☆KA BEISEINA☆ - 4 By Dingdi Pachuau

☆KA BEISEINA☆ - 4 By Dingdi Pachuau

(Dedicated to HAZEL From group -2)

Kei chu ka hman ve lehpek kher lo maithei, hmun danga hman daih an han sawi deuh phei chuan 'ka hman lo sa' ka lo ti rilru a, dàwr ațanga ka haw tlai țhin chu thuhran, ka nu pawhin zànah lehnghál, hmeichhia hmun hrana kal chu a phal lo tawp ang.

Mahse, ka sawi ve chuang lo va, ka tel lovin hlim takin an hmang thei dâwn tho tih ka hria a, ka lo inrawlh ve lo law law. Kan țhianho hi kan tam angreng a, kan vai chuan 15 zet kan ni nghe nghe, chhûngkaw pângngai tak ațanga chhuak an ni deuh vek a, kei hi harsa ber ka ni, hmeithai fa ka ni a, Remi hi chu nu leh pa kâra la awm niin, a nuin dàwrtê a nghâk țhìn a, a u mipate pahnih hi a țûl țûl thawkin ni tin an inhlawh ve bawk a, Lalkâwnga hi chu a pite hnênah a awm thung, a nu leh pate chu Lunglei lamah awmin chhûngkaw pângngai ve tak an ni bawk. Remi nèn hian harsa deuh ber chu kan ni a, hei vàng hi a ni maithei, kawm pawh kan inkàwm ngeih bîk bawk.

A tûkah Remi'n chhùnah min rawn bia a, eng eng emaw kan sawi hnuah picnic chungchâng chu a rawn sawi chhuak ta a, ka theih ka rin loh thu ka sawi chuan," Chûngte chu group-ah khân sawi ve tùr alawm, ngawi tak rawh, zaninah ka'n sawi chhuak leh ang e, i kal theih loh dâwn chuan kei pawh ka kal duh bîk lo ang, kal kim theih loh dâwn ai chuan Jim-a pawhin an in hnuaia hman a duh maiin ka ring," a rawn ti a.

"Ni lo, keimah vàng chuan sawi chhuak miah suh," ka lo ti ve thung a, ani lah chuan," Nangmah vàng tiin ka sawi chhuak dâwn lo, chhuanlam kan siam mai dâwn alawm," a ti ve thung a, ani hi chu kei ai chuan a fing deuh hlek, college kal lai a ni a, a àwm ve tho mai.

A hnuah chuan Jim-ate in hnuaia hman mai chu an titlu ta tak tak a! 'Chhuanlam siam âwih loh' an ti bur ta mai a, chutah, 'nu leh pain phal loh dâwn chuan indìlpui' an la ti zui a, mipaho ni se lìrthei nei an nih vek avàngin 'hàwnna tùr lamah chuan buai s'u, kan thlah kual vek ang che u' an ti bawk nèn, chhuanlam siam tùr tân pawh chhuanlam tùr a vâng ta pharh mai.

Birthday zàn a rawn thlen chuan zanriah ei khamah min rawn sâwm ta a, Jim-a'n car a rawn khalh a,  Remi, Smiley-a leh Lalkâwnga an rawn chuang tel bawk a, Jim-a hriat lohin mi dang zawngin pawisa kan thawh khâwm a, a birthday present tùr kan leisak tawh avàngin pawisa ken pawh a ngai tawh lo va, ka nuin hlim taka hmang tùra min chah hlawm hnu chuan kan chhuak ta a.

Vêng hla deuha awmte chu an rawn inphur thei ve hlawm a, Hriata'n car a rawn keng ve leh tho bawk nèn, chuanna tùr chu kan indaih viau. 

"Round lawk ang u," Jim-a'n a tih avàng chuan kan tlãn kual leh rih a, mi dang hlim taka an titi lai chuan ka rilru pindan pakhatah chuan Pu Hruaia ka hre chhuak vang vang a. Jim-a hi Pu Hruaia rawn ni thut mai se, a birthday-a min hruai tùr ni ta se' tih leh ' Tihian amah ngeiin Aizâwl khawpui chhûng hi min round-pui ni ta ang se' tiin ka suangtuah a, a nuam ngawt ang chu! Ka nui ta sak nghe nghe a.

