☆KA BEISEINA☆ - 3 By Dingdi Pachuau

☆KA BEISEINA☆ - 3 By Dingdi Pachuau

Hruaia
~~~~

Kan boruak chu kan chhûngkaw tân chuan a pângngai angin a lang thei tho ang a; mahse, Irene-i tân chuan a mak viau thei ngei ang, hetiang boruak hi kan inneih hnuah a la tawng ngai si lo va. Zami chu ka en vat a, a lo meng khup lap mai a, a țap teuh ngawtin ka ring. Ka nu hi chu hriat thiam a ngai fo, a duh loh zâwng sawi chhuah palh hi chuan mi dang rilru tùr ngaihtuah ve hauh lova țawng chhuah hi a chîng a, a puitlin lohna kawng pakhat hi a ni ve a, hemi kawngah hian a la puitling hlei thei lo.

Chaw pawh ei chhunzawm lo chuan a tho leh ta daih zui a, kan boruak chu a rit ta churh mai. Ka pa chuan," Chhúngkua chu kan hetih châng hi a awm ve tùr a nia, nakinah a reh leh mai ang. Thinrim deuh châng leh han inhnial deuh bap bap châng hi chu awm reng tùr a ni rêng a, kan chhûngkua chauh hi kan ni bîk lo a nia, thil țha záwk a la rawn chhuak mai ang, ei r'u, chawhmeh kha a dai zo ang e," a ti a, ngaihtuah chhunzawm loh hmel tak hian chaw chu a ei zui nghâl mawlh mawlh a.

Chaw ei kham chuan ka nu luhna an room-ah chuan ka lút ve nghâl a, a lungawi lohna kha ka sawi chhuah a ni a, dam deuh záwka sawipui zui leh ka tum a ni. Zami'n a châk záwng a sawi ve a, pawisa nei lo taka zir tum pawh a ni lo va, phalsak ngei se ka duh a ni.

Khumah a lo țhu a, ka lût pawh chu min lo en duh lo va. Ka nu hi chu a châng hian a naupang chhia leh tlat țhìn a, a buaithlâk țhìn a nia, min hmangaih loh vàng pawh a ni lo, min hmangaih êm êm vek a, kan chhûngkaw tâna a țhahnemngaihna ang hi kan nei ve phâk lo a ni zâwk, kan tluk lo a ni.

Ka han sawipui leh a, a ngawi reng thung a, en pawh min en lo. Zaidam tak leh zãwldawh tak hian Zami'n a thil zir châk a sawi ve ngai lohzia leh an thu a âwih theihziate chu ka han sawi nawn leh a, a tlip nân," A châk zâwng tak a nih chuan puitling taka a zir chhuah ngei ka beisei a, a nih ngei pawh ka ring, phalsak mai la?" ka han ti a.

"Țhahnemngai takin kan chhûngkaw tân tiin ka thawk a, rual in el phâk loh hlauin, rual awt rêng rêngin mi zînga in awm ka hlau a, chumi phuhru tùr chuan hrehawm pawh tuarin ka thawk hrâm hrâm a,  ka thawh chhuah zawng zawng hi in tân vek a ni ka tih ni, a awm sa ațanga sum thawh chhuah tum hi a harsat loh tehlul nèn, ani pawh chuan engah nge thil dang ațanga sum hmuh chhuah leh kher a tum ni?" a hnu deuhah chuan a rawn ti chhuak ta a.

