☆KA BEISEINA☆ - 15 By Dingdi Pachuau

☆KA BEISEINA☆ - 15 By Dingdi Pachuau

Joshua thi chu tuarin hrehawm ti viau mah nî tin ka hna thawhnaa ka kal a ngai tho a, inti phûr lui takin, hlim hmêl pu luiin ka chhuak ve țhìn, ka hna thawh leh hmêl hlim lo hi chu a inmil hlawl bawk si lo va, a rûkin hrehawm ka ti țhìn tak zet. A rûkin ka inkhawngaih a, hlim leh thei tùrah ka indah hek lo. In ațanga ka chhuah chiah hian min lo nghâk dâwn tlata hriatna ka nei ziah a, a lo awm dâwn lo tih hre chiang viau mah ila zawngin ka hawi kual ziah tho. Tlai bànah ni se min thlah tùrin min lo nghâk leh dâwnin ka hre ziah bawk. A hrehawm asin, ka rilru ațang hian ka paih bo thei thlâwt lo, ngaihtuah loh tum pawhin kan lo inthlah kual ngun ve lutuk tawh a, bâkah, dàwr kawng hrim hrim hi kan pahniha kan inhmuh ve theihna hmun kha a ni ve bawk a, ka ngaihtuah chhuak ziah pawh hi a àwm viau. Phûr lo zet leh mal zetin ka haw hnang hnang țhìn, dik tak chuan ka engtih mah hi a tui hlawl lo, engkim hi a tàwpin a chàwl țhup vek ni maiin ka hre hial țhìn, chu vàng chuan suangtuahna rama amah nèna chèn veng veng nuam ka ti ber a; mahse, chu chu thil țha ber a ni lo tih erawh ka ngaihtuah chhuak thiam ve thung.

Joshua thlànah vawi thum chu ka kal tawh a, duh ai chuan ka tlawh zing lo nain hun ka nei lo ve ém mai a, ani pawhin min hriat thiam ka ring. Ka pangpár siam ngei chu ka kensak ziah a, a tâna ka tih theih tlêm ta lutuk hi hrehawm ka ti țhìn. Ka ngaihdam thu ka hrilh rualin min ngaidam ve tùrin ka ngèn ziah a, a chhan chu a thihnaah hian mawhphurhna ka nei ve tlat a, ka inthiam thei lo, a uin min rawn be zauh zauh a, ani pawh hi țha tak chuan ka chhâng tho a; mahse, a lakah hian ka inthlahrung ngawih ngawih.

Min dàwrtu an rawn tam deuh châng hian hahthlâk viau țhìn mah se ngaihtuahna ka kàwm hman lo va, a zia viau. Didiki'n min ngaihtuah a, hun ãwl hlekah chuan min biain min tihhlim a tum viau țhìn bawk, ani pawh hian Remi ang chiahin min ngaihtuah a, ani hi ka lo tawng lo ang tih ka hlau țhìn. He thihna lo thlen ațang chiah hian ka țhiante hlutna ka hmu chiang zual a, ka tãn țhian an lo ni tak zet a ni tih pawh ka hre chiang hlê bawk.

Nula ve ta fam chu tlangvâl min han chhaih fiamtu ka tawng chho ve leh ta zauh zauh a; mahse, ka rilruah hian mipa hi an thî ni berin ka hria, ka ngaihven lo va, melh pawh ka melh ngai lo. Joshua laka inthiam lohna neiin ka nung a, nung reng chung hian ka thî ni berin ka hria. Heti khawp hian ka lo ngaiin ka lo duh thei ang tih ka ring pha lo, a awm loh hnu chiah hian mihring nun lo tàwizia, nunna chungchânga thu kan neih lohzia leh tih theih kan neih lohzia ka hre chiang deuh deuh. Pathian beisei lo phei ila chuan he khawvêlah hian mi retheite hi chuan dam chhan tùr hi kan va nei lo tak êm!

