☆MIN EN LA☆ - 39 By Dingdi Pachuau

 ☆MIN EN LA☆ - 39 By Dingdi Pachuau

Ka enkawl pi ber hi ka awmna pa ber hringtunu hi a ni a, amah hringtu a nih vàng a ni ang, an chhûngkaw zîngah chuan ani hian a duat ber a, ngaihtuah pawh a ngaihtuah ber. Ka enkawl dànah hian a lung a âwi ve hlê a, duhsak pawh min duhsak ve a, ei tùr bâkah thuamhnaw lamah pawh min duhsakin kár khat danah hian kawr thar min rawn hawn ve ziah nghe nghe. Ka pu nupui pawh hian a ngaihsak ve tho a; mahse, inah hian an awm tam lo hlawm êm êm a, pâwn lama hna nei vek an nih avàng hian ngaihsak nân hun hi an nei mang lo ni berin ka hria.

Ka pu hi Malay niin Kristian a ni a, ka pite erawh hi chu an ni ve miah lo, Muslim an ni chuang bawk si lo va, an sakhua hi ka hre chiah lo. Ka pu hian pi ber hi a țawngțaisak ve zauh zauh a, Kristian ka nih vàng nge ani pawh hian țawngțaipui tùrin min ti ve fo țhìn. Heti khawpa ka pu ka chunga a țhaa min han duhsak hi a châng chuan nuam lo ka ti lek lek hial a, a chhan chu ka pi hian a lo ringhlel mai ang tih ka hlau ru deuh a ni; mahse, a lo ringhlel bîk lo pawh a ni ang e, chutiang lama buaina chu kan la nei hauh lo.

"Hmeichhe fel tak chu i ni tiraw? Nurse thiamna tam tak nei ai chuan hetia i enkawl hi i pi hian a ngeih êm êm si a, i hriat ngai loh ni mah se duat taka i enkawl thei hi mak ka ti. Kei chu doctor ka nia, ka hna niin hlawh tam tak ka hmuhna a ni; mahse, i hmangaiha duat taka i enkawl ang hian ka enkawl ve thei chuang lo ang, engtin nge i tih theih bîk le?" tiin Dr. Jerry chuan min zâwt ta khauh a.

Kan innêl ve tawh viau a, amah hi a fel vàng a ni ang ka ti mai, heta ka thawh hmaa thawk țhìnte nèn pawh an innêl viau țhìnin ka ring. A awka chhuak zaidam tak hi hriat a nuam ka tiin a English pawh a mawi ka ti, a hmui leh a English hman hi a inhmeh ka ti tlat pek a nih chu. Tlangvâl lian țha tak ni lo mah se a tê chhe chuang lo va, a smart zaih reng mai a, tlêma a hmai bawl ve deuh hlek chu inhmeh ka ti tlat bawk a nih chu; mahse, ngaihzâwng lam en chuan ka en hauh lo thung.

"Kei pawh hlawh duh vàng chauhin alawm ka enkawl, pawisa hlawh dâwn lo ila chuan hetah pawh ka rawn kal peih nâng," ka ti ve thung a, ka nui pah deuh a, pi ber erawh chu bang lam hawiin khumah a mu ngât a, kan inbiakna pawh chu a hre ve pawhin ka ring lo.

"Ni tho e; mahse, nang leh kei chu kan dang daih tho alawm," a ti leh a, kei pawh chuan," Ni e, kan inang lo, kan dang hlak," ka lo ti leh a, min chhâng tawh lo chuan min en vang vang a. Tho vutin," I pu pawhin a fak viau che kha, fak tlâk i ni bawk a, țha takin thawk zêl rawh khai, ka kal tawh ang e," a ti zui a.

Singapore-a ka kal tùr thu hi Mami pawh ka hrilh lo kha a nia, ani pawh a thin a rim ngawtin ka ring! Lo hrilh ve ta mai mai ila țha tùr hi a nia, ka haw hunah phei chuan biak pawh min be țha duh lo tawp ang le, ka hrilh loh chu thuhran, a unaupa eng mah hrilh lovin ka la kalsan zui bawk a nia.

Kan awmna piah lawkah hian park ve deuh reuh hi a awm a, naupang leh puitling lamte pawh an rawn kal ve diah diah fo. Keini pitu pawh kan chhuah hi chuan he lai hmunah hian ka hruai ve ziah a, hei aia thui hi ka kalpui ngai lo. Kan kal lai hian ka thawh ang thawk ve tho, pitar enkawl lai neite pawh hi ka hmu ve nawlh nawlh fo a, uitê leh naupang rawn hruai pawh an awm ve tho; mahse, Mizo chu ka la hmu miah lo thung, helai bialah hian an awm ve lo a ni ngei ang.