"A dik alawm, ka nu, i thawk nasa, kan chhûngkaw tân hian. A làwmawm a, fak pawh kan fak che. I țhahnemngaihna hi tu mahin kan el phâk lo, nang anga chhûngkaw tâna țhahnemngai nu hi an tam vak lo bawk ang," ka lo ti ve a. Rawn inherin min rawn en a," Nang pawh hi i hrehawm hlau rêng rêngin i tét lai ațang tawhin school țha ber bera kan hriatah kan luhtîr che a, sorkar hna țha leh sâng tak thawkin kan chhûngkua min chãwm lêt ang chu tih laiin, i duhna lamah i kal ta daih a, sawisèl che hi ka duh ngai lo; mahse, i duhnaa i kal daih avàng hian i naute pawhin u ber tih thîkin i tih dàn an rawn la ta a, nu leh pa min hnial ngam ta a nih hi," a ti leh ta bawrh bawrh a. La duh táwk mai lo chuan," Tûn thleng hian ka lung a la awi thei lo, IAS, IFS emaw hna sâng tak leh zahawm tak chelh tùra kan lo beisei ràn che i ni a, Pastor nih i tum thu min hrilh zàna ka țah nasatzia kha i hre tawp lo ang, he hna hi a țha lo viau ka ti lo; mahse, ka lo beiseina che i ti tàwp kha chu tún thleng hian ka lung a la áwi thei lo a ni," a ti leh ta bawrh bawrh a.

Ni e, ka nu hi a lung a awi thei lo a ni. Kei pawhin a hma kha chuan Pastor nih kha ka la ngaihtuah chhin ngai lo a nih kha; mahse, min kotu kohna kha a nasa êm mai a, ka hnial thei lo a ni. Pathian thu ka zir chhûng zawng khân ka nu khân ka chanchin kha min zâwt ngai lo va, ka pa leh ka naute kha chuan min záwt ziah thung. Mihring lama min thlìr dàn ațang chuan min ui ngei ang tih ka hria; mahse, Pathian thu-ah chuan chànna a awm zêl a ngai si a.

Room ațanga ka chhuak chu ka pa nèn kan intáwk a, ka dàra ben thap thap pah chuan," I rilru tihrehawm mah ta se, ka han sawipui ang a, a fel vek mai ang, i nupui kha han hrilh fiah rawh khai, hrehawm a lo ti palh ang e," a ti a, room-ah chuan a lût zui nghâl a.

Irene-i chu kan room-ah a lo awm a, ka lût chu min lo nuih var varin," En teh, vawiina kan chhuah khân thil ka rawn lei haw a, han en chhin teh, ka inhmeh dâwnin i hria em?" a lo ti vat a, a kutah hian kawr dum a lo keng vâ a, amah hi a fing ve hrim hrim a, kan chhúngkaw boruak chu hre kar mah se min tihhlim a tum niin ka hria.

"Inhmeh ang, han ha chhin la?" tiin khumah chuan ka țhu thla nghâl a, a thuamhnaw chu hlîp nghâl sawk sawkin," Ka duh chî tak niin, a colour lah ka duhthusàm!" a ti a, a kawr lei thar chu a ha zui leh nghâl a, a lo inhmeh ngang mai! A bân vun ngo tak chu a kawrbân lace pâr âwng deuh sep sep ațang pawh chuan a hmuh theih a, mit a la zar mai.

"Hmeh em?"

"Lutuk! A hatu tùr dik takin i ha a nih kha,, i tân liau liaua an țhui a nih ngei kha," ka lo ti vat a, a nui hak hak a," Min fak viau teh suh aw," tiin min melh sawr sawr a," Min fak manah, eng nge ka rawn hawn che i hre duh em?" a ti leh zat a, kei chuan, meng phar ãk hian" Wow!!! Thil thar ka nei dâwn maw?" ka lo ti vat a, naupan chhiat hi a la reh thei bík chuang lo thil thar neih hi chuan, kum heti chen hi lo hmang ve tawh mah ila ka la phûr sûrh tho mai a, bâkah, thil min rawn lei ve ka lo ring lo hrim hrim bawk a ni.

Kamis sendâng min rawn leisak chu a han la chhuak a, a mit a lérhin thil mawi leh changkãng a hre bawk a, mi hausa fanu tih takah a thil lei rêng rêng pawh hi man tlâwm tak a awm ngai lo, hei pawh hi a mawi bawk a, a puan a țha bawk nèn, a tlâwm thei lo hi a ni tawp mai.

Vawiin lama Ahlutei'n kawr a tâna min hawntîr pawh kha ka pe ve leh a, nalh a tih zâwng tak leh a hâk duh zâwng tak a nih thu sawiin," Ahlutei chu a va tilàwmawm ve a! Min hrilh hma deuh la chuan nichín pawh khân làwmthu ka han hrilh mawlh mawlh tùr a nia," a ti a, ha chhinin dárthlalangah chuan a han inen kual vêl a, hei pawh hi a inhmeh lehpek khawp mai.

