☆KA BEISEINA☆ - 12 By Dingdi Pachuau

☆KA BEISEINA☆ - 12 By Dingdi Pachuau

Thilthlàwnpêk hi a nazawngin ka dawng duh lo tih ka hrilh tawh a, a hria; mahse, Krismas gift erawh min pêk ngei a duh si a, ka hnarsak lo tawp mai, a duh dàn ka zahsak ve tho a, kei pawhin man to tak ni lo chu ka pe ve, a la lãwm thiam êm êm zui a, a zahthlâk lek lek zâwk a ni, a chhan chu ka thilpêk ve chu a ho sia, bâkah, a to bawk si lo. Ani min pêk nèna khàikhin phei chuan holam tak a ni.

Vêng inang lo ta chu hunpuiah pawh chuan kan inhmu zut thei chuang lo, chuta kârah ka buai ve a, Remi nèn biak in lamah kan che zar zar reng a, hun thâwl kan neih ve lai a ni si a tiin kan ãm ve deuh a ni. Joshua pawh a rawn lang ve zauh zauh a, ka țhian mipate nèn pawh an inkàwm thei nghâl mai, fiamthu an duh bawk a, Jim-a phei chuan," Mapuia bialnu atân ka hual tehlul nèn, i lo che rang hret a ni," tiin a han fiam zui a, ka melh vak ringawt. Mapuia 'Smiley' erawh chuan," Ka bêm ka bêm alawm, min duh tlat lo va," nui chung hian a lo ti ve thung a, chutiang chuan fiamthu thawhin min sawisa a, "Lalkâwnga awm lo chu aw...sawi tùr a ngah leh dâwn asin le," Jim-a chuan a ti leh vang vang a, ani hi a chhûngte, a nu leh pate hnênah Krismas a hmang ve a ni.

Mahse, mipa a ni a, mipa țhian ka kàwm chu a thïk ve tlat tho, a bîk takin Mapuia. A thîk a ni tih ka lo hre lawk lo va, a fâla kan awm dun theih hnuah," An thil sawi kha tak tak a ni em?" tiin min zãwt a, kei chuan," Min fiam mai mai a nih kha," tiin ka chhâng mai a; mahse, a lo ngai thutak viau thung a ni ang, kan inhmuh loh chânga kan inbiak châng pawh hian," An bulah kha chuan ngaih țha takin ka awm tîr thei hauh lo mai che," a ti leh zauh țhin. Thutakah lâksak lovin ka nuih liam mai a, a chângin fiamthu an duhzia leh min fiam nasat theihzia chu ka hrilh leh mai țhin; mahse, a ring thei ngang lo a ni chêk ang," Mipa ka ni ve tho a, chezia leh hawiherah ka man ve thiam alawm, pakhat phei kha chu hmeichhe duh zâwng tak a ni zui ngei ang," a ti leh a, min rawn enin," Ni lo'm ni?" a ti leh a.

Ka ngawih vang vang hnuah,"Ni maithei; mahse, Joshua, nang ka nei che a, mipa dang ka mamawh tawh hauh hleinem. Mapuia leh Jim-a hi ka țhian an ni a, nulain tlangvâl a melh ang hian ka melh ngai lo ve ve asin, i ngaih ti țha lo tawh miah suh," tiin thutak zet hian ka chhâng a, a mitah tak ka en nghe nghe, ka thu sawi hi ring se ka duh vàng a ni.

Mapuia a thîk deuh tlat avàng chuan ka țhian mipa pahnih lak ațang chuan ka theih ang angin ka inthiar fihlîm ve a, an bulah loh theih loh hunah lo chuan ka awm lo a nih ber chu. Anni pawhin mak min ti maithei a ni, a chhan lah ka hrilh si lo, Remi hnënah erawh chuan ka hrilh thung a, a nuih a lo za nasa mai.

"A va buaithlâk ve aw... Laljosh-a chu a thîkthu a va pe chhe ve maw le, a inhmeh lo e, ţhen daih rawh," tiin a nui hak hak a; mahse, a hnu deuhah thutak deuh zâwk hian," Mahse, a thîk tlat si chuan in inkárin a chhiat phah thei bawk si, buaina chhuahtîr ai chuan an bula i awm tam loh chu a țha ber sî a nih chu. Lungngai suh, anni pawhin an hre thiam lutuk ang, an awm lo leh thuai ang a, rilru hahdam takin a awm thei thuai mai ang," tiin min hnèm leh bawk a.

