☆MIN EN LA☆ - 40 By Dingdi Pachuau

 ☆MIN EN LA☆ - 40 By Dingdi Pachuau

Ka nu hnênah chuan," Nu, ka haw tawh tih i hrilh ru a ni maw?!" tiin ka han zâwt chat a, ani chuan," Engah nge maw ka han hrilh ngawt ang le aw... " a lo ti mai a, kei chuan," I hrilh si loh chuan engati nge rawn kal a tum si? Ka awm loh lai khân a rawn kal țhin chu ka ring hauh si lo," ka ti ve leh thung a, ka nu chu ka en kar a, ka lung a âwi vak lo a ni.

"Rawn kal tho e, rawn kal lo tùra ka tih pawhin a țhulh phah chuang lo. A rawn kal hunah i kalsan chhan hrilh la, i țhen tawh a ni tih pawh fiah takin hrilh ang che."

Ka rilru chu hah buai lo tùr leh hrehawm lo tùrin ka theihtâwpin ka thunun hrâm hrâm a, ka thaw leh hawk hawk țhìn a, chu chuan min chhâwk deuh hlek.  Ka awm loh hlàn pawha ka nute a lo la tlawh ziah a nih chuan ka kalsan tih hi a pawm lo hlê tihna a ni thei mai ang em? A ni ngei ang, a hnênah khân chiang takin ka hrilh hauh si lo va, chiang tak chu sawi loh, a them pawhin ka hrilh lo a nih kha, mipa rilru takin țawngka ngeia hrilh loh chuan thu tlingah a pawm lo tihna pawh a ni thei. Chuti a nih chuan a lo kal hunah ka lo hrilh ngei ang. Ka kalsan chhan ka hre chiang a, ani hi tuilairapin ka dah thei lo, hlim taka awm tùrin ka duh kha, khati chen kha kan inhmu lo va, kan inbe lo bawk a, kan thih phah hek lo. Chu vàng chuan, kan nung thei ve ve a, rilru hrehawm taka dah ai chuan ințhen mai kha a țha rêng a ni, ka hlimna chauh ka dah pawimawh thei hleinem, ka thu tlûknaah mi dang hlimna leh làwmna a innghat tlat si a.

A rawn kal ta ngei a, zàn dâr 8 vêlah a rawn thleng a, a rawn thlen lai tak chuan room-ah ka awm a, a țawng ri dût dût pawh room ațang chuan ka hre thei, ka hmui ka pet fan fan a,  ka rilru siamin ka tikhauh sauh sauh bawk, ka nuin thingpui a siamsak hnuah ka chhuak ve ta chauh a.

Min hmu thut laia a hmêl awm dàn chu ka en reng a; mak ti hmêl ka hmu zauh nain a rei lo," Rêngpui..." a ti sup phawt a, chutah," I dam țha maw?" a tih zawm leh a, min be hmasa zâwk a nih chu. Hmêla eng mah lantîr loh tumin ka sam chu ka han tuai a, engah mah ngaih loh hmel tak hian," Dam alawm, eng nge i rawn tih dâwn?" ka ti zui ve zat a, a rûk tak chuan hrehawm ka va ti tak! Amah chu a la ngai reng a, a aw pawh chuti bawk. Duh taka ka kuah țhin leh hmangaih taka ka en țhin hmêl tho kha a ni a la put ni. A hma ai chuan a biang hmul leh khabe hmul chu a buk deuh hlek maithei, min en reng a, kei pawhin ka en tho nain a mitah tak chuan ka en rei lutuk lo.

"Ka rawn tlawh che u."

"Thingpui kha in rawh, khua a vâwt si a, intih lum thuai a țha ngai," ka nu chuan a rawn ti vat a, ka en vat a, ka nu mitmenga min warning-na chu ka hmu nghâl bawk. Lungawi lo ru zet chuan ka hawi sawn ta daih a, ka dinhmun hi min hriat thiampui êm êm tùr hi a ni a, hetia ka tih loha zaidam tak leh amah ngaihsak taka ka lo biak chuan ka rilru dik tak a hre chhuak ang tih ka hlau alawm.

Mahse, ngawihsana tùm khum reng thu a awm bîk lo va, lehlam hawisan reng thu lah a awm hek lo, ka nu lah chu rei lo te hnuah a inthiar fihlîm ta daih zui a, hun fal thil hrilh fiahna hun min pe tih hre mah ila ka ngei deuh țêp tho.

