☆MIN EN LA☆ - 42 By Dingdi Pachuau

 ☆MIN EN LA☆ - 42 By Dingdi Pachuau

Dr. Jerry chuan harsatna a nei lêm lo va, khita an chawhmeh siam dàn angin hetah chuan siam ve kher lo mah se siam dàn ang ang chuan a ei ve mai a, a ei ve bawrh bawrh mai; mahse, anni lam khi zawng, chaw an ei tam ngai lo hrim hrim a,  ani pawh chuan a ei tam lo. 

Chaw ei kham lamah chuan TV room-ah kan țhu khâwm phawt a; mahse, rei lo te hnuah thlang lama bathlàr nuam zetah chuan kan țhu chhuak leh ta a. Jakob-a erawh chu țhu rei ve tawh lovin," Carolene, ka kal ang e, chaw rawn ei chhuak tùr chauh tak taka rawn kal ka nia," a ti a, Mami chuan," Nia, i buai ve thei si a, rei awm tùr pawhin ka phût ngam lo che, Aizâwla i awm chhûng chuan chaw rawn ei zauh zauh rawh aw, i nu pawh a dam chho zêl tùrah ngai ila," a ti duah a, kei erawh chu țawngkam khat tê pawhin min be lo, min melh rùn ringawt a, an thil sawi vêl chu ka lo ngaithla ve tawp a ni mai.

A kal tâk hnu chuan kan titi chhunzawm leh thuai a, Mami chuan Dr. Jerry hnênah chuan Singapore-a a awm lai chanchinte chu a hrilh a, nunhlui sawi chuan a chângin an nui a, kei pawh țawng ve lêm lo chuan nuihzatthlâk an sawiah chuan ka lo nui ve tho bawk a; mahse, rilru zawng zawngin an titi mood-ah chuan ka chêng ve thei lo, thil dang rilru kamtu ka nei tlat.

Kan meng rei lutuk bîk lo ve. Dr. Jerry chu a thlenna hotel-ah kan thlah a, Mami'n riak ve mai tùrin a sàwm taknain a hnâwl a, Mami pawh chuan a tilui chuang lo.

Mutnaah chuan," In inngaizâwng lo tak tak maw?" a ti țha leh a, kei chuan," A mak! Ngaizâwng ila chuan i hre ngei ang chu," ka lo ti thung a, ani pawh chuan," Nia, ka ring tho a; mahse, ani kha chuan a en dàn che kha chu a dang deuh chu a nih kha," a ti leh a.

"Thil-hre-theii hi a..." ka lo ti hlak a, a nui nghâl uar uar mai. A phone a rawn rîk tâkah erawh chuan nui tàwpin," A rawn ri har ka ti rêng a ni," a ti zui zat a, Adonis-a a ni tih ka hre thiam nghâl mai a.

Kei pawhin ka phone chu ka han en ve vat ringawt a, ka rin ang ngeiin message ka lo dawng reng tawh tak tak a! Ka han chhiar a.

*Rilru nei takin min kalsan a, min kalsan mai duh tâwk lovin min tihnat lehzual nân mi dang min neihsan nghâl bawk a, i rãwng mah mah i ti ve lo maw?*   tih hi a lo ni a, ani pawh hian Dr. Jerry chu ka bialpaah a lo ngai ve hmiah a nih hi; mahse, a pawi lo, a țha daih zâwk, hma lam pan zêl tùra ka duh chuan hei hi a rin a ngai miau alawm, a remchâng phian dâwn e.

Chhàn loh ka han tum zet a; mahse, min biak duh loh aiah tiin  *Nia...* tih tê mai hian ka chhâng lêt ve a, a rûk tak chuan sual ka inti asin aw. Ka message min chhàn lêtna ni dâwn ta se chuan ka thin a rim ve khawp ang!

*PHATSANTU NUNRÃWNG...!!*

A thin a rim tak zet tih a hriat mai, ka chhàn lêt dàn vàng nge ni ang a ka țhen vàng chu ni ang tih erawh ka hre mai lo, a ni thei ve ve ang chu. Ni e, a thinrimthlâk dâwn bâkah mipa 'kei ka ni' inti tân chuan a tlàwmthlâk dâwn êm asin, kei eng mah ni lo, zir sâng bawk si lo leh hmeithâi fa mai lakah lehnghâl, a lakah hian inchhuanna tùr pakhat tê mah ka nei lo tih kei pawh hian ka  hre chiang êm êm a, hetia ka ti mai pawh hi hrehawm ka ti lutuk; mahse, ka tih ngei a ngai si a ni.

