☆KA BEISEINA☆ - 8 By Dingdi Pachuau

☆KA BEISEINA☆ - 8 By Dingdi Pachuau

Ka țhiante hi college an chhuak tawh a, a țhenin MZU lama an zir zawm laiin a țhen chu phai lamah an liam thla thung a, Remi erawh chuan," Zir zawm chu duh viau mah ila lehkha thiam sâng an tam tawh sia, hna zawn pahin B.Ed ka training mai teh ang," a ti a, tunah hian a training ve țan a, kan inhmuh hian an hma lam huna an tih ngèi ngéi tùr nia an sir-te sawi chu a huphurh lâwk thu min hrilh ve sap sap țhìn, kei erawh chuan ka thiam ang tâwka fuih vein," I hma lam hun tùr chu hun hriltîr rawh, lo huphurh țùng duh suh, țha takin i ti thei êm êm ang," ka ti ve țhìn a, ka hmaa tla tùr ni se ka huphurh ve tho ang tih chu ka hre reng; mahse, a rilru hnual zâwngin ka sawipui duh hauh lo thung.

Joshua nèn pawh kan inkawp chho țan a ni bawk a, hria vak an la awm lo va, dàwra mite pawhin an la hre lo. Didiki erawh hi chuan min ringhlel a, min hmu dùn ve zuk tawh bawk nèn, a hnuah phei chuan ka hrilh ta nghe nghe a. Min duhpui khawp mai a, vànnei min tih thu sawiin," Hetiang hi kan zawn kan zawn laiin i zawn hmuh ni hauh lovin a rawn zawng hmu zâwk che a nia, vànnei tak i ni, thlah miah suh aw, chelh tlat rawh, a chhe lo bawk si. Awi, in inhmeh reuh e!" a ti barh barh a.

Ni e, mi vànnei tak ka nih ka ring. Min duh ve miau si a, ka tân chuan a sâng a, ka cho phâk a ni lo tih pawh ka hria, star pawh ka star lo a, chutiangin ka en hauh lo a nih kha; mahse, tunah hi chuan hei, kan inkawp ve ta mai chu a ni sia, kan dinhmun a inthlau tih pawh ka hre reng; mahse; ka hnial zo lo a nih tâk hi, tunah phei chuan ka duh ve lutuk tlat tawh.

Zîng leh tlaia min thlah bâk hi hun dangah inhmuhna hun kan nei thei bîk lo va, kei dàwr nghâk ka ni a, ka thu thuin ka awm thei lo, ani lah dàwra min rawn hmu tùra rawn kal sek lah a tih chi hauh bawk si loh a, chu vàng tak chuan, phone a chhawr țangkai khawp mai; kan inbia a, inbiak mai a duh tâwk loh chângin a rawn video-call bawk a, sawi tùr a hria pawh a ni chuang lo, a châng leh a ngawi reng a, min rawn biaka min hmuh hrim hrim hi a duh ni maiin ka hre țhìn, zàna rawn lèn duh viau țhìn mah se ka nu a zah a, a rawn lêng zauh zauh tho nain inthlahrunna chin a nei ve tho a, a châng chuan min ngaizâwng ta hi ka khawngaih țhìn. A chhan chu hun ka nei lo ve êm mai a, a fâla min hmuh ve duh châng pawh a nei ngei àwm si a.

Ka nuin Joshua chanchin chu zàna pangpâr kan siam dun laiin min zâwt a, ka hriat chin chu ka hrilh ve mai a, ani pawh hian kan inzui ve a ni tih a hre tawh a; mahse, a sawisêl lo va, thu țha erawh min hrilh reng tho. Tlangvâl kawm dàn tùr leh mi bula awm dàn mawi min hrilh fo a, hmeichhia ka nih vàng hi a ni ang Bawiha aiin min zilh zing daih zâwk.  Joshua lo lèn chângin a lo be chhe ngai lo va, a be țha húrh chuang lo.