"I han dam țha a, a làwmawm. Engtik khân nge i rawn haw thlâk a?" tiin amah zâwk chuan min be hmasa leh a, kei pawh chuan țha takin ka chhâng leh mai a; mahse, min zawh chin chauh ka chhâng thung.

"Ka ngai lutuk che asin; mahse, dam taka i lo haw leh hi ka beisei tlat thung a, ka beiseina chu a takin ka hmu ta a nih hi," tiin min en leh vang vang a, za lo takin ka țhen sak ringawt. Sawi tùr a tam viau nain a bula han awm leh meuh chuan a vâng ka ti a, ka hmui chu ka pet neuh neuh reng ringawt, pehhêl kual duah lova han sawi phawng lah chu, sawi țan dàn tùr ka bo tlat.

"Eng nge i rawn tih dâwn tak tak?" ka ti leh ringawt a, ani lah chuan," Ka rawn tlawh che u, i awm loh lai pawh khân ka tlawh ziah tho alawm, nangmah ka ngaihna che a zia deuh hlek țhìn a. Min ngai ve țhìn tho ang chu tiraw?" a rawn ti ta duah a.

"Ngai lutuk!" tih ka châk asin aw...! Mahse, ka sawi thei lo, ka thil tih ve zawng zawng kha a hlawhchham nghâl vek dâwn tihna a ni ang asin." Thil awmzia hi hai der tlat suh!" ka ti ta khawl a, a mitah tak chuan ka en ta kar a.

"Eng nge hai der tùr a awm em ni? A awmzia ka va hre lo ve!" a rawn tih chuan," I hria, sawi lo mah ila i hre thiam tih ka hria; mahse, ka'n sawi chiang ang e, kan inkâr hi ka ti tàwp tawh a ni, kan inrem thei dâwn chuang lo. Țawngkaa ka hrilh loh che avàng erawh khân ngaihdam ka dîl e," ka ti chhuak ta a, a mitah tak chuan ka la en kar a, ka thil sawi chu âwih se tih ka duh vàng a ni.

"Engati nge kan inrem theih loh ang?"

"A chhan chu..." tia tàwp deuh chatin ka hawi sawn a, dâwt ka sawi dâwn avàngin a mitah tak ka en duh lo a ni, chutah, sawi zawm lehin," A chhan chu zu in hi pasalah ka duh lo va, chutiangin inkhâwm ngai lo pawh ka duh lo, chu chu ka thu tlûkna a ni," ka ti a, chhûngril lamah ka țang nasa mai si a, țha taka ka sawi chhuak thei chu ka hah dam huai huaiin ka hria a; mahse, rilru erawh a hrehawm thung ta a ni.

Țawng lovin min en reng tih ka hria a, a nawm lohzia mai chuh, en tùr a vâng khawp mai! Amah lah chu ka en ngam hauh si lo, tûn hun tluka hun hrehawm tih hi ka nei mai mai tawh lo ang le.

"A tìr ațangin chûngte chu i hre sa vek si a?"

A rawn ti ve ta chiah mai. Ni e, hetah hi chuan tu ma thiam loh a awm lo, ka thiam loh liau liau a ni. Ka chhuanlam mai a ni a, amah ka țhen theihna tùr atân ka sawi mai a ni. A tìr ațangin zu a in zeuh zeuh tih leh a inkhâwm ngai lo tih te chu ka hre sa vek a; mahse, ka hmangaih tho a, ka duh tho a, ka hnar thei lo a ni, duh leh hmangaih bawk si chu tuin nge hnar thei ang? A famkim lohna lai a ni ve mai a, mihringah famkim kan awm thei hleinem; mahse, a famkim lohna lai tak hi țanfunga ka hman loh chuan chhuanlam tùr ka hre hlawl lo a ni. Min rawn phone-tu thil sawite kha chu sawi chhuah chi ni nâng, hrehawm a ti lutuk dâwn asin.

"Hre sa tho e; mahse, mihring chuan kan rilru kan thlâk fo alawm,  kei pawhin ka rilru ka thlâk daihah ngai mai rawh."

Ka thil sawi chuan a rilru a den nat dàn tùr chu ka ngaihtuah zui duh lo. A lan dànah chuan mi sual tak chu ka ni chiang alawm, kei pawh sual ka inti khawp mai; mahse, a tâna țha leh mi dangte tâna țha tùr ka ngaihtuah a ngai si a, amah ka hmangaih vàng hian ka hlimna tùr chauh ka ngaihtuah thei bîk si lo.

