☆MIN EN LA☆ - 47 By Dingdi Pachuau

 ☆MIN EN LA☆ - 47 By Dingdi Pachuau

Hlauhthàwn tùr a awm tawh lo va, 

nupa dik tak kan nih tawh avàngin kan hma huna kan tih tùr hi kan tân sual a ni tawh hek lo. Ka ngaih a țha a; mahse, tìmna deuh pakhat chu ka la nei, chhûngril lamah nâ kha ka tuar leh ang tih ka hlau. A ni alawm, hun kan hman dun hmasak ber zàn khân ka la thianghlim a, min dìm hlê tho na khân min dìm zo vek thei bîk lo. Kan inmamawhna ka ti mai, kha kha a sângin kan inkâr kha a țang lutuk tawh a, dìm taka chêt zawh vek kha a har ve bawk a ni.

"Eng thil nge i ngaihtuah a?" 

"Nangmah." Hnai set sawtah kan inen a, kan infawh mawlh mawlh lai khân kan tih leh zêl tùr lam ka lo ngaihtuah thui leh deuh a lo ni.

"Engtiangin nge min ngaihtuah? Ka sexy viau em?" A dîlchhût leh mai mai asin. A àwm ve tho chu ka ti, kan thil tih laiah khân ka rilru ka lo pe tâwk lo ve êm mai si a.

"A takah i sexy daih zâwk!"

Ka chhànna chuan a ti hlim a ni ang chu, a nui suk a, a mitmenga min hmangaihna lang chhuak hian," Zanin hian i la hriat ngai rêng rêng loh nawmna tinrêng ka temtîr dâwn che a ni, min ring thei ang, a hma ang kha chu a ni tawh dâwn lo, hlauthãwng miah suh?" a ti ta sup sup a, a thil sawi chuan min ti zak lek lek a; mahse, zah ka duh bîk chiah tawh lo, nupa kan ni tawh a, zêp neih hnì hnè leh zah țît țêt neih a hun tawh lo, kan intihhlim tawn a pawimawh tawh a ni tih ka hria, chu vàng chuan chiang takin ka melh lêt kal a, a mitmengah chuan a thil sawi chu a ti tak tak a ni tih a lang reng bawk. 

"Khumlaizâwlah a pasal tân a nupui chu nawhchizuar ang a ni tùr a ni; mahse, nawhchizuar anga awm dàn tùr pawh ka hre chuang lo va," ka tih chuan a nui leh suk a, ka chala fawh zauh pah chuan," E, lungngai suh, ka zirtîrin ka kaihhruai dâwn che alawm, i zir rei dâwn hauh lo," a ti leh sup a, ka hmuiah chuan a rawn fâwp zui ta nghâl a, chutih rual chuan a kut pahnih chu muangchâng hian ka kawr chhûngah a rawn zen lût pah bawk a, ka mûr nghâl chuai chuai mai.

Mutkawr ka ha ve a, lace dum leh satin puan dum inpawlh a ni a, amahin a duh ber min leisak a ni ve nghe nghe. Ha tùrin min ti ve kha a ni a; mahse, ka kokia a bahna hrui sîn tê tê pahnih chu a tuai liam rang lutuk ringawt," A hnawk a nih hi," a la ti zui. Kan pahnih chauha awm e ti lo chuan a țawng zàwi sup mai a, chutih rual erawh chuan kan thaw erawh a ring viau lawi a.

Muangchângin min kaihruai zêl a, mi a kaihruai thiam hlê a, eng mah ka tih ve ngai lo angin sawi mah se che ve hauh lo chuan ka awm thei miah lo. A che vêl chu ka lo pui ve zêl a, a chét rualin ka lo che ve zêl a ni.

