☆MIN EN LA☆ - 38 By Dingdi Pachuau

 ☆MIN EN LA☆ - 38 By Dingdi Pachuau

Zanriah ei kham hnu lawkah amah zâwk chuan min rawn be ta a, han chhàn pawh chu nuam tih lohna ka neiin ka inthlahrung ru deuh tlat a, ka ngaihbel pawh a ni maithei, a awka chhuak chu a dul deuh ruih maiin ka hria. Ka khawngaih roh mang e, a rilru a hrehawm ve dâwn êm asin. A chanchin kimchang taka ka lo hre lo hi ka thiam loh vek a ni, ni leh lo, a ina ka lo thawk ta kher kher kha a pawi ta ber a nih hi, lo hre lo tawp ila...

Pângngai thei ang berin ka bia a," Chinchâng min rawn zawh ka ring a nia," a rawn tih chuan ka inthiam lo viau mai. Ni e, va zâwt tùr hi ka nia, min rawn hrilh kher ngai lovin; mahse, ka dik lo tlat tawh a ni.

"Nia..." ka ti sap a, ani chu a rawn nui hawk a," A, khatiang ka hriat duh vàng kha a ni lo aw, ka titau ve deuh mai mai a nih kha, ka phût hauh lo che, keima'n ka rawn be thei reng che alawm," a rawn tih leh phei chuan ka inthiam lo zual a, amah chu ka khawngaih a, ka hnukte lam hial a ulh thei nia!

Min duh a, ka thlâkhlelh ang bawkin min thlahlel ve tih ka hria, a nupui boral ta kha a hmangaih ngawih ngawih tih ka hria a; mahse, kei hi chu min hmangaih em ka hre ve tlat lo, nupui atân chuan min neih ngei a tum chu a ni a, a nupui hmun ruak hnawh khattu atân mai min duh  ni êm chuan ka ring phal bîk lo, ka luah zo thei ngai dâwn si lo va, ani chu a hmangaih alawm.

Min rawn betu thil sawi zawng zawng kha mu pah chuan ka ngaihtuah lêt leh a, sawi dik loh a nei lo. Kei chu hmeithai fanu mai ka ni a, kan dinhmun a inthlau lutuk a, khàikhin chi pawh kan ni lo, Jakob-a hi ka tèr phâk a ni hauh lo, a sawi dik chiah. Ni e, min hmangaih thu pawh min la hrilh hauh lo, min duh chauh niin min hmangaih lo pawh a ni mahna; mahse, heti khawpa min duh vetu, nupui hiala min neih duhtu hian sawi chhuak kher lo mah se min hmangaih ru ve tho lo ang maw? A sawi chhuak kher lo pawh a ni ve thei tho a... chuan, riak dùn reng chunga min khawih duh miah lo kha, a nupui vàng maw? Hêng hi kha nu kha a hrilh vek zêl tihna em ni? A nih hlauh chuan kha nu nèn khân an inpawhna a țha ngawt ang, an inkârah thurûk a awm dâwn miah lo tihna a ni bawk ang.

Mahse, a thil sawi zîngah khân dik lo a awm ve tho. Sum ûm vàngin Jakob-a hi ka ngaizâwng lo, a sum hi ka duh lo ve tihna ni lovin amah hi a ni ka duh ber chu. Pâwnlama a mizia a tihlan țhin ang hi a mizia dik tak a ni lo va, hmangaihna nei lo leh sual tak anga a lan dàn hi a chhûngril nun a ni tlat lo, mi fel tak a ni alawm. A nupuia chhûngte pawh a la ngaihsak êm chu, mi fel tak tân lo chuan thil tih mai mai theih a ni lo, zu a in zeuh zeuh leh Pathiannia a inkhâwm ngai lo lai tak hi tlêma mi hmuh eng emaw lai tùr chu a ni mai a, a inkhâwm ngai loh vàng erawh hi chuan a va sual ta viau e tihna pawh a ni chuang lo, Pathian lakah a hel ve rih a ni mai.

Ka thaw hak a, ka rilru a buai tak zet a ni. Ka chan tùr ka ngaihtuah a, ka hlimna tùr chu ka duhin ka thlang lo thei bîk nâng, tuin nge hlim duh lo ang? Mahse, chutih rual chuan Jakob-a rilru tùr ka ngaihtuah lo thei lo, a rilru a hrehawm dâwn êm asin, min hmangaih kher lo a nih pawhin min duh a, ka bulah chuan a hlim ve a ni tih pawh ka hria; mahse... a, ka rilru a hrehawm êm mai, tunah te hian rilru hrehawm takin a awm ngei àwm si a, min rawn biak kha chuan zãngkhai thei ang berin a rawn țawng ve a ni àwm si a.