"A mak thei! Mi ã chu lawm lohin an nui țhìn an tih kha maw," tiin Remi chuan min rawn nghawk deuh salh a, Lalkâwnga chuan nui hawk chung hian," Eng emaw hmuh țha a hmu a ni ang chu," a lo ti ve thung a, chutia min tih tâkah chuan ka zak ta deuh a," Eng mah a ni lo," ka ti ta ringawt a.

"Zanin chu kan lâm vek ang, làm loh âwih loh kan ti ang a, Anne-i pawh i làm ngei chu a ngai ang," tiin car khalh pah chuan ka țhutna lam chu a rawn thlêk zawk a, a nui pah sâng a. Lalkâwnga chuan," Loh theih loh! Ka làm kawr ka rawn ha sa vek tawh, chuan, Remi hi min chuhpui tum lo ula?" a lo ti zat a, Remi lah chuan," Ka ke min rahsak leh palh ang," a lo ti zauh a, kan nui phuh țhawt hlawm nghe nghe. A hmain Birthday lawmnaah bawk an làm dun țumin Lalkâwnga lâm uar lutukin a keah a lo rahsak pek a, Remi a bài phah a, thinrim lamah a kal thei chuang lo, kan nuih vak nghe nghe a ni.

"Tunah chuan ka zir nasa tawh a, ka thiam tawh lutuk, ka rap tawh lo ang che, ka tiam ngam sak!" a lo tih leh phei chuan kan nui tlãwrh tlãwrh a, kei pawh nui nasa ber berah ka țang nghe nghe.

Jim-ate in hnuai hi an sa pum vek tawh a, luah mai theih tùr ang chu a ni; mahse, luah a la ni lo va, zanin phei chu an chei mawi bawk si a, a nuam tawp. In chhûng a phui țha a, a vâwt lo va, thãwm bengchheng pawh a chhuak vak lo ang. A nu leh pate hian an duat a, an fa tlum ber a nih bâkah an mipa neih chhun a ni lehnghâl a, a thil duh apiang hi chu a nei thei ti ila a dik ang. Tuna in an cheinaah pawh hian an sêng tam ngawt ang chu, ka thla khat hlawh chhuah ai pawhin a tam hial ang!

A nuam ka ti ve reng mai. Ei tùr in tùr lah chu kan hnianghnar khawp a, engkim mai chu a tui ber ber chi ni vek maiin ka hria, Jim-a sawi ang deuh khân kan lâm vek a, làm ka thiam ve lo va; mahse, ka lo țhu bîk lo. An bula dingin kut ka lo bêng ve! Lalkâwnga lah chuan Remi chu làmpui phét chu a tum bawk a, ani lah chuan," Min rap leh ang, ka bãi peih tawh lo," a ti tlat a, an han inûm kãwi leh rih bawk a, Lalkâwnga hi chuan nuih hi a tiza thei a nia, a bula awm hi chuan kan inhmuam ûp hlei thei ngai lo, nuih reng a ni mai.

Hemi zàn ațang hian rethei leh hausa dinhmun inthlauhzia ka hre chiang zual. Mi hausa tân chuan chêng sâng hnih khat hi chu eng mah tham a ni lo, pocket money atân pawh a tlêm; mahse, keini ang tân erawh chuan thawh chhuah har tak a nih bâkah, ren taka hman a ngai, rilru nei ràna chét a ngai a nih ber chu. Kan tân chuan pawisa hi tam ve viau mah se 'kan ta' hi a beitham êm a ni.

Ka nu chuan pangpâr chu a han siam chho ve zêl a, nuam a tiin a peih bawk a, kei aiin a siam thiam ta daih mai! Kei chuan danglam deuh hleka siam dàn tùr ka hre lêm lo va, ani erawh chuan pâr chi hrang hrangin a siam a, a mawi phian asin. Bâkah, kei chuan practice hun ka ngah lêm lo va, ani chuan hun ãwl a ngah deuh a, kan in chhûng pawh a pâr nasa tawh khawp mai.

