☆MIN EN LA☆ - 36 By Dingdi Pachuau

 ☆MIN EN LA☆ - 36 By Dingdi Pachuau

A room-a a khumah chuan kan mu dùn ta nge nge a, nghet zetin min kuah hlù hlú reng a, a biangin ka biang sîr a rawn nawr a, a biang hmul avàng chuan a zã ka ti.

"En teh, Pathian zâra kan dam chuan nakkum maiah kan innei thei tawh ang a, innei tùr inkârah chuan inhriat chian tawn tluka țha a awm lo. Mi fel famkim erawh kan awm hauh lo, insiam țhat ngai lo pawh kan awm chuang  hauh lo ang, min duh khawp lohna lai han sawi la, insiam țhat ka lo tum ang, i duh loh deuh zâwnga ka awm ţhìn a nih pawhin han sawi la, sim ka lo tum ang," ka ti chhuak ta a.

"Tuna i awm ang chiah hian ka duh che, nangmah i nih chhûng chuan ka duh che a ni mai. E, thil pakhat, tûn ai hian i thîkthu hi chhe ve deuh se ka ti, i hria maw? I thîkthu i tihlan hian nuam ka ti, min duh a ni tih ka hriat chian phah a," a rawn ti ta daih a, mak ka tih deuh avàng chuan a kut ka tuaisak pawh chu ka chàwl dat a.

"Chu ber kher chu! Ka tilang ngam lo țhìn alawm, i bula hmeichhe awm rêng rêng hi chu ka thîk vek a; mahse, thîkthu chhe lutuk min tih ka hlauh vàngin ka tilang ngam lo mai mai zâwk a ni, tunah chuan ka hre ta bawk a, i bula hmeichhe țawng ri ka hriat ringawt pawhin ka rawn pàwr thei tawh viau ang aw," ka lo ti a, a nui hawk a.

"A pawi miah lo! I thin a chhe lo tih leh i thin a rim tak tak lo tih hre tho mah ila, rum deuh taka min han melh râm râm leh tléma țawngkam vîn ve deuha min han biak te hian ka làwm tlat zêl che a, ngam taka min han tàwng ve țhin phei kha chu, nun nawmna leh nun hlutna ka hre chiang deuh deuh țhin a ni," a ti leh duah a, zanin zet chu a thil sawi rêng rêng hian a țha lamin min țhâwng dawt dawt ni maiin ka hria, mipa hian anmahni tàwng lèttu leh vìn khar khartu hi an ngaithei lovin zak lo khar khar tiin zahpuiawm an tih vek ka lo ring a nia! Ani hi chu a dangdai tlat mai.

"Min zâwt ve tawh rawh, i duh duh min zâwt thei ang," ka ti a, ani chuan," Ka kut kha tuai leh neuh neuh phawt teh, nuam ka ti tlat," a lo ti phawt a, nui sak chungin a kut chu ka han tuaisak leh ta a, chutah," Kei chu mi fel  ka ni lo va, min duh khawp lohna lai a awm țeuh dâwn tih pawh ka hre sa, zawh kher che pawh ka tum lo; mahse, chuti chung chung chuan ka thlah phal chuang lo che a, thlah che lah ka duh hek lo," a ti ta sup sup a.

Kan ngawi vang vang a, a ţawng chhunzawm loh avàng chuan," Ti ta daih ila, inzawh chi a ni em tih ka hre chiah chuang lo va, i nu leh pate leh i chhûngte hi khawiah nge an awm ve? An la dam ngeiin ka ring teh ngawt a, a dik ang tiraw?" tiin ka han zâwt a, ka hre châk deuh thut a ni, amah nèn hi chu kan inbèl chiang ve tawh viau a, a chhûngte lam chanchin hi ka hre ngai tlat lo, amah hian a sawi chhuak ngai bawk si lo va, hmuh lah ka la hmu hek lo.

"Chhûngte ka nei hleinem! Pa chauh ka nei."

A kut chu ka bêng thek a," Âwihawm loh lutuk! Pa vàng ngawtin i rawn piang chhuak ringawt thei lo," ka han ti zui a, ani lah chuan," Ka thei alawm, hei ka la thaw ve țêk țêk miau a; mahse, min boralsan tawh thung a," a ti leh mai a, a lam hawi tùrin ka inlet thak a.

