☆KA BEISEINA☆ - 7 By Dingdi Pachuau

☆KA BEISEINA☆ - 7 By Dingdi Pachuau

Ka tûnlai chanchin a hria emaw tih tùrin a tûk tûkțhuan kan ei laiin ka nu chuan," Pathian zârah hei in lo leikãngin nula tlangvâl in ni chho ta a, Bawihtei phei chu nula dik tak i ni tawh, in chanchin duhawm lo lam leh mi sawisep kai, nulât tlangvàl kawngah pawh ni se, chutiang lam chu ka la hre hauh lo va, làwmawm ka ti a, hetiang hian nung chho zêl ula ka ti khawp mai," tiin min zilh mawlh mawlh a. 

Ka inthlahrung ru khawp mai a, ka hun tawn hre ta chiah se, engtin nge min tih ang aw ka ti rilru a, a fanu hian pastor, nupui nei tawh ngat mai ka star ngawih ngawih a ni tih a hre hauh si lo, tunah pawh tlangvâl pakhatin ka rilru a tibuai țan deuh chu a ni si a, a bulah hian ka sawi ngam teuh lo, Didiki bulah pawh sawi loh, ka țhian țha ber Remi pawh ka la hrilh hauh lo a nia... ka zak!!

"A bîkin Bawihtei, nula nih chuan tlangvâl han duh ve deuhtu che pawh i la tawng chho ngei dâwn, tawn pawh i tawng tawh maithei, i duh zâwng tak i tawng a nih chuan a rûk a râla inngaizâwng lovin ka hriatpui thlap hian ngaizâwng thei  la ka ti khawp mai. Chuan, rilru hi a pawimawh khawp mai a, hma lam hun chu kan hre thei hauh lo nain ngaihzâwngah hian fîmkhur a ngai a, kan ngaihzâwng ni miah lo hi chu pasalah kan nei ngai lo khawp mai tih hriat tùr. Chu vàng tak chuan, kan nun hi hman fîmkhur tùr a ni, ka ngaihtuah lêm lo na chein i nu ka nia, keiin ka hrilh loh che chuan tu mahin an hrilh dâwn si lo che a, a pawimawh ber chu Pathian a ni. A hmasa berah Pathian hi dah tlat la, Pathian a lal ber tlatna hmunah sual a lal thei lo va, sual pawh a tih theih tawh loh. Thlèmna pawh i la tâwk dâwn chauh; mahse, Pathian i dah lal ber chuan a țha vek mai ang," a ti leh dap dap a, ngun takin chaw ei pah chuan ka ngaithla reng a, 'thlèmna' tih thu a sawi lai tak chuan ka mitthlaah Joshua leh Pu Hruaia an rawn lang tawn chhên mai, anni hi ka tân thlèmna an ni thei ang em?

"Bawiha pawh, i nu leh i u min zah thiam țhìn a, ka lãwm khawp. Mipa i ni a, kan chhûngkaw innghahna i ni. Hmeichhia chu mipa angin kan zahawm ve lo va, hmeichhia chauh awmna chhûngkua hi a zahawm mawh khawp a nia, kan innghahna i ni tih hre reng la, țha takin lehkha zir zêl la, i rilruah I zirlai chauh hi dah rih la, hmeichhia chu nakinah i zir zawh lamah an la tam dâwn lutuk! Chu chu hre reng la, Pathian malsàwm tlâkin lehkha zir la, i u leh i nu zahawmna hi i kutah a innghat tlat a ni tih hre reng rawh aw," tiin Bawiha chu a hrilh zui ve leh malh malh a.

"Mi hi ngei ringawt tùr a ni lo va, biak chhiat ngawt tùr pawh a ni lo, sual viaua ngaih ngawt tùr lah a ni hek lo. Kan chungah a pâwng a puiin an sual ngawt ngai lo a nia, an lo sual a nih pawhin keimahni lamah hian eng emaw duh loh an nei a nih loh pawhin dik lo a lo awm tlângpui. Nula tân hlauh phei chuan tu tlangvâl pawh, eng ang mi pawh biak chhiat ngawt loh tùr, kan duh loh zâwng taka min ti a nih pawhin a mawi hi zawn hrâm hrâm tùr a ni," tiin min zilh leh bawk a.

