☆KA BEISEINA☆ - 6 By Dingdi Pachuau

☆KA BEISEINA☆ - 6 By Dingdi Pachuau

Zîng khat chu ni dang zawng aiin ka tlai deuh a, a hun dik tak nang chiah chiaha thleng tùr chuan ka tlàn deuh hlawk hlawk a ngai tawh. Tlai hi ka duh ngai lo asin le, tukina ka nu inlêng a lêng rei deuh a, kan chaw ei hun a tibuai vek a ni, rilrua  hmanhmawh ru zet chuan ka tlãn dàwr dáwr a, dàwr leh kan in hi a inhlat a, ke hlîrin ka kal țhìn bawk si a, tukin chu ka hah deuh dâwn a nih hi.

Pawnfèn ka fêng bawk nèn, tlàn chak chu a har phian zui a. Ka hmui ka pet fan fan a, ka țang sauh sauh bawk, ka tlai hlauh chuan a zahthlâk dâwn êm a ni.

Min ko ni àwm tak hi ka hria a, ka han hawi chhuah chuan ka sîrah hian ka tlàn rual zêl chuan R15 bike dum hi a rawn tlãn ve zêl a lo ni a, helmet full-face khum mah se a mit zâwn chu a hawng a, min rawn en tih ka hmuh chuan ka zak deuh hlek a, ka hmel hriat loh a nih bâkah a chhiat loh hmèl bawk sia, chak deuh chuan ka kal reng a.

"Lo chuang rawh, i hmanhmawh a nih kha."

Ka inngaihtuah a, hmêl hriat pawh ni lo bike-a chuan chu ka hreh ngang mai, chutah, pawnfèn ka la fêng zui. Bike-ah hian ka chuang khât a, a hnung seat lah chu a la sâng váwrh zui a... mahse, bike chu a tlãn chak a, hun rei a ngai lo ang, dàwr pawh hah lovin ka thleng thuai dâwn a ni.

Ka chuang ve ta nge nge, tlãn char char pawh ni ila a hun dik takah ka thleng hman ang em tih pawh ka hre chiang lo a nia, remchâng ti viau mah ila ka hmêl hriat a ni lo va, amah nghèng lo thei ang ber tùr chuan ka chuang nghe nghe a. Ka kal duhna hmun min zâwt bawk si lo va, ka hrilh chuang lo, a tlànna a dik zêl bawk sia.

Dàwr kawtah chuan a ding ta nalh mai. Ka chhuk duhna pawh ka hrilh miah si lo va, mak ka ti tawp! Ani lah chuan," I tlai lo a nia, minute 8-in i thleng hma zâwk aw," a la ti zui a, a hmêl a tilang mang si lo a, chutiang thleng thlenga a hria chu mak ka ti viau a ni, làwm ru viau mah ila tu nge a nih lah chu ka zâwt ngam teuh si lo! Làwmthu erawh ka hrilh sap a, a mit chauh ka hmu thei si, en zauh pahin," Ka lãwm lutuk e," ka ti leh a, bu deuh nghatin a tlãn zui ta nghâl a, ka en zui deuh vang vang a. A tlàn liam hnu chuan ka thaw huai a, a thlâ chu làwmthu ka hrilh leh mawlh mawlh, amah vàng liau liauin ka tlai lo ta si a.

Ka lût tùr chu ka hnungah Didiki'n min rawn ko a, lài zetin ka ding ui a, a lam hawia inher remin," I lo la thleng bîk nange?" ka ti a, ani lah chuan min phurtu bike tlàn liamna lam chu melh zauh pah hian," Tu nge?" a ti a, min rawn enin a mitko chu a'n sàn zui a.

"Min phurtu a nih kha."

"Tu nge ka ti!!"