Ni e, zirna chhunzawm tùrin an kal a hun leh țêp tawh a, Joshua pawhin thïk tùr a nei lo țêp tawh a ni. Anni bâk hi mipa ka biak hnai an awm lo va, Joshua'n a thïk deuh pawh hi hriat thiamna chin ka nei ve tho, a chhan chu a hma pawhin Mapuia hi chu min dem rawn ve tawh tlat a, a hre thâwi em maw ni ka ti hial, min en dàn ţhin erawh ka man thiam ve chiah chuang lo va, Joshua'n a thïk theih tùr hian min lo melh țhin pawh chu a lo ni maithei a ni. Kei pawhin hmeichhia, amah nêl êm êmtu, kan intawn hmaa amah an dem bel nèn hmu dùn ta țhìn ila ka rilru a nuam bîk hauh lo maithei a ni.

A bulah hian ka hlim a, ka nihna ang angin min pawmin min zahpui hauh lo va, kan chhûngkaw dinhmun pawh a hre vek, heti chung chung pawha min duhtu hi kei pawhin ka ngai hlu lo thei lo va, ka duhna hi a ni tèlin a zual zêl lo thei lo, Mapuia a han thîk pawh hi min duh ve êm vàng a ni tih ka hai lo va, làwmawm lo viau angin lang thei mah se chhûngril lamah erawh ka lãwm tlat thung.

Kan inkawp rei telh telh a, a chângin a rilru hi puitling ve viau țhìn mah se naupan chhiat châng erawh a nei ve tho, an unau zínga a tlum ber a nih vàng a ni ang ka ti tawp, a chhûngte'n an duat rawn kha a ni ve bawk a. A thíkthu a chhiat ve avàngin a hmuh lai chuan mipa ka be tam lo rêng a ni, buaina a tam mai mai a, mipa dangin ka rilru an luah lo bawk a, thîkna avànga kan inkâr a buaia insawi fiah kual vêl vak ai chuan tiin ka be tam lo mai, buaina pawh a awm lo deuh nge nge.

Dàwrah ka kal leh tawh a, Jim-ate țhian dùn pawh zirna chhunzawm tùrin an chhuk leh daih tawh bawk. Joshua ngaih pawh a țha ta deuh a ni ang, a hmêl tak deuh rùn hmuh tùr a awm leh tawh lo va, a hlim hmêl ka hmuh hian kei pawh ka hlim țhìn. Han tihtauh deuh châng hi a nei ve tho a, amah ngaihsak lo deuh nia min hriat châng hian min rawn phone a, ka chhàn hian ngawi rengin a awm țhìn, a chângin a han rûm nghut țhìn bawk a, hetia a awm  tawh hi chuan a lungawi lovin ngaihsak a phût a ni maw ti ila a dik chiah zêl, a hnuah erawh a lungawi ve leh mai zêl bawk a, kei aiin kum khatin upa mah se rilru lamah erawh naupan châng a nei tam zâwk. Ka nu bulah erawh hi chuan a țawng duhin a inla fel thei viau a, a inla puitling ka ti mai, a țawngkam hmante hian ka nuih a lo tiza ru țhìn.

"Mipa dang lakah chàn che ka phal hauh lo va, chu vàng chuan inzui rei lovin innei thuai ang aw," a tih chuan ka en vat a, inneih lam thu a sawi chhuah vawi khatna a nih vàngin mak ka ti a, a fiamthu a nih ka ring deuh bawk a; mahse, a fiamthu lo a ni ang, a lo nui hauh lo.

"Joshua, i ti tak tak em?" ka ti phawt a, ka en ràn reng a, ani lah chuan," Ti tak tak e, mipa ka nih hi, hna thawh la nei lo mah ila ka nu leh pa zârah hrehawm takin kan awm bîk lo ang, ka zir chhuah veleh hna ka zawng bawk ang a, hna ka hmu vat lo a nih pawhin ka chãwm zo tho tho ang che," a ti leh charh charh a.

"Kan la naupang i ti lo em ni?" ka ti leh a," Keimah ang rual nupui nei ka hre țeuh mai, naupang tih te chu, kan inneih hnuah kan la upa chho ve zêl mai ang chu," tia min chhàn chuan ka nuih a za ru khawp mai a, a sawi thutak ve bawk si a, ka nuih chuan a hre thiam lo ang tih ka hlau bawk si, ka ngawi ta rih a.

