☆MIN EN LA☆ - 48 By Dingdi Pachuau

 ☆MIN EN LA☆ - 48 By Dingdi Pachuau

Krismas chawlh chu ãm takin kan hmang a, kan hma hun tùr kan hre si lo va, kan dam a nih chuan nakin lawkah Pathian zârah nau ka pai thei a nih ngai chuan kan pahnih chauh hian kan kal tawh lo maithei a, kal pawh kan kal thei tawh rih lo maithei, hun ãwl a nei thei tawh kher lo ang, chu vàng chuan mi dang chîm buai loh leh hun thâwl kan neih lai hian ãm taka hun hman dun kan duh a ni.

Hmun hrang hrangah min kalpui a, ani zawng khawpui a lo tlawh zau deuh tawh bawk nèn, a mikhual lovin a buai chhin eih ngai lo. Thil a ti fel zung zung mai a, a kutah ka innghat fihlîm vek a ni mai. Min duat a, ka tân sum a ren si lo, mawi ka tih zâwng apiang a hlah lo va, ka mamawh lêm loh thlengin min lei a tum zêl mai si a, bazàr pawh ka hreh zo vek.

Kum thar lam erawh chu kan khuaa hman a rawt thung a, ka hnial hauh lo, min ngaihtuah vànga kan khuaa hman rawt a nih ngei ka ring, ka chhûngte thil tùr ni se kan hawnsak nual bawk sia, pêk nghâl a remchâng dâwn êm mai. 

Aizâwl ațanga kan phei lam chuan," I lung a lèn ka rin deuh vàng a nia, i naute leh i nute bula hman ka tih," a ti chhuak sup a, kei chuan," I bula ka awm te chuan lêng nâng aw," nui sak chung hian ka lo ti vat a, a kut veilam chu ka vawnsak pah a. Lo vuan lét pah hian," Chiah maw? Ka va âwih chiah lo êm!" a lo ti thung a, a nui suk bawk a.

"Eng nge i âwih loh?"

Meng sawr sawr pah hian,"24 tlai zet kha chuh--" a sawi zawh hma chuan," A...kha kha chu sawi chhuak miah suh!" ka lo ti chûl a, a nui ta hawk hawk mai. A lam hawia inher deuhin," Kha kha chu tu bulah mah sawi chhuak miah suh aw, ka zak a nia, ka lunglèn êm êm vàng pawh a ni chuang lo nain," ka ti leh sawk sawk a.

"Ka ka i hup dâwn chuan a man i pêk a ngai dâwn asin," nui duh miah lova a tih chuan a kut chu ka hmer nghet salh a," A mak!!! 'Man pêk' ti kher lo la, sum ka neih lohzia lah i hre vek a," ka lo ti hlak a, ani lah chuan," A man tihah khân sum lam kher ka phût lo mai ang, zaninah round 3, a tâwk thei mai ang," a ti ve leh sup a.

Ka chek hlak a, ani erawh chu a nui sûng thung. Ka melh râm râm a, ka thinrim tak tak vàng erawh a ni chuang hauh lo. Ni 24 tlai lama ka lunglêng ka țah vàng vek a nia, tlai ni tla tùr khân ka lung kha a tilêng tlat mai a, ka insûm hman lo va, ani hian min rawn hmuin min rawn kuah ta vat a, kei lah kha ka'n țap uar sauh a, a naupan chhiatthlâk ka ti hnuhnawh a, ka han ngaihtuah lêt hian ka zak thar ta tù tú a ni.

Kan khua kan han thleng a, chhúngkua dam taka kan han inhmu khâwm leh nak nak chu boruak a nuam viau a ni. Thil thar kan hawnsak vek bawk si a, hlim pawh an hlim hle, an hlim hmêl hmuh chu nuam ka ti tak zet a ni. An kiangah kum thar kan hmang dâwn tih kan hrilh láwk hauh lo va, Mercy'n," U, haw leh rih lovin kum thar hetah hmang ula? I awm loh chuan khua a har duh lutuk! Ânu nèn chauh kan awm tawh sia, in lo zin khât bawk si, awm ve reng rih rawh u," a tih chuan Jakob-a chuan," Hetah kum thar kan hmang dâwn alawm, Mercy," a lo ti vat a, Mercy chuan Jakob-a en hau pah chuan," A ni maw?!! Tak tak a ni em?!!" a ti ta chùl a, a meng phâwk nasa mai, kei chuan," Tak tak ni e, U Kob-a office kai țan hma chu kan awm rih ang," ka lo ti ve a, Mercy hlim chu a kúk deuh rãih rãih a, mi dang pawh chu an lo nui sâng hlawm a.