Ngun takin a mitmeng chu ka en chho kar a, ani pawh chuan min rawn en chhuk ve reng a," Ka tih palh aw, i chhûngte chanchin i sawi ngai si lo va, ka hre châk mai mai a nih kha. Chuan, i pa chu, pawi ka tihpui hle mai che," ti sap sapin a beng chu ka tuaisak leh neuh neuh a. A beng ka tuaisakna lam bân chu vuanin," Tih sual i nei hleinem, mihring chu thi tùrin kan lo piang a, upa lamte'n la țhalai deuh zâwkte hmun min kianin anni an kal hmasa thung a. Chu vàng chuan, kan  thih hma ngeia nang nèna hlim taka awm dun hi ka duh a ni, kan hma hun tùr kan hre hauh si lo," a ti ve leh sup sup a, chumi pah chuan ka bân chu muangchâng hian a rawn zût thla zai zai a, a kut a lum ham ham bawk a, a tawhna chin a hriat khawp mai.

Zû chungchâng chu sawipui duh viau mah ila ka sawipui ta lo, a pa chanchin kan sawi chhuak ta daih sia, han pèn kual leh daih kha a nuam ka ti chiah lo deuh a ni. A âwmah ka bei tlãn a, min kuah nghet sauh sauh a, kei pawhin ka kuah ve tho bawk. Țawng lo chuan kan lungphu inchhàwn dat dat rî chu ka ngaithla a, nuam ka ti, nuam ka ti veng veng mai. Chutah min thlah thutin a țhu chhuak ta hlawl a, mak ti takin ka en nghâl hau a!!

"Engtizia nge ni..!" hlauthãwng ru tak leh mak ti tak chuan ka ti chhuak sap a, ani erawh chu a ngawi reng thung a, chêt pawh a che lo. Ka ngaih a țha lo a, va hnaihin a bânah chuan ka va chelh dà dá a," Ka ngaih i ti țha lo, min tihlauthãwng a nia, engati--" ka tih leh lai chuan," Hmangaihna chenpui che i duh loh chuan min tawk miah suh!" a lo ti hluk a, a thil sawi awmzia chu ka hre lawk lo va; mahse, rei a ni lo, min tihhlauh hnuhnawhzia mai chuh, a bân ka chelhna pawh chu ka thlah chiang teh asin!

"Lo kal sawn miah suh," tiin a tho vut a, bathroom-ah lûtin rei fê a va awm  a, kei pawh kal sawn nachâng hre chuang lovin khum lu lamah chuan ka lo țhu ve reng a, a rawn luh hnuah erawh chuan," Room dangah ka riak mai ang aw," tiin ka han tho a, ani chuan," A ngai lo, eng thil mah a thleng lo ang," a ti sup thung a, kei chuan," Ni lo, thleng ang, a hriat loh," ka ti ve thung a, ka kal sawn tùr chu min rawn man chawt a," A thleng lo ang ka tih tawh kha, min ring rawh," a ti leh a, a mitah chuan chiang zet hian ka en a, dâwt a sawi em tih leh a thil sawiah chuan a rin tlâk ang em tih hriat ka tum, ani pawh chuan min en chhuk ve reng a, a nuih suk tâkah chuan," Tak tak maw?!!" ka han ti leh ngat a.

A khumah bawk chuan kan mu dùn leh a; mahse, a sawi ang tak chuan thil thleng a awm lo. Ka han invêng ve viau a nia; mahse, min kuah nghet a, țan țùng reng thu awm hek lo le, ka inthlahdul tial tial a, țawng lovin ka hnung chu min chùlsak hliau hliau a, a hnuah phei chuan a âwmah bei leh chialin ka mut a rawn chhuak selh selh a, hahdam siaiin a âwm ngheng chuan ka muhìl ta siai siai a.

Ka haw hnua ka ngaihzia mai chu, zàn ka mut dâwn apiangin a âwm nghènga ka mut kha ka hre chhuak zêl a, khatianga mu ang khân ka inchan a, tui takin amah ngaihtuah pahin ka mut theih phah țhìn. Ni tin hun rawn inher chhuak hian amah ka duhna a rawn tizual zêl niin ka hria a, ka ngai zualin hmuh leh ka châk a, a bula awm ka châk rualin a aw ri hriat ka châk bawk a, ka phone zin phah viau nghe nghe a ni.