Hun a kal ve nek nek a, dam na nâ nâ chuan thla ruk zet ka awm tling ve leh ta. Pitari erawh chu a upat ve tawh bâkah a natna hi dampui leh chi rual a ni tawh si lo va, a thih hma chu he a natna hian a thlah tawh dâwn lo a ni. Hmun danga mi kuta dah ngawt chu ka pu hian a phal bîk lo va, damdawi in țha zâwka dah chu an tlin ngei mai; mahse, a office bâng lo hawin a nu hmêl hmu thei lo tùra a indah chuan a ngaingam thei lo va, nilêngin a bulah chuan a awm thei lo chiang a; mahse, a lo haw veleha a hmêl hmuh theih tal kha a la duh ve a ni. Ka hriat thiampui reng mai, nu leh pate hi chu an hlu êm asin, eng ti thei lo mah se min dampui hian a nuam ve hrim hrim, Chêkàwna ka pu ka hre chhuak rauh rauh țhìn. Ani pawh eng a ti thei tawh bîk lo va, tiang hawlin a la lêng ve thei a, hla takah phei chuan a kal tawh ngai lo a nih kha; mahse, kan bula a lo ve mai mai pawh khân a thlamuanthlâk bîk, kan phuisui ka ti mai, tar leh upa deuhte hi an lo hlu êm asin.

Ni khat chu pitari ka chhuahpuina lamah chuan ka Mizopui ngei mai  ka hmu ta nawlh mai! Mizo a ni tih ka hriat theihna chhan pawh a jersey rawn hâk chhuah ațangin a ni, Aizâwl FC jersey a rawn ha tlat pek a, Aizâwl hming chuanna jersey ha chu Mizo a nih ngei ringin Mizo țawngin ka be risk a, a lo ni tak tak a! Ka hlimzia mai chu, Singapore ka kal leh hnua ka hlim ber țum a ni chiang alawm.

Mahse, titi rei vak thei kan ni lo va, ani chu naupang rawn hruai a ni a, kei ai chuan a la free deuh thei, bâkah, day-off a nei thei bawk a lo ni. Awhawm ka tih rualin kei chu tuna ka hna hi ka duh thlan kha a ni ve bawk a, vui thei ka ni hauh lo. Ina awm tlawk tlawk kha a ni mai a, bial a zau lo ve khawp mai.

Phone number inpêkin awmzia a neih chuan loh avàng chuan la inbe kham lo tak chuan kan ințhen a, Mizoram lama kan chènna hmun leh khaw hming erawh kan inhrilh ve ve thung, ani chu Lêngpui lama awm a lo ni a, kan awmna khua chu a inhnaih lo nasa; mahse, Mizo kan nihnaah erawh kan inhnaih nghâl êm êm thung si, rilru hlim takin hun ka hman theih phah a, ka lâwm tak tak a ni.

May thla a rawn inher chhuah chuan Zotei result chhuah thla a ni tih ka hre kar tawh a, ka hriat châk rualin ka huphurh deuh hlek a, ka lo ur lâwk ve nasa a ni, ani ai pawhin ka lo țang hialin ka ring; mahse, First-ah a pass a ni tih ka nuin min rawn hrilh chuan ka lâwm lutuk a, ka âu chhuak rãwih rãwih nghe nghe, ka insûm thei lo. Zotei han biak ve ngei pawh chu ka duh viau nain ka hun neihin a zir ngang lo va, ka be ta lo mai, Pathian hnênah erawh làwmthu ka sawi mawlh mawlh thung.

Pitari enkawlin buai viau mah ila ka rilru a hlim ve tawh a, ka Mizopui ka hmu a, Zotei țha takin a pass bawk a, ka hlim lo thei lo. Ka hlawh pawh tunah chuan a full-in ka dawng thei tawh a, Zotei college kal nân ka ti a ni, college-ah chuan thuamhnaw neih tam ve deuh te a lo ngai ve tawh a, a mamawh lei nân hmang se, kei chuan ka lo thawk chhuak zêl mai dâwn a ni. 

Contract hi kum hnih atân sign mah ila ka duh hunah chuan ka haw thei tho a, min chelh lui tlat thei bîk lo; mahse, kum hnih tal chu thawk mah ila pawi ka ti lêm lo. Ka nu erawh chuan kum hnih zet Mizorama haw lova awm tlang chu a rem ti chiah lo va; mahse, min rawn hnial dawt duh lo a, pehhêl deuh tak hian kum khat hnua haw thla tùrin min duh thu a rawn sawi tho.

