Skip to main content

☆KA BEISEINA☆- 14 By Dingdi Pachuau

☆KA BEISEINA☆ - 14 By Dingdi Pachuau




"Anne, intipachang hrâm hrâm rawh aw, ka rawn țhâwng thut mai si che a; mahse, Bawiha hun hnuhnung hi chu rawn hmanpui ve hrâm tùrin ka duh si che a ni, a sawi ngun ber kha i ni si a."

Remi'n min kalpui a, kan vêng a inang si lo va, bâkah, tûn hnai chhoah hian kan inbe țha lo bawk si nèn, ka inkiltawih ngawih ngawih, a hun hnuhnung hmanpui tùrin ka kal a ni a, inthlahrung takin Remi nèn pâwnah kan țhu ngam ve chauh a, lungchhiain ka rilru chu na vawng vawng mah se ka țap ri ngam teuh lo, ka țhu kûn reng a, he hun hi ka mumang ni se ka ti tak zet a ni. Hetiang hi a thleng ang tih chu lo hria ila chuan țha takin ka be ngei ang maw le, ka induhtâwk vàng vêk a ni, engati nge ka lo tlàwm ral raih mai loh ni? Ka thinlunga chapona tlâng kha lo nawr hniam hret ila chuan hetiang thil hi a la thleng lo maithei asin, inchhìrna leh inthiam lohna hlîrin ka khat.

Phone-a min rawn betu Joshua u  khân engtin nge min rawn hmuh ka hre lo, in chhûng lamah min hruai lût a, Joshua ruang dài bulah chuan ka țhu ve ta a nih chu. Hei hi Joshua maw ni a? A va vûng nasa ve! Hmun dangah hmu ila ka hre kherin ka ring lo, a hmêl pângngai kha a lang mang lo tlat. A lu lam a sawh na viau a nih dâwn hi, a lo la intuam bûr mai.

"Joshua..?" A hmél chu ka en reng a, ani a muhìl a, keiin a muhìl lai ka thlîr reng thung. 

"Joshua...?"

A awm ngai rengin a la awm a, ka han ko nawn leh țhìn a; mahse, min chhâng chuang lo va, a rawn meng chuang lo. Joshua chu a țawng duh lo fo alawm, ka ngaihsak tâwk lo nia a hriat chânga min rawn biak pawhin a ngawih reng zêl kha, tunah pawh hian a lung a âwi vak lo a nih chiah hi.

"Joshua, min chhâng teh, mawh, ka ngaihsak tâwk loh vàng chein i lung a áwi lo a ni tiraw? Min chhàn duh loh pawhin min en tal la? Min en hi chuan ka thil sawi i hre vek tih ka hre reng țhìn, maimichhîng lo khân min en teh."

A biang chu ka han chûl a, a lo vâwt thlar mai, vâwt a ti a ni ngei ang chu, a sin lai puan chu ka pawh chhohsak a, a biang chu dìm tê hian ka chûl leh bawk a, nakinah a rawn lum ve mai ang chu maw.

"A lum deuh em, Joshua? Vâwt i tih viau chuan sin tùr dang a la awm țeuh a nia," ka han ti a, ràlkhat hla deuh taka țap ngâwih ngâwih ri ni àwm tak ka hriat chuan 'Tu tak chu ni ang maw? A lung a chhe viau a ni ngei ang' ka ti rilru rauh rauh a, ka han ngaithla chiang deuh a, lungchhe vànkaia nutling țap a ni tih ka hriat tâkah chuan 'A fapa emaw a fanu emaw a pasal emaw a boral a ni ngei ang' ka ti rilru a, ka dàra min rawn kuahtu chu ka en chho vat a, Msi a ni tlat mai. He nu hian eng nge a lo tih ve a? A la awm reng tihna em ni? 

"Joshua, tho teh, han harh teh, Anne-i pawh a hawihai a nia, i ngaiin i hmuh châk êm kha," tiin a țap ta rãwih rãwih mai a, ka hre thiam lo kher mai, engati nge a țah kher le? Joshua chuan min ngai maw? Min hmu châk maw? Kan inhmu reng reng a; mahse, ngawi teh, inhmu reng chung pawhin a inngaih theih tho tak alawm. Tunah hian Joshua hi a muhìl mêk a, muhìl han ințah khum chiam tâk chu, a ti ang lo êm mai a.