"Inhmeh loh pawh hi i nei lo," tia ka han fak chuan," Nang pawh, i inhmeh êm kha, ka hmuh veleh khân ka mitthlaah i ha lai ka hmu nghâl a," nui sêih chung hian a ti a, min rawn hnaihin min han en dik vêl a, a hnuah dárthlalang lam chu enin a han in-pose a, dârthlalang lian puiah chuan kan pahniha thla chu a lang chiang ngang mai.

"Hei hi ka nupui duh tak, hlimna leh làwmna min thlentu, ka hmangaih tak chu a ni, ka hmangaih reng ang," tiin dárthlalangah, a mitah tak chuan ka en a, hnung lam ațang chuan kuahin a chhîpah chuan ka fawhsak zauh a, ani pawh chu rawn inherin ka kâwngah chuan min rawn kuah a, rawn dâk chhovin a hmui chu ka fawh theih tùr chuan zei tak hian a rawn dawh a, ka hnial phal tawp nâng, ka rilru tihhlim dàn hi chu a hre hneh a nia!

He nu hi chu ka duh hneh ve ëm a ni. Ka hmangaih a, ka rilru ni se a hne hneh êm êm a, a bulah hi chuan  ka rilru hi ka thup zo lo a ni ber, ka hmangaihzia pawh hi a hre chiang ngawt ang chu.

Mut hmaa Zami hmuh ka duh avàngin a room-ah ka kal leh phawt a, Ahlutei leh Nùtei an lo la awm a, ka lût chu min lo en țhap a. Zami chu a țap a ni tih a mit ațang chuan ka hre mai, rei pawh min en lovin a hawi sawn leh nghál daih bawk.

Mahse," Mâm, i chungah ka lãwm lo emaw i ti ang e, ka lãwm lutuk a nia," a lo ti sap a, a hmêl hlim lo tak ka hmuh chuan hrehawm ka ti a; mahse, an hmuhah erawh chuan hlim lo hmêl pu duh lovin," Ka nu pawh ka biak kha, a phal êm êm ang, a rilrem loh deuh vàng khân a han sawisêl deuh kha a ni mai a; mahse, a remti êm êm ang, i rilru tihrehawm miah suh," tiin ka han hnèm a.

"Ni e, Au Mâma sawi ang khân i rilru tihrehawm duh rêng rêng suh, ka sawi tawh kha, Nu hi chuan a sawisêl tùn tún a, a hnuah a phal leh tho zêl, Pain a han chhilh zui leh bawk ang a e, i zir thei dâwn, zir thei ngei tùrin i rilru lo inbuatsaih nasa rawh," Nùtei pawh chuan a lo ti ve zat a, Ahlutei pawh chuan," Ni e..." a lo ti ve bawk a.

Kan han sawi kan han sawi hnu chuan ani pawh chu a nui ve ta sak sak a, ka rilru pawh a nuam deuh huai a, ka naute hlim lo hmêl hmuh hi hrehawm ka tih ber a ni țhìn, hmân ațang tawhin. Zami hi chu a rilru a dâwih a, a rilru a chak lo bawk nèn, lehkha zir peih lo ta chu, ka nu hauhbûr hi a ni ve deuh bawk a, a àwm ve tho mai.

*******

Pi Chhani hnên ațang chuan pangpâr siam chu ka han zir ve lauh lauh a, hun ãwl ka neih chhun hun rei lo tê tê kâr lekah ka zir a, min zirtîr uluk bawk nèn, hma ka sâwn lo ve khawp mai. Duh uluk viau lo se chuan ka thiam ve thuai mai ang a; mahse, a duh uluk si, a duh ang chiah chiaha ka siam loh chuan a duh tâwk thei si lo nèn, hun neih tlèm nèn, ka zir rei phian mai.