*******

Ka nuin chhàn ka hreh ber mai zawhna," Bawihte, Jakob-a khân zû a in ve zauh zauh em?" tia min zawh chuan chhàn ka hrehzia chu sawiafiah mai chi pawh a ni lo; mahse, chhàn loh theih ni hek lo le," Aw, in ve zauh zauh," ka ti ta nge nge a, nuam lo ka ti tak zet, ka nitêi thil sawi ațang khân ka nu hian zû in hi chu a pawmzam mai mai lo ang tih ka hre chiang leh zual tawh si a, Jakob-a ka duhzia lah a hre chiang ve tawh tho bawk si.

"Bawihte, in induh tawn hma ațangin zû a in zauh zauh tih i hria ang tiraw?"

"Aw, hre sa e."

Ka nu hmêl chu en pawh ka en ngam tawh lo. Ni e, ka hre sa alawm, a in nasa lo tih erawh chu ka hre tho a; mahse, innghahna tlâk chu a va ni chuang lo êm! Mihringin kan hma hun chu kan hre hauh lo va, a țha leh a țha lo lamin thil a rawn her chhuahpyui thei, ani pawhin a nghei ve thei tho a, a in nasa sauh thei tho bawk a.

"Zu in mi ka duh lohzia i hria tiraw? A chhan i hria em?" a tih leh chuan," Nu, hrehawm ka tiin pawi pawh ka ti; mahse, a hmingin a in ve zauh zauh a ni mai, a rui ngai lo. A in hrim hrim hi kei pawhin țha ka ti chuang hauh lo; mahse maw, sawi a nuam lo ve êm a ni, han sawi chhuak dâwn ila, inngaihzàwn ațanga a awm dàn va control tum tlat ka ang dâwn êm bawk si a, ka rilru pawh a tihrehawm ve tho asin," tiin ka chhâng ta duah a.

A ngawi vang vang a, a thil ngaihtuah àwm ang tùr chu ka hre thiam ve ruakin ka hria, ka pa kha a ngaihtuah chhuak ngei ang a, dik tak chuan zû hian chhûngkuaah thil țha lam aiin thil țha lo lam hi a hring chhuak zël mai si a, thil țha lam a hrin chhuah sawi tùr hi a vâng êm a ni. Tunah tak hi chuan a thil in zauh zauh hian buaina pakhat mah kan inkârah chuan a la thlen hauh lo, sawi lah kan la sawi chhuak dùn hek lo bawk, min duh êm êm a, a rùi ngai bawk lo.

Mahse, 'mahse' tih a rawn awm ta tlat. Ka nu berin a rawn sawi chhuak ta si a, Jakob-a bula ka sawi chhuah ngam loh thil a ni a; mahse, sawi ngei  a ngai tawh ang, ka nuin tunah chuan a hre tawh si a, kan inneih a phal loh phah hlauh phei chuan...

Dik tak chuan hrehawm ka ti tak zet a ni. Jakob-a hnênah engtin nge ka sawi chhuah ang? "Zu hi i in tam chuang si lo va, sim tum daih la, taksa tân a țha lo bawk sia. Tunah tak phei hi chuan ka nuin i in zauh zauh tih a hre tawh lehnghâl a, kan inneih pawh hi a phal lo maithei a ni," ka ti mai dâwn em ni ang? A, a dik thei lo, eng angin nge a lo ngaih ang? A rilrem loh zâwng tak a nih phei chuan min țhen daih mai dâwn asin, min țhen tùr anga ka han indah chhin ringawt pawhin hrehawm ka ti sa ngawih ngawih.

Ka țawngțaina lamah uar lehzualin Jakob-a tân chuan ka thlen leh a, zîngah ni se ka thawh veleha hming ka lam rîk hmasak ber pawh a hming tho a ni, a tân bawk ka dîl lo thei lo. Ka thinlung zawng zawng neitu a ni tawh a, a tâna ka dìlsak loh chuan tuin nge dìlsak ta ang? A tâna thil țha ka duhzia hi hre thiamin a tân ka țawngțai ziah a ni tih hi hre tal se...

Ka account-ah pawisa a rawn lût leh nawlh mai a, amah bâk a nih ka ring lo, ka rin ang ngeiin min rawn text a, amah ngei a lo ni.

*Pawisa kha in mamawhah lo hmang rawh aw, i duh lo ang tih chu ka hre tho; mahse, ka pe duh tho si che a, lung lohah la lo hrâm ang che, ka tâ chu i tâ a ni si a, hah tak leh rim taka ruahsûr kâra thawk tùr chuan ka phal thei lo che a ni*   tiin.