"Yesss... nuam dâwn lutuk! U Kob, in awm chhúngin khawiah emaw i motor-in picnic ang u aw, Bialite pawh an chhûngkuain an picnic a, ei tùr tam tâwk kengin, ka châk ve a nia! Thla pawh an la țeuh, min entîr a, kan kal châk ve hlawm a nia aw..." a ti barh barh a, Jakob-a chuan," E, i châk phawt chuan kan picnic ve ngei ngei ang, picnic-na hmun tùr, han kal châkna deuhte i nei tawh em?" a lo ti ve vat a, muang fân deuh raiha," A, kan khua ni loah hi chuan ka châk vek a ni mai! Kan khua hi chu a common tawh lutuk a," Mercy'n a tih chuan kan inen kual a, kan nui hak hak hlawm a.

Mâma chuan," Kan khua a nuam ber alawm, picnic-na tùr hmun lah a tam a," a lo ti a, a nui duh miah lo va, Mercy chuan," A... kan khua chu.. Mâma chu i sual e!!! Hmun dangah ka kal ve châk alawm! Kan khuate chu kan awm reng reng a, han picnic-na tùr hmun pawh a awm loh hi maw," lungawi lo, nûr deuh nûng chung chuan a ti a, a lungawi loh hmel tak zet a ni. Ka nu chuan," Ni e, a duhna berah kan picnic ang, inah min awmpui char char a, hna ka thawh hlànin school bànah tih tùr țûl a lo thawk vek zêl a, a fel asin, a duhna ber hmunah chauh kan kal ang," tiin Mercy chu a lo pui ve a, chutia ka nuin amah țan záwnga țawngkam a cheh veleh chuan Mercy pawh chuan hlim hmêl a pu leh thei nghâl a, a nui leh sûng mai.

31 zàn chuan kan inah chuan ár kan kang ve a, ka pute chhûng nèn kan ri ve laih laih a. Chhûngkaw kima hman kan duh avàngin ka pu pawh putea'n a rawn paw thla a, naupang zualin an lo nuih nasa mai. Ka nuin Pathian hnênah làwmthu sawiin a țawngțai a, țhenrual țha ngah viau lo mah ila kan hlim tlâng ve dar dar viau, mi dang kan ngai bîk miah lo.

Kan meng rei vak lo, naktûk lamah Kum thar a rawn inher chhuak ang a, inkhâwm kan duh dâwn si a, zàn men rei chuan zîng thawh a har duh ém mai.

Mutnaah chuan khua a vawh avàngin ka kâwnga min kuahin a mal rit zet chuan min kherh bet chual a, ka pum la thêp zaih chu a chûl leh zauh zauh bawk a.

"Nakinah chuan lian takin a la puar ve àwm si a," a ti sup a, kei chuan," A nghahhlelhawm pawh ka ti lo, a hahthlâk dâwn êm mai," ka lo ti thung a, ani chuan," Chutin ti mah ta che, puar thuai thuai la tih laia chutianga i tihte chuan, kan fate'n mi fate an tiat thei nâng," a ti leh a.

Thil ka ngaihtuah chhuak thut a, a beng vâwt thlar khalhsak neuh neuh pah chuan," Thil ka zâwt mai mai ang che aw," ka han ti a, " Yes, min han zâwt la?" a lo ti ve sup a. Kan țawng ring lo va, mi dang pawh an mu ve tawh tho nain an la muhìl bîk lo ang, kan țawng an hriat kher ka duh loh avàng chuan ka țawng ring duh lo va, ani phei hi chu a țawng hi a ring tehchiam lo hrim hrim a, a thûm deuh bul bul zâwk a, a awki hi a sâng ngai lo tluk a ni.

"Ih, thil mai mai a ni tak tak," ka ti leh tê tê a, ka beng fawh zauh pah chuan," Umm...thil tak tak pawh min zâwt thei ang," a ti ve thung a. 

"Polite-i kha, i bialnu hlui a ni tiraw?"

"Tu Polite-i maw?!!"

Ka țawng sual vàng chuan ka hmui ka pet zauh a, Makimi kha Polite-i tia hming ka phuahsak a ni a, ani hian a hre ve tawp nâng maw le.

