☆MIN EN LA☆ - 35 By Dingdi Pachuau

 ☆MIN EN LA☆ - 35 By Dingdi Pachuau

Kawngah ka rùi lëm lo va, ka nitêi chu a țawng duh ve bawk a, khua a har hman lo ve khawp mai. A pasal Pa Rina pawh a țawng duh ve tho; mahse, ani chu mipa a ni a, ka nitêi ang êm chuan a țawng nasa ve lo.

Ka nuin ka chanchin a hrilh nual avàng khân a nia zin tùra min sàwm pakhat ni, bâkah, ka pa lama kan chhûngte nèn hian kan inhmu khât êm êm a, anni an rawn zin thei bîk lo va, keini lah chuti hlauh, hetia hun remchâng a awm hlauh hi a vànneihthlâk ka ti viau zâwk a ni.

Kan chhuahsanna a rei ve tawh bawk a, a lo changkãngin in pawh a lo tam tawh viau mai. Ka nitêite inah chuan ka innghat phawt a, zanriah ei kham lamah erawh ka pute awmna lamah ka insawn phei ta thung a. In pawh an lo sa ţha vek tawh niin, a zau țhain a nuam viau mai. Ka zin a ni tih hriain an lo inko khâwm ve a, ka pute inah chuan kan inhmu khâwm ta rup a nih ber chu, unau pawh kan lo awm ve nual e. Mipaho phei chu an sâng hlawm lutuk, an la naupang tih lah chu an hmêlah a lang reng a, Mâma ka hre chhuak lo thei lo, a chhan chu thlahtu bul thuhmun ni ta na nâ nâ chu, inanna an nei ve hlawm miau si a.

Mut dâwna phone ka en chuan Jakob-a missed call ka hmu, vawi 3 lai a la ni zui, zanriah ei hnu lawk khân ka mute kha a ni a, chhûngte nèn kan inhmu khât a, kan titi laia phone call-in min tihbuai ka hlauh vàng kha a nia, a thinrim loh hrâm ka beisei. Vawiina kawng laka kan chawlh lai khân kan inbiak tho kha maw, ka chinchâng chu a hriat tho kha.

A lo thinrim lêm lo va; mahse," I thlen tluan leh tluan loh hre lova nghah ngat ngat che chu thil nuam a ni miah lo, ka ngaihtuah reng che a, min rawn biak loh tal pawhin text message tala min rawn hrilh tùr che a nia," a rawn tih chuan dik ka ti khawp mai, chu vàng chuan," Ka tihpalh lutuk! Min ngaidam hrâm rawh, ka thiam loh liau liau a ni e," tiin chhuanlam pawh chu ka siam duh ta lo va, tihian ngaihdam dîl mai ila thil a fel hma zâwk ka ti ve tlat.

"Ka ngaihtuah êm vàng che a nia, i chau em? I chau ngawt ang," a rawn tih leh chuan," Chau lo ve, motor chuan ringawt te chu chauhna tham a ni hleinem," ka han ti ve a, ka nui pah a, ani pawh chu a rawn nui ve a," I chhûngte chu an lo dam maw? An lo làwm che em?" tiin zawhna dang dang chu min zawh chhunzawm leh a. Rei deuh chu kan inbe lo, ka ngam chiah lo deuh a, a chhan chu room daidanna atân tile chauh an hmang si a, lehlam room-a muin ka țawng a hriat vek ka duh bîk lo a ni.

A tûk chawhma zawng chu ka pu nen kan inkàwm ti ila a dik ang, kan chhûngkaw chanchin min zâwt a, a upa ve tawh a, thil min zâwt chîk a, a dîlchhût êm êm bawk si a, hun a duh rei lo thei lo. In puia awm ka pateate nupa hi ka nutei(ka patea nupui) nu damlo kanin an lo zin chhuah lai tak a lo ni ve a, an fate nula leh tlangvâl ve uaih tawh pahnih leh ka pu chu ina awm an ni mai a, anni pahnih lah chu school kalin an chhuak bawk si a, ka pu chu ka lo awm a ni ber mai. Chawhnu lamah erawh chuan ka nitêi a rawn lêng ve leh thung a, kuhva ei suah suah pah chuan a titi a, ka pu muthilh hlàn chuan kan têt lai chanchin ka hriat phâk ve mang loh chu min hrilh ta malh malh a.

