☆MIN EN LA☆ - 45 By Dingdi Pachuau

 ☆MIN EN LA☆ - 45 By Dingdi Pachuau

Aizâwl kan thlen chuan a in lamah kan tlän nghâl a, kawng lakah min chawlhpui bawk si lo va, ka ril a țâm ve țan viau tawh a; mahse, min zawh pawhin eng mah ka sawi chhuak duh chuang lo.

A inah lah chuan tu mah an lo awm lo va, kan thlen veleh geyser a on nghâl a," Tui lumin i inbual dâwn nia," a ti sup a," Lo țhu rawh, ei tùr ka'n buatsaih nghâl ang e," a ti zui leh zat a, choka lamah a kal zui nghâl a," Ka lo pui ang che," pawh ka ti duh lo, amahin siam vek rawh se, engah nge ka duh lo chung min hruai ni?

Phone ka nei lo va, pawisa lah chu pads leina tùra ka tih Rs 100 ka kekawr ipteah ka ak ve ràn a, chu tê mai chu ka pawisa neih chhun a ni, thuamhnaw lah ka hâk lai chauh, ka slipper bun lai lah chu chhehchhawl takmeuha ka bun țhin a ni zui a, ka ropui lo ve khawp mai.

Ka țhut ngawih reng lai chuan cup noodles pahnih keng hian a rawn phei a, ka nuih a ti za zâwk! A ei tùr buatsaih ve hi, thil tui tak a siam tùrah ka lo ngai a nia.

Mahse, ka bul dawhkàna a rawn hùn chiah chuan a rim chuan ka ril a ti țâm zual nghâl rawih rawih mai, han hnial pawh ka tum duh tingtang lo, mahni inhremna mai mai, pawisa lah ka nei mang si lo. Pakhat chu ka ban zat a.

"Nakinah tui deuh zâwk ka siam dâwn nia, tûn atân chuan hei hi ni rih mai rawh se," a tih pawh chuan ka thil ei lai chu ka chawlh phah chuang lo. Sa viau mah se, a tuina a bo lo, a sat poh hian a tui zual maiin ka hria, chhêm hoh hoh pah chuan ka ei zui zêl a. A la nui hawk zui, ka en duh lo lui tlat thung a.

"A țâm tawh viau a ni maw? Pakhat pawh hi ei daih rawh," tiin pakhat zâwk chu ka bulah a rawn nawr hnai a, tho nghâlin choka lamah a phei leh rih a, a dang a va la leh dâwn a niang.

Ruah a súr a, khua a lum hran lo.  Inbual tùra min tih pawh chuan hnial ka tum lek lek a, kawr hâk thlâk ka nei bawk si lo. Inbual hnua thuamhnaw ngai hâk hi ka thiam lo va, ka tih ngai loh thil a ni.

"Pawimawh tùr chu bathroom-ah khân a awm vek ang," a rawn tih chuan ka rilru ngaihtuahna a rawn hre vek emaw ka ti hial a ni, ka en hau nghe nghe. Ani lah chuan," I chau àwm si a, i inbual zawhah i muhìl daih dâwn nia," a rawn ti zui a,  ka chau em ka hre lo. Khua a la tlai fahran lo va, tûn ang hunah hi chuan ka muhìl thei lo tawp ang.

Tui luma han inphuh sang sang chu nuam tak hi a ni, ka duh aia rei ka la awm zui a. Ka thuamhnaw chu han sûkna tùr sahbawn ka zawn ngial pawhin ka hmu lo, bâkah, inbualna sahbawn pângngai pawh a awm lo hrim hrim bawk. Ka hâk tùra a lo dah sa pawh chu ka han hâk chuan ka tâwk ve chiah mai, tu thuamhnaw tak ni ang maw ka ti rilru deuh a; mahse, hâk hnu pawh a ang lo.

