☆MIN EN LA☆ - 37 By Dingdi Pachuau

 ☆MIN EN LA☆ - 37 By Dingdi Pachuau

"Naktûk lam khian Aizâwlah phei lawk ka tum a, eng nge ka lo hawn ang che?"

"A ni maw?!! Eng nge i va tih dáwn? Hna thil vàng a ni ang maw?" tia ka zawh chuan," Ni chiah lo deuh. Thênzâwlah zàn ka riak phei ang chu ka ti a, inkhâwmna puan lamte hi i mamawh em?" a rawn ti leh a. Thênzâwlah chuan eng tak chu ti phei dâwn ni maw? Pawisa tam ve deuh tak neiha zin pheia puan duh zâwng tak lei ka châk mai mai mang e.

"Mamawh lo ni mai rawh se, Thênzâwl chu a nuam ngawt ang chu," ka ti hap a, Thênzâwl chu a nuam ve alawm, tûn ang hunah phei chuan a hring dup ang a, a hmuhnawm viau ang; mahse, tlêm lai deuh khân kawng vêlah khân tui a tling phei pum kha an tia, a la ni reng ang em? Ruah a la sûr a la sûr si a, a la ni reng maithei a ni, a hring phei dup ngêi dâwn si a, hmuh a châkawm ka ti.

Mami'n min rawn be ve leh a, kan titi luam hnuah chuan," En teh, pheikhawk ka lei thar ve a, mawi ka ti reuh sia, nimina rei lo tê ka chhuah zawknaah ka bun a, min nâwt nghâl a nih chu, ka duh aiin ka lo tâwt hlek zui. Ka thin a rim tawp, ka lei dâwna ka bun chhin kha chuan ka duh tâwk chiah kha a ni sia, a mak tak tak! I bun tâwk ngei ngei ang, i duh chuan ka pe daih ang che," a rawn ti bawrh bawrh a, kei chuan," A, làwmawm viau dâwn mah se kei aia mamawh an awm ang," ka lo ti ve a, ani chuan," Mi dang ka pe phal hleinem, i duh phawt chuan nang chu ka pe phal che, ka pe ang che, duh ang che," a rawn ti leh ringawt a, a thil sawi dàn hian nuih hi a tiza thei a nia.

"Min pêk phal mah te chuan duh loh tùr thu a awm hleinem, ka va lãwm dâwn êm!" tiin làwmthu chu ka han sawi luam a, ani pawh chuan," Khati mai tùr kha a ni, engtin nge ka rawn thawn phei ang aw? Jalianchhûnga hi a rawn phei dâwn hnai ang em le?" a han ti a, kei chuan," Aw, phei dâwn e, naktûk khian rawn phei a tum; mahse, Thênzâwlah a riak phei phawt dâwn ni àwm tak a ni, eng nge a tih dâwn chu a sawi miah lo va," ka lo ti a.

"A remchàn hlauh chu, ka rawn thawn ang e," a ti phawt a, sawi zawm lehin," Zonuni nu leh pa a tlawh phei dâwn a nih chu. A nupui boral ta kha i hria tiraw? Thênzâwl khua an ni alawm, Zonuni an phùmna hmun a ni nghe nghe a, a kal azâtin a thlàn pawh a tlawh ziah nghe nghe, Zonuni nu leh pate lahin an fapa ang chiahin an en bawk a, an ngaiin an thlahlel a, an fanu an chân tawh bawk si nèn, ani bâk neih nei tawh bîk lo le, an khawngaihthlâk dùn asin," a rawn ti leh barh barh a.

Ka ngaihtuahna a tikal thui khawp mai. Jakob-a chuan a nupui hlui chu a lo la theihnghilh lo nasa ani, a nu leh pate lahin an mâkpa hlui tawh mah ni se an fapa ang chiahin an la en bawk a, an fanu ber boral tawh mah se an tâna Jakob-a la hlut tùrzia leh an ngaih ve dàn tùrziate chu ka ngaihtuah kai zêl a, Jakob-a chuan min neih a tum thute hi a hrilh ang em? A hrilh duh kher lo maithei, an rilruah a tharin an fanu an ngaihtuah chhuak ang a, an rilru a tihrehawm thar leh mai mai zâwk lo ang maw? Chutiang thleng chuan a ngaihtuah pha lutuk ang. Chuan, Zonuni hnênah chuan kei min neih hi a dîl ang em? Ani kha a hmangaih ber a ni si a, Mami hnên ațang pawhin a nupui a hmangaihzia ka hre chàmchî a, kei erawh min hmangaih thu a la sawi hauh lo, min duh thu erawh min hrilh zauh zauh tawh thung. 