WhatsApp message tone a rawn ri a, Jakob-a a nih ring êm êm lo mah ila ka han en vat ta tho a, number ringawt!  Thlalâk min rawn thawn chu a ngaihna hre lo tak hian ka han en chhin a, thlànlung vuana mipa kûn lai hi a lo ni a, eng vànga min rawn thawn nge ni ang chu? Tu nge a nih a, tu thlànlung nge tih lah a hriat bawk si loh.

Thlalâk dang a rawn thawn leh zat a, Jakob-a hmêl chiang takin ka hmu ta, a hmêl ațang chuan a țap a ni tih pawh a hriat theih, chubâkah, thlànlunga thu inziak pawh a fiahin ka chhiar thei vek mai, a nupui thlàn niin nimin lama a kalna a ni ngei ang.

*Ti hian i fiah uar uar em? A rilru a hrehawm asin, bùkna a khai mêk a nih hi, lehlamah a nupui leh a nupui nu leh pate an awm a, lehlamah nangmah, tuilairap takmeuhin a awm a ni, a nupui nu leh pa lah rilru hrehawmin i siam bawk a, hetiang dinhmuna Jakob-a leh mi dang dintîrtu hi nangmah i ni, ni lo ti miah suh, i rilru khân a Amen lutuk tlat. A chhan chu mi pângngai tak i ni tlat a*   tih message hi a rawn thleng chhunzawm leh zat a.

*Tu nge i nih?*  tiin ka zâwt lêt ta a, min tihbuai tum ve hrim hrim nge a nih tih hriat ka duh, amah ngaizâwng leh kan inkâr chhiat duh hrim hrim pawh a lo ni ve thei tho si a.

Min rawn chhâng ve leh mai bawk a *A thurûk engkim hretu maw le, insawi mah ila min hre chuang lo ang. Ka thil sawi kha ngun takin ngaihtuah rawh aw, a țantìrah chuan  a harsa i ti ang; mahse, mi pakhat chauh rilru i tihrehawm hlek dâwn tihna a ni a, mi pahnih pathum rilru tihhrehawm ai chuan a la zia tho tho. I duhna titlangin Jakob-a hi chelh lui zêl ta la, rilru nuam takin i dam chhûng hun i hmang thei chuang lo ang, mi pângngai tak rilru i pu tlat, fanu chân tawhte rilru tihnat nawn leh hi i duh ka ring lo a, ka rinna che hi a dik ngei bawk ang, a chhan chu i nungchang dik tak hi Jakob-a hnên ațangin ka hre tawh tlat a ni*    a rawn ti leh duah a.

Thil ngaihtuah nei lova muthilh ka va châk tak êm!! Ka rilru hi ruak vek se, tui takin muhìl thei ila... mahse, ka thei hauh si lo. Ka han maimichhîng a, ka mitthlaah Jakob-a, thlànlung vuan chunga a țap hmêl chu ka hmu lo thei si lo va, ka rilru a tihrehawm zual êm êm a ni, a nupui a hmangaih êm êm tih ka hre tho nain thlalâka a lungngai hmêl leh hrehawm ti hmêl mawlh mai chuan min tilungngai, mittui pawh a nei ve dâwn em ni tih tùr khawpa pà ka tih țhin chu mittui tlain a țap a ni si a.

*******

Ka pi chu ka en vang vang a, ani pawh chuan min lo en lêt ve kiau mai a, ka han nuih sak a, a ei theih ve ber Cerelac chu fianin ka barh a, vawi khatah ei tam vak lo mah se a ei ve nual tho mai," I fel lutuk, i ei țeuh a nia, i chak thûr thûr mai ang," tiin ka han bia a, ka nuih pah bawk a, ani erawh chuan min nuih lêt ve lêm lo chuan ka che vêl chu min en reng ringawt a.