A nui suk nghe nghe a," I thiam rang viau, kaihhruai i ngai tawh miah lo," a ti leh sup a, min fakna vàng chuan a hmuiah duhthawh takin ka fawhsak nghe nghe a, ani pawh chuan min chhâng lêt zui zat a, duh tâwk chin nei lêk lo chuan kan inkeih mawlh mawlh a, min fâwp reng chung chuan a taksa awm dàn chu insiam remin min muttîr ta zân a. 

Êng kan ti thim lo nain zahna ka nei tawh chuang lo. Ka biang chu zahna vàng pawh ni chuang lo hian a sa ham ham a, ka hmui chu ka'n liak zauh bawk a. Ka dang a ro deuh halh tawh nain chhûngril lama nawrna nasa tak avàng chuan chét loh a har ka ti a, a âwm chu ka chùlsak ruai mai. Vài deuh riai hian ka melh chho a, ani pawh chuan ngaihtuah hmêl tak leh mitmeng hmangaihnaa khat hian min rawn melh chhuk ve a, chutah, ka hmuiah chuan rawn fâwp leh zauhin," Tunah aw," a ti sup a, inbeng thoin che thei tùr chuan a insiam rem zui ta nghâl a, chil ka lo lem dak ringawt.

A hnuah chuan nawmna tinrêng min tempuiin nupa nun dik tak kan chèn dùn a, ãm tak leh duhthawh takin kan chèn dùn a, zahna a awm tawh lo. A hnungah ka hamsak tàwn táwn a, a kâwngah ka kherh bet tlat bawk. Kan chêtna avàng chuan a lumin thàw a sa phung a, kan thlan chuap bawk; mahse, kan inthlah phal chuang lo.

"Round khatna," a ti chhuak sup a, ka lo nui hak thung. Ka âwmah a bei thlar a, duat takin keiin ka kuah bawk. Kan thâwk pawh a mumal ve țan tawh a, kan lungphu inchhàwn dut dut ri pawh a pângngai viau tawh e.

Chutianga rei fê kan awm hnu chuan," A hrehawm lo tiraw? Ka tina lo che tiraw?" a rawn ti chhuak ta sup a, keimah min ngaihtuahna thu bawk a rawn chhâk chhuak leh ta.

Tih natte chu khawi lamah! Nawmna tinrêng min pe a, hmangaihna min chenpui a, min dìm a, ka hma ngâi takin chét a la zêl bawk a nih kha.

"Hrehawm lo nasa!" uar zet hian ka ti phawt a, chutah," Ka pasal i nih vàngin ka lãwm e, nupa nun nuam tak leh hlimawm takin min chenpui vàngin ka lãwm bawk," ka ti leh a, a samah chuan ka fawhsak zauh a.

"Ka nupui i nih vàngin kei pawh ka lãwm," ti supin min rawn melh chho sawr sawr a, thaw halhin," Round hnihna hi kan țan leh tawh dâwn em niang?" a ti leh zat a.

"I chàu nange?!!"

Mak ti angreng tak chuan ka han zâwt hau a, a lo nui khùr dat thung," Round khatna chauh a la nih kha, a vawi khatna ațanga ka chauh mai te'n, pasal fit lo leh lâk tlâk loh deuh ka ni dâwn tihna a ni asin, chutiang ka ni teuh lo mai! Zanin chu nang pawhin chauh thu i sawi loh hrâm ka beisei, i sawi chuan naktûk zîng ațangin exer kan la dùn nghâl ang," a ti leh zui zat a , ka nui ve ringawt. Fiamthu mah ni se, inneihni tûk ațanga exer inlâktîr tum dâwn chu, a phùrawm viau loh ang le.

A tûk zînga exer kan lâk dun dàn chu ka rin loh lam daih a nia! Tlàn țawk țawk lam kha ka lo mitthla ve a nia, a lo ni hauh si lo. 

"Tihian zîng tin exer ka lâkpui ang che a, kan beih tlauh tlauh zawngin a hlawhtlinna kan hmu thuai bawkin ka ring," a hnua a tih chuan a nâkah ka sihsak zauh a, dèk lah chu a la haw êm êm zui a, a eu zawk mai a ni.

