☆MIN EN LA☆ - 46 By Dingdi Pachuau

 ☆MIN EN LA☆ - 46 By Dingdi Pachuau

"Eng thutiam maw?!!"

A ngaihna a hriat loh hmèl deuh hlek a, a hre lo der vêl a nih ringin," I hre zâwk ang chu, min han hrilh la?" ka ti ve thung a.

A thaw hawk a," Min ring tùrin ka duh che, engkima min ring thlap tùrin ka duh che a ni, i thei ang tiraw?"

Kan inmelh dùn ràn a, rin chu ka duh alawm. Ka hmangaih êm êm mai si a, ani pawhin min hmangaih tih a sawi kha; mahse, thurûk hi a ngah êm mai a, ka hriatpui ve si loh, kan inkâr tibuai thei thil leh min hrilh ta se pawi lêm lo tùr min hrilh loh hi a la nei țûnin ka la ring tho bawk si, ka awm dàn hi a laklawh.

"Rin che chu ka duh alawm; mahse, thurûk hi i ngah êm mai a."

Ka melh hnuai nghâl raih a, ani erawh chuan muang fân deuh raih hian," Eng maw?!! Thurûk a?!!" a rawn ti ta sup a.

"Umm... Thurûk ni e."

Kan inmelh leh ràn tawh a, mit khap hmasa zâwk nih tum lo tak hian ka melh kal a, ani pawh chuti tho; mahse, ani erawh chuan a chângin a mit a tizim leh zauh zauh thung.

"I lakah hian thurûk ka nei maw?!! Um, a țha e," tiin a bu nghut a," I duh duh min zâwt thei ang, min rin loh hi ka duh hauh lo, sawi fel vek ka duh," a rawn ti zui ta bwk a.

Ka thaw deuh huai mai.

"Zànah kan sawi fel ang," a tih deuh tlat avàngin hun ãwlah pawh chuan ka zâwt lui duh bîk lo va, lèn chhuahpuiah min sâwm a, kan lêng chhuak a, ka mamawh tùr nia a hriat țhenkhat leh chawhmeh kan lei pah bawk a," I duh apiang sawi rawh, kan lei zêl ang," a ti mai a, a ti mai mai lo a ni tih ka hre nain mamawh êm êm ka nei hran lo va; mahse, pads erawh ka'n lei ve hrâm kha, ka mamawh thuai dâwn si a.

Zanriah buaipui lamah erawh a phal lo chung chungin ka pui lui tlat a, a hnuah chuan," I ei siam pawh ei a châkawm leh tho tawh alawm," a ti ve ta mai a, ei siamah kher hi chuan mamawh apiang a awm zêl bawk si a, nuam ka ti, awm leh awm lova siam ang kha a ni ve si lo va, ren ngai hauh lovin duh tâwk tâwk hman tùr a awm bawk si a.

"A tui leh dâwn mang e!"

Zanriah kan ei chuan ka thil siam chu tui a ti tih ka hre reng; mahse, a ei tam êm êm chuang miah lo. A tih ve dàn rêng a ni a, thil a ei tam viau ngai lo tlat a ni.

"Le, i duh duh min zâwt tawh rawh le."

TV room-ah kan țhu a, inhma chhawnin, hei hi ka duh dàn a ni, a thil sawi laiin a hmêl leh mitmeng hmuh ka duh si a. Pâwn lamah ruah sûr cherh cherh mah se thãwm a hriat hauh loh a, TV pawh kan on reng tho; mahse, kan ngaihsak hran lo.

"Muansangi, ni leh lo, Melody nèn in inlaichìn dàn ka hre châk a," tiin ka zâwt hmasa ber a, awlsam zeta," Hmeichhia min hringtu 'Chu mi fa chu ka ni e' a ti alawm'," tia min chhàn chuan mit khap hauh lo chuan ka en a, min chhàn dàn leh a țawngkam hman dàn avàng chuan mak ka ti deuh hlek a!

