☆KA BEISEINA☆ - 5

☆KA BEISEINA☆ - 5 By Dingdi Pachuau

Min dàwrtu an awm ve nual avàngin Pi ber bul lawka mipa sâng ve tâwk tak ding chu ka lo hmu miah lo va, kan han intifel zo thaw deuh huai paha ka dâk chhuak chuan chu pa chu ka va hmu thut mai a, ka meng bial pawp pawpin ka ring. Second rei vak lo chhûng kha chu che thei lovin ka awm phah zui! Engtin nge ka lo hmuh miah loh ni? Hmuh țhelh theih ni mawlh hek lo le, a lo luh lai khân ka hmuh theih loh nân  Setana'n ka mit a rawn hup a ni ngei ngei ang.

Chhiat lohna zawng zawng hi a tã a nih ka ring ta hial mai! Chhe mawlh hek lo, a chhe lo tak zet a ni tih hi a inhre ve ang em le? A inhriat ve tho chu ka ring, dárthlalangah a inen ve țhìn tho àwm sia, bâkah, mi pawhin an sawi a hre ve tho ang. 

Ka en deuh reng a, dàwr neitunu en paha a nui deuh sak ka han hmuh phei chuan ka thin phu hi a tàwp mai dâwnin ka hria! Ka âwm ka dawm a, an lo inhre sa a ni ngei ang chu. A va nuam tak! An inhriat chuan a rawn tlawh zauh zauh ngei bawk ang, chuti a nih chuan kei ngei pawhin ka hmu zauh zauh thei dâwn tihna a nih chu.

"Anne....!! Eng thil nge ni! A zawh mawlh mawlh che kha!" tiin dàwr ka nghahpui Didiki chuan țawng ring ngam vak lo hian a rawn ti a, ka bâna a kuzungpira min rawn chhun deuh sawk chuan ka en vat a, min lo en kal a, chutah, mitmei hian dàwr neitunu lam chu a melh ta zauh a, ka harh chhuak ve ta chiah!

Customer ka ngaihtuah a ngaih tâkah chuan ka hawi sawn ve ta chauh a, tunah tak hi chuan min tibuaitu tùr(customer) ka mamawh lo asin le, ka va ngei tak! Setana hi ka lamah a țang zar zar a ni thei mai lo maw?

Ka mitsîr chuan ka en pah reng tho a, a bula hmeichhe pakhat lam hawi hian a nui leh a, a en reng deuh ka hmuh tâkah chuan thîkna thinlung rilru pu nghâlin chu nu chu ka en leh vat a, a hmêl ka hmuh chiah chuan a nupui a ni tih ka hre zui nghâl bawk, hmeichhe chhe lo an sawi apianga ka mitthlaa lo lang nghâl țhìn ngei chu, ka thinlung a hnîm nghâl ruih mai!

Ka hmui chu ka pet deuh fan fan a, a en dàn ațang ringawt pawhin a nupui a duhzia chu a hriat ngawih ngawih mai si a, khawvêla ka star berin a nupui, duh taka a melh vawng vawng lai han hmuh chu mi dang tân chuan thil hmuhnawm tak a ni maithei a; mahse, ka tân erawh a ni hauh lo. 

Mahse, ka rilru ka siam vat a, hetiang thil sâwt lo ngaihtuahna hian ka thil tih leh ka hna thawhah effect a nei tùr a ni lo, ani chu ka chan phâk ngai loh tùr a ni a, hetia ka hmuh theih tùra hlim taka hun a hmang hi vànnei inti viau tùr zâwk ka ni tiin ka ngaihtuah ta zâwk a, hmêl hlim tak pu lui chungin min dàwrtute chu ka chhàwn ta zâwk a, har chu a har ve khawp mai, rilruin a hre ve kar bawk si a, an lam ka va melh zauh zauh lo thei lo. Dàwr neitunute nèn hlim tak leh innêl takin an nui tlâng a, an inpawh hmèl sia, a nuam ngawt ang chu.

Dàwr an chhuahsan lai tak ka lo hmu miah lo va, customer ka buaipui lai tak khân a ni ngei ang, ka en liam loha a liam ta chu ka ui ru vawng vawng mai, en liam ngei ngei ka duh asin, ka hmuh leh hun tùr lah ka hre hauh bawk si lo.

