☆KA BEISEINA☆ - 13 By Dingdi Pachuau

☆KA BEISEINA☆ - 13 By Dingdi Pachuau

Kan inkarah buaina han tih êm tùr hi chu a la thleng hauh lo va, han tihtauh châng leh thîkthu han tihchhiat zual chânga a lungawi lo hi a ni deuh mai a, kei phei chu a lakah hian lungawi lohna ka hmu ngai lo va, hlimna leh làwmna hlîr mai min pe zâwk a ni, chu vàng tak chuan tuna hetia ka chunga lungawi lohna a nei hi hrehawm ka ti a, a chhan ka hriat châk rualin reh tawh se ka ti.

Zàna ka muthilh theih loh avàngin zíng thawh ka hai lehnghâl a, ka nuin min rawn kaihthawh chuan phak zetin ka tho a, ka mit lah chu zàn lama țap hrep ang maiin a thial ûrh lehnghâl a, vawiina dàwr kal chu a va phùrawm loh tak!

Zîng lama kan inbiak ngai loh avàngin biak ka tum lo va, ani paehin min rawn be chuang lo. Dàwra min hruai tùr pawhin a rawn lang hauh lo, eng nge a lungawi loh chhan hi ni ang aw? Lungawi lo tùr zâwk chu keimah hi ka ni zâwkin ka hre si a, chhùn lama ka phone loh vàng kha a ni thei ang em? An chanchin zâwt tùrin ka phone hauh lo a nih kha, kha vàng kha a nih loh chuan a chhan ni àwm tùr thil dang ka ngaihtuah ka ngaihtuah pawhin ka hre hlawl lo; mahse, ka phone loh chhan pawh kha damlo kana a nute bula a awm ka rin laia nula chhe lo zet phura ka hmuh tâk vàng a nih kha; mahse, lo phone hlè hlé ila țha mai tùr, kan buaina pawh hi a awm hauh lo ang maw le. Vawiinah, chhùn chawlh laiin phone tùr a ni, kan inkâr țhat lehna tùr a nih dâwn phawt chuan ngaihdam pawh ka dîl leh mai ang.

Chhùna ka phone chuan a vawi khatna chu a ring ral țhak a, hmui pet fan fanin ka han ti nawn leh a, a ring ral țêp tihah min rawn chhâng hrâm a, a aw chhuak lah chu mu tho chiah aw a ang lutuk ringawt.

"Joshua, nimin chhùna chanchin zâwta ka lo biak loh che vàng khân min ngaidam hrâm rawh, ka thiam loh liau liau a ni," tiin ngaihdam chu ka dîl nghâl mawlh mawlh a, a rawn țawng ve hauh loh avàng chuan ka rilru hrehawmna chu a zual sauh a," Mawh, ka ngaihsak tâwk lohnaah che min ngaidam hrâm rawh aw, ni dangah pawh ngaihdam ka dìl che chuan i lung a àwi leh ziah țhin kha, i lungawi lohna nîin a liampui tawh si a, khawngaihin tunah chuan duh tâwk tawh hrâm la, aw...?" ka ti leh mawlh mawlh a.

"Engati nge mipa dang nèn min kawp nia ka hriat tlat chhan hi," a rawn ti teh daih a! Ani hi, engati nge maw chutiang thute chu min zawh ni, zâwt záwk tùr tak ka ni asin, niminah nula chhe lo tak phurin fet zetin a kuah a nih kha, tu nge maw a lo thîk leh tâk ni?

"I hriatna chu a dik lo a nih chu, mipa dang kawp ka nei lo, ka sawi tawh kha, min phatsan a nih ngawt loh chuan ka phatsan ngai lo ang che ka tih tawh kha," duhthawh tak chuan ka han ti a, nimin lama bike-a an inphur mitthla rauh rauh pah chuan," Ka phatsan ngai lo ang che," ka ti nawn leh sap a.