"Hmeichhia i tih chu i nu i sawina a ni em?"

A rûm nghut a," Ni lo ve, min hringtu mai chauh a ni," sehchilh deuh hleka a rawn tih chuan amah hringtunu nèna an inkâr ni àwm chu a hriat theih nghâl ruak maiin ka hria.

"A fanu, sihal rilru pu, ramhuai sâwn tluk zeta rilru bawlhhlawh leh duhãm kha beram no hmul sinin ka hnênah a rawn tîr teh rêng a nih kha, nang thleng thlenga a rawn biak che hi chu ka ring pha hauh lo bawk; mahse, ka lo ring sual chiang a ni," a tih leh nghut nghut chuan ka en reng ringawt a, han sawi ve mai tùr pawh ka hre lo, a thil sawi chuan min țhâwng deuh a ni mahna.

"A rawn biakna che a rei tawh em?"

Kan inzáwt ta sa sa a, dâwt hrilh duh bîk lo chuan," Aw, rei tawh, kum khat chuang a ni tawh," tiin thu dik tak chu ka hrilh ve mai bawk a, a rûm leh nghut a.

"A rawn be duh ang che tih hi lo ring lâwk thiam daih tawh tùr ka ni asin le! Ka thiam loh a ni, i hnênah hian thil țha lam a rawn sawi dâwn lo tih lah hriat sa a ni a, engtiziaa lo ngaihtuah chhuak hauh lo nge ka lo nih ni?" a ti leh nghut nghut a, a inthiam lo leh a thinrim mitmeng chu hmuh a nuam fahran lo.

"I chanchin țha lo lam a sawi hauh lo a nia," ka tih chuan min melh kur pah hian," A theih loh! A rawn biak che chuan kan inkâr hre sain, min pawh țhen a tum ngei ang tih ka hre sa a ni, ka rin dàn hi a dik ngei ngei bawk ang," inringtâwk tak chuan a lo ti thung a, dik ka tih ve tho si avàng chuan ka chhâng lêt duh lo va. Amah vêk chuan," Min kal bosan chhan leh ka laka i hel tâk tlat chhan pawh kha amah vàng a ni ngei ang tiraw? Eng thil nge a hrilh che?" a rawn ti leh a.

"Ka sawi tawh kha, zu i in--" ka sawi zawh hma chuan," A ni lo, kha kha a chhan a ni lo tih ka hria, a tìr ațangin ka lem ve zauh zauh tih i hre tawh a, han hel leh thut nân chuan a țha tâwk lo, bâkah, min hmangaih tih kha ka hre chiang ve tâwk bawk a," a lo tih chuan ka ngawi ta vang vang a, a sawi dik si a, dâwt han hrilh leh ngawt mai chu dik ka ti chiah bîk lo deuh a ni.

"A tìr lamah kha chuan ka thin a rim deuh thut a, khatia min țhen kha ka mipa rilru a chhuak a, tlâwm ka inti ngawih ngawih a ni; mahse, ka ngai êm êm tho si che a, chu chu duh lovin zû hmanga tih reh ka tum a; mahse, a ti reh hlei thei lo chu a lo nih kha; mahse, nangmah ngai anga awm kha chu ka duh hauh lo thung. Chuan, min țhen chhan dik tak kha le, dâwt tel hauh lovin min han hrilh tawh rawh le, min țhen thut chhan kha," a rawn ti leh daih a.

La pehhêl ru deuh tak chung chuan," Sawi nuam a nih loh bâkah ngaihthlâk pawh a nuam chiah lo thei a," ka han ti phawt a, ani chuan," Zêp țhen hauh lovin le," a lo ti thung a, thâwk ka han la leh té tê phawt a, chutah," I nupui boral tawh Zonuni nu leh pate hnêna thu i tiam kha, kha vàng khân ka kalsan ta che a ni," ka ti ta a.