A message chu ka chhiar nawn leh țhin a, thinrim taka min rawn thawn ni mah se a message ka hmuh tàwp ber a nih avàng chuan a thu chu thlum lovin thinlung dek zak mah se ka chhiar nawn tluk tluk lo thei lo, ka message dawn chhun a ni tawh ang. A luhlul ve si a, a message ka hmuh tàwpna  ber a nih ka rin avàng chuan ka lung a lêng lâwk a ni.

A tûkah kan khaw lam panin kan chhuak ta a, Mami hnênah chuan Jakob-a nu(Zonuni nu)chanchin chu lo ngaichang ve reng tùrin ka han chah ve a, ințhen tawh mah ila tunah a nu damdawi inah a awmpui mêk a, an chanchin lo ngaihchàn ve chu a sualna a awm chuang hleinem.

Kan khuate chuan min sawi duh lehpek ngawt ang chu; mahse, tunah hi chuan ngaiah ka nei ve thiam tawh viau, an thinlung leh ngaihtuahnate kan thunun thei lo va, an thil sawi ka thinlungin a lo dawnsawn thiam lamah erawh ka inthunun thei tih ka hria, chu vàng chuan an thil sawi țhenkhat, ka tâna pawimawh lo chu mëna thlâk dàn ka thiam tawh a, ka na duh tawh lo.

Ka nuin English a thiam loh avàng chuan Dr. Jerry chu a kàwm ngeih thei lo ang tih ka hlau viau a nia; mahse, a ni miah lo, zaizir pahin Mizo ţawngin a bia a, ani pawhin a lo hre thiam ve mai . An inhriat thiam tawn loh châng erawhchuan nuihna tùr a tam thei khawp mai a, a nuih loh theih si loh a, kei ngei pawhin ka hlimpui phian mai.

Huanah ka fehpui a, luiah ka kalpui bawk a, chawhmehte ka zawnpui bawk. A châk miau a, hei bâk tihpui theih ka nei lo miau alawm, hmun changkãng kalpuina tùr ka nei lo va, bâkah, khawvêla ram changkãng ber pâwl leh ropui ber pâwlah chêngin a khawsa a, a tân chuan hmun changkãng kha a ngai tawh lo, hetia thingtlâng nun dan leh khawsak dàn hriattîr hi a țha zâwk, a theihnghilh lo zâwk ang  a, a tân experience țha tak a ni thei bawk ang.

Lui kal chu nuam a tiin khaw lum tak hnuaia ramhnuaia awm chu nuam a ti a, chakai tê tak tê tê kan man ve nual bawk nèn, a hlim hmêl chu hmuh a nuam khawp mai. Chawhmeh zawn erawh chu a zei lo ve khawp mai a, a vawi khatna a ni bawk a, a àwm viau; mahse, nuam a ti êm êm tho.

Chawhmeh lam ni se ka nu siam ang ang chu a ei ve mai zêl a, tui ti êm êmin a ei mai a, ei erawh a ei tam lo. Zîng lamah erawh chuan ka thil siam a ei thei thung a, hmarcha lam a ei ngai loh êm avàng chuan chawhmeh ka siam thak ngai lo.

"I bialpa min hmuhtír ve duh ang em?"

Luia kan kal chu lungpui chungah kan țhu chàwl a, ka nuin tiffin-in ei tùr min paitîr a, kan thil pai kan ei lai mêkin he thu hi a rawn sawi chhuak a, ka en hau nghe nghe.

"Bialpa ka nei hleinem," tiin nui chung hian ka chhâng a, ka thil ei lai chu ka eisan leh nghâl daih a, ani erawh chuan ei chhunzawm ve mai lo chuan," Min hrilh ve mai la, Aizâwla i țhiannute ina dinner rawn ei ve kha a ni tiraw?" a rawn ti leh a.

Ka nghîng dawtin ka hria! Che lo chuan ka melh ngai chu ka melh reng phawt a; mahse, eng mah ka hmu lo thung. Engtin nge a hriat theih ni? Mami'n a hrilh dâwn hauh si lo, keiin ka hrilh hek lo va, Jakob-a lahin a hrilh dâwn bawk si lo, biak pawh a be hauh lo a nih kha.