Chaw ei khamah chuan ruah a tlâk deuh siar siar avàngin nihliap ka khum chhuak a, rei pawh ka kal hma chuan kawng chu ka kân a, car rawn tlãnin horn a rawn hmeh chuan ka phu deuh zawk a, leh kher kher chuan. Hmanhmawh takin ka kân ve țâwk țâwk sia, horn rawn hmeh leh kher chu a zahthlâk ve alawm. 

Ka hma lawka kawng kual zau laiah chuan car a rawn ding a,  hêlin vei lamah chuan ka kal a, ka hminga min rawn ko ri ka hriat chuan dingin ka en vat a, tu dang ni lovin Joshua bawk a lo ni a.

"Lo lût la?"

He pa hi, eng nge maw a tih ve ziah ni? Ka kal hun leh a rawn tlàn hun hi a va innang thei tak! An in hi kan vêng lamah hian a awm ve tho tihna em ni le?

"A la hma tho a, ka tlai chuang lo ang," tia ka chhàn chuan," I tlai dâwnah chauh em ni chuan i tum a?  Ka sàwm che chuan rawn chuang ve mai la?" a rawn ti ve thung a, a țawngkam hnuhnung zâwk a sawi laia a aw hman dàn vàng chauhin ka chuang ta, inthiam lohna rilru ka nei tlat a.

A tlàn chhuah dâwn chuan a nui sak a," A dik ta zaih mai," a ti phawt a, min rawn en leh zawkin," Kea hmanhmawh taka kal ai chuan i hah lo zâwk ang, bâkah, ruah pawh a rawn tla tam thut thei asin," a ti zui leh zat a, ka lo nui ve thung.

"Khaw awm dàn hi en la, a sûr tam thut lo tawp ang," ka ti ve thung a, ka hawi vêl a, ani lah chuan," Weather zawng, sawi lâwk a har a asin, kan hma lam hun hi second khat lek pawh kan sawi lâwk thei hleinem," a lo ti leh a, a sawi chu a dikna chen a awm ve tlat avàng chuan ka hnial zui duh lo va.

Dàwr kawt kan thleng thuai a, ka chhuk dâwn chuan," Zaninah ka rawn text ang che aw, i hman ang tiraw?" tiin min rawn en phei a, kei chuan," Hman ve àwm tak chu a nia," ka lo ti mai a, ka en duh lo lui tlat a, chutah," Ka lãwm lutuk e, hah hauh lovin hmâ takah ka thlen phah si a," tiin ka melh zauh a, kawngkhàr chu hawngin ka chhuak zui nghâl a, ka khàr leh hnu chuan," Zanin chu aw," a rawn ti leh hrâm a.

Rilru thar put ka tum êm avàng chuan ka ngaihtuah duh lo lui tlat a, rilru zauthau put lah ka tum hek lo. Ka hna chu țha takin ka thawk a, thil dang, ka hna lam ni lo chu ngaihtuah loh ka tum tlat a. Mi dang hnên ațang hian beiseina neih ka duh lo, kan beisei ang a thlen lohin kan na mai mai.

Zanriah ei khama ka nu pangpár siamna bula ka țhut ve lai chuan ka phone chu a rawn ri a, Remi a nih ringin ka la vat a, a lo ni tak tak a! Ka kal sawn ta rih a. Vawiin lama an hun hman dàn chu min rawn hrilhin Lalkâwnga chêt nuihzatthlâk dànte chu a rawn sawi a, kan nui vak vak a. 

An sem an picnic a lo ni a, a chhan chu nakin lawkah an result a chhuak thuai dâwn, an result a chhuah hnuah chuan an kim thei hlei thei tawh lo ang. College an chhuak țêp tawh a nih chu.

"A duh tak tak che niin ka hria, duh ve tawh mai la?" fiamthua ka tih chuan," Chhe-hot-a hi maw? A joker thei êm mai a, amah a insawisa a, fiamthu hlîrin a khawsa a, bialpa atân chuan hetiangte chu a fuh vak lo, nungchang cool deuh raih hian min hîp zâwk, an pà zâwk bawk!" nui deuh chung hian a rawn ti a, chutah," Ani hi zawng, kan țhianpa a la ni zui a, fiamthuin kan infiam kual vêl mai mai alawm," a rawn ti leh zat a.

Ka ngaihtuahnaah Joshua a rawn lang zawk a; mahse, chu chu duh lovin," Engtikah nge hla kha kan zir leh dâwn kha?" tiin thil dang ka zâwt ta daih a, eng eng emaw sawiin kan inbe rei zêk a, dârkâr chanve deuhthaw zet kan inbia nia!