Meng zîm deuh san pah chuan," Eng thutiam nge? Ka va hre ve lo ve!!" a lo ti vat a, kei chuan," Nupui dang nei tawh lo tùra intiamna," ka ti sap a, chu thu a han hriat chuan a thaw hawk a, a nui hawk bawk.

"Ka rin dàn a dik ta chiah. Melody zet chuh, chu thu vàng chuan inneih kan tum kha i țhulh ta a... Thu lawilo a hrilh che ka ring rêng a ni, ka lo hre chhuak har zet chu aw..." a ti ta vawng vawng a.

"I tiam lo em ni?" kei lah chuan ka lo ti leh a, eng nge, thu dik tak hriat ka duh alawm, rin ka duh a, thu dik tak a kâ ațanga ka hriat chauhin ka ring thei ang.

Ani chuan," Ka tawrhna min hriatpui a, mi dang zawng leh thuai tùrin min ti zâwk a ni, hlimna dang nei leh thuai tùrin min duhsak êm êm a, an fapa ang chiaha min hmangaih avàngin kei pawhin nu leh pa ang chiahin ka en a ni. Min duhsak ang ngeiin nang ka tawng ta che a, an hnênah pawh nupuia neih ka tum thu che pawh ka hrilh vek nghe nghe asin. Ka hlim tih an hria a, min lawmpuiin duhsakna pawh min hlàn thlap a, hmuh ve che pawh an châk asin," a ti ta sup sup a.

A thil sawi hi a dik ngeiin ka ring. Melody'n min hrilh pawh khân ka ring lo deuh hlek a; mahse, thlalâk hrang hrang min rawn thawnte khân a thil sawi kha a ti chiang riau țhìn si a, bâkah, dâwt min han hrilh tùr êm chuan ka ring ngai lo a ni.

"Engah nge ka nupui neih leh neih loh tùrah chuan an lo buai ngawt ang? An hnêna thutiam phei chu...," tiin a lu a han thing nak a," Mahse, ka dem hauh lo che, thil a sawi âwihawm theihzia ka hre chiang ve tawh a, kei pawh vawi khat min bum țhelh tawh a ni. Nang phei chu bum i nuam dâwn nasa mai si, a bum ta rêng bawk che a," a ti leh a.

"Thlalâk hrang hrang min rawn thawn ve reng bawk sia, ka tân chuan lo âwih loh ngawt theih a ni lo alawm. Chuan, tlêm lai lawk khân bialnu i nei tih min rawn hrilh bawk a," ka tih chuan a nui leh hawk a; mahse, a za lo tih a hriat viau thung, a thinrim nui mai mai zâwk a ni.

"A huaisen hlê a ni."

A aw chu a changin a hmêl pawh chu a rum èl àwl viau mai a, a thin chu a rim tak zet tih a lang reng mai. A nau chungchâng kan sawi a ni a, a nau angin sawi duh miah lo mah se amah hringtu ngei fahrin ve tho, a thisen zawmpui ngei a ni tho si. Ngeiawmin thinrimthlâk viau mah se a nau(Melody) bâk hi thisen zawmpui dang a neih loh hmèl a, inngeih takin țha takin awm thei se ka tihpui, a mal viau si a.

"Mahse, tunah chuan kan awm dùn tawh tho alawm, a thil sawi khân awmzia a nei tawh chuang lo va," tiin a bulah chuan ka va țhu hnai a, a bânah chuan ka va khawihsak a, ani erawh chuan nghet takin min lo kuah vat thung a.

"Ka chàn teuhzia che ngaihtuah hi chuan ka thin a rim lo thei lo a ni, chàn che ka tum lo êm zâwk a," a ti sup sup a, min kuah vang vang reng a, kei pawhin ka kuah lêt ve tho a. A hnu deuhah erawh chuan a mood thlâk nân tiin nui hak pah hian," Pathlawi zei tawh chin lo ni kher lo la chuan..." tiin fiamthuin ka han sawi a, ani lah chuan," I duh dàn leh i hma hun tùr ngaihtuahpui lo che ila chuan hmân hmânah khân ka insûm lo daih tawh ang," a lo ti zat a.