Ka nu leh țhiante'n min țanpuiin min țawngțaisak nasa bawk a, ka nun chàu leh lungngai lutuk chu tlêm tlëmin a zia chho ve hret hret a, chutia ka tih avàng chuan Joshua ka theihnghilh ta ka tihna a ni lo, ka hre reng a, ka thinlung hian a ngai a, a theihnghilh hauh lo; mahse, mitthi ngaia indawm kuna hlim lo reng tùr ka ni lo tih ka hre chho ve tial tial a, Pathiannia inkhâwm pawh ka ti chho leh tawh a ni, Joshua boral hnu ațang kha chuan dàwr lama ka chauh chhuanlamin zàn inkhâwm chu sawi loh, Pathianniah pawh ka inkhâwm ngai tawh lo a nia; mahse, ka lo tisual a ni tih hriain kohhrante inkhâwmnaah chuan ka tel chho ve leh a, inkhâwm lova thil țûl lo ngaihtuaha rilru sêng vak vak țhìn kha tunah chuan Pathian fakin hlim takin thinlung takin ka zai ve leh thei ta, rilru ngui taka awm kha Pathian duh dàn a lo ni hauh lo, Setana hmanrua mai a lo ni, mahni inkhawngaihna ka neih pawh kha Setana hmanrua vek a lo ni, Hma lam huna beiseina neih hi ringtute vànneihna a ni a, beiseina nei lova engkim mai a tàwp ta vek emaw ka tih tlat kha Setana min beihna a ni bawk.

'Mihring chu buai taka kan awm hian thil țha lo lam ngaihtuahin rilru kan sêng hman lo' tia ka nuin min hrilh țhin avàngin ni tin buai taka kan awm chu ka vànneihna a ni ka ti ve tlat. Chhùna kan buaia ka chauh hnâp hian zànah hma takah ka mut theih phah a, taksa a chauh tlat chuan zàn men rei a har a, tui takin ka mut theih phah țhìn a ni.Ka thil ei tui lo leh zàn mut theih loh vànga ka taksa tla dâwk pawh ka zia chho ve leh hret hret a, ka nuin a theih ang angin min duat bawk nèn, ka zia tawh lutuk tlat.