Ka pi hi a tar ve tawh viau a, mahnia pâwna chhuah chu sawi loh, in chhûng dungah takngial pawh amah chauh chuan a vei hlei thei thei meuh tawh lo, a mu deuh tlawk tlawk a ni ber mai, a tlûksual an hlauhpui avàngin a fate hian in chhûng dungah pawh vei vei hi an phalsak lo va; mahse, kár khatah vawi khat tal hi chu pâwnah, kan kawt vêlah ka nawr chhuak țhìn, Alzheimer nei a ni a, a fate takngial pawh hi a hriat tawh loh hlawm avàngin ka khawngaih țhìn tak zet a, kei hi chu a tìr ațang khân 'Honey' tiin min ko nghâl a, a ngainat zâwng tak hmêl leh a hriat hnu hmêl ang deuh ka lo pû a ni mahna, ka enkawl thei ve viau mai; mahse, a nui ngai miah lo hi hrehawm ka ti țhìn. Kei lahin theihtâwp chhuahin ka theih anga nasain tihhlim tumin tihnuih ka tum ve țhìn a, hemi kawngah hi chuan ka la hlawhchham ve chiang hlê chu a ni.

Thla thum chuang Singapore-ah ka awm ve leh ta. November thlaah ka chho kha a ni a, ka chhûngte pawh vawi hnih vêl bâk ka la be lo, ka enkawl pi ber hi buaipui a ngai lutuk a, phone khawih hman pawhin ka khawsa lo. Ka hna hi a tìr ațangin a hautak dâwn tih ka hre sa a; mahse, ka duh tho, rilrua thil dang ngaihtuah hman lova thawh theih kha ka duh chu a ni a, ka thawk ta rêng a, hah pawh ka hah viau rêng a ni; mahse, pawi ka ti lo. Jakob-a ka ngaihtuah ngut ngut hman lo va, hei tak hi ka duh chhan a ni. Ka hna a hautak vàng hian hlawh ka la țhain min duhsak a, ei tùr min pe țha hlê bawk a, phone pawh ka duh hun hunah ka hmang thei a; mahse, ka hman lo thung. Kâr tin deuhthaw an doctor-in a hrisèlna a rawn check a, an chhûngkua hi office kal vek niin ina awm hman an awm loh avàng hian engkimah ka lo buaipui pah bawk a; mahse, a hnuah chuan ei siam tùr leh in tifel tùr Philipino an chhawr ta a, a zia ta deuh. Chuta țang chuan ei tùr chah ngai lovin kan ei tùr a siam ve ta țhìn a, kan inkàwm tak tak hman meuh lo nain kan inhmuh ve theih chhunah kan inbia a, kan innuih ziah thung.

Ni khat chu thil hriat chhuah pakhat ka nei. Ka pi hrisèlna rawn en dik țhìntu doctor hian min haw lo tih hi, a mitmeng leh cheziaah ka hmu thiam ve ta tlat. A hmêl chhe miah lo va, a felin a polite ém êm bawk, anniho hi chu an polite êm êm tih ka hre tho nain Dr. Jerry hi chu polite der mai mai ni lovin a tak takah a nunpui a, doctor ni àwm takin a aw a dam a, a nui sâng reng peih bawk. Pi ber a check lai hian ka lo awm lo thei bîk si lo va, a hriat duh apiang min zâwt a, ka hriat ang ang chu ka hrilh ve zêl bawk. Ka chanchin pawh min zâwt pah a, a chanchin pawh a sawi pah tho a, a felin kawm a nuam si a, chutia min be seuh seuh ta chu kei pawhin ka chanchin pawh ka hrilh ve ta nual mai rêng a. Indian ka nih a rin loh thu a sawi avàng chuan Mizoram chanchinte chu ka hrilh chho ve zêl a, a phone-ah chuan kan khua Chêkàwn chu map-ah a'n en kual a, min hmuh a, kal a châk thute chu a sawi siam siam a, kawm a nawm êm avàng chuan kei pawhin ka nêl viau. A hnu deuhah erawh chuan ka en fuh palh chânga min lo en reng țhìn chu  ka hmu ta zauh zauh a, heta țang hian a rûkin ka chîk ve ta deuh a, min haw lo tih ka man chhuak ta a ni.

