☆MIN EN LA☆ - 34 By Dingdi Pachuau

 ☆MIN EN LA☆ - 34 By Dingdi Pachuau

"A chanchin ka hre châk hle mai, min hrilh phal ang em?" tiin kan ngawih deuh hnuah chuan ka zâwt ta a, 'Min han hrilh teh' han tih dawt ai chuan zãwldawh deuh taka han tih hian chhànna ka hmuh theih ka ring a ni.

"Hun kal tawh a nia, i hre duh kherin ka ring lo."

A mood ka ti-off vekin ka ring! A țawng dàn ațangin a hriat reng mai, hna a thawk leh dâwn a nih phei chuan a ngaihtuahna pawh a sâwrbing thei tawh miah lo ang, ka zâwt sual viauin ka hria.

"Ka tihpalh aw, i sawi duh loh chuan ka tilui lo che a nia, i inkhâwm ngai loh chhan kha ka han zâwt duh mai che kha a ni a,  rilru tihhrehawm nân hmang lo hrâm rawh aw," ka ti ta sawk sawk a, a thaw hawk ri chu ka hria a, nuam lo ka ti ru kher asin.

"Carolene-i kâ ațangin i hriat nual tawh ka ring," a rawn tih leh tâkah chuan rang zet hian," Aw, hre ve nual e, in induh tawnzia leh in inhmangaih tawnzia pawh a sawi nghe nghe a," ka lo ti vat a, ani chuan," A sawi dik a nih chu, ka duh a, ka hmangaih a, ani pawhin ka duh leh hmangaih ang chiahin min duhin min hmangaih bawk; mahse, he khawvêl ațang hian lâksak ka ni a, min lâksaktu Pathian hi ka dem a, a hnêna inkhâwm tùra biak ina ka kalna chhan tùr hi ka hre lo, țûl ka ti hek lo, khati khawpa mi fel leh țha kha ka mamawh êm êm a ni tih hre reng chungin min lâksak duh a nia, ka dìlna fahrah tak pawh min chhâng duh hek lo, ka dìlna min chhànsak duh lotu hnêna kal hi a țûlna ka la ngaihtuah chhuak lo rêng rêng," a rawn ti ta duah a.

Sawi mai tùr ka hre lo, a țawngkam chhuak zawng zawngah chuan a thinlung natzia chu a hriat theih rêng mai si a, a nupui Zonuni a lo hmangaihzia leh a boral chu a tuar natzia ka hriat chian lehzual phah viau bawk.

"Thil dang eng mah ka dîl lo, a nunna min lâksak lo tùr chauhin a ni ka dìl ve ni, chu chauh chu, hun dangah pawh thil ka la dîl chhin ngai lo,  engkim ti thei a nih chuan engah nge ka dìlna tlâwm tak kha min tihhlawhtlinsak mai loh? Țawngțaina chhângtu an ti a, a ni tak tak a nih chuan engah nge ka țawngțaina kha a chhàn loh?  Ka duhna min tihhlawhtlinsak duh lotu chu ka mamawhna ka hre thei lo a ni," a rawn ti leh charh charh a, ka lo ngaithla kar ringawt. A rilru luhlulzia ka hre chiang ve tawh a, chuti maia awlsam chuan a rilru hi a thlâk mai mai lo ang tih pawh ka hre chiang ngang mai.

"Ka hlimna hmasa ka chân tawh a,  nang hi chu chàn che ka duh tawh lo a nia, chu vàng chuan, lo fîmkhur viau la, hna pawh kha lo thawk vak vak suh, i damlo palh hlauh ang e. Mamawh i neih chuan sawi hreh lo la, ruah sûr hnuaia ram lama hna thawka i chhuah pawh kha țûl ka ti hran lo, nang leh i chhûngte kher kher hi chu ka châwm hneh ve tâwk ang che u tih ka hria a ni," a rawn tih leh chuan ka han nui a," E, kan dam te chuan hna kan thawk ve ang chu, nang pawh i thawk char char alawm le, zanin tak hi chu thawk lo mai rawh aw, ka be duh si che a," ka ti lêt ve a.

"Teh rêng mai, hna ka thawk lo ka tih tawh kha, hetia biak che hi ka tân chuan Vitamin hlãwm a ni a, ka chakna i ni a, han chauh ve deuh châng pawhin i aw ri ka hriat hi chuan ka chak sawt țhìn a ni, tunah pawh hian ka chak leh tawh a nia aw...exer lain ka va tlãn leh rih dâwn em maw ni ka ti hial." 