"A nih chuan, nimina i kalpui kha tu nge ni si? Mipa chu a nih ngei kha."

Nimin lam ngaihtuah lêtin ka han ngawi vang vang a, țhenawmpa nèn kan kal tlâng a nih kha. Ani hian min lo hmu tihna em ni?!! Ka rei, kha vàng khân em ni a lo lungawi loh char char a!?!

"Min lo hmu elo?!!" ka'n ti lehpek a nih kha, hun lo lutuk!! Ani lah chuan," In nui dùn a, hlim taka nuiin in inen bawk a," a rawn ti leh nghut nghut a, harh chhuak ta vatin," Țhenawmpa school kai tùr nèn kan kal tlâng a nih kha, ințhenawm e ti lovin kan inbe khâtin kan inhmu khât a, kan kal tlàn vawi khatna a ni nghe nghe. Eng mah kan inkârah a awm lo, kan kal tlâng a, chu zawng chu a ni mai. Joshua, min ring teh, vawi khat lek pawh dâwt ka la hrilh loh che hi," ka ti leh mawlh mawlh a, min ring tùrin ka duh, dâwt ka hrilh lo a ni tih hi hre reng tùrin ka duh a ni.

Dàwrah a rawn kal ta a nih chu, ka lo en hau a, amah chauhin ka hmu phawt a; mahse, a hnung deuh hlekah nimina  bike-a a phurhnu ngei mai khân a rawn zui bawk a lo ni, ka hai emaw ka ti deuh hlek a; mahse, amah ngei a ni, a sam ațang sâwn ka hria a ni, a hai theih loh, ka lo dinna lamah ngei mai chuan Joshua chu a rawn kal phei a, 'eng ti tùra rawn kal nge a nih ang aw, nimina ka hmuhnu lah chuan a rawn zui bawk a' ti rilruin ka lo en deuh reng ringawt a; mahse, inthing harh vatin, lo chiauau loh theih ni hek lo, nui lui sâng hian ka lo bia a.

A rawn kalpuinu chu kawr lei tùr a rawn enpui niin, an chhuak leh thuai a, an inbiak dàn ațang chuan inhmu thuta inhria an ni lo tawp tih chu a hriat reng mai a, ani hian a rûkin min lo kawp reng a ni ngei ang, a awm dàn ațang khân ka chungah a thin a la dam lo bawk a nih kha. Min bia a; mahse, min la ringhlel tho a ni ngei ang.

Ka phone hmasa tawh a, ngaihdam ka dîl a; mahse, min la ringhlel tlat mai si a, chutah, ka dàwr nghahah ngei a bialnu (a nih ngei ka ring) rawn hruaiin a rawn bazàrpui a, ka thinlung tina ngei tùrin keimah kher min rawn pan bawk, ka thinlung chhûng na sak sak viau mah se ka mihring rilru chapona a khawih che ve tlat tawh, ka phone hmasa tawh lo ang. Ni e, thil awmzia ka sawi tawh hnu pawha min ring duh lo a nih chuan tihngaihna ka hre lo, hei hi kan ințhenna tùr a ni ngei ang.

Mahse, zàna min rawn biak erawh chuan țha takin ka lo chhâng tho a; mahse, a țawng leh duh tlat lo a nih chu. A hahthlâk a nia, a țawng duh si lohah ka rilru siam sauh sauhin ngaihdam ka dîl leh a, a hnuah a chunga ka lungawi lohna, min kawp nia ka hriat dàn chu ka sawi chhuak ve leh ta vek a. Eng mah sawi ve lo mah se ka duh ka sawi vek a, a ngaithla reng a ni tih ka hre bawk a, chu vàng tak chuan hlâwk ka inti tho tho.