Mahse, a duh uluk hi ka tân a țha zâwk. Ka zir ațanga thla 4-naah chauh thiam min ti, zir nân hun ãwl ka nei tam lo ka tih tawh kha. Thiam min tih ve meuh chuan siam thiam ve tawh tak ka ni, in lamah ka siam chhunzawm ve bawk a, hmanrua Pi Chhani'n min pe nual bawk nèn, ka siam chhuah chu ka nu leh Bawiha pawhin mawi min tihpui ve lutuk.

"U, siam țeuh la, zuar chhuak ve la?" Bawiha'n a tih chuan ka nuih a za angreng khawp a; mahse, ka nu pawhin," Nia, kei pawhin dàwra an zawrh chhuah tam tak aiin a mawi ka ti daih zâwk," a rawn tih ve tâkah chuan ka ngaihtuahna chu a tikal thui ve ta deuh. Ka la siam tam lo êm mai a, ka siam ka siam ang a, a chi hrang hrang ka siam ka siam hnuah ka la ngaihtuah ve ang chu, tunah hi chuan dàwr nghah hi ka hna ber a ni rih tlat.

Pi Chhani hian thil thiam hi a lo ngah reuh a, ei tùr siam, chhang siam leh cake ur dàn chi hrang hrang pawh a lo thiam niin, chu pawh a tih dàn min hrilh chho zêl a; mahse, hun ãwl hi kan nei lo dùn ëm mai a, kei phei chuan siamna hun pawh ka la nei lo hrim hrim, a siam țhenkhat hi kan zuar chhuak a, hralh pawh kan hralh thei viau. Chhùna kan ei tùr a rawn ken ka ei ațang hian a siam tui ve thawkhat tih ka hria a, hei pawh hi min zirtîr thei leh ngei se ka duh khawp mai.

Krismas dâwn hnaiah phei chuan kan buai ve khawp mai a, kan pahnih chauh kan ni si, kan inhralh thei ve tho bawk nèn, pangpâr siam ngai bawk, chhang siam ngai bawk, amah hi a indaih thlâwt lo, zàna in lama chhang siama a buai theih dàn tùr ka ngaihtuah châng phei hi chuan ka khawngaih ru ve ngawih ngawih, a tân lah sum hmuh tamna a ni a, kan hralh theih êm avàngin siam duhthawh a ngai ve bawk si, Krismas zawh hnuah chuan heti lutuka a thawhrim hi a ngai tawh bîk lo ang chu maw ka ti ta ringawt.

Krismas hunpuiah kan chàwl a, hun ãwl chu kei pawhin ka hmang ãm ve viau. Remi nèn kan inkawp char char a, Jim-a leh Smiley-a'n min rawn fin zauh zauh bawk. Anni pahnih hi chu chhûngkaw harsa an ni lo va, mipa an ni bawk a, ei tùr lam an pawk thei viau mai, Remi nèn 'Ei theih hun' tiin kan ei țân țân reng mai a ni; mahse, keini pawhin ei tùr kan neih ve pawh an tân kan ui bîk chuang lo va, kan lo inzui ngun deuh a ni maithei, Kum thar lamah chuan miin kan țhianho chu min fiam ta nak nak a.

Kei leh Smiley-a, Remi leh Jim-a. Min chhaih ţantirh chuan chuan kan nuih liam mai mai a; mahse, a hnu deuhah erawh chuan ka nui liam mai mai thei ta lo, nuam ka ti lo, a chhan chu Smiley-a hian star-tu a nei nual mai a, chûngho min melh dàn chu a hrisêl lo ka ti a ni. A hnu deuhah phei chuan 'Ani ang hmeithai fanu lehnghâl, lehkha thiam sâng bawk si lo chu a kawp duh tak tak lo tawp ang' tia min sawina ka hre zui leh a, ka insitna leh ka induhtâwk ve theih miah lohna ber hmanga min han sawi phei chu hrehawm ka ti ta viau a, Jim-ate țhian dùn kawm pawh ka inthlahrung ta sawt mai.