Kei hi min hmangaih miah loha min neih a tum a nih ka ring ta tù tú mai, a hmangaih chu a nupui ngei kha a ni; mahse, eng nge pawi chuang? Min hmangaih thu sawi lo mah se min duh tho a, min neih a tum tho alawm, a pawi vak chuang em ni? Ani a hmangaih ber lahin a boralsan tawh a, mitthi tawh chu thîk chi lah a ni hek lo.

Thênzâwla a riah zàn chuan min rawn be miah lo va, text pawh min rawn text lo. Biak chu duh viau mah ila Zonuni nu leh pate nèn hun an hmangho lai ka tibuai ang tih ka hlau a, bâkah, ani pawhin hun thâwl pawh a duh ve ngei ang, a hming ka hmeh chhuah chu ka en vang vang a, phone duh lo chuan ka back leh ta daih a. Engtin tak hun hmang ang maw? Sawi tùr an ngah tawh ngawt ang, Jakob-a chuan min rawn hre chhuakin min rawn ngaihtuah chhuak ve ang em? Zanin hian a nupui hlui Zonuni room-ah ngei a mut ka ring a, a thinlungah an nunhlui a va thar dâwn tehlul êm! An nunhlui a han chhui kîr ang a, a mittui pawh a tla hialin ka ring. A nu leh pa pawh a duat thiam ngawt ang chu, an fanu duha hmangaih êm êmtu chu anni, Zonuni nu leh pa tân pawh mâkpa hlu tak a ni ngei ang, kei ngei pawhin Zonuni a duhzia leh a ngaihzia chu ka hriat ve nual tawh kha. A dawhkàna thu ziak a dah pawh ka chhiar tawh nghe nghe kha.

A tûkah erawh chuan zîngkârah min rawn bia a, rei tak erawh min be lo, Aizâwl lam pana a chhuah dâwn thu min rawn hrilh zawk a; mahse, ka thaw deuh huai tho. Ka ngaihtuah nasa lutuk a, rilru hrehawm țûnin, amah ngaihtuah rengin ka mut phah a, ka muhìl thei lawk lo zui, ka han țawngțai sateh a, eng ka ang thei chuang si lo.

Pu Head-ate in sakah ka inhlawh ve a, Pu Head-a hi high school head ni țhìn, nikum lawka pension ta kha a ni a, kei pawh a school-ah matric kha ka pass chhuak ve nghe nghe a ni. An in luah lai hi zîm an ti deuh tawh a, room 4 daih thei tùr an sa leh mêk a ni. Vawiin chu khua a zia deuh a, slab chhùn a ni a, thawk pawh kan awm nual. Hmeichhe pahnih kan thawk ve a; mahse, nakinah thingpui lam kan buaipui leh daih ang, kan la pui rih mai mai a ni.

Tlangvâl senior, kan khuaa mi zawng zawngin 'Pu Zârpui' tia kan koh chuan fiamthu a thawh pah a, kan nui dar dar reng mai a, kan hna thawh chu hrehawm viau hran lo mah se a hahthlâk ve deuh a; mahse, chuti chung chung pawh chuan Pu Zârpuia fiamthu thawhah chuan kan nui tlãwrh tlãwrh tho, tu mahin hah kan sawi lo. 

Chhùn chawlh lai chuan hmeichhe pahnih chu tlangvâlho chuan min fiam nak nak a, Pu Zârpuia chuan," A țha, fiam fiam rawh u, nakin lawkah chuan 'Ka pi' tiin asin kan la koh dâwn ni," tiin min rawn melh a, amah pawh chuan min han fiam chhunzawm nghâl zat bawk a.

Hahthlâk ve deuh mah se rilru a hlim a, ka thawh hlawh ka la haw lehnghâl a, rilru a nuam duh viau. Hahthlâk deuh taka thawh chhuah pawisa hi chu hlu bîk riauin ka hre țhìn. Singapore-ah te khân taksa kha a hah viau ka ti lêm lo; mahse, rilru kha a chàwl thei meuh lo va, kha tak kha hrehawm ka tih chhan chu a ni. Mi ina awm chuan mahni in a ni lo tih kha ka chiang ngawih ngawih a, ka inthlahrung a, ka chét dànah an mit kha tlung lovin min hau ang tih mawlh kha ka hlau țhìn.

Tlaia ka inbual zo chiah tihah chuan ka phone chu a rawn ri ral ral a, Jakob-a'n a thlen tawh thu min rawn hrilh dâwn a ni ngei ang chu tiin phûr zet hian phone chu ka han ban a; mahse, number ringawt a lo ni thung. 

"Hello?"