Kan kohhran upa pakhat nupui a boral a, chutah chuan a pangpâr siam chu 'dàwra pangpâr siam to taka lei ai chuan' tiin a keng ve mai a, a zahpuiawm bîk miah loh nia! A nalh lohna a awm loh bâkah a pàr dàn leh a rawng chu a inchawih reuh a, a rûkin ka lo chhuang khawp mai. Lei mai chu a awlsam zâwk ngei mai a; mahse, a siam thiam tho a, a mawi êm êm tho bawk a, țha ka ti zâwk daih mai.

Kei pawh Pi Chhani chuan chhang siam dàn chu min hrilh zauh zauh a, a sawi tui ve thei bawk sia, min hrilh fiah nasa thei lutuk ringawt; mahse, thu ringawt hi chuan siam tui a awl ang a, a taka han tih chiah hian a lo har duh riau a, a taka tihna hun lah hi ka nei lo êm êm bawk si. A taka min han zirtîr tùrin duh viau mah se kan in a inhlat a, chu achhapah, Pi Chhani pasal a dam țha lo chho bawk nèn, hun kan nei thlâwt lo.

Ni khat chu," Bawihi, i pu hi a hrisêl lo chho zêl si a, kei lah dàwr enkawl a ngaiin, inah pawh ka awmpui tak tak hman si lo, hetia chhuahsan reng mai hi dik ka ti lovin dàwr hi ka ti tàwp mai dâwn em maw ni tih te ka ngaihtuah rum rum mai," a rawn tih chhuah chuan ka en vat a, a hmêl buai deuh nak leh hrehawm ti hmêl chu ka hmu thiam mai. Tûn hnai chho hian a pasal a hrisêl lo va, a hlim hmêl pawh hmuh tùr a váng tih ka hre ve a ni.

"Eng nge a natna ni rêng rêng a? Doctor-ah in kal tawh em?" tia ka zawh chuan," Um, kal tawh e; mahse, a natna tak an hre rih lo va, damdawi an chawh a ei ringawt mai. In lama lo enkawl tùrin tu mah an awm si lo va, chu vàng tak chuan dàwr hi tih tàwp mai ka rilrûk deuh a ni, ka ngaihtuah viau che a; mahse, i fel reuh a, ngaihtuahawm chu i ni hauh lo ang tih chu ka hre tho bawk a," a ti leh duah a.

"E, min ngaihtuah miah suh, kei chu țhalai ka la nia, ka pu amah chauha ina a awm chu a khawngaihthlâk alawm. Dàwr chungchâng chu i thu thu a ni mai, min ngaihtuah miah suh, Pathian zârah hna thawh tùr chu ka hmu ve leh vat mai ang," tiin ka lo hnèm ve a, an nupa chuan an khawngaihthlâk reuh ka ti, ka pu damlo lah chu pangchan duh ve pawh ni se ka piin nî tin dàwr nghâk tùra a chhuahsan a ngai bawk si a, amah chauha natna lo tawrh chu a hrehawm dâwn lutuk.

Ka pi bulah kha chuan min ngaihtuah lo tùr khân ka hrilh kha a ni a; mahse, dik tak chuan hna thaw tùr dang han zawn leh chu ka huphurh ru ve tho, Pi Chhani bulah ka lo thawk rei ve tawh a, engkim a zeizia ka lo hre bel ve tawh a, hmun dangah thawh tùr hmu leh pawh ni ila a tìrah chuan ka zum leh dûk dâwn tlat, hei hi peihawm loh ber leh ka huphurh ber chu a ni.

Thla a laklawh deuh hlek a, kâr khat chauh thawhna hun ka nei tawh a, Pi Chhani pawhin," Thla hi ral se, i hlawh pawh a kimin ka pe thei che ang a," a tih vàngin tûn kâr chiah hi kan thawk dùn tawh ang. Han bànsan dâwn chuan a uiawm reuh mai mai mang e, kum hnih chuang ka lo nghah ve tawh kha a ni lehnghâl a, han bànsan dâwn meuh chuan rilru a hnîm ve deuh ruih mai.

