☆KA BEISEINA☆ - 10 By Dingdi Pachuau

☆KA BEISEINA☆ - 10 By Dingdi Pachuau

"Customer an reh lai tak a ni bawk a,  mi dangho saw khawngaihin i va hrilh mai dâwn em ni ang?" a rawn tih leh chuan ka inthing harh zawk a," Aw le," tiin ka kal sawn nghâl a, Didikite chu ka va hrilh kual a, a neitunu hnêna lêt lehin," An nat loh hrâm ka beisei. Kalpui i ngai em?" ka han ti a, Pu Hruaia chu ka ngaihtuah rauh rauh a, engtin nge a awm mêk ang? Hliam a tuar nasa ang em? Nichina an inbiak dànah kha chuan nasa viau chu a nih loh hmèl a; mahse, puitling chuan thu an khuh ziah alawm, mi tih chî-ài an duh lo ţhìn a.

"Ka lãwm e, ngai lo tùrah ngai ang," tiin min nuih sak a, kei erawh chuan Pu Hruaia chanchin hriat chian ka duh ëm vàng chuan," Inthlahrunna tùr a awm hauh lo a nia," ka ti leh hrâm a, polite over min ti maithei a ni; mahse, a pawi lo, ka kalpui duh se ka ti zâwk daih tho, a u chanchin ka hriat chian phah thei dâwn asin.

A rilru buaina chu tih lan tum lo viau mah se a chî-ãi ve chiang tih ka hre tho, kei, mi hrang daih pawh ka rilru a buai a nia, ani phei chu a u ngawih ngawih a ni a, an nupain an la ni zui, chî-ãi viau pawh ni se a àwm ngawih ngawih zâwk a ni.

Haw kawngah chuan ka rilruin ka țawngțai mawlh mawlh a, Pu Hruaia tân a bîk takin ka dìlsak a, a nupui pawh ka dìlsak tel tho. In ka thlen hnuah pawh ka ngaihtuah zui zêl a, hliam na tak a tawrh loh hrâm ka beisei takmeuh, chutiangin a nupui pawh; mahse, ka han ngaihtuah chiang a, Kolasib ațanga heta an rawn inphur a nih chuan hliam na tak an tuar a ni thei mai lo'ng maw? An na viau a ni ngei ang, ka rilru a va hrehawm tak; mahse, chutianga țha lo tak lam chu ni lo hrâm se ka duh bawk si, kawng lakah chesualin Aizawl an hnaih zâwk avànga rawn inphur thleng ta pawh an lo ni thei tho bawk. A, hliam na tak tuar lul suh se.

Joshua ka lo theihnghilh vang vang a nih chu! Ka phone a rawn rîka a hming ka hmuh chuan ka hre chhuak  leh chiah! Bialnu lâk tlâk loh tak chu ka lo ni, a chanchin zâwta be hmasa zâwk tùr ka nih tehlul nèn, amah pawhin min phût ru viau ngei ang le.

Inthing harhin hlim thei ang berin ka bia a, a chanchin chu ka zâwt nghâl mawlh mawlh, ka biak hmasak loh avàng chuan ngaihdam ka dîl zui bawk a. Ani erawh chuan ngaihdam ka ngaih loh thu leh min hriat thiam thu sawiin an zin chhan ber a u natna chanchin pawh chu min hrilh ve nghâl mawlh mawlh a.

A u hi lung țha lo a ni a, zai ngai niin AMRI Hospital, Kolkatta-ah an zai dâwn a ni. Hmeichhiain kalpui tùra ka ngaih laiin nurse pakhat hire-in Joshua a awm bawk a, ani hi a hman ber a, a u nupuiin awmpui dâwn ta se, ani raipuar pùng mai niin awmpui ngai ve tho a ni a, a nau neih a lo hnai chho ve tawh bawk nèn, Joshua chungah a tla lo thei ta lo a ni.

Kan inbiak zawh chuan Joshua u tân leh Pu Hruaiate nupa tãn Pathian hnênah ka țawngțai a, ka nu pangpâr siam pawh ka pui peih lo. Tlangvâl inlêng ka nei ngai lo bawk a,  hma takah khum ka pan a, muthilh erawh ka thei rih lo.