Thaw hawkin," Ka hre bîk lo, ka zâwt hleinem," ka lo ti ve thung a, ani lah chuan," Hmm..min hrilh duh lo vêl ah! Pawi lo, i sawi phal lo rih a nih kha," tiin a'n hawi sawn deuh hmak a, a kokia kuahin," Lût ang hmiang, hmanhmawh lutuka ka rawn tlàn laiin a rawn tlãn remchâng a, ka rawn chuang ve tawp mai a nih kha, kein rawn kal ila chuan ka rawn tlai dâwn sia," tiin ka chhâng zui leh a.

Chhùn chawlh laiin min zâwt țha leh a, ka hriat loh thu chu ka hrilh leh a, ani chuan," Min tih der mai mai emaw ka tia, i lo hre lo tak tak elo?" tiin thutak zet hian a ti a, kei pawh chuan," Hre nâng, a hming ka zâwt ngam hleinem, ka hmanhmawh lutuk kha min khawngaih ve a nih ka ring," ka lo ti ve a.

"Mahse, i chhukna tùr thlengin a hre vek bawk sia, a mak e!" a tih leh chuan, ka ngawi vang vang phawt a, chutah," Ka thuamhnaw hâk ațang hian a hria a niang," ka lo ti leh a, ka rilrua rawn lang thut a ni a, a dik ngei pawh ka ring ta, ka thuamhnaw inbel ațang hian min drop-na tùr a hria a ni sa, ka ring nghet ta bur mai.

"Chu pawh chu lo ni se, a star deuh che a ni ang," a lo la ti zui țâlh a, melh râwm râwmi pah hian," Âwihawm loh lutuk! Ka hriat ngai pawh ni lo, ani pawh khân min hre lo tawp ang," ka ti leh a, a rawn nui chhuak ta a.

"Duh lo ve bawk siah! Eng pawh chu lo ni se, i tlai mai tùr a chhanchhuak che a, i tân chuan Prince-Charming a ni tawh tho tho. Awi, romantic reuh lutuk!" tiin a han inla no vêl a, kei pawh chu ka nui lo thei ta lo.

A hnuah chu pa chu ka hmu leh a, chutah pawh chuan a hmêl ka hmu thei chuang lo, a inthuamna lah chu a bike ang chiahin a dum vek bawk, a mit chauh ka hmu a, min phurh leh a tum a; mahse, ka tlai dâwn lo tih ka hriat avàng erawh chuan ka hnial ve ta thung a.

"Min hlau a ni maw?" a tih chuan ka en vat a, a nuihza mitmeng chu ka hmu thiam ve mai. Lu thingin," Hlau lo ve. Ka tlai dâwn lo tih ka hria a, ka chuan kher a ngai tawh lo a ni," ka ti a. Ka rin loh deuhin a lu a bu ta nghat a, chutah," Vawiin chu in dàwrah ka rawn lêng dâwn a nia," a rawn ti zui a, phâwk zet hian ka en ta hrá a.

Chu chu a hmuh chuan a nui hak a," Hlauthawng duh suh, ka rawn seh dâwn lo che," a ti leh a, min fiam a ni tih ka hriat chuan nuam lo tihna riau nei mah ila hrehawm chu ka ti viau chuang lo, a eng emawti nawm ve tlat.

A rawn kal tak tak ring deuh si, ring meuh si lovin ka awm a, dàwra mipa rawn lût rêng rêng chu ka theih chin chinah ka lo mitsìr ru ve pah reng bawk a; mahse, amah tùr àwm ka hmu hauh lo, dâwt min hrilh, ni leh lo, min fiam mai mai a nih kha. Rawn kal pawh ni se ka hre tawp nâng, a hmêl pawh ka hriat loh tawp kha maw le.

Mak deuh maiin ka ngaihtuah zui rauh rauh pek a nih chu. Kei hi ka lérh tihna em ni? Pu Hruaia ka star êm êm a, tunah mipa pakhat ka hriat ngai pawh ni lovin min chhaih ve deuh a, ka han ngaihtuah nghâl deuh ringawt a... mahse, hriat lohpa hi dàwra rawn lèn a tum thu sawi si, rawn kal leh si lo vàng mai maiin alawm ka ngaihtuah ni, ka star vàng a ni lo, star tùrin a hmêl pawh hre lo napui chuan.