"Makimi kha, i bialnu hlui a ni tiraw? In inkârah khân thil awm chu a awm chiang a ni tiraw?" ka ti leh a, a bialnu ni lo anga a sawi ve ziah kha chu tûn thleng hian ka la âwih hlei thei lo, mut pawh an mu dùn nghe nghe lo maw kha.

"Ka bialnu hlui a ni lo." 

A mak, a la țang ve țàng țáng nia! 'A ni' pawh ti se tunah chuan ka pasal a ni tawh a, engah mah ka ngai tawh dâwn chuang lo asin le.

"A va mak țàng țàng tak! Mut pawh in mut dun reng kha aw, engah nge i zêp tlat a ? Ka thinrim dâwn chuang hleinem," ka ti a, a beng chu na vak lo hian ka sihsak a.

"A naaaaa...!!"

"Ka âwih chiam chiam lo êm mai a... Dâwt i sawi leh chuan kha aia nâ khân ka sik leh ang," ka han ti a, ani lah chuan," Ka bialnu ni hek lo, ka bula a mut vàng maiin ka bialnu a ni tihna lah a ni hek lo. Han sik leh vaih teh, kei pawhin seh tùr ka nei ve tho," tiin, ka beng chu a hmui chuan a rawn tawk lum thar thar a, ka bengkâwm sîr tê chu a rawn seh nghâl zauh bawk a.

"Nghal suh!" ka ti țhat a, ka phut deuh zawk avàng chuan a beng chu ka sik vak nghe nghe. Ani erawh a insûm thei nasa, nâ pawh a ti ve lo a ni ang, a rûm nghut ve miah lo. Kei chu a zâ ka tih bâkah a thîp zek ka ti a, a ha a lo zum viau a ni tih ka lo hre ngai miah lo.

"I bialnu hlui a ni tho tho," ka ti leh țâlh a, ani lah chuan," Nang hi a nih hi luhlul an tih chu, ka bialnu chu nangmah hi i ni, ka nupui i ni bawk," a ti nghut nghut a, min kherh bet nghet sauhin min kuah ngheh sauh bâkah a kut chu ka kawr chhûngah a rawn zen lût zui nghâl a, ka thaw nghâl hak mai.

A tûk zîngah chuan ka rin aia hmain kan tho a, min kai tho ve a ni mah, a inthlahrung deuh a nih ka ring a; mahse, amah zâwk chuan," Kum thar a ni si a, hma deuh hleka thawh a țha ngai," a ti mai a, thawh loh ka han tum zet a nia; mahse, ka thawh ve loh chu a rem ti teuh lo mai.

"Nupa kan ni tawh a, pumkhat kan ni tawh, pakhat thawha pakhat mut theih a ni lo," a ti tlat a, kan pahnihin minute 10 vêl chu kawngpuiah kan han tlãn a, tlàn pawh kan tlãn chak lo; mahse, ka lo ti thei vak lo niin, ka hah chu ka thaw hluam hluam mai a, a hnuah chuan tlän lovin kan kal ta ringawt nghe nghe.

"Zîngah rei lo tê tê chu kal tawh țhìn ila a țhat dâwn hi, i hrisèlna atân a țha ngei bawk ang. Naute i pai hunah phei chuan i hrisèl a ngai zual dáwn a nia," a ti sauh sauh a, hna ka thawh nasat lai kha chuan ka hah ngai lo ka ti ve țhìn kha a nia, tunah chuan ka lo hah thei nasa a lo nih hi.

"Ka va nêp tak, nêp min ti àwm mang e?"

Ka kut chu rawn vuanin," Nêp lo ve, nêp ka ti hauh lo che, ka khawngaih zâwk che asin. A chhan chu i naute chàwm nân hna hahthlâk i thawk țawk țawk a, hna hahthlâk thawh leh exer laa tlàn hi a inhmeh lo êm a ni, kei hi i hna thawh țhin ang kha thawk ve ta ila ka hah hma ngawt ang, i nêp lo, nêp inti ngai hauh suh," a ti sup sup a, ka en chho hauh lo nain min en pah reng tih ka hria.

Kum thar tûk a ni a, inkhâwm tùrin ka sâwm leh a, min chhâng lêm hlei lo va; mahse, inkhâwm tùra ka insiam zo, room ațanga ka chhuah chuan mak ti takin ka en reng a! A lo nui suk a, nuih lét ve nachâng pawh ka hre lo, mit pawh khap lovin a nia ka en ni.