Ka nuin min lo ngaihtuah ka hlauh avàngin phone ka duh viau a; mahse, ka dîl duh hauh lo. Ka nu hnêna hrilh tawh ang khân a insawi ngei mai a; mahse, ka ring chiah lo. Ka nuin kan inrúk a phal ka ring teuh lo, engtin chiah nge a hrilh ang le? Hetia awm tawp lo hian chhuah dàn ka ngaihtuah dâwn lo em ni? Ka chhuak ru thei ang em? Min dah free êm hi maw, ka thei hrim hrim ang; mahse, pawisa ka nei lo tih ka hre chhuak leh thut a, ka hnual leh rawih mai. Pawisa tel lo chuan khawiah nge ka kal chuan ang? Khua a thim ang a, zàna hmeichhia mahni chauha vah phei chu, a hlauhawm ang.

Țhutthlèng dûp nuam zeta țhua ka ngaihtuahna ka kawm melh melh lai chuan ka mut chu a rawn chhuak selh selh a, ka maimichhîng a, ka chhîng sek ta ni berin ka hria; mahse, chhîng sek tih tùr chu a lo ni hauh lo a ni chêk ang chu, ka harh leh meuh chuan zàn dâr 7 a lo pèl tawh niin!

Jakob-a nghèng chialin ka lo muhìl a lo ni, ani erawh chu a muhìl ve miah lo va, ka harh tih a hriat chuan," I chàu deuh a nih kha, muhìl leh rawh," a lo ti sup a, kei erawh chu ka harh chiang tawh bawk a, mut chhunzawm ka tum tawh lo.

A ei siam tui zet chu kan ei a, chaw pawh tlêm chu a lo chhùm ve a, kan la ei zo lo zui. Ka țawng lo va, ani pawh a țawng chuang lo. Thil ei pah chuan ka ngaihtuahna ka kàwm chhunzawm leh a, heta min hruai hi a lo tum lâwk sa rêng em ni ang? A in enkawltute awm miah si lovin ei tùr lah engkim a lo awm fel vek si. A motor-ah khân lo chuang lo ila tunah hian hetah hian ka awm hauh lo ang le, ka lo chuang ve ta kher kher khân thil a ti pawi zo vek.

TV bulah ka țhu reng a, en tak tak si lovin TV chu ka melh reng a, dâr 10 a rîk tawh pawh chuan ka thawhsan chuang lo. Ani erawh chu chaw ei kham hnu lawk kha chuan a rawn țhu ve rèn ráwn a; mahse, thovin eng eng nge a tih pawh ka hre lo, a chângin a rawn kal leh țhìn bawk a.

"Mu tawh ila?"

A bula mu tùrah min ngai a ni ngei ang chu, ka mu dâwn lo, hetah hian ka riak mai ang.

"Ka mut a chhuak lo," tiin ka chhâng a, chhuak mawlh hek lo le. Ka inbual zawha ka muhìl khân min tisuakbãk vek, ka mut a chhuak hauh lo. Țhutnaah chuan ka ke ka hlâng chho ve ve a, ka țhu hlãn a nih ber chu.

Puan lum kengin a rawn kal a, min nghèng chiaha rawn țhu vein puan lum chu min han zàwn zui a, ka taksa nghèng chiala a rawn țhut ve tâkah chuan chhûngril lamah lum ka ti țan nghâl ap ap mai ka ti.

"A hmuhnawm viau a ni ngei ang."

Eng nge ka film en chu a awmzia ka hre lo hrim hrim, ka mitin a hmu a, chu zawng chu a ni mai, ka rilruin ka ngaihtuah lo hrim hrim. 

"Ka nu hnênah engtin nge i sawi?" ka ti sap a, ka nu rilru ka tihhrehawm ka hlau ber mai. Inrûk chu a rem ti dâwn hauh lo tih ka hre ve bawk si a, min lo ngaihtuah viau ang em? Ngaihtuah lo thei nâng, kei pawhin ka kal ve dâwn tih ka hre lo a nia, min phur tlang lui a ni tih hre ta ngat se... A, kan lo induh ve tawh țhìn bawk sia, mi pawhin inrù-ah min ngai tawh tho mai lo ang maw? Ani lah hian chutiang chuan a sawi bawk si; mahse, a ni ringawt thei bîk lo. A hnênah hian țha takin sawiin hàwnna tùr pawisa pûk hi dîl ta mai ila...