Ina ka haw hnuah pawh ka ngaihtuahnaah a awm reng a, Pu Hruaia hmu theia ka awma ka mit a del lo hi ka vànnei tak zet a, nupui a nei tawh a, ka lawmpui viau tùr a ni, a nupui chu a duhin a hmangaih a nih chuan keia lo thîkna chhan tùr lah a awm hek lo. Pathianin kei hi chu Pu Hruaia tân min ruat lo va, a tâna thil țha duhpui hi a tâna ka tih theih awm chhun chu a ni mai. A nupui nèn hlim taka an awm chu keia lo thîk phâk a ni lo va, a hlim chuan ka hlim ang a, a hlim hi ka duhpui êm êm tùr a ni ringawt, chu chu a Pathian thû ber alawm le. Mi tâna a țha lam hlîr duhsak ta chu ka rilru a hrisêl tihna a ni dâwn bawk, a va țha tehlul êm!

Hlawh ka lâk tlai chuan nuam ka va ti tak! Ka tân chuan a tam ve bawk si a, hetianga tam hi pawisa ka la dawng ngai si lo va, ka rilru pawh a hlim tak zet a ni. Ka nu hnênah ka pe lût vek a, ani pawhin chutianga tam pawisa a fanu kut ațanga a han dàwng chu a lãwm ve hlê tih ka hre thei bawk.

Dam chuan ni a liam zung zung a, dàwr a lùn bawk a, hah pawh ka hah ve țhìn viau mai; mahse, ka hlawh hmuhna a ni a, hah ve viau țhìn mah ila dàwr neitu hmêl hlim sáng reng mai han hmuh hi chuan hah hi a dam sawng sawngin ka hre țhìn, a lak ațang hian ni tinin thil thar ka zir chhuak ziah a, mi biangbiak dàn te, hawihhâwm leh hlim taka mi lo chhàwn dàn te leh mi lo dàwr dàn te ka zir chhuak zêl a, Pi Chhani dàwra ka thawh pawh khân thil thiam chhuah ka nei nual kha a nia, tunah ve thung hi chuan mihring indàwr tawnna lam ka zir chhuak ve thung a, ka hlâwk dùn ka ti viau a ni.

Ka nuin ka dàwr nghah chanchin chu min zâwt ve fo a, kei pawhin ka hrilh ziah. " Nangmah i sual loh phawt chuan i chungah mi an sual ringawt lo ang, chu vàngin, sual duhna rilru pu lo la, chutiang tùr chuan ka țawngțaipui reng țhìn bawk che a ni," a ti a, chu vàng chu a ni ngei ang, țhian fel tak ka tawn ni. Didiki hi ka kawm rual ber a nih bâkah a nui duh a, kan inkàwm ngeih ber bawk. Pathianni tih lohah chuan Remi nèn kan inhmu khât a, Didiki hi ka hmuh ngun ber a ni ta a, mi fel tak a lo ni bawk nèn, vànnei hi ka inti tak zet a ni. Ka nu thil sawi chu ka hre chhuak ziah, țhian fel tak neiin min chhawrtu lah a fel êm êm bawk a, rethei tê mah ni ila Pathian min ensan lohzia leh kan chunga A țhatzia hi ka hre chhuak leh vawng vawng țhìn.

Nula ve ta chu, min han chhaih fiamtu pawh ka tawng chho ta zauh zauh mai, a nuihzatthlâk asin. Didiki nèn kan bungrua, mi rawn lâk tùr chu pâwna thiar chhuakin kan lo vêng a, motor kan lo nghâk a ni. Motor chu a rawn tlãn ta ngei a, chu motor driver, pa lian vak lo chuan," Eu, in va chhe lo ve! In thuamhnaw hâk lah chu in la inhmeh êm êm zui a! Heti khawp hian Mizo nula hi an lo chhe lo tih pawh ka lo hre ngai lo. Chhe lo rau rauah hmai țhuangvuak zâwk ngei mai hi chhe lo zâwk ka ti!" tiin ka uanpui loh êm êm leh ka zahpui țhìn, ka hmai țhuangvuak ngei hmang chuan min han fiam zui a, han thinrim ringawt chi a ni si lo, za vak lo hian ka nui ringawt a. Chu pa lah chuan la duh tâwk lo chuan," He dàwr hi ka tlàn pèl ve fo va, nula chhe lo deuh deuh an thawk ang tih rêng rêng ka lo hre lo nia, Pathianni zînga fate thawhláwm semtu atân in awhawm mang e!" a ti leh zui a, a  țawng lo hre phaho chu an nui dar dar a, min en duh hlawm bawk sia, a nuam vak lo, chàwn lang pawnfèn kan fêng bawk sia, infêng sexy min ti hlawm a ni ang.