"A muhìl alawm, i tiharh ang e."

Msi țap chu țap ri dangin a rawn chhunzawm a, an țap ri ta luai luai mai, ka han hawi vêl a, mi an lo awm țeuh niin, ka bul vêla mite lah chu an lo țap vek a, an inhru tluar tluar a, tu chu nge an țah ni? 

Ka hma chiaha țhu nutling chu a țap nasa zualin ka hria," Bawihte, Bawiha, ka va hre thiam lo êm! Heti maia min kalsan hi ka hre thiam lo, ka phal lo thei lo; mahse, i na êm a ni tiraw? I nâ kha tawrh țhensak thei che ila... Aw, i nu hian nu nih ka va tlin si lo êm! Ka fapa, i hliam pawh ka tawrh țhensak thei si lo che a tiraw? A na dâwn êm asin, kei pawh ka thinlung hi a na ngawih ngawih, a na êm mai!" tiin a țap khùr ngawt ngawt a, mi dang țap rîllin a rawn hliah khuh leh a, kei pawh chu nu ka khawngaih avàng chuan ka mittui a tling puau mai. A khawngaihthlâk êm asin, a 'Bawihtea' a thi miau alawm.

"Joshua, Joshua, a hrehawm êm mai, awm ngaihna ka hre lo a nia," tia ka bula Msi țap ri chuan min tiharh leh zawk a, Msi chu ka en a, a țah chhana chu ka en leh a, 'Joshua' a ti a; mahse, ka 'Joshua' kha a niin ka hre lo; mahse, engati nge hetah hian ka awm?!!

Maimichhîngin ka han ngaihtuah a, rilru fîm put ka tum hrâm hrâm a, ka rilru ka sàwrbing theih deuh hnu chuan ka hre chhuak ta uai uai mai, Joshua boral thu a uin min rawn hrilh a, ka kal ve a nih tak kha. Boral hi Joshua maw?!! Ka hmaa mu reng hi Joshua maw?!! A ni thei lo, ka la phal hleinem, Shillong-ah a zin a, a rawn haw chhoh hunah inhmuh kan tum kha.

Țap rî ka hre leh a, mengin ka han hawi kual deuh a, mi lo awm hmur, a țhen țap ngâwih ngâwih leh a țhen lo meng sen rûm ka hmu a, ka han en hniam deuh a, Joshua chu ka hmu ta, a hmêl țha tak leh mit meng nung sar mai țhìn kha hmuh tùr a awm lo, a hmai chu a vûng a, a duk deuh bawk a, a mit ni se a chhîng daih bawk.

A hmai chu ka zu khawih a, a lo dài riai mai. "Joshua??" Ka țap chhuak ta hawk mai a, chhûngril lama min rawn hnawhtu a nasa lutuk a, insùm hman a ni lo. Ka thinlung chu a rûm tlawk tlawk a, a tân tih theih ka neih chhun chu ui taka țah vawng vawng chauh hi a ni ta, chu vàng chuan ka rilru chu a na lo thei lo, insûm pawh ka tum buai peih lo va, ka ri chhuak hawk hawk reng mai.

"Joshua, a pawi êm mai, min ngaidam rawh aw; mahse, awmzia a va awm tawh si lo êm! Hetiang ringawt maia min kalsan hi i lo tum rêng em ni? A pawi ka ti êm mai, ka thiam loh vek a ni tiraw?" Ka țah kárlakah chuan ka ti sep sep a, mi dang erawh chu ring tak taka țapin a hmingin an ko reng bawk, a va hrehawm tak êm! Lungngai țap thãwm chuan min ti tâwt up up maiin ka hre lehnghâl; mahse, ka ngaihtuahna ka tifîm hrâm hrâm a, mi tam tak hmaa mualpho ka hlau.

Mumang ni se harh chhuak ila hêng hi tàwp vek se ka va ti tak êm! A nih loh tal pawhin a rual hian thi ve daih ila... mahse, chu zawng thil theih a ni bawk si lo, tunah tak hi chuan thih ve daih mai ka châk tak zet a ni, he mangchhia zet hi, tàwp vat vat se.


