☆MIN EN LA☆ - 44 By Dingdi Pachuau

 ☆MIN EN LA☆ - 44 By Dingdi Pachuau

In ka thlen hnu lawkah Mami chuan a biakin min rawn bia a," Melody ni leh lo, Muansangi kha, engtia hria nge i nih a?" tiin min rawn zâwt zui zat a, in ka thlen tawh leh tawh loh pawh min zâwt lova chu thu min rawn zâwt daih chu mak ka ti deuh hlek a; mahse, Lungleiah ka zin tih ka hrilh lo tih ka ngaihtuah chhuak leh zat bawk.

"Ka hre hran lo, ka hriat loh vàng alawm ka rawn zawh che le!" ka ti ve thung a, ani erawh chuan," Hre lo la min rawn zâwt lo ang tih ka hria alawm, engtia hre nawlh nge i nih ka hre châk lo thei lo, J-a nau chu a ni ngei mai a; mahse, a puitlin hnuah chauh J-a hian nau a nei tih a hre ve chauh, a nu lama a nau a ni àwm e, kei phei chuan vawi hnih chauh ka la hmu nghe nghe," a rawn ti leh barh barh a.

"Thisen zawmpui nge nge chu puitlin hnuah chauh pawh inhre mah se an inpawhin an inhmangaih viau tho ang chu," ka tih chuan," Ka ring chiah lo, a lo ni maithei tho bawk a; mahse, ka ring lo zâwk a ni," a rawn ti leh a. Duh tâwk mai lo chuan," Melody ai chuan kei pawh hi min pawh zâwkin ka ring! A chhan chu kei chuan unau pianpui ang tak takin ka hmangaih a, han vìnin a lakah țawngkam țha lo han hmang țhìn mah ila ka hmangaih tih hre thiam pha chin a ni tawh, a sum lah ka ît ve hek lo," a rawn ti leh ta bawrh bawrh a.

A duh tâwk chin a sawi hnu chuan," Ka han hrilh vek law law che a nih kha, vawi hnih chauh la inhmu mah ila vawi khat chu min ti thinrim tawh a, J-a ka pawh viau chhan kha sum vàng niin min puh pek a! Kan insual lo chauh a ni, chu vàng chuan in lo inhre ve tawh a nih pawhin a rang lamin inthiar fihlìmsan rawh, nang phei chu i rilru a țha lehnghâl a, a bum khawlo vek mai ang che, J-a nau, ka cousin ve tho chu ni mah se  mi țha ni mawlh hek lo, ka mil lo, ani pawhin sual min tiin min mil lo ve thei tho bawk," a rawn ti leh bawrh bawrh a.

Melody a ni emaw Muansangi a ni emaw ka hriat chian zâwng mi a ni ve lo va; mahse,  Jakob-a nau a nihna avàng tak chuan a u thurûk tam tak chu a hre ngeiin ka ring tho. A nungchang chu eng pawh lo ni se, a lo sual deuh a nih pawhin Jakob-a chuan a duat viau tho ang tih ka ring, duat tùr dang unau pianpui a nei hleinem ti ila a lo la nei ru leh khiau maithei a ni, thurûk a ngah êm mai.

Lunglei ațanga ka haw hnu kâr khatna chiah a ni a, zanriah kan kîl laiin Zotei chuan," U, U Kob-a Aizáwl kal tùr a rawn pêng lawk dâwn a nia, zàn khat chauh a rawn riak ang, kan unau chunga a ţhat êm kha, lo be țha ve tho la aw, zàn khat chauh tak tak a nih dâwn chu," tiin min rawn bia a, kei chuan," Engtikah maw a rawn kal dâwn?" ka lo ti thung a, ka thin a phu nghâl dawt dawt mai. Ani chuan," Zanin dâr 8 vêl khian a rawn thleng theiin ka ring, kan thuamhnaw țhenkhat ka rawn thawn haw pah a, a remchâng sia ka tia, lo be țha rawh aw, a khawngaihthlâk," a rawn ti leh a. 

A va ho mai mai tak!

Ruah a sûr lo teh tlat a, chhûm erawh a tam khawp mai thung a, thla pawh a lang lo, arsi erawh pahnih thum vêl chu hmuh tùr a awm. Zàn rei lamah chuan a sûr leh ngeiin ka ring. 

Pu Nuna leh Adina an rawn lêng leh a, pângngai takin ka lo be luam a; mahse, lo thleng tùr mi pakhat a awm tih ka hre reng si a, rilru a bet thei hlawl lo. Inthup tum viau mah ila dik tak chuan chhûngril lamah ka dik thei lo a ni, ka phî ru deuh chung ti ila a dik ber ang chu, a lo thlen hun ka nghahhlelh vàng lam chu a ni lo, ka huphurh vàng a ni mah zâwk ang chu. 