Ni hnih chhûng chu a chanchin ka hre ta miah lo. Min rawn be lo va, kei lah ka luhlulin va biak hmasak chu tlàwmah ka la tlat a, kan inbe lo ve ve a nih chu. Ka thinlung na viau mah se țah ka tum lo va, buai pawh ka tum chuang lo. Didiki pawhin kan chanchin chu min zâwt ve a, dàwra an rawn lût dùn kha a lo hmu ve tho sia, kei pawhin kan chungchâng chu ka hrilh ve mai bawk a.

"A nih mai mai chu a, a zia lo êm mai, in inhmeh reuh sia, inkawp tluang hlê ula ka ti asin le!" a lo ti a,  kei pawh," Nia, kei pawh hian ințhen hi ka la ngaihtuah ngai lo; mahse, kan awm dàn hi ințhen chu kan ni ve mai ni tùrah ka ngai, biak hmasak hi tlàwmah ka la ve tawh bawk sia," ka ti ve a, ani pawh chuan," Ni e tiraw? Tlàwm leh lutuk lah hian min ngainêp duhin ka hria, a kawp lo che a niha a duh tak tak che a nih chuan a rawn be hmasa ngei ngei ang che, lo nghâk reng mah rawh, a lo biak che ka ring tlat," tiin min hnèm ve bawk a.

Remi ve thung chuan min thinrimpui tawp a," In inkawp rei ve tawh nèn, i nungchang pawh a hre chiang lo che tihna a nia, a ringhlel che a, mi dang a kawp thei nghâl a nih phei chuan țhen vang vang rawh, a thîkthu a chhe ropui si!" a ti hlak hlak a, la duh tâwk mai lo chuan," A rawn biak leh che pawhin lo be țha duh miah suh, ngaihdam dîlin thil awmzia i sawi a, chuti chung pawh chuan a hre thiam duh tlat lo a nia, mipa tak tak a nih pawh ka ring lo e a," a ti leh bawrh bawrh a, a thinrim ve tehlul nèn a thil sawi tàwp lam chuan ka nuih a tiza lutuk a, ka lo nui chhuak hawk a.

"Eng nge!! Nuihza ka sawi loh chu," a lo ti hmak a, ka hmui chu hupin ka han insûm ve deuh rih a, ka țhiannu berin thinrim ve tâwkin ka thlavàng a hauh a, lo nuih daih chu a dik lo tih ka hre ve tho; mahse, ka nuih a tiza tlat sia, ka nui lo thei lo a ni.

"Ka lãwm e, ka țhiannu hi chu i awm lo ang tih hi ka hlau țhìn, i bulah hi chuan ka rilru hrehawmnate hi a kiang țhìn," tiin ka han kuah a, a lo țang deuh nain ka kuah bet lui tlat a, a țang rei bîk lo, min kuah lêtin ka hnung chu a bêng thak thak a.

"Pawi viau mah se pawi lo ti mai ang aw, hringnuna inlaichìnna hi chu a nghet lovin a derthãwng êm mai a, mi dang tawn ang ve tho kha a lo nia, i tawng veah ngai thiam la, i rilru a hrehawm lo deuh ang, nikhua a rei deuh hnuah mi dang țha tâwk i la tawng leh dâwn nia," a ti sap sap a, ka țhiannu bulah hi chuan ka dam sawng sawng chu a nih hi.

Kâr khat deuhthaw kan inbe ta lo. Ka ngai a, ka lung a lêng êm êm a, hmuh ka châk êm êm bawk; mahse, ngai viauin hmuh châk viau mah ila hmuh ka tum lo va, biak hmasak pawh ka tum hek lo, ka phone-a a number erawh han hmeh chhuah châng chu ka nei tehmeuh mai; mahse, ka phone chuang lo. A châng chuan a tìr têa ka va be hmasa lo kha ka inchhìr dâwn dâwn a, hrehawm chu ka ti ve alawm; mahse, 'amah pawhin a theih chuan engah nge ka theih loh bîk ang' ka ti a, luhlul ka chhuah lui ve tlat. Hrehawm ka tih ber chu tlaia mahni chauha ka haw hian a ni, ka lung a lêng zual bîk a, min thlah hawin hun rei lo tê chhûng kha inthlahlel takin, äm takin kan hmang dùn ve țhìn a nih kha, tunah erawh thehmeh ang maiin a reh ta vang vang mai si.

