☆KA BEISEINA☆ - 1 By Dingdi Pachuau

☆KA BEISEINA☆ - 1 By Dingdi Pachuau

Ka duh aiin ka phûr mah mah! Hetianga lo phùr êm êm ringawt mai chuh, kawng lehlam taka ngaihtuah chuan a zahthlãk zâwk, Pathian thu sawi ngaihthlâk duh vànga phûr ni lova thu sawitu tùr zâwk hmuh châk avànga lo phur chiam kha a Pathian thu lo ve êm a ni; mahse, chu chu ka rilru put dàn dik tak a ni bawk si.

Ka phùr lutuk avàng chuan chaw ei kham veleh thlèng ka sil sawk sawk a, ka insiam zawh veleh ka nu leh ka nau Bawiha pawh nghâk chhuak zo lo chuan Remi sâwm tùrin ka chhuak leh nghâl vat a, ani pawh a lo hman ve chiah a, Biak in lam panin phûr takin kan pên ta vat vat a.

Inrinni zàn mah ni se, inkhâwm kan țhahnem viau mai a, kan biak in zau ka lo tih ve viau ţhin pawh chu a zïm ta riauin ka hriat phah nghe nghe. Hawi kual si lovin ka mit ka lèn reng a, ka zawn rük chu ka la hmu rih lo. Ngaihtuah fahran lo chuan ka zai ve vak vak reng tho a, Remi chuan min rawn kheuh zauh pah hian," I zai ring lutuk! Insûm deuh teh," a rawn ti sar sar a, rum deuh taka melh zauh pah hian ka han zai uar sauh bawk a, zanin zet zawng tlai ațang tawh khân ka dik thei tawh lo a ni ber, chhûngrilah phùrna mak takin min chîm tlat si a.

Nakin deuhah chuan a rawn lût ta zân zân mai, a chhiat loh ngaiin a lo la chhe lo reng a nih chiah hi. Nupui a neih hnuah a hring a hrãnin ka hmu leh tawh miah lo va, TV lamah erawh chuan ka hmu zauh tho nain a takah nge nge hi chuan mit chu a lo tlai deuh zâwk chu a lo nih hi, thin pawh a phu ring ta sawt mai.

A chhe lo tak zet a ni, a coat suit hâk pawh a inhmeh viau, a to viau ang chu. A țhui a dak thlarh mai a, a rawng pawh a mawi, a thlan a nih loh chuan a nupui thlansak a ni ngei ang, a changkãng zaih mai a, a pheikhawk bun sen duk pawh chu a inhmeh ka ti, ka zai lai tàwp meuhin ka awm dàn avàng chuan ka han thaw halh a, en zui zêl loh chu ka duh ve alawm; mahse, ka hawi sawnsan phal si lo a ni. Ka hmuh theih lai hi chuan en reng mai ka duh a, inkhâwm bàn lamahte chuan enin hmuh pawh duh viau mah ila hmuh tùrin, hmuh phâkah a awm leh tawh nâng.

Thu a han sawi ta a, ka en reng a, mit pawh ka khap mang lo. A hmêl ka hmuh fiah loh dâwnah chauh ka khap a, a thu sawi zawng zawng pawh hmaih nei hauh lovin ka hre vekin ka hria! Hmân ațanga ka lo star ve tawh kha a ni a, min hre ve hauh lo mah se ka star bâng thei chuang lo; mahse, chuti chung chung pawh chuan tu bulah mah ka star thu hi ka la sawi chhuak miah lo thung! Ka zak tlat alawm, ani star pha tùr leh star ngam tùr pawh ka nih lohzia ka hre chiang ve êm a, pa pawh nei tawh lo, ni lo, pa pawhin a duh loha a tlàn bosan fanu kha ka nia, hmël țha ka tih leh ka star thu sawi chhuak ngam tùr ka ni lo hrim hrim. A rei ve tawh asin, ka star tirh ațangin kum 10 chuang  a liam daih tawh!

