☆MIN EN LA☆ - 43 By Dingdi Pachuau

 ☆MIN EN LA☆ - 43 By Dingdi Pachuau

Ka kal ve lo. Jakob-a'n hrehawm a tih tùrzia chu ka ngaihtuah a, a mawhphurhna rit leh ta sawt chu ka lo ngaihtuah ve lo thei lo. Zonuni nu boral chu a pain a tuar viau dâwn si a, chhûngte dang nei tho mah se Jakob-a lo chu innghahna tak tak a nei dâwn lo zual a ni. 

Mami hnên ațangin thlalâk dawng lo mah ila Muansangi hnên ațangin ka dawng leh nual a, Zonuni pa țap lai leh Jakob-a'n hnem tuma a kuah laite a ni nawk mai, Jakob-a hmêl pawh chu hmuh nuam tak a ni miah lo, ka khawngaih tak zet a ni, a rilruin hahchàwlna hun a nei lo hle mai si a, a taksa pawhin a tuar mai ang tih ka lo hlauhpui ve ngawt, țhen tawh mah ila hmangaih loh vàng leh duh loh thut vànga țhen ka ni lo va, rilru hrehawm taka a awm hian hrehawm ka lo ti ve lo thei lo. A chanchin Muansangi'n min rawn hrilh zêl mai si. A hnênah hian a chanchin rêng rêng min hrilh tawh lo tùr leh a thlalâk pawh min thawn tawh lo tùr hian ka hrilh mai dâwn em ni ang?Nge a number hi ka block mai dâwn? A tân lah eng mah lo mai leh phatsantu nunrãwng mai ka ni tawh a, nge ni, min hrem nân a chanchin min hrilh zêl tùr hian Jakob-a hian a lo ti zâwk ni ang? A phuba lâk dàn kawng khat a ni thei zâwk mai lo'ng maw?

Hun a liam a, Kan in bula huan kan siama thlai kan tuh vete pawh chuan pàr rawn chhuangin rah an rawn chhuah ve țan tawh a, ka thlîr ka thlîr mai țhìn, hêngte hian ka nun an tihlim ve ta mai mai chu a ni tak si a, zonu zopa tân chuan hlimna hi a va ho tak! Ti ila, dinhmun leh awmna hmun azir hian hlimna leh làwmnate hi a lo dang mai mai a nih dâwn hi ka ti leh ta zâwk a.

Zoteite chawhmeh tùr leh ei tùr rêmcháng châng chu sumo-ah ka thawn ve zauh zauh a, driver Zára pawh ka hmêl hriat țha tawh viau mai a; mahse, Zoteite in khera va dah chu harsa a ti ve a,  kei chuan," A ngai teuh lo mai, counter-ah a rawn lam mai dâwn alawm," ka ti a, chutiang hlîr chuan an thil tùr rêng rêng chu kan thawn țhìn. Thawn man kan chawi ve hlek a, Zoteite tân lah va lam chu thil harsa a ni lo va, thlai hnah tharlâm leh rah an ei châk zâwngte kan thawn ve thei a, pawisa tlêm têin tam tak kan thawn thei a, a zia ve rêng rêng a ni. A exam zo kha a rawn haw miah lo va, a u dàwr nghâk eirawng bàwlsaka awm tlang mai tùr khân ka nuin a ti a, thu âwih takin a awm ve mai bawk a. A hnuah phei chuan pâwl li naupang pali lai mai tuition a lo pe țhìn tih kan hria a, chu pawh chu a hlawh tùr an pêk tlaia a hlim lutukin min rawn phone vàng chauh a ni. A lo awm mai mai bîk miah lo, he nau hi chuan rilru hi a nei reuh tlat.

Mami pawh rawn zin lawk a tum ve tehlul nèn, dàwr lamah an buai leh ta si a, a nuin a remtihsak lo a ni, Favàng lama zin erawh a phalsak thung a, ani pawh a duh hun hunah a chhuak hlei thei tawh bîk lo, tleiràwl chhuah lai nun ang khân a awm theih tawh bík loh a ni e.