"Kan inneih thuai loh chuan mi dang lakah ka chân daih ang che tih ka hlau alawm," a tih tãkah chuan a kutah chuan chelhsakin," Joshua, min chân dâwn lo, nangmah hian min kalsan a nih ngawt loh chuan kei chuan ka kalsan dâwn lo che, chu chu hre reng tùrin ka duh che," ka ti a, sawi zawm lehin thutak zet hian," Tunah hi chuan kan la naupang dùn deuh hlek ka ti a, inneih lamte phei chu ka la ngaihtuah chhin hauh lo, inneih hial i sawi chhuak ta mai hi mak ka ti a, a làwmawm ka ti bawk; mahse, kan dinhmun i hria a tiraw? Pasal nei thuai thei dinhmuna ka la din lohzia hi, han ngaihtuah ve la," ka ti leh a, a kut chu nghet zet hian ka hmer a.

A hnuah chuan a sawi chhuak leh tawh lo. Min chàn a hlauh vàng maia sawi chhuak a ni tih chu ka hre tho a; mahse, min tihlim êm êm thung. A theih ang angin min duat a, ka lakah pawh a pangchang ve țhìn bawk; mahse, a pangchang han ngaihsak hi nuam ka ti tlat pek a nih chu, ani pawhin min ngaihsak êm êm reng a, a pangchan châng hi chuan ngaihsak hlê hi ka tih tùr dik tak a ni ka ti ve tlat.

Thawhlehni a ni a, ni dang ang bawkin ka insiam zawh chuan dàwra kal tùrin ka chhuak zui nghâl a, kan in piahah chuan țhenawmpa school kai tùr pawh a lo chhuak ve chiah a, nuihin," Teh tlat chuan, tukin chu i va tlai teh tlat ve!" tiin ka bia a, ani pawh chuan," Ni e, vawiin chu ni dang aiin kan țan tlai dâwn a," a lo ti ve mai a, ni dangah ka hmu ngai lo, school an țan hma deuh țhìn bawk a, ka hmu hman ngai lo hrim hrim. A thawhna school hi an in ațanga hla tehchiam lo, kawngpui bula a awm a nih avàngin rei lo tê kan kal dùn thei a, kal pah chuan an school chanchin chu ka zâwt ve a. Ani pawh chuan min hrilh ve mai a, an school naupang chét dàn hrang hrang, nuihzatthlâk lam chu min hrilhin kan nui dùn bãwk bãwk a.

Tukin chu Joshua'n min thlah hman lo ve tlat, a chhan nizàn khân a sawi a, an chhûngte damlo kan tùrin a nu leh pate a hruai dâwn vàng a ni. Min thlah ziah hi ka phût lo va, ka inthlahrung țhìn zâwk a; mahse, ka han sawi ve lah hian," Ka theih lai hi chuan hruai zêl che ka duh alawm, nakînah chuan hruai duh viau che mah ila hruai theih miah loh hun che ka la nei àwm si a," a ti tlat zêl a, a ngaihtuah thui thei bawk si a, ka thu sawi a zawm ka rin chuan loh avàngin ka sawisêl peih lo ta mai, a duh dàn ka zawmsak hian a hlim a, kei lah ka lo hahdam bawk a, a țha mai.

Chhùn chawlh hma hretin customer pakhat bungraw lâk chu a tam tham deuh a, Didiki nèn dàwr kawtah motor a lâk chhúngin a bungrua chu kan lo vènsak a, rin aiin a rei phian mai, Didiki chuan," Ka rin aiin a rei daih mai ka ti!" a ti sap a, ka sawi chhuak ve lo nain dik ka ti; mahse, chawlh hun kan nei ve a ni mai tiin mipui kawng kal vêl chu ka thlîr kual pah a, Joshua bike rawn tlãn ka hmu tlat!!  A nute damlo kan tùra a hruai a rawn lêt tawh a ni ngei ang.

