawn ti sar sar a, kei erawh chuan ka chhâng lo va. 

"Engtizia nge ka nautĕ hi a ngawih tlat a? A lung a âwi lo em ni?" 

Nui hmêl pu duh miah lo hian," Eng nge gate bulah khân in sawi? Ani lah khân a en reng che a," ka ti nghat a, han thinrimna tùr chu a awm hran miah lo tih chu ka hre ve tho a; mahse, ka zâwt ve duh tlat, ani pawhin Nunhlima nèn kan titi laiin min rawn pawt chat ve tho. Ka bialpa hlui pawh a ni lo va, Polite-i kha chu a bialnu hlui a ni tlat.

"A pa kum 60 a tlin nî leh a pension nî tùr a inrual chiah a, an lawmnaa tel tùrin min sâwm leh a nih kha," a tih chuan," Chu chu eng tikah maw?" ka lo ti vat a, ani chuan," Tûn kâr Nilaini hi a nia, min hrilh nawn leh a nih kha," a ti leh mai a, a mitah chuan ka en chho kar a, dâwt a sawi leh sawi loh erawh ka hre thei hauh lo.

"I kal ang em?" tia ka zawh chuan," Ka hman chuan kal ve ang, min sàwmna kha a rei ve tawh a, a pa lah a lawmpuiawm ka ti hrim hrim bawk, dam leh hrisêl taka pension rak thlenga hna a thawk thei hi làwmawm deuh mai a nia," a ti leh sup sup a.

"A nih tak chu!"

Min pawm kãng lawp a," Ani kha chu i thîk a ngai lo ang, nang i awm chhûng chuan tu mah ka mamawh lo, nangmah chauh a ni ka duh ni," a ti a, a room lamah min pawm phei a, kei erawh chuan," Min thlah teh, mi an lo kal hlauh ang e," ka ti a, ani lah chuan," Ho mai mai, tûn ang hun hi lèn dû dû hun pawh a ni lo," a ti leh mai a; mahse, vànneihthlâk takin ka ti dâwn nge ni, ka phone a rawn rì ta hlauh mai a, min thlah lo thei ta lo va.

Ka nu lo niin, ka haw hun tùr leh ka haw dàn tùr min rawn hrilh a lo ni a, kan khuaa Pu Mafakate nupa an gypsy-in naktûk zîng dâr 7: 30 vêlah Lunglei ațangin an haw phei dâwn a ni àwm e, sumo service lah chu Thawhlehnî-ah daih a tlàn dâwn avàngin naktûka haw tùrin min duh a, min rawn hrilh ve a lo ni.

"Naktûk zîng dâr 7:30-a ka haw a ngai a nih chu," ka nu nèn kan inbiak zawha ka tih chuan," Ka thlah haw leh mai dâwn che alawm, eng nge thawh tùr țûl bîk riau i nei em ni?" a lo ti thung a, kei chuan," Ka nu thu ka hnial ngam nâng. Bâkah,  office kài i ngai a, min thlah daih te chuan i kai hman nâng, thil țûl takah a nih ngawt loh chuan keimah avànga i chawlh ka duh teuh hleinem," ka lo ti vat a, min chhâng lo chuan min en rùn rún ringawt a.

A hnuah chuan a phone la chhuakin a kheuh nuap nuap a, a han ngaithla a, chutah," Zote, in unauin zanin tlai chu chaw rawn ei r'u aw, hei i u nèn rawng kan lo bâwl ang a, in hman hunah in rawn kal mai dâwn nia," a han ti a, a han ngaithla leh vung vung phawt a," Aw, pawi hleinem, i peih phawt chuan le," tiin a nui suk a, a hmet tàwp zui nghâl a.

Rei vak lo hnuah chuan Zotei chu a rawn thleng chho ta mai a, rawn nui hai chung hian," Boss-in min rawn sâwm sia, ka hnial ngam lo va," a rawn ti lût a, Jakob-a chuan," Kid rinawm tak i ni dâwn e," a lo ti ve a, rawng min bàwlpui tùrin a lo kal hma a lo ni. 

Rawng min bàwlpui chu a ti taknain Jakob-a'n eng eng emaw tihpui atân a sâwm pêng zêl a, min bàwlpui hman lo tluk a ni. Games an khèl thùl, newspaper an chhiar, an titi, TV an en thùl, kei chu an bulah ka awm ve hman lo va, min phût ve hek lo, an pahnih chuan an tlei tâwk viau a; mahse, Mâma rawn thlen chhoh ve tâk hnuah erawh chuan tlêmin ka mal lo ta deuh a; mahse, ani pawh a hnu deuhah chuan an rawn ko ve leh a.

