☆KA BEISEINA☆- 16 By Dingdi Pachuau

☆KA BEISEINA☆ - 16 By Dingdi Pachuau

Nizàn lama ka nawmsam meuh loh avàngin zîngah ka tho har deuh a, ka tho nuam zân lovin ka lu a rit bûr mai. Peih loh thu sawi ila chuan ka nuin kal lo mai tùrin min ti leh ngei ang tih ka hriat avàng erawh chuan eng mah ka sawi lo va, bâkah, ka nute rilru hi ka ti hahin ka ti hrehawm rei ve tawh a, nawm loh thu hrilh lehzêl pawh hi ka inthlahrung zozai ve tawh a ni.

Muangchângin kawngah chuan ka kal a, ngaihtuah chhuah duh lo viau mah ila Joshua ka ngaihtuah leh vang vang tawh. Ani kha chu la dam se chuan aw... heti khawp hian ka mal lo deuh tùr hi a nia. A tel lova hun ka hmanna pawh ni tam a ral ve leh tawh a; mahse, ka ngai êm êm reng a, vawi khat tal hmuh leh theih ka châk tak zet a ni! Ka mumangah ni se hmuh ka tum viau pawhin ka hmu thei ngai lo, a boral ațangin ka mumangah ka la hmu hauh lo a nih chu! Hmuh ka châk asin, mumangah tal hi chuan hmu thei ila a zia deuh tùr, thil ho mai mai leh hrehawm deuh deuh mumanga hmuh ai chuan ani kha han hmu thei ila...

Motor horn rî vàng chuan ka phu zawk mai a, hre thiam lo tak chuan dâk chhuakin ka han hawi a, kawng sîrah ka lo kal rêng rêng tawh lo niin, kawng laiah kalin traffic ka lo ti jam lo chauh a lo ni! Ka zak kher asin, ka hnaih ber car driver hnênah chuan ngaihdam ka han dîl zawk zawk a, hmanhmawh takin ka kal sawn zui ta nghâl a. Mi ã emaw min ti ngei ngei ang chu, a va zahthlâk tak! Thil ngaihtuah vak vak hi ka tàwpsan a ngai, chuti a nih loh chuan motor-in min la su hlum mai ang.

Dàn ngai tein vawiin pawh kan lùn leh viau e. Mite hian pawisa hi an lo nei hi ka tia, ni tin hian min dàwr tùr hi an rawn kal reng a, chatlak hi a awm mang lo ti ila a dik ang, zawrh chhàwn leh tùra min rawn dàwr hi an tam zâwk a, a mala hralh pawh kan nei tho, ni khata kan hralh chhuah hi a tam asin. Ahlutei (ka ti ve ringawt, han pì dâwnin a duh mang si lo va, koh mai dàn tùr ka hre lo a ni) pawh hian pawisa chu a ngah reuh ngawt ang le, bungraw chatlak lai hi a awm pawhin ka hre lo ka nghah ve hnu pawh hian. 

Buai hi ka duh zâwk ka tih tawh kha, chhùn chawlh hma zawng chu ka vir buai a, mi dang pawh an ni ve tho ang chu. Kan han chàwl a (ei tùr hi hmun dang ațangin Ahlutei hian a order mai țhìn a ni) ei tùr kan ei malh malh lai chuan mipa țawng rî ni àwm tak hi ka hria a, hmeichhe nui rî ka hre bawk, Ahlutei'n inlêng a nei a ni ngei ang.

"Pi berin inlêng a nei a nih hmèl," Didiki chuan a ti zauh a, kei pawh chu ka lo bu ve mai a, amah vêk chuan," A bialpa pawh a ni maithei a ni, a țawng a thùm dàn ațang chuan pa tê a nih loh hmèl," a ti leh a, ka lo nui ringawt. Hmu miah lova a rin thu a sawi vêl chuan ka nuih a tizâ, kei pawhin ka hrât ve tho a, Didiki hi ka dem hran miah lo a nia, a nuam ve alawm.

Ei tùr kan ei zawh hnu chuan kan chhuk ta a, in chung lamah a nia kan chawlh țhin ni. Ahlutei chuan inlêng chu a lo nei tak tak a; mahse, an hmêl ka hmu lo, min hnungchhawn bawk sia, han thlêk deuh reng ila chuan ka hmu mial mahna; mahse, thil nuam leh mawi lêm lo va, ka en duh lo hrim hrim a ni.