"A țha, mi pângngai nih chuan ngaihzâwng chu neih tùr a ni ngai e; mahse, ka sawi tawh kha, a hmasa berah Pathian hi dah tùr a ni, a phal loh zâwnga awm tum miah loh tùr. Ngaihzâwng neih chuan nei lo aiin thlèmna a hnai a, hmingchhiat pawh a awl bîk. Nulát tlangvàl kawnga hmingchhiat hi a zahthlâk a, hmingchhiat tawh chuan nupui pasal inneihna thlengin a nghawng thei a, fîmkhur êm êm tùr a ni," tiin min hrilh leh malh malh a.

Ka zah theih lohna zawng zawng sâwn khâwmin," Nu, Joshua hi i duh loh zâwng a ni lo tiraw?" ka ti ta sap a, ka zawh loh chuan ka hre châk si a, a awm dàn ațang hian a duh zâwng a nih leh nih loh ka hre thiam mang meuh si lo va, ka zâwt tawp a ni.

A nui a," Keia duh zâwng leh duh loh zâwngin awmzia a nei hleinem, lo inrawlh ka tum lo. In induh tawn chuan a țha a ni mai, in duh zâwng a nih phawt chuan ka pawmpui ang che u; mahse, hmêl leh sum ringawt en lovin an nungchang, an chhûngril nun hi en hrâm hrâm tùr a ni a, chu chu in duh chhan tùr atân ka duh bawk a ni, hmêl hi chu rei lo tê atân a ni a, chhûngril țha hi a pawimawh ber a ni, a daih rei ber bawk," a lo ti duah a. 

Ka ngaihtuah reuh reuh a, Joshua hi a hmêl a țha a, a tlâwntlai pawh a țha, ka phû loh a ni ka tih tawh kha; mahse, ka duh ai chuan amah hrim hrim hi ka la hre chiang lo chu ka ti, kan inhriatna a la rei lo êm asin; mahse, induh tùr hian rei tak inhriat kher hi a lo ngai hran lo a nih dâwn hi ka ti tawp mai. Vêng khata awm kan ni lo va, chiang taka inhriat chu a har ve alawm, tuna ka hriat dànah hi chuan mi sual chu a ni hauh lo mai a, min ngaihsak a, min ngai a, min thlahlel êm êm bawk; mahse, pawimawh ber chhûngril nun tak hi chu inhriat chian a har ve deuh bawk a, hun a kal zêl ang a, ka la hre chiang chho zêl mai tùrah ka ngai.

Zîng khat ka dàwr kal tùr min thlah chu," Engtin nge ka hming kha i lo hriat a? Kei lahin ka hre ngai si lo che a, chubâkah, ka hmu ngai bawk si lo che a," tiin ka zâwt ta a, ani lah chuan," Nula hmêl țha hi chu, hriat in awlsam alawm," a lo ti mai a. Melh ralh pah chuan," Fiamthu min thawh khum kher lo la," ka lo ti ve thung a. 

"Ka fiamthu lo, i hmêl țha alawm."

Ka lo nui hawk a," Ka hmêl hi a țha thlâwt lo, min hrilh chiang mai teh, ka hming i hriat theih dàn chu?" ka ti leh a, ka hmêl hi a țha lo tih ka hria a, chuta kârah ka biang leh hnârah țhuangvuak a la awm zui, ka vun a ngo ve deuh avàng hian a langsàr êm êm zui a, ka thin hi a rim thei a nia.

"Dàwra i țhiannuin a koh lai che kha ka lo hria a, i thawh țantirh tê lai kha a ni nghe nghe, 'Anne'. He hming hi chu mawi ka ti thlâwt, ka ngaina, ka thlahlel, a hming neitu ang chiahin."

A hmêl chu ka en phei reng a, chutiang teh thlâwt chuan hmaichhanah min sawi (fak der) mah se nuam ka ti tho a nih chu. A chhan chu a sawitu hi ka bialpa a ni miau a, zahah pawh ka la tawh bîk lo.

"Ka lãwm e, Joshua," ka ti sap a, ka lãwm tak tak a ni, ani chuan," In dàwrah sâwn ka kal ve fo a nia, țhian leh cousins hmeichhia hi ka ngah ve a maw, ka kalpui țhìn a ni," a ti leh duah a, kei chuan," Ka thawh hnuah chuan i rawn kalpui vak tawh lo a ni ngei ang," ka lo ti ve thung a, vawi thum chauh ka la hmu tlat si a.