Kamis vâr, a taksa rem zaiha țhui hi a lo ha a, a nghâwng erawh a chilh phui vek lo, a kekawr hâk chu a dum dak thlarh a, a inhmeh tak zet tih bâk sawi ngaihna ka hre lo, a smart viau a; mahse, eng emaw ti zâwng tak chuan mi sualpa chhe lo deuh, inlâk fel tum taka inthuam nalh deuh hi ka tehkhin deuh bawk, a kawrkilh chu kilh kim vek se chuan a lang smart viau ang tih ka hria; mahse, tuna a hâk dàn hian a inhmeh viau tho bawk si, amah hliah hliah bîk.

"U, U Kob-a hian kamis vâr hi a inhmeh tiraw? Thuamhnaw dum chauh a inhmeh emaw ka lo ti țhìn a, a nih lohzia ka hmu chiang khawp mai," Zotei chuan a lo ti var a, chutia a tih tâkah chuan ka harh chhuak deuh kâwk a," Inhmeh lutuk!" tiin ka nuih sak a, ka kutzungpui ka ti pir vah bawk a.

Ka en ning lo. Thuamhnaw rawng thim lam hlîr inbel țhìn a ni a, tukin chu a dang tlat a, bâkah, inkhâwm tùrin a insiam ve bawk sia, min tihlim satliah lo, chhûngrilah ka hlim veng veng a ni ber. Ka kaah pawh rawn zen se tu mah ka seh hauh lo ang, inkhâwm chhûng pawh chuan ka nui vur vur reng lo chauh a ni. Kum thar tûk niin inkhâwm kan tam a, kan țhu dùn thei hlauh a, ka kutah a vuan deuh reng a, a thla a ngam vak lo pawh a ni maithei, thu sawi lam pawh chu a ngaihtuah vak pawhin ka hre lo, a hawi chhuak mang tlat lo; mahse, ka lãwm êm êm a ni, a inkhâwm ve tawh a, step khatin hma kan sâwn tawh tho tho.

Fel ka ti a, min ti lãwm bawk. Inkhâwm bàna miin min be paha min chibai lâwp lâwp laite chuan hrehawm a ti ang tih ka hlau a, ka en ru leh zauh zauh țhìn. Miin an biak chuan țha takin a chhâng ve mai a; mahse, nuam chu a ti vak lo tih ka hre ru thung. A inkhâwm ngai lo va, a thlá a la ngam lo tih ka hria, ka la tih rehsak ngei ang, a rei deuh ang a, a la reh êm êm ang.

Tlaiah ruai kan țheh a, ka chhûngte bula kan awm vàng nge, eng mah sawi lovin ruai chu kan țheh a, a duh loh thu pawh a sawi chhuak lo. A sawisêl ngam lo pawh a ni mahna; chu pawh chu lo ni se min ti lãwm tâwk a, ka hlim hliah hliah, zànah pawh chuan a duh tihlawhtlingin a che hmasaah ka țang a, mak a ti tih pawh ka hria; mahse, mak a ti rei lo thung.

Mercy duhna tihpuitlinsakin kan chhûngkua chuan kan picnic ta a, a duhna hmun takah kan kalpui a, hlim pawh a hlim khawp mai. A han titi siam siam a," U Kob-a hi ka țhiante chuan 'i pu tùr' an ti a, a chhan ka zawh chuan 'a upa tawh alawm' an tia, pu chu ka nei tawh reng a, pa ka neih loh avàngin pa atân ka duh deuh zâwk mah a," a han ti mai chuh, kan nui phuh țhawt vek a ni. A sawitunu ber lah chu a'n hawi ã mai mai khawp a, a ngaihna a hre lo tak zet tih a hmêl ațang chuan a hriat theih vek.

"Bawihte, i u pasal chu i u ve tùr alawm, 'U Kob' tia i koh khân a dik chiah," ka nuin a lo ti a, ani lah chuan," Pu kha chu ka tum lo sa hrim hrim, u erawh kha chu ka inthlahrung deuh a, kan innaupan hleih sia," a lo ti leh a, la nui sûng chung hian Jakob-a chu ka en a, a lo zak deuh a ni maithei, a zak ve tih ka hmuh vawi khatna a ni chiang.

*HMÊL PAWISAWI LO TAKAH PAWH HIAN A LAN DÀN ANG LO TAKA CHHÛNG RIL KIL KHATA KAWLH RÛKNA RIAU A AWM FO A NI*