Chaw eia min sâwmtu an awm ve neuh neuh reng a, Aizâwla kan awm chhûng chuan kan inah pawh chaw kan ei hman mang lo deuhthaw a ni. Mamite inah phei chuan ruai tenau kan țheh a ni hawt mai a, heti ve mai ka nih laia țhian țha leh kan inneihna min lawmpui êm êmtute leh min duhsaktute heti khawpa ka nei țha hi vànnei ka inti ngawih ngawih, Pathian hnênah pawh làwmthu ka sawi lo thei lo. Ka nute pahnih erawh an awm rei theih loh avàngin an haw phei thuai a, Mercy school kal a ngai si a, chàm ve deuh duh mah se school chawlh reng kha a fuh chiah bîk lo a ni.

Hun kan hman chhoh zêl dàn chu nuam ka va ti tehlul êm! Ka hlim a, ka duhthusàm ramah ka chêng ni berin ka hria. Ka bulah ka duh leh ka hmangaih êm êm, ka pasal ni bawk zàn tin ka bulah a mu a, zîng tin ka harh veleh ka bulah a hmêl ka hmu ziah a, hlim tak leh duat takin hmangaihna min chenpui ziah bawk, hei aia nun duhthusàm hi a awm thei dâwn em ni?

Kan inneih hma khân Thênzâwlah, a nupui hlui ni ta Zonunite inah min hruai a, a pa nèn min inhmêlhriattîr thlap bawk. A nupui nu leh pate'n an lo duat dàn tùr leh an lo hmangaih dàn tùr chu rei lo tê ka awm chhûngin ka hre thiam nghâl ruak nghe nghe. A nupui ka nih tùr thu a hrilh laia a pa hlim hmêl leh mittui tling kuau mai ka hmuh phei kha chuan kei pawh ka lung a chhe lek lek hial a nih kha. Mal min sàwm a, lawmpuina thu min hrilh bawk a," Tunah chuan thlamuang takin, rilru dam takin ka awm ve thei tawh ang.  Bawihtei pawh a hlim tawh ngawt ang chu," a ti nghe nghe a, min lawmpui êm êm rualin a fanu, a duat êm êm a hre chhuak a ni tih a lang chiang si a, a khawngaihthlâk ka ti viau bawk.

Zonuni thlànah pawh kan kal a, a thlànlunga a thlalâkah chuan a hmêl chu a țha zualin ka hria. Hmêlah leh fel zâwngahte, khawsak phungah leh chhûngkaw dinhmun hrim hrimah pawh ka tluk hauh loh tùr a ni tih ka hria, ka rilruin Zonuni thlarau hnênah chuan Jakob-a ka theihtâwpa ka enkawl țhat tùr thu leh ka hmangaih tùr thu chu ka hrilh mawlh mawlh a.

Kan inneihnaah khân a pa kha a rawn tel ve thei ta lo va, a tar ve deuh tawh bákah Aizâwlah daih inneihna hun kan hmang si a, a tân chuan a harsa ve deuh tawh a ni, Muansangi (Melody) ni tùr àwm pawh ka hmu miah lo va, a rawn kal ve kha ka ring a nia. Jakob-a sawi dàn hmang kha chuan a sàwm tel loh ka ring sa a; mahse, kâwlhrâwng ve táwk tak a nih ka rin avàngin sàwm loh pawha a rawn tel ngam tho ka ring a nia, a rawn tel lo a ni ang e. A chanchin kan la sawi chhuak leh miah lo va, nakinah hun tháwlah ka zâwt leh chhin ang.

Aizâwla awm reng theih ni hek lo le, Lunglei lamah kan phei leh a, chumi hma chuan kan khuaah kan pêng haw phawt a, zàn khat chu kan riak nghe nghe. A hna a chawlhsan rei tawh si a, ka nuin zàn hnih emaw zàn thum emaw tal riak tùra min tih pawh chuan keimahin ka lo hnial a ni.

