☆KA BEISEINA☆ - 11 By Dingdi Pachuau

☆KA BEISEINA☆ - 11 By Dingdi Pachuau

Ka star êm êm maiin a hmuh tawh leh a hriat tawh deuh anga min han sawi chu, nuam ka va han ti tak êm! Thil dang ka phût lo, min hriat hian nuam ka ti a ni mai. Ni e, tunah chuan min hre ve ta bawk a, hei bâk bâk hi chu a lakah beisei ka nei lo hrim hrim, nuam ka ti a, ka thinlung chu hlimnain a khat a ni ber mai.

Ka dam chhûng hun tawna ka hlim ber țum chu a ni chiang alawm. Ina ka haw hnu thleng pawhin ka la hlim a, zàna Joshua'n min rawn chuan ka harh chhuak zawk a nih chu! Ka hlim lutuk a, ka lo hrechang tawh miah lo niin! Hria se eng angin nge min ngaih ang? Ka hlim lai ber pawhin ka hre chhuak hauh lo va, chu ka hlimna chhan lah chu mipa dang, a laka beisei tùr awm hauh lovin ka hminga min koh vàng leh a hmuh tawh nia min hriat thu a sawi vàng maiin a la ni zui. Kei hi ka dik lo a ni, Joshua hi ka duh tak tak lo tihna em ni ang? A nih si chuan engati nge tûn thleng thlenga ka la kawp si? Min ring ve êm êm a, nichin lawkah pawh khân min ngaih thu leh ka kianga awm a châk tawh thu min rawn lawm lawm kha a ni si a, kei lah hi...

Ka rilru ka thlâk danglam a ngai a ni. Pu Hruaia pawh hi ka ngaihtuah tam loh a ngai tawh a ni, ani zawng ka ngaihtuah phâk a ni lo va, Pathian rawngbâwltu niin kawppui nei tawh a ni zui a, ka tân lah a laka beisei neih chu thil thiang lo tawp leh zahthlâk lutuk a ni, ka rilru hi miin hre phei se chuan ã pawh min ti pha lo ang, min nuihzatin min hmusit hlawm ngawt ang chu.

A ni tèlin Pu Hruaiate pawh an țha chho zêl a, kâr thum deuhthaw an awm hnuah chuan pângngai takin damdawi in ațang chuan an chhuak thei ta nghe nghe a, ka lawmpui hle a; mahse, an chhuah nî chu thinlung taka ka mang țha nî tùra ka ruat a ni thung. Thinlung taka ka star-na hi ka ti tàwp tawh ang a, star melha ka melh țhinna pawh hi ka ti tàwp tawh bawk ang, duhsak taka an nupa tân malsàwmna tinrêng dawng tùr leh hlim leh hrisêl taka hun hmang tùrin rilru țawngțainain ka thlah liam a ni.

In ka thlen chuan chau nghulhin ruak huai maiin ka inhria, ka phone ka han phawrh a, a tàwp nân tak tak Pu Hruaia thlalâk ka neih chhun chu ka han en leh vang vang a, vawiinah ka thinlung ațangin a taksa ka thlah liam tawh a, a thlalâk pawh hi thlah liam ngei a ngai ang, ka hmuh ka hmuh chuan ka rilruah a thar leh țhìn ang a, rilru siam ka tum pawhin awmzia a nei lo palh ang. Ka delete hma chuan ka han maimichhîng leh vang vang phawt a, vawi khat chauh ka en leh a, ka delete ta a ni.

Rilru ruak huai chuan zàn hun ka hmang a, phone rîin min tiharh zawk a, Joshua a lo ni a, an rawn haw chho dâwn tawh niin," Eng nge ka rawn hawn ang che?" a rawn tih chuan," Hey, thilthlàwnpêk a ngai lo ka tih tawh kha," ka ti vat a, ani pawh chuan," E, ni dâwn tak e! Ka lo theihnghilh dâwn alawm le. Tihpalh aw, chuti a nih chuan keimah ka rawn inhawn mai ang che," a rawn ti ve leh a, ka nui hak hak a.