Thuamhnaw khai ka siam țhat lai chuan," Khi chu a mawi hle mai, a man pawh a to ngawt ang a?" tia țawng thãwm ka hria a, ka inher vat a, ka piah lawkah chuan thuamhnaw ka khai țhat chiahin a hliah deuh lek lek hmeichhe kawr dum chu kâwkin Pu Hruaia a lo ding reng mai! Ka en ngawt ngawt a, ka hmu deuh thut bawk nèn, engtia rei nge ka en pawh ka hre lo; amah zâwkin nui chunga min rawn pan hnaia," Khawngaihin ka lo en chhin thei ang em?" a tih tâkah chuan ka harh chhuak ve chiah!

"Aw... le," tiin ka hawi lêt vat a, ka en vung vung chu mak min ti ngawt ang, a va chêt chhiat theih tak êm! Inhau ru mawlh mawlh pah chuan a en chhin duh tak kawr chu ka lâk thlâksak ta thuai a, an nu tân a en duh a ni ngei ang chu, hmmm... tunah pawh hian ka rin dàn ka kalpui leh mêk tawh a ni. "Hei aw, ka pu," tiin nui hmêl pu lui deuh hian ka han pe a, ani pawh chuan a lo la ve mai a; mahse, min en ve vang vang a, nuam lo ka ti rilru khawp mai, miin min en rêng rêng hian ka lài hma êm êm a, ka hmai țhuangvuak nasat vàng hi a ni pakhat a; mahse, Joshua'n mawi a tih tlat țhìn vàng chauh khân tlêmin ka confi chho ve ta deuh kha a ni a; mahse, tunah a awm leh tawh si lo va, ka confi leh tawh lo a ni.

"Khawiah emaw hmu tawh tlat chea inhriatna ka nei!" a rawn ti chhuak ta a nih chu, mak ti takin ka en hau a, engtin nge min hriat tehlul ang? Ani hian min hriat chuan... a mak ngawt ang! A ti der mai mai nge a ti tak tak ni ang?!! Min hmu tawh chiang alawm hmuh chu; mahse, min hriat chu ka ring lo, mi hmêl a hmu tam tawh dâwn lutuk a, hmêl inang tak tak leh inang lo tak tak pawh a hmu țeuh ngei bawk ang, chûng zîngah chuan a hmêl hriat tu emaw nèn min hriat pawlh pawh a ni mahna! Kei hi chu min hre kher lo ang.

"Min lo hre thiam la, dàwr nghâkin khawiah emaw i thawk thawh em? Chutah chuan a ni em kha aw ka hmuh tawh che kha le?" a ti leh vang vang a, ngaihtuah lêt ni àwm takin a han meng zîm deuh a, Pi Chhani dàwra ka thawh laia a rawn kal kha a ngaihtuah chhuak ve a ni maithei a ni; mahse, vawi khat min hmu thuak a ni mai a, min hriat zui ngaihna a awm lo. E, ni dâwn tak! Ka hmai țhuangvuakah hian a hre chhuak a ni ngei ang, min hre ngai vak lo pawhin ka ngei deuh ka hmai țhuangvuak ațang hian min hre mai țhìn a nih tak kha.

"A nih, Kolasibah i lo kal tawh em?"  Ka chhàn lawk loh vàng chuan a rawn ti leh a, min en rùn mai bawk si a, ka zak deuh nèn, men ngaihna ka hre lo kher mai.

"Kal lo, ka la kal miah lo," tiin ka chhâng ve ta hrâm a, ani chuan," A ni maw? Ka hre sual em ni? Mahse, chu chu niin ka hre si lo, ka hmuh hnu chu i ni ngei mai. A nih leh, he dàwr ni lo, khawi dàwrah emaw i thawk tawh mial em? Ka dîlchhût deuh hlek a, min hre thiam a ni ang chu, ka hriat hnu, ni lo, ka hmuh hnu i ni tlat si a," a ti leh a.

"Pi Chhani dàwrah ka thawk tawh a," ti chauhin ka chhâng leh a, Pi Chhani dàwra ka thawh laia a rawn kal thu leh pangpâr a rawn lei thu erawh ka sawi chhuak mai duh bîk lo. A pangpâr bâwr lei pakhat pawh kha ka thlansak a nih nghe nghe kha; mahse, hrilh ka tum chuang lo.