A tûkah dàwr chu a hun takah hawn a ni tho a, dàwr thlen veleh chuan ka hriat châk êm avàngin zah pawh dâwn zo lo chuan pi ber hnênah a ute chanchin chu ka zâwt ta rãwih mai a, ani chuan damdawi ina an awm ve ve thu leh hliam serious tak an neih loh thu chu min hrilh ve mai a, ka thaw deuh huai a; mahse, a hmêla zàmna lo lang vàng chuan ka ngaih erawh a țha viau lo thung. A phone a rawn ri a," Min lo hre thiam lawk aw," tiin a chhâng a, nghah reng thu awm hek lo, min dàwrtu an rawn kal ta țak țak bawk nèn, kei pawh chu ka kal sawn ta nghâl a.

WhatsApp news group-ah Pu Hruaiate nupa chêtsual chungchâng chu an rawn  ziak ta chuai chuai a, an chêtsual chhan chu motor lian pakhat brake fail nèn an intai palh a ni awm e. An car chu a chhe khawp mai a, motor lian erawh chu a chhe ve mang lo. An ziah dàn chuan motor lian khaltupa chuan hrehawm a ti lutuk a, police-ah a inpe tawp ni àwm tak a ni.

Chhùn chawlh laiin Pu Hruaiate chanchin chu Didiki chuan a sawi chhuak a, pi ber rilru hrehawm dàn tùr chu sawi sap sapin a ute nupa ngaihtuah ngai chunga dàwr nghah loh theih loh bawk si avànga a rilru buai dàn tur chu min hrilh sap sap a. An chhûngkaw chanchin pawh chu min hrilh pah a.

"Dàwr hi chu khãr mai se--"

Ka hnunga ben thap pah chuan," A tih chi nãng! Kan dàwr lunzia hi ngaihtuah la, dàwr luah man leh a thawktute hlawh man tùr nèn, a khãr a nih hlauh chuan a hloh duai dâwn tihna a ni dâwn asin, ni khat chu sawi loh, nimin tlai hma deuh taka kan khàr pawh khân sîng têl chu a hloh ang tih tih chhût ve la, dàwr luah man hi a to viau a nia," a ti leh sar sar a.

Ka ngaihtuah a, anni ang hausa tân chuan sîng hloh tih mai mai chu a ho àwm êm mai, a ute chu a ngaihtuah tak tak a nih chuan dàwr hi khãr kher lo pawhin a ute enkawl tùr chuan nurse fel tak hire mai se tih te chu ka ngaihtuah kai a, ka ngaihtuah ang hi ngaihtuah ve se ka va ti tak! Didiki sawi anga an chhûngkaw ințhen darh lai, a naute hmeichhe pahnih hmun hranga an awm lai a nih bawk si chuan nurse chhawr mai chu an tihmâkmawh a ni, an lo ti tawh maithei bawk a, an lo chhawr tawh a nih leh a țha a ni mai a, hmuh erawh ka châk, an chanchin dik tak hre tùrin.

Rilruah Joshua ka ngaihtuah rual rualin Pu Hruaiate nupain min delh rit viau bawk a, Joshua chu hliam tuar a ni lo bawk a, a u nunna ni se hlauhthàwnawm a ni hran lo bawk a, anni chu ka ngaihtuah dàn a dang, Pu Hruaia mawlh mai hian min tihrehawm.

"Anne, lo kal lawk mai teh."

Ka pan phei vat a, kan bâng țêp tawh a, eng atâna min ko nge ni ang aw ka ti rilru nauh nauh a, a bul ka thlen chuan," Eng thil nge ni ta?" ka han ti a, ani chuan ngun zeta min lo en ràn pah hian,"Naktûk ațangin hna dangah min pui lawk thei ang em?" a lo ti a. Mit khap lo chuan ka en lêt ve kal a, mak ka ti rilru deuh a, eng hna tak chu ni ang maw? Hna hrehawm leh hahthlâk deuh hi a lo ni mai ang em? A nih loh pawhin mi duh loh zâwng leh sawrkâr duh loh zâwng lo ni ta se...

