☆MIN EN LA☆ - 49 (LAST) By Dingdi Pachuau

 ☆MIN EN LA☆- 49 By Dingdi Pachuau

Nilêngin pâwnah hun kan hmang a, ei leh in tùr kan hnianghnar viau bawk a, a nuam ve phian. Zotei leh Mercy phei chuan nuam hi an han ti khawp a, thla an la a, an in-pose reng mai ni berin ka hria. Mercy ka phone ka hmantîr a, nuam a tihzia leh a hlimzia hmuh chuan picnic kan remti ta pawh chu inchhìrawm loh tak a ni. Ei tùr a ei apiangin a u Kob-a fakna a chhâk chhuak ziah a, in tùr lam ni se a duhthusàma tam a awm bawk si," Ka țhiante hmuh ve atân ka ît," a'n ti ngei a," U Kob-a hi Au Rêngpuii pasal a ni lo ang tih ka hlauthãwng ta khawp mai, ka duh zâwng a hriain pawisa a ngah bawk si, U Adina ai khân țha ka ti daih záwk bawk," a tih phei chuan Jakob-a pawh a inhmuam ûp thei tawh bîk lo, vawiin chu Vitamin A-Z kan ei reng a ni ber mai. 

Zanriah chu hotel nuam pãngngai takah kan ei a, Jakob-a'n a lo hrilh lâwk sa vek bawk a, kan puar han han hlawm teh e. Mercy lehpek chuan kan sa ei bãngte chu enin," Ka ui e, Nu, fûn haw mai ang u, a la tam si, inah chuan kan hmeh leh har  dâwn a nia," a han ti làng láng mai a! Zotei chu a lo zak ve deuh a," Hei, a zahthlâk, an fûn haw ngai lo," tiin phun deuh sap hian a'n khap leh rih bawk a, ani lah chuan," A tui sia, ka ui alawm, kan ei hnu a nia, tu mahin an ei duh tawh lo ang, ka fûn hlek dâwn tho tho, inah ei ve miah suh ang che," a la ti tlat tho a, vawiin zet zawng kan pui hem hem thlâwt e, kan hlim a, kan nui nasain ni chhinchhiah tlâk tak zawng a ni ngei mai.

Zàn dár 9 rîk hma hretin in kan thleng a, Mercy phei chu motor-ah a muhìl nghe nghe. Vawiin khân a hlim êm mai a, a tlãn kual nasa bawk nèn, a chàu ngang a ni ang.

Kan khuaah chuan January ni 6 thleng kan châm a, ni 7-ah kan haw ta a, Thênzâwlah zàn khat kan riak leh a, ka pa( a nupui hlui pa mah ni se pa ka neih tawh loh vàngin ka pa ve tawp, ani erawh chuan a 'pu' thung) pawh a lo dam țha a, min hmu chu a lo hlim khawp mai. Rei tak awm tak ni hek lo le, a tûkah Lunglei lam panin kan chhuak leh ta a, Krismas chawlh hmangin Jivan-a a haw ve tlat mai a, kan pahnih chauhin Quarter lian pui chu kan luah ta rih a ni.

Khum phah chuar tingtawm zet ka siam țhat lai chuan," Adina nèn chuan engtia thui nge in lo kal rêng rêng a?" a kawr ha țha mawlh mawlh pah chuan a ti sup a, ka thil tih lai chàwl meuhin ka en vat a, min en ve lo chuan kekawr lum chu a ha zui leh nghâl a.

"Engtia thui mah kan kal lo, a rawn lêng ve țhìn a, chu zawng chu."

Min en chuang lo chuan," Tlangvâl țhalai a ni ang maw?" a ti leh sup a, a țawngkam chhuakah chuan lungawi lohna a awm lêm lo va, a sawi chhuak ve mai mai a ni ang, kei pawhin Polite-i chanchin ka zawh ve tho kha.

"Ni lo ve, pathlawi a nia," ka ti phawt a, nui chung hian," Tlangvâl țhalai ka hmu zo ve lo, pathlawi lamah hian ka tla na deuh zâwk a nih ka ring," ka tih zawm leh a, chutia ka chhàn tâkah chuan min rawn en ve ta chiah a.