Pathianni chawhnuah Joshua'n min rawn lam a, a u chu tlawh ve tùrin Remi nèn kan chhuak a, an rawn haw ve êm êm a, tlawhna hun remchâng ka la nei miah si lo va, Remi sâwm vein zak ru viau mah ila tlawh ka duh ve a ni.

Joshua'n kan chanchin a hrilh vek tawh avàng chuan ka zak ru khawp mai a; mahse, ka zah an lo ring ve a ni ang, min lo be bawrh bawrh a, an lo fel lutuk ringawt. Ka rin phâk bâkin an lo fel a, kan lèn rei deuh hnuah phei chuan nuam ka ti ve ta viau.

Kan inkawp rei ve telh telh a, ka rilru ka pe chho ve tak tak ta bawk a, fel ka tiin ka duh ve tawh viau mai, ani angin kei min han kawp ve reng duh mai hi mak tiin amah pawh ka zâwt hial tawh a. Ani erawh chu a nui mai a," Hmeichhia chu an hmêl ka en rualin an nungchang hi ka en țhìn a," nui chung vêk hian a ti a, kei chuan," Chu, ka hmêl hi chu a țha lêm lo o tihna a ni maw?" ka lo ti vat a, ka nui pah bawk a, ani chuan," Chutiangin ka sawi loh kha, hmêl leh nungchang ka en kawp ka ti mai a nih kha. Nang chu i hmêl a țhat rualin i nungchang pawh hi a țha a," thutak zet hian a ti leh a, ngun zet hian min en bawk a.

"Ka lãwm e," tia nui chung hian ka'n bûk khum nghat a," Nang chu i fel a, i hmêl a țha a, i mitmeng pawh a mawiin i kutzungțang pawh a sei țha, chutiangin i ke pawh a sei țha bawk. I chhîp ațanga i ke lèr thleng hian han sèlna tùr che ka dap ka dap pawhin ka tân hian i țha mah mah a ni tih chauh hi ka hmuh chhun a ni," ka ti ta duah a, ka nui pah sâng a. Ka en phei chuan ani erawh chu a lo nui ve hauh lo, ngun takin, mit khap hauh lo hian min lo la en reng a.

"I fiamthu a ni maithei a, kei chuan fiamthu-ah ka ngai phal hauh lo, i thil sawi zawng zawng kha ka duh êm êm vek, i țawngkam pakhat tê pawh kha ka hriat hmaih hauh lo a nia," a lo ti sap a, kei pawh chuan," Fiamthu ni nâng, fiamthu ka hrilh hauh lo che," ka lo ti lét ve a, ka lamah rawn ãwnin ka chalah chuan a fâwp ta zoh a.

"Ka zêp lo, bialnu chu ka nei ve tawh țhìn ngei mai; mahse, nang ang hi ka la tawng ngai lo," a ti sap a, kan inkawp rei ve deuh ta bawk nèn, ka zak viau tawh bík lo va, nuih sak pah hian," Ka lãwm e, kei pawh, nang ka tawng che hi vànnei ka inti tak zet a ni," ka ti ve a, chutah," Hah taka ka kal phal lovin min thlah ziah bawk sia, kawng lehlam takah--" ka tih lai mêk chuan ka hmuiah chuan a rawn fâwp ta chat a, ka țawng zui thei ta lo va. 

"Ka duh tak zet che a ni," a tih loh leh," Nang ka tawng che hi mipa vànnei tak chu ka ni," min fawh kârlakah chuan a ti sap sap a, a duhthawh si a, a kutin ka hnung lam a chûl pah ruai a, min tibuai hneh lutuk a, ka thluak pawh a buai vek! Kan inthlah meuh chuan ka thâwk a buai lo chauh a ni, ka thin pawh a phu rang dup dup khawp mai a, ka marphu phei chu a phu tlir zawt zawt maiin ka hria, hetiang hian ka la awm ngai hauh si lo.

"Ka chhuk tawh ang aw," aw khùr dar dar leh làwi zet hian ka ti a, ka aw chu kei pawhin ka aw a ni tih ka hre lo țêp, a mak lutuk a! Ka awm dàn dik loh vànga ka aw chu chhuak dik lo a ni tih a hre chiang ngawt ang chu!