"Ngaihtuah buai duh suh," tia min chhàn chuan," Ka haw a ngai a ni, hetiang thil hi thleng thei a ni lo, sumo fare tùr pawisa min pûktîr la, naktûkah ka haw leh nghâl ang e, hming a chhiat hmain," ka lo ti vat a, a nui hawk mai.

"Hawsan lo ve, tihian ka nupui i ni tawh dâwn alawm. Inneihna lah kan tlawlh rei tawh bawk a, tlawlh lehzêl ka tum tawh lo," a ti thung a, hnung lam ațang chuan nghet zet hian min rawn kuah zui zat a. Ka tîm deuh chãwih a, ka beng bul lawkah rawn țawngin a rawn thâwk khum lum ham ham bawk si, ka za chem chemin ka hria.

"Chutiang a ni thei ringawt lo. Kan inkârah thil a thleng hnem tawhin hun pawh a liam tam tawh a, a hma ang kha kan ni tawh lo, thil a danglam vek tawh," ka tih chuan," Eng nge danglam?" a lo ti sup a.

"Thil engkim!"

"Ka hre ve lo, keimahah chuan danglam a awm ve lo a nih chu," a lo ti nghut a, kei erawh chuan rang zet hian," Dâwt sawi kher suh, bialnu pawh i neih reng kha!" ka ti chhuak ta thuai a, ka mitthlaah a bialnu nèn an thlalâk chu ka hmu nghâl rauh rauh mai. 

"Bialnu nei ila ka ru dâwn che em ni?"

"Phubâ lâk nân min hrem i tum vàng mai a nih hi," ka ti ve thung a, ani ve thung chuan," I ngaihtuahna i kalpui thui mah mah, ngaihtuah ngut ngut lovin hahdam takin awm tum teh," ka beng bulah chuan a rawn ti leh sup sup a.

"Ka hahdam thei hleinem."

"Mihring dam lai, tung chhoa kal zîngah nang chauh hi ka duh i ni ka tih tawh kha," tiin amah en thei tùr chuan min kuai her ta deuh a; mahse, ka en duh lawk chuang lo va," Min en teh le," a tih sup hnuah chauh ka en.

"Eng mah ngaihtuah buai suh, ka kutah innghat vek rawh, i tâna țha lo tùr hi ka ti duh hauh lo ang tih hria la, min ring hmiah mai rawh," a ti leh sup sup a, rawn kûn hniam zuiin ngaihtuahna fîm pawh ka put theih hma chuan min rawn fâwp zui ta nghâl a.

Ka buai zo leh ta vek mai. Buai zo han ti ila eng thil dang mah (amah chauh tih loh chu) ngaihtuah thei lovin min siam leh tawh ka tihna, min kuahna avànga chhûngril lama lo dik loh tawh sa nèn, min fawhna zùn zâmah chuan ka tui ral zo leh ta.

Heti lama experience ka neih lohzia lah a hre chiang nasa si a, min hruai dàn a thiam nasa mai. Ani hi zawng engkim lo pal tlang tawh leh a chin hria a ni bawk a, kei hi chu min hnehsawh viau mah mah zâwk ang chu, amah chhâng lêt lo thei lo leh amah mamawh ngawih ngawih tùrin min siam a, ka la dài ngai loh ram a ni bawk nèn, ka rilru a mumal thei hauh lo, inngaihtuah harh thei pawh ka ni tawh lo hrim hrim, kan hmabâk dài zêl châkna ka nei zêl a, châk tak leh zei takin ani'n min hruai zêl bawk a, he khawvêlah hian kan pahnih chauhin kan awm ta ni berin ka hria.