Ngaihtuah vài riaiin ni ka hmang ral a, zànah ka muhìl thei lo va, ka nuin min mutpui hial nain eng ka ang chuang lo. A chângin ka han mu ve rèn râwn a, a hnuah ka tho leh a, ka nu tihbuai ka hlauh êm avàngin ka che sek ngam lo zâwk a, bâkah, țah pawh ka insûm bawk, zàn hrehawm tàwp chu a ni. Joshua chungah ka inthiam lo êm êm a, a boral chhan pawh hi keimah vàngah ka ngai deuh tlat,  a chhan chu kan la inbe țha hman tlat lo si a, ka han be țha duh lo vêl a, phone pawh ka switch off hial a nih kha.

"Joshua, a pawi ka ti vawng vawng êm mai,  engati nge ka lo biak țhat duh loh che ni? Ka thiam loh vek a ni tiraw? Aw engkim hi siam țhat leh theih se, a nih loh pawhin i tuar ai kha tuar thei ila ka va ti tak êm!! A sâwt tawh si lo, hrehawm ka va ti tak êm!!" ka ti vawng vawng mai a ni.

A tûkah dàwr neitu Ahlutei ka bia a, dàwra ka la kal theih loh tùr thu chu inthlahrung tak hian ka hrilh a, ani chuan min tawrhpui thu leh ka inpeih hun huna ka hna chu zawm chauh tùra min lo hrilhin inthlahrung hauh lo tùr chuan min lo hrilh siam siam a, fel ka tiin ka thil tawn min hriat thiampui chu ka lãwm tak zet a; mahse, ka lungchhiatna min koh chhuahsak leh thung, Joshua min ngaih zualtîrtu a ni, dàwrah khân a rawn kal ve zauh zauh a, Ahlutei pawhin a lo fiam zauh zauh a nih kha. Ka han rûm leh tlawk tlawk a, insùm ka tum ve viau pawhin tun hunah hi chuan ka la thei rih lo. 

Mite lo felzia ka hriat thar belh a, Remi a lo lêng a, Didiki a rawn kal vang vang bawk, chutiangin dàwr neitu Ahlutei pawhin min tawrhpuizia lantîr nân pawisa bâkah ei tùr min rawn thawn bawk! Hei zet hi chu ka beisei phâk hauh loh a ni a, ka làwm rualin ka lung a chhia a, zahthlâk ka ti viau bawk; mahse, tih theih ka nei dér bawk si lo.

Pathianniah pawh inkhâwm ka peih lo va, inah ka awm a, ka nu pawhin min ti lui bîk lo. Ka țhu a, a chângin ka ding a, in chhûngah chuan ka vei tawn sek bawk a, a chângin hla ka ngaithla a, ka eng tih mah a tui lo, a chângin ka en ngai ka en reng a, ka rilru hi a mang chhuih a ni ber ang chu.

Joshua chhûngte bâkah Msi lakah ngei pawh ka inthlahrung ru deuh a, an inah pawh ka va kal nawn tawh chuang lo, nupa êm pawh kan ni lo va, bâkah, kan ințhêțhù deuh lai a lo ni bawk nèn, Msi hmuh phei chu ka hreh ngawih ngawih, kan chanchin a hre vek àwm si a, hmuh nuam ka ti hlawl lo.


Zànah Remi a lo kal a, inkhâwm lovin min awmpui a, ka mamawh laia min awmpuia min hnèmtu țhian ka nei hi ka lãwm ngawih ngawih. Engtin min hnèm viau bîk pawh a ni lo; mahse, ka bula a awm hian ka mal lo va, țawng lua lo mah se ka kianga a awm hrim hrim hian nuam ka ti a, ka thlâ a ti muang a ni.

Kawngka a rawn rì a, Remi'n a lo chhàwn vat a, Msi a rawn lang hlawl mai. Ka țhutna ațanga thovin ka lo chiau-au ta vat a, nui hmêl erawh ka hmuh thei lo, bag hi a rawn ak lût a, khawiah emaw a kal pah dâwn a ni ngei ang. Ani pawh a mit meng a phelh deuh phang a; mahse, hlim hmêl pu luiin a nui sâng thung.

Ka piah lawka a țhut hnu chuan Remi chuan," Thingpui in ang u aw," a ti a, chhuang tùrin a kal nghâl a, Msi hnênah chuan," Engtikah nge haw i tum ang?" ka ti mãwl tawp a, han biak țan dàn tùr pawh ka hre lo.