Ka dinhmun hi ka duh dàn a ni bîk lo va, hmeithai fanu nih leh lehkha zir sâng lo nih hi ka duh bîk rêng rêng lo bawk; mahse, tuin nge a dinhmun tùr chu thlang thei le?  Duh thlang thei ni ila, tuin nge hmeithai fa nih duh ang? Tuin nge rethei taka pian chhuah duh bîk ang? Lehkha pawh sâng tak thlenga zir chu ka duh ve alawm; mahse, kan chhûngkaw dinhmunin a zir lo va, hreh tak chungin matric ka pass hnu khân ka nu thu âwihin ka chawlhsan lo thei ta lo a nih kha. Ka han ngaihtuah lêt leh phei hi chuan ka thinlung hi a la na thar vawng vawng thei nia! Ka duh miah loh leh ngaihtuah chhuah pawh ka duh tawh loh ka pa, min tlàn bosantu chu ngaihtuah chhuak lehin ka han mawhchhiat thar țha leh bawk a, thil sâwt lo leh țûl lo tak a ni tih ka hre reng nain ka mawhpuh thar leh lo thei lo.

Mahse, Krismas leh Kum thar boruak a han zo a, dàwr ka nghah leh hnu chuan ka boruak rit pawh a zia chho leh țan ta a, ka dinhmun lam ngaihtuah duh lovin Pi Chhani hnênah chuan chhang siam dàn bawk chu ka zâwt leh a, youtube-ah pawh siam dàn chu en tùr a awm țeuh tih pawh ka hre tho; mahse, ani hi chu hmân ațanga lo siam tawh țhìn a ni a, min zirtîr hi ka duh tlat a ni.

Pangpâr siam dàn chu ka nuin min zâwt ve bawk a, zànah ka thiam ang angin ka han hrilh ve a, chawhmeh zawrh tùr a neih loh laiin a lo siam ve țhin a, a peih bawk a, thiam pawh a thiam chak. Hmanraw țha deuh chu nei phei ila chuan a siam chhuak nalh ve khawp ang le.

"Mitthi pangpâr tùr atân pawh a țha ngawt ang," ka tih chuan," Ni e, chu chu ka lo ngaihtuah ve mêk a," tiin chaw eina dawhkàn chunga pangpâr siamna hmanrua darh niai chu a thlêk reng a, chutah," Chutiang lam chu siam ka'n tum chhin teh ang," a ti leh a, kei chuan," A, chhùn lamah buaipui zâwk teh, khua a váwt si, mu lum zâwk la?" ka lo ti ve thung a.

Kan in luah hi Assam Type chhâwng hnuai niin, a chhuat hi lei a ni a, zàn lamah hian a vâwt thei viau a, ka nu hian vâwt a ti viau ang tih ka hlau țhin a ni, heater hi tuak duh viau ţhin mah ila current chhit man nen, chàwi a sâng duh si a, ka nu hian a ti meuh lo si a, ka lei ngam țhìn lo a ni. Thlasik lai hi chuan hi chuan vâwt a tih hlauin a khumah hian ka va mu ve ziah a, țhalai zâwk ta chu, ka ke a lo lum hma a, pangti lum ka nei zâwk bawk nèn, ka theih ang angin a ke hi ka va tlawh lumsak hrâm hrâm țhin.

Mut hmunah țhianho group lùn zetah chuan ka lût a, Jim-a birthday hun tùr an lo sawi niin, group hming pawh lo thlâkin ' Jan 25 Birthday Party dàn tùr' an lo ti tawh! An han phûr nasa hlawm a nia, a bîkin Lalkâwnga. Ani hi chu che hot chi hi a ni ve hrim hrim, Krismas lai pawh khân làm tualah lâm ve ngam si lovin mi hmuh phâk loh chin, thim deuh china amaha lo lâm ve ngar ngar peih kha a ni ve a, Remi hian 'Chhe-hot' ti hlîrin a ko țhìn, a haw ngam chuang miah lo, a chhan chu Remi hi a star tlat a, kan hre ve kar sia, kan nuihpui nasa thei tawp.

*A TÂWK LEK AIA TAM HRETA THIL ȚÛL MIAH LO I NGAIHTUAH VAK VAK KHÂN TU MAH I TINA LO, NANGMAH CHIAH KHA I INTINA, BÀNSAN DAIH RAWH*