A tûka customer lo buaipui tùr awm loh lai takin thuamhnaw kan khai chu ka sîksàwi kual mai mai a, mi dang chuan buaipui lai an nei vek a, ka awm kil deuh hlek avàngin lo buaipui tùr ka chang lo a ni ber mai. Thuamhnaw dum ka khai sawn lai tak chuan ka hnung lam ațang hian," Tukinah i tlãn leh dàwr dáwr em?" zàwi thãwp deuh sata tih ri ka hre thut a, ka phu zawk nain ka phû a ni tih ka taksain a lantîr nasa lo thung.

A aw ațang leh a țawngkam hman dàn ațang chuan R15 dum neitu kha a ni tih ka hre mai a, kawr chu khai țhain ka inher a, min betu chu ka hmachhawn ta a.

Chèr sâng lam deuh a nih kha chu ka ring sa tho a; mahse, ka rin aiin a lo sâng daih!  Lukhum dum a khum chu a inhmeh phian mai a, a hmêl pawh chiang takin a hmuh theih tawh, a hàng miah lo bawk, min rawn en chhukin a nui ve suk a, chutah chiah chuan ka hawi sawn rang ta viau mai.

"Eng nge mamawhte i nei em? Eng lam nge i en duh ang?" tiin polite takin, customer ka lo chhawn ang chiah chuan ka be ta a, a hmêlah tak erawh ka en tawh lo. Ani chuan zàwi thâwp deuh tak hian," Ka lo lêng dâwn ka tih kha," a ti ve thung a, thuamhnaw lam pawh en kual tum lo chuan a dinna ngaiah chuan a ding reng a.

Thawhpuite'n min rawn hria ang tih hlau ru tak chuan," Fiamthu i duh hle mai," ka ti ta ringawt a, zahzèlah ka ka kut chu ka elh deuh nak nak a, min en reng ringin a hmêl pawh ka en ngam lo. Dum vekin a inthuam a ni tih chu a hmêl en kher lo pawhin a hriat a, rawng dum a ngaina viau a nih ka ring ve nghâl ngawt bawk.

"Fiamthu nâng, nimin pawh khân pâwn ațangin ka rawn hmu reng che, min lo beisei reng tiraw? A dik em?"

He pa hi, a hlauhawm ru tlat. Ka  rilru chhûng a rawn hre thei vek em maw ni. Mak tak maiin ka thinphu lah chu a inthum rawn tlut tlut mai lehnghâl a, ka kut ni se a thlan dup dup bawk a, a bulah hian ka zäm viau a nih dâwn hi.

"Dâwt i sawi a nih kha."

A lo nui hawk a, a nui ring hauh lo; mahse, a nuih dàn chu a eng emawti ril tlat, ka duh vak lo khawp. Duh aiin min rawn 'inti' hre tlat, min hre tawp lo, kei pawhin ka hre hek lo, a hmêl pawh ka hriat chian loh bâkah a hming takngial pawh ka hre lo a nia.

"I va duhawm reuh tak! Anne Lalduhawmi ni àwm tak i ni!"

Ka en chho ta hrâ a! Ka hming engtin nge a lo hriat ni? Mak ka ti lo thei lo, khawi ațangin nge a lo hriat? Min lo hre sa tihna maw? Ka hming a hriat chuan, min lo chhui ru reng tawh tihna em ni?!!

"Mak ti viau duh suh, i hming ka hriat vàng maiin mi hlauhawm ka ni tihna a ni lo a nia, hriat duh zâwng hi chu--"

"Joshua.....??"

Chu hminga kotu lam chu ka hawi phei vat a, hmeichhe chhe lo zet, sam buang deuh lek lek hian kan lam chu a lo hawi ve reng bawk a, saw nula sâwn ka bula ding hi a rawn ko tihna em ni? He pa hi a hria maw? An rawn kal dùn tihna em ni?