Lungawi lo pawh ni ila a rawn thun vek tawh a, amah pe lêt ve leh nghâl mai tùrin a account number lah ka hre ve bawk si lo. Nakinah, hun ka neih hunah làwmthu hrilh pahin ka la pe lêt leh mai a niang chu, lo lâk duh pawh a duh lo tawp ang.

Zirtàwpni zànah kâr tàwp chawlh hmang tùrin a rawn thleng leh nawlh mai a, khua a chhe bawk si a, min rawn hrilh lâwk hauh lo nain nichîn lawk khân, a rawn thlen hma lawk a ni ber ang chu, phone-ah min rawn biain a rawn kal tih min rawn hrilh hnuhnawh a, mut tum țêp tawh ka ni a, ka tho leh vat a. Hun rei pawh a liam hma chuan amah ngei mai chu huh deuh phungin a rawn lût ta a nih chu.

Step-a a rawn chhukna lamah a rawn huh hman a ni ngei ang, a lu hrûk hul nân towel ka lo pe vat a, lo ban ve vatin làwmthu min hrilh pah sup a, a lu chu a hru nghâl mawlh mawlh a, han hrûksak chu châk viau mah ila ka insûm a ni. Ka nu pawh room ațangin a rawn chhuak a, ani hi chu ka hrilh miah lo va; mahse, kan țawng thãwm a rawn hria a ni ngei ang.

"I rawn kal a ni maw? Khua a nuam lo hle mai si a. Kha, i huh a nih kha. Bawihte, Mãma T-shirt lian ve deuh a awm em? Han la ta che, khatia i hâk reng chuan hritlâng âwmna i kai mai ang," a ti zung zung a, kei pawh chu Mâma T-shirt la tùr chuan room lamah ka kal ta vat a, Jakob-a'n," A ngai lo ang, ka huh mang lo," a tih ri chu ka hre hman tho a; mahse, ka la lui ta tho a.

Ka nu chuan mutna lam a pan leh thuai a, thingpui ka lumsak a in mêk a, Mâma T-shirt hain pyjama a ha thûn bawk a, a inthuam loh țhin dàn deuha a inthuam avàng chuan ka en duh viau, a inhmeh vêl vek tho.

"Min en reng a, ka hmuhnawm viau a ni ngei ang."

Ka la lài thei tho nia. Ka nui ringawt a, a țhutna bul chu ben thak pah hian," Ka bulah hian rawn țhu hnai teh," a ti leh sup a, thu âwih tak chuan ka va țhut hnaih ve nghâl mai bawk a," Ka ngaih tawhzia che chu," tiin min han kuah a, chutah chiah chuan rim eng emaw ka nuin a duh loh thil rim ngei kha a nam a ni tih ka hre chiah.

"Zû i in a ni maw?" Ka țawng rim ngam chiah bík lo va, ruah sûr tho mah se ka nuin ka thil sawi rî chu a hria ang tih ka hlau tho. Nichîn khân ka nu khân a duh loh rim kha a hre ve ang em? A hria a  nih teh chuan aw...

"Aw, tlêm ka lem, tlêm tê chauh."

"A țha lo asin, țha ka ti lo," ka ti chhuak ta nge nge a, he thil hi ka hriattîr ve ngei a ngai tlat a ni. Sawi chhuahna hun remchâng tak a ni pawhin ka hria, ka duh lohna hi hre ve se, ka duh lo a ni tih a hriat chuan  tih tawh loh pawh a tum ve thei tlat.

"Rëngpui, ka rùi hleinem, ka rùi miah lo. Kawng a thui tham a, ka chauh loh nân chauha lem sek mai ka ni, ngai serious duh vak suh. Ka tâna țha lo khawp chuan ka in duh hleinem," a lo ti ve thung a, a mit taka en pah chuan," Ka ngai serious lo thei lo. A chhan i hria em? Ka nu hian zû in mi hi ka nei ang tih a hlau êm êm a, kan unau min zilhna ber pawh a ni. Kan têt lai khân ka pa khân zû a in ve zauh zauh a, hun lo takah min boralsan phah ti mai ang, kan la naupan deuh avàng khân ka pa khân zû a in ve a ni tih ka lo hre ngai hauh lo! Tûn hnua ka ngaihtuah hian ka nu rilru lo hrehawm dàn tùrzia kha, hrehawm a ti dâwn lutuk! Kei pawh ni ila ka ni ve tho dâwn, khatiang thil kha kan paltlang ve ang tih a hlau a, min zilh a, min țawngțaipui bawk a," ka ti ta duah a. Ka pa chungchâng ka sawi chhuah tâk chu a, ka nuin lo hre nâ se chuan, ka pa chanchin ka hria chu mak a ti ngawt ang chu!