"Nangni pahnih kha, in ei tlêm ang aw, min bàwlpui lovin eng eng emaw in ti daih bîk a," tia ka auh chuan Zotei chuan," A, naktûkah i haw leh daih dâwn sia, heta i bàwl kan ei khât leh tawh dâwn asin, tui tak khân bâwl mai mai teh," nui chung hian a rawn ti a, rum deuh hian ka melh ringawt a.

Zanriah chu tui ti takin kan eiho a, Mâma nèn kan ngawichawi deuh a, Zotei leh Jakob-a erawh an țawng deuh reng a, Zotei phei chu a țawng char char ang a ni mai. Jakob-a'n on dàn a thiam si a, a ute pahnih țawng ve ai min țawngsak a ni deuh mai.

Lungleia zin vea an bula vawi khat mah riah loh chu ka ti ve a, Jakob-a rem ti vak lo chung chu ka riak lui ta tho a, mi pakhat riahna mai mai chu zau a ngai lo bawk a, bâkah naute bul a ni bawk a, a nuam reng mai. Jakob-a erawhin min be rei a ni, a bulah ka riak ta si lo va, lungàwi lohna tilang lutuk si lo hian a țawng chhum deuh hmuk hmuk a, ka nuih chu a tiza angreng, ka khawngaih ve roh tho bawk si a.

A tûka kan tlàn chhuah dâwn chuan min rawn thlah hman leh tho a nih chu. Pu Mafakate nupa chu ka zah ru khawp mai a; mahse, min rawn thlah ve ta na nâ nâ chu han biak khawtlai ve deuh loh theih loh a, anni nupa erawh chuan min hre thiam khawp mai a; mahse, minute 3 vêl bâkin kan tlaiin ka ring lo, kan tlàn chhuah chuan ka en zui châk viau nain ka ngam chiah lo va, Pu Mafaka lah chuan min fiam zuk zuk bawk si a, za vak lovin ka nui ka nui ringawt, Lunglei kan han chhuahsan mai tùr chu ka lung a lêngin min rawn thlahtu ngei mai chu ka ngai nghâl vawng vawng maiin ka hria.

Ka lunglèn reuhzia chu a. Ka ngai takzet a ni, ani pawhin min ngai ve bawk a ni ang chu, min rawn be hmasatu zâwkah a țang zêl a, Makimi pu pension leh birthday lawmnaa a kal dâwn pawhin min rawn hrilh leh thlap a, Makimi nèn chuan ringhlel êm êm lo mah ila hnaih viau lo tùr chuan ka han chah ve leh hrâm a, a rawn nui huk zui a," Eng nge?! I hnaih vaih!" ka han ti ngal ngal a.

"Thîkna chhan tùr i nei lo, ngaihngam tak khân lo awm rawh, nang chu ka naute, ka duat leh ka duh ber i ni alawm," a rawn tih chuan," Mahse, ka hmu phâk lo che a, nula chhe lo tak takin an melh che chuan... ka thin a rim bâkah ka ngaih a țha thei lo alawm, ka ngaihtuah reng lo thei lo che a, ka rilru lah a chàwl thei hek lo," ka ti ve thung a.

A ni tak tak alawm. Ani chu officer a ni a, pâktu tam tak a nei chiang, kei aia chhe lo tak tak, ni leh lo, kei chu eng mah lo mai ka ni anni lakah chuan. Bâkah, mi awmthei leh hausa tak tak fanute pawh an ni hlawm ngei ang, zirna lamah pawh chhuan tùr nei țhiau an ni bawk dâwn, a nupui ka nih tak tak hma hi chuan lungdam taka awm hi chu a harsa ve det.

"Nangmah chauh hi ka thlan chu i ni, nula dangte hi chu eng atân mah ka ti lo, nang lo chu ngaihtuah lah ka nei hek lo."

Mami nèn pawh kan la inbe reng a; mahse, Lungleia a unaua bula ka zin thu erawh ka hrilh lo, min zâwt chîk leh dâwn sia, ka peih lo, anni pawh Adonis-a nèn an la inkawp tluang ve zêl a, Adonis-a'n a duat theihzia leh a ngaihpawimawh thiam rohziate chu min hrilh seuh seuh reng a, an chanchin min hrilh kârah kan chanchin pawh min zâwt ve zauh zauh tho.

