☆MIN EN LA☆ - 33 By Dingdi Pachuau

 ☆MIN EN LA☆ - 33 By Dingdi Pachuau

Ka lung a awi lo tih leh chhàn pawh ka chhâng țha duh lo a ni tih chu a hre ngei mai; mahse, min be lui tlat a, ka chhàn hma chu min be lui zél. Zaidam takin min bia a, Mercy chu inah awm ve lo se chuan ka thinrim khum ang a, hrehawm a tih ve viau tùrin ka siam ang ka ti a nia; mahse, a rem țeuh bîk lo.

Ka nu rawn hawin Jakob-a a hmuh chuan," I lo kal a ni maw? Engtik lai khân nge i rawn thlen a? Ka lo hre miah lo," tiin a be vat a, ani chuan," A la rei lutuk lo. I lo awm lo va, a reh ruih mai," tiin a lo chhâng ve ngei a, lungawi lo viau lo ila chuan ka nuih a za ngawt ang.

Ka nu nèn chuan an titi deuh reng a, zanriah ei hma hretin a inbual a, a inbual hlàn chuan ka nu chu ka bulah rawn kalin," Thinrima titau mai lovin țha takin lo be ta che, a lo kalna a hlat tehlul nèn, a haw hmain buaina in neih kha sawi fel ngei ngei ang che u," a ti sap sap a, ka chhàn hma chuan a kal sawn leh nghâl daih a, ka en zui ringawt. A bulah lem ka chan ve nasat tehlul nèn, hringtunu nge nge chuan thil thleng chu a lo hai lo chiang e.

Inlâk mark țhat a tum a ni ang chu, ka nu tân ei tùr leh damdawi țha, vitamin lam chi a rawn lei nual a, a man pawh a tlâwm miah lo, Mercy tân pawh T-shirt lam chi rawng hrang hrang pathum lai a rawn leisak nghe nghe a, chawhmeh pawh kha a rawn lei nual kha a ni a, làwmthu hrilh mawlh mawlh tùr ka nih tehlul nèn, ka han hrilh duh lo kha a nia, ka sual ve reuh êm asin.

Zanriah ei khamah ka pu a rawn lèn thlâk avàngin Jakob-a nèn chuan han titina hun pawh kan nei lo va, a titipui char char mai a, ka nuin a han sàwm hran dâwn pawh chuan ka pu chuan," A lo kal tih ka hria a, titipui ka duh vàngin alawm ka rawn lèn ni, ani hi chuan thil a hre êm a, han titipui hi a nuam riau a," a la ti charh charh zui a, thil awmzia hre ve hek lo, a àwm ve viau tho mai.

A tûkah chauh hun thâwl chu kan nei thei ta a, kan sitting room-ah chuan kan țhu dùn ràn mai a, tunah tak hi chuan nimin lam ai kha chuan ka thinrimna pawh a dai tawh, nizàn lam khân text-in ka thinrim chhan chu min zâwt leh a; mahse, țawngka ngeia sawi chhuah ka duh vàngin ka chhâng lêt ve duh lo kha a nia.

"Le, i hun a ințan chiah e."

Ngei zetin ka en phei a, a lo la nui suk zui a, a hmêl țha takah chuan vawm chawrh ka va châk tak!

"Engati nge min rawn biak loh? Engati nge biak tlang theih loha i awm ti zâwk ang," tiin zawhna hmasa ber chu ka chhâk chhuak ta a, thutak zet hian a mitmeng chu ka en ràn a, dâwt a sawi leh sawi loh hriat ka tum dâwn a ni.

"Ka phone a chhia alawm."

Ngun zetin ka en a, dâwt sawi hmêl a pu pawhin ka hre lo; mahse, chu pawh chu lo ni se a phone chhiat hmaa ka phone khân hmeichhiain a lo chhàn kha, kha kha buaina pakhat chu a ni tho.

"Engtin nge a chhiat a i phone chu?"

"Ka thlauh keh a niang; mahse, ka thlauh lai ka hre miah lo a nih chu," a tih chuan," A va mak dâwn ve! Mahni phone thlauh keh lai pawh hriat miah loh chu, thil mak tak a nih dâwn chu!" ka lo ti nghat a, ani chuan," Min ringhlel tihna a ni thei ang em?" a lo ti ve thung a.