"Min țhen a..." a ti sup a, a ngawi leh dat a, ka lo bu deuh nghat ringawt. Rawn țawng lehin," Mahse, kei chuan ka țhen ve lo che, a der pawhin ka la țhen chhin ve hauh lo che," a rawn ti leh ta a, a țawng ring lo va; mahse, ka hre chiang êm êm tho a ni.

"Min țhen lo mah la kei chuan ka țhen miau che a ni," ka ti leh ringawt a, han sawi viau dàn ka hre tlat lo. A luhlul reng ang a, hnar hleih theih loh hian min hnaih zui tlat ang tih ka hlau, ka bul hnaiah leh ka hmuh theiha a awm fo chuan hnar reng ka thei àwm si lo.

"Min țhen chhan chu zu ka in vàng leh ka inkhâwm ngai loh vàng a ni a," muang cherh chawrh hian a han ti sup sup phawt a, chutah," A nih, min hmangaih thu i sawi kha dâwt a lo ni tihna a ni maw?!" a tih zawm leh ta a, ka en zawk nghe nghe. Kha thil ka lo sawi chhuak ta kher kher kha aw ka ti rilru vawng vawng mai.

"Kha thil kha sawi chhuah ka duh lo, hun kal tawha mi a nih kha. Bâkah, rilru puthmang hi a ngai reng thei hleinem."

"Dâwt min lo hrilh reng tihna a ni maw? Inkhâwm țhìn mi tân chuan dâwt hi sawi mai mai loh tùr asin, Pathian duh loh zâwnga ni a. Kei ang mi sual, inkhâwm ngai lo leh zu in mi sawi àwm tâwk chauh a ni!" a tih chuan ka zak tak zet! Ka hnâr chu ka hmu lian rauh rauh mai a, ka hnarna thu chiah hmangin min rawn vaw lêt si a, a sawi dik bawk si, sawi tùr ka vàn viau mai rêng a ni.

"Zanin atân chuan duh tâwk phawt teh ang, rilru tharin kan inbe leh dâwn nia," tiin a ding hluai a," I nu kha làwmthu min lo hrilhsak mai dâwn nia, ka chungah a țha êm êm reng si a," tiin a han ngawi leh dat a," Hmun danga awm bo kha chu tum buai duh tawh suh, i intihrehawm mai mai," a ti leh sup a, kawngka lam pan chuan a kal zui ta nghâl a, țawng lovin ka en zui zêl ringawt.

A chhuak chu a reh nghâl ngawih ngawih maiin ka hria, rei lo te hnuah motor a rûm ham ham a, tlãn chhuak rîin a zui nghâl bawk. Chutiang rum rum chu ka lo ring phâk hauh lo, heta riah tum a ni ngei àwm si a, ka thil hrilh vàng khân a thin a rim a, a haw leh ta daih tihna em ni? Ka hmui chu ka pet fan fan a, che lovin ka țhutnaah chuan ka la țhu reng bawk, ka ngaihtuahna erawh a buai nuai nuai mai. 

'Mang țha' tih pawh a hlawh lo va, kei lahin ka hlawh hek lo. Tûn ang zàn tlai tawha haw han tum chu, a rawn thleng chauh a, a haw leh nghâl tihna a nia, ka ti deuh mah mah chu a ni. Mipa mah ni se rilru hrehawm ve thei mihring tho a nia, ka lo țawng na mah mah a ni ngei ang.

Dár 9:30 a pèl hlek a, tûn ang thlasik hun atân chuan a hma tawh lo. Khua a vâwt si, a haw a nih hlauh chuan kawng a thui nasa mai si a, a va chau dâwn tehlul êm! Mi sual tak ka lo nih hi, ka țhen thu sawi tho mah ila țha tak khân ka sawi thei reng sia, khawngaihna rêng rêng nei lo ang maiin ka țawng khum a, nâ a ti ve viau ang, bâkah, a hre thiam lo ngawt ang.

Awmzia a awm tawh lo, engkim a thleng vek tawh a, ka sawi zo vek tawh bawk. Hei hi a ni lo'm ni ka duh chu? Ka han ti ta chêng a, ka inchhîr leh ang maw? Ni lo ve, hei hi chu thleng tùr a ni rêng a ni, ka țhen hmasa a, hrilh tùr ka ni. Ka hrilh ta a, rilru thâwl huai tùr ka nih teh rëng nèn, a hma aiin a tâwt záwkin ka hria.