"Min duh tâwk loh vàngah ka lo ngai mai asin."

"I la hre tlêm êm a ni," a tih leh chuan," A, inla expert viau suh," tiin a hnung chu ka chumsak dat a, ani lah chuan," Inlâk expert vàng a ni lo, vawi khatna leh vawi 100 chuang lo ti tawh tân chuan thiam dàn a inang thei lo," a ti ve thung a, ka en hau nghe nghe. Ani lah chu a nui duh miah lo lehnghâl a, ka zak leh deuh si a, a bânah ka sik vak ringawt.

"Ka âwih êm êm lo," tiin ka hawi sawn daih a, a nui ta hawk a, min kuah lehin min pawm kãng nawlh a," Ka zirtîr leh châk tawh che a nia," a ti sup a, TV off lam pawh kan ngaihtuah tawh lo rêng rêng.

Mahse, nupa nun kan hmang dùn tawh lo. Vawi khat tisual tawh mah ila a sual a ni tih hre renga tih nawn leh kha ka duh tawh lo.

"Kan inneih vat a ngai a ni. Haw veleh hmaichhanah ngei i nu ngaihdam dîl leh pahin ka be leh ang a, a rang thei ang bera inneih min phalsak tùrin ka dîl ang. Nghah rei che ka duh tawh lo."

Kan khuaa haw chu ka hreh rualin haw thuai chu ka duh ve tho. Kan khaw mite chuan ka zinah an ngai thei mai ang a; mahse, ka nu ve thung chuan... hmuh ka hreh, ka thianghlimna ka vêng him zo ta si lo va. A chhuan êm êm a fanu hian a zahna ka thlen dâwn ta si, kohhran dàn thianghlim ngeia pasal neih ka tlin dâwn ta si lo va. 

Ka nu rilru chu ka tina ta ngei mai. A tilang chiam lo nain ka hre kar tho si a, hrehawm ka ti tak zet a ni. Palai hmêl kan hmu nghâl mai bawk a, kohhran dàn thianghlim tlin tawh loh rau rau chuan awlsam tak leh  a hma thei ang bera inneih kha Jakob-a duh dàn kha a ni a, chu chu ka nu pawhin țha a ti. Chhûngkua an han inrâwn khâwm ve a, room-ah ka awm nain an thil sawi chu ka hre vek tho a, ka putea nupui Pitei chuan," Tu mahin an chesual tawh tih an hre kher chuang nâng, Rêngpuii ni se a ruak lo nghâl tih lah kan hre hek lo, mite pawhin tlin lo chung chungin an chesual fê tawh ang tih kan rin hriatte thleng pawhin kohhran dàn an la ti hrâm hrâm zél a nia," a ti barh barh a.

Ka nu chuan," E khai, Pathian a zahawm lutuk!! Bâkah kohhran mipui pawh an zahawm lutuk tlat, a tih chi loh," a ti ve thung a, Pitei vêk chuan," Holam taka tirh liam ringawt chu a khawngaihthlâk ve alawm, a thuhrimah vawi khat chauh a ni lo'm ni an chêtsual?" a ti leh a, an thu sawi ka lo hre pha ve bawk sia, ka lo zak chem chem mai.

"Vawi khat leh vawi li vawi nga chêtsual kha Pathian mithmuhah chuan a inang reng, thil sual a ni tho tho, a lian leh a tê a awm chuang lo," ka nu chuan a ti leh a, Pitei lah chuan," A, vawi khat ringawt chu a sual nêp deuh alawm, Rêngpuii phei chu a fel si a, tlân koh ang leka an inneih buatsaih a nih leh si chuan kohhran mite'n an en dàn tùr han ngaihtuah ula, chu chu ka lo ngaihtuah alawm," a lo la ti țâlh a, ka nu lah a dinna ngaiah tho a lo la ding bawk a," Tlin loh na nâ nâ chuan tlin tâwkin tih mai tùr, sual tih zêp rûk hi a țha ngai lo, hai der lah a țha hek lo," a ti leh a, keimah avànga chutia an inhnial hriat chu hrehawm ka ti tak zet, ka insùm loh rah vek a ni. Min beisei sâng a, kei lah an beisei loh leh rin loh takin ka che si a, an rilru ka tihrehawm tih ka hre ve kar bawk si nèn, hmai a uang lo tak zet a ni.