Mahse, kei erawh chu a lakah ka invêng êm êm thung. Ka nihna ka hria a, ka hna ka hre chiang bawk. He laiah hian ngaihzâwng ka neih a thiang lo tih ka hria a, ngaihzâwng nei tùra kal lah ka ni hek lo. Dr. Jerry'n min huat loh avàng hian amah hi ka huat phah hran lo va, țha takin ka be tho; mahse, a beisei theih tùrin ka awm lo va, mitmei lah ka hmuh hek lo. Min rawn tlawh nî hi chuan rilruah duh lo teh mah ila Jakob-a ka hre chhuak ngei ngei a, mipa rêng rêng ka hnaih tùr a ni lo tiin ka infuih sauh sauh țhìn.

Ni khat chu chhùna ka pi a muthilh zawk hlàn chuan ka nu ka han bia a, ram lamah hna a thawk lêm lo nain kohhran hnatlângah a lo thawk chhuak ve niin, a chanchin bâkah ka naute chanchin chu ka han zâwt zawk zawk a, an dam țha tih ka hriat chuan ka thaw huai mai. Ka mut dâwna ka țawngțainaah ka hre reng a, an tân leh Jakob-a tân ka dîl ziah țhìn a ni. Ngaihtuah chhuah duh lo țhìn viau mah ila țawngțainaah hi chuan a theih loh, ka chhûngte ai pawhin a hmasa berah ka dìlsak lo thei lo. Ka kalsan ta daih si a, a thin a rim viau ka ring a, amahah harsatna insiam lova min theihnghilh thei tùr leh ka tel lova a awm theihna tùr, a hlimna tùr ka dìlsak a, chumi rual chuan a nuna pawimawh ber tùr Pathian lam eng emaw ti zâwng taka a hnaih ve theihna tùr ka dìlsak hmaih lo, ka theihnghilh thei lo a ni. 

"Niminah Jakob-a a rawn kal a."

Ka nu nèn hian vawi hnih kan inbe tawh a, Jakob-a chanchin lam rêng rêng kan la sawi chhuak miah lo va, tûn țum hi a vawi khatna a ni. Sawi chhuah ka duh lo tih hi chu a hre sa reng si a, engati nge maw a rawn sawi chhuah ni?

Mahse, a chanchin ka va hre châk tak! Min lo la ngaihtuah ve reng tho tihna em ni? Ka kalsan vàng khân a  thin a la rim viau em? Min ngai em? Engtin nge a awm? Ka chanchin a zâwt vak em? A thin a rim ngawt ang chu, kei akára min duh ve êm êmtu ka han kal bosan a nia, chu pawh chanchin hrilh hmasa hauh lovin, ka awm bosan tùr hi a them pawhin ka hrilh lo a nia. Thinrim vànga rawn kal nge a nih ang min ngaih vàngin? A, a chanchin engkim, a pâwn lam lan dàn zawng zawng leh a chhûngril zawng zawng nèn lam ka va hre châk tak!

"Nu...---" 

"Aw, ka hria, sawi chhuah i duh lo tih ka hria alawm; mahse, ka khawngaih ve riau a, tihtak zetin i awmna mai bâkah nangmah biakpawhna tùr che min zâwt nasa lutuk a, i awmna hmun chu ka hrilh ta mai a nih kha, a pawi lo tiraw? Mahse, biakpawh che erawh a harsat ka rin thu ka hrilh a," a rawn ti tih chuan ka țang deuh țeuh pawh chu ka inthlahdul thei ta deuh a. Ka awmna hre mah se min rawn biakpawh loh chuan a zia alawm, a thin a rim teh ang chu!

"Ni lo'm ni? Heta țang chuan biakpawh i har a ni lo'm ni? Phone i kawl thei àwm si lo va," a rawn tih leh chuan," Aw, kawl thei nâng," ka lo ti vat a," Khawihna hun pawh ka nei lo," han tih chu châkawm viau mah se ka buai viau thu ka nu hriata sawi chhuah chu ka duh lêm lo, ngai ka ti lo, min ngaihtuah lutuk palh ang. Ka phone kha chu kawl chu kawl e; mahse, sim card ka nei lo a, bâkah, sim card pawh lo nei ta teh rêng ila khawihna hun ka nei lo hrim hrim, hman ve hunah lah phone khawih ai chuan mut daih ka duh zâwk a, phone hman duh hunah lah home phone a hman theih mai a, sim card chu ka ngaihtuah duh lêm lo a ni.

"A thin a rim viau lo maw?" ka ti ta nge nge a, hre châk miau hek le. Ka mitthlaah ka hmu rauh rauh a, kei a tâna eng mah ni lo, dinhmun lamah phei chuan khaikhin chhin rual loh khawpa a tâna hniam hian eng mah sawi lovin ka han awm bosan ta a nia, a rim lo thei lo.