"I thlauh keh hma a nih ngei dâwn chu, ka rawn biak lai che kha chuan hmeichhiain min rawn chhâng chu a nih kha, kha kha chu mipa chu a ni miah lo, nangmah i ni lo ka tihna a nih chu," ka ti leh a, mit khap hauh lova min en ràn chung hian," Min rawn bia maw!!? Engtik laiin maw?" a rawn ti ta sup a.

Ka hrilh pah chuan," Hmeichhia a ni lo ang chu ti hauh suh, engtin nge i phone hi hmeichhia hian an lo lâk theih ve ziah ni? Thil mak tak chu a ni i ti ve lo maw?" tiin ka han zâwt zui zat a, a ngaihtuah lêt a ni ngei ang chu, a ngawi vang vang phawt a, hmun dang hawi sawn duh hauh lovin ngun takin ka lo en reng a.

"Khami nî khân rawn lêng an awm nual a, pâwna mipaho kan țhut hlàn khân a ni ngei ang chu, hmeichhe rawn kal zînga tu emaw ber fiamthu thawh i nang fuh a nih ka va ring ém!!" 

Thinrim ru zet hian," Khatianga ințawng khum kha fiamthu-ah i ngai thei a nih chuan, a țha a nih chu! Kei chuan fiamthu-ah ka ngai ve lo, ka ngai ve thei ngai lo ang, bâkah, ka rawn biak che hian hmeichhia hi an rawn lëng fuh thei hi ka tia," ka han ti lui ve ngat a, za lo zet hian ka țhen sak bawk a.

"Engtin chiah nge a rawn chhàn che a?" a tih leh pawh chuan ka hrilh duh lo dâwn dâwn a; mahse, ka thin a rim ve tawh bawk si a, hrilh vek pah chuan," Chu chu fiamthu-ah i la ngai thei cheu ang maw? Ka rilru a tinâ asin. Chuan, i phone-ah khân ka hming kha i lo save tak tak miah lo tihna a ni em?" ka ti khùr dar dar a, ka thin a rim avàng chuan ka țawng pawh a khùr lo thei lo.

"Ka naute i nia, chutiang chuan ka save bawk che," a tih chuan," Ka âwih chiah lo, kha nu khân ka number i save peih loh thu a sawi kha, hmeichhe țenghneng leh zak lo tak, sum leh sex--" sawi pawh sawi zo thei lo chuan ka ngawi phawt a, ka rilru a na thar leh tlat a, a hmuh laia țah emaw mittui tih tlâk leh emaw chu ka tum tawh hauh lo thung, chu vàng chuan ka insûm hrâm hrâm a, ka țawng leh hma chuan thâwk ka la huai huai phawt a.

"A pawi ka ti hle mai, min rawn biak hmasak khàt nèn, min rawn biak ve laia ka chhàn loh che avànga i rilru ka tihnat rualin chu nu pawh chuan i rilru a tina hlê mai si a, pawi ka ti tak zet, min ngaihdam theih nân eng thil nge ti tùra min duh, eng pawh sawi rawh, ka ti vek ang?" a ti chhuak ta sup sup mai a.

Rilru na tak chuan ka en ràn reng a," Engati nge min rawn biak loh sawi phawt rawh," ka ti sap a, ani chuan," Ka phone ka thlauh chhia ka tih kha," a lo ti vut a, kei chuan," Ka hria, chu pawh ni se phone dang ațang pawhin min be thei reng," ka lo ti leh a.

"Ka sim card a chhe tel ve bawk a, phone number ka hre lo a ni, a tlaw thlâk i ti viau maithei; mahse, pawi pawh ka ti chuang lo, ka chak lohna lam a nia, tu number mah ka vawng lo a ni," a ti leh ta a.

"Chuti, khawi ațangin nge min rawn biak theih si?" ka tih chuan," Josh-a i number ka dîl alawm, mak a lo la ti êm êm zui a!" a ti sup a, chutah, sawi zawm lehin," Buaina hi a mal mala rawn thleng lovin a hlãwm hlãwmin a rawn thleng tup tup ni berin ka hria, kan thawhpuipa nupui a boral a, hna lamah buaina a lo thleng a, phone lo chhe bawk nèn, ka buai tak zet a ni, buai lai laiin zin chhuah a lo ngai ve leh bawk a," tiin a han thaw hawk hawk a," Nang lah rilru hrehawm takin ka lo siam bawk che a, a pawi ka ti tak zet. Thil dang zawng aiin i rilru hrehawm kha pawi ka ti, khatiang thil kha i chungah a thleng tih lah chu ka lo hre hauh bawk si lo va," a tih chhunzawm leh a.