Mami lah chuan," Pathlawi zei chin nge nge chuan a tlàwm ta che maw," tiin min rawn fiam a, nuih a za lutuk miah lo. Min fiam chhunzawm zêlin," A zei bawk a ni maw? Zei lo se i tlâwm lo tawp ang le," tiin a rawn nui leh kar kar a, kei chuan," I ninawm!" ka lo ti hlak a, mi mah hrehawm tih rûk ve nâklaiin. 

A hnu deuhah erawh chuan," Mi tih loh dàn a ni hleinem, inhmu sual viau duh suh,  dàn thianghlima inneih hi inneih reina pawh a ni chuang lo a nia, inneih dàn ai chuan inneih hnua nun dàn hi a pawimawh zâwk," a rawn ti leh thung a, min rawn hnemna a ni tih ka hre ve tho a, ka rilru hrehawmna erawh a tih kiam phah chuang lo.

Mi min sawi dàn chu râpthlâk tak a ni; mahse, chhetê mahin ka kâ ka âng lo, âng thei dinhmunah lah ka ding hek lo, an sawi theih dàn tùrin ka awm miau si a, ka awm dànin a zir lo tlat a ni. Ka nuin min hnèm ve bawk a, hrehawm ti viau mah ila ti lo angin ka awm lui ngar ngar a ni ber ang chu, kei hi chu ka luhlul ve thei tlat a, hetiang kawngah hi chuan. Mi min sawina hi chu mêna thlâk ka thiam lutuk tawh; mahse, hrehawm ka tihna ber chu thil ka tih sual vàng zâwk chu a ni, ka tih sual lah chu a hmingchhiatthlâk ber chi a la ni zui a.

Inbuatsaihna hun awm thei tawh hek lo le, Jakob-a'n engkim a ngaihtuah fel vek a, amahah chuan kan innghat tawp a nih ber chu, ka la ngaihtuah ngai hauh loh dàn chuan pasal chu ka nei ta rum rum a ni. Biak in hawng ngeia tih theih ni tawh hek lo le, Jakob-a'n Wedding hall a lo hauh lâwk diamah chuan kan innei ta a, an chei mawi bawk a, mi thiam tak tak chei a ni tih a hriat hliah hliah, pawisa pawh eng emaw chen chu sèn ral a ni ngei ang le. Chutiang pawh chu ni se, min sawi duh tân chuan sawina tùr kan la awm tho tih ka hria, inneih ropui lamah chuan a ropui lo chuang miah lo, a ropui lutuk ringawt; mahse, biak in hawng thei lo kan nihna tak chu a ni, zahthlâk zâwk chu.

Min lawmpuitute an țhahnem viau mai a, a thawhpuite leh a țhian hnai ve tak takte an lo tam phian a lo ni. Ka chhûngte Chêkàwn leh Dârlàwn lama mite pawh tel thei tùra ngaih chin chu an kim viau. Mami'n min dinpui a, Jakob-a cousin mah ni se ani bâk kawm tak tak ka nei si lo va, ka inthlahrung ta lo mai. 

Zotei leh Mama pawh an rawn phei a; mahse, inneihni tak tak chauh an awm hman a, zànah an phei lehnghâl a ni. A tûk lama Zotei'n a training-na lamah tih tùr pawimawh lutuk, class miss theih miah loh tùr a neih vàng a ni a, a zirna lama a tih chhiat dâwn ai chuan tiin chelh rih kan tum ngam ta lo a ni.