Dâr 8: 30 chiahah kan in chhak kawngah chuan motor a ding ri ta dat a, ka hre ru kar mai, mi dang erawh chuan an hre lo a ni ang, an titi chhunzawm bawrh bawrh reng a, ka nu pawhin a hria a ni ngei ang, choka ațangin a rawn phei vat a, kawngkaah a rawn chhuak zui nghâl a. Ni e, lo chiau-au teh se, kei chu biak pawh min be châk kher bîk lo ang, chutih rual erawh chuan Zotei thil min rawn chah mawlh mawlh kha ka hre chhuak leh zat a.

Kawta an inbe rî chu ka hre thei nain an sawi tak erawh ka hre thei lo. Ka in lêngte an titi ve bawk si a, thil dang han ngaihtuahsan daih chu a dik lo tih hriain an thu sawi lamah chuan ka beng chu ka dawh ta zâwk a.

An rawn lût chu lo biak vak ngaihna ka hre lo va," I rawn thleng tluang thei maw?" ti zawngin ka lo bia a, a tâwk dèr. Lo buaipui chiam dàn ka hriat loh bâkah ka tum hran lo, ka nuin a buaipui a, thingpui pawh a siamsak nghe nghe.

Adina leh Pu Nuna pawh mi ã nilêng an ni lo va, inneih tuma palai hial pawh rawn tîr tawh kha a ni tih an hai lo, hawihháwm tak erawh chuan an lo bia a, rei tak erawh an lêng dùn ta lo thung. An haw hnu chuan hmun ka phiat fai a, Mâma khum a ruak a, chutah chuan mu mai tùra ka nuin a tih avàngin mutna tùr phah hran a ngai tawh lo.

Zotei'n min rawn chah ve miau avàng chuan," Aizawlah i phei dâwn ni àwm ka lo hria a?" tiin ka han zâwt ve a, ani chuan," Aw, a dik alawm," a lo ti sup a, ka nu bathroom-a a luh hlàn a ni a, ani awm rih loh avànga boruak reh lutuk tùr chu ka duh chiah bîk lo a ni.

"Hna vàng a ni ang maw?" Ka va zâwt chîk mai mai tak! A chanchin chipchiar taka hriat vek tum ang maia ka han zawh chuh! Ka lo la ngaihven hlêah min ngai ngei ang chu.

"Ni tho, ni lo tho bawk."

Ka nu rawn chhuah hnu chuan kei ka lût ve leh ta thung a, zàn dang aiin ka rei deuh hlek, ka rei lui a ni, ka chhuah hnu lawka mut thuai theih tùrin ka ha ka nâwt rei lui ve ngat a ni.

Mutnaah erawh message-in min rawn ûm zui zat a, *A tu zâwk kha nge i bialpa chu?*  tiin. Chhàn ngai ka ti lêm lo va, ka phone pawh ka dah leh daih a; mahse, a rawn tih nawn leh tâkah chuan *A hmêl țha zâwk kha*  tiin ka han chhâng lêt ve salh a.

*Naupang kha maw? Ka hmuh thut khân mipa naupang emaw ka ti tak tak*   tiin ngeiawm zet hian min rawn chhâng lêt leh a, za lo zet hian ka nui ringawt, ka âwih lo chiang lutuk a, chhàn lêt pawh ka tum tawh lo.

A tûkah chuan tûkțhuan ei khamah muangchângin chhuak tùrin a insiam a, ka nuin kawt thleng thlahin kei erawh chuan ni dang ang lo takin motor thleng ka zui chho a, dàwra kal lawk ka duh tho si a ka tih vàng a ni, ka thla tin hunbî a hnai leh tawh a, pads lei lâwk ka duh.

"Dàwr kha a la hla a ni lo'm ni? Lo lût ve mai rawh."

Hnial ka han tum zet a nia; mahse, kan piah deuh lawk ka pute in ațanga kan khaw nu zawng zawng zînga lei hman thiam ber mai tia an sawi țhin Nu Rawngbâwli lo chhuak ka hmuh chuan ka han hawi sawn deuh a, ka thlêk leh zauh lai chuan kan lam panin a rawn phei tih ka hmu ta a, sawi tùr a ngah leh dâwn lutuk tih ka hria. Pumpelh nân tiin motor-ah chuan ka lût ta thuai a, min rawn hnaih hmaa tlàn chhuahtîr hman ngei ka duh avàng chuan," Tlãn thuai teh!" ka ti ta sap a.

Min rawn biak hman hma chuan a tlãn chhuak ta a, ka thaw huai mai. Ka peih lo, chîk zet zetin thil min han zâwt kual leh ang a, tunah tak pawh hian mi dang bula min sawina tùr chu a hre leh țeuh tawh tho ang. A huhoa inkhâwm hun, Pathianni a huphurhawm leh dâwn mang e.

Ka thil ngaihtuah avàng chuan ka hawi chhuak miah lo, ka maimichhîng a, ka mitthla suangtuahnaah Pathianni ka hmu a, miin min melh leh hrek hrek hlawm tawh a, Nu Rawngbâwli rawngbàwlna a tla țha leh viau tih ka hmu thei, ka thaw chhuak hawk nghe nghe a. A rawngbàwl dàn hi a fuh chiah lo țhìn a ni, mi chanchin sawia rawng bâwl lo hian Pathian rawng hi bâwl ta zâwk se...