"I thil sawi kha a ni tak tak em?" Rin ka duh alawm, rin ka duh han ti ila ka ring daih tawh zâwk a ni ber ang chu, a lang a mawiah ka zâwt a nih ka ring zâwk mah.

Thingpui lum tùra ka thawh chuan a rawn tho chhuak ve nghâl a, min rawn zuiin," Rêngpui, min ring rawh, ka sawi tawh kha, ka sawi nawn leh ang, he khawvêla mihring dam lai, tungchhoa kal zîngah hian nang chiah hi ka duh awm chhun i ni, ka fate nu ni tùrin nang chauh hi ka duh bawk che," a rawn ti zui a, ka din loh avàng chuan min rawn zui ve zêl bawk a.

"Min rawn zui zêl suh, thingpui ka lum dâwn," ka tih chuan," Ka thil sawi i rin hma chu ka zui zêl dâwn che, niminah ka rawn thleng tawh a, ka rawn thlen ațangin vawi khat pawh ka la tawk lo che a nia, a hrehawm êm asin, min rin theih nân eng thil nge ka tih ang?" a ti ve thung a.

"Phone thar i nei tawh em?" ka ti daih thung a, ani lah chuan," Nei lo, kei chu ka duh khirh alawm, ka duh ang hi ka hmu zen zen ngai lo bawk," a lo ti mai a, sawi zawm lehin," Ka phone chhe ta kha ka leina a la rei hran lo va, han hluihlâwn tawp kha ka ui ve deuh avàngin siam țhat hun ka nghâk ta ringawt a ni, sim card erawh ka number hmasa ang chiah kha ka dîl leh a," a ti leh a.

Kan boruak pawh a pângngai chho ta viau a; mahse, ka la lungawi kim zân loh avàng erawh chuan a lakah chuan ka invêng tlat a, chu chu hrehawm a ti tih ka hre chiang viau bawk.

"Min ring tawh emaw ka ti a," a tih sup chuan," Ka rin loh thu che ka sawi em ni?" ka ti ve thung a, ani chuan," Sawi lo; mahse, i cheziaah i tilang thung alawm," a ti leh sup a, chutah," Eng thil nge ka tih ang min hrilh teh, hetia ka laka i awm chuan ka ã thei mai ang, i laka tlâwm nih hi ka hreh lo, ka duhzia che tihlan lah ka hreh lo va, ka zak ngai hek lo ang," a tih chhunzawm leh a.

Min duh vezia ka hria, heti taka kan dinhmun a inthlau chung pawh hian min duh a, min pan a, miin an sawi pawh a pawisa zo hek lo, kei ve mai min han duh ve êm êm mai chu a ni si a, a mak zâwk asin! A laka inchhuanga induh thei ka ni hauh lo, chutah, nakkum lawkah inneih kan la tum zui.

Buai chung chunga rawn kal a ni tih ka hria a, a haw leh thuai a ngai, a awm rei hman bîk lo, kei pawhin ka duh êm avàngin kan inkâr chu ka tihfel thuai a ngai a, inngai tak leh inthlahlel tak chunga kan ințhen leh hnu chuan ka ngaihtuah zui rauh rauh a, he pa hi ka duh mai ni tawh lovin ka hmangaih a ni tih ka hre chiang ta ngang mai, ka ngai êm êm a, ni dang zawng aiin ka ngai zualin ka hre nghe nghe. Ani pawh khân min duh ve tak zet ngei mai a, sawi pawh a sawi fo; mahse, min hmangaih thu erawh a la sawi hauh lo, min hmangaih thu sawi hauh lovin nupuia min neih a tum a nia; mahse, chutia tih lêm si ah chuan sawi lo mah se min hmangaih loh chuan nupuia min neih a tum dâwn em ni? Tlêm tal chuan min hmangaih ve tho tihna a ni mai lo maw?

