☆KA BEISEINA☆ - 2 By Dingdi Pachuau

☆KA BEISEINA☆ - 2 By Dingdi Pachuau

Chawhmeh zawrh tùr kan siam rem lai chuan ka nu chuan," Mâte, i nu Piani chu han phone chiang lawk mai teh, pawisa kha an lo hmu ta em tih tê mai kha," a ti a, hmarchate zawrh chhuah tùr chu a teh pah mawlh mawlh bawk a. Ka thil tih lai dah nghâlin phone chu ka ban a, chawhmeh zawrh tùr min rawn thawn țhintu Nu Piani chu ka han phone zui ta nghâl a. Ka nu hi chuan 'nakin' tih hi a hre thiam lo va, a sawi tawh chuan thil tih laklawh pawh hi a awm ve thei ngai lo, tih nghâl zêl a duh vàng hian ka hnial ngai lo rêng a ni.

Ka nu hian a hman chângin thingtlâng lama kan chhûngte chawhmeh rawn thawn hi a zuar ve lãwp lãwp țhìn a, kei erawh nî tina (Pathiannî tih loha)dàwr nghâka chhuak reng ka nih avàngin puihna hun ka nei khât khawp mai a; mahse, kàr khata vawi khat bâk zawrh tùr a nei bîk chuang lo, èma phur kualin a zuar kual mai a, a hralh ve thei phian zêl, hahthlâk deuh mah se a in hralh țhat theih êm avàng chuan a zawngchhang phian zui a, amah pawhin a hlim phah viau. Pawisa thawh chhuah ve theih dàn a zawng hrâm hrâm ve a, chawhmeh an rawn thawn tam châng phei chuan a thlep hi a hlêp ve thei țhìn a, a tihzia thei khawp a ni.

Nu Piani'n a lo hmu tih ka han hrilh chuan," A țhat hlauh chu, sumah kher kher hi chuan fîmkhur a ngai a, thlèmtu hnai ber niin rinawm loh pawh a awlsam ber a ni. Suma rinawm tlat hi chu thil dangah pawh rinawm tùra ngaih a ni țhin, nang pawh i dàwr nghahna lamah fïmkhur la, ngaihtuah ngaiah ka dah lo na chein engkima fîmkhur hi himna bul ber a ni tih theihnghilh hauh suh," tiin min zilh chho pah leh malh malh a, pa tel lova a enkawl chhoh kan ni ka tih tawh kha, ka nu hi ka zah a, ka ngaisâng a, a thu pawh hi ka hnial khât, zawm ka tum hrâm hrâm țhin. Ani bâka min hmangaihtu leh min zilhtu țha hi kan unau hian kan nei tawh dâwn lo, kan nu leh pa a ni a, a thu zawm hi kan tih tùr a ni bawk.

Pu Hruaia'n Pi Chhani pangpâr siamchawp a lei avàng khân pangpâr siam thiam ve chu ka duh thar ta tlat a, Pi Chhani hnêna ka sawi chuan a lo phûr nasa mai niin!

"Ngawi tak rawh, ka zirtîr êm êm ang che, a harsa miah hleinem. Mawi tak tak siam tùr erawh chuan hmanrua hi tlêma man sâng ve deuh a ngai a, tuna ka siam angho hi chu a to lo, kan la ti dâwn nia," a ti sauh sauh a, a phûr hmêl chuan min tiphûr zual sauh a, Pu Hruaia mitthlaa hmu pah rauh rauh chung chuan min dàwr tuma lo lût nu pakhat chu nui sâng chung hian ka lo chhàwn ta vat a.

Dàwr nghah hi thil hrehawm leh thâ han sèn țùng țùng ngai chu a ni lo nain nilênga dàwra awm hi ninawm ve det tih châng hi ka nei ve zauh zauh tho a, ina ka haw hian chàu ve riauin ka inhre tlat zél. In ka han thleng chu ka nu chuan," I chau em? I ril a țâm tawh ngawt lo maw?" tiin min lo zâwt vat a, amah vêk chuan ka chhàn hma chuan," I chàu ngei ang, han țhu chàwl vang vang phawt la, chaw chu kan ei chauh dâwn nia," a ti leh zat a.

