☆MIN EN LA☆ - 41 By Dingdi Pachuau

 ☆MIN EN LA☆ - 41 By Dingdi Pachuau

Tunah hi chuan tlêmin ka rilru a pangkhing lo deuh tawh, ka țhen tih țawngkain hmaihmaah ngei ka hrilh tawh a, ngawih bo daih ai kha chuan rilru chhûngrilah min kam rùntu a nêp ta deuh bawk. Mêl sãng tam tak danah kan awm tawh lo va, Mizoramah, amah hnaih takin ka awm a, engtik hun pawha hmu thut thei ka nihna erawh hi chuan min tihrehawm deuh thung. A lungawi lo a, a thin a rim a ni tih lah chu a awm dàn, tûn thleng thlenga min la rawn be lova a awm dàn ațang hian a hriat mai si a; mahse, hei tak hi chu pawi ka ti lo, a thinrim poh leh a tân a țha ting, min theihnghilh thuai kha a tân a pawimawh si a.

Mami'n min rawn be fuh ta tlat mai. A thin a rim hauh lo nain a rawn titau nasa khawp mai a, min thinrim khum lo chu keimah ka inthlahrung zâwk khawp mai, a unaua nèna kan chanchin lam erawh a them pawhin min zâwt hauh lo.

"Min rawn tlawh lo hrim hrim pawh kha lungawi loh tham a ni a; mahse, ka thin a rim lo ang, eng harsatna tak nge i tawh ka hre lo, min hrilh duh loh chuan ka zâwt lui dâwn lo che, chhan țha taka awm tihna a ni mai, engkim min hrilh i inpeih hunah erawh chuan ngaithla tùr chein ka lo inpeih reng ang," a rawn tih chuan ka țhiani felzia chu a takin ka hre nawn leh ta awn awn mai a ni.

"Aw le, ka lãwm e, ka lãwm tak zet a ni," ka ti sap a, ka thinlung ațangia chhuak làwmthu a ni ka hrilh ni. Min thinrim khum pawh ni se ka dem hauh lo ang, a dinhmunah hian ding ni ta ila chuan ka thin a rim zãwk maithei a ni.

"Inneihna làwmin kan ri hut hut ang chu tih laiin a changtunu tùr ber i bo daih a, ha kan lo tát hriam țan tawhin kan lo  in-ready ve tawh teh rêng nèn," tiin a nui leh ar ar phawt a, chutah," Ka han fiamthu hluai a nih kha, nakinah ka rawn zin hunah țha tâwk kan zawng dâwn nia," a rawn ti leh a.

Kan vênga mite'n Jakob-a nèn kan inngaizâwng a, palai hial a rawn tîr tih kha an hre ve tho si a, pasal neih lam ka hawi leh ta si chu, a chhan hmaichhana min zâwt dawt ngam lo hian rin thu an sawi a, ka thiam lo hlawm chuang lo, min zâwt ta pawh ni se chhàn dàn tùr a vâng dâwn êm asin.

Zotei nèn pawh kan inbe reng reng a, Jakob-a'n a la tlawh fo a, ei tùr leh an mamawh pawh a la pe tho a ni tih a sawi chuan ka thaw hawk ringawt a, ani lah chuan," A lakah ka inthlahrung tawh lutuk a, a la rawn be tho che em? A rawn biak che chuan thil min rawn leisak tawh lo tùrin lo hrilh ve teh, ka inthlahrung zozai tawh!" a la rawn ti zui a," In ințhen tawh hnua hetiang tih lehzel hi chu, a zahthlâk ve a," a rawn ti leh zat a.

"Min rawn be ngai tawh lo, kei lahin ka be tawh lo hrim hrim bawk a," ka tih chuan," A nih tak chu, a hma ang chiahin min la be tho sia, in ințhen tawh a ni tih ka hre kur a, ani lah hian țawngka leh cheziaah a tilang ngai lo rêng rêng bawk si nèn, inthlahrunawm duh tak a ni. U, inbe țhain sawi dùn țha leh mai ula, in inneih hnuah țha tak taka zilhin inkhâwm țhatna leh zu in țhat lohnate i hrilh țhìn ang a, nang berin i tih i tih chuan a sim ngei ngei ang ," a rawn ti leh duah a.