Ni khat chu Muansangi chuan Jakob-a leh nula pakhat, tê ve deuh mai leh ngo veng mai țhu dùn lai, an pahniha an nui dùn lai ngei thlalâk hi min rawn thawn a, nula chuan a kutah a chelhsak nghe nghe a. *A bialnu tharlãm ber* tih hi a hnuaiah a rawn ziak bawk. Chu thlalâk ka hmuh veleh chuan ka thinlung a na zawk mai a; mahse, ka inthunun leh vat. A chhan chu ani hi lawmpui viau tùr ka ni tih ka hria, rilru hrehawm rêng rêngin hun a hmang a, hlimna ni hmu ve tawh se a țha; mahse, thinlung taka lawmpui chu harsa ka va ti sî êm!

Hmm.. a țha, ni e, hma lam pana kal zêl tùr kan ni alawm, hma lam a pan ta tihna a ni a, a hlim chuan rilrua hrehawm ti chung chung pawhin ka lawmpui mai ang. Hlim rawh se, hlim hi a phû, a hlim lo rei tawh êm mai. Mittui tling piau chung chuan Muansangi thlalâk min rawn thawn chu ka en tlawk tlawk a, hmuh hrehawm ti viau mah ila Jakob-a hlim nui hmêl erawh chu ka en kham thei lo.

Rilru hlim lo takin  hun chu ka hmang chho ve zêl a, hna ka thawh bawrh bawrh leh mi bula ka awm hian ka thinlung na vawng vawng chu ka theihnghilh ve deuh țhìn, chu vàng tak chuan hna ka thawk nasa a, kan leipui kan thawh fai vek hnuah pawh mi hlo thlawhahte ka inhlawh leh char char a, hna thawh  bawrh bawrh ka duh ber a ni tawp mai. Ina awm nî ka nei mang lo rêng a ni Pathiannî tih loh chu.

Ka nu erawh chuan Inrinnî tal chu chàwl hahdam ve tùrin min ti țhìn a; mahse, ka thawk lui zêl tho. Mi hlim taka an nui hmêl ka hmuh hian a rûk tak chuan ka awt êm êm a, a langah hlim hmêl pu lui țhìn mah ila chhúngril lam hi a hlim mawlh si lo va, ka awm dàn chu ka nuin a hria ang tih ka hlau ngawih ngawih a, a bulah phei chuan hlim àwm takin ka awm ziah.

Zotei result chuan min tihlim kher mai. Jakob-a nèn kan ințhen hnua rilru taka ka hlim lehna hmasa ber a ni ngei ang, ka feh haw veleh ka nuin phûr takin min lo hrilh vat a, a hmêl ațang pawh chuan a lãwm a ni tih a hriat ngawih ngawih. Ka inbual hmain Zotei chu biain lawmpuina thu ka han hrilh ve nghâl a, kan tân chuan a làwmawm êm a ni. Mark 5-in distinction a phâk lo chauh a nia, kan chhûngkaw tân chuan a hlûin a làwmawm êm asin.

Zànah làwmthu sawiin kan țawngțai a, ka pute chhûngkua pawh an rawn lêng ve nghe nghe. Ka pu chuan muang charh hian," A làwmawm êm mai, amah hi rawn haw se, làwmthu sawi pahin chawhlui pawh kan buatsaih ang chu," a ti chuar chuar a, ka putea chuan," Ni e, Broiler âr kan vulh țeuh alawm. A pass țha si a, lawmsak hi a phû a ni," a lo ti ve bawk a, chutiang sawi chhuah chuan naupangho lah chu a phûr phûrah an lo țang a, kan ri nak nak hlawm a.

Mâma'n chawlh a neih ve theih loh avàng chuan Zotei chauh a rawn haw a, ka puin a lo tiam tawh angin an Broiler âr lian zet zet pahnih chuan pass chu kan làwm ta a, mi kan sâwm tam lêm lo, a school luhna țhin Primary school leh Middle school Headmaster ve ve erawh kan sâwm a ,anni pawh chuan an lawmpui ve khawpin ka hria. Thilpêk țha tak tak an pe bawk a, kan lo sâwm tel ta kher kher chu kawng lehlamah chuan a zahthlâk ka ti angreng, thilpêk beisei kan nih duh hmèl ka ti leh hnuhnawh a; mahse, ka nuin sàwm tel kha a ti ve tlat bawk si a.