*******

Kan khuaah chuan ka han awm leh ta vang vang a, a țûl țûl thawh kha a ni leh mai a, ka hman ve deuh nî hi chuan ka ngaihtuahna a kal ding thei viau a, amah ngaihtuah hlîra hun ka hman avàngin ka lung pawh a lêng țhìn. Ni sensa hnuaia nilênga hna han thawh tak tak erawh hi chuan lung hi a lêng hman thei meuh lo chu a ni; mahse, zàn lama min rawn biak hi chuan ka ngaih a zual leh țhìn a, awki hniam chhek chhawk, thûm deuh hlek dam dup sìa a han țawng sup sup hian ka ngaih a zual mai bâkah a zùnah ka uai ral zo ni berin ka hre țhìn. A thiam ang tâwkin duat pawh min duat ve alawm; mahse, kâr hlâ ațanga induat ringawt hi chu lung tilêng zualtu ni maiin ka hria.

Zirtàwp zàn dâr 9 vêla kan ina a rawn lût hlawl mai ka hmuh chuan ka meng phâwk nasa viauin ka ring! Min hrilh lâwk hauh loh bâkah rawn zin a tum lam a sawi lo hrim hrim a, Aizawl lama phei lawk a ngaih thu min hrilh zâwk kha a nia, mak ti taka ka en reng a nih pawhin a mak hran lo ang.

"Eng nge i lo tih dâwn?!"  Leh hû mai a.

Ka inlêngte enin a hawi kual phawt a, chutah," Ka rawn kal remchâng a, ka rawn riak dâwn a nih hi," a ti ta sup a.

Inlêng pahnih ka lo nei ve mêk a; mahse, anni hi chu min rawn rîm tlangvâl inlêngah pawh ka ngai lêm lo, pakhat hi chu kohhran țhalaia inhmang ve tak niin Mâma nèn an inrual chiah, pakhat lah hi pathlawi a ni a, ani hi chu mi ina lêng kual peih ve chi leh mi nèl hlawh deuh mai a ni a, nuihza sawi tùr a hriain hlim pawh kan hlimpui viau țhìn nghe nghe, kan inah pawh hian a lo lêng zauh zauh, a mikhual lêm lo. 

Ka nu pawhin kan thãwm chu a rawn hria a ni ngei ang, a rawn phei vat a, rawn biain a rawn chiauau ve a, inlêng dang neih ve reng laia han ngaihsak deuh bîk hûrh chu dikin ka hre meuh si lo va, a rûk tak erawh chuan han ngaihsak deuh bîka a chanchinte han zawh chian pawh ka châk viau, inlêngte hi han haw phawt se.

Ka rin aiin an la haw har zui a, ka ni țùng mai. Nipui lai ngang a ni bawk nèn, zàn a rei har deuh bawk a, Jakob-a rawn thlen hma deuha kan thil sawi kha kan sawi chhunzawm a, ka rilru erawh a bet vak lo, a mawiah ka zàwm ve hrâm hrâm a ni ber mai.

Inlêng ka lo nei chu a lung a âwi zân lo tih ka hre mai a, chubâkah, amah chauh ka ngaihsak bîk thei lo nèn, ka biak chuan a țawng țha duh lo khawp mai; mahse, ka hre thiam ve tlat, a lungawi lo rei lo ang tih ka hre chiang a,  a han lungawi lo vêl awm dàn leh țawng dàn chuan ka nuih a tiza tlat.

Țawng zawih a thiam dàn chu mak tak a ni, mak tak! Ka nu leh Mercy mut hnuah kan la meng a, ka bul chêtah, min si chêtin a țhu a, tunah pawh hian lungawi lo angin awm mah se a lungawi țan tawh tih ka hria, han lungawi lo zui zêl vaih teh se a châk lo a ni mai.

"Inlêng neih âwih tawh loh, ka nupui ni mai tùr i nih kha."

Ka nuih sak a," Mahse, tlangvâl inlêng angin ka ngai chuang hleinem, an rawn lêng ve miau sia, rawn lêng ve ta chu lo biak loh ngawt theih an ni bîk si lo, zanin chu min hre thiam hrâm la tiraw? An rawn lèn leh dâwn hunah chuan 'Rawn lêng tawh s'u, mi nupui ni mai tùr ka nih tawh hi' ka lo ti tawh ang e," ka han ti a, a lungawi loh chhan ka hriat chian êm avàngin thinrim ka tum ve lo.

"A țha khawp ang! Kawngkhàr pâwn lamah sâwn tàrsak mai che ka duh."

A tûk Inrinnîah ina awm teh tawp ai chuan tiin leipui huanah ka kalpui a, ani pawhin ina awm ai chuan a châk daih zâwk bawk a, bêktê kan zàr ve mai mai hnuaiah chuan kan țhu dùn a, hna thawh tum êm êm a kal kan ni lêm lo bawk a, a tam thei ang ber hun hman dun mai mai kan tum a ni ber mai.