"A lan dànah chuan rim lo ve; mahse, chhûngril tak chu ka zu hre chuang lo va. A hmêl, a pâwn lam lan dàn erawh a khawngaihthlâk hlê thung, a chêr deuh kuamin a hriat a, a damlo tih pawh a sawi nghe nghe a."

Room lama thâwm a rawn awm avàng chuan ka duh ang pawhin kan inbe rei thei ta lo. Ka pi a rawn harh leh tawh si a, ka pan phei ta vat a, ka mittui tling deuh pam pawh chu ka hru phei mawlh mawlh bawk a.

Chumi nî ațang phei chuan Jakob-a ngaihtuah loh chu ka tum lo ta law law mai. Ka ngaihtuah lo thei si lo va, ka pi ka buaipuia ka buai êm êm lai pawhin ka pi chu Jakob-a ah ka chan a, hetiang hian Jakob-a lo awm ve ta se tih te ka ngaihtuah kai zêl a, ka pi pawh chu ka duat phah sawt țhìn. A damloh laite chuan min hre chhuak ve ang em tihte ka ngaihtuah a, a nat viau loh ka beisei. Natna tuara damlo tùrin ka duh lo va, ka phal hek lo. He khawvêlah hian hlimnain ûm phâk ve leh tawh se, hlim takin a nun hmang ve se tih ka duhsak êm êm a ni. Dinhmun hrehawm taka a ding ka duh loh avànga kal bosan kha ka ni si a, tunah chuan tuilairap pawhin a ding tawh lo ang a, a rilru pawh a zia deuh tawh ang; mahse, eng nge kan khuaah chuan a va tih le? Ka awmna chu hre mah se min rawn thinrim khum tùr chuan a rawn kal lul lo ang, a chhan chu hêngah chuan a rawn kal dâwn lo chiang sa a. Min rawn biakpawh theihna lah ka nu hnên ațang chuan a hre dáwn bawk si lo, kei hian be duh ila chuan a number chu ka la vawng vek ngei mai; mahse, biak chu a tih chi hauh lo, ka biak leh te chuan awm bosan khân awmzia a nei nâng.

Zàn mutnaah chuan kalsan ka tum dâwna ka rilru ka siam nasatzia leh ka ngaihtuahna ka hmêla tihlan loh ka tum nasatziate kha ka ngaihtuah lêt a, harsa ka tihzia tak kha! Ka nute hriat lohin zànah ka țap ru fo a,  ka boruak leh ka thil tum hre ve hauh lo khân Jakob-a lah khân min rawn biain min ngaih thute kha a rawn sawi sup sup reng a nih kha.