"Thawhlehni emaw Nilaini-ah emaw a ni ang," tiin min chhâng a, min rawn enin,"  Thil eng emaw pe tùr chein ka lo kal zawk a, bâkah, thil hrilh che ka duh a, sâwt tawh lo mah se ngaihdam dìl che ka bat tlat avàngin rawn hmu tùr chein ka rawn kal a ni," a tih chhunzawm leh a.

"Eng thil nge ni ta?" ka lo ti ve mai a,  Joshua ber a awm loh tâkah chuan kan chanchin kha a hre ve tho àwm si a, a inthiam lo ve a ni ngei ang.

"A hmasa berin Joshua bialnu, a kawp lai ka ni lo tih hrilh che ka duh a ni. Second-cousin kan ni a, kan têt lai chuan kan inkàwm ngeihin kan inkàwm nasa thei viau; mahse, kan puitlin chhoh hnu hian kan awmna, khawsakna hmun a lo inang lo ta bawk nèn, kan inkàwm zui thei ta bîk lo va, a châng zeuh zeuhin kan inzin chhâwk a nih deuh ber chu," a han ti ta dap dap a, kei chuan mit khap hauh lo hian ngawi rengin ka lo en reng thung a, Msi hi a bialnu ni lovin a cousin maw a lo nih?!!

"In chanchin hi a hnên ațangin ka hre fo a, a duhzia che pawh ka hria. Vawi khat chu a rilru hriat nân ka sawisêl chhin che a, a kiangah chuan awm ila chuan kut min thlâk chiang ngawt ang chu! Chuta țang chuan ka sawi chhe ngam tawh lo chiang che a ni," tiin a han nui sak a, sawi zawm lehnghâlin," A thîkthu a pe chhe ve viau a lo nih kha. Ka rawn zin chhoh lai tak a ni a, mipa pakhat i kalpuia hlim taka in nui dùn lai a lo hmu fuh pek a nih àwm kha, ina a rawn haw veleh chu chu min hrilhin a bialnu anga awm tùrin min ti ta tlat pek a, a tìrah chuan ka nuih pawh a za lutuk a, a fiamthu a nih ka ring nghe nghe a; mahse, a lo thutak viau si. Chuan, bike-a min phurin kan lêng chhuak a, nang chuan min lo hmu dùn ta ngei a nih kha," a ti leh dap dap a.

Remi thingpui rawn ken chu inin a han chàwl rih a, a hnuah sawi zawm lehin," In inkâr chu khatiang kha a lo ni ta a, thu dik sawia be tùr chea ka hrilh pawhin a ti duh tlat lo va, mipa chu hei, tlàwm har an tih êm hi, a rilru chhûngril kha ka hre chiang si a, Shillong-a min zui thlâk ve pawh khân a lunglêng lutuk kha a țap lo chauh ni berin ka hria; mahse, khati chung chung pawh khân a tlàwm theih miah loh kha maw, a luhlul hi ka ti khawp a; mahse, a hnuah kha chuan a tuar thei ta ngang lo va, a rawn be ta che a nih kha. Rilru hlim tak leh beiseina thar, thinlung thar neiin a rawn haw a; mahse, i hnên chu sawi loh, an in pawh a thleng ta hauh si lo, a accident tih ka hriat veleh ka rawn chho ve nghâl a; mahse, tih theih ka nei lo, a pawi ka ti a, ka inthiam lo va; mahse, awmzia a awm tawh chuang si lo," tiin a insût ta hraih a, chutiangin kei pawh, kan insût thãwm bâk chu thãwm dang awm lovin a reh tlawk tlawk a.

Remi'n min riahpui a; mahse, zàn dang aiin ka lâktlâk loh zâwk. Ka insûm thei lo va, ka țap leh rih țhìn a, Remi pawh ka tihrehawm viau; mahse, ka duh dàn a ni bîk si lo. Msi rawn ken Joshua thil ziahna lehkhabu leh a kawr min leisak luih țâlh chu ka pawm a, ka lungchhiat a zual zêl sî a ni. A lehkha ziak chu ka la chhiar ngam lo va, a kawr min leisak ni se ka la inthawlh chhin ngam lo bawk.