An duh berte hnêna an thianghlimna hlàn hmeichhiate ka dem thei ta lo. Dem thei dinhmunah lah ka ding hek lo, engkim mai a nih tùr ang a ni tawh a, inchhìrin awmzia a nei tawh lo va, eng mah siam țhat theih a ni tawh hek lo.

A hnungzâng chu ka țhàmsak tàwn táwn a, ka mittui ka bek tawn tawnah a luang ngiai ngiai bawk. Ka rilru nat vàng chu a ni lo ang, ka taksa chhûngril nâ vàng zâwk chu a ni ngei ang, ka hmuì ka pet fan fan bawk a, amah pawh en lo chuan ka mit ka chhîng tlat a. Ani chuan ka sam chu duat taka min chùlsakin ka mittui luang chu a rawn fâwp zauh a," Rêngpui, min en teh," a tih leh sup tâkah chuan vài deuh riaiin ka meng a, ka melh chho a, min duhna leh duatna mitmeng ka hmu," Ka hmangaih che, Rêngpui," a ti ta sup a, muangchânga rawn kûn hniam lehin ka hmuiah chuan duh tak hian a rawn fâwp leh ta vang vang a.

Min hmangaih a nih chu. A țawngkam chu ka bengah chuan a ri nawn tluk tluk mai, min lo hmangaih tak tak maw? Min mutpui avànga min hnem nân mai em ni a sawi? Ka rilru thâwi dam nân chauh maw?

"Ka hmangaih êm êm che a ni," min fawh kârlaka a tih leh sup chuan hlimna sawi thiam hleih theih loh chuan min rawn tuam hlawp hlawp maiin ka hria, rinhlelh pawh ka ringhlel phal ta lo," Kei pawhin ka hmangaih che," ka ti lêt ve ta sap a, a hma pawhin ka hrilh tawh tho a, ani hi chuan ka hmangaih tih a hre tawh a ni.

"Ka hria asin, ka lâwm rêng bawk. Hei vàng tak hian kalsan che hi ka tum ngai lo," a ti leh sup sup a, kan infâwp mawlh mawlh a, kan induhin kan inhmangaih tawn tih kan hre ta bawk nèn, kan duhthawh dùn ta viau mai; mahse, min dìm thiam takin a chê a, ka taksa chhûngril nâ pawh ka hrechang tawh meuh lo.

Khumah kan lo mu dùn reng tawh a lo nih hi! TV room ațanga min sawn lai pawh ka lo hre hauh lo, ka thluak a ti buai hneh lutuk a, thil thleng kha a rang bawk sia, ka hre thiam tawh lo. Light kan off loh avàng chuan a  khumah kan mu tih pawh ka hre thiam ve chauh a ni.

"Muhìl tawh rawh le! I chau ang, he zàn duhawm leh chhinchhiah tlâkah hian eng mah ngaihtuah lovin muhìl rawh aw," tiin duat takin ka chalah a rawn fâwp a, ka hnárah a rawn fâwp bawk. Ni e, ka chau ve ringawt nia, che nasa zâwk pawh ka ni hauh si lo.

*******

Ka inchhîr lo ang, thil thleng tawh a ni a, ngaihtuah lêta inchhìr awmzia a awm hek lo; mahse, ka ngaihtuah lêt lo thei lo. Khati khawpa insùm theihna ka nei lo kha mak ka ti tàwp thei lo, eng emaw rokhawlhna lo thleng lo leh tàwpna tùra hmanrua eng emaw tak lo awm miah lo kha a mak ka ti, thlèmna ata tlàn chhuah nachâng ka hre lo leh ka pil bo hneh lutuk kha, Setana kan lamah a va țang chiang tak , a lãwmin a nui khi vur vur ang chu.

Zîng lamah erawh amah aiin ka harh hmasa a, ka thawhsan daih. Thil dik lo a ni tih ka hria a, tih nawn leh ka duh tawh lo. Vawi khat ka ti tawh a, a dik lo tih rilru fîm puin ka ngaihtuah chhuak tawh a, ka ti nawn tawh lo ang. Ka nu hmêl ka mitthlaah ka hmu rauh rauh a, min rin tehlul nèn, a fanu hi a rin angin ka awm ta si lo.