Zànah ka nu nèn chawhmeh zawrh tùr kan buaipui laiin ka phone a rawn rì a, Remi a nih ringin," Nu, lo chhâng mai teh," ka ti a, ka phone a hnaih zâwk miau si a. Ani pawh chuan a han ban ve mai a; mahse, min rawn pe zui leh daih a, Joshua a lo ni teh tlat a!

Ka thâ a khùr a, ka thinphu a rang a, ka awm dàn chu ka duh lo kher mai, ka ngaihzia ka hre thar leh zat bawk. Chutih rual chuan Remi thil sawi kha ka rilruah a rawn lang zawk bawk a," Hello?" ka han tih chuan a thaw hawk ri ka hre phawt a, chutah," Luhlulnu!" a rawn ti teh ngawt a nih chu! Ka chhâng lo va, chuti teh thlâwta min rawn ti chu thinrim tùr nge làwm tùr tih pawh ka hre lo e a. Ka rilru erawh a la chiang viau thung.

Ka chhàn loh vàng chuan amah vêk chuan," I va han luhlul ngar ngar tak! Ka nîte uitê ang mai!" a rawn ti leh a, kal sawnin ka room-ah ka lút a," Eng nge ni ta?" ka ti ve ta thung a, ani chuan," Ka ngai hlê che a ni tih ka rawn hrilh che, min rawn biak i tum ve mang si lo va," a rawn ti ta a.

Sual chhuahin," Engati nge ka rawn  biak ngawt ang che?" ka han ti nghat a, min ngaih thu a sawi ațanga ka rilru nèm nghâlzia chu hre tùrin ka duh lo. Ani chuan," Ka ngai lutuk che a ni mai, zan tin lah hian ka mumangah ka hmu ziah lehnghâl che a, i dam țha em?" a rawn ti leh a, ka thu sawi chu engah mah a ngai lo a ni ngei ang.

"Aw, dam țha." Ka chhâng bung leh lutuk a, chhûngrilah inthiam lohna ka nei zui zat, hetianga chhâng tùr hi chu ka ni lo asin, eng mi pawh ni se miin thil min zawh chuan țha taka chhàn tùr asin.

"A țhat chu, ka hmu zing lutuk che kha ka ngaih a țha lo deuh hial a, ka zin daih bawk si nèn; mahse, ka lo haw thuai dâwn e. Eng nge ka lo hawn ang che? Eng nge i duh?" a rawn tih chuan ka meng phar deuh a, a lo zin daih vàng a nih chu a reh êm êm ni. Khawiah tak chuan zin ni ang maw? Aizâwlah a awm loh vàng hi a ni ngei ang ka ngaih êm êm ni.

"Sorry, eng mah i duh lo tak! Ka tih palh aw. Ka rawn haw ang a, kan inhmu ang a, kan inkâra thil fel lo awm zawng zawng hi kan sawi fel vek tawh ang. Chuan... ka hmu châk tawh tak zet che a ni, heti khawp maia ka ngai che hi thil mak a tlingin ka hria, ka ngaih a țha lo lek lek hial a ni!" a rawn ti leh a, chu thu zet chuan ka rilru a dek ta tlat mai. Ka rilru lâk tum nân mai maia sawi a ni tlat lo, min ngai tak tak a ni, ka thinlung hian a hre thei tlat.