Chaw ei lai chuan a chawhmeh hralh dàn leh pawisa a hmuh zâtte chu a sawi pah malh malh a, hralh zawh loh a la neih chu naktûk lamah a la zawrh chhuah lohna lam vênga zawrh chhuah leh a tum thu pawh chu a sawi tel nghâl a. Bawiha chuan," Zuar kual lovin kan in chhak kawngpuiah khian țhutpui zâwk ta mai la, i hah lo deuh zâwk ang," a lo ti vat a, ani chuan," A, mai mai a, in ngeia zawrh kual hian chhuak remchâng lo tân malsàwmna kan nih bâkah hralh pawh a awl zâwk a ni. Kan lei mamawh ngawih ngawih thilah pawh lei tùra va pan ai chuan kan thil lei duhin kan ina min rawn panchilh tlat hi chuan lei mai hi a awl bík a ni," a ti ve thung a.

"Mahse, i kal kual nasa thei sia, i hah leh viau dâwn asin," Bawiha'n a tih leh chuan," Hah lo ve, rit deuh deuhin ka phur ngai hleinem, bâkah, mahni chauha ina awm mai mai ai chuan tlêm tê tê pawh ni se, pawisa lo thawh chhuah ve hi nuam ka ti a ni, ni sensa hnuaia thawh lah a ngai hauh si lo, ni tina zawrh chhuah tùr hi awm se te ka lo ti zâwk asin," tiin ka nu chuan a lo chhâng thên a.

Youtube lamah pangpár siam dàn a țhen a zâr chu ka en ve a; mahse, Pi Chhani siam ang kha chu ka hmu mai miah lo. Ka siam thiam hun tùr ka han mitthlà chhin a, kan in chhûng pawh ka pangpár khàwiin a vul chûk mai! Ka han nui sak a, Pu Hruaia ka thlansak ang ngei kha ka siam ve ngei ang le, ani pawhin ka thlansak chu mawi a tih ve êm kha maw.