"Ka inthlahrung deuh viau nain nang tih loh chu han sawm mai tùr ka hre lo va, bâkah, min puih chuan tuna i hlawh aia tam hi i hlawh ang, thil hrehawm tak a nih loh pawh ka beisei," pi berin a tih leh chuan,"Eng hna nge ka hre hmasa thei ang em? Puih i ngaih chuan ka hnial hauh lo a nia, thil țha lo lam a nih ngawt loh chuan," ka lo ti ve thung a.

A nui deuh sak a," Thil țha lo lam chu ni lo ve. Ih, thil harsa pawh a ni lo tùrah ngai ila. Englo a nia, damdawi in lama ka ute ei tùr min pêksak tùrin ka ngèn duh che a ni, kan inah an ei tùr i lam ang a, chu chu damdawi ina va dah a ni mai; mahse, an ei chhûng i nghâk ve thung ang, an ei zawha an eina ruak chu kan ina rawn dah lêt leh kha a ni mai a, thil harsa tak a ni lo ang tiraw? Kei lah hi min hmuh ang hian ka hman lo nasa mai bawk si a, ka awm loh chuan dàwr hi a buai vek a ni mai. Khawngaihin, chu chu min tihsak hrâm mai ta che," tiin min ngèn ta a nih chu.

Ka vànnei lutuk chu mak ka ti zâwk! Chhàn nghâl mai nachâng pawh hre lo chuan ka en reng ringawt a, a ute nupa, an chanchin ka hriat châk êm êmte ka hmu thei dâwn a nih chu, a va mak dâwn êm! Ka phùrzia mai chu, ni e, phûr lutuk anga lan chu a fuh ber lo ang, ka rilru chhûngril hi hre na se zawng...

"Min pui thei hrâm ang tiraw? Kan in leh damdawi in inkâr fare tùr lam kha chu ngaihtuah a ngai lo, mi dang zawn buai ai chuan ka hriat sa i ni a, min puih theih ka ring bawk a," a ti leh sap sap a, kei chuan," Lungngai suh, ka tih theih a awm phawt chuan ka hreh hauh lo a nia; mahse, engkim min hrilh fiah vek erawh ka ngai thung ang," ka lo ti ve thung a, thawveng huai ni àwm tak hian a han thaw huai a," Ka lãwm e, ka lãwm tak zet a ni. Chhûngkua kan tlèm lai tak ni lo se chuan ka tihbuai kher che pawh hi a ngai lo tùr a nia," a ti leh a.

An in awmna ka hria a, an awmna damdawiin ka hre bawk. Thil harsa a ni êm lo ang chu maw, Pu Hruaiate ka hmu thei tùr chu ka phûr a, kawng lehlamah erawh chuan ka huphurh tho bawk a; mahse, dàwra awm ai chuan ka châk tho tho.

Didiki hnênah ka hna tùr chu ka hrilh ve a, naktûk ațangin dàwrah  ka kal dâwn si lo va, ka hrilh loh chuan a lo hawihài viau ang tih ka hlau a ni. Ani pawh chuan," A hrehawm lo ang, dàwra thawh ai chuan bàn pawh i bâng hma thei dâwn a, a zia phian ang," a lo ti ve a, a thil sawi chuan ka ngaih a ti țha deuh sawt mai.

Joshua erawh ka hrilh lêm lo, ka nu leh Bawiha erawh a hrilh loh theih loh a, ka nu chuan," Chutianga i puih theih tùr thu i hrilh chu a țha e, i hlawh erawh a pêk belh che a ngai hauh lo, pêk che a tum hunah pawh la miah suh, mihring chu ințanpui tawn ngai vek alawm kan nih, kan theihna zâwnah hi chuan mi țanpui hi hreh loh tùr, țanpui ngaite țanpui hi a Pathian thu êm êm bawk a ni," a ti dap dap a.

A tûk ațang chuan dàwra kal lovin pi berte inah chuan ka kal ve ta thung a, pa ber a lo awm a, min lo be hlut mai. An awmpuinuin damdawi ina ka ken tur chu a lo siam fel mawlh mawlh a, a siam zawh veleh a thil siam keng chuan ka chhuak nghâl a, taxi emaw bus emawa chuan erawh ka tum lêm lo.