"I nu hi biak țhat leh mai ka duh!"

A sawi awmzia hre tho mah ila," Eng chungchângah maw?" tiin ka han zâwt lui ve salh a, ani chuan," Kan pahnih chungchângah hian maw le, ani thu hmu lova palai rawn tirh leh ngawt lah chu a dikin ka hre thei meuh si lo; mahse, a rei mah mah ka ti, ka bula awm reng tawh tùrin ka duh si che a," a ti sup sup a.

"I puitlin tawh zâwk kha, chutiangte sawi rêng rêng..!!" ka ti ve thung a, ani lah chuan," Puitling rilru pu lova rûk daih che hi ka duh zâwk asin!" a lo ti daih thung a.

"Awiii, a râpthlâk!!"

"A râpthlâk hleinem, a phùrawm daih zâwk alawm," a lo ti leh thên a, hnai zetah min en chhuk rùn mai a, a thil sawi chu ka han ngaihtuah a, engtin emaw tak ka awmin ka hria.

"I nu chu lo sawipui ve chhin la," a tih leh chuan," A rilru ka sawh sawn chuang lo ang, a thuhrimah, duh lo rùn che pawh a ni lo va, kum khat chhûng enthlâk che a duh ve a ni mai a, lérh hauh lovin a mittlung viau la a ni mai," tiin ka han nuih a, a hnungah chuan ka han bensak a.

A tûkah ka nu chuan inkhâwm tùr chuan a ti ve ta tlat mai a, a hmêl ațang chuan a hreh a ni tih ka hre reng mai, a hnial ta ngei rêng bawk a," Ka inkhâwm ngai lo," a ti tawp mai rêng a. Chhuanlam leh dâwt sawi lova chutia a han sawi chhuak tawp chu ka lo lãwm khawp mai a, ka nu pawh chuan a sâwm lui ta bîk lo.

A haw hnu chuan miin min sawi duh khawp tih ka hre leh a, Lunglei ațanga ka chuan hàwna motor neitu Pu Mafakate nupa min sawina ni àwm tak țawngkamte pawh ka hre nawlh nawlh mai; mahse, min lo sawi pawh ni se Jakob-a khân min rawn thlah miau si a, an duh phawt chuan min sawi thei tih ka hria, sawi theihin ka awm tlat, tûn hnaiah ni se a rawn zin leh bawk si a, an sawi theih tùrin kan awm zêl ve tlat, kan nuna an lo buai peih chhûng chuan lo buai vêl mai mai teh se, thil sual Pathian duh loh zâwng tak kan ti pawh a ni chuang lo, min lo sawi mai mai teh se, a na vung vung lo êm mai ti mai teh ang.

Pathianni tlai khat chu ka nu damlo kana a chhuah avàngin rawng ka bâwl a, min rawn biak hma tiin be hmasa ve zâwk teh ang ti rilruin ka phone chu ka la chhuak a, Jakob-a number chu ka hmet chhuak a, nizàn lamah a țhiante nèn chaw an eiho lehpek a, a quarter-ah erawh a ni lo, min rawn hrilh sa tho a, tukin lamah ka be zuai a; mahse, nizàn lamah an che țha deuh a ni maithei, ka be rei duh lo kha a ni a.

"Hello?"

Hmeichhia leh bawk! Makimi em ni? Ka hre thei mai lo.

"Jakob-a a awm em?"

A rawn nui hak a," Tu nge i nih? A hming lah chu i rawn hre dik ve chat bawk sia, amah beiseitu zînga mi i ni ngei ang maw? Rawn beisei buai duh suh," a rawn ti hmak a, mak ka tih êm avàng chuan ka țawng thei lawk lo va, min hmuhsit tih hriat zet hian a rawn nui leh a," Hmeichhe țenghneng tak leh zak lo tak tak, rawn biak tum phêtte zînga mi i nih chiah hi, chu vàng chuan i number pawh a save duh lo a ni ngei mai, rawn biak tum buai duh tawh suh, zah pawh i zak lo'm ni? Nangni ang hmeichhia, sum leh sex mamawh ang chi hi chu eng atân mah a ti lo che u tih lo hria ang che!" a ti a, a hmet tàwp zui ta hmiah a.

*HARSATNA I TAWH TAM BER BER KHA HRINGNUNIN A RAWN INHER CHHUAHPUI VE HRIM HRIM NGE NANGMAHIN I INSIAMCHAWP?*