Zirtàwpni thlengin dàwr chu kan nghák a, Inrinniah Pi Chhani pasal chu ka va kan ve nghe nghe. Ei tùr ka kensak ve bawk a, Pi Chhani pawh a lo lãwm thiam khawp mai. Dàwr a ti tàwp mai chu hrehawm a tih thu leh a inthiam loh thu a lo la sawi sap sap bawk a, kei erawh chuan ka thiam ang anga hnèmin inthiam lohna tùr a awm loh thu leh dam tak leh hlim taka an nupaa hun hmang chho tùrin ka hrilh thung a.

WhatsApp group-ah ka țhiante chu dàwr nghah tùr min zawnpui tùrin ka han ti ve leh ngawt a, an hriat kher chu ka ring lêm lo na a; mahse, ka ti ve hrim hrim a ni, 'mial' a awm tâkmialah ka ti a ni.. Ka țhiante hi college kal lai an ni deuh vek a , pahnih chiahin college kan kal lo a nih chu. College kal lo ber pawh chu dàwr nghâk ve tho a ni a, hmel hriat a nei zau ve a, a lo hre mial maithei a ni.

A lo hre deuh reuh tak tak a! Mahse, a hriat chu kan vêng ațang chuan a hla deuh hlek, thuamhnaw dàwr niin a thawkate pawh an buai ve thei viau ni àwm tak a ni. Thawktu indaih loh avàngin dàwr neitunuin chhawr tùr pakhat lâk belh a duh a, chutih laiin a chhawr zînga pakhatin pasal a nei dâwn bawk si a, buai tawh nâklaiin, an buai belh ve viau ni àwm tak a ni.

Hlawh chu Pi Chhani hnuaia thawh ai chuan a tam zâwk dâwn ngei a; mahse, buai a na dâwn thung. Tlai lamah erawh bàn a hma thung dâwn a, thuamhnaw hâk tùr lamah ni se uniform deuh reuh an nei a, chu pawh a thlàwn vekin lâk tùr a ni. Ka ngaihtuah ka ngaihtuah a, ka nu ka sawipui bawk a, hahthlâk deuh angin lang mah se ka nu chuan zia dâwn riauin a hria a, kei pawhin hna dang zawna thawh tùr kaihhlak buai vêl ai chuan thawh ve mai chu țha ka ti mah.

A neitunu biakpawh theihna tùr min pe a, ka han be chhin ta ngei a, eng eng emaw min zawh kual hnuah chuan," Naktûkah dàwrah lo kal ve phawt la, i hmêl pawh ka lo hmu ve phawt ang," nui hak hak chung hian a rawn ti a, kei pawh chuan," Ni e, ka rawn kal dâwn nia," ka ti ve mai a, a aw ațang chuan a nèlawm dâwn riauin ka hria.

A tûkah chuan ka va kal ta ngei a, țhiannu Duhawmi sawi ang chiahin an lo buai khawp mai a, an lo lùn ngang mai a lo ni. A thawkate pawh an hah dâwn chiang; mahse, a neitu chu phone-a biak ang chiah khân a lo fel ngang mai a, a hmêl pawh a țha, a țawngkam a dam a, buai viau mah se hlim hmêl takin amah betute a lo chhàwn thei zêl a, a hnuaia thawh pawh a nuam viau ang.

Nui sângin min lo bia a, ka hming ka sawi hnu chuan," E, a ni maw? Min rawn betu kha i ni dâwn tak! I hah àwm sia, lo țhu hahdam rih rawh khai, kan buai ve bawk sia; mahse, heti luai luai hi kan ni reng bîk lo a nia," a ti bawrh bawrh a, a nèlawm phian mai si a, a dàwra thawkte pawh hi hah viau mah se ni tin hlim taka an haw theih zêl ka ring nghâl hmiah, a neitunu a fel êm mai.