A thil sawi avàng chuan ka nui hawk hawk a, amah nèn a inmil lo ka ti lutuk a ni, kum lama upa ve viau tawh si a thil sawi chu a naupang chhia ka ti a; mahse, ngaihthlâk nuam ka ti tho bawk si.

A mood off tak pawh kha tunah chuan a zia leh ta. Kan boruak a zãngkhai hnu chuan rei tak kan inbe zui nghe nghe a, hna thawh a duh palh tâkin tia biak tàwp ka tum pawh chuan phal lovin," Min rawn be hmasa a, chutin min biak tàwp mai ka la phal lo, ka la be kham lo che," a ti tlat a, dârkâr chuang fê kan inbiak hnuah chuan," Hna thawh tùr i neih kha, thawk leh tawh rawh, naktúk lamah ka rawn be leh dâwn che nia," ka ti ta hrâm a, ani pawh chuan," I inlêngte'n rei an ti tawh che a nih chiah kha, min lo cho vek dâwn nia," a ti ve thung a, nui hawk hawk chung chuan kan inmang țha ta rih a.

Tho chhuak lehin ka nu chu titipui ka han tum deuh a nia; mahse, ani pawh room lamah a lo kal ve tawh niin, Jakob-a nèn kan inbe rei êm mai a, dâr 9 a ri thuak a nia, ruah a sûr cherh cherh bawk nèn, a mu ve tawh pawh chu a àwm viau mai.

A tûkah chuan morning message thlum zet mai min lo hnutchhiah a, ka nui sak a, nilêngin hei hian ka awm a tinuam leh dâwn tih ka hria, ka hlimna siam hi chu a thiam ve ngawt mai. Hetiang hi ni reng thei se, kan inneih hunah pawh a nungchang leh awm dàn hi thlâk miah lo se ka ti.

Hna thawka chhuak lovin in bul ka tifai a, zîng ni chhuak a țang țha a, in bul tihfai pawh a nuam viau e. A la hnim hran lo va; mahse, a hnim tak tak hmaa tihfai hi ka duh țhìn a ni. Ka tifai zo chu ka han en vêl a, ni sa țha tak chuan a tilang fai zual a, hmuh pawh a handamin thlìr a nuam ka ti.

Chhùn chawlh lai chuan phone enin message ka check zung zung a, message pakhat ka han en chuan ka account-a Rs 20,000 a rawn luh thu min hrilhna a lo ni a, SBI lam ațangin a ni a, mak ka ti kher asin! Khawi ațangin nge a rawn luh ve ngawt? Ka account number hria tu nge awm? Ka naute chuan an hre ngei ang a, anni bâkah mi pakhatin a hre leh ngei bawk ang, hlawh min petu Jakob-a. Ani hi, mamawh lei nân tiin min rawn thunsak a ni lo maw?!! Mahse, engati nge a rawn thun ngawt ang? Ka duh hleinem, ka han ngaihtuah a, ka naute rawn thun a nih chu ka ring lo nghâl mai a, Jakob-a a nih ngei ka ring, hnial rual a ni lo.

Ka be ta nghâl a, a buai ang em tih pawh ka ngaihtuah hman lo. Min chhâng har deuh lehnghâl a, a buai a ni maithei.

"Jakob, ka account-a pawisa hi i rawn thun a ni tiraw?" ka ti nghâl a, ani chuan," Ni e, engati nge?" a rawn ti ta mai rêng a, kei chuan," Jakob, hetianga i rawn tih hi ka duh lo asin, pawisa duh loh tak tak chu a awm miah lo va--," ka tih lai mêk chuan ani chuan," Ngawi lawk aw, ka rawn be țha ang che," a rawn ti a, a titàwp zui nghâl a, a buai a ni ngei ang, inlêng a nei pawh a ni mahna.

Rei lo te hnuah chuan min rawn be ta ngei a," Inlêng ka neih lai a la nia, chu vàng a nih kha, chuan, eng maw han sawi zawm la?" a rawn ti nghâl a, kei chuan," Min țanpui i duh tih ka hria; mahse, hetiang ringawt hi chu thil dik a ni lo, ka pawm thei lo ang, ka nuin a hriat phei chuan..." ka han ti a, ka nu chu ka chhuanlam ve ta zaih a.

Ani lah chuan," I nu chu hrilh lo la ni mai alawm. Rêngpui, ka nupui tùr i ni a, ka neih zawng zawng hi i tã tùr vek tho a ni, sum hman tùr in neih loh vàng tiin ka rawn thun a ni lo a nia, i tân hian thil ka tihsak khât che a, kha kha chu pawm mai teh, tam tham pawh a nih loh kha, mamawh lei nân i lo hmang dâwn nia,"  a rawn ti ve thung a. 