"Pathlawi chu, tlangvâl țhalai ai chuan kan țha lo zâwk niin i hria tihna a ni em?"

Ka kut lo vaiin," Ni lo, teuh lo mai! An zei duh zâwk an tia, tak tak a ni tih pawh ka hre chiang khawp mai," ka lo ti chûl a, ka rin loh deuh hian a nui vei suk a.

"Min chhàn dàn tùr hi chu i hre ve ngawt mai!"

Ka nui leh a," A ni tak tak alawm, an zei ka tih vàng erawh chuan mi dangin min hnìmhnai ve e ka tihna erawh a ni lo, min hnìmhnaitu ber hi a zei ve êm a ni, a zùnah uaiin ka tãl chhuak thei ta lo rêng a," ka ti leh a, min rawn en vang vang phawt a, chutah, rawn hnaiin," Tak tak maw?" tih leh ka kâwnga rawn kuah a rual nghâl a, khumah chuan min tlûkpui leh nghâl a, khum lah a dûp nuam bawk a, kan sawt ting al al mai.

"Hei, khum ka phah mar lai lai a! Hetiang chuan a chuar leh vek dâwn asin!" ka ti chùl a, ani lah chuan," Ho mai mai, chuar lo khân ka dah rei êm asin, kan hlimna a nih phawt chuan nî tin zàn tin chuar nuai reng mai rawh se," a lo ti sup sup thung a, a hmuiin ka hmui a rawn sîktîr leh tawh avàng chuan ka țawng zui tawh lo.

Office a kai hma chuan inah kan pahnih chauhin kan awm bawk a, kan free-in tih tùr awm hek lo, khua a la váwt bawk nèn, khumah kan inawm reng hi a ni mai, a sawi ang tak takin a mar hman thlâwt lo.

A hnua ka hriat leh dànin Polite-i khân pasal a lo ûm daih tawh niin, Jakob-a kha a ngaizâwng viau țhìn  a; mahse, Jakob-a ber hian țhian ena a en tlat avàng leh ngaihzâwng ena a en theih loh avàngin an inkârah boruak eng fang mah a awm thei lo ni àwm a ni, a hmeichhia lahin eng mah a sawisêl ngam lo va, a lènchilh reng tho a, a chângin a riak ve tho bawk a; mahse, khum khatah erawh an mu dùn ngai lo, vawi khat erawh chu an mu dùn a; mahse, nupa nun erawh a chenpui chuang lo. A nupui boral ta a hre chhuak zêl a, a thei ngang lo țhìn ni àwm a ni.

"Zonuni tih loha ka hmeichhe duh awmchhun i ni a, chhuah che ka tum ngai lo. Ka nupui i nih theih nân theihtâwp ka chhuah rêng bawk a, zàn hun kan hman dun hmasak ber khân Zonuni hre chhuak hauh lovin ka awm a, ka damdawi țha ber i ni tih ka hre chiang hle bawk. Ani kha ka hmangaih a, ka hmangaih reng bawk ang; mahse, a awm tawh lo va, ka hmangaih theih tùrin nang hi a rawn tîr che a ni. Ka rilru, taksa leh thlarau zawng zawngin ka hmangaih che a, ka khawngaih bawk che a, ka dam chhûng hian ka phatsan ngai lo ang che tih pawh ka hria a ni."

Jivan-a a rawn thleng chho a, ani pawh Office lam an țan leh tawh bawk a, chhùn lam chu khua a har țan leh ta. Chu vàng tak chuan khawhar hnèmah, hun khawhral nân tiin a laptop chu ka khawihsak ve țhìn a, games ka khelh loh chângin thlalâk ka en bawk a, thlalâk lah chu a ngah khawp mai a, a thu ziak țha tak tak leh mawi tak tak, Zonuni a ziah chhan ni àwm tak takte pawh chu ka chhiar fo bawk. A hun laia a awm dàn tùr leh hun a hman chhoh dàn tùr te ka suangtuahsak a, ka khawngaihin a châng phei chuan a thu ziak chuan ka mittui a ti tla fo réng a ni.