A ngaihtuah chhuak ve a ni ang," Aw ni dâwn tak e, pangpâr bâwr pawh Pi Chhani dàwrah khân ka rawn lei tak kha alawm. A lo nih chiah chu. E taka, eng nge anni kha an chanchin ni ta zêl? An pa kha a hrisêl lo viau niin ka lo hria a," a ti leh a, a fel hi chu ka ring sa ve tawp a, pastor lai a ni bawk sia; mahse, ka rin aiin mi a besawm peih ka ti thung, a inlâk puithùa a inhmuam ûp viau ka rin tehlul nèn.

"Ka hre chhunzawm ta miah lo," tiin inthiam lo deuh tak chuan ka chhâng a, a rûk tak chuan ka zak angreng viau mai. Ni e, an chanchin hi ka hre chhunzawm ta tlat si lo va, a hma kha chuan phone-in an chanchin kha ka zâwt ve mai țhìn kha a nia, Joshua boral hnuah phei hi chuan ka be leh tawh lo hrim hrim!

"A nih tak chu. A, inbiak reng pawh hi a harsa ve a, kâr a hlât deuh bâkah chhûng hnai tak nih loh phei chuan chanchin inhriat tawn reng hi chu harsa ve deuh mai a nia," a ti leh a, ka inthiam lo deuh tih a hria a ni maithei," I hriat tâkah tiin ka zâwt mai che a nia," tiin nèlawm tak hian a rawn nui leh ta suk a.

Min be rei angreng sia, mi dang ka buaipui hman lo, customer a ni ve deuh tho nain thawhpuite, buai ve tak tak kârah chuan nuam lo ka ti angreng viau a, ka inthlahrung ru deuh bawk. 