Pawisa min rawn thunsak hi ka lãwm lo a ni lo, a thlàwna hetia pawisa dawn hi țha ka ti lêm lo a ni, innei tawh ni ila chuan tlêmin ka hre thiam ang. Inneih hma ațanga sum inpêk hi chu ka tih zâwng a ni lo va, a sum ei heksak lah ka duh hek lo. Ka thawk ve thei a, ka dam țha a, kan mamawh chu ka thawk chhuak ve ang chu tih hi ka ngaih dàn a ni.

"Tih nawn tawh âwih loh aw, a vawi khatna a ni a, a tàwpna ni nghâl bawk rawh se, kan mamawh tùr chu kan thawk chhuak ve thei a ni, ka chapo vàngah min ngaihsak lo la, lãwmna nei loah min ngai lo hrâm bawk la ka duh a ni. Ka lãwm a, ka zak pah tho bawk a; mahse, hetiang hi chu thleng tawh lo hrâm rawh se aw," ka ti ta duah a.

"Hmeichhe dang i an lohna hi min tihlimtu a ni. Hmeichhe țhenkhat chu ka office-ah rawn lêngin sum min rawn dîl țhìn asin, an taksa pawh an ui lo, sum an hmuhna a nih phawt chuan. Nang chu i dang hlak, khatiang kha ni reng ang che," a rawn tih chuan ka nui sak a, han fiam zauh ka châk tlat pek a," A nih, chûng hmeichhiate chu engtin nge i lo chhàn țhin a? Sum chu i lo pe țhìn em, a thlàwn liau liauin a nia ka tih ni?" ka han ti a, ani lah chuan," Pe dâwn lo'm ni? A thlàwn chiah loin a ni maithei thung a," a rawn ti lêt ve nghâl mai a, a nui zui hawk a.

"Tenawm suh..!!" ka ti țhat a, a nui leh hawk hawk a," Eng nge, an ui loh miau te chuan. A thlàwn ngawta pêk ringawt chu a tih chi bîk loh," a rawn tih leh phei chuan," Ka ngaithla duh tawh lo, duh tâwk ang," ka ti ta chùl a, a fiamthu a ni tih ka hre tho a; mahse, khatiang lam a sawi kha ngaihthlâk nuam ka ti lo.

Hun a liam ve zêl a, kum chanve zet kan lo chuangkai leh ta. Pathian zâra kan dam chuan tûn ațanga kum chanve zet a liam leh meuh chuan palai hmêl pawh ka hmu leh thuai ang a, ka nu pawhin remthu a lo sawi thei ngei tawhin ka ring, chu hun lo thlen hlàn chu ka nghâkhlel tak zet a ni.

Ka naute pahnih pawh Lunglei lama kal tùr hmêlhriat hnai kan hriat phawt chuan an chawhmeh tùr kan thawn ziah a, Mâma hlawh tam lo takin an khawsa ve nãw nãw a ni mai si a, a hlawh ațanga in luah man, tui leh êng chhit man an han pêk hi chuan pawisa chuangbãng a tlêm tawh êm mai a, chu vàng tak chuan chawhmeh lam tal hi chu kan thawn ve hrâm hrâm țhìn a ni. A hringa inthawn hi a buaithlâk deuh avàngin ka nu chuab thil rèp a uar phah a. Anthûr, Anțam, behlawi hnah, bàibîng leh mautuai hi a rêp uar zual a, dah țhat a lo awl bawk a, chu bâkah, pickle lam hi a uar leh a, chawhmeh a lo țha rei deuh bawk a, a tam laiin Hmarchatê, hmarchapui, tumbu, țawktê, theihai leh khanghu tih vêl hi a siam țeuh a, kei pawh Lungleia ka la awm ve lai khân min hawntír bâkah a rawn thawn zauh zauh rêng a ni.

Palai hmêl ka hmu a, pasal ka nei thuai dâwn tih an hriat vàng nge tlangvâl inlêng hi ka nei ngai lo tluk a ni a, ka neih ve chhun pawh kan kohhran țhalai lama hruaitute an ni mai a, pathlawi lam erawh an rawn lêng ve zauh zauh thung. Inlêng pângngai takah chuan Nunhlima tih loh hi chu ka nei lêm lo, ani kha a nupui nèn khân an innei tluang tùrah ngai ila, hlim takin awm se ka duhpui, tlangvâl fel tak a ni si a, a nupui pawh a chungah a sual thei lo tawp ang.