Pu Hruaia ka hmu chiah chu, ka keh chhe vek lo chauh a ni. A lu an lo tuam bûr a, a mit pawh a tel thoin ka hria. Harh erawh a harh țha a, a țawng sap sap peih bawk. An nu chhûng lamhnaite'n an lo awmpui a, min lo beisei sa a ni ngei ang, eng vak min lo zâwt lo chuan," Ei tùr chu i rawn keng maw?" an lo ti mai a, kei pawhin han biak kual vël dàn tùr ka hre hauh lo. Ka thlen hnu deuh lawkah Pu Hruaia pa pawh a rawn thleng chawpchilh ve mai bawk a, ani hi chu motor-in a rawn kal ang a, a rawn thleng hma deuh tihna a nih hi.

An nupa chuan room khatah an awm tlâng miah lo, an natna tawrh a inan loh vang pawh a ni mahna! Pu Hruaia chu a harh tho nain doctor-in țawng vak an la phal lo va, amah enkawl tùra an rawih nurse nu chuan a kut leh kete chu a hrûk faisak a, mi hriat làr a lo ni bawk a, a tân chuan lo lan balh leh țawp viau kha thil tih chi a ni hauh lo.

Joshua ka hre reng a, ka biak azâtin a u chanchin chu ka zâwt ziah bawk. Ani pawh an zai dâwn tawh a, thil țûl tùr pawh an ti zo vek tawh a ni àwm e, min ngaih thu a rawn sawi sap sap chuan ka khawngaih ru ve reuh khawp mai, tih theih erawh a vâng. Pathian zârah dam tak leh zai hlawhtling taka an rawn haw chhoh theih nân ka țawngțaipui ziah, hei hi ka tih theih tâwk chu a ni mai si a.

Pu Hruaia pawh pastor a ni a, rawn kan apui an tam thei khawp mai. A rûkin ka lo intithei tawp, nuam ka ti tlat pek a! Kohhran hruaitu, kohhrana mi pawimawh tak takte leh mi pãngngai ve tak takte pawhin an rawn kan zut a, kan tum an tam vàng hian Cabin lamah hian an awm daih nghe nghe  a ni.

Chutiang chuan Pathianni tih lohah chuan ka kal ta ziah a, kâr khat hnu lamah phei chuan ka haw hma țhin tho tiin ka awm rei lui ve deuh a, ni tin deuhthawa kal ka nih vàngin min lo hre tawh khawp mai a, nurse pawh chuan min lo ko ve chûl țhin. A fel reuh a, chaw ei hma deuha Pu Hruaia a han hmet leh nawk nawk țhin ka hmuh chuan," Ka lo pui dâwn che em ni ang?" ka ti zauh a, ngai ti lêm lo mah se puih ka châk avàng chuan ka ti lui ta tho a, a hnuah phei chuan kan pahnihin kan hmet a, tuiin a kut leh ke ka hru ve zauh zauh bawk. Pu Hruaia hmêl pawh a rawn dik chho viau  tawh a, a rawn pângngai chho viau tawh bawk. A nupui Irene-i erawh chu  ka hmu ve zauh zauh nain ka buaipui ve mang lo, buaipuitu a nei ve tho a, ka inrawlh ve lêm lo.

"Anne-i maw i hming kha?" A chaw tur ka siamsak mawlh mawlh lai chuan a rawn ti sup a, chutia ka hming a rawn hre ve leh ka hming hre tùra min chîk ve ta chu ka hlim ru veng veng thei nia! Tenawm hian. Ka hming a lam rïk dàn lah chu a mawi tawp lehnghâl a.

"Aw... ni e," tiin ka chhâng a, ani chuan," Ka hmu tawh che em? Ka hmuh tawh hnu i ang tlat, i hmai leh hnâra freckles ațang khân khawiah emaw hmu tawh tlat chein ka inhria a, ka mumang em ni zâwk le? " a lo ti leh sup a, ka ngei ber ka hmai țhuangvuak chungchâng bawk a rawn sawi lang leh chu haw viau tùr ka nih laiin ani hi chu ka haw miah lo nia, ka thin pawh a rim lo!

*HLA I NGAIHTHLÂK CHÂNGA I THINLUNG A RAWN DEK VIAU A NIH CHUAN MI, TU EMAW, ENG THIL EMAW I HRIAT CHHUAH VÀNG LEH I HMEH BEL VÀNG A NI TLÂNGPUI, A HLA THU NGAWR NGAWR VÀNG KHA CHU A NI LÊM LO*