☆MIN EN LA☆ - Bonus By Dingdi Pachuau

 ☆MIN EN LA☆ - BONUS By Dingdi Pachuau

Tu chu nge ni aw? Makimi aw chu niin ka hre si lo. A bialnu tharlâm em ni zâwk? Engati nge ka va phone hmasak ve hian hmeichhiain min lo chhàn ve ziah? Vawi hnihna chauh chu a ni na a; mahse, mak ka ti. A phone hi engati nge a bulah a dah ngai loh? Nge bathroom-a a luh hlàn ni lehpek? 'Ka nautê' tiin ka hming kha a save ngei a nih kha; mahse... thil awm dàn hi ka hre thiam lo.

A hnua ka ngaihtuah thui zêl phei chuan ka thin a rim a, ka zak bawk a, khatiang teh hrepa min han țawng khum mai kha, zahthlâk deuh mai asin, ka hmêl a hmu thei lo erawh ka lãwm phian, ka zak dâwn lutuk si a, men ngaihna pawh ka hre lo hial ang chu. Ngawi tak rawh se, min rawn phone hunah chuan a châk lo ang, a phone hmeichhia a lo chhàntîr man a hmu khawp ang, min tizak êm mai.

Min rawn biak hun ka ngaichãng reng a nia; mahse, zanin chu min rawn be ta miah lo mai. Inkhâwm hlànin min rawn bia a ni ang ti dâwn ila missed calls pawh a awm chuang lo, message min hnutchhiah bawk si lo va, ka rinhlelhna 'bialnu tharlâm' a neih rinna hi a dik a nih ka ring ta tù tú mai, rilru hrehawm takin zàn ka mu a, ka muhil thei lo, ka phone chu ka han tuai let ka han tuai let a, va biak hmasak erawh chu ka hreh tawh si, hmeichhiain min lo chhàn leh ka hlau tawh a ni.

Zàn dâr 10 thleng ka nghâk a, min rawn be lo va, message lah a rawn thawn hek lo. Rilru hrehawm taka zàn mut ai chuan tiin message ka va thawn ta ringawt a; mahse, chu pawh chu chhàn lêtna ka hmu lo. Rilru hrehawm taka ni khat han hman ral chu ka hreh viau a, tihngaihna lah ka hre dèr bawk si lo, va call tawp tùrin zàn lah a rei tawh bawk si.

A tûkah chuan hma takah ka tho a, ka nuin ka awm dàn chu a hria ang tih ka hlauh êm avàng chuan ka inthup hrâm hrâm a, hrehawm ka tihzia mai chuh, hlim luih mawlh chu harsa ka ti, ka hlim lo nasa mai si a. Chanchin hre chiang turin ka va be chhin leh tawp mai dâwn em ni ang; mahse, hmeichhiain emaw min lo chhâng leh ta se, bâkah, ani pawhin tûn thlengin min la rawn be lo a nia, ka message pawh min la chhâng lo bawk. Message chu ka han thawn leh a, ka han nghâk deuh vang vang a; mahse, min rawn chhâng chuang lo, en pawh a en lo.

Rilru hrehawm leh pangkhing hûin hun chu ka hmang a, ka nu leh ka nau hmuhah erawh ka intihlim lui hrâm hrâm thung. Min rawn be ta miah lo hian ka ngaih a ti țha thei hlawl lo va, min duh ta lova mi dang neih a duh ta a nih pawhin min rawn be tal se, thil awmzia sawiin min țhen thu tal min rawn hrilh se ka ti, hetia reh hmak hi chu a hrehawm.

Mami nèn kan inbiak chuan a unaua chanchin chu ka zâwt chhin a, ni thum lai mai a chanchin ka hriat tawh loh thu leh ka ngaihțhat tawh loh thu ka hrilh chuan ani chuan," A va mak àwm ve!! A phone a tibo te hi a ni mai lo maw? Biak ka lo tum ve chhin ang e, chutiang chu a fuh lo," a lo ti vat a, kei chuan ka rinhlelh rûkna sawi lang duh lêm lo chuan," Nia, biak lo tum chhin teh," ka ti a, tlêm chuan ka rilru hahna chu a zia ta deuh.