Ka nuin min zilh a," Hmeichhiain a phone a lo chhàn vàng maiin a phatsan ta che tihna a ni kher lo a nia, a lo awm lo remchâng ve thei a, engtin pawhin a lo chhâng thei che a, chu chu Jakob-a rilru a ni ve kher lo ang, mihring rilru hi a inang vek hauh lo, amah ngeiin țhenna thu emaw a duh tawh loh thu a rawn hrilh che a nih ngawt loh chuan khatia hlim loh phah nân leh han thinrim viau nân chuan hman loh hrãm hrãm i tum tawh dâwn nia.  Ani a lo puitling tawh hlauh a, thil a lo hre thiamin a tlâwm thei pawh hi ka ti a, a dinhmun en phei hi chuan kan inthlau lutuk a, zah pawh ka zak rum rum țhìn a ni. Hmun hrana awm in ni a, han inrinhlelhna tùr chu zawn chuan a tam thei viau ang; mahse, finfiahna tak a awm a nih lêm loh chuan rilru tihhrehawmna mai a ni, a duh thiam viau chein ka hria a, chutih rual chuan kan hma hun tùr erawh kan hre hauh lo mai; mahse, kan tisual lo tùrah ka ngai a, in tân pawh hian ka țawngțai ziah țhìn a ni, Pathian hnênah hian engkim mai hi thlen ila, tê lua a awm lo a nia, thlen hmiah hmiah mai tùr a ni, nang pawh țawngțai nasa la, a tân liau liau i dìlsak nasat pawh a țha, kristian chhûngkaw dik tak dinpui i tum a nih chuan," a ti malh malh a.

Ka ngaihtuah zui vang vang a. Ni dâwn tak e, Jakob-a hi a inkhâwm ngai hauh lo va, a țawngțai lai ka la hmu hauh lo bawk. Mi sual erawh a ni miah lo; mahse, Biak in rap ngai lo leh Pathian hnêna țawngțai ngai lo chu, a nun chu ngaihtuahawm tak a ni tlat, chu chu ka pasal tùr, ka dam chhûnga pasala ka vawn tùr leh kristian chhûngkua ka dinpui tùr nun chu a ni tlat si. Engtin nge hei hi ka ngaihtuah chhuah ngai miah loh le? 

Ka tleiràwl chhoh lai vêla kan chhûngkaw inkhâwmnaa kan thil sawite ka ngaihtuah lêt a, pasal ka neih hunah Pathian țih mi leh kristian chhúngkua ka dinpui theih tùr ngei ka neih tùr thu ka sawi a nih kha. Ka nu khân ka pa chanchin kha sawi chhuak țhìnin ani pawh a țawngțaipui nasa țhìn tih a sawi bawk a nih kha. Ka pa kha ka hre chiang ve deuh tho a, naupan lai ngang ni mah se, a inkhâwm ve țhìn chiang a, țawngțai pawh a țawngțai ve țhìn alawm, ka nu nèn khân an inhauh ka hre ngai miah lo va, zàna a lo haw har deuh chânga ka nuin khum sîra țhingțhia ka pa tân leh kan unau tân a țawngțai laite ka ngaihtuah chhuak uar uar a, ka nu min țawngțaisak țhin avànga tún hun hi thleng kan nih ngei pawh ka ring bawk, Mâma lah tlangvâl fel tak a ni a, Zotei lah lehkha a ti thei phian a, Pathian zâra kan hrisêl țha viau pawh hi Pathian hnêna ka nu țawngțaina rah ngei a ni.

Chumi nî la la ațang chuan Jakob-a tân ka dìlsak ve ta a, ngawrh zâwkin ka dìlsak lo thei lo. Ka pasal tùr a ni a, ka hmangaih chuan a tâna dìlsak ngei tùr ka lo ni, keiin ka țawngțaisak lohin tuin nge țawngțaisak tehlul ang? Hmangaihtu chuan a hmangaih tân a dìlsak ang chu.

A phone a țha tawh a, kan inbe fo tawh bawk. A dinhmun leh a puitlinna ka hmu thiam tawh a, kei pawh ka thinrimin ka titau tawh bîk lo. Kan inkâr pawh a nuam leh viau tawh a, Zoteite pawh a tlawh zauh zauh a, an inah pawh vawi hnih lai chaw a zu ei tawh a ni àwm e. A pawi ka ti lêm lo, Jivan-a eirawng bàwlsak kha a tui fahran si lo va, Zotei thil siam tui a tih zâwk ka ring a ni.