Kan inbe zo ka phone ka han en chuan WhatsApp message a lo awm reng tawh a, ka han en vat a, number ka save loh ațangin a lo ni. Rin chu ka nei nghâl mai a; mahse, ka ring ngam chiah lo deuh a, chhiar pawh ka chhiar duh lawk lo nghe nghe; mahse, a hnu deuhah chuan ka chhiar ta nge nge a.

*Lalduhawm, i hman em?*   Ka rin kha a dik chiah, ani bâkin hetiang hian min la ko lo, ka hming tak tak ni lo mah se ka haw chuang lo va, ka nihna tak tak pawh ni chuang lo mah se min fak a ni ve mai a, huat lam aiin làwmawm lamah a kal ve tlat.

*Min hai a ni lo maw? Lalduhawmi ka ni lo*  tiin ka han chhâng lêt kher a, min hai lo tih ka hria, ka hre chiang lutuk tlat; mahse, hetia tih hi ka châk tlat mai a ni. Amahah hian beiseina neih ka duh lo, ka ngam lo, nula ka nihna angin min fiam ve mai mai a nih hi.

*Ka rawn call dâwn che, i buai lo tiraw?* a rawn ti ve thung a, inbiak kher chu ka duh lo asin le, sawi tùr ka hre dâwn lo, ka chhàn lêt dàn dik loh vàng vek! Pângngai takin ka be thei ang em? Ka nu leh ka nau an awm ve reng a, ka țawng an lo hre ve thei vek dâwn asin.

A rawn call ta. La duh lawk lo chuan ka en reng phawt a, thâwk ka la leh ham ham a, chumi hnuah chuan ka chhâng ta chauh a.

"Joshua ka nia, ka hai lo che chuan ka hria, Anne. Ka rawn be ringawt che a, i buai a nih chuan sawi mai la aw," a rawn ti thãwp ta sat a, phone-ah meuh min rawn be ta chu beng bul mai a ni si a, engtin emaw ni tak ka awmin ka hria!

"Buai lo ve." Sawi chhunzawm tùr ka hre lo nasa, ka aw pawh chu tlêmin a khùr deuhin ka hria, ka awm dàn hi ka va duh lo tak! A hre thei ngei ngei ang, ani kha chuan hetiang lam hi a dài thûk tawh hmèl bawk si.

"Tlangvâl inlêng i nei em? Ka rawn tibuai lo tak tak che maw?" a rawn ti leh a, kei chuan," A, inlêng ka nei ngai ngawt ngawt lo," ka ti ve thung a, ka sawi zo chiah chu ka chhàn dàn avàng chuan ka inchhìr leh deuh a, a hnênah ka inpuang ringawt tihna a ni mai si a.

"A țhat hlauh chu, thil eng emaw hrilh che ka duh a, naktûkah ka lo nghâk ang che aw."

Ka duh loh deuhin ka ngaihtuahna a luah tâk tlat chu. Eng thil nge min hrilh ang? Min duh thu maw?!! Teuh lo mai! Ani khân min chhaih mai mai a nih kha, duh te chu a teuh lo! Nge ka rilru en chhin a tum ni ang? Ka ngaihtuahna a luah ngut ngut lo thei lo, thil dang ngaihtuah ka tum pawhin ka thei lo. Pu Hruaia thlalâk pawh chu ka han en vang vang nain min hnèm vak lo, Joshua thil sawi tùr mawlh mai chuan ka rilru a luah.

Ka huphurhzia mai chuh! Khua vâr thei lo se ka tih rualin a thil min hrilh tùr chu ka hre châk tho bawk si, he pa hi ka duh tihna em ni? Duh lo ila hetiang hian ka awm ang em? Eng ang mi nge a nih pawh ka la hriat loh hi, ka duh thei lo ang, beiseina ka nei tùr a ni lo.

A tûka dàwr nghâk tùra ka kal chuan min lo nghâk ka hmuh mai ka inring deuh ngawt a nia; mahse, ka hmu hauh lo, ka hmuh loh avàng chuan ka rilru chu a hnual deuh tlat a nih chu. Ani khân dáwt min hrilh a ni ang, keiin ka lo âwih ve mai bawk a, beiseina ka lo nei hman a nih chiah hi.

"I mãwl lutuk! Engah nge beiseina i lo neih hman ni? Neih lo tùr ka ti mawlh mawlh a, mahni rilru pawh thunun zo lo, mãwl lutuk mai!" tiin ka inzilh mawlh mawlh a, ring mai tùr ka ni lo tih chu ka inhrilh pah mawlh mawlh bawk a.