"Nang chuan i hre pha kher lo ang, hun kal tawh tho a ni a, in têt zual lai khãn i nu hi ka khawngaih thei viau asin, a chhan chu i pa khân zu a in ve zauh zauh tlat a, chuta kârah ngaihzâwng ve deuh reuh kha a nei nia sawi thãwm a awm bawk. I pa kha kan u zãwk ni mah se i nu hriat loh hian ka hau fo a, a ngaihzâwng nia an sawi chu a ngaizâwng ngei em tih hre chiang ve lo mah ila khatiang thuthang hriat kha ka zak a, i nu ka khawngaih rualin nangmahni pawh kha ka khawngaih bawk che u a, in la tê bawk si. Han hauin han zilh ve mah ila a ngawi reng a, min chhãng lêt ngai miah lo, thinrim tak pawhin han hau tàwn táwn mah ila min chhâng lêt ngai chuang lo, i pa kha chu pa zaidam tak a nih kha maw, in lo leikàn deuh khân a in tam ta zêl a; mahse, rui buaiin a awm ngai lo va, a hna pawh kha chu a țhulh phah ngai lo; mahse, zu in hrim hrim kha țha ka ti lo va, ka hmuh apiangin ka hau lo thei lo. I nu kha fel ka ti thlâwt țhìn asin, kan hmuh laiin vawi khat mah i pa a thinrim khum leh lungawi lo hmêl a hmuh ka hre miah lo, kan hmuh loh lai pawhin a thinrim khumin ka ring chuang lo, thinrimna tel lovin i pa tân khân a țawngțaisak ngat ngat țhin zâwk a nih chu, kha kha hmangaihna dik tak an ti ngei ang; mahse, kei ni ila ka theih loh tùr a ni tih ka hre chiang, i nu kha chu a zaidamin a fel ve êm a, a fate pawh hi in fel ngei ngei ang tih ka ring tlat a ni," a ti barh barh a. A thil sawi chu ka hriat ngai loh leh ngaihtuah pawh ka la ngaihtuah chhin loh a nih avàng chuan mit pawh khap lovin ka lo ngaithla a, mak ka ti viau bawk a ni.

"Ka pa kha engtia boral nge a nih kha? Ka hre chiang lutuk tawh lo va, thing mistiri a ni tih leh hna thawh tùr a hmu thei viau tih kha chu ka la hre chiang ve deuh a," ka tih chuan ani chuan," Aw, Pathian zârah hna kha a hmu ve thei ëm êm mai a, in chhûngkaw khawsak pawh kha a zia phah ve viau a nih nghe nghe kha; mahse, ka sawi tawh kha, zu kha a in ve zauh zauh a, kha khân a pum lamah insawisèlna a neihtîr a, insawisèlna a neih tâkah kha chuan a han insûm ve a, rei tak a in lo nghe nghe, hna pawh a thawk chhunzawm thei reng tho; mahse, a insùm viau hnu khân vawi khat kha a han ti leh zauh ni àwm tak a ni a, kha erawh kha chuan a thawk na ta a, a dampui zo lo ta a nih kha," a ti leh malh malh a.

"A lo nih chu, chiangkuangin ka hre miah hleinem," ka lo ti a, ani chuan," Hei i pa Rina pawh hi i pa ațanga thiam chhuak ka ti mai, naupang tëin i pa kha a zui ve țhìn a, a chemkalna tak a lo ni ve bawk nèn, tûn thleng pawh hian a la chawlhsan thei lo, an rawn ko ve zêl a, an rawn koh loh pawhin in lama a siam tùr tal tiin eng eng emaw hi an rawn order ţhìn a, chu chu kan ei bël ber a la ni chho zël chu a nih hi," a ti ve leh a.