Mi vànnei ka ni a, pasal fel tak, min hmangaiha ka kum zât leh ka dinhmun thlîr hauh lotu ka nei a, zirna leh chhûngkaw khawsak dinhmunah phei chuan a țhiante zîngah pawh zahpuiawm tak tùr ka ni ngei mai; mahse, min zahpui loh bâkah min duhin min hmangaih ngawih ngawih niin ka hria a, a tân nupui țha tak leh a țhian țha tak nih chhoh ka tum a ni.

Mami'n rai a phal loh thu a sawi vàng kha nge ni, ka la rai thei miah lo va, Jakob-a'n fa a awhzia lah ka hre ve reng si a, hrehawm tih rûk deuh vang vang châng ka nei ta fo, keimah chauha ka awm chânga ka inngaihtuah châng hian a ni zual; mahse, hemi chungchângah kher hi chuan thu kan neih lohzia ka ngaihtuah chhuak leh țhìn a, chu chuan ka inhnèm leh fo bawk, thla thum thla li érh âwrh chauh la inneiin kum khat êm pawh kan la innei tling lo a nia, fa nei thei lo leh hlawhchhama inngaih ngawt chu a la hun lo deuh ka ti țhìn bawk.

Ka hrisêl viau a, damloh hi ka nei mang ngai lo, tûn hnai chhoah ngat phei hi chuan nachhâwkna damdawi hi ka hmawm àwm ka hre lo, period dâwna tai na țhêm țhûm ka neih bâk hi nâ ka nei ngai meuh lo.

Mahse, tlai khat chu ka lu ka su tlai deuh hlek a, ka ti ro har deuh bawk nèn, zàna ka han mu chu ka hnár lehlam hi a ping deuh tlatin ka hria a, ka sam ka sûk tlai vàng chu a nih ka ring nghâl mai bawk. A tûkah pawh chuan zîng danga ka thawh aia tlaiah ka harh a, ka lu chu a rit deuh lûkin ka hre mai ka ti; mahse, ka sawi chhuak chuang lo va, tui lum inin nimbu tui leh khawizu nèn ka chawhpawlh a, chu chuan min ti zia deuhin ka ring a ni.

Nilêng chuan nuam lo deuh ser serin ka awm ta reng a; mahse, in ti felin insûk ngai pawh chu ka insu tho a, chhùna Jakob-a a rawn haw hman dâwn loh avàngin chhùn ei tùr pawh chu ka siam peih lo. Tlaia a rawn haw erawh chuan țha takin nawm lohna nei lo ang chiahin ka lo làwm a; mahse, ka mitmeng a lang phelh deuh a ni mahna, ka țhat leh țhat loh min zâwt vat a.

Zëp theih pawh a ni lo, zàn lamah phei chuan ka hnár pingin ka khua a sik ta hial mai a, min buaipuiin a vir buai ta zak zak mai. A hmel hriat doctor phone-in ka awm dàn chu a hrilh a, damdawi ei tùrte a záwt pah bawk a, zàn mah ni se damdawi leiin a tlän chhuak leh a, keimah vàngin, ka fîmkhur tâwk loh vàngin a buai tak zet a ni.

Inentîr țha a tih thu a sawi a, kei erawh chuan hritláng vàng mai maia inentîr a ngaih loh thu ka hrilh ve thung a, damdawi ni se a lei vek tawh a, ka ei ve dâwn țan chauh a ni si a, inentîrin damdawi dang min lo chawh vak ka ring bawk si lo, bâkah, hritlâng satliah a nia, a reh leh vat tùrah ka ngai.

Nawmsam loh lai laiin a hna vàngin min zinsan daih dáwn zui. A hreh ve khawp mai a, dam țhat loh laia min kalsan chu a duh lo a ni, kal loh mai a duh thu a sawi chuan," Ni lo ve, hnà vàngin alawm i zin dâwn, ngaihtuah ka ngai miah lo, hritlâng satliah mai mai a nia, i lo haw hunah meuh chuan ka lo dam var tawh ang,"  ka ti a.

Zotei leh Mâma min awmpui tùrin a be sa thlap a, a zin chhûng chu kan ina awm rih tùrin a hrilh a ni. Ngai ka ti lêm lo va; mahse, a ngaih tih țhat nân ka hnial duh lêm lo thung, min ngaihtuah si a, chuta kâra a thil tih lo sawisèlsak chu ka duh lo a ni.