Ni e, anni hi chuan ka chhuanlam bâk kha an hre lo va, hetia a han ti mai pawh hi a demawm lo, a chhûngril, thil nihna tak an hre tlat si lo va.

Kan in piah chiahah hian chuktuah huan angreng deuh hi kan siam ve a, tui pêkna a hnai bawk nèn, eng eng emaw hi kan phun ve nual a, zîng tin leh tlai tin mai hian tui ka pe a, Mercy'n min pui zauh zauh bawk. Kan chhûngkaw member kan tam lo va, Zoteite pahnih thawn phei tùr êm chu nei lo mah ila kan nufa thum ei hi chu kan chuktuah huan hian min hlui hneh ve viau mai. 

Ka thlo fai a, terrace angreng deuh laia ka buai viau lai chuan ka phone chu a rawn rì a, ngaihtuah lêm lo chuan ka han chhâng a.

"Rêngpui, he number hi i lo la hmang reng a..! Rawn biak che ka tum nasa țhin, ka thil hrilh che kha i ngaihpawimawh avàngin i chungah ka lãwm khawp mai. Jakob-a pawh a rilru na deuh angin lang mah se tunah chuan a nupui nu leh pate rilru pawh a muang ve thei tawh a, amah pawh hian a theihnghilh vat tho ang che. Mi pângngai tak i ni tih ka hria ka tih kha, chuan, i pângngai chhunzawm zêl pawh ka beisei, i lakah hian ka beiseina ka nghat tlat bawk," hmeichhe aw hian a rawn ti a, ka phone chu ka han en nawn leh ngat a, a number hi ka save hauh lo; mahse, ka hre chiang viau a nih kha, nichin khân ka lo chîk lo va, ka chhâng ve tawp mai kha a nia, ka inchhîr ru angreng viau mai.

"A țha a nih chu, a rilru tihhrehawm ka duh hleinem, chutiang bawkin a nupui nu leh pate pawh," ka ti lét ve a, ani chuan," I ti țha lutuk tlat. I han kalsan tirh kha chuan a hre thiam lo viau dâwn a, beidawnsan che pawh a tum lo; mahse, tunah chuan i țhen tak tak tih a hre thiam ve tawh a, a rawn tibuai zui lo ang che, nang pawh hlim taka awm tum rawh khai. Khawvêlah hian inkawp rem ve miah lo tùr hi an awm ve châwk a nia, nangmahni chauh hi in ni bîk lo aw," a rawn ti leh a, amah vànga Jakob-a kha kalsan ni mah ila min duhsak leh ka hmá ngai àwm taka a han țawng hi chuan mi țha tak chu a nih hmèl ka ti, han dem dâwn viau mah ila mi pakhat hlimna ringawt ai chuan mi pathum hlimna leh mi pakhatin mitthi nu leh pate hnêna a intiamna tihhlawhtlinsaktu nih hi a pawimawh zâwk ka ti a, Jakob-a ka hmangaih avàng hian a tân chhiatna leh a hmingchhiatna tùr thil chu ka ti hauh lo ang.

"Jakob-a chu a hlim thei tak tak ang maw?" tiin ka han zâwt a, a thu tiam tihhlawhtlinsak mah se a hlim loh miau chuan thil țha tak niin ka hre lo, hlim a phû ve tawh a, a nupui boral ta vànga a lungngaihnate khân kiansan hlen tawh se, hlim se ka duh a ni.

"Hlim e, nang pawh khân i tihlim viau tih ka hria, làwmthu ka han hrilh nawn leh ang che, hun a han kal ang a, theihnghilh chein thil dang hlimna a hmu ve leh thuai mai ang, lo ngaihtuah suh, i hlimna tùr thil dang lo ngaihtuah zâwk rawh, ani hi chu ka lo enkawl ang."

He nu hi Jakob-a tân hian a eng nge a nih chiah hriat ve rêng rêng ka duh avàng chuan," A thurûk engkim hretu i ni a, in inpawh viau ang tih pawh ka ring a, a tân thil țha tak ngaihtuahpuiin i pui țhìn ngei pawhin ka ring. Kei chuan a tâna țha ber kha ka duhpui chu a ni mai a, ka hlimna aiin a hlimna leh a zahawmna ka dah pawimawh zâwk bawk. Kan pahnih hian Jakob-a hi kan hmangaihin kan dah pawimawh ve ve bawk a, i hming min hrilh ve thei ang em?" tiin ka zâwt ta a.