"Thilthlàwnpêk i dawng duh lo țhìn niin a sawi a; mahse, ngaihdam dìl nân che pêk ngei che a duh tih a sawi a, kei pawhin 'A duh loh chuan ti lui duh suh, i tlawnah a ngai rêu rêu ang a, a thin a rim phah zâwk maithei asin' tiin ka hrilh nghe nghe a; mahse, ani erawh chuan 'Tûn țum chauh hi chu a hre thiam ang, thinlung leh tihtakzeta ngaihdam dîl pahin ka pe ang a, ka tlawnna a ni lo tih chu a hre chiang bertu tùr a ni' a ti tlat a," tiin Msi khân min hrilh a nih kha. 

*******

Thla khat hnuah a lehkhabu chu ka chhiar ve ta chauh a, Shillong-a a awm laia a ziah mai mai a lo ni nghe nghe. Lehkhabuah chuan min ngaih thu leh a lunglèn thu a ziak kûr ve nguai a, Msi khân a journal emaw tiin a rawn țhãm chho tel a lo ni a; mahse, a ni lo tih a hriat hnuah Joshua thil ziak chu ka hmuh ve ngei a duh vàngin min rawn pe tel a lo ni. A țhen chu a hun a ziak lang lo va, a țhenah erawh chuan ziak langin chuta țang chuan a tam zâwk chu ka biak țhat duh loh zàn kha a ni tih ka hre thei.

Phêk khatna ațangin min ngaih thu a ziak hmasa ber zêl a, a thil hriat suala ngaihdam a ngaih thu leh tlàwm a tum thu nèn. Mittui tling pamin ka chhiar zêl a, a hawrawp chu uluk chiam lo mah se a mawi angreng phian.

*Anne-i ka ngai lutuk hi ka ngaih a țha lo hial a ni. Zànah ka mumangah ka hmu ziah a, a hnuah thisena inchiahpiah nuai hian ka hmu ziah bawk. Ka ngaih rêng a țha lo, a chungah thil țha lo a thleng a ni ang, a thleng a nih hlauh chuan ka inthiam thei tawh ngai lo ang*   tih hi phêk thumnaah chuan a lo ziak a, phêk lìnaah chuan *Min be țha duh lo, a thin ka tirim tih ka hria. Ni e, a thinrimthlâk alawm, ka hre thiam lutuk. Ani pawhin min ringhlel tho a, a zawhna ka chhàn țhat duh loh vàng a ni. Mipa a kalpui ka hmu a, ka thîk a, min lo kawp ru reng a ni ang tiin, ka rilrua hrehawm ka tihna hi hre ve chhin se ka tih vàngin Msi ka sâwm lui ta a, a duh lo chung ka sâwm a, a thawk țha ve viau mai, min ringhlel ta chiah bawk a; mahse, ka haw chhoh hunah hêng thil hi chu a fel vek mai ang, kan buaina bul hi ka tihsual a ni a, ka țan hmasak a ni a, keimah ngeiin ka tihsual chu ka siam țha leh ang*   tih hi a lo inziak ve thung a.

Phêk tàwp ber ti ila a ziah tàwpna ber phêkah chuan hawrawppui hian  *HE KHAWVÊLA KA HMANGAIH BER CHU ANNE LALDUHAWMI A NI, MI HMAIA ȚHUANGVUAK AWM HI MAWI KA TI NGAI LO; MAHSE, ANI CHUAN A MAWIPUIIN A INHMEH NGAWIH NGAWIH, ANI ANGA HMEICHHE NUNGCHANG DUHAWM HI KA TAWNG LEH TAWHIN KA RING LO*   tih hi a lo ziak kuau a, ka mittui kárah ka hmu phê ruai mai. 

Ani min hmuh dàn chu heti hi a ni tak si a, kei hian ka va phû lo sî êm! Nungchang duhawm tak nei ni ila ani kha ka thinrim khum dâwn em ni? A chungah pawh hetiang thil hi a thleng nâng, ka inthiam thei thlâwt lo.

"Joshua, ngaihdam i ni, ka ngaidam vek che aw, eng emaw hriat sual palh vàng mai mai a nih kha. Kei ngei pawh hi min ngaidam rawh aw, i bialnu nih kha ka lo va tlin lo tehlul êm! Sâwt tawh lo mah se, min ngaidam rawh, min ngaidam mawlh mawlh rawh aw," tiin ka phun sep sep a, ka mit ațangin mittui a tla zung zung bawk a.