Min kalsan chu a hreh ve thlâwt tih ka hria, kum 40 deuhthaw a ni tawh a, min kuah a, ka âwmah a hmai a phûm a, a lung a lêng lâwk a ni. A kum ngaihtuah chuan a awm dàn hi a nuihzatthlâk alawm; mahse, ka nuihzat phal teuh lo, min ngai a, min thlahlel a, tunah phei chuan ka nuamsam lo nèn, min ngaihtuah zual tih ka hria a, ka khawngaih ru hial zâwk a ni.

Ka nuin ka nuamsam lo tih chu Zotei hnên ațangin a lo hre ve a, ka awm dàn min rawn zâwt a, hritlâng satliah mah ni ila inentîr ngei țha a tih thu min rawn hrilh mauh mai. Kan tân inentîr a har lo va, khaw danga zin ngai lovin hmunpuiah kan awmchilh a ni zâwk si a tia min rawn hrilh chuan ni thei viau chu ka ti ve a, kár a hlâ a, min ngaihtuah ve bawk si nèn, a ngaih tih țhat nân a thu ang chuan inentîr ngei kan tum thu chu ka hrilh ve ta a.

Jakob-a pawhin a hun âwlah min rawn be reng reng a, a rawn sawi ve ziah chu eng mah lo thawk lo tùr leh lo mu mai mai tùrin min rawn chah ziah, damdawi chu a hun taka ei țha tùrin min rawn hrilh reng bawk. Amah ngaihtuah lo tùrin min han hrilh ve bawk a; mahse, ka pasal a ni a, ka ngaihtuah lo thei bîk nâng.

Ka result chuan min țhâwng tak zet a ni. A țha lamin a nia ka tih ni, ka nu khân inentîr tùr khân min rawn hrilh lo se chuan tunah pawh hian ka ruak lo chho mêk a ni tih pawh ka hre tawp nâng, a va màwl theih bawk ve aw!!! Thla hmasa khân thla chawhma lamah ka period a, tûn thla hi, thla chawhnu lam kan hmang mék a, ka la period hauh lo tih pawh ka lo ngaihtuah lo, ka hriltlàn vànga ka damdawi eiin min nghawngah ka lo ngai ve mai a nia.

Ka damdawi ei ve hlek khân thil a lo la khawih pawi hman lo hlauh a, a tihzia khawp mai. Ka hlimzia hi, tunah chuan Jakob-a duh leh awh êm êm thil a thleng ve dâwn ta, a hriat hunah chuan a va hlim dâwn tak! Hrilh nghâl vat chu ka tum deuh ut ut a; mahse, a lo haw huna surprise ka duh ta zâwk a, chumi hma chuan hrilh lo tùrin ka insûm hrâm hrâm a ni. Ka nute pawh ka la hrilh ngam lo, Jakob-a'n hre hmasa ber se ka duh si a, an hriat hunah chuan an phûr hlawm ngawt ang chu, an lãwm ve dâwn êm asin. Chu zawng zawng ai chuan, Jakob-a'n a hriat hunah a va lãwm dâwn tak êm!

Zotei takngial pawh ka hrilh lo, ka inentîrna chanchin min zawh pawh chuan ka rai thu chu ka hrilh chuang lo va, damdawi min chawh thuin ka chhâng mai. Thil ka ei țhat theih loh kha ka hritlâng damlo ka tui lo-ah ka lo ngai mai kha a nia, tunah chuan a chiang ta viau mai. Ei luih erawh ka tum chuang lo, ka luak a chhuak tlat.

Jakob-a lo haw huna lo surprise dàn tùr chu ka ngaihtuah kual a, ka bangbo viau mai; mahse, tih ngei ka duh bawk si.

Ni 5 zet a zin bo hnu chuan a rawn haw ta ngei a, a rawn thlen hun tùr zawng zawng leh a rawn thlen chin a rawn sawi zêl a, ei châk ka neih leh neih lohte min rawn zâwt pah zêl bawk a. Ngaihtuah hi chu min ngaihtuah chiang alawm, tunah hian a fa ka pai mêk a ni tih han hre ngat phei se chuan...