A bula awm hi a khawharthlâk loh ka tih tawh kha, tlai dâr 3 hnu lamah a haw ve ta chauh a, kei pawh eirawng bâwl tùrin ka inbuatsaih a, Sawsawmi school rawn bângin min rawn pui nghâl bawk a, kan hneh khawp mai, kan bãwl zo thuai a. Zanriah hma takah kan ei a, fùr lai ngang a nih vàngin ruah pawh a rawn tla leh ta fuap fuap a; mahse, kan lamhnai țhenkhat chu an rawn lêng tho.

Mut hmunah erawh chuan chawhnu lama ka nitêi thil min hrilh kha ka ngaihtuah lët a, ka pa khân zu a in țhin tih ka hre lo rêng rêng mai chu mak ka ti a ni, a rimah pawh hriat ve àwm tak a neih vei nèn, engtin nge vawi khat tal pawh ka hriat chhin loh theih ni? Chuan, ka nu rilru chu a hah thei ngawt ang chu, mi sawi a hre ve vek àwm si a, rilru hrehawm takin hun a hmang țhìn ngeiin ka ring, a inbunruahna tùr keini a fate lah kan la tê si, a rilru hahna sawipui tùrin Dárlàwnah lah a unau pianpuite an awm ve hauh bawk si lo, a lo va tuar nasa dâwn êm!

A tûk lamah chuan ka pu hovin muangchângin kan in hmun hlui lam kan fang a, concrete in țha tak leh lian tak chu kan inhmun hluiah tak chuan a lo ding vùng tawh a, luahlum erawh a la ni lo, a bul vêlah pawh in lian lêm lo paruk vêl lai chu sak a lo ni tawh bawk a. A hmunhma a danglam tawh êm avàng chuan ka hre thiam chiah tawh lo, an lo lai danglam ve tawh bawk nèn, ngaihruatin lunglèn a hril chang chang an tih ang kha ka chan a ni zo tawh.

"U Rêngpui, engtik thleng nge i chàm theih ang?" tia Sawsàwmi'n min zawh chuan," Ka hre chiah lo le, kâr tàwpa ka haw loh chuan kârleh Thawhțanniah emaw Thawhlehniah emaw a ni ang," tiin ka lo chhâng vat a.

"Châm reng la, kâr tàwp zànah phei chuan rawn lèn châk deuh deuh ka hria a nia," nui chung hian a ti leh a, kei pawh chu ka lo nui ve a," Eu, ka va luck dâwn êm!! Chhe lo tak tak hlîr an ni ang maw?" tiin fiamthuin ka chhâng lêt a.

Ka pu chu room ațanga rawn chhuakin," I pateate lo haw hunah i haw chauh dâwn nia, an hmu châk ve dâwn che asin, kan inhmu khât si a, i rawn zin chhunah chuan i châm ve deuh rih ang chu," a lo ti a, Sawsàwmi chuan," Pu, engtikah nge nute chu an rawn haw dâwn a?" a lo ti vat a, ani chuan," An tum dàn chuan Inrinni khian a nia, rawn haw thei tak ang maw? A nu pawh chu zia chho zêl tùrah ngai ila," tiin a chhãng a.

Ka pa thlàn kan tlawh a, ka nitêi leh ka pu nèn kan pathumin, lung pawh an lo phun diam tawh niin. Ka pu chuan an phun hun leh an phun dàn te chu min hrilh ve suam suam a. Fùr lai mah ni se thlànmual chu a fai viau mai a, an enkawl țha viau tih a hriat theih mai bawk.