Flashback

~~~~~~~

"Carolene-i pheikhawk rawn thawn phei che hi ka rawn pe vang vang dâwn che nge i rawn zin hun atân ka lo dah țha rih mai dâwn?"

Aizâwla a zin phei Lungleia a awm hnua min biakin a nia a rawn sawi ni. Amahin min rawn pe se chu ka duh viau nain office chawlh phah nân a hman leh kha ka duh tawh lo va, bâkah, ka rilru a buai nuai nuai rih a, a hmêl hmuh loh rih ka duh. A hmêl ka hmuh chuan thu tlûkna țha leh fel ka siam thei lo palh ang, ka thu tlûkna siamah ka ding nghet thei lo palh ang, ka sût a nih hlauh chuan amah ka duhna vàngin mi rilru hrehawmna tam takin ka siam belh dâwn si a.

"Ka lo zin hun atân lo dah țha mai la?"

A rawn nui hawk a," I rawn zin dâwn tak tak maw?!! Wow. !! Engtikah maw?! Tunah tak hian rawn hruai tùr chea rawn tlàn chhuah nghâl mai ka duh, i tum ang huna i rawn zin dâwn a nih chuan i rawn zin har àwm si a," a rawn ti zui a, ka nui ve hak mai.

"Teuh lo mai! Ka rawn zin thuai dâwn, hmuh che ka châk tawh alawm," ka han ti ve ngial a, ka insûm zo meuh lo a ni. Kalsan tùr angin ka han indah chhin a, ka ngai dâwn lutuk tih ka hre sa reng si a, chu vàng tak chuan tunah pawh hian hmuh ka châk, kuah vawng vawng ka châk a, a bianga chùlsaka a beng khawihsak leh neuh neuh pawh kha ka châk, ka kalsan hunah chuan ka ti theiin ka ti phâk tawh dâwn si lo. 

Ka thu tlûkna chu ka nu pawh ka hrilh vek a, ka thil hriat zawng zawng erawh chu ka hrilh vek lêm lo. Ani erawh chuan min pawmpui chiah lo va, a chhan chu min rawn betu hmeichhia kha chiang takin ka hre chuang lo va, min rawn tih der emaw Jakob-a nèna min pawh țhen tum angah emaw a han puh deuh a; mahse, kei erawh chuan ka thu tlûkna siama ka din ngheh tawh thu chu ka hrilh a, Jakob-a ka duh leh ka hmangaih avàngin ka hlimna chauh ka ngai pawimawh thei lo a, a hlimna leh mi dang rilru nâa ka dah lohna tùr zâwkin a ni ka kalsan dâwn ni. Keimah vàngin rilru hrehawm takin a awm si a, min duh tih hre tho mah ila min duhna ringawt hi a tâwk zo lo. Ani hi chu mipa a nia, a thil tum hi a țhulh duh kher lo ang; mahse, kei hi chuan ka țhulh thei ang, ka hlimna chauh ûma mi dang rilru hrehawm taka an awm hi ka duh lo.

September thlaah Lungleiah chuan ka zin ta ngei a; mahse, a quarter-ah chuan ka thleng ta bîk lo, a hre thiam lo viau a, tihtauh erawh a titàu êm lo; mahse, a awm dànah a lungni vak lo tih a lang reng a, chu chuan ka nuih a tiza angreng viau, lehlam takah erawh chuan ka lung a tichhe lek lek, ka kalsan hunah phei chuan...

Zan khat erawh chu a bulah ka riak ve ta tho a, țawng lovin min kuah a, min fâwp a, chutiangin kei pawhin ka chhâng lêt ve tho. A chhan chu tûn bâk hi ka mutpui tawh dâwn si lo va, kan tân chuan zàn hnuhnung ber tùr a ni; mahse, ani chuan a hre ve kher lo ang.

"Rêngpui, ka duh che!"

"Um, ka hria alawm, kei pawhin ka duh che," tiin ka chhâng lêt ve sap a," Chuan, ka hmangaih tak zet bawk che, min hmangaih lêt ve lo mah la kei chuan ka hmangaih lutuk che," tih erawh chu a rìin ka sawi chhuak ta lo, ka rilru erawh chuan ka sawi mawlh mawlh reng a, nakinah, ka kalsan hma ngeiin ka hmangaih thu hi chu ka la hrilh tho ang.

Kan chesual țëp chu a ni, kei pawhin a tàwp thlen law law chu ka duh deuh thut thut a; mahse, kan him leh hrâm. Mipa tam tak ang chu ni se chuan kan chesual ngeiin ka ring, a insùm theih ka ring tawh miah lo a nia; mahse, a thei ta tho. Lehlamah ka làwm rualin lehlamah ka rilru a tinâ, a chhan chu a nupui hlui a ngaihtuah chhuah vàng a ni ka ti lo thei lo, min rawn betu pawh khân a sawi vek tawh kha.

"Rêngpui, ka thei lo..."