A rawn thleng a, garage-a motor a dah luh hma chuan páwna ka lo hmuak chu min rawn panin min rawn kuah vang vang phawt a, ka samah chuan a hmai a phûm a. Zotei'n," A va mak ngawih ngawih ve! In lo inngai tawh àwm mang e, ni 5 chauh a ni lo'm ni in inhmuh loh? Kum 5 vêl zet inhmu tawh lo ang mai in ni," nui chunga a tih tâkah chuan kan inthlah ve ta deuh a, Jakob-a'n," Pasal i neih hunah i hre thiam ve chauh ang," tia a chhàn chuan ka nui hak a.

A thuamhnawte chu Jivan-a'n a khai lût a, khai ka tum ve pawhin a phal hauh lo," I chau ang, i la damkawr si," a ti tlat a, a la tlai chhiat loh avàngin Zotei'n in tùr lo a siamsak vat a, chawhmeh leh eng ilo a rawn lei haw pawh fridge-ah a dah lût nghâl mawlh mawlh a.

"Room-ah i thil tùr ka dah a, i duh ngawt ang."

Min rawn en chhukin," Eng thil maw?" a ti sup a, ka kut chu a tuai pah neuh neuh a, kei chuan," I duh dáwn lutuk tih ka hria a," ka lo ti leh a," Va lût hmasa teh, ka rawn zui lût ve nghâl ang che," ka ti zui leh zat a. Fridge lam panin a thil rawn hawn chu ka han thlêk kual a, room-ah lûtin ka thil pêk kha hmu se ka duh a ni.

Room-a luh veleha chhiar theih tùrin dârthlalangah 'Pa i ni dâwn' tih ka ziak a, ka dul thlalâk bel telin balloon ham puar sa pakhat leh rose par pakhat ka bel tel bawk. A hre thiam vat ngei ang chu.

Ka va luh phei hmain a rawn tek chhuak hman! Phâwk zeta min enin," I rai maw?!! Naute i pai tawh maw?!! Tunah khân i rai mêk maw?! Lalpa leh! Ka âwih thei lo! A làwmawm lutuk! Ka ring ngam lo asin, ka va lãwm tak! Pa ka ni dâwn!" a ti nawk nawk mai a, min rawn kuah a, min pawm kãng a, min thlah leh a, min pawm leh a, awm ngaihna a hre lo a ni ber mai, a hlim hmêl leh mitmeng chu a hmuh a nuam tak zet.

"Pa ka ni dáwn!" tiin a au leh vak a, Zotei a rawn tlãn phei, Jivan-a pawh chuti bawk. Chutia a au ta chiam mai chu hriat thiam harsa ve deuh tùr chu a ni, hlauthãwnga rawn tlãn an ni ve ve; mahse, thil awmzia chu a lo hrilh zung zung a, Zotei pawh chuan mak a tiin, a hlim hmêl leh mitmeng, mittui parawl kiang ațang chuan a lãwm ve tak zet tih a lang reng mai.

A chhûng leh țhiante a hrilh kual vek a, ka nute pawh ka hrilh hman hmain Zotei'n a hrilh a, kan hlim hlawm êm vàng chu nge ni, zanriah pawh chu ka ei tam ve riauin ka hria, Jakob-a lah chu a ka pawh zen ila min seh lo ang tih tùr khawpin a hlim a, a nui suk suk reng mai. 

"Hetiang a nih chuan Carolene-ite inneihnaah pawh i dinpui thei lo ang, motor chuan a tih chi dâwn hauh loh, kawng a thuiin a sawt dáwn si," a ti chho țan ta a, Mamite inneihte chu April thla tàwp daih a la nia, chutih hunah chuan ka zia tawh ang a, indim over pawh a ngai tawh bîk nâng, motor chuan pawh a theih tawh ang; mahse, hnial zâsng chuan țawng ka cheh duh rih lo.

Eng thil mah ka tih a phal lo. Ei tùr ka siam pawh a phal ta lo va, amah zâwkin ka ei theih tùr leh ka tâna țha tùr nia a hriat chu min siamsak zung zung a, a chezia rêng rêng mai chu a zãngin a tha a tho tak zet tih a hriat, duat theihna zawng zawngah min duat ti ila a dik ber bawk ang.