Nilêngin ngaihtuah loh ka tum țàng țáng a, harsat erawh a harsa. A lakah hian ka rilru ka lo pe hman viau tawh a nih chiah hi, ka va mãwl tak êm! Engah nge hetiang hian ka awm ni? Ka mãwl!!! Hriat pawh ka hre chiang hauh si lo.

Mahse, tlaia ka haw tùr chuan ka hmu leh ta nawlh mai. Min lo nghâk reng a nih duh hmèl, a chhan chu ka  lam hawiin a car nghèngin a lo ding reng tlat a ni. Ka va hmu ve chiah bawk si a, han hmuh loh der theih pawh a ni lo, min rawn en ve reng bawk si.  Han hêlna tùr a awm loh avàng leh ka hàwnna kawng a nih miau avàng chuan kal zêl loh theih ni hek lo le, a lam ka pan hnai zêl lo thei lo.

A bul ka thlen hma deuh chuan car chu lo hawngin," Lo lût la, ka lo thlah ang che," a lo ti a, ding deuh datin ka en ve deuh reng ringawt. Tukin khân hmuh ka inbeisei kha a ni a, ka hmuh tâk lohah khân ka lunghnûr a, dâwt min hrilh leh ta niin ka hria a.

"Nizànah ka hrilh tawh che kha, thil eng emaw hrilh che ka duh thu kha, lo lût rawh le."   A mitah tak ka en ngam lo țhìn kha a nia; mahse, tunah hi chuan khatiang kha ka ni miah lo, a mitah tak chuan ka en lêt sak a, thu dik a sawi leh sawi loh hriat ka tum ni berin ka hria.

"Tihian a sawi mai theih em?" ka ti ta sap a, ani chuan," Theih tho nain khawiah emaw hruai lawk che ka duh pah a," a lo ti ve thung a, ka melh ta hrâ a, min tihlauthãwng, khawiah emaw a tih chu hotel-ah a tihna em ni? Ka hlauthãwng hmêl chu a lo hai bîk lo nasa, a nui hawk a," Khatiang khân min en lo teh, engtin mah ka ti dâwn lo che," a ti leh a. 

'Khawiah emaw' a tih chu gate lian pui chhûnga kawt zâwl zau nuam tak chu a lo ni a, chutah chuan min dinpui a, in pawh ka hmu; mahse, in hnungchhawn zâwnga ding kan ni a, min rawn hmu kher lo maithei.

Car ațang chuan kan chhuak lo. Pehhêl tehchiam nei lo chuan min duh thu min hrilh ta a nih chu! Awm dàn tùr leh chhàn lét dàn tùr pawh ka hre lo, mumang a ang ka ti a, ka la tawn ngai loh thil a nih avàng chuan awm dàn ka thiam lo, che lovin ka țhu reng ringawt.

Mahse, a fel ve ka ti tlat. Mipa ninhlei deuh chu ni se min kuah a tum loh pawhin min fawh a tumin ka ring! A nih loh pawhin min dek tal ang! Chutiang chu a ni miah lo, engtin mah min khawih a tum lo va, ka awm dàn ațangin hetiang boruak hi ka la tawng lo tih a hria pawh a ni mahna," Min chhâng lêt nghâl tùrin ka ti lo che, ka lo tlài tawh a nih phei chuan min hrilh hreh hauh suh, chutiang a nih loh chuan ka chunga i rilru put dàn i hriat chian hun, i inpeih hun ka nghâk ang che," a ti a ni.

Kan in bul deuh thleng min thlah a, kan kawt êma min thlah chu ka duh lo, ni dang ai chuan ka tlai lo thei lo si a, in ka luh veleh ka nu chuan," Buaina in nei deuh a ni maw?" a lo ti vat a, inthiam lo ru deuh tak chuan," Nia, bungrua a lo thlen belh a," ka han ti ve rawk a,  dâwt ka sawi ta ngawt chu a ni si a, rilru a nuam lêm lo khawp mai.

Inrinni zàn a nih vàngin chaw kan ei sawk sawk a, ka inkhâwm ve hrâm. Ka nu bula dâwt ka sawi vàng erawh chuan ka inthiam lo ru khawp mai a, ngaihzâwng ka neih tak tak hmain dáwt ka han sawi nghâl mai chu a ni si a, thil țha tak chu a ni hauh lo mai.