Ka bula ding chu a phun deuh sap a, chutah, inherin," I hman tawh em ni?" a ti ve ta a, ani chuan kan lam chu rawn panin," Aw, hmun dangah kal ka la duh a, chhuak tawh ila?" a rawn ti a, a kal paha a sam buang deuh han inchhawk fâwn vêl chu hmuhnawm ka ti, a hmêl pawh a chhe lo, makeup erawh a inhnawih nasa deuh mah mah.

Lo scan nghâl zung zung mai.

"Ka la rawn tlawh ang che," ti sapin chu pa chu ka bul ațang chuan a kal sawn zui nghâl a, amah rawn kotu thil khai lai chu a khaisak a, an kal sawn ta chu ka en zui reng ringawt. Joshua maw a hming kha? Ka hriat ngai a ni hauh lo, a hming mai pawh ni lovin amah pawh kha ka hre ngai lo, bike-a min phurh ațang chauh khân he khawvêlah hian a lo piang ve a ni tih ka hre chauh a nih kha. 

Ani chuan min lo hre tawh a!! Ka hming pawh a hre dik chat, 'Anne' a ti a nih kha, engtin nge min hriat le? A, ka ngaihtuah peih lo, min lo hre ve a ni mai, ngaihtuah chhunzawm tùr ka ni lo, mi hlauhawm a nih nghe nghe kha.

Mahse, mak tak maiin chaw ei khama dàwr kal tùra ka chhuak hian ka hmu thei ta riau a nih chu! Min rawn hria tih hriat tak hian ka bul hnai deuha rawn tlãnin horn lah hi a rawn hmet ziah lehnghâl, ka lo hmuh loh pawh hian a rawn tih rîk tawh chuan ka hmu ta ziah. Min chhaih a ni tiin ka inhrilh ziah a, ngaihven zui lo tùrin ka infuih sauh sauh ziah bawk.

Tlai khat chu ka haw lamah ka hmu ve ta thung, Didiki nèn kan kan hàwnna lam a inan loh avàngin kan ințhen deuh chiah tihah chuan min rawn ko ta a nih chu! Ka en vat a, a bike dum chungah chuan a lo țhu vàng mai a, min lo nghâk chu a nih ka ring meuh lo, mi a nghâk a nih ringin ka han hawi kual deuh a, ani lah chuan," Aw, nangmah kha ka lo nghâk che," a la rawn ti zui a, eng atân nge min lo nghah ve ngawt ni?

"Lo chuang la?"

Leh teh ngawt a! Ka hming a hriat vàng ngawt leh vawi khat a bike-a min phurh vàng ngawt khân min phur leh thei ang tih hi khawi lehkhabu-ah mah a inziak hauh lo ang.

"Ka lâwm e, ka lo chuang lo mai ang e," tiin ka hnial a, min biak miau avàngin ka kal muang deuh kha a ni a, a bike-ah ka chuang dâwn lo bawk a, kal muan a țûlna ka hre hran lo, ka speed ngai te chuan ka kal țan leh ta a.

"Ding lawk teh."  Ka chek deuh hlak a, kal muang deuhin ka hawi lêt a, ani pawh chu a bike ațang chuan a lo chhuk tawh a, ka lam pana rawn kalin," Ka lo nghâk ve êm êm che a, i chuan duh si loh chuan kein kan kal dâwn tihna a ni mai a," a rawn ti ta mai! Ka ruala kal ve a tum tihna, khawnge a kal dâwn? Min thlah dâwn tihna em ni?

"Khawnge i kal dâwn?"

Ani chuan,"Ka thlah ang che," a lo ti mãwl tawp a, ka en deuh hâ a, he pa hian min chhaih rei tawh mah mah a ni, eng atâna min chhaih reng nge maw a nih le?

"Thlah ka ngai lo, ka hlau lo."