"Ka la phal lo asin!"  Min rawn kuah leh a, ka lo țang leh bîk chuang lo, a taksa lum thar thar chu ka kawr hâk chhanah chuan ka hre rauh rauh a, nuam ka ti tlat a nih pek chu! Mipa dangin min la tawk ngai lo va, min tawk tùr khawpa hnaih lah ka la nei hek lo, engtin emaw tak ka awm a, chhûngril lamah nuam tihna leh phùrna ka nei tlat; mahse, chu chu a hria ang tih ka hlau viau thung.

"Ka mamawh che a ni," a rawn ti leh sap a, ani pawh a aw chhuak a dik bîk hauh lo, keimah ang tho hian chhûngril lamah engtin emaw tak a awm ve a ni ngei ang, a kut lâwnga ka hnungzâng a rawn chùl chhoh chuan ka lo thaw hak a, ka awm dàn zet chu mak ka ti thlâwt. 

Zàn mutnaa tlaia kan awm dàn ka han ngaihtuah lét chuan ka zak ru chem chem mai, motor chhûngah khân kan chesual țêp chu a nih kha. Khatih lai khân ka rilruah virginity vawn him pawimawhna leh hlutna ka ngaihtuah chhuak hauh lo a nih kha le. A zahthlâk asin, eng angin nge min hmuh tâk ang? A phone kha rawn ri lovin lo chesual dùn ta ila, mi dang chuan kan chesual a ni tih an rawn hre ve kher lo ang; mahse, ka inthiam lo dûk ngei ang a, țhiante bulah leh ka nu bulah ngei pawh hian ka inthlahrung ngawt ang! Ka nu phei chu, min zilhna leh min fuihnate kha eng mah lo maiah ka chantîr dâwn tihna a ni si a, phone lo rì kha min chhan himtu dik tak a lo ni. Nula tam zâwk virgin tawh lote hmusit thei dinhmunah ka ding ta hauh lo, kei pawh ka duhna leh châkna thlèmnaah hruai luhin ka awm a, ka vànneih vàng takmeuhin kei chuan chhan himtu ka nei a ni mai a, mi dang chuan an nei lo tihna a ni, ka va vànnei bîk tak êm! Mahse, Pathian hnêna țawngțai erawh a inthlahrunawm dûk ta mai.

A fâla inhmuh hian thlèmna a hnài bîk avàngin inhmuhpui tawh loh ka duh ve viau a; mahse, dik tak chuan inhmuhna hun hi kan nei lo ve lutuk a, ngaihzàwn pawh hi ka hrehawm ngawtin ka ring! Hetia ka kal lam leh ka haw lam min thlah hi kan inhmuh hun chu a ni deuh mai a, han ham strict viau pawh hi a fuh ber bîk lo ka ti ve deuh a, zànah a rawn lëng zauh zauh a, kan inah erawh hi chuan thlèmna hi chu ka ngam ve a, min thlêm lo bawkin ka ring, kalkawnga han ham strict viau ringawt lah hi a ni ber bîk si lo.

Mahse, 'Ber' thla a ni chho ve tawh bawk a, kalkawngah pawh rei kan ding khawmuang hman vak tawh bîk lo, pawi ka ti viau lo nain amah hi ka thlahlel ve tho si a, ani lahin min lo thlahlel ve viau tho bawk a, hun thâwl kan neih hun a ni ve bawk nèn, in ka thlen meuh hi chuan duh ai chuan ka tlai ve hret ziah a, a rük tak chuan ka nu lakah hian ka inthlahrung ţhin.

Kan la chesual lo nain a châng hi chuan min thlëm ve fo a; mahse, thui kan kal hmain ka rilru tifîmin ka inla hrang thei ziah, chêtsual țhat lohna ka sawi lah hian," Thil țha tak chu a ni lo maithei a; mahse, induh leh inngaizâwng inkârah chuan a thleng ve fo alawm, chêtsual vànga ințhen ta aiin inkawp zui ta hi an nghet duh zâwk, an rilru, thinlung leh taksaah inzawmna leh inpawhna thûk tak an nei si a," a lo ti mai ţhìn a, kawng lehlama chhût chuan a dikna chen chu a awm ve tho ang, a châng chuan kei pawh hian thlèmna hi ka do zo lo lek lek fo va, eng mah ngaihtuah hauh lova a duh dàna awm maite hi ka taksa hi chuan a châk ve fo; mahse, inngaihtuah harhin 'Pathian duh loh zâwng a ni, châkna sualah ka tlu lût lo ang, he châkna sual vàng hian pa pawh ka neih tawh loh hi ' tiin ka rilru ka siam sauh sauh a, chu chuan chakna min pe a, chêtsual loh phawt hi thil țha ber a ni ka la ti fan.