A lo harsa lo khawp mai, ka hawin ka uniform tùr ka hàwn nghál a, naktúka thawk țan nghâl tùrin min hrilh bawk. Ka hlawh zât tùr min hrilh sa vek bawk a, buai viau dâwn pawh ni ila hlawh a țha tâwk ve tho a, a inhen viau ang chu. Ka nu pawhin țha taka thawk tùr leh ka hlawh tùr phû ngeia thawk tùrin min hrilh malh malh a, dàwr neitunu fel ka tihzia ka hrilh tawh a, a fel avàng ngawt chuan nêl sual lo tùr leh a fel avàng chuan zah viau tùrin min hrilh pah bawk a.

*******

Hruaia

~~~~~

Kalosib lama kan liam thlâk ațanga ni hnihna, ka inbual zo deuh chiah tihah chuan Zami'n min rawn bia a, hlim awka tih hriat taka," Mâm, beautician zir kha Pain a phal bâkah Nu pawhin a phal tawh a," a rawn tih chuan ka thaw huai thei nia. Kan haw dâwn thleng kha chuan ka nu khân a la remti lo kha a nia, Zami pawhin a sawi nawn tawh lo va; mahse, ka pain a sawipui leh a nih ka ring.

"A țhat hlauh chu, ka lawmpui che, i zir hunah țha takin aw ni ang, i zir chhuah hunah kan nupain facial emaw eng emaw tak min la tihsak ve ang chu," ka tih chuan a rawn nui hawk hawk a," Tehrêng mai, loh theih nâng!" a rawn ti leh a, a hlim awka hriat chu nuam ka ti tak zet. Tuin nge mahni naute hlim awka hriat chu nuam ti lo tehlul ang le?

Irene-i chuan," Ka nuin Zami chu a zir châk zir a phal ta tih ka hre mai!" zãng vah hian a lo ti ve vat a, kei pawh chuan nui chung hian," Nia, a hlim êm mai a, min rawn hrilh ve vang vang a nih kha," ka ti a, hlim rilru tak chuan room-ah insiam tùrin ka lût zui nghâl a, damlo kan tùr pakhat ka nei a, a hma lama kan thuai ka duh vàngin ka insiam zui nghâl a ni.

Programme neuh neuh hi ka nei nasa ve țhin a, hetiang hunah pawh hian sawisêl hauh lovin ka nupui a nihna ang takin min țàwiàwm ziah a, phûr taka min zui ve thei mai zêl hi ka fak a, ka chhuang a, amah ka hruai tel ve theih lohna tura ka zin chhuah dâwnin ka thuamhnaw leh pawimawh tùr min siamsak vek a, keimaha ka insiam hi a awm lo tluk a ni. Nupui fel nih hi chu a tling ve chiang, mi pawhin fel an tiin an fakna thu hi ka hre ve zauh zauh.

Kan inneih dâwn lai vêl khân Ph.D tih a tum lai vêl a ni a; mahse, keiin ka nawr ve tho si a, a țhulh ta nghe nghe a ni. Inthiam lohna êm êm pawh ka nei chuang lo, a chhan chu min duh ve tho tih ka hria a, inzui rei tak chu kan ni lêm lo nain Pathian  ruat ngei a nih ka ring nghet bur bawk. Kan inneih hnu hian ka zâwt ve zauh zauh a, min nei ta hi a inchhìr leh inchhìr loh te hi ka záwt a, keimah vànga Ph. D a ti ta lo ringawt kha min mawhchhiat em tih thlengin ka zâwt, min chhâng lo hian a nui ziah zui a, inchhîr pawh ni se awmzia a awm chuang si lo va, a sawi vêl peih lo a nih ka ring.

Zàna laptop ka khawih lai chuan ka hnung lam ațanga min rawn kuah pahin," A va pawimawh àwm ngar ngar ve! Ka ko che a, i hre miah lo," vui awka tih hriat tak hian a rawn ti a, kei chuan lo en vatin," A ni maw?! Ka tihpalh lutuk! Ka lo hre miah lo a nih chu," ka lo ti vat a, a biangah chuan ka fawhsak zauh a," Ka ti zo țêp, i khawhar lo thei țêp aw, games kha lo khèl ve mai mai la?" ka tih chuan," Ka lo nghâk zâwk ang che, ka nghâk thei che alawm," a lo ti thung a.