"I nu hi chu ka fak ve thlâwt a ni, tûn thleng pawh hian. A hun lai khân kan harsa ve êm mai a, he lamah chhûngte tak tak a nei lo bawk nèn, a pate Chêkàwn lam belh mai țha a tih pawh khân in tân leh a tâna a nawm zâwk beiseiin ka hnial duh lo kha a nia, ka uiin ka ngai khawp che u asin. A tân heta awm reng kha nawm lohna chin kha a awm ve thei tlat si a, tûn thlenga pasal nei lova a fate a han țùlpui țhak mai che u leh fel taka a enkawl sei lian che u hi ka fak lehzual a ni. I pa boral khân a la upa miah lo asin, pasal nei leh rual lek a la ni; mahse, chu lam chu a lo ngaihtuah miah lo tih chu hei tûn thleng pawh hian kan hre chho zêl chu a nih hi, a mitmei kha ka vêng ve a, in pèm daih kha ka phal lo; mahse, a pasal ber a boral tawh kha chuan a tâna hrehawm lo tùr leh a rilru damna kha ngaihtuah a ngai ve si a," ka pu chuan a ti charh charh a, ka nitêi chuan," Ni e, khatih lai khân kan harsa ve tho nain nangni nufaza kha chu awmpui kha kan hnial miah lo, kan enkawla kan țanpui tùr pawh in ni; mahse, i nu chan kha kan hria a, keini bul maia awm ai chuan amah hringtute bul ngeia awm kha a tân pawh țhaa kan hriat vàng a nia," a lo ti ve a.

Ka pa thlànah chuan thláte kan la ho a, ka pa lung an lo phun diam avàng leh a thlàn an lo enkawl fai avàng chuan làwmthute ka hrilh ve a, ka pu chuan," Thlalâk kha i nu i thawn ve dâwn nia," a ti a, kei chuan," Ka pu, ka nuin thlalâk thawn theihna ang phone a hmang hleinem, ka haw hunah ka entîr ve zâwk mai ang," ka lo ti a. A ni lah tak a, ka nu hian smartphone hi chu a khawih duh miah lo va, jio phone ang kha a hmang a, inbiak theih hi a duh ber a ni bawk a, a tân chuan smartphone hian awmzia a nei ve lêm lo, bâkah, ngai a ti lo,' Pawisa a hek mai mai, keini ang tân chuan hei hi a tâwk chiah,' a ti ve tlat.

Kâr tàwpah chuan ka pateate chu an rawn haw thei ta lo va, ka nutei nu chuan zia lam a pan hlei thei tlat si lo va, an rawn hawsan ngam lo a ni. Zàn lamah chuan inlêng ka nei ta tak tak a, Sawsàwmi sawite ngei kha an lo ni nghe nghe a, dàwra kan kal dùn min lo hmu a ni àwm e, an sawi dànin.

Rawn lêngte hi pathum an ni a, an la upa lêm lo bawk a, an țawng duhin an țawng pawh a rang angreng a, an nui duh viau bawk. Kei aia an la naupan vek ka ring ve ngawt a, chu vàng tak chuan an bulah pawh chuan lai ru ve thovin zak ru ve deuh mah ila a langah erawh ka zak duh lêm lo, ka pu pawhin a hriatte an ni hlawm bawk a, a men chhûng chuan a be ve luam hlawm nghe nghe a.

Kan titi a, Dârlàwna awm ţhin kan nih thu ka sawi chuan an zînga upa ber ni ngeia lang Zâma chuan," A ni maw? Khawi laiah nge in awm țhin a?" tiin min zâwt a, ka hrilh hnu chuan," A nih tak chu, chuti a nih chuan ka hria che a nih chu, in in lamah khân inkhèl tùrin kan rawn kal țhìn, in in thlanga kàwn zau vak loah khân kan inkhèl țhìn alawm, khatih lai kha chuan kan la tê ve khawp mai," a rawn ti chhuak a, kan insawi pawp ta bawk a, titi tùr a tam ta khawp mai.

Ka chhûngteho an fel bawk a, nuam ka ti ve khawp mai. Mi awmthei tak tak an ni chuang lo nain an harsa viau lo hlawm a, an in pawh a țha pângngai viau hlawm mai.  Ka chàm chhûngin chaw eiah min sâwm kual reng a, kan chhûngkaw chanchin min zãwtin kan dinhmun a zia tawh thu ka hrilh pawh chuan," Kan inhmu khâtin in harsat zual chhûng zawngin kan țanpui thei si lo che u a," tiin pawisa min pe ta zêl mai a, ka duh loh dâwn lah chuan," La mai rawh, Pathian zârah keini chu kan zia tawh a, in khawsak a harsa bîk e kan tih vàng a ni lo, in duhnaah lo hmang ve rawh u," an ti tlat a, ka pu pawhin," E, la rawh, i rawn zin lai a ni bawk a, kha kha chu an tih tùr a ni," a ti ve mai bawk a, min pêk tling khâwm chuan Rs 10,000 a pèl ta daih mai!