Min dàwrtute ațang pawh hian min chhaih zauh hi chu ka tâwk ve fo a; mahse, inhmuhsit leh a mawi lo lama min chhaih an nih loh avàngin polite takin ka chhàwn ve mai a; mahse, pawnfèn fèn mawlh chu hrehawm ka ti, min en duh thar riau hian ka hre tlat mai a, a hma pawha eng vaka ka lo ngaih loh kha ka ngaimawh thar ta riau. A chhîng êm êm pawh a ni hran lo, khûp chu a khuh pha tho a; mahse, chàwn lang tak hi hrehawm ka ti a ni, stockings tal bun theih se.

Didiki bulah pawh ka sawi nghe nghe a, ani lah chuan," A nuam ve alawm, stockings nèn chuan a lum duh àwm êm mai, thlasikah erawh chuan thuhran a nia," a lo ti thung a, thlasika hetiang fèn chuan a váwt duh ngawt ang chu.

Zàn khat chu inkhâwm bànah zaipâwlin hla kan en dâwn a, kan kal kháwm țak țak a, țan tak tak hma Jim-a chuan," Anne, i dàwr nghahnaa thawk ve Siampuii kha i hria em?" tiin min zâwt a, kei chuan," Um, hria e, engati nge?" ka lo ti vat a, ani chuan," Ka zâwt mai mai che maw le, a chhe lo riau ka ti a," nui chung hian a lo ti a.

"Hmm...i lêrh!!"

"Leh ngawt a che! Chhe lo tih neih chu lérh tihna pawh a ni lo, nang pawhin chhe lo tih i nei ve tho ang," a lo tih chuan Lalkâwnga chuan," Het! Chhe lo sawi s'u, hla kan en dâwn hi!" a lo ti deuh hmak a, a nui duh miah si lo va, kan inen kual a, kan nui țhû hlawm a.

"Chhe lo hi chu sawi tawh miah suh u, ka sawi ve zawngin in țawng hman ve lo ang!" a tih leh phei chuan a thu sawi chu inhmeh ka ti lutuk a, nuih țhat pah chuan," Khatiang kha sawi ve suh aw, tu emawin a tihtauhsan che chuan e, i hawihil viau mai ang," ka ti lêt ve sak a, Remi chu ka melh pah ralh bawk a.

La dang duh hauh lova," Anite chu sawi sawi a ngai lo, ka tân chuan nambar 1 niin țha chungchuang, tuma tluk loh a nia, sawi loha lêng a ni," a tih leh chuan ka insûm thei tawh lo, nuih rin vak hlau si chuan ka nui dîr ta char char a, Remi lah chu a lo ner nâwng zui a, Jim-a leh Smiley-a ni se nuih rin hlau ve thovin an hmui hupin an lo nui ve bawk a, Lalkâwnga hi zawng, Vit A- Z hi a ni ringawt mai.

Ka nu zîng tho chu a nuamsam meuh lo a, chuti chung chunga han kalsan chu pi ber lakah inthlahrung viau mah ila ka nu chu ka khawngaih a, Bawiha ni se school kal a ngai a, ka nu hnêna awmpui ka duh thu ka hrilh chuan," A, a ngai hleinem, awmpui ka ngai lo, i hnaah chuan kal zâwk rawh khai, damdawiin min chhâwk thuai dâwn alawm," a lo ti mai a, a inthlahrun vàng a ni tih ka hria a, chu vàng chuan," Nu, kan pi ka bia ang a, thil awmzia ka hrilh mai dâwn alawm, i inthlahrung a nih kha," ka ti ve thung a, a rûk chuan ka hreh viau nain ka nu chu kalsan ka duh bîk si lo, phone chu lain pi ber chu ka han be ta nghâl a.