Thu a sawi zawha tàwpna hla kan sakah chuan lâm țhìnho chu an rawn lâm chhuak sap sap a, Remi'n," Lâm ve ang," a rawn tih sap pawh chuan ka ding zum reng ringawt. Ka mit erawh chuan tu emaw pulpit-a lâm bân phar kual chu a en reng thung a, zanin chu ka phûr viau nain ka zai tui lo va, làm pawh ka tum chuang lo, tu emaw en deuh char char mai chu ka duh a ni ber.

Inkhâwm bànah chuan thlâ an lâkpui sap sap a, duh ve viau mah ila ka ngam teuh lo mai! Ka en zui deuh vang vang ringawt a, Remi chuan min rawn pawtin," Kal thuai teh ang, inhmuh khâwm kan tum kha," a rawn ti a, min kài nghâl dàwr dáwr mai. Ka țhiannu lah hian ka rilru hi a hre lo nasa mai sia maw... mahse, ka dem hauh lo, ka hrilh lo miau a; mahse, han hrilh hriat kher erawh ka tum chuang lo.

Zaipâwlin hla an lo en dâwn niin, ka tel ve hauh si lo, eng atân nge maw min hruai ve ngawt ni? Kei lahin zawh nachãng ka lo hre miah si lo, ka awm dàn a laklawh hû mai, kalsawn dâwn lahin mi dangin min lo hmu ve laklawh tawh bawk si nèn.

Zaipâwl hruaitu U Zuia lah chuan min lo hmuh rual rual chuan," Lo tel ve nghâl rawh khai, contralto an indaih lo nasa bawk si," a lo ti vat zui a, kei erawh chuan," A, ka thiam ve teuh lo mai!" ka ti lêt ve vat bawk, tel tuma kal ka ni hauh si lo, bâkah, contralto part hi ka sa thiam fahran lo hrim hrim, suprano erawh sak pângngai kha a ni mai a, ka huphurh hran lo thung a.

"A har lo, suprano part phei chu i sak thiam sa vek tho kha aw. U Zui, contralto part ka thiam deuh tho bawk a, ani hi suprano-ah awm zâwk mai se," Remi'n a tih chuan melh nghek mai ka duh; mahse, ka ti êm lo. U Zuia chuan," A tihzia hlauh chu, suprano phei chu vawi khat i sak chuan i thiam nghâl vek ang, hla ni se a thar lah a ni chuang lo va," a lo ti leh a, hnial luih ka hreh ve deuh si a, chutia kei a kár min han sáwm der ve ta chu, hnial ngam chi ni pawhin ka inhre lo va, ka tel ve ta ringawt a ni. Zaipâwla tel hi chu nuam ka ti alãwm, ka tleiràwl chhoh ve lai pawhin ka tel chho ve char char a, tleirãwl ã buang mai niin chhûngkaw dinhmun rilrua ka la hriat thiam tak tak hma deuh kha a ni bawk nèn, ka active thei a nia.

Tunah hi chuan ka hnain a zir loh êm avàngin zaipâwlah hian ka tel ve thei ta lo va, ni tin dàwr ka nghah bâkah ka dàwr nghâk ve hi mî dàwr nghâk ang ka ni ve lo va, a châng chuan dàwr neitu Pi Chhanite in lamah ka thawk leh lâwp lâwp bawk nèn, haw pawh ka haw tlãi thei viau. Ke hlîrin ka haw bawk si a, in ka thlen hi chuan dár a lo tlai duai tawh țhìn a ni. Ka nuin ka thawh dàn hi a duh vak lo va; mahse, hna dang han thawh mai tùr ka hmu mai lo bawk nèn, hah deuh hlek mah ila tlêma hlawh tam ve deuh ka duh ve tho si a, ka la thawk ve țàng țáng a ni. Pi Chhani hi mi sual a ni hran lo va, eng emawah hi chuan min duhsak ve tho, ka sawisèlna awm chhun chu ka thâ hi a duh ve êm a ni, nupa rek chauha khawsa an ni a, a châng hi chuan hriat thiamna thui tak ka nei ve tho mai bawk.