Lunglei kan phei zàn chuan Zotei leh Mâma chaw an rawn ei phei a, Jivan-a a lo awm sa bawk nèn, kan hlim nak nak viau mai, Jivan-a erawh kan bulah a awm tam lêm lo va, thil țûl a tih zawhah a room lamah a kal daih a. In lêng dang kan nei rih lo bawk a, kan unauho chuan kan titi nak nak a. Kan titi kârlakah Zotei chuan Jakob-a chu a fiam leh zauh zauh țhìn a," Pathianni hmasa ber ațangin inkhâwm a ngai tawh ang aw," a tih loh leh," Inkhâwm chu a hrehawm hleinem, Pathian thu sawi ngaihthlâka zài kha a ni mai a, mi thu sawi ngaihthlâk lah a hrehawm hran si loh, ka rawn sâwm ngei ngei ang che," a ti țhìn a, ani pawh chuan tih vak ngaihna a hre lo a ni ang, min enin a nui suk suk ringawt.

Office kal tùra chhuah chu a hreh ve ngar ngar khawp mai. A àwm ve tho ka ti, a chhan chu kan inneih ațang khân ni tin zàn tin kan inkalsan lo tluk a ni a, kan awm dùn reng a nih ber chu. Hun kan hmang dùn a, kan inawm a, khawiah emaw kal a ngai a nih pawhin kan chhuak dùn a, min hruai kual a, min chelh a, min hlatsan ngai lo, țûl fêah chuan kan chhuak ngai lo bawk.

"Chhùnah ka hman theih chuan rawn chawlh haw ka tum ang."

A kal ta chu ka thlîr zui vang vang a, kei pawh a kal tâk avàng chuan ka ruak huaiin ka hria! Chhùna lo haw a tum chuan a ei tùr lo siam a ngai ngei ang le, tunah chuan ka pasal a ni tawh a, hna thawka a chhuak a nih chuan ei leh inah ka duat viau a ngai, mi dang duattu pawh a neih loh hi, kei min nei tawh a, ka duat poh leh ani pawhin min duat ang a, kan nun chu a hlim zual dáwn a ni.

In chhúng chêt a phal lo viau nain ka ti lui ta tho, kan chènna a ni a, ka tih fel fai loha Jivan-a thawh ngawta innghah chu thil dik a ni lo, ka tum lo, duh pawh ka duh hek lo, eng mah tih tùr nei lova awm ngawt chu ka duh lo a ni.

In ka tihfel hnuah a pheikhawk ka tihfaisak vek a, siai hnawih ngai chu siai hnawihin ni sâah ka pho chhuak bawk a, chumi hnuah a thuamhnaw pawh ka en fel leh a, thuamhnaw dum lam hlîr mai a nei si a, kamis ni se a dum leh a uk lam, rawng thim chi hlîr mai a inkhai dul a, biak ina a hâk tùr kamis vâr lam leh rawng thianghlim lam leisak a ngai a ni. 

Chhùna a ei tùr chu ka siamsak sawk sawk a, a sawi angin a rawn haw ta chiah bawk. Chokaa ka la awm lai a ni a, hnung lam ațanga min rawn kuahin," Ka ngai hman viau tho che a nih chu," a ti sup a, che lo chuan nghet takin min kuah vang vang a.

"Mipa pà tak i nih kha."

A chala ka lu rawn tauh dat pah hian," Mipa pawh hian kan nupuite chu kan ngai thei tho alawm, pà lohna a nih pawh ka hre lo," ao ti ve leh thung a, ka nui sak a, ka ti ve mai mai a ni, min ngaih hian nuam ka ti daih zâwk!

"I chàwl rei hman lo palh ang, i ei tùr ka'n suahsak ang che, lo țhu la?"

Min thlah chu a la hreh ve deuh a ni ang," Kuah che hi ka la duh zâwk!" a ti ta mauh mai a, naupang chhia ti viau mah ila a chêt dàn hi ka duhin min tihlim viau zâwk si.