Thil awmzia ka sawi chuan," A nih tak chu, a va zia lo ve aw...! Mahse, damdawi a ei tawh chuan a zia vat tùrah ngai ang, inthiam lo duh suh, a dam hunah i rawn kal leh mai dâwn alawm," min hre thiam tak chuan a rawn ti a, ka thaw huai thei! A lo fel tak zet a nih hi, mi harsatna a hre thiam bawk si.

Nilêngin ka awmpui a, a hritlâng ințan tùr nuam lo chho vêl a lo ni a, khawsik chu a awm ve deuh tho nain damdawi chuan a chhâwk thei mai a, tlai lamah phei chuan khawsik pawh a awm tawh lo; mahse, a awm chu a nuam zân chuang lo, ni lûkin a inhre tlat.

A tûk lamah erawh chuan a tho harh deuh bawk a, rilru nuam vak lo chung chuan dàwrah ka kalsan a, amahin kal tùrin min ti tlat a, pi berin min lo hmuh chuan," E, i lo kal thei maw? Eng nge i nu chu, a țha tawh tihna em ni?" tiin min lo záwt vat a, a zia tih ka hrilh a; mahse, ka ngaihtuah deuh avàngin chhùnah, ka àwl laiin ka va be nghe nghe a; mahse, a țhat thu leh khawsik a neih loh thu min lo hrilh thung a, ka rilru a dam deuh huai mai.

Didiki nèn chuan thil ei lai chuan kan titi mai mai a, kei aia lo thawk hma hret a nih vàng chuan pi ber chanchin pawh a lo hre deuh zâwk a lo ni. Chhûngkaw khawsak harsa lo tak an nih thute chu sawiin pi ber fel a tih thute chu a sawi ve sep sep a, kei pawh chuan ka lo zàwm ve zat a.

"Pasal țha deuh a nei ngei ngei ang," ka tih chuan," Teh ngawt chuan!" nui chung hian a lo ti ve thung a, kei chuan," A fel êm mai a, mipa fel tak nei tùrin ka duhpui alawm," ka ti leh a, ani pawh chuan," A nei ang, mi hausa hi chuan mi hausa vêk hi an nei duh a, ani pawhin sumdâwng hausa ve tâwk tak a neih ka ring; mahse, mipa lam hi a hawi loh hmèl viauin ka hria, bialpa pawh hi a nei lo em maw ni, an sawi dànin," a lo ti leh a.

"Nei ang, ani ang chuan dàwra inhmuhpui a duh tawp nâng!" ka lo ti ve thung a, ani chuan," Ni ve tho mai, an chhûngkua hi an harsa lo ka tih tawh kha, an lãr ve viau na hian pi ber hi chu a fel ve thlâwt ka ti, a inla milian si lo, nu leh pa, thlahtu ațanga hausa chhûngkua kha an ni sia, a pa pawh i hria ang, MLA term thum, a zâwna tling thei kha i hre lo'm ni?" a ti leh a.

Ka han ngaihtuah vang vang a, chuti chu... ka hmui ka hup ta vat a, ka au chhuah vak loh nân! Pu Hruaia nau a ni tihna maw?!! A ni tak tak! Heta Pu Hruaia leh a nupui lo kal chhan pawh kha, ni dâwn tak e! A nau dàwrah chuan a rawn kal ve bawk ang chu. Ka vâr ta uar uar mai.

Ka hringnun kal chhoh dàn hi a va mak reuh tak!