*******

Hruaia

~~~~

Thil țûlah ka chhuak ve fo a, kohhran member tlawh kual leh committee pêng hrang hrangah ka chhuak ve fo bawk. A chângin min rawn panchilh ve tho bawk a, nilêng lênga țhut châng a awm lo thei lo nèn, thil hahthlâk tak nia lang si lo hian kan zawh meuh hi chuan ka chàu ve rawih țhìn; mahse, nupui hi ka nei fel êm mai a, min ngaihtuah a, a kianga ka awm meuh hi chuan ka chau tih hi ka theihnghilh leh vek țhìn.

"Programme i neih loh kâr, i àwl deuh kârah Aizâwl lamah kan zin chho dâwn em ni ang?" a tih chuan," A pawi hleinem, eng nge tih duh deuh i nei em ni?" ka han ti zui zat a, ani chuan," A, nei chuang lo ve, han zin chhuah ve zauh zauh hi a nuam ve a, bâkah, chhûngte kan hmu khât leh tawh alawm," nui chung hian a lo ti a, ka pawmpui viau. Ni e, kan zin leh ngei ang, bâkah, hun insiam ve zeuh zeuh pawh hi a țha. Pastor nupui ni mah se mihring ve tho a ni a, lunglêng thei leh khawhar ve thei a nih rualin zin nuam ti mi a ni a, ka nupui a nih vànga nuam a tih ber țhin 'zin vêl' kha nuam a ti lo thut dâwn lo tih pawh ka hre chiang a, a duh dàn hi tihpuitlinsak ka tum ve hrâm hrâm țhìn. 

Kan pahnih chauhin kan awm si a, a châng hi chuan a khua hi a har ve êm êm ang tih ka hria. A nulât laiin chhûngkaw hung tak bulah awmin a khawsa țhìn a ni a, nun khawhar hi a tem lo ang tih a hriat hliah hliah, an khawsakna hmun lah khawpuiah pawh khawpui lùn lutuk Mumbai a la ni zui a, Mizoram nèn hi chuan tehkhin chi a ni mawlh lo. Kan inneih hnuah vawi khat chu ka zin thlâkpui tawh a, ka hna thawhah hian mahni duh dàna awm leh duh duh huna zin ang kha a remchâng ve tawh si lo va, chuti chu ni lo se chuan zinpui zauh zauh a pawi loh tehlul nèn, ka thei bîk si lo va, a rûk tak hi chuan ka khawngaih țhìn.

Mahse, games khelh hi a peih hlauh a, hmun danga min zui theih loh châng leh min zui mai a remchàn loh chângte hian a khawhar dâlah games hi a khèl mai țhìn a, ka sawisêlsak ngai lo. 'Pastor nupui ve si games khelh hrât lutuk' an tih tùr khawp erawh chuan a khèl ngai lo thung, puitling a ni tawh a, mi hmuh atâna mawi leh mawi lo hre rual a ni a, a tâwk chin chu a hre ve alawm, hemi kawngah hi chuan ngaihtuah ngaiah ka dah lêm lo, a la țhalai ve rih bawk a, nakinah fate kan neih hunah phei chuan khelh pawh a khèl thei tawh nâng.

Quarter kawt leh a chhehvêlah hian pangpâr leh thlai a chîng ve țhìn a, a peih reuh phian a, pangpâr hi chu mawi ka ti ve tho nain a hmeichhe hna deuh hlek a, min sawipui ngai lêm lo bawk. Thlai rah leh hnah lam, hmarchapui, purùn, bean, dhania, hmarchatê, anțam leh sawhthing tih vêl pawh hi a thar chhuak a, kan lei ngai lo, kan ei a tam lo bawk nèn, a châng phei chuan țhenawmte pawh kan pe ve hial țhìn, mi thilphal chi a lo ni bawk a, mi khawngaihna pawh hi a ngah viauin ka hria, a bulah ka awm tam telh telh a, sawisèlna tùr hi ka hre hlawl lo a ni ber e.

"Kan thlai tharte pawh hi chhûngte thartem ve ila a țha ang, tui an ti ve dâwn êm asin tiraw?" tiin bucket téa a thlai rah lawh chu dawhkànah chuan a rawn bun chhuak a, ni sain a chhunna a hmai chu a sen deuh chal a, a thlan deuh hliam bawk a; mahse, inhmeh ka ti, ka tân chuan hmuhnawm tak a ni ringawt. 

Ka en deuh reng vàng chuan ka chhâng lawk lo va, rawn hawia," Min chhâng la, a mak thei vung vung êm mai," a rawn tih tâkah chuan rang fê hian," Nia, tui an ti viau ang, an lãwm ngawt bawk ang chu, i thar chhuah ve liau liau a ni bawk sia, a làwmawm dàn a ril lehzual êm asin," ka lo ti ve a, ani pawh chuan," Țhenawmte pêk leh hlek ka duh dâwn sia, chhûngte kensak tùr chu a tam vak thei dâwn lo a ni; mahse, tam lo mah se kan thar chhuah a ni ve a, ei ve hrim hrim se tih kha ka duh chu a ni mai a," a ti leh siam siam a.

"I va han ngaihtuah kim tak êm aw...!! Nupui fel hi chu i tling ve chiang alawm tiraw?" ka tih chuan a nui sak a," Fakna hi chu ngaihthlak a nuamin hriat pawh hi a hahdam teh e," a lo ti hlak a, a thil sawi dàn avàng chuan ka lo nui ve ringawt. Ka rilru tê tê chuan," Nang anga fel hi mi zawng zawng hi ni vek ta se hringnun hi a va nuam dâwn tak êm! Ngawi tak rawh, hun ãwl remchâng kan neih veleh Mumbai lamah, i chhûngte tlawh tùrin ka zin thlâkpui khawp ang che, i phû tawh hrim hrim," ka ti mawlh mawlh a.

