☆KA BEISEINA☆ - 9 By Dingdi Pachuau

☆KA BEISEINA☆ - 9 By Dingdi Pachuau

Mahse, ka nu min zilhna thu ka hre chhuak zawk mai. 'Nula tân, a bialpa thilthlàwnpêk lawm viau loh tùr, pe tùr phei chuan tih hauh loh tùr a ni, sum leh thilpêk hi lawm viau loh tùr a ni a, thilpêk dawn duh vàng chauha mipa sum nei deuh tak kawp lek phei chu a zahthlâk, sum hmanga thinlung inleitîr hlauh phei chu a chhin pawhin tih hauh loh tùr, sum tam tak aiin hming țhat hi thlan zâwk tùr a ni' tiin. 

Lace kawr dum mawi zet chu ka en vang vang a, ka nuin hre ta se engtin nge min tih ang tih ka ngaihtuah lo thei lo, thilpêk chu ka dawng ta ngei mai si a, ka nu hi ka hrilh ang nge hrilh lovin heti hian ka nei tawp mai ang?

Ka rilru a nawm theih tlat loh vàngin kan inhmuh hmasak berah chuan a bulah ka han sawi chhuak a, ka inthlahrungin nuam lo chu ka ti ve reng mai; mahse, ka nu rilru tùr ka ngaihtuah lo thei si lo. Ani erawh chuan," Anne, hmeichhe țha tak i ni tih ka hria. I thil sawi pawh kha ka hre thiam reng mai; mahse, pêk che ka duh tlat si a ni, kan inkawp ațanga thla thumna chiah a nih vàng a nia, kawr ka hmuh lah khân ka mitthlaah i rawn lang hmasa ber bawk, pawm hrâm mai teh. I neih loh vàng leh thilpêka vûr che ka tum vàng a ni lo, chutiang chuan ngai miah suh. Ka ti tak tak, i inhmeh dâwn êm asin," a lo ti ve thung a.

Han hnarsak chu nuam ka ti bîk lo, thilpêka min vûr tum a nih lah ka ring hek lo, a thil sawi chu ka ring vek. Chu vàng chuan," Làwm loh vànga sawi chhuak ka ni lo tih i hria tiraw?" tiin ka han zâwt a, ani chuan," Hre tehrêng mai," tiin a lo bu nghat a, kei chuan," Um, ka pawm ang, hun dangah erawh chuan min pe tawh lo la tiraw? Thil inpêk kher loh pawhin hlim takin hun a hman dun theih tho bawk a," ka ti leh a, ani pawh chuan," Aw le, ka lo hre reng ang; mahse, i birthday-ah tal chuan ka pêk che phal tho la? Mi thilpêk hi nuam ka ti alawm," a lo ti leh a, a luhlul reuh lutuk vàng chuan ka nui hak a.

Ka nu laka zêp ka duh loh vàngin ka hrilh a, ani chuan," I pawmsak tawh tho a, sawisèl ka tum lo, lãwm takin i ha mai a niang chu; mahse, hun lo la kal lehzêl tùrah erawh chuan ka thil sawi kha hre reng la chu ka duh khawp mai," a ti a, kei pawh chuan," Aw le," ka lo ti ve a. Ka ngawih leh deuh vang vang hnuah chuan a cousin birthday-a kal chu ka dîl ta a, a chhan chu ka kal loh chuan Joshua rilru tihhnual ka hlau ve a ni.

"Bawihte, țha ka ti tehchiam lo asin, in inhriatna a la rei si lo, a che mawi lo ang chu ka ti hauh lo va; mahse, zàn lama chhuah hi chu țha ka ti vak lo a ni," ka nu chuan a ti vang vang phawt a, chutah," Ka duh loh zâwngin i awm ang chu ka ti hauh lo, ka ring tâwk che, i nu timualpho thei hian i awm lo ang tih ka hria a ni; mahse, sual hi zàn lamah hian a ngampa bîk a, mi chêt màwi loh zâr pawh i zo thei, bâkah, Joshua tih loh chu hriat i nei dâwn bawk si lo va, nuam pawh i ti dâwn em ni?" tiin min zâwt lêt a.