*******

Hruaia

~~~~

He nu hi ka hmuh hnu ngei a ni. Ka hre chiang, ka hmuhna tak erawh ka hre chhuak thei mai lo, a insawi tâk hnuah erawh chuan ka hre chhuak leh a. Pi Chhani dàwra ka hmuh lai nèn khân a lo danglam tawh viau mai a, a lo chérin a mit khurte chu a tla deuh dâk tawh a, ka hre chhuak mai lo pawh hi a àwm tho mai ka ti; mahse, a hmai țhuangvuak tê hian a ti danglam reuh a, vawi khat hmuh chian tawh chuan theihnghilh leh mai theih chi a ni miah lo, kei pawh khân ka hmuh tawhna hmun ka hre chhuak lo mai a ni.

Ahlutei hnên ațangin a chanchin ka hriat theih chin chu ka hre vek tawh a, a hmêl ka en hian a rilru tùr chu ka hre thiam ve ruak tho. A hmêl dul raih leh mit meng hlim lo zet hian khawngaih thla a la hliah hliah reuh a, hlim lo hlê mah se hlim luih a tum tih a hriat viau bawk. He nu hi ka hmu tawh a ni, Pi Chhani dàwrah ni lovin khawiah emaw ka hmu tawh a ni, a hmai țhuangvuak hi chu thuhran, a mit meng ka en hian khawiah emaw ka hmu tawh tlat a ni. Ka han ngaihtuah lêt vang vang a; mahse, ka hre chhuak thei tawh lo.

Chu lam chu dah bo phawt teh ang, Ahlutei min ngenna lam zâwk kha, "Ka lo țawngțai ang che chu," han tih ngawt chi a ni dèr mai si lo va, amah lah hi a zakzumin min nèl loh hmèl bawk si, chhuanlam siamin ka pan tawh a, han kalsan ngawt lah chu a tih chi bawk si loh.

"Ka pu, kawr chu la la? Nge rawng hran khi ka rawn la leh ang? I en duh em?"

Kawr chungchâng ka lo theihnghilh daih tawh niin, ka biak luam tâk vàng a ni, ka lo la keng reng nghe nghe a; mahse, kawr hi chu a pawimawh hran lo, ka chhuanlam mai kha a nia amah ka biak duh vàng chauhin.

"Duh lo ve, hei hi a țha, ka la ang e."

Ka kal sawn ta a, a rûk deuhin ka en leh zauh zauh thung. Ka hmuhna hmun hriat chhuah tum chuan ka han ngaihtuah lêt leh a, ka thluak ka han sâwr bing a, ka hmu tawh alawm. Hmai sen deuh têk leh hmai țhuangvuak nasa deuh, common lo deuh hmêl ngei kha, hriat chhuah ngei tum chuan ka va melh leh zauh a. Aw, tuna a lan dàn ang tak saw, a benga a sam zep pahin a nui sak a, a thle deuh hlek bawk a... ka hre chhuak ta, kha maw, ka hmu tawhin ka hre tawh ka tih rêng kha; mahse,  a rei ve tawh êm a ni. Chhùn khaw lum deuh nîin vûr a zuar a nih kha, vûr sen ngei mai kha, khatih lai kha chuan hmeichhe naupang kum 11 emaw 12 emaw vêl bâk a la ni lo tawp ang. A vûr ka leisak a, a bula a dah a tui vâwt pawh ka insak hial a nih kha. A țhiannu a bula lo awm ve lah khân," I va inhralh thei êm êm! Anne, a zawh hmain a lawm nân pakhat chiah min khilai ve rawh aw," a ti nghe nghe, a hming pawh 'Anne' ngei a ni. Hmeichhe naupang, khaw lum vànga hmai sen deuh têk, hmai țhuangvuak ngah deuh nui sen sen kha, kha nu ngei kha. Khatih lai hun pawh khân a hmaifang kha a dik reuh a, nula hmêl țha takah a lo țhang lian chho ta chiah a nih hi.

Mahse, kan vênga mi ni ngei tùr a ni si a, engati nge Ahlutei khân vêng dang daih angin a sawi? Kan vêng chhûng thil tihna ngeiah khân vûr kha a zuar a nih kha, chuti si, kan vêngah an awm tawh lo tihna em ni?

*******

Phûr lo zet chuan ka haw leh hnang hnang a, dik tak chuan nizàn lam ka nuamsam lo kha ka la nuamsam lo chhawm zêl a, tunah tak phei hi chuan ka pang pawh hi a sa tawh hialin ka hria, ka lu pawh a na ut ut tawh bawk. Joshua kha chu la dam se chuan kein ka haw àwm tawp si lo va, a car-ah nuam taka țhuin ka nawmsam loh thu ka hrilh ang a, min ngaihtuah ngawt ang chu. Tûn ang hunah hian ka ngaih a zual, ka tân a awm a ni tih hriat kha a nuam țhìn a, ka thla pawh a ti muang țhìn a nih kha.