Zanriah ei khamah Mercy'n lehkha a zir a, ka nu nèn chuan kan titi dùn sap sap a. Jakob-a chanchin ka hriat ang ang chu hrilhin inkhâwm a tih ngai loh chhante chu ka hrilh a, ngun takin a lo ngaithla a, ks sawi zawh chuan," A tân nasa lehzuala dílpui a ngai a nih chu, mi chu eng anga officer lian leh eng anga mi tê hnuaihnung pawh ni se, kohhran a belh tlat chuan mi nuihsawh a  hlawh ngai lo, a fing tlat tihna a nih ber chu. Chutih rualin a lang a mawia kohhrana inhman emaw mi fak leh chawimawi duh vànga inkhâwm tlut tlut emaw ang chi hi a awm ve leh theih a, thinlunga tih tak takna a tel loh chuan engtihna mah a ni leh chuang lo. Hei tak hi a hlauhawm hlê a ni, pâwn lamah chuan țha ber angin an lang a; mahse, an nun chhûngril erawh a kha hlê si, kristian hmêl tibàltute ka ti mai, an nunah hmuh tùr a awm si lo va, mi nuihzat an hlawh mai țhìn. Kan va teh tùr chu a ni chuang miah lo; mahse, an rahah an nihna dik tak chu a lang chhuak țhìn si a, a tàwpah chuan an mualpho leh nge nge țhìn a ni," a ti sap sap a.

Ka nitei( ka pate tê ber) Lungleia thil țúla tia a passl nèna an kal chu kan khuaah an rawn pêng haw a, pêng haw ti ila min rawn tlawh chhuah ve hrim hrim an duh vànga rawn kal an ni mah zãwk. Kan inhmuh lohna a rei ve tawh bawk a, ka lo hre lo têp a ni, inhmuh hun a vâng ve êm a, anni Dârlàwnah daih an la awm reng a, zin vang vang a nih ngawt loh chuan han kala han tlawh theih ngawt a ni bîk lo a ni.

"I lo puitling tawh hle mai, Rêngpui, rawn zin ve ta che? I pu pawhin a hmu châk ngawt ang che, in rawn zin ngai si lo va, keini lah kan rawn zin hman bîk si lo, tûn hi hun remchâng tak a ni, kan rual hian rawn kal ve la?" tia ka nitei'n min sàwm chuan ka nu chu lo inrawlh vatin," A remchâng khawp mai. Ni e, Bawihi, i thu thu a ni mai, zin harh pawh hi a țhat châng a awm ngai a nia," a lo ti zung zung a.

Chutia ka nuin a tih tâkah chuan han hnial emaw han țan deuh tlat ang chi kha ka hre lêm lo va, amah hi ka chhuanlam tùr ber a ni a, hetia a tih tâkah hian han zin khawthawn mai mai pawh a châkawm ve tho ka ti, bâkah, Dârlàwn pawh hmuh leh a châkawm tawh alawm.

Jakob-a hnêna ka zin tùr thu ka hrilh chuan min zâwt chîk khawp mai a, ban deuh hlekin a țawng a, a phal vak lo a nih ka ring deuh ngawt bawk a.

"I awm rei ang em?" a tih chuan," Rei lo ang, a rei berah kâr khat vêl bâk a ni lo ang," tiin ka chhâng a," Kâr khat..." tiin a phun sup a, chutah," Ka thinlung i zinpui daih dâwn a, dimdâwih takin lo enkawl țha ang che. Tlangvâl inlêng nei miah suh la, an rawn lèn dâwn pawhin mu daih zêl ang che, nang chu tlangvâl rìm chî i nih tawh loh kha, ka tâ i ni tawh," a rawn ti leh sup sup a.

Zàn khat an riak a, a tûkah chuan ka niteite khua Dârlàwn lam pan chuan ka niteite Alto hlui ve deuh tawh chuan kan tlãn ta vang vang a, Jakob-a ka hlatsan zual sauh dâwn si a, ka ngai lâwk angreng, tunah tak te hian eng nge a tih ang? Min rawn ngaihtuah ve ang em?

*HLAWHCHHAMNA HI HLAWHTLINNNA KAWNGA BET TEL VE TLAT A NI A, HLAWHCHHAM HLAU MI TÂN CHUAN HLAWHTLINNA KAWNG ZAWH HI THIL HARSA TAK A NI A, HLAWHCHHAM A HLAUH TLAT AVÀNGIN HLAWHTLING TÙRIN A BEI NGAM LO ȚHÌN A NI*