A tûkah chuan ka nu chuan chanchin eng mah min zâwt lo va, nizàn lama kan țawng pawh kha a hre ve vek tho maithei; mahse, eng mah a sawi chhuak lo, min rawn phone-tu thil min hrilh kha a zawng a zain ka nu hi ka hrilh vek kher lo va; mahse, tuilairapa a awm thu kha chu ka hrilh zauh ngei mai, ngun taka ngaihtuaha thu tlûkna siam tùrin min ti kha a ni a, ka thu tlûknaa inrawlh a tum loh thu pawh min hrilh a nih nghe nghe kha. Tunah pawh hian eng mah min zawh ka ring lo rêng a, ka ring dik viau bawk.

*******

Zotei nèn kan inbia a, eng eng emaw kan sawi dun luam hnu chuan nizàn lama Jakob-a quarter-a chaw an ei khâwm thu chu a sawi chhuak a.

"Zote, a ina chaw ei ei chu a fuh ber lo ang, tunah phei chuan kan ințhen tawh a," ban deuh hlek chuan ka han ti sap a, ani chuan," Eng maw?!! In ințhen tawh maw?!! Chutiang a sawi hauh si lo, hlim takin min be bawrh bawrh reng asin! Engtikin nge in ințhen a? I rawn haw hmain maw?!! Nge haw hnuah?" tiin zawhna hrang hrang chu min rawn zâwt nghâl a.

Ka hrilh vek hnu chuan," A nih tak chu, kan tân ui a nei si lo va, kan in luahah ni se buai chung chung pawhin min rawn tlawh reng reng a, min ngaihtuah êm êm reng asin! U, mi fel tak a ni si a, engati nge i țhen rêng rêng a? Ngaihzâwng dang a nei tih pawh ni hlei lo," a rawn ti bài bái a, kei chuan ka țhen chhan chu Jakob-a ka hrilh ang chiah chuan ka hrilh ve leh ta a, hrilh vek kher kha ťûl ka ti lêm lo a ni. 

"Inkháwm ngai lo tih leh zu a in zauh zauh tihte chu a tìr tê ațangin i hre vek a, chuti chung chung pawh chuan i duh ve tho kha. Khami vànga țhen leh tùr tho si chuan bul țanpui loh mai tùr che a nia," a rawn tih leh chuan chhàn ngaihna pawh ka hre lo, mi tidang vek nia!

"Bâkah, Pathian hnênah i dìlpui ve tawh em? Zu a in tih i hria a, a bulah sim hrâm tùrin vawi eng zát nge i hrilh tawh? Chuan, a inkhâwm ngai loh chungchângah pawh, inkhâwm tùrin vawi eng zât nge tihtak zeta i sàwm tawh? Pathian hnênah i thlen tawh em? U, hetiang mai mai tùr hi a ni lo asin," a rawn ti leh ta zêk a, sawi tùr chu vâng tak mai a ni! Nau zâwk mah ni se a thil sawi chu a dik lutuk vek si a, ka țhen chhan tak zâwk a hre ve miau bawk si lo.

"Singapore-a i kalsan daih lai pawh khân min rawn tlawh a țhulh ngai chuang lo, sawi chhuak lo mah se a ngai lutuk che tih ka hria, mi fing tak a nia, a tilang lo mai chauh a ni. Inneih thuai in tum vànga  pawisa inkhâwl deuh hlek i duh vànga kal ni maiin ka lo ring che a, a lo ni lo deuh tihna a lo ni si," a ti leh a, a ngawi dat a, chutah, sawi zawm lehin," Singapore-a i kal leh hnuah phei kha chuan min rawn ngaihtuah zual a, kan mamawh tùr nia a hriat hi chu min rawn pe ziah bawk, U Kob-a chu ka khawngaih reuh mang e, i tikhawngaihthlâk ka ti!!" a rawn ti leh daih a!

"Thil i hriat thiam loh vàng a nih kha. A thuhrimah, ani khawngaih teh daih chu, kei i u pawh hi min khawngaih ve tho la, thil țha záwk a tân ka duh vàngin alawm ka țhen ni," ka han ti nang nang a, ani lah chuan," A duh ve che sia, keh thei dawm tak khân a dawm che a nia, ka khawngaih tho tho, țhentu ai chuan a țhena chu a khawngaihthlâk zâwk fê a ni," a rawn ti leh thung a.