"Ding teh...!!!"

Ka thil sawi hre lo ang hmak chuan a speed ngai rengin motor chu a khalh a, ka hawi kual nasa mai!  Kan khua kan lo tlàn chhuahsan tawh lo niin, ka suangtuahna rama ka chèn lai khân ani chuan remchângah lain min tlànpui zêl a lo ni.

"Ding rawh, dàwra kal tum alawm ka nih," ka ti leh tuar a; mahse, chu pawh chu engah mah a ngai chuang lo.

"Aizâwlah ka ru phei dâwn che."

"Jakob...!!?" A hmel chu ka en vat a, danglamna pakhat tê mah ka hmu lo. Min rawn en lo va, kawng lam chauh chu a en ngur mai a, a bula chuang ve pawh ka ang lo, phurh nei lo ang maiin a khalh ni berin ka hria.

"I ti hauh lo ang! Police-ah ka report dâwn che, i hria em? Min kidnap tia ka report che chuan--" ka sawi zawh hma hma chuan," Kidnap lo ve, i nu ka dîl vek tawh," a lo ti leh thung a.

"Chu pawh ni se, keiin ka duh hleinem, ka rem tihna tel lo chuan min hruai chhuak thei lo," ka ti leh a, ani lah chuan," Thei a ni ang chu, hei ka hruai chhuak che chu a nia," dàr chhìn ãk hian a lo ti leh thung a, chak zetin a car chu a khalh par par a, a thil sawi leh ka thil sawi chuan a motor khalh lai chu a tibuai pha hauh lo a ni ngei ang.

"Mi duh lo chung ru chhuak duh khawpa hniam i nih ka lo ring ngai lo," ka ti leh ringawt a, ka thin a rim bâkah ka mang a ang ru khawp mai a, ani lahin din rêng rêng a tum hauh bawk si lo, ka phone ka han dap a; mahse, inah khân ka charge vàngin ka dah daih a ni tih ka hre chhuak nghâl chiah.

"Chuang tùra ka tih luih hauh loh che kha maw. I duh thu ngeia chuang i ni alawm, ni lo'm ni?" 

A va han ngeiawm chiang tak! A nui deuh suk hmêl chu ben thlawrh ka châk lutuk ringawt, ka inhûm ruh a, ka hmui ka pet a, kei hi ka lêt leh vat a ngai a ni, engah nge ani Aizawl phei tùr ka zui ve ngawt ang? 

"Ding rawh, ka chhuk duh!"

Engah mah min ngaih loh dàn chu vut laka vawih ang vêl a ni. Ka melh ràn rán a, a motor khalh lai saw ka va tibuai mai dâwn em ni ang? Mahse, kan accident phah ang tih ka hlau si, thih ringawt chu ka la duh meuh si lo.

"Khawngaihin, min hruai haw leh hrâm rawh, khawngaih takin ka ngèn che a ni," tiin a khawngaihna chu ka dîl leh ta zâwk a, thinrima invin vaka invau ai chuan hetia khawngaih dìl hian kawng ro a su zâwkin ka ring a ni.

"Ka nupui i ni dâwn alawm."

à taka chêt nghâl rum rum mai chu ka ngaihtuah chhuak hial mai, a motor ațang hian lum chhuak tawp mai ila emaw a dârthlalang hi chhu keh ta mai ila tih te chu ka ngaihtuah zawk zawk a;  mahse, ka inbeng dài hrám hrãm, rilru fîma ngaihtuahna ka sèn a ngai. Ani nèn hian kan lo induh tawn tawh țhìn ngei mai, kei phei chuan ka duh rêng vàngin ka țhen hauh lo zui a; mahse, hetiang êm ti duh tùr khawp hi chuan ka ring pha lo.

Kawngah kan ding lo hrim hrim a, a speed a chak bawk nèn, a cháng phei chuan ka hlau ve țêp a ni; mahse, a khalh thiam ve viau a lo nih hi, kan la accident lo chu a nia.

"Hetiang hi ti mah la, kan innei dâwn chuang lo, thil theih a ni lo," ka ti leh ringawt a, a thurûk kha ka ngaihtuah chhuak a, thil theih ni hek lo le; mahse, tunah tak hi chuan ka beidawng ve țan deuh tawh a ni. A tlãn lêt dâwn lo tih ka hre chiang tawh a, Aizawla zàn hnih khat riaha haw phei leh mai a nih chuan a harsa lutuk lo tùrah ngai phawt teh ang.

Mahse...

*I NUN KHA MI NUN A NIH LOH AVÀNGIN MI-AH BUAI SUH, VA BUAI AI CHUAN I KAWNG KHA EN NGUN VIAU ZÂWK RAWH, AN KAWNG KHA I KAWNG A NI VE SI LO*