Pitari hrisèlna a rawn tla hniam deuh thut a, enkawltu ber ka nih avàng chuan ka ngaihven a ngai zual ta a, zànah pawh ka mu tlêm thei ta khawp mai. Ka puin min menpui zauh zauh a; mahse, a tûk lama office kal tùr a nih vàngin rei tak chu min menpui thei chuang lo. A fate pahnih lah chu an rawn haw tlai theiin zîng takah an chhuak leh țhìn bawk si a, an meng ve hman lo, an buai lutuk tlat.

"Nula fel tak i ni, ka nu enkawltute zîngah chuan ka mit i tlung ber a, ka chhuahsan pawh hian ka nu hi ka ngaihtuah lo sawt țhìn; mahse, i tân hian a hahthlâk hlê si a, i thawk rimin keinin kan pui hman hlei thei si lo che a, ka tih theih ve lam, i hlawh lam ka pun ang. Duat taka ka nu i enkawl hi ka lãwm êm êm a ni," ka pu chuan a ti mawlh mawlh a.

"Ka lãwm e, ka pu."

Tunah chuan pâwnah pawh ka chhuahpui thei ta lo, khumah a mu tlawk tlawk a, a chângin a khuh leh ber ber țhìn a, damdawi a ei tho nain a reh hlei thei si lo. A châng chuan damdawi ka pêk tùr hi a ei duh lo ve a ni ngei mai, min lo vai buaksak țhìn a, a nun dàn ka lainat êm țhin avàngin thinrimah ka la ngai lo, ka pe nawn leh mai zêl a, a hnuah hi chuan a ei ve leh mai țhìn.

Ka vànduai ka ti dâwn nge, ka vànnei ka ti dâwn ni, kum khat ka awm tlin hnu deuh lawkah pitari chu a boral ta hlauh mai a, hrehawm ka tiin ka pu chu ka khawngaih kher asin. A tân tih theih neih ka châk khawp mai, thihna hi chu a tàwp êm mai a, thu kan nei lovin tih theih kan nei hauh bawk si lo. Chutia ka enkawl berin min boralsan tákah chuan awm reng thu awm hek lo le, ka pu chuan Singapore-a ka la awm zêl duh leh duh lohte chu min zâwt a. Hetiang a nih tâk rau rauah chuan awm chhunzawm lova haw mai ka duh, chutiang chuan ka chhâng ta chiah bawk; mahse, chhúngril takah erawh chuan haw chu ka châk hran hauh lo thung.

Mi fel tak hi chu a ni ve chiang alawm, ka hàwnna tùr flight ticket min buaipui vek hnuah pawh làwmthu sawi nân tiin ka hlawh aia tam min pe zui a, ka chunga a țhat dàn êm êm hi mak ka ti hial zâwk. Pathianin awmpuiin malsàwm se, a hna thawhnaah pawh hmuingil zêl se ka duh tak zet. Pathian malsàwmna dawng tlâk a ni bawk.

Khawhar tak, thawveng pah tho leh rilrua Mizoram thlen huphurh ru țûng, mahse, thlen thuai châk pah tho chuan ka thlâwk haw ta vuah vuah a, thlawhnaah chuan hmêl hriat an vâng pharh mai. Ka nute hnênah ka haw dâwn tih pawh ka hrilh hauh lo, ka thlen hunah ka thleng tawp mai dâwn a nih ber chu. Jakob-a ve thung hi, eng nge a lo an ang? A lo dam țha ang em? Ka haw tih a hre àwm si lo va, ka tum aia hmain ka haw ta sia, chanchin ngaihven hian a rawn zin leh ang em? Bialnu dang a nei tawh ang em? Ka lakah chuan a thin a rim ang a, min rawn ngaihven tawh hauh lo ang le.

Aizâwl boruak chu a lo dang khawp mai, a lo vawt var mai a, thlasik lai a la ni bawk a, a àwm viau mai. Aizawlah zàn hnih ka riak a, Mami pawh ka tlawh ngam lo va, ka be duh lo bawk. Ka biak chuan engkim ka hai lang vek dâwn tihna a ni mai asin, Jakob-a engkim a hrilh thei tlat, nakinah erawh chuan biak hun chu ka la nei dâwn chiang a, min thinrim khum ngei bawk ang a; mahse, chu chu ngei ngei tùr a nia, ka ti àwm ang lo ve êm bawk a, thinrim mah se a àwm hliah hliah. Aizawlah zàn hnih ka riak a ni tihte hi hre phei se...ka châk lo nasa ang chu!