Ka thaw hawk a, ani hi chuan Jakob-a hi chu a țan ve thei chiang alawm, a tìrah kha chuan a ngei viau a nih kha, tunah chuan kei ai pawhin a țan ta zâwk chu a ni si a, a zawng zawng hi hre ve ta se chuan min khawngaih daih zâwk ang chu! 

Zotei thil sawi chuan ka ngaihtuahna a tikal thui khawp mai. A sawi ang khân vawi khat chu a zu in kha chu țha ka tih loh thu ka sawi chhuak ngei a, chu bâk chu ka sawi tawh lo. Inkhâwm chungchâng phei kha chu, insawi thiamna tùr ka nei lo zual, sáwm sâwm tùr zâwk hian ka beidawnsan tihna a ni ber si a.

Zotei chuan message min rawn thawn zui leh a.

*U, beidawng mai lo la, ngaihtuah țha leh la ka duh. Pathianin engkim a ti thei tih i hria a, U Kob-a hi a thinlung a luhlul tih chu ka hria; mahse, ani aia thinlung sak daih zâwk Pharoa thinlung tinêm theitu Pathian kan nei tih theihnghilh lo tùrin ka duh che, in pahnih tân ka lo dìlpui ang che u*

He ka nau hi chu a rilru hi a puitling țhìn maw le,  ka u ni àwm zâwka mawi a ni. Kei hian tluk lohna ka ngah mang e! A thil sawi dikzia pawh ka hria, ka nau mah ni se ka ngaisâng a, ka zah sawt bawk.

Ka number hlui kha tih thih ngawt chu ka ui deuh a, ka bank account nèn ka thlun zawm ve si a tiin ka recharge leh tawh a; mahse, ka recharge lo rei tawh bawk a, phone call pawh ka dawng lêm lo. Ka phone chu ka ching let kual a, ka hmet ka hmet a, Mami number ka han hmet chhuak ta hlawl mai a, ka en vang vang ringawt. Vawi eng zât tak min rawn call tum ang maw? A unaua hnên ațangin ka awmna chu a hriat mai ka ring deuh a; mahse, a thin chu a rim ve viau ang le, kei pawh ni ila ka thin a rim ve tho ang. Va biak pawh chu duh rilru deuh viau mah ila ka be lo. Jakob-a cousin a lo ni kher kher hi chu aw...!!  Mahse, ka țhiannu a nia, Jakob-a ka hriat hma daih ațanga ka țhiannu a ni, Jakob-a vànga ka be duh lo leh ka inla hrang hi chu ka thiam loh a ni ka ti ve tho. Social media lam ni se, Singapore-a ka awm chhûng khân social media lamah ka reh hmak a, tûn thleng pawh hian he lamah hi chuan ka  active viau lo, fb erawh ka khawih zauh zauh a, Dr. Jerry pawh ka friend list-ah a awm vâng tawh kha, active lêm lo mah ila hrehawm tihna pawh ka nei lêm lo; mahse, Mami chungah erawh chuan ka inthiam miah lo thung a, nakinah ka inrintâwk deuh hnuah ka bia ang chu.

Jakob-a chu a reh ta char char a, ka nu a la rawn be pawp em tih erawh ka hre lo. Duh lo viau mah ila a number ka la delete bîk lo va, a thlalâk pawh ka la nei țeuh mai. Zàn mutnaah ka en țhìn a, ka hmehsak hun laite ngaihtuah chhuakin kan hlim theihziate ka ngaihtuah chhuak a, khatih lai kha chuan a thurûk ka la hre hauh lo a nih kha. Hria ila chuan bul ka țanpui hauh lo ang le; mahse, amah ka thiam lo hauh lo, ka khawngaih êm êm zâwk; mahse, hemi kawngah kher hi chuan a tân tihsak theih ka nei lo a, kawng awmchhun ka tih mai loh chuan, hetia țhen mai hi kawng awmchhun leh ka tih theih awmchhun chu a ni si.

*MI DANG NGAIH DÀN LEH HMUH DÀN ZAH THIAMIN THLÌR DÀN THIAM ANG CHE. I HMUH DÀNA 6 KHA MI DANG HMUH DÀN CHUAN 9 A NI THEI TIH HRE RENG LA*