"Khawvêlah hian induh takte inkâra chêtsualna hi thil pawi ber a nih ka ring lo, chu ai chuan induh hauh lote inkâra chêtsualna hi a pawi zâwkin ka ring, keini chu kan induh tawn a, a pawina a awm hleinem." Hei hi a thu lâk dàn a nia, a ngai serious ve vak lo; mahse, kei chu hetiang hi ka ni ve tùr a ni lo.

Duh lo na nâ nâ chu min tilui bîk lo va, kan hlim loh phah chuang pawhin ka hre lo. Min thlahlel viau nain ka duhna min zahsak ve tho a, ka remti lo chung min tihluih a tum loh avàng chuan kei pawhin ka zah a, chu vàng tak chuan ka duhna a zual tulh tulh ni maiin ka hria. Tunah hi chuan duh hleuh hleuh tak ka ni tawh, ka duh dàn min zahsak miau avàngin a duh dàna awm ve zêl ka tum a, Pathian duh loh zâwng pèl si lovin. Ni tin deuhthaw inhmu thei mah ila kan inngai a, kan inthlahlel a, kan inkâra induhna a zual a, min zahpui hauh loh leh min iai hauh loh vàng hian ka duh zual bawk. Tunah hi chuan ka thawhpuite pawhin kan inkawp a ni tih an hre vek tawh a, anni bâkah pi ber pawhin a hre tawh. Min fiam zauh zauh țhìn a, zak ru takin ka nui mai ţhin. Joshua lah hi a rawn kal ve zauh zauh bawk a, inkawmna hun kan nei lo va, ka khawngaih avànga ka han hauh ve deuh pawh hian rawn lan a țhulh chuang lo, kâr khatah vawi hnih hi chu ngei ngeiin a rawn kal ziah.

December thla tìr lama an exam dâwn avàngin zir nasa tùrin ka fuih ve a, zàn lamah pawh rawn lêng lova lehkha zir tùrin ka ti țhìn; mahse, a zàwm chuang hlei lo va," Ka thiam lutuk tawh," a ti tlat a, zan tin rawn lêng țhìn a ni lo bawk a, ka han hauh ve pawh hian a duh hunah hi chuan rawn lèn a țhulh phah lo.

Dec ni 2 chawhnuah exam a nei a, ka țawngțaipui nasa ve a ni. A exam dâwn zàn hian rawn lèn a tum leh tlat pek a; mahse, ka hnial tlat a, ka phal lo va," Rei lo tê chauh alawm ka rawn lèn dâwn, zanin ngeia ka hmuh loh che chuan lehkha ka zir thei chuang lo ang," tia min nawr tlat avàngin ka han phalsak ta ngawt a, rei pawh a lêng lo ta ngei a; mahse, a haw hnuah min rawn be leh tho a nih chu.

A exam a chhàn rei avàngin tlai lam chu min thlah hman lo va, kea ka kal tâk hnu chuan kea ka kal khàt tâkzia chu ka ngaihtuah pah rauh rauh a, exam a chhàn țhat leh țhat loh pawh zawh ka duh viau a; mahse, a buai lai a ni thei tih hriain ka be duh ta rih lo va.

Chaw ei khama ka va biak chuan a țawng țha duh lo khawp mai a, a ti țha vak lo a ni ang ka ti rilru a, ka han hnèm ringawt a," I rilru kha ti-down ngawt suh, a dangah i ti țha mai dâwn alawm, i thiam êm kha, i vànnei tawh mai ang," ka han ti a, ani chuan," Ka ti țha lo tih ka sawi hauh lo aw," a rawn ti nghut a, chuti si engtizia nge ni a mood a off viau si ni?