Zàn mutnaah chuan a hma lam hun tùrte chu ka sawipui a, a duh dàn ka zâwt bawk. Ani chuan," Zirtîrtu nih hi ka châk ta ber mai, chutah pawh chuan primary school zirtîrtu ngei mai ni se, a chhan chu naupang hi ka ngaina a, an bula awm hi nuam ka ti, kan sìr pawhin,' Naupang i ngaina si a, i pass chuan DIET-ah training daih la ka duhpui êm mai che, tum nei lêm lova college kal tawp chu tûnlaiah college chhuak an tam tawh a, an awm mai mai a nih ber hi,' a tia, min duhsak bawk sia, ka training ve dâwn em maw ni ka ti, ka râwn chhin ang che u ka ti rilru pah tho bawk a, fee chàwite hi a tam viau ang em le?" a ti vang vang a.

"E, i châk a i duh phawt chuan lungngai miah suh, i ute kan awm alawm, kum eng zât nge training ngai?" ka lo ti vat a, ani chuan," Kum hnih a nia, an sawi dànin," a ti a. Kei chuan," A rei loh chu, kan han ti leh țàng țàng ang a, dam chuan kum hnih chu a liam leh vat mai ang, i duh dâwn chuan ngaihven thuai chi a nih chu," ka lo ti leh a.

"Nia, ka țhiannu pawh ka sawipui ve chhin tawh a, ani pawhin a duh a, lo zâwt chiang tùrin ka chah zui nghe nghe kha," a tih leh chuan Zotei rilru lo puitlin reuhzia chu ka hre chiang telh telh mai. Ni e, han training se, a unaute pahnih kan han țang ang a, a mamawh chu kan thawk chhuak thei êm êm ang.

Zotei pass lawmpui nân Dr. Jerry chuan a duh duh leina tùr pawisa tam ve tâwk tak a rawn thawn a, a làwmawm ka tih rualin a zahthlâk ka ti a, làwmthu hrilh pahin ka han hau leh rih bawk a, ani lah chuan," Ka tihsak theih ve chhunah chuan min hau kher lo teh," a rawn ti a," Ka awm lai khân a result kha lo chhuak hman se chuan kan han làwm tùr a nia, a nuam ngawt ang!" a la rawn ti zui deuh deuh a!

Zotei chu DIET-a training thei tùr chuan a han tling ta ngei a, a tlin ngei ka ring sa bawk a, pawisa lama a phàn lohna tùrin a theih ang angin ka lo inhlawh lâwk bawk, thawk chhuak tam tehchiam lo mah ila a mamawh tùr tâwk chu ka hlawh chhuak hman ve tho. A hnua ka hriat leh dànah phei chuan a zirna sènso engkim chu Jakob-a'n a lo tumsak vek niin, a pass lawm nân pawh a quarter-ah chawhlui tuihnai tak a buatsaihsak a, pawisa ka hlawh chhuah ve erawh chu hmang lovin Zotei chuan a lo kawl țha vek thung. Mâma min hrilh a ni nghe nghe a, Zotei erawh chu Jakob-a'n sawi lo tùra a tih vàngin min lo hrilh duh lo a lo ni.

A duh a, a tihsak a ni mai a, ka tân lo sawisèlsak chiam theih a ni tawh lo. Tunah phei chuan kan inzui tawh lo va, kan inbe ngai tawh hek lo, han lungawi lovin han sawisêl chiam dâwn teh ngawt ila Zotei tân pawh boruak nuam lo zâwk ka siamsak thei tlat; mahse, ka duh dàn takah chuan thil tihsak tawh lo se chu ka ti, thil a tihsak zêl chuan kan tân a tlàwmthlâk bâkah thinlungah inchhuan vena rilru a put theih loh. Mi tin hian rilru chhûngrilah hian chapona țha mi ti mai ang, mahni indahsànna, mahni inngaihsànna rilru kan nei ve vek a, chu chu min tihchhiatsak ka duh lo a ni.