*******

Hruaia

~~~~

Innei tùr an awm a, invawntîrtu ka nih dâwn avàngin Irene-i nèn chuan kan kal a, ka bula țhu ka nupui chu ka han en țhìn, a chhe mawlh lo a ni. A mit, a tâwk chauha a hnawih dum leh a hmui, mawi tâwk chiaha a hnawih sen chuan ka mit a la a, en nin har ka ti a ni.

"Kawng en țha la?"

Ka nui hawk a," Ka bulah chhe lo táwkin i țhu reng si a, en reng che ka duh a," ka tih chuan," Motor khalh lai êm êm chuan ni lo ve," a rawn ti sap a, ka kut tuai hauh hauh pah chuan," Mipui hmaa i din hunah mipui mit fûkna i ni dâwn sia, kei pawhin ka duh tâwkin ka rawn thlîr ve ang che; mahse, ka pasal chhe lo tak mai an han thlîr țhup tùr che chu ka lo thîk lâwk, an mit tuamsak vek hial a nia ka duh ang ni!" tiin min han fiam zui a.

Hun kan hmang rei lutuk lo ve, mo leh moneitu chu invawntîrtu ka nih avàngin pâwn lama photo booth an siamah chuan thla ka lâkpui a, ka kal sawn deuh chiah tihah Irene-i'n min lo ko vat a.

"Hruai, en teh, tu nge ka rawn hruai hi?"

Irene-i bula ding ka hmuh chuan," E khai, i dam maw?!!" tiin ka kut chu ka phar chhuak nghâl a," Inhmuh loh chhûng a va rei ngar ngar ve! Engtikin nge Mizoramah i rawn haw a?" tiin a chanchin chu ka zâwt nghâl a.

Rda hi lehkha zira phai lama awm tlâng țhìn kan ni a; mahse, Pathian thu lama ka kal tâk avàng khân kan awm dùn thei ta lo va, kawng hran kan zawh ta ve ve a, zirna lam inang lo ta chu, chanchin pawh kan inhre pawh ta meuh lo, phai lamah a tâp ta reng ni àwm tak a ni, a sawi dànin. Inneihna hmang tùr hian nimin piahah a rawn chho a, tuna inneia Moneitu hi a patea fapa a lo nih nghe nghe chu.

Țhian inhmu chhuak ta chu kan titi hlut a, a la single thu a sawi chuan," E khai, neih thuai i ngai a nih chu, hei i nau pawhin a neihsan tawh che a nia, i lang senior mai dâwn, nupui hmu chu thil țha hmu asin kan nih," ka han ti a, ani pawh chuan," Ni ngawt mai, nauteho hian ute hi min neih khalh zêl mai a, 'U záwk a nia, kian rih teh ang' tih nachâng pawh an hre lo," nui deuh chung hian a lo ti ve a. 

Hlim takin kan titiho a, amah hi chu Champhai lam mi daih a ni a; mahse, haw chhoh pawh tum lêm lovin kârleh lamah a hna thawhna Mumbai lamah a chhuk leh dâwn niin a sawi.

"I chhuk hmain a tlawngãwl zâwk chuan min rawn tlawh ve ang chu maw le, chawhlui pawh kan kîlho ang chu, kan inhmu khât si a," ka tih chuan," Tehrêng mai, ka rawn tlawh ngei ngei ang che u; mahse, naktûk khi chuan ka hman lo phawt ang a. A, remchàn hun kan inhrilh thei tùrah ngai ang," a lo ti ve a, number kan inpêk hnuah kan ințhen ve ta chauh a.

"Țhianpa chu a lo hlawhtling chho hle mai maw..." ka ti vang vang a, kan awm dun lai ka han ngaihtuah lêt a, min tluk lo țhìn kha a nia; mahse, tunah chuan, khawvèl lam ațanga ngaihtuah phei chuan sâng tak a ni tawh.

"Nang pawh i hlawhtling alawm, khawvêl hmaah chuan hlawhtling viau angin i lang lo a ni maithei e; mahse, Pathian rawngbâwltu leh a chhiahhlawh i nia, chu aia Pathian mithmuha ropui a awm nâng," ka bula ding Irene-i'n a rawn tih chhuah tâkah chuan ka en vat a, a lo nui sâng a, a kut chu vuanin," Ka lâwm e," ka ti sap a, kan kal sawn zui ta nghâl a.

Rda chuan min rawn tlawh ve ta ngei a, sâwmtu zâwk ni mah ila sa siam tùr leh a bàwlhlo tùr leh chawhmeh tùr thlai hnah leh rah a rawn lei nghâl vek pek a, a sâwmtu zâwk kan fihlîm lel a nih tâk ber chu.

*KAWNG ENGKIMA FÎMKHUR HI A ȚHA; MAHSE, A LUTUK ERAWH A ȚHA LÊM LO, HUAISENNA THINLUNG NEIH A HAR*