"Ka rawn kal chuan rawn biak fàl deuh kher che kha ka tum dâwn si a, dàwr neitunuin a zilh hlak che ka hlau a ni, keimah vànga zilh i tawh chu ka duh dâwn hauh si lo va," tiin a kut chuan ka kut chu a rawn húm lum vang vang a, nuam ka va ti mai mai sî êm! Ka kut hûmtu kut hi kut mai mai a ni tlat lo, ka bialpa kut ngei a ni tlat.

Zan khat chu ruah a sùr nasat avàngin a rawn lêng thei lo va, min hrilh sa ve vek tawh a nia; mahse, a rawn chhuak thei bîk lo a ni. Min rawn be leh tho a, video call ngatin, kan țawng kan inhre țha thei azeng pawh a ni lo, min hmuh hian a lung hi a awi ve hrim hrim ni berin ka hria. Kan in luah hi in hnuai mah ni se ruah a sùr nasat chuan a bengchheng ve tho a ni.

A room-a a chetla chu ka en a ni deuh mai, a țawng hran lo va, țawng pawh ni se earphone ka hman loh chuan ka hre thei chuang lo ang. Ka tân chuan a hmuhnawm tho, a room ka fang ve a ni mai a, room a nei zau bawk si a, a nuam tih lah chu en mai pawhin a hriat hliah hliah a. A hnu deuhah chuan paper-ah hian eng eng emaw hi a ziak a, min rawn hmuh ta alawm.

A hmasa berah chuan 'Ka thinrim' tih hi a rawn ziak a, eng vàng tak chu ni ang maw tiin ka ngaihtuah a, a thinrimna chhan chu keimah vàng a ni thei ang em, eng thil nge ka tih dik loh tiin ka ngaihtuah hman hial a; mahse, a thil ziah pahnihna 'Ruah sùr vàng hian, rawn lèna hmuh che ka tum tehlul nèn!' tih a rawn tihlan leh chuan ka rilru a nuam deuh huai a. Zîngah kha chuan min thlah ngei a, tlaiah erawh an chhûngte Durtlânga awm a thlah chhoh avàngin min thlah hman ta lo va, chu vàng pawh chu a ni mahna le.

'Karleh Saturday zànah ka cousin birthday an làwm dâwn a, kal ve ang aw' a rawn tih ve thung chuan ka rilru a buai deuh nak mai a, hun thâwl kan neih dun ngai lohzia ka ngaihtuah chhuak nghâl zawk bawk. Inngaizâwng chu hlim takin hun an hmang dùn ve a ni ngai a, keini pahnih hi chuan hun thâwl tak kan la nei lo hrim hrim, pâwn lamah inhmuhna hun thâwl kan nei ngai lo va, kan neih ve chhun dàwra ka kal lam leh haw lam hi a ni deuh mai a, chu pawh minute 5 ațanga minute 10 chhûng vêl bâk a ni lo. Mipa a ni a, ka hman loh țhinzia hriain min nawr lui duh lo țhìn a ni ngei ang.

'I nu i dìl hreh chuan kan pahnihin kan dîl ang a' a rawn ti leh a, ka nui ringawt. Kan pahniha dìl chu a ngai hauh lo ang, dîl ta ila chuan a phal maiin ka ring, birthday tih vêlah ka chhuak khât a, ka țhiante, a hriat chian ve deuhho birthday lawmnaa ka kal hi a ni deuh mai a, chutah lah chuan ngaihtuahawmin ka awm ngai bawk si lo.

Mahse, ani hi chu ka bialpa a nia, bâkah, khawsak harsa lo tak fapa niin an vua leh vàngte pawh an khawsa thei ve tâwkin ka'n ring deuh ngawt a, chutiang bula awm chu ka tân a inthlahrunawm duh viau lo'ng maw? A bialnu tia min lo hriat ve phei chuan... ka inhmu tê cheuh cheuh mai ang.

'Kan la sawi chiang deuh dâwn nia' a rawn tih leh chuan ka bu nghat a, thu tlûkna siam nghâl ngawt theih a ni chiah lo deuh a ni. Kan sawi chiang phawt ang a, chumi azir chuan ka nu pawh ka dîl mai ang chu.