Ka ti zo țêp tihah chuan țhenawm hnai ve deuha awm, Nu Chawii, nikum hmasa lama pasal sûn tawh hi a rawn lêng hlawl mai a, lo chhàwn vatin," Lo lêng rawh, Nu Chawi. I va lo lang khât tak! In dam țha tiraw? Lo țhu rawh, i rawn lang khât hle mai, thingpui hâng tui tãwkin ka lo siam ang che," tiin Irene-i chuan a lo be sawk sawk a, ka nui sak ringawt. He nu hi chu ka han duh chiang tak! Mi fel hi chu a tling ve chiang alawm, a țawngkam a dam si, ngaina lo pawh hi an awm pawhin ka ring lo.

"Aizãwl lama in zin hnu khân ka la rawn lêng miah lo va, bengvàr hi a har loh tehlul nèn hian, ka bengvár lo leh tlat țhin, in chhûngte an lo dam țha maw?" Pi Chawii chuan a ti ve charh charh a, Irene-i chuan a chhâng a. Ka thil tih ka zawh teuh êm avàng chuan," Nu Chawi, lo lêng reng rawh aw, ka han ti zo law law ang e," ka ti a, ani chuan," E, hei Irene-i a awm alawm, nang chuan i tih tùr țûl kha ti mawlh mawlh rawh, kan mamawh vak lo ang che," nui ar ar pah hian a lo ti a, kei chuan," A, chutiang chu a fair lo, min mamawh lêm loh pawhin ka tih zawh veleh ka rawn tibuai tho tho ang che u," tiin fiamthu hian ka chhâng lêt ve leh a.

Rei tak a lêng lo, a haw dâwn chuan," Pastor ka hrawn tawhah chuan ka la nêl ber che u a, chu vang chuan a nia ka rawn lan ve deuh zut ni, min lo ning lo ula," nui chung hian a ti a, kei chuan," Ning lo ve, in rawn lêng ngam lo ang tih hi kan hlau daih zâwk a ni, in rawn lèn hian nuam kan ti, rawn lêng ziah rawh," ka ti a, Irene-i pawh chuan," Lo lëng ziah rawh, inlêng neih hi nuam kan ti a, kan thlahlel teh a nia," a lo ti ve bawk a. Nui hak hak chung hian kan inmangțha a, amah tê hi pasal sûn tawh mah ni se mi hlim thei tak hi a ni roh a, a fapa naupang ber nèn awmin nikum kum tàwp dâwn khân a fapa chuan nupui a nei ve a, an pathumin an khawsa tihna a nih chu, kan inlêng neih regular ve ber a nia, a rawn lèn loh hi chuan a reh ve ruih a, kim lo hi a awm ve tlat tawh.

Mutnaah chuan kuah chialin a ke chu ka han tlawhsak a, pangti lum hi a nei țha phian a, tunah pawh hian a lo lum leh thar thar tawh.

"Mi felnu, i chungah hian ka lãwm tak zet a ni. Ka nupui i ni hi ka lãwm a, a châng phei hi chuan ka mumang mai i ni ang tih ka hlau țhin a, a rûk hian ka insik leh fo țhin asin," ka ti sap sap a, ani chuan," Umm... ngaihthlâk hrehawm tak a ni miah lo, sawi zêl rawh," tiin ka kuahna bán chu a tuai neuh neuh a.

"Sawisèl bo, nang ka lo tawng che hi chu mipa vànnei tàwpkhãwk chu ka lo ni, i tâna pasal țha tak nih pawh hi ka tum ve rêng a ni, ka chunga i awm dàn leh mi dang i en dàn leh kawm dàn lahin ka mit a tlung êm êm bawk, sawisèlna tùr i awm lo lutuk hi ka sawisèlna che a ni," ka tih leh chuan a lo nui hak a, rawn inherin," Pastor romantic tak leh țawngkam thiam tak i nih hi a, heti khawp hian țawngkam i lo thiam tih hi ka lo hre ngai hauh lo," a ti a, min rawn en chhovin ka biang chu a rawn chûl pah a.