*******

Hruaia
~~~~~

Ka âwm nghèng chiala ka nupui muhìl thaw ri sâk sâk chu ka ngaithla reng a, mihring tung chhoa kal zînga thaw rî ka hriat tawhah chuan min la hîp ber a, mawi ka la ti ber bawk! Ka duh êm vàng pawh hi a ni mahna, ka bula a muta ka kuah reng chung pawh hian hei aia hnaih lehzual theih hi ka la duh cheu nia! Pathianin hetiang hmeichhe hmêl țha leh duhawm, pasal atâna min thlang nalhtu min pe hi A hnênah pawh làwmthu sawi ka la bâng lo. Kan inneih ațangin kum khat a tling ve țêp tawh a, zàna ka țawngțainaah hian ka kawppui atân Irene-i min pêk avàng hian làwmthu ka la sawi ziah, he mipa thinlung chhûngril hi a hlimin a lãwm êm êm si a.

Vawiin lam khân kan pan țhin kan chhûngkaw doctor ti mai ang, Dr. Tluangtea hnênah kan hrisèlna kan check-tîr a, insawisèlna neih vànga pan erawh kan ni hran lo, thingtlâng lam ațanga khawpui zâwk dài luh tawh hi chuan tih țhanah ka nei ve tawh a, ka in-check-tîr ziah țhìn. Kan kal kual nasa deuh bawk nèn, Irene-i pawh hi duh aiin ka lo hnûk chàu deuh a ni ngei ang, zàn dang zawng aiin a muhìl hma tlat. Ka khawngaih reuh mang tak e! Hmeichhe âwm nêm zâwk a nih tehlul nèn, ka duat thiam tâwk lo a ni. A thleng nawn tawh lo ang ka ti sauh sauh a, a chhîpah chuan fawhsak zauhin ka kuah țha leh a, muthilh tum chuan ka mit ka chhîng ve ta nghâl a.

Ka hmaia min khawih neuh neuhtu awm avàng chuan ka han mêng siar siar a, ka mumang chu a lo ni lo. Khua a lo vár tawh niin, ka han maimichhîng leh rih a, chutah, ka nupui duh tak aw ngei maiin," Honey, harh tawh teh, a tlai tawh teh a nia!" a rawn tih tâk sar sarah chuan ka meng chhuak leh vat a, a kutzunglai chuan dìm tê hian ka hmai chu a la chûl kual zai zai reng a.

A kâwngah kuahin," Min thawhsan daih a, váwt ka tih vàngin ka harh phah, khum a ruak lutuk bawk!" ka ti ve thung a, khuma ka kuah mu tùr chu a lo țang der ve deuh nain ka hneh ve chiang êm mai a, khumah chuan ka kuah mu leh rih a, nui ar ar chung hian," Thawh a hun tawh teh a nia, hetia awm rei thei kan ni lo, eirawng bàwl pawh a ngai ang," a han ti leh a, a sawi ve tak nain a sawi mai mai tih ka hria, kan inah hian ani lo che tùr an tam lutuk! Ani hi chu ka nupui a ni a, chhûngkaw fa mo neih chhun a nihna angin an duat a, a lal bawk a, heta kan awm chhûng, hun rei lo te chhûng na nâ nâ hi chuan a chét ve pawh an phal lo hrim hrim bawk.

Kan thawh chhuah ve meuh chuan a tlai ve tawh viau mai a, dàn ngai têin ka nu ka nau hmeichhe pahnih chu dàwr lamah an lo kal leh daih tawh a, kan thawh chhuah hnu lawkah tûkțhuan kan kîl chu a ni nghâl mai.

Tûkțhuan chu ka pa leh kan tê ber Nùteite nèn kan paliin kan kîl a, kan ei hmain làwmthu sawiin kan zavai aiawhin ka țawngțai a. A dàn ngai têin ka pa chuan chaw kan ei lai chuan thu țha min hrilh leh malh malh a, kâr khata vawi khat chauh Biak in thleng țhìn ni mah se chhûngkuaa chawhlui kîl laia thu țha min hrilh hi chu a bâng ngai chuang lo.

Nùtei chuan," Mâma, heta ka awm theih chhúng chu châm ve rih ula? Kan inhmuh khàt êm hi?" tiin min han en a, Irene-i chu a melh leh nghâl daih a. Ka pa chuan," Chutin an duh duh dànin an awm thei tawh bîk hleinem, programme pawimawh hrang hrang nei an nih tawh hi," a lo ti vut a.

"A, chu pawh ni se, leave a lâk theih ve tho lo'm ni?" a tih leh chuan ka nui a, ka pa leh ka nupui duh tak Irene-i pawh chu an lo nui ve tih ka hmu nghâl a, Nùtei chu enin," A châkawm khawp mai; mahse, ka pa sawi ang khân duh duh dàna kan awm a remchâng tawh lo va, i sawi anga chawlh lâk ve ngawt chi pawh kha a ni lêm lo," ka tih chuan a hmui chu a lo tisàwi a," Pastor hna hi chu ngaihsànawm tho mah se chawlh lâk theih loh chu a țha lo ém mai, pasal atân pawh an țhat dâwn loh tawp chu, U Irene-i nèna chhuah dun ka châk tehlul nèn, ani pawhin hun a nei thei bîk lo tihna a ni ang maw?" Nùtei chuan a ti leh a.