Mami lah chuan," Kan inneih hunah i la puar viau dâwn chuang lo va, mi dang ka ngaihtuah dâwn lo a nia. In pa lah khân ' A dinpui thei chein ka ring lo, nau a pai tawh a, hunserh chhûng ringawt a dinpui che pawhin a chau palh ang a, a chauh chuan nautein a tuar ngei dâwn, mi dang zawng mai rawh' a rawn ti leh ngawt a, mi nupuite pawh an rai ve tho, khatiang êm êma fîmkhur over kha ka la hre lo, leh lutuk mai!" a rawn ti khar khar a, ka nuih liam vêl mai mai tawp.

"Naute, ka duat, âpa țawng hi i hria tiraw? Aw ka va hmu châk tawh che êm! Lo lian thuai thuai la, lo chhuah tum thuai la, ânu tihrehawm zâwng chuan awm lo hrâm rawh aw," tiin mutnaah hian ka dul chûl hauh hauh pah chuan a be mawlh mawlh zan tin a, a chângin," Rimawi ngaithla rawh se," a ti thùl, phone a play a, chu chu ka dul nghèng chuan a dah a, a chângin," Țha takin lo piang rawh aw, khawvêlah ka duat ber ang che, ânu nèn," a ti bawk a, a châng chuan hetia a bia, a'n thluaithlum kual vêl hian ka nuih a tiza thei tawp bawk.

Mamite inneihnaah chuan ka dinpuj ve chiang alawm. Motor-a thui tak chuan a phal loh vàngin helicopter-in kan phei a, Aizâwl khaw chhûngah pawh a motor khalh loah chuan ka chuan a phal lo," Mi dang chuan an khalh sawt ang a, naute tân leh nangma tân a țha lo ang," a ti tlat.

Kan haw phei leh hnuah Biak ina kan inkhâwm țumin Nunhlimate nupa kan hmu nawlh mai a, anni pawhin min rawn hmu ve nghâl. Nunhlima a hmuh veleh ka kutah nghet zet hian min vuan tehrêng a nih chu, Nunhlimate nèn chuan kan inbe bawk sia, ka kut chu a hmer na lek lek hial a ni.

"Kha pa ka hmuh kha chuan ka thin hi a la rim țûn ziah."

A va zia lo țhìn tak! Ka bialpa hlui a nih vàngin tunah a nupui ni tawh mah ila a chhûngril lamah thîkna a la nei a ni ngei ang.

"Chutiang rilru put a ngai lo, i inti hrehawm mai mai, ka bialpa hlui mai a ni tawh a, inhre ve ta nafam chu inhmuh châng chuan inbiak châng te chu a awm lo thei nâng. Ka biak avàngin kan inngaizâwng leh ta tihna lah a ni hek lo, nupui pasal nei ve ve tawh kan ni. Nang chu ka pasal ka dam chhûnga ka vawn tùr i ni a, i dinhmun hi a derthãwng ngai hauh lo ang," tiin a nghâwngah chuan ka kuah a.

"I bialpa hlui a ni tih ka ngaihtuah chhuah apiangin ka dik lo ziah țhìn hi tihngaihna la hre bîk lo. Amah vànga tawnga nei thei che ka ni tih pawh ka hria; mahse, ani tluka thîk hi ka nei chuang lo," a ti leh sup sup a.

Zanriah kan kîl laiin Muansángi'n min rawn call leh tlat mai! Biak ka duh lo va, Jakob-a bulah hlauh phei chuan ka duh lo zual, a unaunu a ni a, an inkâr lah ka hre vek tawh bawk si.

"Tu nge a?"

Ka phone chu hmet tàwpin," A, tu vak ni lo ve," ka ti mai a, kan sîrah chuan phone chu ka dah a; mahse, a rawn ri chhunzawm lehnghâl vat a, Jakob-a chuan," Khawi maw," tih leh phone ban chu a rual a, Muansangi hming a hmuh chuan a insehruh nasa mai.