Horn ri vàng chuan ka phu deuh zawk a, horn rawn petu pawh en lêm lovin kawng chu ka kian zau ta sauh a, dik tak chuan horn pêk ngaia awm hi ka zak ve tawh. Ka lo ngaihtuah mûk leh deuh tawh vàng a nia, ka la bànsan hlei thei meuh lo a ni e.

"Anne-i a ni reng mai ka ti. Lo chuang la?"

Ka hminga min kotu chu ka en vat a, ka rin loh deuhin Pu Hruaia a lo ni! Mak ka ti ru viau mai, engtin nge ka hming a hriat?!! Ahlutei hnên ațangin a ni ngei ang chu. Ka en deuh reng a, ani pawh chuan nui hmêl pu hian min en ve tho a, a lang nèlawm ka ti tak zet; mahse, ka zah.

"A ngai lo, hei kein ka kal thei a," tiin ka hawi sawn zui ta nghâl a, duh lo viau mah ila ka lai ru kher asin, he pa bulah hi chuan ka la lài chhe êm êm tho reng a la nih hi, a thuhrimah kan pahnih chauha chuan chu ka duh hleinem, a bulah a nupui kha a chuang miah lo niin a lang lehnghâl si a.

"I thleng hma thei zâwk ang, lo lût rawh, hei a hma lamah hian rawn lût la, a hnung lam chu bungrua ka dah hnawk nuai si a."

Hnial ka duh viau nain a ding ve reng bawk si a, hnial viau kha a polite loh thlâk bawk si, ka rilru a ti buai, han din reng pawh chu ka lu a rawn na tur ut ut tawh bawk nèn, a hnuah erawh amah zah vàng chuan ka lût ta nge nge a.

"I nuamsam zân lo a ni maw?" kan tlàn chhuah hnu chuan a rawn ti leh ta a, thil a hre thei ka ti kher mai, ka hmêlah a lang viau a ni ang, a nih loh pawhin ka cheziaah ka lo ti lang viau pawh a ni thei tho.

"Ka lu hi a na deuh hlek a," ka ti ve mai a, ani chuan," I hmêl leh mit meng ațang khân a hriat tlat a ni, damdawi ka kawl tak asin, ei rawh aw?" a rawn ti leh a," A ngai lo ang, in ka thlen hunah--" sawi pawh ka sawi zawh hma chuan a rawn phawrh a, min rawn pein tui bottle pawh chu min rawn pe leh nghâl zat a, han hnial theih pawh a ni lo, kawng sîr rem laiah chuan a ding a, damdawi ka ei hun chu a nghâk a ni ngei ang.

Ka ei hnu chuan a tlãn ve leh mai bawk a, kan in awmna min zâwt a, ka hrilh hnu chuan a țawng zawm ta bîk lo, ka țawng peih a ring lo a ni ang. A khalh dam hle a, a tlän chak viau hran lo nain motor a tam lêm lo va, a khalh pângngai viau. Kan in bul kan thlena a din chuan làwmthu hrilhin ka chhuk thuai a, a tlai tawh tho bawk sia, kan ina a rawn luh ve loh hrâm ka beisei. Ka beisei ang ngei chuan motor ațang chuan a rawn chhuak ve lo va," Damdawi khân a chhâwk thuai mai ang che, chaw ei tui le," a lo ti daih a, a tlãn chhuak zui ta nghâl a, ka thaw huai mai.

Zanriah chu peih lo chung chungin ei loh aiah tiin tlêm te ka ei ve hlek a, damdawi ka ei bawk sia, ka kua a ruah loh nân ka ti a ni; mahse, ka damdawi ei khân min chhâwk lêm lo a ni ang chu, ka khua chu a rawn sik zui ta hluah mai a, han mut nghâl mai chu hreh ru ve deuh mah ila khawsik hluah chunga ka nu bula men ve reng chu tih chi hek lo, ha nâwtin ka hmai ka phih a, khumah chuan ka mu ta thûn a.

Țawng rîin min ti harh a, ka lo muhìl a ni chêk ang chu, ka hre thiam lo khawp mai a; mahse, ka hre thiam ta thuai, ka zun a chhuak kher mai, țawng rîin min ti harh ka ti tak nain ka zun lo chhuak lutuk hi ka harh phahna pawh a nih tho ka ring, țawng ri chu ka han ngaithla chiang deuh a, ka nu țawng loh kâra țawng chu Pu Hruaia aw a ni chiang mai! A rawn kal a ni maw? Eng nge a rawn tih le? Ka nawmsam loh vàng khân chanchin a rawn ngaihven tihna em ni? A va âwihawm chiah lo e. Ka zun chu chhuak viau mah se zung tùra va chhuah chu ka hreh ru viau mai, kan toilet lah bathroom nèn inzawmin kan choka bulah a awm a, zung tùr chuan ka nute awmna pal tlang ngei ngei a ngai dâwn bawk si.