Zànah lah chuan Jakob-a țhiante'n party an ti a, Mami pawh a phûr phûrah a țang a, min làmtîr dâwrh dâwrh mai. Adonis-a a awm ve bawk nèn, kan hlim tlâng viauin ka hria, ei leh in lam ni se kan hnianghnãr a, beer ti zauh zauh an awm nain Jakob-a chuan a ti ve miah lo tih ka hria a, ka rilru a hlim veng veng mai, zu lam chi rêng rêng ka duh lohzia a hre tawh a, a insûm ve a ni ngei ang.

Lehkha thiam awm khâwm an ni bawk a, haw hun pawh an hre hlawm khawp mai. Inneih thilpêk min pêk țeuh tawh hnuah party an buatsaih leh a nia, an țhianpa tân chusn an insêng ve nasa hlawm viau ngei ang.

"I hlim em?"

Melh ralh pah chuan," Hlim lo ka tih chuan dâwt ka sawi dâwn sia, hlim ti mai ang," ka ti a, ka nui sak bawk a.

"I chau ngawt lo maw?"

"Hmm..chau ve țêp a ni," ka ti a, zêp ka tum lêm lo, ka làmna ka rawl maithei a ni. Dressing table hmaah chuan țhuin ka hmai ka phih fai tawhah chuan Mami min pêk night  cream chu ka hnawih malh malh a, ani erawh chu khum bula dingin min en reng thung a.

"I lâm nasa ka ti rêng a ni," a tih leh chuan," Min pawt tho zêl sia, hnial țûng kha a tih chi mang bawk si lo," ka lo ti ve thung a, ani chuan," I ti țha ka tiin fel ka ti khawp mai che; mahse, i chau viau ang tih kha ka lo hlau ber a, inneih zàna chêt nasat tum leh chauh chu a inrem dâwn hauh si lo,"  a ti leh duah a.

"I ti râpthlâk e!"

"Râpthlâk lo ve, a phùrawm lutuk tawh zâwk! Nupa kan ni tawh a, thil sual a ni tawh dâwn hleinem," a lo ti ve thung a, mipa a ni a, han sawi hreh deuh lah hi a nei map si lo, a rûkin ka zak leh ram ram ta a nih hi.

Rawn kal hnaiin ka hnungah chuan a rawn ding a," Vawiina inneihna hun kan hman lai ațang tawh khán zanina kan hun hman dàn tùr hi ka lo suangtuah daih tawh asin," ka kokia a kut rawn nghat pah chuan a ti a, dârthlalangah chuan kan lang chiang dùn bawk a, kan inen ràn mai.

"Chu, rilru bawlhhlawh i lo pu a ni maw?"

"Bawlhhlawh nâng, thil phùrawm lutuk a nih bâkah nupa dik tak kan nih zàn tùr a ni a, ruahmanna fel tak lo neih lâwk chu mi fing nihna a ni zâwk," tiin ka dàr chu a tuai neuh neuh a, a kut lum thar tharin min han deh tâkah chuan ka danglam țan.

"I fing mang e!"

Insiamremin min pawm kãng leh ta nawlh a, ka rãk țhat, a nghâwngah ka kuah nghâl a, khum lamah min pawm pheiin," Zanin chu ka nupui duh tak, muhìl hman lêk lovin ka siam dâwn che a nia, ka hrilh láwk che aw," a ti sup a, khumah chuan țhuin a mal chungah chuan min pawm leh a, rawn kûn hniam deuhin ka hmuiah chuan a rawn fâwp țan nghâl a.

*THIL I  THLÌR DÀN KAWNG I THLÂK DANGLAM CHIAH KHÂN CHU I THIL THLÌR PAWH CHU A  INTHLÂK DANGLAM VE ANG, THLÌR DÀN KAWNG KHAT CHAUHA THLÎR LOVIN I THLÌR DÀN KAWNG KHA I THLÂK VE ȚHÌN DÂWN NIA*