"Muansangi ka ni e," a rawn tih chuan," A eng nge i nih chiah? A cousin nge a țhian zâwk?" tiin ka han dîlchhût leh rih a, a nui hawk a," I va dîlchhût tak! A pahnih hnihin ni mai rawh se," a rawn ti ve leh mai bawk a.

Ni sâah chuan ka thlan chu a bawl țek țek a, chutiang tùr khawpa lum chu la ni kher lo mah se ka țan țûng avàng chuan ka thlan chu a tla a ni tih ka hria, chhúngril lamah ka lum up up reng a, ka mitthlaah Jakob-a ka hmu reng bawk si a, tuna kan inbiaknate hi rawn hre ve thei se ka țhenna chhan chu a hre chiang viau dâwn asin le...

Tlai ka inbual zawha eirawng bâwl pah chuan phone ka khawih a, fb-ah ka lût chhin mai mai a, message a lo awm vàng mai a, ka han en vat a. Dr. Jerry a lo ni a, holiday hmanga India rawn zin a tum a lo ni!

*Tak tak maw?!! India chu a lum teh asin, i peih dâwn em ni?*  tiin ka chhâng lêt a, a hmuh hunah min rawn chhâng ve mai ang chu.

Min rawn chhâng har lo. India-ah vawi khat a rawn kal tawh thu leh nuam a tih thu chu a rawn sawi a, tûn țuma a rawn kal hi chuan a la kal ngai lohna hmun lam rawn fan a tum ni àwm tak a ni.

*In awmnaah khân rawn kal duh ta ila min lo welcome duh ang em?*

Ka meng pãwng zãwrh zãwrh lo chauh ang chu! Hêng laiah chuan a rawn kal peih lo tawp ang, an ram a nuamin a changkãng si a, he lai tlâng ram, hmun âwih leh hmun khawkrawk laiah hi chuan rawn kal pawh ni se a awm rei peih lo tawp ang le.

A rawn kal duh tak tak ka rin loh lutuk vàng chuan  *I rawn kal phawt chuan welcome lutuk ang!*  tiin ka chhâng lét ve a, rawn kal tak tak roh se Dãl kan hmin kâwi hlarh, bàibíng rêp leh Phuihnam chhum hàn ka lo hmehpui ang, khitah a ei ngai dâwn teuh si lo, eng nge an nih pawh a hre nâng. Ka thil ngaihtuah chhuah avàng chuan ka nui chhuak hak hak a, a rawn kal tak tak dâwn pawh ni hlei lo; mahse, min tinui tho chu a nih hi.

Ka rin loh tehlul nèn, a rawn kal tak tak a nih chu, chuan, Mizorama rawn kala min rawn tlawh chhuah ngei a tum bawk a nih chu! Chu pa mai mai chuh, ka thil sawi kha han sût leh chi a ni tawh mang si lo, lo mikhual ngei chu a ngai dâwn a ni. Kawng lakah eng emaw harsatna neiin Mizoramah chuan rawn kal thei lo se ka ti rilru ta hial mai,  ka rilru han chhiatzia chu a, a lakah ka insawi ba vek tawh, a rawn kal chuan lo welcome ém êm chu ka tih tùr a ni mai, khita ka awm laiin ka chungah a fel theih êm kha.

Khawpui dang a tlawh chhûngin ka nu hnênah chuan Singapore-a ka hmêl hriat pakhatin min rawn tlawh a tum thu chu ka hrilh ve ta chauh a, mak a ti nasa mai! 

"Hmêl hriat tihah bialpa i han nei tihna a ni em?" tia min zawh chuan ka nuih a," Ni nâng aw, ka pitar enkawl doctor kha a nia, chuta țanga inhre ve mai chu kan nia, a fel lutuk!" tiin ka chhâng a, ani erawh chuan," Engti tiha rawn kal daih ve a nih a? Hmêl hriat satliah mai chuan a rawn tlawh vang vang lo tawp ang che,"  a la ti țãlh a.