Chaw ei laiin," Engati nge hetia i chêt thut chhan hi? Ka tih chu kan khuaa i rawn kal dâwn lai vêl kha chuan Aizawla  min hruai phei hi i tum pawhin ka ring lo, nge i lo tum reng zâwk?" tiin ka zâwt a.

"Ka rawn thlen laia i in lêng pahnih ka hmuh rual khân hruai phei che ka tum nghâl a ni," tiin min chhâng a, ka en vang vang a," Motor-ah khân chuang duh tlat lo ila min hruai phei tawp lo ang," ka lo ti ve thung a.

"Ni tho mai; mahse, i chuang tlat si a."

Kan ngawi vang vang a, amah zâwk chu rawn țawng chhuak hmasaah țangin," A rang thei ang bera inneih ka duh a ni," a rawn ti chhuak daih a,  kei chuan," I bialnu țhen fel phawt rawh," ka lo ti nghat a.

"Bialnu ka nei lo ka tih kha. Melody'n eng thu nge a rawn fah țhin che ka hre lo; mahse, thil țha lam chu a ni hauh lo ang le, ka hria a ni."

Ka en vat a, engtin nge Melody chu a lo hriat chhuah ve a?!! Ka phone a en ru ti ila ka keng si lo, Mami'n a hrilh tihna em ni? Ni lo se khawi ațangin nge a lo hriat ngawt ang?

"Dâwt ka hrilh ngai lo che, i lakah hian thurûk zêp lah ka nei hek lo. Kan buaina bul ber pawh hi Melody a nih ngei ka ring, a dik tiraw? Eng thu nge a hrilh che?"

Kei erawh chuan," Melody nèn kan in hria tih chu engtin nge i hriat? Mami'n a hrilh che a ni maw?!!" ka ti ve thung a, ani chuan," Carolene-i chuan min rawn biak laiin a sawi ri zauh a, a be zauh zauh che tih a sawi hnuah thil awmzia ka rem khâwm ta mai a ni," a ti leh ta a.

"I nau a ni lo'm ni?"

A ner sawk a, a rûm nghut bawk. A mitmenga thinrimna lo lang chu hmuh hmaih theih a ni lo, a inseh ruh nghâl bawk a, sehchilh deuh hleka," Nang nèna kan inkâr chhiatna duhtu hi ka nau ni theiin i ngai em? Kei chuan ka nau tiin ka sawi ngai lo ang," a ti chhuak ta sup a, chutah," A hma thei ang bera neih che hi ka duh a ni, nang pawhin min hnial loh ka beisei," a ti leh nghut nghut a.

Thil dik lo kan ti tawh a, kohhran dàn thianghlim kan tlin tawh lo nèn, min neih duh phawt chuan a rang thei ang bera inneih chu pawi ka ti hauh lo.

"Ka nghâk rei tawh che. I nu hnêna ngaihdam dîl pahin nupui atân dìl leh che ka duh a ni, kan inhmangaih a, harsatna a awm ka phal tawh lo ang," a ti leh a, a thil sawi chuan ka rilru a tihlim ngawih ngawih. Pathian duh loh zãwng kan ti tih ka hriat hnua ka hlim lehna ber a ni ngei ang.

Mahse, a nupui hlui Zonuni nu leh pate hnêna a thu tiam kha...ka ngaihtuah chhuak leh thut a, ka hlimna pawh a chuai leh rawih rawih mai.

"Mahse, i thu tiam kha..."

*VÀNNEIHNA KAN TIH PAWH HI AMAHIN A LO THLENG TAWP BÎK LO, VÀNNEIHNA DAWNG THEI TÙRA THAWK CHHUAK ȚHÌNTE CHUNGAH A NI A THLEN ȚHIN NI*