Zan khat chu ruah a sûr cherh cherh a, fùr a ințan hma deuh a ka ti mai, ruah a tla peih ta tlat si a, țo thlîin a rawn ken ni tho mah se duh aiin a tla peih tho tho, fùr ruah ka ti mai. Puan sin hlãn chuan khumah ka țhu a, tih tùr awm lêm lo mah se ka la mu peih meuh lo a, a la hma bawk si nèn, Jakob-a ka phone chhin a, min rawn chhâng rang khawp mai.

"Ruah a sûr ve em?" tia ka zawh chuan," Sûr ve e, vawiin lamah pawh a sûr tawh maw le, a tla duh mah mah chu a ni," a rawn ti a, a aw hriat hi nuam ka ti a, ka bula awm ang maiin nuam ka ti țhìn, chu vàng chuan min rawn biak hmasak hi ka nghâk kher tawh lo, ka be hmasa zing ve ta viau bawk.

"Tunah khân eng nge i tih?" ka tih leh chuan," Hei, ka bia che, ka nupui ni mai tùr hmêl țha lutuk mai nèn kan inbe mêk," chimawm tak hian a rawn ti a," Sual lo mai teh aw, ka rawn tibuai che em? Hna i thawk em tih ka hre duh a," thutak zet hian ka ti ve thung a.

"Ka thawk ka tih chuan min be chhunzawm duh àwm si lo va, ka thawk lo mai," nui hawk chung hian a rawn ti leh a," Tak tak chuan, ruah sûr hian boruak a tivawt deuh a, khumah puan sinin laptop ka inchhawp a. Nang, i mu tawh nge tlangvâl inlêng i nei zâwk?" a rawn tih chhunzawm zat a.

"Tlangvâl inlêng nei țeuh chungin ka rawn bia che," tiin ka han fiam ve a, a âwih lo nasa a niang, a rawn nui hawk hawk a," Hnawt haw vek rawh, engah nge ka nupui tùr chu ka phalna la lova an lo rìm ve ngawt? Ka rawn kal ang a, tuibûr hmuamin ka rawn phuh darh vek dâwn tih han hrilh hlawm teh," a rawn ti a, nui chung hian," I thil sawi ri kha an hria a, hei ka hrilh hma hmain an hlau lutuk a, an haw nghâl vek mai," ka ti ve a, kan nui dùn hawk hawk a.

"En teh, thil zawh che ka duh a?"

"Min zâwt rawh khai, i zawhna rêng rêng hi chu chhàn vek che ka duh alawm, eng thil nge ni ta?" a rawn tih chuan," Englo a nia, engati nge i inkhâwm ngai miah loh a?" tiin ka zâwt ta nge nge a, min chhâng duh kher ang em ka hre lo; mahse, zawh ngei erawh ka duh si, a chhan ka hriat chuan tih dàn a awm mahna!

"A țùlna ka hre lo va."

Thu dik a sawi ngei ka ring nghâl ringawt nia, inkhâwm chu țûl a ti lo va, a țùlna a hre lo a, a tùlna hre lo tân chuan inkhâwm kha awmzia a awm lo rêng a ni.

"A nih, engtik ațangin nge i inkhâwm loh țan i la hre thei em? I têt laite chuan i inkhâwm ve țhin ngeiin ka ring a, kawr pawh mawi tak tak i ha țhìn ngei ang a," ka ti leh a.

"Têt lai chuan inkhâwm maithei, ka len hnuah erawh ka inkhâwm ngai  lo," a rawn ti leh a, min chhànna chu ka la duh khawp loh deuh avàng chuan," Nikhua i hriat chian hnuah pawh biak in i rap ngai hauh lo maw?!!" ka ti leh a, mak ka ti ve pah deuh nèn, tlêmin ka awki pawh a sâng deuh.

A ngawih deuh vung vung hnu chuan,"Ka nupui Zonuni ka neih hnu khân biak in chhúng chu ka rap ve ngei alawm, min kalsan hnuah erawh..." a ti a, a ngawi zui ta daih a.

A nupui hlui hming leh chanchin a rawn sawi chhuak ta, a sawi ka hriat vawi khatna!!

*I NGAIH ROPUI TAK THIL AVÀNGA I MUALPHO CHÂNG A AWM ANG, CHUTIANG CHIAH CHUAN, I NGAIHNÊP TAK THIL AVÀNGA I MÀWI CHÂNG PAWH A AWM NGEI ANG*