Ka nu thil sawi hi a dik vek. Ni e, Joshua bâk hriat ka neiin ka ring lo, a cousin-te chu eng ang mi nge an nih tih leh ang angin nge an lawm dâwn ka hre lo, in tùr lamte hi an leklam viau phei chuan kei pawhin nuam ka ti dâwn lo tih ka hre sa tho, chutiang chu kan țhianho birthday lawmnaah kan ti ve ngai si lo; mahse, a buan a hmaa lo kherh viau pawh chu a dik ber chuang lo.

Ka nu pawhin hun thâwl ka neih ngai lohzia a hre chiang a, phal viau lo mah se min phalsak ta tho a, min ngaihtuah viau loh nân hlim taka hman ka tum thu leh hma thei ang bera haw ka tum tùr thu ka hrilh a, Joshua'n min rawn lam vang vang a, ani pawh chuan ka nu hnênah chuan min ngaihtuah lo tùr leh a hma thei ang bera min thlah haw leh a tum thu chu a hrilh ve bawk a.

Min ngen angin a kawr min leisak chu ka ha a, motor chhûngah chuan min en vang vang a," Ka mitthlaa ka hmuh dàn chiah chiah! I inhmeh tak zet! Han fawh che ka duh viau nain i nuin min en reng si a," a ti sap a, ka han hawi chhuak a, ka nu chuan kawngka ațangin min lo thlîr reng tak tak a, bân vaiin ka nuih sak a, kan tlàn chhuak zui ta nghâl a.

A cousin chu hmeichhia a lo ni a! Hmeichhia an lo tam viau tak tak mai, a laina hnai tak tak vek an lo ni a, vua leh vàng an lo ngah a nih hi, an rual viau hlawm bawk a nih hmèl. Hmêl hriat ka neih loh vàng chuan Joshua chuan rei lo tê pawh min kalsan lo hrim hrim a, a cousin-te bulah chuan min hmêl hriattîr zêl a, min en duh viau hlawm nain an polite hlawm viau mai! A àwm ve tho, lehkha thiam awm khâwm an ni tih an chezia, hawiher leh țawngkamah pawh chuan a hriat theih mai si a, chulai kâra Joshua'n min zahpuina nei hauh lova min  ngaihsak êm êm mai chu nuam ka ti a, ka duhna pawh a zual sawt mai. Ka inchei ve viau kha a tìrah khân nuam ka ti vak lo kha a nia; mahse, tunah chuan ka inchhìr tawh lo, an zîngah țhing deuhin ka lang bîk lo ve tlat.

Programme an duang thiam viau, a hlimawm zâwngin hun kan hmang a, kan nui dar dar a, a hnuah an lâm leh suau suau bawk a, ei tùr leh in tùr lam ni se, kan hnianghnàrin cake lah chu a han tui êm êm khawp mai a, zak miah lova ei țeuh a châkawm hial mai ka ti, ka țhiante birthday chu ni na se chuan ka lim nghek ang!

Mipa dang zîngah rim dang nam awm mah se Joshua chuan rim dang a nam hauh lo va, a cologne hman rim tui zet chuan car chhûng chu a luah vang vang nghe nghe. Rim dang a nam ve hauh lo chuan min tilãwm hliah hliah, tûnlaiah hmeichhe zîngah pawh han ti mai thei an tam tawh tehlul nèn.

"Rim dang i nam ve loh vàngin ka lãwm e," ka ti sap a, a lam hawiin ka nuih sak a. Ani chuan," Hrehawm i ti lo tiraw? I tih ka lo hlau khawp mai a," a lo ti ve thung a, hrehawm ka tih loh thu chu uar tak hian ka han sawi ve a, min sàwm ve avàng chuan làwmthu ka hrilh hial a. 