"Rêngpui, Jakob-a hi i lo ngaizâwng ngam a ni maw?!! Inneih hialte in lo sawi ri a...Zah pawh i zak lo'm ni? I phû tâwk hre ta che, nang hmeithai fa lehnghâl. I dinhmun ațangin han beisei pha tùrah i lo inngai ve hrim hrim a nia, a ropui râpthlâk viau a ni. A nupui hlui a hmangaihzia an sawi pawh i lo hre tawh ngeiin ka ring a, a nih, nang a hmangaih thu a hrilh ve tawh che em? Ka ring chiah lo, a hrilh hauh lo ang che. A nupui hlui kha a hmangaih asin, a nunna tluk zeta a hmangaih a ni a, ani pawh khân a hmangaihin sum leh pâi a neih lam a en ve hauh lo, Jakob-a'n a nun țha lo tam tak a sim phah bawk, nang ve thung hian eng nge a nunah hmasâwnna i neihtîr ve? A mutpui che pawh ka la ring lo e a! A dik ngei ang tiraw? A la mutpui hauh lo ang che," a rawn ti ta hrep a.

Sawi tùr rêng ka hre lo, ka melh ngai melhin a țawng chu ka ngaithla reng ringawt!

"Zahna i nei a nih ngai chuan tûn ațang khân bànsan nghâl rawh. A neih duh tak tak che i ring em ni? Teuh lo mai! A nupui hlui hmangaih êm êm leh ngai reng chung chuan a nei thei hauh lo ang che, a nupui thlâktu tùr angin i lo insuangtuah te hi a ni ang e, Zonuni kha chu i tluk thei ngai lo ang, i dam chhûng pawhin tum mah la, i thei chuang lo ang. A thinlungah hmun a chang thûk lutuk! A thinlunga Zonuni hmun ruak kha chu tu mahin an luah zo thei ngai lo ang, tum duh suh, i thei chuang lo. A hmangaih lo bawk ang che, i taksa chu a duh ngei ang, mipa hrisêl tak a ni alawm. Tûn thlenga a la insùm theih chhan hi i hria em? Zonuni a hmangaihna vàng a ni, a hmun ruak luah tùr hian tu mah a duh lo va, a thinlung kawngka a hawng duh hek lo. Chu vàng chuan, beidawnna lipui thûk taka i luh hma hian bànsan rawh, ka duhsak vàng záwk che a nih chu. Nimin lamah pawh Thênzâwlah a riah phei kha, Zonuni thlàn tlawhin hun rei tak a thlànah chuan a awm a, ngaihdam dîlin a nu leh pate bulah a intiam nawn leh a nih kha. An fapa ang chiah a ni a, an fanu ni lo mi dang pasal ni tùra an thlah zalèn chu ring duh suh, ka ring lêm lo. Nupui dang neih leh an lo phalsak tawh pawh chu a lo ni maithei; mahse, ka ring chiah lo, an fanu pasalin hmeichhe dang nupuia a neih hian an rilru a na ngei ang, chu chu i ngaihtuah ngai em? Dinhmun khirh taka Jakob-a dintîr hi ka rem ti lo a nia, tunah tak hian chutiangah chuan i dintîr a ni tih i hria em? Sum ûm i nih hmèl tho bawk a, i duh a nih chuan dîl mai rawh, hlawhchham chuan a kaltîr hauh lo ang che," a rawn ti leh ta phiar phiar mai a, phone chu a ti tàwp zui ta hmiah a.

Che lo chuan ka țhu reng a, phone chu ka en reng ringawt mai a. Mak ka ti lo thei lo!! A rawn insawi miah lo nain Jakob-a hre chiang tak chu a ni phawt mai. Min rawn phone sual a ni ang ti dâwn ila ka hming a rawn sawi dik thlap a, Jakob-a hming leh nunhlui zawng zawng lah a rawn sawi dik vek bawk a. Tu chu ni ang maw? Engtin nge ka number a hriat theih ni? Jakob-a nunhlui leh nun dàn zawng zawng lah chu a hre chiang hle mai si a, amah hre chiang tak, bèlbul hnai taktu chu a ni chiang alawm, a chhûng lamhnai tak, tu emaw a ni mai lo'ng maw? Nge, a nupui hlui Zonuni chhûngte lam ni zâwk ang? Mahse, a chhûng lamhnai ni tùrin chutiang tu mah a nei lo ni khân Jakob-a kha a insawi si a, pa a neih thu a sawi chauh a nih kha. Tuna mi lah kha a pa a ni ang ti dâwn ila mipa aw chu a ni bawk si lo, hmeichhia ngei a ni si a, ka hre thiam ta hauh lo mai!

Engtia rei chiah nge ka țhut chiah ka hre lo, ka nuin min rawn ko a, ka ngaihtuahna ram ațangin ka harh chiah. Chaw ei a hun tawh tawh min rawn hrilh a lo ni a, chinchâng hre tùra Jakob-a va biak pawh chu duh viau mah ila ka inthlahrung ru zo ta vek mai.

*RINAWMNA HI THILPÊK MAN TO TAK A NI A, CHU VÀNG CHUAN, MI NAZAWNG LEH HOLAM TAK HNÊN AȚANG CHUAN DAWN INBEISEI SUH*