Mami pawh rawn zin phei lawk a tum deuh a nia; mahse, rawn kal a tum nî tak zîngkárah Adonis-a an in bul step-ah a chesual palh hlauh mai a, a ke veilam kheimit bâwr a sawh nat bâkah a dinglam ngal ruh a ti khi bawk a ni àwm e. Damdawi ina a awm avàngin Mami chuan a rawn zinsan thei lo va, pawi a tih thu a rawn sawi ve sap sap a, kei erawh chuan," E, kan dam ang a, hun țha zâwk a rawn awm leh mai ang, ani berin harsatna a tawh laia rawn pheisan daihte chu a tihchi nâng, duat a thlâkhlelh dâwn tehlul nèn," ka ti ve thung a.

A túkah min rawn be leh tlat a, Jakob-a chu a pi(A nupui boral tawh Zonuni nu) dam lo phur pheiin Aizawl lam a pan mêk tih min rawn hrilh a lo ni a, ka phu deuh zawk nghe nghe. An lo la inpawh tak zet chu a lo nih chiah hi, an fanu boralna pawh kum eng emaw zât a liam ve tawh a nia, Muansângi'n min hrilh kha a lo dik chiah a lo ni, an inzawmna leh an inkâr boruak țha tak hi kei hian ka lo tichhe vek lo chauh a lo ni, Zonuni nu leh pate tân Jakob-a hlut dàn tùrzia leh an tân a țangkaizia, fapa ang tak taka la enzia chu a hriat theih ruak, Jakob-a tân lah mi pawimawh tak an ni dùn bawk a, a hmangaih kal ta Zonuni hringtunu leh pa an ni tlat, an inkâr hi țha reng teh se, Zonuni nu leh pate tân pawh ani bâk innghahna an nei lo ang, Jakob-a'n a ngaihtuah loh chuan an khawngaihthlâk dâwn lutuk.

"Mi dang ngaihtuahtu tùr laina hnai nei ve tho mah se J-a ber hian mi dang kuta dah hi a duh tlat lo va, Aizawl a kalin a tlawh reng reng a, Thênzâwl hi chu a khua pakhat hi a ni ve hrim hrim bawk, a nu leh pate lahin an lo thlahlel ve tho bawk si a," Mami'n a tih chuan ka tihsual lohzia chu hre chhuak uar uarin ka thu tlúknaa inchhîr tùr ka nih lohzia chu ka inhrilh nawn leh mawlh mawlh a.

"A nu chu engtia nâ nge a?" ka tih chuan," Ka hre chiah lo le, a hrisêl lo ve a, a fanu boral ațang phei kha chuan a hrisèlna kha a tla hniam rawih rawih ti ila a dik ang, J-a hian a ngaihsakin damdawi țha tinrêng a leisak a, hmâ a rawn sâwn chho ve leh thei zâwk a ni. Cancer lam pawh a ni maithei, a ringhlel deuh a," a rawn ti a, ka ngaihtuahna a kal thui ta khawp mai.

Jakob-a phur rihzia chu a ni ka lo ngaihtuah daih ni. Zonuni nu leh pate enkawl chu a kovah a nghat tlat si a, anni lahin an ring ve tawp bawk a, Jakob-a tân lah hmun hran ațanga ngaihsak reng chu a harsa viau ngei ang; mahse, chuti chung chung chuan a ngaihsak ém êm tho si. Kan inkawp lai khân eng mah a sawi chhuak ngai lo va, hrilh ngai lo min ti pawh a ni ang e. An nupa lak ațanga ka pawh hran teuhzia ka ngaihtuah lêt a, Muansangi'n ka mit a tivár ta hlauh zâwk a, chuti ni lo se chuan Jakob-a tân Zonuni nu leh pa lakah inthlahrunna, inkiltawihna ka siamsak ngei ang a, Zonuni nu leh pate tân lah kum upat tawh lamah rilru hrehawmna chauh ka thlensak dâwn si.

"Cancer chu ni lo hrâm teh se, a râpthlâk êm mai!" ka ti sap a, tu tân mah he natna ngeiawm tak hi ka duhsak thei lo, theih ni se khawvêl ata hi paih bo vang vang ka châk.

"Ni e, rinthu chauh a nia, a ni kher lo thei tho bawk, chanchin ka lo zâwt zêl dâwn nia. Adonis-a pawh a zia viau, a pangchang deuh e tih lohah chuan."