Zàn mutnaah chuan Pu Hruaia thlalâk ka neih bawk chu ka han hmet chhuak leh a, Joshua hi Pu Hruaia rawn ni thut mai se chuan aw... tih ka ngaihtuah a nih chu! Ka chhâng chiang viau ang chu; mahse, ka han inngaihtuah chiang leh a, anite zawng ka phû loh lutuk leh dinhmun inang lo lutuk kan ni a, nupui nei lai a nih bâkah ka beisei phâk loh a ni hrim hrim. A thuhrimah khawsak phung inang lo lutuk chu an inkawp rei thei tak tak lo an tih te chu ka ngaihtuah chhuak leh a.  Ni e, Joshua pawh hi mi awmthei ve tâwk tak fapa a ni ngei ang, ka phû loh a ni a, ka fîmkhur tho a ngai, kei ai chuan a upatna chu a tam vak lo maithei; mahse, ka la hriat chian loh bâkah eng ang nge a nih chiah ka la hre tâwk lo, ngaihzâwng neih dâwn pawhin fîmkhur tluk a awm lo ve, ka nu pawhin min hrilh tak kha, bâkah, bialnu dang pawh a lo nei maithei asin, dàwra a rawn hruainu pawh kha, a eng nge a nih ang?

A tûk inkhâwm bàn hun remchâng ka hmuhah Remi chu ka hrilh ve ta chhin a, a lo phûr nasa mai. Mit khap hauh lova min enin," A va țha dâwn ve! Ka hmu ve châk hle mai, a thlalâk i nei mial lo maw?" a lo ti vat a, ka neih àwm ka hre lo, WhatsApp dp-ah ni se thlalâk a dah hauh si lo.

Ka neih loh thu ka hrilh chuan," A va mak bawk ve! Ka hmu châk asin le! Chutiang thleng thleng chu a hrilh tawh che a, fìmkhur tluk chu awm lo mah se i han sawi hmangah chuan a chhiat loh hmèl bâkah a cool hmèl ka ti; mahse, i chhàn leh chhàn loh tùr thu keia lo sawi theih a awm lo bawk a, i thu tlûkna a nih ber chu," a ti leh malh malh a.

"Nangni pahnih kha eng thil nge in sawi a?" Lalkâwnga chuan a rawn ti làwng láwng a, kan en vat a, Jim-a leh Smiley-a nèn an pathumin kan awmna lam chu an rawn pan a, kei chuan," Mipa hriat ve chi loh!" nui chung hian ka ka lo ti vat a, Remi pawh chuan," Thurûk hi mi tam tak hriat chi a ni ngai lo," a lo ti ve bawk a.

"Kan nu tak hi chu aw! Kan inneih hunah chuan thurûk neih âwih loh kan ti ngei ang," Lalkâwnga chuan a lo ti a, Jim-a leh Smiley-a chu an lo nui țhâ a, Remi chu ka han melh ralh a, ani lah chuan," Kan inneih hunah meuh chuan thurûk pawh hi thurûk a ni tawh lo ang, thu phawrh a ni tawh ang," a lo ti a, a nui ve sâng tho a, fiamthua infiam țhang an ni a, an thil sawi hi thu tak hla takah an inlâksak ngai lêm lo; mahse, Lalkâwnga'n a star ru tih hi chu kan hre tho.

Thawhțanni zînga ka chhuah chuan ruah a sûr a, car-in min lo nghâk leh reng tawh a, hnial duh viau mah ila ruah a sùr avàng leh min nghah tlat avàng chuan ka chuang ta nge nge a, chutiang chuan tlaiah pawh a ni tho. Hna thawh tùr te hi a nei ve lo em ni? Zîng tin leh tlai tin min lo nghâk ziah a, ruah a sùr peih êm avàngin ka hnial phal lo țhìn a, ka chuang ve ziah mai bawk. 

Ni tina hmu ka ni bawk a, amah ka duhna leh ka ngainatna pawh a zual ve telh telh a, ka phû loh a ni tih ngaihtuah ve tho mah ila ka hnar thei tak tak chuang lo, a chhan chu kei hi heti ve mai hi ka ni a, ani lah hian duh tak takin min duh ve a ni ang ka ti, heti tak mai hian min chhaih buai reng chu a ni si a, a lakah hian induh thei ka ni hlawl lo a ni. Ka tân sângin phû lo mah ila ka ban phâkah a awm tlat a, ka kiangah awmin min duhna țawngkamin sawi lang tawh kher lo mah se a chét phungin a lantîr thung. Kan inkâr chu a tu ve ve mahin kan sawi chhuak tawh rih lo va, țawngka chuan sawi chhuak lêm lo mah ila kei pawhin ka hnial bîk lohzia leh ka duh ve tho a ni tih chu ka awm dàn ațangin a hre thiam viau tawhin ka ring.