E, Jivan-a number pawh ka nei tak! Engtia han theihnghilh thei nge maw ka nih ni, ani hian a pu chanchin chu a hre ngei ang.

Ka han biak chuan a pu dam țhat thu chu min hrilh mai a, kan chanchin engkim hre vek ni mah se a bula thil awm dàn han zawh chu ka hreh deuh hlek a, a awm dàn a rûka thlithlai ka ang dâwn bawk si, ringhlel deuh anga a chanchin ka zawh chuan, ka duh meuh si lo.

"A phone a tichhia em ni le ka phone thei tlat lo va," tiin dâwt ka han sawi ta ringawt a, ani chuan," Chutiang chu ka hre miah lo, nimin zîng khân a zin chhuak daih lehnghâl a, kan la inbe miah lo chu a nih hi," a rawn ti a, chutah," Ka lo zâwt chhin dâwn em ni ang? Biak ka lo tum ve chhin ang e," a rawn ti leh a, a ngaih loh thu chu ka hrilh nghâl vat ringawt. A chhan chu a va phone a nih hlauh chuan amah(Jivan-a) ka biak thu leh a hnêna a chanchin ka zawh thu a sawi ngei ang, chu chu ka duh lo a ni. Zoteite pawh ka duh phawt chuan ka biaktîr thei tho a; mahse, kan chanchin an hre ngei dâwn si a, chu chu ka duh lo a ni. A phone chu lo chhia pawh chu lo ni ta se, landline ațang pawhin min rawn be thei alawm, min ngaipawimawh a nih chuan, bialnu tharlâm a nei a nih ka ring ber mai, min hnê tawh a ni ang.

Zàn mutnaah chuan ka mittui chu a tla deuh reng a, ka sûm thei lo, țah chhuah êm chu ka hreh a, țap ri lovin ka mittui erawh a tla zung zung thung. Hetiang mai maia min tih hi chu ka ring ngai bîk lo asin, min duh ve êm kha, min ngaiin min thlahlel a, ni khat lek pawh min be lovin a awm ngai bîk lo a nih kha. Heti maia min hnâwl leh thut thei si hi a mak tih loh rual a ni lo ka tân chuan, amahah ka innghat ve nasa tawh a, ka thianghlimna pawh ka hlàn lo chauh chu a nih kha. Hetianga kan awm dâwn vàng hi a ni ngei ang chu, ka lo la thianghlim theih ni, min ti lui lo pawh kha hetia tàwpsan min duh vàng hi a ni mai lo'ng maw? Mahse, mipa a ni a intih si chuan chiang takin min țhen thu min hrilh mai se, hetia reh daih lo hian min hrilh tawp mai se ka tuar dam zâwk ngei ang.

Ka inngaihtuah a, vawi khat tal chu ka biak ngei a ngai a ni, kan inkâr zâwt fiah tur tal pawhin, tu pawhin min lo chhâng mah se amah chu ka be lui tho ang, pau tikhauh luiin zàn dâr 10 vêlah chuan a number chu ka hmet chhuak a; mahse, awmzia a awm chuang lo, ring pawh a ring lo, biak theih pawhin a awm duh lo a nih chiah hi.