"A la rawn be ngam che a ni maw? Ka lo vau na tâwk lo a ni ngei ang," a ti nghut nghut a, phone chu hmet tàwpin," A duh ber sum tam tham tak, a chan tùra ka pêk chin chu ka pe vek tawh! A la vek tawh, a rawn be buai tùr che a ni lo, inkungkaihna lah kan nei hek lo, mi duhãm leh mi sual tak hi chu hnimhnaih duh miah loh tùr," a ti leh nghut nghut a, Phone chu a hmet pah mawlh mawlh a, Muansangi number chu a block pawh a ni mahna!

"Amah hi i hria tiraw? Hmâna he ina i awm laia vìntu che leh hmusit deuhtu che kha a nih kha, a pian chhuahnain a zir a, mi sual chuan mi sual vêk a rawn hring chhuak lo thei lo," a ti leh bawrh bawrh a.

"I thinrim țawngkam kha nautein a lo hriat hlauh chuan..."

Inthiam lo hmêl rawn pu vatin," Ka tih palh, naute, âpa hi min hre thiam lawk mai aw, ka thin a rim thut a nih kha, mi fel tak rawn nih i tum dâwn nia," tiin min rawn țhut hnaih a, ka dul chu a rawn dap ruk ruk a.

Zàn mutnaah chuan duat taka ka hmai chûlin," Min en teh le, min en la, ka mitmengah hian eng nge i hmuh chiah? I rin dik phawt chuan naktûkah ei tùr tui 'cial' tak ka siam ang che," a ti sup sup a, a mita ka han en chuan ani pawh chuan min lo en reng tawh a.

"Min mamawhna ka hmu, a dik chiang!"

A țhen sak a," Nang tluka min hre chiang hi chu an awm tawh kher lo ang maw le. Ni e, ka mamawh che, ka mamawh tawh tak zet che a ni," zêp nei chuang lo chuan a ti leh sup sup a. Ni e, a insûm rei tawh êm asin, min mamawh hi a àwm ngawih ngawih.

Kan hmaah eng nge lo thleng dáwn ka hre lo; mahse, pasal min hmangaiha min ngaihsak êm êmtu ka nei a, ka kiangah a awm a, kei pawhin ka hmangaih a, Pathian zárah tluang tak leh fel takin fate kan nei chho ve thei tùrah ngai ila, a bul berah Pathian hi dah pawimawh ila, thil kan lo tih sual leh humsual kan lo dai tawhte leh nunhlui țha lo kan lo neihte pawh hre reng lovin kan tún hun atân zêl hian nung ila tih hi ka ngaihtuah ve fo. Jakob-a ka hmangaihna leh min hmangaihna hi a ropui a, chutiangin ka chhûngte min hmangaihna pawh. He lei dam chhûngah hi chuan kan hmuh theih kan nu leh pa leh chhûngte hi hmangaih thiam ila, lei hi vàn ramah kan chantîr thei reng a lo ni. Kan tlin lohna leh fel lohnate inhmuh kânsakin kan țhatna hi inhmuh lensak ta záwk ila, nun ho pawh a nuam ngei ang. 

Jakob-a pawh tunah chuan biak inah pawh a ngampa ve deuh tawh a, ka țawngțai pawhin a lo inhup vat tawh țhìn. Țawngțai pawh hi la ti lêm lo mah se a heti reng bîk lo ang tih hi ka beisei tlat a, engkim ti thei Pathianin a hmangaihin a hnên pan tùrin a duh tih hi a la hrilh ngei ka beisei tlat a ni.

A TÀWP TA

*MI DANG LAKA I RINAWM ÊM AVÀNG KHÂN MI DANG KHA NANGMAH ANG TÙRAH NGAI VEK CHUANG SUH, I RIN ANG LEH BEISEI ANGA AN AWM LOH KHÂN ANMAHNI NI LOVIN NANGMAH BAWK KHA A NIA HREHAWM TI TÙR CHU*

THANK YOU ALL, MIN ȚAWIÀWMNA ZAWNG ZAWNGAH LÀWMTHU KA SAWI TAKMEUH, REGULAR LO CHUNG CHUNG PAWHIN MIN LO CHHIARSAK HRÂM HRÂM A, KA LÃWM A NI TAWP MAI, LO DAMIN LO HIM ULA, INHMUH LEH THUAI KAN TUM DÁWN U NIA