"I pa chunga thil thleng chu pawi ka tihpui hle mai che; mahse, kei chuan kan inkâr leh chhûngkua tibuai tùr khawp chuan ka in ngai lo ang, min ring rawh. Țhiante nèna chaw ei khâwm châng leh ka chauh deuh châng hian ka in mai chauh a ni," a ti leh a, min en ve reng tho, mit pawh a khap lo.

"Keima lam chauh ngaihtuah lovin ka nu ngaih dàn tùr che ngaihtuah tel hrâm rawh aw, Jakob. I thil sawiah ka ringhlel che tihna a ni lo a nia, thu dik tak min hrilh ngei pawh ka ring; mahse, chuti chung chung pawh chuan ka'n ti leh hrâm teh ang, i in hun i sawiah pawh chuan in tawh lo thei hrâm la ka va ti êm! A harsa pawh i tiin control che tum ang pawhin min ngai maithei, chutiang chu ka tum a ni lo, rilru dam taka ka nu hi awmtîr ka duh vàng a ni, i hre thiam tiraw?" ka ti koh koh a.

Ka ngaihtuah lêt hian khami zàn khân vawi khat mah kan infâwp hauh lo tih ka hre chhuak chiah. Ani khân min fawh a tum hran lo va, kei pawhin ka tum chuang lo. Zû a in avàng khân a chungah ka thinrim chuang lo va, a thil min hrilh pawh kha ka ring thlap tho; mahse, ka nu ber hi, ani hi chuan zu in ve zeuh zeuh thei pawh hi a fanu pasal atân hian a ring zo thei ngai lo ang.

Ka nu pawh ka titipui ve tho, Jakob-a thil min hrilhte pawh ka hrilh ve vek a; mahse, a rilru ka hmin chuang lo tih a mitmengah ka hmu, a thil lo tawn tawh ațangin a tân chuan pawmzam a har duh ngawt ang!  Khami zàn khân a rim ațangin zû a in tih a lo hre ve tho a, room lama a luh daih chhan pawh kha a rilru nat vàng a lo ni. Keiin ka duh ve tawh tho si a, min sawisèlsak leh min hnial  hrehawm a ti ve tawh bawk nèn, sawichhuah lohah a tlâk a lo ni. Ka titipui hnuah ka hre chhuak chauh nghe nghe.

"Bawihte, ka duh ang diak diak hi chu pasalah in nei vek thei lo ang, nangni pawh miin nupuia an duh ang diak diak chu in ni pha bîk hek lo ang. Ni e, thlìr liam theih chin neih pawh hi a țha viau a lo nih dâwn hi; mahse, zu in thei mai hi chu țha ka la ti chuang lo, ka thlîr liam mai mai thei lo ang. A chhan chu min zâwt suh, țha ka ti lo a ni tawp mai. T
A tìrah chuan tlêm tê têin an in ang a, a rei telh telh ang a, zû in rêng rêng hian in thiam chin an nei thei ngai lo, zûin a in lêt hunah phei chuan... ngaihtuah zui ngam pawh a ni lo, chhia leh țha hriatna khawih buai thei thil a ni a, harhfîm lova an awm hunah phei chuan a khirh țalh tawh mai ang, chutiang chu i tawng ang tih hi ka hlau ngawih ngawih, in zeuh zeuh ațang hian a nia bul an țan țhin rêng ni," a ti malh malh a, chhàn dàn tùr ka hre lo, a thil sawi hi a dik vek mai si a.

*ENGTIK NÎAH EMAW CHUAN NUN HI KHIRH TAK, HARSA I TIH DEUH NÎ A LO LA HER NGEI ANG; MAHSE, CHUMI I PALTLANG HNUAH ERAWH CHUAN THIL I THLÎR THIAM TAWH ANG A, HLIMNA I NEI NGEI BAWK ANG*