Ka lu nâ a zia tawh a, khawsik erawh a la awm reng tho a, peih lo tak chuan ka tho ta nge nge a. Pu Hruaia leh ka nu an lo ni tak tak a! Eng nge maw a rawn tih ni? Ka nu chuan eng nge ka an tawh tih min lo zâwt vat a, ka zia tawh thu ka hrilh ve mai a. Pu Hruaia chu kan ina rawn lêng a nih vàngin ka be ve thuai bawk a.

Toilet ațanga ka chhuah chuan ka nu chuan," Bawihte, i lo chhuak ta rau rau, lo țhu ve lawk rawh, i nau ka'n ko bawk ang e, Pu Hruaia hian kan chhûngkaw tân țawngțai a duh a," a lo ti vat a, țawng lêm lo chuan ka țhu ve mai bawk a. A țha alawm, kan chhûngkua min țawngțaisaktu tùr pawh kan neih loh hi, keini he ina chêngte hi chu kan indìl tawnsak fo a, chhûngkua kan nihna angin. Mi dang daihin kan chhûngkaw tân liau liau kan inchhûngah ngei min dìlsak dâwn a nia, a hlu dâwn êm asin.

Pastor a ni bawk a, a țawngtai thu pawh a țha, a fûn kim thiam khawp mai. Ka lo Amen êm êm vek mai a, malsàwmna min dìlsak a, taksa damna min dìlsak rualin thlarau lam damna pawh min dìlsak tho, hei hi thil pawimawh tak a ni alawm. A han țawngțai zo chuan min chibai dan dan a, min chibai zo chiah chu ka dam nghâl sawng sawng maiin ka hria. Ka nuin min țawngțaisak fo a; mahse, tûn ang êma dam sawng sawng ang hi ka la nei miah lo a nih chu.

A haw hma chuan ka meng ve ta reng a, nichîna ka lo chhîng sek khân ka mut chhuak tùr a hnawt bo laklawh a ni. Pu Hruaia pawh a awm rei hran lo ve, a haw dâwn chuan ka nu chuan làwmthu a hrilh nawn leh mawlh mawlh a," Kan lo beisei phâk ngai hauh lohin kan in tlâwm takah Pathianin a rawn hruai lût hlawl che hi kan lãwm tak zet a ni, kan chhûngkaw tân liau liau Pathian min biaksak bawk a," a ti leh a, ani pawh chuan," Ni e, a mak ngawt mai! Tum lâwk pawh ka ni bîk hauh lo, a bul ber chu Anne-i vàng hi a ni ang," a ti a, tlai lama ka nawmsam loh vàng kha a ni ngei ang chu, min rawn enin nui hmêl a pu a, a hmêl hmuh a nuamin a lang zahawm tak zet a ni.

"Nu, engati nge a rawn lèn ve chawt a?" tiin a haw hnu chuan ka zâwt a, ani chuan," In inhria a ni lo'm ni?" a ti phawt a, ka chhàn hma chuan," Kan vêng hluia awm kha an lo nia, a nu leh pate kha chu ka hre lutuk a, ani tak kha chu ka lo hre ngai miah lo a lo nih àwm kha, an fapa neihchhun lo ni rengin. Kha, pastor fel tak a nih kha, i dàwr nghahna neitu u a lo ni hlauh lehnghâl a, i chanchin ngaihven paha rawn kalin min rawn tlawh ve hrim hrim a nih kha, an vêng mi kan lo nih tawh țhin vàngin," a tih chhunzawm leh a, ka lo ngawi dâk mai. 

Ka khawsik reh hlauh a la nih loh vàngin mut dâwn tak takah chuan damdawi ka ei leh a, Pu Hruaia damdawi min pêk bâk kha ka la ei lo hrim hrim bawk a, a pawi êm lo ang chu maw. Mut hmunah chuan Joshua ka ngaihtuah rauh rauh a, vawi khat tal chauh pawh ni se ka hmuh leh châkna chuan min tur ut ut ni maiin ka hria, ka mumangah te hian min rawn tlawh ve tal se... A hmêl țha tak leh a mit meng pawisawi lo zet te kha ka hmu leh châk, min hnèm se, ka damlo hi min rawn kanin vawi khat chauh pawh min hmangaih thu min rawn hrilh se..  A lehkha hnutchhiahte chhiarin a rilru tak tak nia Msi sawi kha hre tawh mah ila ama țawngkam ngeia hriat ka châk tak zet, a tel lo chuan ka kim lo tak zet a ni, a hun tàwp lama kan hun hman dun dàn lah kha, mahni inthiam lohnain ka khat thar leh a.