"Ni nâng, bialpa ka nei lo ka tih chu," tiin ka chhâng a, a hmêl erawh ka en duh lo thung. Ani erawh chuan," Ka han ti ve mai mai a nih kha, a en duh êm che a, ka lo ringhlel mai a nia," a lo ti leh a, ka nui ringawt. 

Zotei pawhin Singapore lama ka țhian a lo zin tih ka nu hnên ațangin a lo hre ve a, min rawn be sek mai.

"En teh, Korean a ang em? A hmêl țha em? A ngo ngawt ang chu, a fel bawk em? A sâng țha em? Ka va hmu châk tak! Lo zinpui la, mâkpa atân pawh a țha viau maithei asin! U, a haw hmain rawn zinpui lawk tak tak la? Lee Min ho pawh a ang ka ti maithei asin, lo zinpui rawh aw, please-in? " tiin zawhna awm thei zâwng zawng zawng nia a hriat ni ngei tùr chu min rawn zâwt nghál vek a.

Hmuh a châk êm avàng chuan Dr. Jerry thlalâk chu ka han thawn a, min rawn chhâng lêt vatin *A chhiat loh kha, ka țhianteho pawhin an hmu châk ngawt ang, kan țhianho group-ah ka'n post nghe nghe teh ang*  a la rawn ti zui a, ka nuih a tiza angreng. Khawchhak ram changkãng ngaisâng tlat nun ang kha a nei ve a, TV lama kan hmuhte hi an changkãng thei hlawm bawk si a, khatiang vek ni tùrah khân a ngai ve miau a, ka dem lutuk bîk lo.

Kâr khat chuang a châm a, Pathianniah pawh a inkhâwm ve mai, amah hi Kristian chu a ni chiahin ka hre lo, a nu leh pa erawh Roman Catholic an ni thung a, ani hi chu a inkhâwm ngai lo a ni àwm e.

Kan khua chu nuam a tih thu a sawi ve sap sap reng a, nuam a tih chhan chu ka hria alawm. Hmun danga a tih ngai loh tùr ram kal leh lui kalte, rama chawhmeh zawn leh hna hrâm thawh thlengin hetah chuan min tihpui vek a, hna thawhpui loh ka tumin a duh si lo va, insiam hmasa saah țangin min tur sek zêl a ni.

Mami pawhin Jakob-a nu chanchin chu min rawn hrilh ve zauh zauh a, Jakob-a'n a awmpui reng hman bîk loh avàng chuan a pain(Zonuni pain) a awmpui ve bawk a, Mami pawhin vawi hnih lai chu a va tlawh tawh a ni àwm e. Kárleh lamah chuan an chhuak thei tawh dâwnin a sawi a, ka lo thaw ve huai mai. Buaina hian tlâkbuak lo se ka ti, tunah pawh hian rilru hrehawm takin a awm ngei ang, keimah vàngin eng emaw chen chu hrehawm a ti ang a, a nu natna vàngin hrehawm a tihbelh ang a, a nu ngaihvena a bula a awm reng thei lo chu hrehawm a ti leh bawk dâwn asin.

A haw hmain Dr. Jerry chu Zotei min ngenna angin Lungleiah zàn khat riakin ka zin pheipui a, ka rin ang ngeiin Zotei nèn chuan an inkàwm ngeih leh thei mai, a tìrah chuan zak deuh hlek hian Zotei chuan English inti thiam fê hian a'n bia a, a lài pah ngei bawk a; mahse, a lài rei lo. Rei lo te hnuah a titipui bawrh bawrh a, a tûk maia Aizâwl lama phei leh mai tùr kan nih vàng chuan kawm nân hun a nei rei lo tih ka hria a, duh tâwkin kàwm teh se tiin hun chu ka pe ve a.

Step ka phiah fai laiin tu emaw rawn pên thla a awm avàng chuan ka en chho vat a, ani pawhin min rawn en chhuk ve chiah. Kan mit chu a intawng chiang asin; mahse, harh chhuak vatin," Lo lêng rawh, i nu kha eng nge a an tawh a?" tiin ka rilrua awm hmasa ber chu ka zâwt ta vat a.

Min chhâng lo chuan a ding phawt a, min melh rùn ringawt. Chutah, rawn chhuk lehin step dinglam sîra in neitute'n thil eng eng emaw dah nâna an hman, va pûk thûk deuh tak lamah chuan min nawr phei ta a nih chu!