Ka hria, ka hre chiang khawp mai. Ni e, a thei lo ang. Kei chu min hmangaih tlat lo alawm, a tân a harsa dâwn lutuk, a nupui boral ta kha a la hmangaih reng a, a thinlung hi ani tân khân a hlàn pumhlûm țhak tawh a, mi dang tân thinlung hlan tùr a nei tawh lo. Hmangaihna han chen leh pawh ani hre reng chung chuan a harsa dâwn, duhna mai hi chu hmangaihna a ni ve si lo.

Kan khuaa ka haw hnuah a hmaa Singapore-a ka kal theihna Agency lam chu ka be pawp leh a, min lo la hre ve reng bawk a, thil a awlsam zuih mai. Anni'n thil țangkai tùr min tihsak vek a, Aizawla ka phei hmain vawi khat chu Jakob-a a rawn zin leh a, ka hmuh tàwpna tùr tak tak a nih tawh dâwn avàngin hlim takin, ãm takin a bulah hun ka hmang a, a hnu lama ka hlim lohna tùr lam chu ka ngaihtuah duh hauh lo. Hlim takin hun chu kan hmang dùn a, ka hmêl leh chezia, awm dànah ka thil tum chu eng mah ka tilang lo bawk. Hemiah pawh hian min duh thu min hrilh leh a, min hmangaih thu a sawi tel leh chuang lo. Kei erawh chuan ka hrilh hman thei tawh dâwn lo tih hriain ka hmangaih thu ka hrilh thung a, ka bek tawn tawna dawmin min en vang vang a, nui sukin lungchim takin min fâwp vawng vawng nghe nghe. A rilru ka tihrehawm ang tih pawh ka hre reng a; mahse, ka pawi sa zo tawh lo, ka kalsan hma ngeia ka hmangaih thu kha hrilh ka duh si a.

Lunglei lama a lêt phei tùr ka thlah zet kha chu ka insûm hlei thei lo chu a ni. A hmuh lai erawh chuan ka insûm a, pângngai thei ang berin ka awm lui tlat a, motor-a a luh hnuah erawh chuan ka mittui tling kuang chu a tlâk mai loh nân ka inseh ruh tlat a, min rawn ena min rawn nuih pawh chuan ka țhen ve deuh tho nain ka ti hlei thei tawh lo chu a ni. A tlãn chhuak chu ka hmu phê ruai a, ka en zui ve bawk nain ka hmu fiah lo; mahse, en zui ngei ka duh thung, tûn bâk hi ka thlah ngai tawh dâwn lo va, ka hmu ngai tawh dâwn lo bawk.

A tlàn liam hnuah pawh ka dinna ngaiah chuan ka ding zui reng a, ka taksa chu ka dinnah chuan a ding reng nain ka thinlung erawh chu a tlàn liampui daih thung si. Tluang takin a tum hmun chu thleng se, min rawn ngaihtuah lo se, a thin ka tina ve ta a nih pawhin min rawn haw zui mai rawh se, chu chuan a thin nâ a rawn chhâwk zâwk ngei ang. Min rawn ngaihtuah zui lo se, a ngaihtuahna chang ve tlâk pawh ka ni dáwn lo, amah kalsantu ka ni dâwn si a.

Aizâwlah ka phei a, ka awm rei lo. Min chhawrtu tùr ka hmu thuai a, pitar awmpui tùr ka ni tih pawh ka hre sa thlap, pawi ka ti lo, kal vat theih kha ka duh chu a ni mai. Jakob-a'n min rawn be reng reng tho a, kei pawhin țha takin ka chhâng ve tho; mahse, ka kalsan țêp tawh, min be thei lo țêp tawh.

Aizâwl ațanga Lêngpui pana kan chhuah hnuah ka text a, ka chhûngte erawh ka be thung. Kan thlawh chhuah hmain ka be leh a, Jakob-a erawh ka text leh ringawt, ka be ngam tawh lo, ka țah khum ka hlau a ni.

Tunah chuan ka hlatsan ta telh telh mai, ka hmangaih chu ka hlatsan ta telh telh chu a ni si a, a hriat chhuah hunah chuan engtin tak rawn ngai ve ang maw? Min rawn biak a tum ang a, min be thei tawh dâwn si lo, a mang a ang ngawt ang. Ka phone ka off hmak tawh a, ka chhûngte biak nân pawh ka on ngam tawh rih lo, Jakob-a phone call ka dawn ka hlau tawh a ni.

Tunah chuan mêl sâng tam tak danah kan awm ta. Hlat viau mah ila ka rilruah chuan amah lo chu an awm dèr si lo, engtin nge a awm ang tih leh a thin a rim viau ang em tih mawlh chu ka ngaihtuah a, ka thaw leh kâwk kâwk țhìn. Ka ngai nghâl êm êm mai a; mahse, ka thu tlûkna siamah inchhìr ka tum hauh lo, hei hi ka tân, a tân leh a nupui chhûngte tâna thil țha ber a ni tiin ka ngaihtuah lui ngar ngar a ni ber. Rilru dang put ka tum lo va, inchhìr  lam phei chu ka ngaihtuah duh lo hulhual, awmze nei lo a ni si a.

*MI EN DÀN CHE LEH HMUH DÀN CHE AȚANG KHÂN I HLUTNA KHA INTEH NGAI HAUH SUH. MITE CHUAN AN DUH DÀN DÁNIN AN TEH MAI ANG CHE, I THUNUN PHÂK BÂK A NI*