"Tluang takin i rawn haw dâwn nia, khawnge i zin rêng rêng a?" tiin ka han chhâng thui ve ta deuh a, ani chuan," Shillong-ah Msi kha ka zui thla ve lawk a, ka duh aia rei ka awm ta a nih hi; mahse, naktûk khian rawn haw chhoh ka tum a, kan inhmu thuai dâwn nia," a rawn ti a, Msi hming a rawn lam rì chuan min ti tîm leh ta tlat mai, Msi zuiin Shillong-ah a chhuk ve a, eng nge a tih? A bialnu a zui thlâk chuan eng nge an tih vak ang? A chanchin ka zawh lah khân 'Msi a ni' tih bãkin thil dang a sawi duh miah lo a nih kha. Ka rilru tih nat tum hrim hrimin min rawn bia a ni chiang lutuk, ka thîk ve tho tih pawh a hriat reng kha.

Ka thin a rim deuh thut a," A nih tak chu, mang țha le," tih leh phone hmeh tàwp chu ka rual nghâl a, min bum mai mai bîk lo ang, ka duhzia a hria a, a lang a paua min kawp a tum a nih hi.

Phone chu a rawn ri zui leh zat a; mahse, ka chhâng duh tawh lo. A rawn ri nawn zêl a, amah a ni tih ka hriat avàng chuan chhàn ka tum chuang lo, a hnuah phei chuan ka switch off ta daih nghe nghe a, min bum mai mai tawh bîk lo ang. Ka thinlung ka pe a, ani'n ka thinlung chu infiam nân a lo hmang a... Ni lo ve, hetiang tùr hi a ni lo, mi thinlung hi infiam nân hman mai mai loh tùr asin. Eng ang mi pawh ni ila, a tâwk chin hi chu a awm ve a ni.

A tûkah pawh chhùnah chauh ka phone chu ka on zawk a, chu pawh mi biak tùr ka neih vàng a ni. Ka off zui leh daih a, min rawn biak a tum leh reu reu ang a, ka thinlung nâ a rawn tih nat belh leh palh ang. Kei chuan a thil sawi a nih phawt chuan ka âwih leh ang a, nakinah tún aia nâ hian min siam mai ang.

Chaw ei laiin Lêngpui piah lawkah motor accident a awm a, a chuang pahnih zînga pakhat a thih thu leh pakhatin hliam na tak a tawrh thu Bawiha'n a sawi chuan ka nu chuan," A pawi thei ngawt mai, accident thu hi ni tin hian hriat tùr hi a awm chu a ni ta mai si a, a pawi teh zawng a nih hi," a lo ti vat a, kei chuan," A pawi viau nain an khalh chak thei lutuk a, khalh chak lutuk chuan fîmkhur sèn a har a, an tisual leh nge nge țhìn, an hmanhmawh viau a niha thlen thuai an duh a nih leh chhuak hma deuh țhìn mai se, accident hi chu a tlêm deuh ang," ka lo ti ve thung a.

Chutiang chu chaw ei chhûng chuan kan sawi a, chaw ei khamah hla zir tùrin ka chhuak a, kan țan hma chuan Remi nèn chuan kan titi sap sap a, Joshua chanchin bawk a ni kan sawi ni, ani pawh chuan," A zak lo thei hi ka tia, a rawn ngam leh che a nia, ngaih pawh a ngai tak tak lo ang che, a ti mai mai a ni, a zah loh vàng mai mai! A thiam loh zâwk a nia, a rawn be leh chea ngaihdam a rawn dìl loh che chuan ngaidam miah suh, mipa tih vànga tlàwm tum loh ringawt mai! Ka ngaih dàn a ni thlâwt lo," a ti leh barh barh a, ani pawh hian Joshua awm dàn hi a hre thiam thei tlat lo, a haw êm êm tlat. Keimah vànga hua a ni tih pawh ka hria, a țhiannu ka ni miau mai a.

A tûkah chuan news hriat ve ka duh avàng chuan ka phone chu ka on ve ta a, ani pawhin min rawn biak a tum kher tawh nâng. Amah vànga news hriat loh ringawt chu a fuh ber lo, min rawn phone leh a nih tâk leh ka chhâng lo thei tho alawm le, ka mute thei tho bawk.