Pasal neih tum ve uaih tawh; mahse, țhulh leh ta hmiah ka nih vàng chu nge ni, pathlawi lamin min rawn hĕl țan a, tlangvâl lam erawh chuan min kalsan deuh ka ti mai, ngaihsak lêm lo mah ila pathlawi pahnih hi chu an rawn lêng zauh zauh a. Pakhat chu nupui ru ve zawk chauh a nih vànga pathlawi tih  a ni a, fa erawh a nei lo. Pakhat erawh chu a nupui nèn ințhenin fa pahnih a nei thung a, an nuin an fate pahnih chu a awmpui a, khaw hran daiha awm a nih vàngin a hawi tawh lêm lo a ni ang.

Mercy lah chuan chaw ei lai hian ka inlêngte chanchin chu sawiin min han dem a, nupui ru zawktu zâwk Adina chu ka pasal atân a duh zâwk thu hian a tlip ziah bawk. Adina hi chu a hmêl țha zâwk tlat a, Mercy lah hmêl țha ngaisâng chi hi a ni ve si a, min duhpui lo thei lo, fa pahnih nei tawh zâwk Pu Nuna erawh chu a patling deuh tawh a, a hàng deuh bawk nèn, a teh tling thei tlat lo, kan nuihpui nasa thei a nia, ka nu lah hian fiamthu a ni tih a hriat miah loh tùr hian Pu Nuna chu a'n fak a, a lo ner kual nasa thei, kan chhûngkaw tihlimtu ber a ni.

Pathlawi mit hi ka la a ni ang ka ti tawp mai, Jakob-a ni se pathlawi bawk, Nunhlima erawh kha chu tlangvâl pângngai a ni ve a, kei lah nula awm ãwl, tituai nalh tak ka ni hran lo va, a chhan chu hna hrâm thawka ni tin chhuah chuan tituai hi a no mawh êm a lo ni, ka kut ni se a thap ve deuh hrep bawk a, nula kut pawh a ang lo țêp tawh, dinhmunin a zir loh miau chuan tihngaihna awm hek lo le.

Lungleiah Mâmate tlawh pahin an mamawh chawhmeh ka kensak a, Lunglei kal kher lo pawhin a thawn theih tih hre tho mah ila tlawh ve rêng rêng ka duh a, zàn hnih lai ka riak ta nghe nghe. Lunglei kal manah tiin ka haw dâwn tlai lamah bazârah ka kal kual mai mai a, hnathawhna tùr secondhand mawza thin pahin ka nu thil tùr ensak ka duh bawk a ni.

Mawza chu a lo vâng phian a, ka duh aiin a țha lo tlat lehnghâl a; mahse, ka en peih viau thung a, lei ngei ka duh si a ni. A tàwpah chuan pahnih ka thlang a, a man ka pêk lai chuan," Ka pi, helaia Jacket hi eng zât man nge?" tia mipa aw ka hriat chuan ka en phei vat a. A aw kha ka hriat hnu a ni tlat si a, Nunhlima a lo ni rêng bawk a, ani pawh chuan min rawn hmu ve nghâl chiah bawk.

"I dam maw? Inhmuh a va khât ve!!" tiin ka be hmasa vat a, ka nui sak bawk a,  ani erawh chuan min chhâng lawk lo chuan min en reng phawt a, min hmu thut chu mak a ti viau a ni ngei ang chu.

"Teh nawlh che chuan! Hmuh che ka inring lo lutuk a! Lungleiah hian i la awm reng em ni? Pasal i nei tawh em?"

Min sàwm luih tlat avàng leh 'Țhian kan inhmuh chhunah, kan inhmu lo rei tawh si' a tih tlat avàng hnial luih chu nuam ka ti ta bîk chiah lo va, dàwrah min chawlhpui a, chanchin chu kan inzâwt tawn a. Nupui a nei tawh tih ka hriat vàngin zawh tùr chin leh biak dàn tâwk chu ka hriat a ngai tih ka hria; mahse, ani hi chu mi fel tak a ni ve hrim hrim a, ani pawhin min zawh tùr chin a hre khawp mai bawk, invêng ru taka inbiak a ngai hran lo.