Pathianni zàn inkhâwm bànah hla chu kan en leh a, kan rei vak lo. Biak in ațangin kan in a hla lutuk lo va, bànah high school kan kalpui țhin Jim-a leh a țhianpa a kawm ngeih êm êm, a nuih duh êm avànga 'Smiley-a' kan tih mai țhin Mapuia chuan min thlah haw a, ani hi chu high school kan kalpui a ni ve lo va; mahse, Jim-ate nèn hian ințhenawm chiah an ni a, kohhran khata lawi niin college kal dùn an ni tho bawk nèn, an inkàwm ngeih viau a ni, keini nèn pawh kohhran khata lawi ta na nâ nâ chu Pathianni hi chuan kan inkàwm ve fo mai.

Remite inah thingpui hâng in an tih tlat avàng chuan kan han pêng leh rih a, thingpui hâng in lai chuan Remi chuan nimbu pum 3 hi rawn la chhuakin," Bâwl mai mai ang u," a rawn ti a, Jim-a chuan," A tui viau ang chu! Nula felte khân han siam ta ula?" a lo ti vat a, Mapuia pawh chuan nui var var chung hian," Kan thil in lai nèn chuan inhmeh lo viau mah se ei a châkawm tho mai," a lo ti ve bawk a.

Ka mut hmunah chuan Phone chu ka kheuh neuh neuh a, tu emaw thlalâk ka save țhat khiau chu ka han hmet chhuak leh bawk a. Ka muthilh dâwn hian ka en lo thei lo, ka star ve chiang êm a ni. Ka en loh hi chuan ka mut hi a tui lo tlatin ka hria a, ka en hian ka mumangah ka hmuh ka ring țhìn bawk a ni. Tuna a thlalâk ka neih phei hi chu nupui a neih hmaa mi daih tawh a ni nghe nghe a, rei deuh tawh mah se, a lan dàn ka duh êm avàng leh a incheina inhmeh ka tih êm avàngin ka delete phal chuang lo a ni.

Ka mumangah ka hmu tak tak zui a! A nawmzia mai chu a; mahse, mumang mah ni se ka zah êm êm tho nia! Mumangah lehzêl pawh ka lo la zah zêl tho a nih chu, a mak ve mai mai ngawt mai. A takah duh ang angin kan nun hmang thei lo mah ila mumangah hi chuan kan duh dàn ang hian awm ve thei tal ila aw... mahse, chu pawh chu lo ni se ka duh thu leh ka star êm êm thu pawh hi ka hrilh ngam pawhin ka ring chuang lo. Bâkah, kei aiin a upa daih zâwk a, a kum zât chiah hre lo mah ila kan inthlau ngawt ang. Nupui a nei tawh a nia, kei chu ka la nula chho dâwn chauh thung a.

A tûka dàwr ka nghah lai chuan rin loh deuhin Pu Hruaia chu a rawn lang ve hlawl mai! Mak ka tihzia mai chu a! Lo biak mai nachâng pawh hre lo chuan ka en hû reng ringawt a. Pi Chhani a lo bengvár a,  lo chhàwn vatin," E, kan pastor teh tlat chu! Lo kal rawh, lo kal rawh, tûnlai chu he lamah i awm a ni maw?" a lo ti vat vat a, ani chuan nui sâng chung hian," Aw, awm e, tûn kár chhûng chu ka la awm rih ang," a lo ti a, a hawi kual a, min rawn en lai tak chuan ka lo la en ve reng si a, ka țêk sawk maiin ka hria.

"A țhat hlauh chu, awm ve reng rih rawh u khai, in nu nèn ni tùrah ka ngai ngawt che u a?" Pi Chhani'n a tih leh chuan," Aw, ni e, khawpui lama rawn chuan chhuah hi chuan hrisèlna lam check a remchâng si a kan tia, kan han in-check law law dâwn a nih hi," tiin a lo chhâng leh a, a hmêl chu ka en tawh lo nain an inbia chu ngun takin ka lo ngaithla thung a, a aw mawi zet leh pà ru zet chuan min ti mûr ar ar thei hialin a nia ka hriat ni. Ka awm dàn hi ka duh thlâwt lo, ka lérh ka inti tlat. Mi pa a ni tawh tih hre reng chungin ka la star tlat mai a nia.