*THUIN A SAWI FIAH THEIH LOH CHHÛNGRILA HREHAWMNA LEH LUNGNGAIHNA HI THIL HREHAWM TÀWPKHÃWK A NI*

Comments

Popular posts from this blog

☆KA TÂNA RUAT☆ - 1 By Dingdi Pachuau

☆KA TÂNA RUAT☆ - 1 By Dingdi Pachuau "School ațanga i hlawh ni lo, hmun dang ațanga sum hmuhna dang hlâwk tâwk i neih tâk ațang hian i induh deuh sawtin ka hria, tiraw?" nui chunga a rawn tih chuan ka melh rawlh a, a rûk tak erawh chuan ka nuih a za ngei mai. A fiamthu tih ka hria a, a dik lo hulhual tih hretu kan ni ve ve bawk. Kan pahniha inkârah hi chuan fiamthu hian hmun a luah sâng a, fiam pawh kan infiam nasa țhìn viau rêng a, thutak sawi pawh hian fiamthu sawiah kan inngaihsak fo a, hei erawh thil țha tak chu a ni lëm lo. "I duh duh han sawi la, ka leisak vek ang che," tiin, a hnu deuhah chuan uang tak hian ka chhâng lét a, nui hmêl pu duh miah lovin chapo hmèl tak hian ka'n dâk zui deuh vah a, ani lah chuan," Yess...!! Tak tak aw, Zarda pân ka ei châk tawh lutuk! Chu chu ni leh rih mai rawh se," a lo ti vat a, min rawn kheuh zauh pah hian a meng sawr sawr a, ka lama rawn thle phei deuhin," My name-a a rawn lang e," a ti zu...

☆KA TÂNA RUAT☆ - 35 By Dingdi Pachuau

☆KA TÂNA RUAT☆ - 35 By Dingdi Pachuau Ka tih luih deuh tlat avàng chuan ka awmpui ta nge nge a, ka sawi tìrh lamah kha chuan ka fiamthu emaw a ti a, min chhâng țha duh lêm lo, ka awmpui duh kha a ring chiah lo a ni maithei. A cousin-te lam hman an inti pawh bîk chiah lo va, a nu kha a rawn lang ve leh tawh bawk nèn, a nu kutah an dah ta deuh a; mahse, ani lah chu eng emaw thilah a hman lo leh thut ni àwm tak a ni. Mak ka ti ve deuh hlek a, a fapa thih hlauhthàwnawma a awm laia awmpui hman lo leh thuta a awm chu eng thil pawimawhah tak ni ang maw he ka lo ti ve mai mai a; mahse, U Rintea'n a zin hma zàna min hrilh leh tâk chu Joel-a accident hma ni hnih kalta khân a nu kha a lo zin chhuak tawh a lo ni. A chêtsual thu kha amah U Rintea ngeiin Pi Mawitei chu a hrilh a, ani chuan a zinna ațanga a la rawn haw theih loh thu a rawn hrilh a. A rawn haw hnuah a awmpui ta char char a, kâr khat deuhthaw a awmpui tihah eng emaw thilah a zin chhuah leh a ngai a ni àwm e. U Rintea zi...

☆KA TÂNA RUAT☆ - 36 By Dingdi Pachuau

☆KA TÂNA RUAT☆- 36 By Dingdi Pachuau "Fîmkhur ta che maw le! I intina țêp a nih kha," tia pakhat a țawng chhuah chuan ka inher ta vat a, Joel-a hnaih bera țhu ber chuan Joel-a kut chu a lo ensak mêk a, engtizia nge? Thisen ka hmuin ka hre lo va, chhuatah erawh a thil tih tlâk keh ni ngei ni tùr dârthlalang keh them a darh nuai thung. Eng thil nge a tih keh le?  "Engah nge i bân i vai duai a? Hmuh pawh i hmu lo rêng rêng em maw ni?" Chu pa vêk chuan a ti a," I intina lo hlauh, fîmkhur ve deuh tawh rawh," a ti leh a, kei chuan va pan hnai vatin," Eng thil nge ni? I intina lo tak tak maw?" ka ti a, tray ka la chawi reng avàng chuan Joel-a kut pawh chu ka zu vuan thei lo, ani erawh chuan melh pawh min lo melh lo hrim hrim, a kut chu a en vang vang ringawt a. A bula țhu a țhianpa vêk chuan," Na lo hlauh, a tlaw ve êm a ni," a lo ti leh a, tho chhuakin chhuata glass keh nuai chu a chhar kháwm zui a, chutia a tih tâkah chuan a bula...