"Zanina lo kal khâwm hmeichhe zîngah khân i duhawm ber tih i hria em? Mipa dangte pawhin an en duh êm che kha, an hmuh theih loha hruai hran daih che kha ka duh rum rum hial a; mahse, a tih chi hauh si loh, hun hmang tùra ka hruai chhuah i ni bawk si a," a ti charh charh a, kei chuan,"  Ka nihna tak ni miah lo mah ni se min fakna avàngin ka lãwm lutuk e.  Cousins i nei hmel țha hlawm tak zet, an polite-in an changkãng hlawm bawk si," ka lo ti ve a, ani chuan," An zîngah i chhe lo ber tho tho," a ti leh a, nui hak hak chung hian," Nang pawh mipa awm ve zîngah khân i chhe lo ber," ka ti ve leh a.

Min hruai haw hma deuh a, kawng lakah erawh kan ding ta rih," In ina ațang tawh khân fawh che ka châk tawh a, hun thâwl tak hnuaia fawh vang vang che hi ka duh a ni," a ti a, kei pawhin ka lo hnial teuh lo mai.  Motor rawn tlãn a awm zeuh zeuh nain min rawn hmu thei chuang lo ang.

Kan duhthawh dùn a, a duhthawh zual a, min fâwp pah chuan a kut chu ka taksaah a vahtîr ruai a, ka la tawn ngai loh a nih vàng chuan zã ka ti tlat pek a. Chutah, ka kawr hâk tlâng lam chu rawn hlîm chhovin ka mal a rawn chûl chho țan ta, ka phu deuh zawk mai a, a lak ațangin ka inla hrang nghâl daih bawk.

Ka thaw hawk hawk phawt a," Duh tâwk rih ang," aw khùr deuh hlek hian ka ti sap a, ani chuan," Anne, ka duh lutuk che tih i hai lo tiraw? Fawh che ka la kham lo asin," a rawn ti ve thung a, ani pawh a aw chu keimah ang tho, a pângngai bîk lo tawp mai.

"Joshua, kan tih leh chuan humsual kan dai palh thei a ni," ka ti chhuak ta halh a, sawi chhuah hreh ka duh lo, a pawi tùr a thleng ang tih a hlauhawm zâwk, hlim taka hun kan hmang hi a tàwp lam hlim lohnaa khàr a hlauhawm tlat, Pathian duh loh zâwng tak a la ni zui.

"Anne, ka mamawh che asin, min mamawh ve lo em ni?" tih pahin min rawn hnaih leh a, a kut pahniha ka bek tawn tawna dawmin," Anne, ka duhzia che hi thuin a sawi fiah phâk lo asin, ka duh tak zet che a ni," a ti leh sap sap a," Ka hria asin, kei pawhin ka--" ka sawi zawh hman hma chuan duh tih hriat tak hian min rawn fâwp leh tàwn táwn a.

Humsual dai palh hlauhna ka neih tlat avàngin a mood-ah ka chêng thei tawh lo va, ka rilruah ka nu ka hre chhuak lo thei lo. Min zilhna thu ka hre chhuak zut zut a, chutih rualin a hmêl chiang takin ka hmu bawk, keimah vànga hrehawm a ti tùr hmêl chu.

"Ka thei lo!" tia ka inngaihtuah harh meuh chuan ka kawr hnung zipper a lo inhawng thla vek tawh a lo ni! Inla hrang vatin ka țhu tawm chãwih a, tuna kan awm dàn hi thil dik a ni hauh si lo va, ka zak ru kher mai. Khùr deuh dar dar pah chuan," Joshua, kan ti thei lo, humsual kan dai thei lo," hlauthãwng zet hian ka ti mawlh mawlh a, ani erawh chu a ngawi vang vang a, mit khap hauh lovin min en reng ringawt. A hnuah erawh chuan a mit chu a chhîng sawk a, a hawi sawn ta nghâl bawk a.