Keimah tê chuan ka bazâr a, dik tak chuan ka phûr hlawl lo, lei tùr pawh ka hre lo. Lei tùr ber hre lova ka hawi kual ruai lai chuan," Anne, he lamah..." tia min ko ri ka hriat chuan ka hawi vat a, Joshua ka hmuh chuan mak ka va ti teh rêng em! Ka hmuh lohna a rei tawh si a, a àwm viau mai, ka en reng mai a ni. Hetah a awm reng sia, engati nge ka hmuh theihah a rawn inlàr duh miah loh ni; mahse, ka thinrim khum phal teuh lo.

"Eng nge hetah i tih ve?" ka tih chuan," Ka lo chàng che a," nui chung hian a lo ti mai a, kei chuan," Engati nge ka hmuh theih lohah i awm char char a? Hmuh che ka châk theih teh rêng nèn! I dam țha maw? Awm bo tawh suh aw," tiin ka ngèn ta mial mial a, a kutah chuan ka vawnsak tlat bawk a, ani chuan," I bulah ka awm reng țhìn alawm, i hre lo mai mai a nih kha, ka kalsan ngai lo che," tiin a nui a," Hawh, ka leipui ang che," a ti leh a, ka lei duh pawh ka sawi hma chuan amah chuan min leisak ta vek a, a bulah kalin hlim takin min hruaina apiangah chuan ka zui kual zêl a.

Restaurant-ah min luhpui a, ei tùr a order hnu chuan," Min hmu châk tih ka hria a, ka rawn kal chhuak a nih hi, i hlim tiraw?"  tiin min zâwt a, a hmêl hmuh nuam tak en reng chung chuan," Hlim teh rêng mai, ka hmuh theih tùrin ka bulah awm reng tawh rawh aw, ka hmuh loh che chuan ka mal thei lutuk a," ka ti siam siam a, ka thlahlel tak zet mai si a, min kalsan mai ka hlau a ni.

"Ka sawi tawh kha, ka kalsan ngai lo che, i kiangah ka awm reng a ni. Min hmuh loh vàng maiin ka awm lo taah i ngai a; mahse, engtiklai pawhin i kiangah ka awm reng tih hre tawh rawh aw, malin awm tawh miah suh, ka hmangaih che a, ka thinlung hian a zui reng bawk che a, i mal ngai lo a ni," a ti dap dap a, ngun tak hian kan inmelh kar reng a, chutiang thu a kâ ngei ațanga ka han hre leh thei chu nuam ka va ti tak! 

Ri deuh bur hi ka hria a, ka nu awin," Bawihte??" tia min ko ri hi ka hre bawk a, ka han en vat a, ka nu hmêl ka hmuh chuan," Eng nge ni?" ka lo ti vat a, ani chuan," I harh em? I harh chiang maw? Eng nge i mang a țha lo deuh em ni?" a rawn ti a, ka lu chu zàwi tê hian a rawn sâwi pah bawk a.

Ka khap fak fak a, khumah ka lo la mu reng a nih hi! Chuti a nih chuan Joshua ka hmuh kha, ka mumang vek a lo ni maw?!! Ka han chhîng leh vang vang a, ka nuin min rawn ko harh kher kher chu ka va ui tak êm! Joshua nèn khân kan hlim dùn viau a nih kha le...

Ka nuin ka pang chu rawn dekin," E, i pang pawh a dài siai tawh mai, i khawsik a awm tawh lo a nih dâwn hi," a han ti a, ka han dek ve chhin a, a lo dài diai tawh tak tak a, ka damdawi ei khân hna a thawk ve tak tak tawh a ni ngei mai. Heti a nih chuan vawiinah pawh dàwrah ka kal thei ngei ang, chawlh dìl ziah hi chu ka inthlahrung ve tawh.

Ka nu rem ti vak lo chungin dàwra kal tùr chuan ka chhuak ta tho a, kea ka kal chu ka thâ a khùr deuh dar dar thei hial mai. Nizàn lam khân min lo nghawng viau a nih àwm hi.

Ahlutei'n min lo hmuh chuan," E, i rawn kal theih ka ring lo a nia, i țha tawh em ni? Nang hi, i inthlahrun vàng te hi a ni lo maw? A ni ngei ngei ang," a lo ti vat a, kei chuan," Ni lo ve, ka țha lutuk," tiin ka lo chhâng vat a, min lo zawh chat dànah a u khân ka khua a sik tih a hrilh a ni ngei ang, ka chanchin an sawi chhuak tihna em maw ni le? Eng vàngin nge ni ang? 

Ka thâ chak lo viau mah se ka rilru erawh a hlim viau thung. Nilêngin Joshua thlâin min chènchilh ka ti mai, ka mumanga ka hmuh vàng khân ka hlim lo thei lo, ani pawh a hlim êm kha. Tunah a takah hmuh theih loh mah se mumangah tal min rawn kan tawh a, tunah chuan ka làwm a kim tawh rih tlat.

*ENG MAH TI LOVA AWM MAI MAI AI CHUAN TLÊM TÊ CHAUH I TIH HLEK PAWH KHA A ȚHA ÊM ÊM ZÂWK A NI*