Dr. Jerry pawh Aizâwl a rawn thleng chho ta, hotel-ah a innghat a, min rawn message-in *Aizawl ka lo thleng tawh si a, min lo welcome tawh la?*  a rawn ti a, kan khua ațangin la hla viau mah se keimah vànga Mizoram hial rawn thleng a ni si a, ka rilru a tibuai ru kher mai. Ka nu ka hrilh chuan," A lo kal vawi khatna a ni si a, a bo palh ang, Mizo țawng a thiam ve dâwn si lo, a rawn kal ve vang vang tawh a nia, va hruai chu i hnà a ni ve tawh," a lo ti thën mai a, ka rin loh deuha țawng a cheh avàng chuan mak ka tih rualin ni dáwn riauin ka hria a, Aizâwla va kal ve chu țha ka ti ta a.

Hotel-a va innghah ve ngawt ai chuan tiin Mami ka bia a, ka tih tùr erawh ka hrilh chuang lo. Ani lah chu a lo lãwm nasa mai a," I lo kal phawt chuan i duh duh a ni mai," a lo ti chùl a, ka pan lo thei lo.

Adonis-a pawh damdawi in ațangin a chhuak tawh bawk a, zanriah ei khamah chauh pawh sawi hlei thei lovin Adonis-a chu kan va kan a, khumah a lo țhu mu deuh a, min lo hmuh veleh chuan," Rêngpuii chu, min rawn kan tùrin i rawn kal vang vang a ni maw?!! Engtikin nge i lo kal a?" a lo ti chùl a, Mami chu a bula țhu tùr chuan a han pawt nghâl a. A chhûngte chu sitting room lamah daih an awm bawk a, mitmei vèn tùr an awm lo.

"Zanriah ei hma khân maw le. Boss ber i accident rup mai si a, rawn kan tùr chea lo kal hi a ngai tlat," ka yi ve a, kan nui țhâ hlawm a.

Rei tak kan lêng lo va, Mami'n vawiin lama motor ka chuan vànga ka chauh a hlauh avàng chuan haw a rawt har lo va, Adonis-a erawh chuan a lo la phal lo nasa a; mahse, Mami'n thiam taka a han hnial leh chuan a hnial ngam bîk lo, lèn leh thuai intiamin kan chhuahsan ta a.

Mutnaah chuan Aizâwla ka kal chhan tak chu min zâwt ta a, kei pawhin dik takin ka hrilh ve ta mai bawk a, makti taka min enin," Chu pa chu i ngaihzâwng a ni em?!! Min hrilh hreh suh, J-a ka hrilh chuang lo ang," a ti vat a. Kei erawh chuan a nih loh thu chu sawiin," A zin kual vêl mai mai a, chawlh a hmang a nih ber chu, he lama a rawn kal tâkah chuan hmêl hriat ve ta chu min rawn bia a ni mai," ka ti a.

A tûkah chuan hmuh ve a châk avàng chuan min chhuahpui a, Dr. Jerry min lo nghahna lam chu min panpui a, kan han inhmu chu kan innuih var var mai a, Mami chu hmêl hriattírin," Ka țhiannu a nia, ani pawh hi Singapore-ah khân a rawn kal ve tawh tho a," ka ti zui a.

Țawng duh leh fel ve ve ta chu, an inbe nghâl bawrh bawrh a, chanchin pawh an inhrilh dùn bawrh bawrh a, Mami chuan an ina dinner ei ve tùr chuan a'n sâwm zui nghâl zat a. A chhan chu naktûk lama kan khuaa haw tùrin sumo ticket ka hauh lâwk tawh a, zanina a sàwm loh chuan hun a nei remchâng lo ve thei tlat a ni.

Restaurant-ah kan chàwl a, kan inhnawh puar hnuah chuan Mami chuan Dr. Jerry hnênah chuan," I rawn kal vawi khatna a ni si a, Aizâwl khawpui kan fang ang," a ti a, ani lah chuan a lo châk bawk a, kan inphur chhuak leh ta dial a.