Mami pawh chuan a be tlang thei chuang lo. Min rawn hrilh a; mahse, lo biak zêl a tum thu a sawi a, kei erawh chuan," A, keimah vàng chuan tum buai duh suh, kan chhûngkaw dinhmunin a phù loh tehlul nèn, ka nuin kum khat nghâk tura a tih kha a nghâk zo lo ta pawh a ni ang e, a tân chuan inhnarnaah pawh ngaih a awl dâwn êm asin, ka hre thiam alawm," ka ti ve thung a, ani lah chuan," Chutiang sawi suh, kum khat nghah tih mai mai, a duh tak tak che a nih chuan a nghâk tùr che a ni mai, engah nge biak theih loha a han awm ngawt? A dik lo rêng rêng! Ka biak theih hunah chuan a châk lo ang," a ti ngal ngal a, mi țan hi a tina ve thei a nia, ka țhiani hi chu.

A tân chuan kum khat nghâk tùra intih kha intham lohna leh inhnarnaah a ngaih theih ve tlat, ngai kàwi lui duh tân chuan a ni chiang alawm. Ani phei hi chuan khatia palai rawn kal kha kan lo hnar a ring miah lo ang, ka nu lo chhàn dànah pawh khân induh pawh a ti ngei ang, a rûk chuan a lungawi lo viau thei ve tlat, phuba lâk nân min duh der pawh a ni thei, eng mah nei nei si lova indah sâng pawh min lo ti maithei asin!!

Hna thawh chhuah ka phùr lohzia mai chuh; mahse, awm mai mai thei ka ni lo va, leipuia kal ngei ngei ka ngaih avàngin phûr lo zet chuan ka inphur chhuak a, ka nu erawh chu ka pute lo lamah a chhuak ve thung. Kan bêkté ka thlen chuan ka lung a lêng thar leh ngei mai, kan pahnih khân helaiah ngei hian kan țhu dùn a, lum viau mah se insi rialin kan țhu dùn a nih kha.

Ka mittui a rawn hnai leh tawh, chutah a rawn far koh a, duh lovin ka hru tãwk ringawt, tihngaihna lah ka hre dèr lo, ni e, hei hi ka chan tâwk mai tùr chu a lo ni dâwn ta si a, ka nu leh ka chhûng dangte chuan engtin tak ngai ang maw? Ka nuin a hriat ve hunah a thin a rim ang em? Mahse, induh loh leh dâwn rau rau chuan inneih hma ngeia induh loha ințhen hi a țha, mi dang pawhin ka tawrh ang hi an tuar ve tawh ngei ang a, keimah ang tho hi an ni ve ang em?

Ka phone rí pawh chu ka lo hre lawk lo va, ka ngaihtuah ram ațanga ka harh chhuah chuan ka han en vat a, number ka save loh a  lo ni nghe nghe. Ka mittui ka hru hul sawk sawk phawt a, ka be ta chauh a.

"Hello?"

"Rëngpui!! Lalpa, ka lãwm e! I aw ka han hre leh thei ta chu ka lâwm hle mai! Ka ngai tak zet che a ni," Jakob-a aw ngei mai chuan a rawn ti a, mak ti takin ka en ngai ka en reng a, Jakob-a aw chu a ni tak tak si a, eng atân nge min rawn biak? A lung a lêng ve leh deuh si a ni ngei ang.

"Jakob, engati nge hetia i awm a? Min duh tawh loh pawhin țha takin sawi mai la?" Ka țawng chhunzawm ngam tawh lo, ka mittui chu mahni inkhawngaihna avàngin a rawn tling leh kul kul tawh a, a far a, a hriata han inhnìt ka duh loh vàng erawh chuan ka insûm hrâm hrâm a, țawng pawh ka țawng ngam tawh lo.

"Rêngpui, eng thil nge i sawi tâk?!!  Mihring tung chhhoa kal zîngah nang bâka duh ka nei lo ka tih tawh kha."

A thil sawi leh a țawng ri ka hriat chuan ka hnuk a ti ulh tlat pek a, ka insum hma chuan ka țap chhuak ta hawk mai nghe nghe a, nêp chu min ti ve ngawt ang, kei ngei pawh chu ka inthiam lo, phone-a  țah khum te chu ka la ngaihtuah chhin lo hrim hrim.