"Eng lam nge i mamawh deuh a?" tiin Pi Chhani chuan a zâwt leh a, lo din tlâwn reng mai chu a fuh lo viau a ni tih hriain nui hmêl pu deuh chung hian ka en chho a, a rûk tak chuan ka zak a; mahse, nuam ka ti viau lawi bawk si.

Ka va lêrh tak!

Ani chuan pangpâr awmna lam chu thlêk zauhin," Pangpâr i siam mawi thei viau tih ka lo hria a, hnam dang siam lei leh ngawt țhin ai chuan mahni Mizopui siam ngei chu ka hmu châk a, ka ngai hlû a, ka rilrem zâwng tak a ni bawk nèn, lei ngei tumin ka rawn kal a ni," a ti deuh duah a, a nui pah sak a, ka dinna bula ban chu ka vuan nghâl zat. A nui hmêl țha lutuk tak mai avàng chuan ka tlu mai ang tih ka hlau, ka kaihza tha a thlengin a dik thei lo.

Kamram lam thil ei tùr eng eng emaw dàwr nghâk kan ni a, a tìrah kha chuan thuamhnaw dàwr a ni țhìn; mahse, Pi Chhani hian hlâwk lo a ti deuh a, chu vàng chuan ei tùr dàwrah a let a, sîr khatah pangpâr pawh kan zuar tel tho bawk. Pi Chhani hian a siam thiam viau mai a, a siamho lah hi a mawiiin a lang changkãng ve thei reuh phian lehnghâl a, a man a chhiar to lêm lo nèn, min dàwrtu pawh hi kan hmu thei fû a ni.

"I va tilàwmawm ve aw...!! Han en rawh khai, ka lo discount duai ang che," tiin Pi Chhani chu a nui hak hak a, a hmêlah chuan Pu Hruaia fakna avàng chuan a lãwm a ni tih a hriat viau, kei pawh ni ila ka lãwm viau ang chu.

Pu Hruaia chuan pangpâr rawng inang lo țhah, bâwr thum a lei a, mawi pawh a lo hre riau a lo nih hi, pangpâr bâwr en kual dan dan pah chuan mawi ka tih zâwng chu min han zâwt ve ngial a, fel ka ti tak tak a ni! Ka lei tùr a ni tawp si lo va, keia mawi tih ve chuan amahah chuan awmzia a nei dâwn tawp si lo; mahse, chu pawh chu ni se, mawi ka tih deuh pakhat chu a lei tel ta tho.

"I thlang thiam hle mai, ka thlan hmasak pahnih ai pawh khân a mawi daih zâwk a nih hi," tia min nuihin min han fak zui a, ka lãwm bawk si, zak leh lài deuh bawk si chuan ka hnâr hi ka hmu lian rauh rauhin ka hre thei hial mai! Nuam viau mah se laih lutuk chuan a fuh vak lo, ka hmêl chhe ngawt ang chu.

Ka star êm êm hi a hming pum chu Vanlalhruaitluanga a ni a, pastor a nih avàng leh nupui nei tawh a nih avàng hian a der, a them tê pawhin ka star thu hi ka sawi chhuak ngam ngai lo, nupui la nei lo pawh ni se ka sawi chhuak ngam chuang lo. A hma chuan vêng khatah kan awm țhìn a, kan tét deuh laiin a nih chu; mahse, ka pain min tlàn bosan hnu lawk khân vêng dangah kan chhûngkuain kan insawn ta daih a, tûn thlengin kan la awm ta reng chu a nih hi. Pa tlàn bosan nih kha hrehawm ka tiin ka zak êm êm țhìn a, tunah hi chuan theihnghilh chuang lo mah ila kan thiam loh a ni lo tih ka pawm thiam tawh a, rilru chhûngrilah hrehawm tih châng chu la awm tho mah se ka zak viau duh tawh lo, awmzia a awm lo, mahni ka intihrehawm mai mai. Bâkah, mite hi an țha a, nikhua a lo rei ta bawk nèn, tu mahin ka pa chanchin min zâwt ngai tawh bîk lo va, a zia viau tawh; mahse, pa tel lova sei lian chho na nâ nâ chu, kim lo hûih hi awm tlatin ka hre țhìn, nu leh pa enkawlna hnuaia sei lian ka țhiante ka kawm châng pawh hian rualawh a na duh chu ka la ti fan tho.