"Jakob...!!"

"Shhh..." tiin ka hmui chu a rawn hup a, mak ti leh hlauhthãwng takin ka en chho hrâ mai. Tuna kan awmna lai tak hi chu chhùnah pawh a êng êm êm thei lo va, tlai lamah phei chuan torch light chhun hial a ngai a ni, tunah tak hi chuan chutiang êm chu la ngai lo mah se a thim ruih tawh tho a ni.

"Ka tâ i ni, tu dang tâ mah i ni lo," ti supin a kut chu la sawnin a rawn kûn hniam zui a, ka han tãl ve nain min pawm nghet hneh êm asin. A hmuiin ka hmui a rawn sîktîr zat a, kei ka hmui ka lo chîp hmak si lo, rawn nawr kau zualin duhthawh zet hian min fâwp ta bawrh bawrh a. Min fâwp bawrh bawrh ti ila min dìm lo chuang miah lo va, a nawm loh phah chuang lo. Hetianga min fawh hi a thiam tlat alawm. Eng thil dang mah ka ngaihtuah thei ngai lo țhìn a, tunah pawh chutiang chiah chuan ka awm leh tawh, a hnungah ka chûl a, ka fâwp lét a, a hnuah phei chuan a nghâwngah ka bân pahnihin ka kuah hial mai!

Duhthawh taka kan infawh mawlh mawlh lai chuan a tàwp ta thut a, min thlaha a hmui chu tuaiin," I rilruin min phatsan tum mah se i taksa erawh chuan min phatsan thei lo a nih kha, kha pa kha chu kawp tum duh suh, phùrna ka pêk ang che hi a pe ve thei lo che," a ti leh sup sup a, a kawr chu pawt mar țhain ka bul ațang chuan a kal sawn a, step-ah chuan a chho zui ta nghâl a.

Tha khùr dar darin ka en zui reng ringawt! Ka thin lah chu a phu su dup dup a, ka thaw ring lutuk pawh chu miin an rawn hre thei hialin ka ring a ni. Nichin khân min fâwp a, kei pawhin ka fâwp a, duhthawh takin kan infâwp dùn mawlh mawlh a nih kha; mahse, min thlah thutin min kalsan ta a, hei hi a phuba lâkna a ni thei ang em? Țhen tawh inti reng chung siin a duh ang takin ka chungah a la che thei a, kei lahin ka lo hnar hauh si lo, a phûr phûrah ka la țang zui a, ka thinlung chu a va hre chiang dâwn tehlul êm! Amah, a taksa ka hnar thei hauh lo tih a hre kar ang chu.

Ka tha khùr zualpui a reh hnu chuan zum deuh dâkin ka pên chhuak a, tha za lo zet hian step chu ka phiah chhunzawm leh ta a, nichina kan thãwm leh awm dàn kha chu in chhûng lama mite chuan an rawn hre pha kher lo ang le; mahse, ka rilru erawh a nawm phah chuang hauh lo.

Zànah chuan Dr. Jerry haw tùr chu kan thlah a, Zotei pawhin lehkha a zir lo. Mâmate pahnih chu a phûr phûrah țangin thlah nân tiin an zai a, an phawk an chhuah ni berin ka hria. Kan thlaha ber pawh chu zai ve tùrin an ti a, a han zai ve mai bawk a, a thiam fahran lo nain a han tihlawhtling ve mai chu a làwmawm ve hrim hrim.

Jakob-a message ka dawn leh mai ka ring deuh a nia; mahse, thehmeh ang maiin a reh vang vang mai. Min hrem dàn hi chu a hre ve thlâwt ka ti, heti hian amah ngaihtuah lo thei lovin min han siam thar leh chu a nia, pathlawi nge nge hi chuan rilru chu an lo nei deuh a nih dâwn hi ka tih phah, ngawih daih hun lah a hre ropui si.

Dr. Jerry chuan ngeiawm hauh si lo hian min duh thu chu a sawi chhuak a; mahse, chhàn ka tum lo va, huat pawh ka tum chuang lo. Țha takin ka chhâng a, Jakob-a nèn kan inkawp țhin dàn chu a tlângpui ka hrilh a, min beisei lo se tih ka duh vàng a ni. Kei hi chuan ka phù loh lutuk bâkah hnam dang a ni a, a fuh thei ngai dâwn lo. Kan khawsak phung a inan loh bâkah ka tum lo hrim hrim, lo hmangaih viauin lo duh lêt ve viau ila chuan kawng pawh a awm ve thei mial mahna! Mahse, chu chu ka tum lo bur a ni tawp, tum loh miau hi chuan a lo theih viau a ni.