Aizâwlah chuan kan zin chho ta ngei a, boruak pawh a inang lo khawp mai. Kan chhuak tlai deuh a, kan thleng hma lutuk lo; mahse, chawhnu dár 3 vêlah kan thleng chho tho. Ka pain Irene-i chawhmeh thartem zînga Anțam tël a han hmuh chuan," E khai, a va han fresh sawr sawr ve! A tui ngawt ang, zanriah hmehah siam nghãl tùr a nih kha," a lo ti vat a, ka nu leh Ahlutei lo la haw hek lo le, kan awmpuinu chuan a lo dah fel zung zung a, ka pain," Anțam kha zanina ei tùrin siam tùr a nih kha," tiin a han au zui leh a.

Zàna chhúngkua kan han inhmu khâwm chu kei ngei pawh ka hlim viau a ni, damlohna leh hrisèl lohna, han insàwisèl deuhna lah kan nei si lo va,  dam taka chhûngkaw inhmuh khâwm hi a lo nuam a nih hi. Ka nu pawh chu hlim takin a țawng ve bawrh bawrh a, ka chungah lungni lo hmêl a pu tawh lo bawk a, a lo dam țha viau tih lah chu a hmêlah a hriat reng mai.

Ahlutei chuan," Tún țum chu châm ve deuh reng ula ka va ti tak!" a ti a, kei chuan," Engati maw?" ka lo ti a, ani chuan," Țawng thu chhe lovah, kan tlêm tawh sia, awmchhun lah hian dàwr nghah kan ngai a, ka pa lo kàwm hlim tùr takngial pawh kan awm thei lo va," a ti leh mai a.

"Châkawm viau mah se mahni thu thua awm reng thei kan ni tlat si lo alawm, Pathian zâra dam chuan hun țha a rawn inher chhuak ve leh mai ang chu maw?"  ka tih chuan Irene-i pawh chuan," Ni e, hun thâwl hi kan melh ve reng a nia, nakinah Nùteite rawn haw chhoh hunah phei chuan rei tak châm tùrin kan rawn zin ang," a lo ti ve a, a dàwr chungchâng chu a han zâwt zui zat a.

Zàn mut nán a la hma deuh sia, Irene-i pawhin games a khèl leh mai mai a, kei pawhin 'mut hma chu' tiin Ahlutei room lam chu ka pan leh rih a, ani pawh a lo la mu bîk lo. Kan han titi ve luam a, a bialpa chungchângte ka han zâwt bawk a. Tawng duh deuh chu ni lo mah se nèlawm taka awm dàn hi a thiam a, a châng chuan zirtîrtu ni se tihna rilru ka pu țhìn, naupangin an ngaina ngawt ang, ka nau mah ni se fel ka ti ve țhìn.

"Mâm, thil ka ngaihtuah chhuak thut. A remchângin a țha dâwn riauin ka hria a, hei ai hian hun nei deuh hlek la ka ti ngawt mai, nang chu pastor i nia, hun hrehawm tak paltlang mêk ka chhawr zîngah hian a awm a, kawmna hun nei thei la ka ti! A nih loh pawhin țawngțaina hun tal neihsak thei la..." a ti duah a, ka en vang vang hnu chuan kei chuan," Eng nge a buaina chu ni a? Kàwm tùrin min duh ngawt mah la, a lo duh kher nâng, hmuh pawh min lo hmu duh lo maithei asin, hmel hriat ngai loh kawm phei chu a duh dâwn em ni?" ka ti ve thung a.

"A duhin ka ring, a nun a hlim lo lutuk a, a bialpain tlëm lai deuh khân a boralsan a, a fel reuh sia, ka khawngaih êm reuh a maw le, a tân tihsak theih ka nei hauh si lo. Nangin i kawma i țawngțaisak chuana ziain ka ring tlat, bâkah, i țawngțaina chuan keia țawngțaina ai chuan rah țha a chhuah ngeiin ka ring bawk," a tih chuan ka en leh vang vang a, ka nau hi ka lo tluk lo hle mai ka ti, a hnuaia thawkte a lo hmangaihin an chanchin pawh a lo chîk viau a nih hmèl a, a en hran lohzia, a ngaihsak reuhzia leh a dahpawimawh reuh sizia a lang chiang viau alawm, ka chhuang reuh teh e.

"Hun remchâng a awm phawt chuan le," ka ti ve ta a, ani pawh chuan," A làwmawm dâwn êm mai, hun remchâng chu insiam hrâm mai rawh aw, ani pawhin țawngțaisak chu a duh daih zâwk ang, ka lo thlîr reng ang che," a ti a, chumi hnu chuan rei awm tawh lovin kan room lam ka pan ta nghâl a, ani erawhin games a lo la khèl tho ngang niin, a khèl laklawh deuh a ni ang, ka biak pawh chuan," Aw ka zo țêp a ni, ka khèl laklawh reuh lutuk!" a ti rêng a, khumah chuan ka lo zâl mai mai a,  a inpeih hunah rawn mu ve mai teh se, a inphih fai vek tawh tho.

A tûkah chhûngte tlawh kualin kan chhuak a, a nu leh pate hetah awm ve lo mah se an in pui ber, a pi leh pute leh a pateate chhûngkaw chènna hi Aizâwlah a la awm tlat a, a chhûngte in kan tlawh hi chuan hei hi kan tlawh țhin chu a ni, an in pui ber a ni miau mai a. Zanriah ei tùrin min lo sâwm zui zat a, kan hnial lo, a pu hi pastor ve tho a ni a; mahse, a chawlhna a rei tawh thung, a upa ve viau tawh bawk, a tunu pasal pastor ve tho a ni hi a lãwm ve viauin ka hre țhìn.

*MI DANG NÈN INKHAIKHIN NGAI SUH, I INKHAIKHIN TÙR AWMCHHUN CHU NIMIN LAMA NANGMAH KHA A NI, NÎ TININ NIMIN AIA ȚHA KHA NIH TUM ZÊL THUNG RAWH*