Hmuh ngai loh ai chuan hmuh zin deuh chu ngainat a lo awl deuh chu a lo ni. Joshua-ah hian a chiang tlat, an awmna, an vêng leh a chanchin pawh ka hre chho ve zêl a, unau mipa panga zînga naupang ber a ni tih thlengin ka hre tawh. Chhûngkaw awmthei ve tâwk tak niin a nu leh pain hna thawh an nei ve ve a, an pension țêp tawh tih thlengin maw le! A ute hi pakhat chu sipai, pakhat UDC niin Mamit lamah nupui neiin a awm a, pakhat leh hi chu zirtîrtu niin pakhatin keimah angin dàwr a nghâk ve bawk. Amah tak hi chuan regular-a class kal a peih loh vàngin

IGNOU-ah M.A a ti mek a, a chhuak ve țêp tawh a ni àwm e.

Inhmua inkàwm ve reng ta na chu, kan chhûngkaw chanchin pawh ka hrilh ve nual tawh a, kan inah pawh vawi khat chu a rawn lêng ve tawh bawk. A țawng tam viau lo nain ka nuin a kàwm thiam a, zawhna eng eng emaw a zâwt a, a chhâng ve zêl lo thei lo va, a țawng ve țeuh mai. A tûk chaw ei laia ka nuin a chanchin min zawh loh avàng chuan ka lãwm angreng, thu țhain zilh erawh min zilh leh thung.

A hnua min hrilh dànin dàwra a rawn kalpui kha chu a cousin a ni àwm e, a sawi tâkah chuan inanna lai pawh an nei deuh," I bialnu a nih ka lo ring a," ka tih chuan a nui hawk a," Hria se a nuih a za ngawt ang chu!" a ti a, kei chuan," Hrilh miah suh aw, a nih ve duh hmèl êm asin," ka lo ti a.

A vawi khat nân hemi tlai hian a car chhûngah min fâwp a, ka zak viau nain ka chhàn lêt thiam ang angin ka lo chhâng lêt ve a, zei lo erawh min ti ngawt ang chu! Ka vawi khatna a nia, ka khawr alawm. Ani chu mipa a nia, țan hmasatu a ni bawk a, a zei reng, a chhan chu bialnu pahnih a nei tawh tih a sawi tlat a, an infâwp ngei ngei dâwn, experience a nei tawh alawm, kei ve hi bialpa ka neih vawi khatna a nih bâkah mi ka fawh vawi khatna niin miin min fawh vawi khatna a ni bawk a, ka tân chuan zei chu a har ve det.

"I bialpa hmasa ber leh fâwp hmasa bertu che ka ni hi vànnei ka inti tak zet, a hmasa ber atân chuan țha tak a ni ringawt!"

Thil hrehawm tak leh tha sèn ngai a ni lêm lo bawk a, min thlah apiangin miin min hmuh loh chuan kan infâwp deuh ziah a, ka zak lutuk tawh bîk lo, nuam ka ti ve tlat. Ani lah hian," Infawh hi a hrisêl a nia, uar deuh taka tih hian a hrisêl zual," a ti ve ziah a, a châng chuan ka nuih a tiza leh thut țhìn.

Remi pawh kan chanchin dik tak chu ka hrilh chiang tawh a, ani aia bialpa ka nei hmasa chu a âwih thei lo a; mahse, âwih lo ngawt mah se thu dik a ni bawk si, ani hi dik tak chuan kei aia nei hmasa tùr zâwka ngaih a ni; mahse, ka tih khalh tlat. Jim-ateho erawh kan hrilh lo, hrilh kher pawh ka tum lo, a țûl lo, a zahthlâk, bialpa neih inhrilh duat duat kher a țùlna ka hre lêm lo a ni.

*KAN NGAIHTUAHNA LEH SUANGTUAHNAA THIL ROPUI TAK TAKTE HI A TAKA CHÊT CHHUAHPUI A NIH SI LOH CHUAN ENG MAH LO MAI A NI*