'Muansangi' inti chuan min rawn text zauh zauh a, Jakob-a ka țhen chungchângah làwmthu min rawn hrilh rualin a nu(Zonuni nu) natna chungchângah chuan min rawn puh deuh hlek a, lang lutuk si lo hriat thiam theih tho si hian. A chhan chu Jakob-a nèn kan inkawp tih an lo hriat khân an rilru a na lutuk a, a hrisèlna a lo pan sa nèn, a nu chuan chaw ei thei lovin natna dangin a tlâkbuak nghâl ni àwm a ni. Chutiang thil chu a lo nih lehzêl avàng chuan kei pawh ka inthiam lo zualin hrehawm ka ti zual a, a hun taka Jakob-a ka lo țhen kha hrehawm ti viau mah ila tunah hi chuan ka lãwm a ni. Mi nunna kan kutah a awm tih theih a ni ta mai si a,  Jakob-a hi thiam loh ka pe hauh lo, ka khawngaih zâwk, hetia a reh vang vang pawh hi pawi ka ti lo, a rilru a hrehawm dâwn êm asin, a inthiam lo ve pah dâwn nèn, ka khawngaih ngawih ngawih.

Mahse, Muansangi hnên ațang chuan Jakob-a chanchin mai bâkah a nu(Zonuni nu) chanchin thleng thlengin ka hre thei zêl a. Tunah chuan damdawi in ațangin a chhuak tawh a, an khua Thênzâwlah an awm tawh tih thu thlengin ka han hria a, kawng lehlam takah chuan ka lãwm viau, damdawi ina awm ngai lova a chhuak thei chu ka lo lawmpui ve tawp mai a, a dam chhoh zêl pawh ka beisei a, ka duhpui êm êm bawk. Jakob-a tân pawh tlêmin rilru a hahdam ve thei deuh hlek tawh ang chu.

Mahse, May thla chawhnu lamah chuan Mami hnên ațangin a nuin zual lam a pan thut thu ka hre leh a, Jakob-a buai dàn tùrzia leh rilru hrehawm tùrzia chu ka ngaihtuah a, ka khawngaih ngawih ngawih a ni. Hnèm tùra han biak lah chu ka ngam dér si lo va, țawngțaina lamah erawh ka dìlpui ta ziah thung.

Kan dìlna hi kan duh dàn anga chhàn ni vek ta ila chuan khawvêl hi a buai nuai nuai maithei a ni, famkim lohna khawvêl niin kan thu thua kan awm theih lohzia leh kan thunun theih loh thil a tamzia, nunna chungah hlauh phei chuan thu kan neih lohzia ka hre chhuak thar uar uar a, Jakob-a nu pawh a natna chuan a taksaah zung a lo kaih thûk tawh lutuk a, a tlin ta ngang lo a ni tih ka han hriat chuan ri chhuak lovin chhúngrilah ka lo țap ve a ni, a pasal ka khawngaih rualin Jakob-a ka khawngaih êm êm a, a rilru hrehawm tùrzia ka ngaihtuah lo thei lo, thiam loh inchantîrin a nu natnaah chuan amah a inpuh ngei ngei dâwn si a.

Mami'n," Kal ve ila? J-a'n hrehawm a ti viau dâwn asin, țhenrual ngah ve viau tho mah se anni lakah chuan keini chu kan dang a," a rawn tih pawh chuan 'Aw' tiin ka chhâng ngam lo, Jakob-a chu ka hmu ngam lo a ni, ka khawngaih dâwn si a, ka mualpho mai ang tih ka hlau a ni. 

*I HRINGNUNAH HARSATNA TAM TAK TÂWKIN HLAWHCHHAMNA TAM TAK PAWH I TÂWK NGEI ANG; MAHSE, CHÛNG THIL CHUAN NANGMAH KHA, NANGMAH NGEI KHA TLÀWMTÎR CHE PHAL HAUH SUH, 'HRINGNUNA THLENG VE TÙR RÊNG A NI' TIIN HMA LAM PAN SAUH SAUH ZÂWK ANG CHE*