Fapa leh fanu a neih tawh thu chu hlim takin a sawi siam siam a, a hmêl ațang chuan a fate chuan a nun chu an tihlim viau tih ka hre thei mai, an thlalâk pawh min hmuh nghe nghe a, an hmêl pawh a chhe miah lo nia, nu leh pa tân phei chuan en nin an har ngawt ang chu.

"Ngaihdam dìl che hi ka la ba ngar ngar tih ka hria, kan hun kal tawh avàng khân min ngaidam hrâm dâwn nia, hetia ka tih hma loh hi chuan ka rilru hi a hlim hlen tak tak lo ang, i chungah hian inthiam lohna rilru ka pu reng țhìn si a."

Kan inhmu hlauh chu làwmawm ka ti tak zet a ni. Kei ngei pawh a lakah inthiam lohna rilru ka pu ve reng tho kha a nia, a sawi chhuak chu țha ka ti, ngaihdam indîl tawnin hlim takin kan titi zui thei ta si a.

Ka haw lam chuan rilru engthâwl takin ka kal a, Nunhlima ka hmu nawlh chuan min tihlim chu a ni kher lo ang; mahse, kan thil sawi leh kan thinlunga kan lo vei kan sawi chhuak a, ngaihdam kan indîl tawn a, khatiang boruak kha a nuam êm a ni, tunah chuan rilru zãngkhai takin, inhmuh leh hunah pawh kan inbe bawrh bawrh thei tawh ang a, inkiltawihna a awm tawh lo ang. 

Chutiang ngaihtuaha hlim taka ka kal lai chuan ka hma lawka kawng tan tlang zâwnga kal mi pahnih ka hmuh chuan ka tàwi deuh hrat a, ka hlim hmêl pawh chu a reh riai riaiin ka ring, Jakob-a leh a bialnu ngei mai kha bâna inchelh rialin min hmu hauh lo chuan an kal dùn si a, ka en zui deuh nain min rawn hmuh ka hlauh avàng chuan ka en rei ngam lo, ka hmai ka kuta inhliah deuh hlek chung chuan ka kal ta thuai thuai zâwk a. 

Ngaihtuah loh tum viau mah ila ka mitthlaa an lan tlat avàng chuan ngawi vung vungin ka lo ngaihtuah zui leh țhìn a, ka chawhmeh chhuan lai a so liam phah bawk. Zotei chuan," A bulah i ding ve reng sia, a va mak ve maw le, kan khaw lama tu tute emaw i ngai tawh a ni ngei ang," nui deuh chung hian a rawn ti a, ka en vat a, pathlawi pahnih chungchâng kha Mercy hnên ațangin a hre ve vek si a, min dem ve a ni tih ka hria.

"Ngai ve tawh bawk ang chu maw le," nui lui sak chung hian ka ti a, fian lain ka chawhmeh siam so mêk chu ka hawt sawt sawt a, gas chu ka off zui nghâl a.

Rin loh lutukin Jakob-a a rawn lût nawlh mai! Zanriah kan ei kham deuh hlawt a ni a, Mâma bathroom-ah lûtin Zotei dàwrah a kal lawk zui a, lo awm ber ta chuan lo chiau-au loh theih ni hek lo le, ban deuh hlek hian," Lo lêng rawh, eng nge ni i duh tâk?" ka lo ti charh a.

Kei min hmu chu mak ti hmêl pawh a pu lo, keiin mak ka tih rúk nèn, ngawi rengin min en rùn rún phawt a, chutah," I dam maw?" a ti sup a, kei chuan," Aw, dam e," ka lo ti ve mai a, han chhàn thui zui zêl dàn tùr erawh ka hre lo.

Zotei dàwr kal a rei lo hlauh chu a làwmawm tak zet. A rawn lûtin Jakob-a a rawn hmuh chuan," I lo kal a ni maw? Dàwrah ka kal lawk a," a ti nghâl sawk sawk a, thingpui ka lum so tawh chu ka thli chhuak a, Jakob-a chu ka pe zui nghâl a.

In a chêp a, inhnaih takin a țhut loh theih loh a, a mi dîp a na si a, nuam lo ka ti tak zet a ni. Țawng lovin min en leh rùn rún țhìn bawk si a, nuam lo ka ti tih pawh a hre ve ngeiin ka ring. Zotei'n a be zauh zauh zâwk a, chuti ni lo phei se chuan a nuam lo zual ngawt ang chu.