A rawn tlãn hnai zêl a, ka lo en zêl bawk; mahse, a hnungah chuan hmeichhe sam buang thar mai phurh a nei tlat a nih chu. Tu nge ni ang le? Kan awmna ațangin la hla deuh mah se chu nu chu a nui a ni tih ka hmu thei, Joshua chu a kuah fet khawp mai a, a âwmbáwr chu Joshua hnungah chuan a nêk pèr vek hialin ka ring! A cousin chu a ni lo tawp ang le, ka la hmuh awm pawh ka hre lo. Joshua lah chuan helmet full face a khum lo va, chu vàng tak chuan amah ngei a ni tih ka hre chiang, an inhnaih dàn chu an bek ve ve pawh a insi hial thei nia!

Ka thinlung hi engtin emaw a rawn awm zawk a ni, ka sawi thiam chiah lo, rinhlelhna a awm rualin na nget nget a awm, rinhlelh rual a ni lo, khatianga inphur fet kha chu, an inhre țha tawh viau a ni ngei ang, kei pawh kha min phur ve zauh zauh tho a; mahse, amah sìin ka țhu ngai lo tluk a nih kha; mahse, vawiina mi kha chu...  Ani kha chuan min rawn hmu ve hauh lo ang, a chhan chu a rawn hawi miah si lo va,  a bialnu dàwr nghah țhin a ni tih a hre reng sia, rawn hawi ve tal àwm. An tlàn liam thleng chuan ka thlîr zui a, Didiki pawh chuan a lo hmu ve a ni chêk ang chu," Joshua a ni lo'm ni? Engati nge a?!!" a ti teh ngawt a, chhàn ngaihna a vâng teh asin.

Chhùn chawlh lai chuan ka phone chu ka tuai rauh rauh a, han biak teh ngawt pawh chu, ka ringhlel tih a hriat phei chuan, ka țawngkamah a lang ngei dâwn si a, hun kan nei rei lo bawk nèn, tlaiah kawnga kal laiin  be zâwk mai ang.

Ngaihtuah loh ka tum viau pawhin ka mitthlaah a rawn lang zêl a, ka mitthlaa lang chu ka nuai reh thei bîk si lo, ani hian min lo kawp reng tihna em ni ang tih mawlh ka rilruah a awm a, min kawp anga ka han indah chuan ka thinlung a na lo thei lo a ni. Kha nu kha a bialnu a nih ngei ka ring tlat, chhùn ênga khati khawpa inphur fet ngam chu, an dai thûk tawh viau maithei nghe nghe asin. Inneih chungchâng meuh min sawipui tawh a ni a; mahse, vawiin kha chuan a theihnghilh tawh a ni ngei ang. Rinhlelhna chuan ka thinlung hi a kher nget nget a, a nâ ka ti a ni. Kawp nih ngawt ai chuan min țhen mai se, a tân pawh mi pakhat tân chauh a rinawm thei tawh ang a, nge ka duh lutuk tawh tih hriain min kawp pawh ka pawisa zo tawh lo niin a ring zâwk? 

Zànah phone zâwk mai teh ang, vawiin khân ka hmu chiang si a, rilru fîm taka inngaihtuah hnuah thu dik tak zâwt chhuak zâwk teh ang, rilrua rinhlelhna neia awm reng ai chuan, tunah hi chuan ka rilru fìm dàn hi ka duh aiin a nu deuh tlat, rinhlelhna leh thinlung natnain a pawlh nu deuh rih tlat si a.

Zanriah ei khamah amah zâwkin min rawn be hmasa ta a, min rawn be hmasa mah se a ngawih reng dàn ațang chuan ka chungah lungawi lohna a nei tih ka hre mai; mahse, kei pawhin a chungah ungawi lohna chu ka nei ve tho alawm, kan inang chiah.

"Damlo in kan chu eng nge a lo an a? I hmu ve em?" tiin ka lungawi lohna chu dah bovin ka bia a, ani erawh chuan," Hmu lo," ti chauhin min chhâng a nih chu. Ani chuan hmu lo ang, bike-ah nula phurin a chhuak daih alawm.

Ka țawnga zawhna ka zawh loh chuan țawng ve a tum hauh lo va, chu vàng chuan a țawng ve nân tiin," Vawiin khân bike i khalh chhuak em?" tiin ka zâwt leh a, ka hmuh sual ni hlauh se, amah hi ni lo se ka tih vàng a ni.