Mut hmunah chuan ka inngaihtuah a, ka chal chu dawmin ka insehruh ngawt ngawt a. Ka inzahpui tak zet a ni, khatia a chêt ngam chhan kha chu keimah vàng a nia, khatiang khân awmpui lo ila chuan khatiang thleng thleng kha kan kal hauh lo ang le, kei pawh hian ka lo châk ve tho tihna em ni? Ka inngaihtuah harh tlài teuhzia kha, ani lah kha a țawng ta mang hauh si lo va, a thin kha a rim em niang? Mahse, min rawn text-naah kha chuan *Sorry*  a rawn tih kha maw... Han text lét duh viau mah ila sawi tùr ka hre hauh si lo, bâkah, ka zak deuh bawk si a, ka chhâng lét ta lo ringawt.

Amah pawh chu a inthiam lo deuh nge ni a, min hmu hreh ve deuh pawh ka hre thiam lo, a tûkah pawh chuan a rawn lêng miah lo!  Ka rilru a nuam fahran lo va, a thin a rim a nih ka'n ring deuh ngawt a. Remi lah chuan kan inhmuh duh leh a ring deuh a ni ang," In chungah kan chho leh dâwn em ni ang?" a ti a, kei chuan chhoh a ngaih loh thuin ka chhâng a, nizàn lama kan chanchin erawh ka hrilh lêm lo, ka ngam teuh lo, a zahthlâk.

Min rawn be tho a; mahse, Inrinni zàn boruak erawh a thawi pawhin a sawi chhuak lo, min rawn biak avàng chuan a lung a awi lo hran lo a nih ka ring a, ka rilru pawh a nuam deuh huai mai. Khatiang thil kha chu theihnghilha hlim taka hun hman chhoh leh ka duh a ni, a thiam loh pawh a ni hleinem, mipa pângngai tak leh hrisêl țha a ni a, mihring tung chhoa kal zînga mi pângngai chin chuan an tawn vek tùr a ni, chûng zîngah chuan insûm thei an awm a, insûm thei lo an awm bawk a, a hun hmaa insûm thei erawh hi chu a hnuah an hlim deuh nge nge tih ka hria.

Didiki'n," Joshua cousin birthday-ah khân i kal ve em?" tia min zawh chuan," Aw.." tiin ka chhâng a, engtin nge a lo hriat ni? A lo kal ve em ni? Mahse, ka ring chiah lo, hmuh pawh ka hmu lo a nih kha.

"I lo kal ve em ni? I va hre ve?!" tia ka zawh chuan," Kal lo ve, a cousin, Zoramate kha ka țhenawm lawka awm an nia, ka ute nèn hian an inkàwm ve țhìn a, chuta țang chuan ka hria, bâkah, Instagram lama an post ka hmu bawk a," tiin min lo chhâng mai a. A lo nih mai mai chu a! Khawvêl hi a zîm mang tak e ka ti.

"Ka hmu tel che a," a tih leh chuan ka melh hrâ a, ani lah chuan," A ni reng! Hei en la," tiin a phone chuan Instagram lama tu emaw ber post chu min entîr a, ka lo lang chiang ve ngang mai, ka hmai țhuangvuak erawh a lang lo tih theih a ni, nuam ka ti ru veng veng mai.

Kan inkâr tluang purh hi nuam ka ti a, a tluang leh lutuk hi a châng chuan kan ințhenna ni a hnai dâwn a niang tiin ka ngaihtuah a, a nih loh pawhin harsatna eng emaw tâwk dâwn tlat ang tein ka inngaihtuah bawk a, harsatna tâwk lo hian inkawp reng thei ila tih hi chu ka duhthusàm a ni a; mahse, he khawvêlah hian tuin nge harsatna tâwk lo ngai ni? Harsatna tawh chu ka duh hauh lo nain kan hma hun tu mahin kan hre si lo va, ngaihtuah chiam a țûl lêm lo nain ka ngaihtuah tel ve lo thei lo. Mut hmuna ka ngaihtuahnaah pawh hian kan ințhen ve zauh zauh tho a; mahse, hrehawm ka tih tùrzia ngaihtuahin ka ngaihtuah thui duh lo va, a hlimawm lam bawk hi ka ngaihtuah lui țhìn.