Inherin ka apron hák chu ka phelh tê tê a, chumi hnu chuan a nghâwngah ka bân pahniha kuahin," Ka'n duat hlak ang che," ka ti sap a, nui deuh sakin a hmuiah chuan ka fawhsak a, ka chêt dàn chuan a țhâwng deuh a ni maithei, min chhâng lét lawk lo va; mahse, hun rei erawh a ni lo thung.

Chutiang chuan office a kal ni chuan chhùnah a rawn haw ta ziah a, ei tùr siamsakin ka theihtâwpin ka lo duat a, a tâna inpe zo tak nupui nih ka duh a ni. Ka phù lohzia ka hria a, kan dinhmun leh khawsak pawh khaikhin chi a ni lo, chutiangin kan kum pawh kan inthlau viau tih ka hre tho; mahse, hmangaihna hian kum inthlau leh chhûngkaw khawsak dàn a lo thliar hauh lo mai a, kan țhat lohna lai ber pawh inhmuhsakin kan tlin lohna lai ber pawh inhmuhsak mah ila chúng chuan hnualsuatna min neihtîr lo va, kan hmangaihna leh duhna a tizual sauh em maw ni tih tùr zâwk a ni.

Mi min sawinaah pawh 'An kum a inthlau si, an dinhmun a inchen bawk si lo, an innei rei thei chuang lo ang' tih te a ri nawk a, a țhenin ' A mipa hi a awm theih vàngin a nei mai mai a nih hi, hetiang khawsak harsa hi a mipa hian a nei rei peih lo ang' min ti thùl, a țhenin 'Putar hausa leh nula sum ûm' min ti bawk a, sawi uar fâl deuh chuan 'Bâwngpui tar pawhin luang no a duh ve tho a, chutiang chiah chuan nula khawsak nuam duh pawhin tar hausa a hnar ngai lo' an lo ti ve bawk a, an sawi zawng zawng hi dik vek kher lo mah se ka chhâng lét duh lêm lo. An sawi hi dik tam tak chu a awm ve tho alawm, kan khawsak a nuam viau lêm lo va, hna thawh a ngai a, thawh loh chuan sum lût tùr awm hek lo le, kan thawh lohte chuan kan ngei mai dâwn asin. Jakob-a ve thung, sum lamah a buai lêm si lo va, chutah tlangvâl hnahkhat ni tawh lovin pathlawi a ni a, kum lamah ni se naupang zawk zawk a ni tawh hek lo, min sawi duh tân chuan kan kum inthlauhna ringawt pawh hi sawi tham a tling ngei ang chu!

Zàn khat kan mu chu," I ina ka awm laia mutkawr sen leh dum ka hmuh ve ziah kha, kha kha tu ta nge?" tiin ka zâwt ta chhin a, ani lah chuan," Chutiang a awm em ni?" a lo ti mai a, ka zawh fiah viau pawhin chutiang àwm a hriat loh thuin min chhâng tho.

"A nih leh, i mutna kha a mar țha thei viau sia, tunah lah hian mar chu sawi loh, a chuar thei ang berin a awm ni ta berin ka hria, khatih hun lai khân engtia mar țha thei viau nge a nih?" tiin ka záwt leh a, thinrima zâwt ka ni lo, amah pawhin a hre ngei ang. A khum kha a mar țha thei hlê a nih kha, tunah hi chuan khâng hun lai nèn khân a inthlâk hlawk a ni ber.

Ani chuan," Khâng lai kha chuan chuar chhan tùr a awm hleinem, tunah chuan ka bulah i mu tawh a, a mar hman tawh lo," a lo ti a, sawi zawm lehin," CRP mutna khum leh nupui nei lai mutna khum a inang thei ngai lo," a ti leh a, ka lo nui hak a.