Zanriah ei hma deuh, khaw thim tak tak hma chuan kan haw a, Dr. Jerry pawh a thlenna lamah chuan a lét tawh lêm lo. Nuam a ti ve viauin ka hria, Mamite in pana kan tlàn lai chuan zawhna erawh a ngah angreng viau a; mahse, kan hre thiam viau tho. Mizoram anga khawpui hmun rem lo leh khàm kâra in sa huai deuh deuh in sak chu mak a tih thu leh kawng chu zîm a tih thu chu a sawi a, a dangah chuan Aizâwl chu nuam a tih thu leh a rin aia in a tam thute sawiin fakna thu lam hlîr a sawi ta thung.

Mi fel leh hawihhâwm hi chuan titipui theih loh pawh an nei lo chu a nih ber hi. Mami pa nèn chuan an inkàwm nghâl chat a, keini pawh chuan Mami nu ei siam chu kan pui ve a; mahse, a lo ti zo deuh vek tawh a, salad erawh kan buaisaih hman ve țáwk a ni ber.

"J-a pawhin zanriah a lo ei dâwn a, a lo thleng țêp tawh ang," Mami nuin a tih chuan ka en vat a, hei hi chu ka lo beisei loh tawp thil a ni! Mami pawhin phâwk zet hian a nu chu a en ve vat a, chutah, min rawn en lehin a hmui tipawrhin a dàr chu a'n chhìn ãk a, a lo hre lâwk bîk lo a nih hmêl.

Jakob-a lo lût chu lo en duh vak lo mah ila ka mitsîr chuan ka hmu tho.

Choâk ang chiah a la ni tho nain a thlakî erawh a râng ve deuh a nih àwm hi.

"I rawn thleng fuh chiah chiah hle mai."

En loh theih ni hek lo le,  ani pawh chuan min rawn hmu zui ve zat tho a, Dr. Jerry nèn sofa pakhata țhu tlâng kan nih avàng chuan Dr. Jerry chu a han melh zui zat a, Mami chuan," Lo țhu ve rawh khai, i chàu àwm si a, zanin chu hetah riak mai ta che," tiin a lo bia a.

"Chau lo ve." Țhu lovin a kekawr ipte zenin a la ding thûn a.

Zàn a meng rim a ni tih a mitmengah a hai theih loh. Zonuni nu chu a la awmpui char char tihna em ni le? Zàn lamah an mu țha vak lo a ni ngei ang.

"Hei, khawi lam mikhual nge?"

Mami chuan lo chhâng vatin," Rêngpuii hi chu i hre sa a," a han ti phawt a, ka lo melh ralh a, nui sakin," Pakhat hi chu Singapore lam ațangin Dr. Jerry, Rêngpuii hmêl hriat a nih hi, chawlh hmangin a lo zin a, naktûkah Rêngpuiite khuaah an phei ang," a han ti zui duah kher a nih chu.

Chiang zeta Dr. Jerry hmêl nui sâng a en hnu chuan min rawn en leh a,  a mitmengah chuan eng nge a ngaihtuah ang tih hre lo mah ila min thiam lovin min dem viau ang tih ka ring tlat thung, a dik ngei bawk ang chu.

"Zanriah chu kan ei hman tawh em? Hman chuan ei mai ila, ka hmanhmawh deuh a," a ti thûm dût a. Dr. Jerry chu chibai pawh a tum lo a ni ngei mai, a kut chu a kekawr ipteah a la zen tlat.

"Inchibai ula, mikhual a nih hi, a fel asin," Mami'n a tih sap chuan," Mikhual fel nazawng chibai tùrin hun ka nei lo," a lo ti hmuk a, a kal sawn zui nghâl a, chhûngril lamah ka lo tâwt up up mai. An țawng kha ka hre pha reng a, mi dang chuan an hre kher lo maithei, Jakob-a țawng dàn hmek hmuk chuan a ina ka awm țantirh lai kha min tihre chhuak, za lo zet hian ka han țhen sak a, Dr. Jerry chuan eng nge ka nuih tih min lo zâwt vat a.

"Ka thil ngaihtuah chhuah vàng maw le," tiin ka chhâng a, ka nuih pah a, ani pawh chu a lo nui ve sak a. Ka han hawi chhuak leh chu ngun zet leh mit khap hauh lova Jakob-a lo meng kurin min lo en rùn chu ka hmu zui nghâl a, nuam lo tihna ka nei nghâl cham cham mai.

*HLAWHCHHAMNA PUMPELH TUM TLATTU CHUAN HLAWHTLINNA PAWH HI A PUMPELH NGE NGE ȚHÌN*