Kan khua ka thlena kan in ka thlen hma chuan ka pitei'n min lo hmu hmasa ber a, âu chùlin," Rêngpuii a lo haw!!" a ti a, ka duh aiin a au ring lehnghâl a, kan inah ka nu a lo awm a nih teh chuan a hre pha vek dâwn chiang, surprise ka ngaihtuah kai chuai chuai asin le.

"I lo haw dâwn tih min hrilh hauh si lo va; mahse, ka thu i âwih a, ka lãwm khawp mai," ka nu chuan a ti a, kei chuan," I thu ka âwih vàng pawh a ni chuang lo, ka enkawl ber pitar kha a boral ta si a, awmna tùr dang zawna buai leh ai chuan rawn haw mai kha țha ka ti a," ka ti ve thung a.

Singapore-a ka awm chhûng khân Jakob-a chanchin kha vawi khat chauh kan sawi dùn a, kha pawh kha a rawn sawi chhuah hmasak vàng mai kha a nia, a hnuah phei chuan kan sawi tawh lo hrim hrim, engtin nge a awm zêl pawh ka hre hek lo, a dam țha tùrah erawh ka ngai ve tawp. 

Ina ka haw leh tâk hnuah chuan facebook lam ka khawih ve leh ta a,   ka number hlui kha chu tihnun a ngai tawh a, paih erawh phal lovin ka dah țha rih a, sim card dang leiin ka hmang ta daih a, Jakob-a number chu vawng khiau mah ila ka be chhin duh hauh lo. Țhen ka duh avànga kal bosan na nâ nâa ka biak leh sî chuan a fuh nâng.

Facebook-ah Dr. Jerry chuan friend request min rawn thawn niin, amah ngei a ni tih ka chian tê té hnuah ka confirm ta vat a, a thlalâk chu ka han en a, a lunglènthlâk reuh mai mai mang e. A fel si a, Singapore nuam ti ve deuh hleka ka awm theih chhan kha a ni ve a, ka țhian nih hi a phû ngawih ngawih a ni.

Ka nu chuan," Jakob-a lo kal hunah thil awmzia chiang takin hrilh fiah vek ang che. I hrilh fiah hi a phû ka ti a ni, a khawngaihthlâk êm asin. Khita i awm avàng leh a chanchin sawi chhuah i duh loh êm avàng chauh khân ka sawipui ngai lo che a nih kha. I kalsan chhante chiang takin hrilh la, 'inkawp leh rawh u' ka tihna a ni lo a nia, thil awmzia hrilh fiah a phû ka ti mai a nih chu," a ti dap dap a.

Ni e, ka nu thil sawi hi a dik chiah. Eng mah sawi lova kalsan tawp kha hrehawm ka ti ve tho a, ka inthiam lo a, min huain thinrim viau pawh ni se ka thiam viau ang; mahse, kan inkâr hi chu din țhat leh ka tum lo, tum ni ila kalsan kher kha a ngai nâng, ka kalsan chhan kha ka hre chiang alawm, a bula sawi chhuah vek erawh ka tum chuang lo, țùlna a awm lo, a zu in zauh zauh leh Pathiannîa a inkhâwm ngai lo kha chhuanlamah chuan ka hmang mai dâwn a ni.

Zanriah ei khamah ka nu phone chu a rawn ri țang țang a, chhângin loudspeaker a on zui nghâl a, ka rin loh deuhin Jakob-a a lo ni a!

"Ka tum dàn chuan naktûk chawhnu lam khian rawn kal ka tum deuh a, chu chu rawn hrilh pah chein mamawh in neih nual ka ring bawk si a, ka rawn zâwt pah bawk che," a rawn ti a nih chu! Ka nu chu mak ti takin ka en reng ringawt! Ka awm loh chhûng khân he pa hian ka nute hi a lo tlawh ziah tho tihna em ni?!!  An mamawh thil a lo leisak bawk țhìn... tihna maw?!! An inbiak dàn ațang khân a hriat theih tlat a ni.

Engtin nge ni ta ang?

*HE KHAWVÊLAH HIAN NUNNA PAKHAT BÂK I NEI LO VA, VAWI KHAT CHIAH I NUNG DÂWN BAWK, CHU VÀNG CHUAN, I TAWNG SÀN THEIH TÙR BER HLIMNA CHÈNIN HRINGNUN HMANG LA, MI DANG TÂN HNAWKSAK MAI NI LOVIN MALSÀWMNA NIH TUM BAWK LA, CHU CHUAN I NUN PAWH A TIHLIM NGEI BAWK ANG*