Mahnia chetla țhang niin che fel viau mah se kan inneih hnu hian min nei ta viauin a ngaih a țha ta lutuk nge ni, a sùlhnu chhui tùr hi a awm ve ta fo a; mahse, ka sawisêl lo. Khati chen amahin a lo khawsa ve tawh a, tunah chuan rin tùr min nei tawh a, a inthlahdah ve thei tawh ni maiah ka ngai, bâkah, che fel thlap tùrin ka duh hran lo, hetia a chêt ve deuh niai hian mihring pângngai ve tak, mi dang rinchhan tùr neiah ka hmu a, min rinchhan ta viau ni maiah ka ngai a, ka läwm daih zâwk bawk, keiin hna ka nei lo, a sùlhnu chhuia tih fel ngai tih fel mai loh hi chu.

Inkhâwm lamah hma kan la sâwn hlei thei lo va, Pathianni tûkțhuan ei khamah hi chuan ka insiam rualin a insiam ve hluai a, motor-in kan kal a; mahse, biak in bulah hi chuan keimah chauhin ka chhuk leh țhìn. Ka nawr lui duh lo va, a hun takah chuan a inkhâwm ve mai ang tih rilru ka pu a, a hun a lo la thleng ve êm êm ang tih ka ring tlat bawk a, ka nawr ngai lo. Zú erawh a in ngai ta lo a ni ang, a in ka hmu tawh miah lo va, a țhiante'n chaw an rawn ei khâwm deuh pawhin an in tawh lo, a duh fâl deuhte'n an in zauh châng a awm a, chutih hunah pawh chuan ani chuan a in ngai tawh lo.

"I nupui i hlauh vàng a ni maw?" tia an fiam hian," Zu no hnih khat ai hian ka nupui hian hlimna min pe tam zâwk tih ka hria a, hlimna min petu hlim lohna thlen ai chuan a hlimna ka duh zâwk mai a ni!" a ti mai țhìn, a thil sawi hian min ti lãwm țhìn a, ka duhna a zualin ka hmangaihna a zual sawt țhìn bawk.

Mamite pawh nakkum lamah tih huk an tum ve tak tak ta. A bula ding atân min hauh hlur bâkah," Lo rai miah suh ang che, i la rai thei rih lo a nia," tiin min rawn vau láwk a, Jakob-a lah chuan," Chutiangah thu neihna i nei hauh lo, ràitîr tuma beih tlauh tlauh laia chutiangte lo sawi," a ti bul bul reng a, rai vatin fa nei vat ila tih a duh tih ka hria; mahse, duh ang ngawt chuan a lo rài theih bîk loh a lo nih hi.

Hun thâwlah kan khuaah ka nute kan tlawh zauh zauh a, Lunglei lamah Zoteite nèn kan intlawhpawh reng bawk a, Jakob-a'n nau ang tak takin a en thiam bawk a, ngainat pawh an ngaina, Zotei phei chuan ngaina tak a ni; mahse, a fel ve reuh a, a u pasal hi hausa viau mah se pawisa a dîl ngai hauh lo, Jakob-a'n mamawh a neih leh neih loh a zawh châng pawh hian mamawh a neih loh thuin a chhâng ziah a; mahse, Jakob-a hian," I u ka ni a, i mamawh apiang chu min dîl rawh, i sawi hreh chuan i u angin min en lo tihna a ni ang," a ti hial țhìn a, chuti chung chung pawh chuan mamawh a neih pawhin a sawi ngai lo, Mâma hlawh hi kham an tum tlat a ni.

"I zir chhuah veleh i hna tùr kan ngaihtuah ang, hmêl hriat țha ka nei ve nual alawm," a tih châng te hian Zotei chu a nui mai a," Hmêl hriat țha zárah ni lovin mahni thiamna hmang ngeiin hna zawngin kan tling ve ang chu maw le," tiin fiamthu ti tak deuh hian a chhâng țhìn a, Jakob-a pawh hian a en zui vang vang țhìn, a chhàn lét țhin dàn chu puitling a tih thu min hrilh ve sup sup fo.