A hmaa a nui ang khân a nui leh hawk a," Tih har viau lo teh, thlah che ka duh alawm, biak che ka duh pah a," a ti leh a, han hnial chhunzawm zêl pawh min rawn kal pèl an awm ve reng avàng chuan nuam ka ti chiah lo va, bâkah, ka sàwm pawh a ni chuang lo va, a duh leh min thlah mai teh se.

"Eng kawngah nge min biak i duh?" kal pah chuan ka ti a, ka chàwn lam a en thlâk avàng chuan nuam ti vak lo chuan ka kal a, ka hmui ka pet pah bawk a.

"Tlangvâlin nula a biak duh ang hian ka be duh che maw le."

Min fiam zah a tum hrim hrim a nih teh chuan a hlawhtling chiang khawp mai. Ka hmai chu a sa ham ham mai a, a sen țâwn țâwnin ka ring bawk, ka beng pawh a sa vek alawm.

"Sawi tùr ka nei ve lo," ka ti ringawt a.

"A mak thei, tih har viau lo teh ka tih tawh kha; mahse, nula chhe lo deuh leh tih har deuh hlek hi an inhmeh bîk ka ti, ka duh tawhnaah hi chuan beidawn lah hi ka'n tum lo mai mai khawp a! Harsa deuh hleka ka thil neih hi awlsam taka ka neih theih ai chuan ka la hlut ziah zui!"

He pa hian țawngkam a thiam lutuk! Min hnial thlâkna tùr a hre ziah lehnghâl, sawi tùr pawh ka hre tawh lo, ka ngawi ta rauh rauh a, kan inahte hian min rawn zui lût rêu rêu ang tih pawh ka hlau hlel lo ve!

"Khawngaihin, i number min pe thei ang em?" Ka pên rual zêl chuan a pên a, a mal a sei daih zâwk a, a pên zâu zâwk bawk si a, ka ûm titih deuh dâwn mai.

'Phone ka nei lo' tih leh 'Ka phal lo' tih thu awm hek suh," Eng atân nge i tih?" ka'n ti lui hrâm a, ani lah chuan," Tlangvâlin a nula duh hnêna a number a dìl hian eng atâna ti nge a niha i rin?" a la rawn ti zui a, ka biang chu a sa nawn leh hat hat mai.

Number ka pêk avàng chuan min rawn biak ka ring deuh nge ni, phone rî chu zàn dang ai chuan ka ngaichângin ka hria; mahse, mut dâwn thleng pawh chuan min rawn be lo va, min rawn text hek lo. Ka number ka pêk vànga min rawn biak nghâl ka ring chu ka ring sual chhiava hle a ni.

Pu Hruaia thlalâk ka neih chu ka en leh vang vang a, tunah tak hian a muhìl tawh ang em? Nge a la meng ve reng zâwk ang em? Eng nge a ngaihtuah ve ang le? Nge muhìl tawhin a nupui chhe lo zet kuah chial khân a mu tawh zâwk ang?

Hmm...mi khawngaihthlâk hi chu ka va ni tak êm! Ani kha chuan ka awm ve a ni tih pawh a hrechang àwm tawp si lo, min chhaih vetu ka hmuh chhun lahin min rawn text bawk si lo, tu chungah mah hian beisei rûk nei lo ila rilru a hrehawm lo deuh ang, he paah pawh hian beisei ka lo nei ru deuh chu a lo nih chiah hi. Naktûk ațang chuan rilru siam thar ila, miin min biak pawhin țha takin bia ila, beisei deuh nei lo ila, Pu Hruaia chunga ka rilru put ang deuh hi pu reng ila, beisei lêt nei lo ila a dik ber ang, tunah pawh hian tlêmin ka rilru hi a hnual deuh tlat, a dik lo.

Beisei ka nei tùr a ni lo.

*NANGMAH LEH NANGMAH I INRINZAWH CHHÛNG CHUAN I TÂN KAWNG  A INHAWNG ZÊL ANG, KAWNG HARSA TAK PAWH ZAWH MAH LA*