Joshua nèn kan inzui ațang hian Pu Hruaia pawh ka hre chhuak khât ta viau a, dàwra ka kala dàwr neitunu ka hmuh hian ka hre chhuak leh țhìn a, a chhan chu unau na nâ nâ chu inanna chin an nei tlat a, kan têt laia vêng khata kan awm lai khân Pu Hruaia hi ka hre chiang ve deuh ber a, a nauteho hi chu ka hmu ngai lo a ni ang, ka hriat hlawm àwm pawh ka hre lo.

Pathiannîah Remite in chung zâwlah ah Joshua nèn hun fâl kan nei thei ve ta hlawl mai a, Pathiannia kan inhmuh vawi hnihna niin a vawi khatna chu kan inah a ni thung. Remi nèn hmaichhanah  an inhmuh vawi khatna a ni a; mahse, Remi chuan a hmuh tawh hnu ang maiin a be bawrh bawrh nghâl a, a be tlângnêl thuai mai.

"Ni 21 khi thla thum kan nihna cham chiah a nia, hun hman dun a châkawm viau rualin hun i nei àwm si lo va, Ken-a birthday-ah tal chuan hun neih tum la, a birthday lawmna neih pahin kan pahnih chuan thla thum kan inkawpna cham kan làwm ve thung ang a."

Hun kal chakzia hi, thla thum kan lo inkawp tling ve reng tawh a lo nih chu! Ka lo chîk ve hauh lo va, kan nih țan nî pawh ka lo chhinchhiah hauh lo bawk , thil a hre thei hle mai ka ti, kei a hmeichhia zâwk pawhin ka hre lo a nia.

"Hun i chhinchhiah theiin i hre rei thei hlê mai, a làwmawm, kei chuan ka lo hre tawh hleinem," inthiam lo ru angreng tak chuan ka ti a, ani chuan," Ka chhinchhiah theih zâwng hi a ni ve a," nui deuh chung hian a lo ti a, a mit min siai khum sak bawk a.

"Ka ngaihsàn chi," ka lo ti ve a, kan nuih dun hak hak lai chuan Remi a lo chho leh tawh a, thingpui leh a hmeh a rawn chawi chho hi a lo ni a,  nui var var chung hian," Awm fâl tih vàng khân kohhran mittlung lovin in lo awm hlauh ang e," tiin min han fiam zui a, kei chuan," A teuh lo e, Paul-a'n Timothe-a hnêna a lehkhathawn chungchâng hlîr a ni kan lo sawi ni," ka ti lêt a, Remi chuan," Tenawm suh aw," a lo ti kher khar a, chutah," Lehkhathawn in lo sawi a nih pawhin Paul-a lehkhathawn chungchâng ni lovin hmangaih lehkhathawn chungchâng a nih zâwk ka ring," a ti leh a, kan nui ta dar dar a.

Chawhnu pum deuhthaw chu kan inhmu fâl ve thei ta a, birthday chunchâng pawh kan sawi fel thawkhat, kal ve ngei tùra min duh avàngin kal ve ngei pawh ka tum, Inrinnî tlai hi chu ni dang zawng aia hmain kan bâng ve a, kal hman ngeii ka inring.

Ni 21 tlaia min thlah haw pah chuan gift min pe a, parcel phêk lam deuh hi niin a inchàr vek a, en ka châk reuh mai mai. Hawn ka tum lah chuan," In i thlen hunah chauh," a lo ti tlat a, in thlen hlàn ka nghahhlelh țum ber a ni ngei ang.

In ka thlen veleh room-ah lût vatin ka han hawng nghâl a, lace kawrfual a lo ni a, a dum niin a mawi kher asin!! A to ngawt ang chu. Ka han ha chhin nghâl zat a, ka tâwk chiah bâkah ka inhmeh ve reuh lutuk tlat.

Card a lo awm a, chutah chuan a hawrawp ngeia a ziah 'Hun rei lo tê emaw tih laiin thla thum lai a lo ni ta; tún ang hun hi kum tam tak hmuh dun tum ang aw, Anne Lalduhawm💜' tih hi a lo awm vàng bawk a, ka chhiar zawh chuan ka nui deuh sak a.

*A HUN TAKAH, KAWNGHMANG NEIIN THIL DIK TAK TI LA, CHU CHU HLAWHTLINNA BUL CHU A NI*