"I bulah hi chuan sawi tùr hi a tam a, hrilh thiam vek che hi ka duh țhin. Ka duhzia che sawi lan nân țawngkam thiam tak hi nih ka châk fo; mahse, țawngkam thiam ber pawh chu lo ni dâwn pawh ni ila ka duhzia che sawi chhuah nân chuan ka țawngkam chu ka la duhkhawp thei chuang lo ang," ka ti leh sap sap a, a mitmeng mawi zet, a han meng deuh ser ser chu ka en chhuk reng a, a hmêl țha tak mai leh a hmui, vawi khat chauh en pawha mipa thinphu tirang nghâl dawt dawt thei khawpa sexy-ah chuan ka mit a bûr leh nghâl chat a.

"Zanin chu--"

"I tân chuan ka inpeih reng alawm,"  a tih sap rual chiah chuan ka kûn a, a hmuiah chuan ka fâwp nghâl chat bawk. He nu hi ka duh lutuk tlat, ka taksa leh ka thinlung hian a mamawh ngawih ngawih reng a, heti tak maia ka duh êm êm mai hi Pathian thîkthu chhiatna ka tawng bua ang tih pawh ka hlau ru hial țhin.

Fa hi a la pai hlei thei tlat lo, inentîr mai ka sawi rì a, ani lah chuan," A ngai hleinem, kan hmanhmawh a ni ang, kan heti ta rau rau a nih leh hun kan hmang dùn rei thei deuh dâwn tihna a ni mai a, pawi ka ti hauh lo. Fa kan neih nghâl vat chuan kan pahnihin hun kan hmang dùn tam thei lo ang a, bâkah, fa kan neih vat chuan i rawngbàwlna lamah tûn ang hian ka țàwiawm țha hlei thei lo bawk ang che, chutianga ngaihtuah chuan ka rai vat lo pawh hi a zia phian ka ti. Pathian zârah fa chu kan la nei ve ngei ang a, mite pawh kum hnih kum thum hnuahte pawh an nei ve tho alawm tiraw? Tunah hi chuan pum hmawm che ka la duh rih tlat," a ti a, a sawi hi dik ka ti ve tho. Fa chu ani pawhin a awt lo pawh a ni chuang lo; mahse, nei ta chiah ila tuna min țàwiawm ang hian a thei dáwn tawh lo tih chu a hre chiang bertu ka ni ngei ang. Chu vàng chuan Pathian pawi kan sawiah pawh ka ngai chuang lo, kan duh loh vànga rai lo pawh a ni chuang lo va, rem a tih hunah Pathianin min la hlawhtlintîr ve mai ang.

March thla laihawl laiin kan rawngbàwlpui, Aizawl lama awm a boral hlauh mai a, kan hmelhriat hnai tak leh lo inkàwm ve fo kan nih avangin ka ngaipawimawh hle a, kan nupain Aizawl kan pan vat a, a ruang pawh kan han nang hman nghe nghe a, han haw leh vut chu a fuh lêm loh avàngin kan riak a, kan in pawh a lo reh ta deuh. Zami leh Nùtei an awm tawh si lo va, zànah chauh a awm chhunate pawh kan inhmu thei a ni.

A tûkah Irene-i chhûngte tlawhin kan chhuak a, a hma khân kan tlawh hman ta si lo va, mitthi in lamah pawh kal a țha viau a; mahse, kan kal ta lo mai. Chawhnu dár hnih vêlah Irene-i chhûngte in ațang chuan kan chhuak leh a, Ahlutei dàwra pèn a remchàn êm avàng chuan kan pêng leh rih bawk a, min lo hmuh chuan min lo làwm thiam khawp mai.

*I THIL TIH LEH I AWM DÀN APIANG KHA MI DANG HRIATTÎR VEK A NGAI KHER LO A NIA, I MIMAL NUN KHA PUAN ZÀR CHIAM A NGAI LO*