Ka nu ka hrilh chuan," E, a va làwmawmin a va ropui ve! Chutih rual erawh chuan a zahthlâk tho bawk si. I pute pawh mamawh an neih chuan han leisak mai la, i pateate an awm loh kha, an duat êm che kha, duat lêt ve rawh," a rawn ti a, ka pu erawh chuan," Eng mah lei a ngai hauh lo a nia. An kal hma khân mamawh tùr chu an lei lâwk a, bâkah, kan ei a tam lêm lo va, tlâkchham kan la nei lo ve," a lo ti thung a.

Dârlàwna ka chàm chhûngin Jakob-a'n zàn dár 7:30 vêlah min rawn text ziah a, inlëng ka neih leh neih loh min rawn zâwt țhin. Inrinni zàn leh Pathianni zànah inlêng ka nei a, dâwt ka hrilh duh bîk lo. A tân thinrimna tùr a awm chuang lo va, ka hrilh hreh lêm lo. Zàn mutnaah erawh min be rei deuh thung a, chîk tak maiin ka inlêngte chanchin chu min zâwt a, naupang tê tê an nih thu ka hrilh chuan," An nghal reuh hrep mai ka ti, naupang tê tê!" a'n ti ngul ngul a, chutiang bâk chuan han inhrosak chiam ngaihna hre hek lo le, ka nuih a tiza thei a nia.

Thawhțannîah ka puin haw a la phal loh avàngin Thawhlehnîah ka haw ta zâwk a, haw ti mai ila Aizawl lamah ka pêng khawtlai leh rih. Mami'n min sâwm miau si a, ka tân lah tûn bâka hun remchâng hi a awm thei tawh àwm si lo va, ka nu remtihnain ka pêng leh ta rih a ni.

Jakob-a'n Aizawlah ka awm tih a hriat chuan," Ka rawn phei ve lawk teh ang," a rawn ti ta pek a nih chu! Ka han hnial a," Office chawlh i nei lo, rawn phei suh, kei pawh ka awm rei dâwn lo, ka haw thuai dâwn," ka tih pawh chuan a rawn phei lui tho a, Nilaini chawhnuah a rawn phei tihna a nih chu. Mami lah chuan," A thlahlel vawng vawng mai si che a, nangmah hi nuthlawi ni zâwk tùr i ni, i zùnah a uai na tlat," tiin min fiam a, za vak lovin ka nui ka nui ringawt.

Jakob-a a rawn thlen chuan Mamite ina ka riah leh pawh chu phal tawh lovin a in lamah kan tlãn chho a, Mami leh Adonis-a'n min zui chho ve bawk a; mahse, Mami erawh chu a riak ve dâwn lo thung.

Tlai lama ruah a sùr avàngin boruak a dài nuam viau a, a váwt mah mah em maw ni tih tùr a ni mah. Mami leh Adonis-a chuan kan thlen veleh in tùr an ken chu an phawrh nghâl a, kan inkim tùrin an lo keng a lo ni; mahse, kei chuan ka duh loh thu ka sawi a, Mami chuan," A tui asin, a ruih theih loh, i rui lo ang," a lo ti vat a, kei chuan," A, ka duh lêm lo, ka pum a tinuam lo palh ang, ka in lo ang, ka kian ang che u," ka ti leh a, Jakob-a chuan," Carolene, a duh loh chuan a duh lo a ni mai, engah nge in tîr kher chu i tum ni?" a lo ti nghut a.

"A tui êm a, a taste hi hre ve se ka duh mai mai maw le, ka duhsak a nih ber chu," ani chuan a lo ti mai a, kei chuan," A tuina ka hriat ve zawngin ka in zawngchhang vek mai ang," nui chung hian ka lo ti ve a, Adonis-a pawh chuan," Rêngpuii han felzia hi chu aw... a induh tãk si lohah chuan nangmahin in mai la, ka kian ang che?" tiin Mami chu a'n en a, a nui sen sen a, ani pawh chuan," Nia, motor i khalh dâwn sia, nang chuan i in thei lo ang, ruih i tum palh rêu rêu ang," nui chung hian a ti a.