"Aw..."  A tãwi tek tawk viau mai, bike khalhtu kha amah ngei a ni, a phat hauh loh hi. Chuti a nih chuan ka mit a lo la țha viau a nih chiah hi, ka záwt pawp mai dâwn em ni ang ka ti rilru nauh nauh a. Ka chil lema țawng ka tum lai tak chuan," Josh, zanin chu min chhuahpui ang tiraw? Min tiam tawh kha, mipa i nih chuan i tih puitlin a ngai ang aw," tia hmeichhe rawn țawng ri ka hre ta, a la nui har har zui a, vawiina mi kha a ni ngei ang chu, thîkna leh rinhlelna thlipuiin min nuai ta buan buan mai.

"Va insiam rawh," tia Joshua chhànna chu chiang takin ka hria a, hmeichhe nui ri hla tial tial pawh chu ka hre thei. Ka hmui chu pet fan fanin ka han thaw halh a, chutah," Zanin chu i buai àwm hlê mai, ka ti buai rei lo ang che, vawiina i phurh kha tu nge ni?" tiin ka zâwt ta chat a, ringhlel chung renga zawh loh kha ka duh lo, thu dik tak hria ila a țha zâwk.

"Vawiina mi maw..? Msi a nih kha," ti chauhin min chhâng leh mai a, a sawi fiah zui nghâl mai si lo chuan ka thin a ti tâwt up up thei nia, min chhàn tàwi lutuk vàng chuan kei, lo lungawi lo deuh pah bawk nèn," Msi chu tu nge? I bialnu a ni maw?" ka ti ta a.

"Msi a ni mai," a rawn tih leh nghut chuan ka maimichhîng vang vang a, ka biangah chuan ka mittui a rawn luang thla ta, duh lo zet chuan ka han hru tãwk a, hetiang mai maiah hian ka mittui a tla tùr a ni lo tiin ka infuih sauh sauh a.

"I bialnu a nih chuan sawi țha ve mai la?" ka tih chuan," Bike-a ka phurh apiang hi ka bialnu tihna em ni?" a rawn ti leh chhak mai. He pa hi, eng nge a hriat ni, min chhâng țha duh hlawl lo, a lungawi lo ve leh ringawt bawk a; mahse, chutiang   pawh chu ni mah se thlèm ka tum lo tûn țum chu, thlèm mood-ah ka awm tlat lo.

"Joshua, eng nge thil awmzia hi?" A thil sawi dik ka ti tho nain thil awm dàn hi sawi fiah se ka duh.

A thaw hawk ri chu ka hre phawt a, chutah," Ka bialnu hi mi dangin min țâwmpui ka duh ngai lo," a rawn ti ta sup a. A dik alawm, ni rêng ang chu, mahni bialnute mi dang țawmpui duh ka hre ngai lo, tu mahin an duh tawp lo ang.

"Joshua, kei pawh ka bialpa hi mi dangin min țáwmpui ka duh bík lo asin, mi pakhat chauh tân rinawm hi a țha ngai a nia, mi dang dang tâna rinawm hi chu a fuh ber lo," ka ti a, ani pawh chuan," Dik chiah!" a lo ti leh mai a, a thil sawi dàn lah chu, ka thil sawi chu a la lâp tih a hriat si a, ka thinlung tâwt a tibelhchhah sawt lo thei lo.

"Josh, ka hman tawh e, bike ngeiin lêng leh ila?"

Chu aw ka han hre leh chu ka thinlung hi a keh ni berin ka hria, phone chu ka hmet tàwp ta daih a, hmeh tàwp hmak hi ka tum lâwk a ni hran lo; mahse, kan inbiak lai renga khatiang thu han hriat kha chu a hrehawm ve êm asin.

Zanin atân chuan kan sawi fel rih lo ni mai teh se,  Msi nèn chuan lêng chhuak se, ka chungah lungawi lohna a nei bawk a, inhrithla teh se, naktûk lamah chuan ni thar, thinlung thar leh ngaihtuahna thar nèn, a fel thei mai ang chu maw.

*NANGMAH I INNGAIHTUAH ANG TLUK KHÀN TU MAH HIAN AN NGAIHTUAH VE TEHCHIAM LO CHE A NIA, CHU VÀNG CHUAN I DUH DÀNIN, A ȚHA LAM LEH HLIM ZÂWNGIN I NUN HMANG RAWH, AN DUH DÀN ANG ZÊLIN NUN HMAN TUM SUH*