Pu Hruaia ka star viau țhin avàng khân khatih lai khân naupang tê pawh kha ni mah ila a chanchin kha ka bengkhawn tlat mai a, hriat pawh ka hre thei viau. Kan tleirawl chhuah chhoh hma daihin ani chu a tlangvâl chho titih tawh a, lehkha thiam thei tak a ni bawk. A hmêl a țhat êm avàng leh an chhûngkua an hausak êm avàng hian an chhûngkua hi chu Zoram khawvêlah na nâ nâ hi chuan an lãr ve tâwk a, Aizawla awm leh kum upa, hawiher zau deuh hlek chin chuan an hre vek ngei ang; mahse, chuti khawpa hmêl ţha leh hausa pawh chu ni mah se a nungchang a sual phah chuang lo niin an sawi țhin, ka ngaisâng thei a nia. A nu hi Mizorama sumdâwng hmasa thlah kal zêl niin mi hausa fanu a ni a, a pa lah MLA term thum a zâwna thlan tlin theih a ni bawk, an harsa lo ve chiang a nia.

Zirna avàngin  Mizoram lamah erawh a awm tam fahran lo va, lehkha thiam tak a nih avàngin Central Service lama a inziah tlin mi tam takin an ring țhup a ni; mahse, mi sawi zël dànin a inbuatsaih laiin Pathianin a ko ta tlat a, Pathian thu lam a zir ta daih ni àwm tak a ni. Mi tam takin an ui hle mai a, ani ang mi thiam chu Central Service-ah inziak tling se, Mizoram tân pawh a chhuanawmin a hmingțhatthlâk dâwn viau si a, an ui viau thu an sawi țhin; mahse, kei erawh chuan Pathian thu a zir ta daih mai chu ka lawmpui a, ka ngaisâng sawt a, a thiamna leh finna Pathian tân a hmang chho daih tùr chu ka lo lãwm viau thung a ni. Ka nu hian a sawi ka hre fo țhin, "Pathian rawngbâwl tùra inpète hi mi rethei tê pawh ni se Pathian hian a ensan ngai lo va, a chawisâng țhin a ni. Harsatna leh hrehawmna erawh an tâwk lovin an tawng lo a ni bîk chuang lo; mahse, an rin Pathianah an chiang a, Ani pawhin a ensan ngai hek lo. Harsatna leh hrehawmna ruamah pawh Amah vàng chauhin hlimna leh lawmna an chhar chhuak zél mai țhin, a chhan chu an zui Pathianin engtiklai mahin A kalsan ngai lo va, A awmpui reng țhin a ni tih an hre tlat a," tiin. Keini pawh hi harsa ve tak ni mah ila ka nu hian Pathian lam a hawi tlat a, a nun hi ka awt ru fo țhìn nghe nghe. Thu țha engkim min hrilh a, amahin a nunpui bawk a, ka zah êm êm țhìn, a fate tân zah tlâkin a nung tlat alawm le.

*MAHNI I INTIHHREHAWM LOH NÂN MI DANGTE AWT LOVA NUN DÀN ZIR HRÂM HRÂM RAWH*

(Ka han ti ve leh rãwih chu a nia, eng tak ang ang maw? Ka ziah țhin dang anga bung tam tak ang kha chu a ni kher lo ang; mahse, tãwi lutuk pawh a nih loh ka beisei tho bawk)