An thil in chu Beer chi khat a ni tih ka hre ve tho a, chu vàng chuan han tem chhin pawh kha ka duh lêm lo a ni. Han in chhin lo phawt mai ila a ngawl pawh ka vei har deuh ang tih hi ka ngaih dàn a ni a, miin an lo in ta a nih pawhin ka va sawisèlsak chuang lo, kei chuan ka in duh hran lo mai a nia.

Jakob-a pawh chuan a in ve tho a, a țhiante nèn chaw an ei khâwm lai pawh khân a in ve zauh zauh tih ka hre tawh tho a, thil thar pawh a ni lo; mahse, ţha ka ti lêm lo. Ka pa kha zu vàngin a thi chu ka ti ngam chiah lo nain a zu in kaihhawih vàng a ni ka ti tho, ka nitêi min hrilh ațang khân ngaih dàn ka lo siam ve nghâl mai a, hei vàng tak hian ka pasal tùr chuan zu leh a kaihhnawih lam ti lo hrâm se ka duh zual ta a ni.

Mahse, a tìr ațang pawhin Jakob-a hian a in ve zauh zauh tih ka hre sa reng a, tûn thlengin a bulah zu lam rêng rêng ka la sawi chhuak hauh lo chu a nih hi, pasal atân neih ka la tum zui bawk a, engtin nge ni ta ang? A ngawl a vei chu ka ti hauh lo, in pawh a in ngun kher lo maithei; mahse, a theih hrâm chuan zu leh ruihtheih thil laka fihlîm parh ni thei se ka ti.

Nakinah ka buai phah zâwk lo ang maw? Ka nu chuan zu in chu a duh dâwn lo chiang sa a, ka pain a lo in ve zauh zauh tawh avàng khân a tawn ang kha tawng ve tùrin min duh hauh lo ang.

Engtin nge ka tih tâk ang le? Inneih hma hauh ațanga control tum chu a dik miah lo a; mahse, chutia tih avànga thil țha lo, ti lo se ka duhpui pawh ti lo tùra ka sawipui loh ngawt chuan thil dik ber pawh a ni bîk lo.

Zàn mutnaah chuan ka mut hran a remti tlat lo mai a," Ka ngai che a, ka rawn pan vang vang che a nia, i mut hran daih chuan... ka khua a har dáwn asin, min khawngaih ve lo em ni?" a ti tlat a, kei chuan," Khawngaih e, i fel pawh ka ti, khawhar zauh zauh pawh hi a țhat châng a awm ve a nia.  Inneih tum pawh ni ila khum khata mut dun hi thil țha a ni lo, keini phei chu induh tawn kan ni lehnghâl a, intawk lova mut hian thil sual tih a har ber," ka lo ti ve thung a.

"Ka kuah duh che alawm, ka ngai che ka tih tawh kha. Mut dun ringawtte chu..."

Min mut hrantîr chu a tum loh hmèl khawp mai a, a luhlul ve bawk si a, riah duna khum khata mut dun ringawt hi thil sual chu a ni lo; mahse, thil sual tih a awl bïk, chance a awm bîk tlat.

"Ka hlauhawm thar ta thut em ni?"

*A CHÂNG CHUAN A ȚHA LAMA TIDANGLAMA TIȚHANG LIAN TÙR CHE HIAN THIL ȚHA LO LO THLEN A NGAIH CHÂNG A AWM VE ȚHÌN*

[Nimin ka birthday min wish-tute zawng zawng leh min wish ve hman ta lote😊 leh min wish tum hran lote🤗 leh ka birthday a ni tih pawh hre chuang lote😄 in zavaia chungah ka lâwm vek, ka thawnthu ziak in lo chhiar ve duh avàng hian ka lâwm hrim hrim tawh😗😘😚]