"Ka nautê, engati nge i țah?!! I țha em? A chhan min hrilh teh. Aw... i bula awm ka va duh tak êm!!" a rawn ti mawlh mawlh a, kei erawh chuan ka la chhâng thei lo, țah hawm hawm reng chu ka la châk tlat.

"Aw le, ka nautê hi eng vàngin nge a țah? A țah ka phal hleinem," a rawn tih leh phei chuan ka țap uar sauh a, bàn mai ka tum lo, ţah a nuam tlat.

"Ka rawn biak har vàng chein em ni i lung a chhiat? Nge min ngai viau tawh zâwk? Kei pawhin ka ngai lutuk che alawm."

Ka zia hnu thlengin min biakna chu a la ti tàwp duh bîk lo, min biain thu thlum lam min fah reng a, ka bulah awm phei se chuan min kuahin ka hnung chu a chûl hliau hliau ngei ang le.

"I zia tawh em? Chuti chu, i țah chhan min han hrilh tawh teh le, tuin nge khatianga lungchhe taka țahtîr che ni?" a rawn tih leh chuan," Kan inkâr hi a tàwp em?" ka han ti tâwng a, ka thil hrilh chu a hre thiam chiah lo a ni maithei," Eng maw i sawi!!" a rawn ti ta chiah a.

"Kan inkãr hi a tàwp em ka ti!" ka tih leh chuan," Engati nge a tàwp ngawt ang?" a rawn ti leh a, ka hnial zui peih ta lo va," Nangmah vàngin ka țap a nih kha, ka be tlang thei lo che a, ka messsage pawh i chhiar hek lo, ka rawn biak theih lai che lahin nangman min chhâng lo bawk. Nula dang i duh zâwk a nih chuan tlang takin min hrilh mai rawh, ka tibuai dâwn lo che," ka ti chhuak ve ta a.

"Chutiang chuan, nula dang duh tùrah min ngai tihna a ni tiraw? Réngpui, ka rilru ka hrilh chiang viau tawh chein ka hre si a, engtin nge mi dang duh zâwk ang tùra min ngaih theih?" a rawn tih chuan," Thil tam tak a awm ang chu, phone-a sawi fel vek chi pawh a ni lo," ka ti leh a.

"Chuti, ka rawn zin dâwn tihna a ni ang maw?"

"I thu vek alawm, sawi tùr erawh a awm țeuh!" ka ti bak ve hlak a, phone-a min biak lohna chhan pawh a sawi miah loh kha, eng emaw chu a awm a ni.

"A țhat hlauh chu! Ka rawn kal ang chu," a tih chuan," Insawi fiahna tùr kha rawn dap țha viau la," ka ti leh hlak a, tunah chuan țahna lam a lang tawh lo, chhûngril lama thinrim deuh tet tetna ka nei chho ta zâwk . A pawi lo, a insawi fiahna ka ngaithla ve phawt ang chu.

Rin loh takin a tûk tlai lamah a rawn lang leh ta ngei a, heti vut vutaa rawn kal hi chu ka ring hauh lo asin, a zin haw lam a ni ngei ang chu.

Ka țawng duh loh khum ve a, nuih pawh ka nuih lo. Ka be ve tho,  lo be tùr ber ka nu a awm tlat si lo va,  Mercy nèn kan awm tawh a, a duh ang pawhin min khawih theih loh bâkah min kuah thei hek lo, a duh angin a awm thei lo a nih ber chu, a insawi fiahna ka ngaithlâk hnuah a chunga thu tlûkna ka siam chauh ang, a chhan chu eng pawh lo ni se, tunah hi chuan ka lung a awi lo ve tlat.

*CHAPOPUI TÙR KHAWPA THIL HLÛ LEH ROPUI HI HE KHAWVÊLAH HIAN A AWM HAUH LO, CHAPO THEI TU MAH KAN AWM LO TIHNA A NI*