Ngawih deuh kar reng chu a fuh bîk chiah loh avàng chuan han sawi mai tùr ka ngaihtuah kual a, Zotei zirna sènso a tumsak chungchâng chu ngaihtuah chhuakin làwmthu ka han hrilh leh rih a. 

"A làwmawm tak zet a; mahse--" ka la sawi zawh hma chuan ani chuan," Eng mah a nih loh kha, a tâna ka tih theih ve chhun ka tihsak mai kha a nia, min sawisèl erawh ka duh hauh lo," a lo ti dût a.

"Sawisèl che ka tum chiah pawh a ni lo--" ka ti leh a, ani chuan," Chuti a nih leh, a țha a nih chu!" a lo ti leh mai a, țawng zawm leh mai tùr a vâng duh khawp mai.

Kan ngawih deuh reng hnu chuan," Vawiin khân i hmêl hriat hlui i hmu a ni maw?" a rawn ti leh dût a, keimah min bia a nih ring lovin ka en deuh hau a; mahse, keimah min lo en reng niin.

"Tu ka hmêl hriat...?"

"Hai der mah ta che, i lunghlui pawh a lêng mahna!" a tih leh sup chuan ka ngaihtuah chhuak thiam chiah, Nunhlima nèn kan inhmuh tak kha, he pa hian min lo hmu reng tihna em ni?!! 

A haw har lo, ni e, ka awm vàng ni lovin Zoteite a rawn tlawh a, kal kualna tùr nei angin a la insawi nghe nghe bawk a, a bialnute inah a pêng haw dâwn a ni ngei ang. Tlai lamah pawh khân an inzui nghe nghe kha, hmeh pawh an inhmeh alawm, a bialnu lah kha a no reuh sir ser bawk si, a duh thiam ngawt ang.

Mami'n min rawn text a, ka chhàn laiin Muansangi'n min rawn text ve bawk a, Jakob-a leh a bialnu thlalâk bawk chu min rawn thawn leh a. Mitthlaa hmuh pawh hi ka duh tâwk viau tawh asin, hetiang hi chu min rawn thawn tawh lo hrâm se ka va ti tak! A number han block ringawt mah ila number dang ațangin min la rawn thawn thei tho bawk si.

Mami hian Muansangi hi a hre ve ang em? A hre mial maithei asin, zâwt teh ang. Ka han zâwt chhin tak tak a, pehhêl deuh takin a nia ka zawh ni. Ani chuan  *Ka va hre mai lo êm! Engati nge ani chungchâng chu min rawn zawh daih a?*  a rawn ti lêt zat a.

*Ka zâwt mai mai che, i hriat tâk mialin ka ti maw le*  tiin ka chhâng a, ani erawh chuan *Chutiang chu ka hre miah lo, J-a hian țhian chu a ngah viau mai a; mahse, han kawm deuh bîk hi chu pahnih pathum bâk a neih ka hre lo, chu pawh mipa vek an ni zui a, ka hriat loha hmeichhia a lo kàwm țhìn a nih chuan le, ka hre lo le*   a rawn ti leh duah a.

A tûkah chhùn dâr 12 vêlah a message chu ka hmu leh a, a lo ngaihtuah char char a ni ngei ang chu *Muansangi chu ka hria; mahse, 'Muansangi' tiin ka hre ngai lo, 'Melody' ti hlîrin kan ko țhìn a, chu vàng chuan nizàna min zawh pawh khân ka hre mai lo alawm, J-a nau a nia*  tiin.

Jakob-a'n nau a lo nei maw?!! Ka hriat vawi khatna! Pa a neih thu chauh kha a sawi sia, a va mak dâwn ve! He pa chanchin hi ka lo va hre chiang lo tak êm tih ka ngaihtuah nghâl bawk. Chuta kârah mahni chanchin sawi sárh sârh chi a lo ni lo bawk nèn, a àwm ve tho mai. Tunah chuan nau a lo nei reng tih ka hre leh ta, thurûk eng zât tak la nei ang maw?

*NUNNA AWMNAAH CHUAN BEISEINA A AWM ȚHÌN*