"Nei e, vawiinah kan haw dâwn tihna a ni hleinem, i duh phawt chuan ka chhuahpui ang che," Irene-i chuan a lo ti vat a, ka en vat a, mit min lo siai khum sak mai, Nùtei lah chuan," I hman dâwn maw?!! Yesss..!!" hlim leh phûr tih hriat tak hian a lo ti vat a, a hlim hmêl ka hmu leh thei ta chu nuam ka ti; mahse, vawiin hian Irene-i chhûngte tlawh kan tum kha a nia, engtin nge awm nge kan tum tâk ni?

"A thuhrimah, nangmah zâwk hian i chhuk hmain min rawn tlawh ve zâwk la?" tiin ka sâwm ve thung a, ani lah chuan," A buaithlâk êm alawm le," a lo ti mai a; mahse," Ka hman hrâm chuan rawn tlawh zawk che u chu ka tum tho ang, U Irene-i vàng liau liauin," a tih chhunzawm leh a, an pahnih chuan ka en tawn ralh ralh a, an pahnih lah chuan inhre thiam tawn takin, nui sâng chung hian an lo inmelh dùn a. A u Irene-i hi chu a ngaisâng a nia, nupuiah ka nei dâwn tih a hriat pawh khân kei tih lohah chuan phûr berah a țang nghe nghe, an inmil bîk tlat.

Nùtei a chhuahpui tùr insiam lai chuan a kiangah ka lo tâp ve reng a,  thil awmzia chu ka zâwt a, ani chuan," A, Nùtei han tihhnual kha ka duh lo a nih kha, ka chhûngte chu hun dangah kan tlawh mai dâwn nia, kan hman loh tâk leh tihngaihna a awm lo tihna a ni mai a," a ti mai a,  a hmaiah chuan hmai hnawih lam chi ni ngei tùr, a vâr diak deuh hi a hnawih pah mawlh mawlh a, ka lo en reng a, a hmêl hi chu a țha ve chiang a ni, sawisèl tùr ka hre lo.

"I mit kha a tlà ang e!"

A hmai a hnawih lai mah ni se a hnung lam ațang chuan ka han kuah a, a lo țê deuh țhat a," Ka kut i ti che hlauh ang e, ka mit hnawih hi a pherh a ni mai!" a ti chùl a, kei chuan," Pherh vek se, chhuak thei lo tawp mah la pawi ka ti nâng!" tiin a bengah chuan ka han sehsak hlak a. Ani erawh chuan," Nùtei ka hrilh vek tawh kha, ka chhuahpui si loh chuan a hre thiam lo ang," a lo ti thung a, zei tak hian a mit chu nail polish dum ni àwm tak hi a hnawih pah mawlh mawlh a, a mita a hnawih dum țhìn hi chu ka hmu fo tawh; mahse, ka bèl chiang ngai lo, mita nail polish êm han hnawih chu ni êmin ka hre ta lo deuh a, ka han en chiang deuh a, 'eye-liner' tih lo inziak kalh ka hmuh tâkah chuan ka nui ta suk a. Hmeichhe incheina hmanrua hi a hming ka hre hlawm lo, lipstick leh powder hi ka hria a, lotion leh perfume ka hre leh tawp a ni mai.

"Eng nge i nuih?"

"I mita i hnawih kha nail polish dum emaw ka ti alawm," ka tih chuan za zet hian a rawn nui chhuak ta hak hak a," A lo ni tak tak maithei asin," a ti a, a kutin a mit chu a han zâp pah deuh a," Mawi em?" a ti zui sap a.

"Mawi vek! Mawipui loh i nei lo," tiin dárthlalanga en mai duh tâwk lo chuan amah ka kuai her deuh a, ka kûn hniam pah deuh bawk a, ani lah chuan," Ka  hmai hnawih kài i duh loh chuan ka hmuiah chauh aw," a lo ti a, a nui deuh sak bawk a, 'chutia a tih aiah' tiin a hmuiah chuan rei tâwk tak ka fawhsak a, min fâwp lét lo thei bîk si lo va, a hmai pawh a hnawih țhat leh hlek chu a ngai ngei ang le.

Irene-i ber a awm si loh chuan tiin ka nu leh naute dàwr lamah ka inkhalh chhuak a, ka chhang chiah Ahlûtei dàwrah ka kal hmasa a, ani pawh hi ka nu thisen a kai deuh a, sumdàwn lam hi nuam a ti êm êm a, a pualin dàwr a nei a, hlâwk pawh a hlâwk, nula naupang tê niin sum pawh a ngah ve tawh ngawt ang.

Min lo hmuh veleh chuan min rawn pan vat a," Mâm, lo kal rawh, ka dàwr ngeia min rawn tlawh hi ka ring rêng a! Khawnge Irene-i?!" a lo ti vat a, thil awm dàn ka sawi hnu chuan," A nih tak chu, tih tùr dang i neih loh chuan awm ve reng rawh aw," a ti leh sárh sárh a.

Ka awm rei lutuk lo. A dàwr chu ka rin aiin a lùn daih mai ka ti, dàwr nghâk hi pakhat chu a chhawr ve bawk a, a lùn angreng si a, kan titi vak hman lo, a tân lah customer lo chhawn a ngai ve reng bawk si a. Rei tak pawh ka awm duh ta lo rêng a, Irene-i tân kawr pakhat chu min han pe a, ngai lo tiin ka han țang ve viau a nia," Pêk ve hrim hrim ka duh alawm, i rawn lêng ve bawk sia," nui chunga a tih chuan ka lâksak ve ta hrâm a, chutah," Mipa thuamhnaw lam ka kawl lo tlat mai a, han pêk ve che pawh a țhat tehlul nèn," a la ti zui a. Làwmthu ka hrilh fê hnuah ka chhuahsan ve ta chauh a, kan chhûngkaw dàwr awmna lamah ka inkhalh chhuak leh ta a.