News pawh chu ka chhiar hman rih chuang lo, chaw ei hma hret, hmarcha ka ràwt lai chuan Remi'n min rawn phone a, ka han chhàn chuan," Anne, Joshua chanchin kha i hre tawh em?" thaw deuh hlawp hlawp chuan a rawn ti a, kei chuan," Eng a chanchin maw? I va han àwm ve! Eng nge i tih a?" ka lo ti mai a, hmarcha ka râwt pah reng bawk a, ngaihțhat lohna pawh ka nei chuang lo.

"A accident kha!"  Ka hmarcha râwt lai chu ka tàwp chat mai! Ka melh ngai melh rûn chung chuan," Engtikah maw?!!" ka han ti sep a, ani chuan," Ih, Lêngpui bulah an chesual an tih kha, damdawi inah a awm mêk an tia, a ngaihtuahawm viau niin an sawi nghe nghe," a rawn ti leh a.

"Chu chu engtikah?"  Ka phone chu ka hûm ngat ngat a, ka kutte chu a khawng vek maiin ka hria. Hlauhthàwnna avàngin ka thâ a khùr nghâl dar dar thei hial mai. A lo accident a maw? Engtin nge chu chu a thlen theih?! E, Bawiha sawi kha a ni thei ang em? Lêngpui piah lawka accident a tih kha, a ni ngei ngei ang.

"Anne... ka rawn țhâwng viau che a nih ka ring, a pawi ka ti hlê mai, a țha leh mai ang chu maw? Beisei ila," a rawn ti leh sap sap a, ka rilrua hlauhthàwnna chu țha leh mai tùr anga a beisei thu a sawi chuan a tibo hauh lo, hlauhthàwnna hlîrin ka la khat tho.

"Rem, ngaihtuahawm viau niin i sawi kha."  Ani pawh chuan min han hnem vak ngaihna a hre bîk lo a ni ang, a ngawi reng a, sawi mai tùr a hre bîk lo a ni ngei ang.

Chaw ei ka siam lai chuan ka phone bawk chu a rawn ri leh a, number ringawt a nih avàng chuan ka hlauhthàwnna chu a rawn zual teh ngawt a, Joshua thih thu min rawn hrilh ang tih ka hlau a ni. 

Mahse, a lo ni lo hlauh a, ka thaw deuh huai a. Ka chaw ei tui lohzia chu, ka lem thei lo achha a ni e. Ka insiam laiin ka phone bawk chu a rawn ri leh a, tukin chu ka phone a luck hle mai, a ri ve chhên mai.

Joshua a ni. A zia tawh a ni ngei ang, rang zet hian ka han chhâng a," Joshua, i țha em? Eng nge i an tawh? A pawi ka ti lutuk!" ka ti nghâl vat a, min rawn chhângtu erawh Joshua a ni lo tawp mai.

"Anne, Joshua u ka nia, a pawi ka ti hle mai! Tûn lawk khân Joshua chuan min kalsan ta a ni, a hliam kha a na êm mai a, a tuar chhuak thei ta lo a nih kha. Chhel takin a tuar a; mahse, tuar kha a lo na êm a ni."

Khumah chuan ka țhu thla hnawk a, ka phone chu ka hmer ngawt ngawt mai. Joshua chuan...engtin maw? A hliam tawrh chu eng ang fakaua nâ nge a nih? A tuar chhuak lo maw? Tunah khân Joshua u khân 'Min kalsan' a ti maw? Engtin nge min hmuh hmain min kalsan theih? A ni lo, hei hi ka mumang mai a ni.

*I NIHNA DIK TAK CHU I THIL TIH KHÂN A HRIL ȚHÌN, I LA TIH TÙR LEH I THIL SAWI LAMIN NI LOVIN*