"Kumin Krismas chu khawiah nge kan hman ang?" tia min zawh chuan," Khawiah nge hman i duh ber?" tiin ka zâwt lêt a, ani chuan," Ka zâwt hmasa che," a lo ti tlat a, kei chuan," I duhna hmun apiang a ni mai, i kiangah chuan khawiah pawh hmang mah ila pawi ka ti lo,"  tiin ka chhâng ta daih a.

Kan inneih khân a hnà vàngin chawlh rei tak a nei thei si lo va, 'Honeymoon kan hmang thei si lo va' tiin Krismas hun thâwlah chuan Goa lamah kan thlâwk thla ta daih a, ka la kal ngai lohna a ni a, kan kal lah ka lo ring chiah lo bawk nèn, ka rin aiin nuam ka ti daih mai. Ani chu a lo kal tawh țhìn a, hmêl hriat pawh a nei nghe nghe. Kan chhuak vâk tam lo, kan thlenna hotel khum nuam zet han thawhsan chu kan huphurh țhìn a ni ang ka ti mai.

"Hetah hian kan inhmangaihna chi nung kha lo awm tawh se..." tiin ka dul chu a kutzungțang chuan a chûl kual zai zai a, khumah kan mu mai mai a, a vei lam kiu khuma nghatin a inbeng kãng a, lehlamin ka dul a chûl a nih chu.

"Thu kan nei lo êm a ni. A nih, fa kan neih hunah mipa nge ni se i duh ang hmeichhia?"

Rang zet hian," A hmasa berah mipa ni se, a dangah chuan ka hre mai lo, unau erawh panga tal ni se," a lo ti vat a, a duhthusàm a sawi ve a ni.

"Panga lai maw?!  Ka puar mawlh mawlh reng dâwn tihna a ni maw?" tiin ka nui hak hak a, ani lah chuan," Panga chauh a nih chu, panga chu a tam hleinem," a lo ti leh mai a.

Kan ngawih leh vang vang hnu chuan," A țhenin fa kan duh êm êm laiin a țhenin duh lovin an lo ti tla bawk a, mihring hi kan lo inang lo hlawm teh tak e, theihtâwpa uara kan tih leh position hrang hranga kan try chung pawhin kan la hlawhtling thei rih lo a nia," a ti leh sup sup a," I va sawi ho tak!" tiin ka nuih a, ani lah chuan," Ho hleinem, kan fa ngei ka hmu châk tawh alawm, i rai hunah chuan tuna i dul thêp zaih hi a rawn lian chho ang a, a hmuhnawm dâwn bâkah i lang sexy zual dáwn êm asin," a lo ti leh a, ka dul chu a chûl leh riak riak a.

"Raipuar hi an lang sexy thlâwt lo aw," ka lo ti ve thung a, ka mitthlaah ka han indah raipuar chhin a, ka chhe pèr pùr viau dâwn tih ka hria a ni.

"Ka mitah hi chuan i sexy reng tho nain i dul rawn lian chho tùr leh i âwmbáwr rawn lian chho tùr ka mitthla hian i lang sexy ngawih ngawih a ni. Chuan, zanin chu round thum tal aw, kan uar deuh loh chuan mi fate aiin kan fate an naupang palh ang."

*TIHSUAL PALH LEH TLÛK PALH HLAU SUH, HRINGNUNAH HIAN TIHSUAL PALH LEH TLÛK PALH CHÂNG AWM LO CHUAN HLAWHTLINNA A AWM THEI LO A NIA, NAUSÊN PAWH KAL A ZIR CHHOH CHUAN TLÛK CHÂNG A NEI ȚHÌN, MIHRING HI INZIR CHHO ZÊL TÙRA DUAN KAN NI A, KAN INZIR CHHOHNAAH HIAN TIHSUAL PALH LEH TLÛK PALH CHÂNG A AWM VE TÙR A NI*