"Chuti... eng thil nge ni ta? I down lutuk a, hrehawm ka ti a nia, i mood kha engtin nge ka on theih ang?" ka han ti a, a chhûngte lakah lungawi lohna eng emaw a nei a ni maithei, ka khawngaih roh mang e, a exam lai kher hi chuan rilru lamah buaina dang nei lo se ka ti asin.

A ngawih rûn sî avàng chuan," Ka ti tak tak a nia, i down viau hi chuan kei pawhin hrehawm ka ti a, ka down phah ve tho a nia, ka hriat ve chi a nih chuan min hrilh hrâm la?" ka ti leh a, ka hmui chung lam chu ka pet fan fan a, hetiang hian a awm ngai meuh si lo, ka hre thiam lo.

"I hre lo maw?! Ngaihtuah rawh," a rawn tih sap chuan," Aw, ka hre lo, ka ngaihtuah kual ve tho sia," ka lo ti vat a, ka bo telh telh mai, eng thil nge ni ang? Hre tùrah min ngai a nih bawk si chuan... ka hre bawk si lo. A exam a chhâng țha bawk si a, eng vàng tak ni ang maw?

A thaw hawk ri chu ka hre thei a," Hmeichhe nungchang țha lutuk tak hi chuh!" a rawn ti sup a, ka bo zual deuh deuh! Eng vànga chu thil chu sawi chhuak daih nge a nih? Ka nungchang hi a duh lo tihna em ni? A down êm êm chhan ka ngaihtuah chhuak thei mai si lo va, mãwl min ti viau ngei ang.

"Nia, kei chu ka mãwl êm mai a, ka ngaihtuah chhuak ve thiam mai lo a ni," ka ti sap a, mi dang anga lehkhazir sâng leh fing niha thil ngaihtuah chhuah thiam zung zung ka châk, hei ai hian lehkha kha lo zir sâng deuh ila chuan... tunah tak hi chuan hun danga ka ngaihtuah ngai loh, heti taka rethei bîka ka lo piang hi ka thin a rim.

"Anne, i mãwl lo!" a rawn ti chhuak hrãwk a, a thâwk leh hawk hnuah chuan aw dam deuh zâwk hian," Ka thiam loh a ni, ka tih palh lutuk! Khawngaihin, khatiang thu kha chu sawi chhuak tawh miah suh aw, ka rawn hmu lawk thei che ang em? Rei lo tê chauh a ni ang," a rawn ti leh a, hnial mah ila a rawn lèn luih tho ka rin vàng chuan ka 'aw' ve sap a.

Min hmuh veleh chuan min rawn panin ka nu hmuh loh chuan ka kut a rawn vuan a, a mit mengah chuan inthiam lohna rawn lang chhuakin," Ka tih palh lutuk!" a ti sap a, he pa hian min ti bangbo telh telh! Engah nge a tih palh thu hi a sawi ziah ni?

Ka nuin," Joshua, vawiinah i exam tiraw? I chhâng țha viau em?" tia a rawn biak tâkah chuan ka nu lam chu hawiin," Ti țha ve thawkhat chuan ka hria, ka zir a rawn chhuak țha ve êm a," tiin a chhâng a, ka kut erawh a la thlah chuang lo.

A hnua min hrilh dànin a exam zo kha a tih țhat leh țhat loh zâwta ka biak a lo ring ni àwm tak a ni, ka be si lo kha a lungawi lo deuh a, chaw ei khamah chauh ka va be si a, a lo tihtauh ve deuh avàngin a lo țawng țha duh lo a lo ni. A hnuah chuan a exam nî apiangin a zawh hun àwmah chuan ka va be ta ziah, tih lungawi loh chu ka hlau ve tho alawm, a chhan hre hauh lova a țawng duh lo kha chu a hrehawm êm mai.

*I NGAIHDAM KHÂN AN THIL TIHIN I THINLUNG AN THUNUN LO TIHNA A NI, A AWMZIA TAKAH CHUAN ANMAHNI LEVEL ANGIN, AN PUITLIN DÀN TÂWK LEH HRIAT DÀN ANG TÂWKA AN CHEIBÂWL CHE KHA NANG CHUAN I MIHRINGPUI ANGA ZAHIN I CHEIBÂWL VE THUNG TIHNA A NI*