Ka nuin min rin tâwk avàngin min rin ang ngeia nun ka duh a, Joshua pawhin chance min neih nawnpui a tum leh tawh chuang lo. Chance nei tùr pawhin hun ãwl ka nei lo ve êm bawk a, a hre chiang ve bawk. A châng hi chuan ka khawngaih ve țhìn, bialnu a nei ve êm êm a, min ngaih zual deuh leh min thlâkhlelh deuh châng pawh a awm ve ngei ang chu; mahse, chutiang hunah pawh chuan kei hian hun ãwl ka pe thei tlat lo, mi thuhnuaiah ka kûn ve tlat si; mahse, naupang chhia a ni tawh lo va, awm lo ngèna thinrim rual lah a ni hek lo, min hre thiam êm êm zâwk țhin a, hei vàng tak hian amah ka duhna hi a zual sawt țhìn.

Zàn khat a rawn lêng chu kárleh lama zin a tum thu a sawi chhuak a, ka hriat rual rualin ka rilru a hnual nghâl rawih rawih mai; mahse, tilang lovin khawiah nge a zin dâwn tih leh engtia rei nge a chàm ang tiin ka lo zâwt vat a, ani chuan phai lamah a u zinpui a tum thu leh an awm rei deuh a rin thuin min chhâng a.

"Ka ngai àwm che, rawn haw thuai tum tal la?" ka tih chuan," Kei deuh hian asin ngai dâwn che, rawn zin ve zâwk ta che," a ti sap a, ka lo nui sak a," Ka châk ve khawp mai; mahse, thil theih a ni si lo, dam takin i zu awm ang a, rawn haw thuai i tum dáwn nia," ka ti leh a.

A kal tùr pawh ka thlah liam thei lo, ka hna hi ka duh hun huna ka chawlhsan theih a ni tlat si lo a ni, hman veleh a chinchâng hre tùrin ka be zêl a, phone-ah inbe reng mah ila min hlatsan zêl a ni tih ngaihtuahnaa a awm tlat avàngin ka ngai nghâl êm êm mai a, ani pawh chuan," Ka kalsan hma hauhin ka ngai nghâl ringawt mai che ka ti, kal loh mai a ni ka duh ni!" a rawn ti ve nghe nghe a, chu thu ringawt pawh chuan ka thinlung ngui deuh nghiai tawh chu a rawn tinung thar leh thei tlat nia!

Tlaia kan bàn hma deuh chuan pi ber Ahlutei chuan phone call a dawng a, a bul hnaih bera ka din avàngin a țawng chu ngaithla lêm lo mah ila chiang takin ka hre thei a, hlauhthàwn hmel taka," Irene-i maw?!! Khawi damdawi inah?!! Mâm, nangmah i țha em?" a tih chuan en lo mah ila ka beng ka chhi ngun zual sauh a, an thil sawi lo ngaihthlâk rûk chu duh lo viau mah ila ka beng a verh tlat si.

"Aw, ka lo kal nghâl ang, Mâm, nangmah i țha tak tak maw?" tiin a zâwt nawn leh a, tu nèn nge an inbiak chu hre chiang lo mah ila thil pawi eng emaw a thleng ngei tih chu ka hre thei a, a kal nghâl dâwn a nih phei chuan dàwr kan khãr nghâl ngei bawkin ka ring.

Ka rin loh deuhin min rawn ko ta, ka en vat a, kal hnaiin," Eng nge ni ta?" ka ti nghâl thuai a, ani chuan," A tlai ve tawh tho bawk a, kan inkhär mai dâwn em ni ang? Ka ute nupain accident an tâwk a, ka kal vat a ngai si a," a ti a, chutiang thil chu ka lo rinsa deuh mah ni se a u Hruaia a ni tih ka hriatna chuan min țhâwng a, phâwk zetin ka en reng ringawt.

*HLAWHTLIN TUMA I  THIL TIH MÊKAH KHÂN I THEIHTÂWP KHA HAN CHHUAH TEH, I INCHHÎR HAUH LO ANG*