Dàwr hi hmun hnihah kan nei ve a, pakhat hi chu chhûngkaw mamawh ei leh in lam thil zawrhna niin ei tùr chi hrang hrang a awm a, awm lo pawh hi a awm lo ang a tih tùr khawpin a awm chikim ve a ni, pakhat ve thung hi chu puanthãn leh mutbu, blanket, foreign rizai chi hrang hrang, centre carpet, a hmul chi leh hmul lo chi leh chhuatphah carpet thlenga zawrhna hmun a ni thung. Dàwr a zau a, dàwr bungrua lah a muk țha bawk a, hei hi chu ka nuin a nghâk țhin.

Ka nu nghah lohna lam zâwk ka tlawh phawt a, a lo lùn mam mam khawp mai. Chuti chung chung pawh chuan  Zâmpuii chuan min lo hmu vat a, nui sângin min lo be vat bawk. Ani hi Ahlutei chhang chiah a ni a, lehkha zir tui hlawl lo ang chi kha a ni a, college chu a rap ve ngei mai, lehkha zir lova a tuina lam zir tùra tih lahin tui zâwng a neih a hre tlat bawk si lo; mahse, dàwr lamah hian thawktu an lo indaih lo chho ta nèn, a enkawl chho ta ringawt a, dàwr nghah lam hi a tui lêm lo nain ka nuin lehkha a zir peih tawh loh chuan nghâk mai tùrin a ti tlat bawk si a, ka nu thu hnial ngam hek lo, a nghâk ta reng chu a nih hi.

"Mâm, beautician lam hi ka zir châk sia, ka pate bulah min sawisak teh, i awm chhûng ngei hian aw, i thu sawi chu an ngai pawimawh ngeiin ka ring, ka nu bulah ka sawi ngam dèr si lo," a ti sar sar a, chutia châk zâwng a lo nei ve chu mak ka ti kher asin!

" Châk zâwng i lo nei ve ta maw?!! A va làwmawm dâwn ve!" ka ti hial nghe nghe a, ani lah chuan," Châk e, ka châkna a rei tawh! Ahlutei anga mahni puala dàwr neih ve pawh hi ka châk a, ka dream nasa țhìn alawm, ka pate bulah chuan min sawisak ngei ngei rawh aw," a ti leh a. Ani hi zawng, rilru dâwih chi ngang hi a ni ve a, ka nu leh pate thu pawh hi a hnial ngai lo tluk a ni, thu a âwih êm êm vàng pawh ni chuang lo hian, lehkha a zir peih loh ațang khân a inkiltawih vàng ni berin ka hria.

"Aw le, lungngai mah ta che, ka lo sawi dâwn nia, an lãwm viau zâwk ang chu," ka ti ve a, hlim hmêl taka min enin," Ka lãwm e, sawi ila chuan ka pa hi chuan min phalsak maiin ka ring a, ka nu ber hi, ka huphurh a," a ti sap sap a, a hmêl ngui leh deuh rawih ka hmuh chuan ka khawngaih ru reuh khawp a.

Ka haw veleh ka pa bulah ka sawi phawt a, ani chuan," A, a châk zâwng tak a nih chuan a țha alawm," a lo ti mai a, kan sawi thui hmain Nùtei leh Irene-i an rawn haw ta si a, sawi zui ta lo chuan Nùtei titi kan ngaithla ta rih a, zanriah kîla chhûngkua kan kim țhep țhawp laiin ka sawi chhuak leh ta a, Zami chuan min lo nuih sak nghe nghe a.

"Ani a awm lohin tuin nge dàwr saw enkawl ang?" ka nuin a rawn tih deuh hmuk chuan ka pa chuan," A, mi dang kan chhawr mai ang chu," a lo ti ve mai a. Kei pawh chuan," A nghâk rei ve tawh bawk alawm, Pathian zârah harsa lutuk pawh kan ni hran lo va, a zir châk a nih chuan kei chuan zir se țha ka tihpui khawp mai, a zir chhuak ngei pawhin ka ring a, mahni intunnun nân pawh a țha a ni," ka lo ti ve a.

"Dàwr saw țha takin enkawl se a țha ber, mi dang mi dang chhawr ngai lovin. Zami pawh, i zir nân pawisa tam tak a ngai leh dâwn asin, Mizoramah i zir duh lo ngei àwm bawk si a, pawisa thawh chhuahna tùr kawng dang dap dap ngai lovin lâk luhna tùr a awm sa reng tawh a, hei hi lungawi taka thawh mai tùr a ni. Pawisa hlutna in hre vek tawh, amah maiin a rawn awm thei lo, thawh chhuah a ngai," ka nu chuan a ti ta kalh kalh a.

"Aw...a châk zâwng a sawi ve a, chutiang sawi duah a ngaih loh chu. A zirna tùr pawisate chu kan nei ve bawk ang chu, Zâmtei phei hi chuan a duh zâwng leh châk zâwng pawh a sawi rîk ngai loh hi maw, a vawi khat sawi chhuahna a ni hial ang," ka pa chuan a lo ti ve ta a, ka nu a ngawi ta hmak mai.

*RILRU NATNA LEH  HREHAWMNA I TAWRHAH KHÂN MI DANG MAWHPUH TUM ȚHÌN  SUH, I MAWHPUH AVÀNG KHÂN I RILRU HREHAWMNA KHA A BO NGAI CHUANG LO ANG*