☆KA BEISEINA☆ - 17 By Dingdi Pachuau

☆KA BEISEINA☆ - 17 By Dingdi Pachuau

Ka taksa hrisêl viau lo mah se ka rilru erawh a zia chho ve zêl tawh a, hlim taka nuih hawk hawk ang kha chu la nei chiah lo mah ila inngaihtuaha mal ngawih ngawih tlata inhriatna leh hma lam hun thim bîk riaua inhriatna ang kha ka nei tawh lo, a chhan bul ber nia ka hriat chu ka mumanga Joshua ka hmuh vàng kha a ni ka ti lo thei lo, a sawi ang khân ka bulah a awm tlatin ka hria a, hlim hmêl pua mi han biak pawh ka harsat tawh bík lo rêng a ni, ka bul lawkah min chènchilhtu a awm reng a, min kalsan ngai lo niin ka hre tlat a, ka mumang mai mah ni se ka tân chuan mang nung an tih ang hi niin ka hria.

A thlànlung an phun thuai a, min rawn hrilh ve thlap nghe nghe, min lo en hran lohzia leh min lo la theihnghilh bîk lohzia ka hriat chuan ka lãwm hlê a, lehlamah ka zakin hrehawm ka ti ru viau bawk. Kei ve mai min rawn lam ve tak țâwk țâwk chu a nia, min rawn lam miah lo pawh ni se vuina tùr leh hriat thiam lohna tùr a awm loh tehlul nèn, mi pângngai chung lam chhûngkua an nihzia a lang chiang ngawtin ka hria. Joshua puala hun hnuhnung ber tùr ang a ni tawh bawk a, an insêng nasa ngawt ang chu, mi sàwm lah an tamin an rawn kal țha hlawm bawk a ni ang, an țhahnem êm mai.

Chhùn lama a thlalâk hrang hrang leh a dam lai video hrang hrang kan en vàng nge, zànah ka mumangah ka hmu chuai chuai mai a. A châng chuan kan lo hlim dùn khawp mai a; a chângin kan lo ințhen bawk a; mahse, ka mumangah pawh chuan ' A thi tawh reng sia, engtin nge kan la awm dun theih le?' tiin ka lo la ngaihtuah chhuak thei tho a nih chu,  mak ve deuh chu a ni.

Hun a ral a, Joshua boralna pawhin kum a tling chho ve ta reng mai. 'Khuareiin mi a hnèm' an tih țhin kha, ka hre thiam chho ve telh telh, Joshua theihnghilh lo mah ila tunah chuan hun a lo rei ve ta bawk a, ka ngaihtuah rùn tawh bîk lo va, țhian țhate nuih rual pawhin ka nui ve thei tawh a ni. Lalkâwnga bulah phei chuan a nuih loh theih loh, a bula awm tawh chuan min tih nuih tum rêng rêng țhìn a ni bawk a, ka țhen reng mai. Kan inhmu khât êm mai pawh a, hmu zing theiin a bulah awm tam phei ila chuan ka tân hian a va țha lehzual dâwn êm ka ti hial țhìn. Ka țhiante hi zirna sâng zâwk zirin hmun dangah min awmsan deuh vek a, ka țhiante zîngah Remi nèn kan imhmuin kan inbe ngun thei ber a, dàwr lamah Didiki, anni pahnih hian ka tân țhian nih an tlin êm êm mai a, Pathian hnênah pawh làwmthu ka sawi fo țhìn a ni.

Mahse, mipa lam erawh ka hawi lo tawp rih. Mipa hrim hrim hi nulain tlangvâl a melh ang hian ka la melh thei lo, ka tum lo a ni ang, ka hma hun tùr erawh ka la hre lo nàngin tûn hnaiah hi chuan ka țhian mipate leh ka nau mipa tih loh mipa dang rêng rêng hi chu ka hnìmhnai lo hrim hrim ti ila a dik ber ang. Nula nih ve chuan min chhaih dertu hi chu an awm ve lo thei lo va; mahse, an peih rei ngai lo thung, ka ûksàk lo lutuk a, ka awm dàn hian a hnarin a ti beidawng țhìn a ni ang ka ti mai. Hna hi țha deuhin thawk ila, mipa lam ngaihven tawh rih lo bawk ila, chhûngkua hi han inhmangaih viau mai ila, kan tum tâwk tùr chu Pathianin min ruatsak leh mai ang chu.

Pathian zârah ka hrisêl chho a, hna ka thawk țha a, chawlh pawh ka la ngai tawh lo, Ahlutei pawhin min ringin a buai zual deuh châng phei chuan tirhkahah ber min neih a, an in leh dàwr hi ka kàrtawn zut mai țhìn. Ka sawisêl ngai lo va, hah thu pawh ka sawi ngai hek lo, min ring ngam hi dik tak chuan nuam ka ti zâwk a ni. Ka nu ni se a hrisêl țhain thlai a zuar peih a, sum pawh tlêm tlêmin a lo thawk chhuak ve zél a, Bawiha pawh class a kal loh chângin a inhlawh ve ziah bawk nèn, thawk thei vek kan nih avàngin Pathian zârah kan khawsak pawh a zia ve viau tawh a ni. Mamawh kan nei tam lêm lo a, ka nuin mamawh ngah lo tùrin min zirtîr țha bawk a, kan zàwm țha viau. Bawiha erawh college hial a rah ve tawh avàngin mi zîngah inthlahrung lutuka a awm ka hlau țhìn a, class kalnaa a hâk tùr T-shirt ka leisak zauh zauh, kekawr erawh a inhlawhna ațangin amahin a duh zâwng a lei mai thung.

*******

*En teh, hrilh tùr che ka ngah lutuk ringawt, ka rawn be dâwn che, i hman em?*

Remi whatsApp message a ni a, zanriah ei kham niin thlèng ka sil zo deuh chiah a, message ri hriain ka phone ke en nghâl a ni. Eng thil nge maw min hrilh ang? A ho leh ngawt ang chu, ka nui sak a, ka rilru hi hria se a thin a rim lehpek ngawt ang.

Keimah zâwk chuan ka va bia a, ani chuan," I hman chiangkuang maw?" a rawn ti leh a, ka hman chiangkuan thu hrilhin eng chungchâng nge min hrilh tùr a neih tih ka zawh chuan, ani chuan," Lalkâwnga maw le,  vawiin chawhnu khân min duh thu min rawn hrilh a nih chu!" a rawn ti nghâl a.

Ka rin loh lam daih a ni. 

"E... a nih chu, a va țha ve!" ka ti teh ngawt a, ani chuan," Thutak deuh teh! Engtin nge ka tih ang? Chhàn dàn tùr ka hre lo a nia," a rawn ti a, kei chuan," Nang berin i hriat loh te chuan, ka tân phei chuan hriat a har àwm e," ka ti phawt a, min chhàn loh vàng chuan sawi chhunzawmin," A fiamthu a ni lo maw?" ka ti leh a, ani chuan," Teuh lo mai! Kei pawhin 'I fiamthu a nih kha, rawn uang suh' ka ti nghe nghe a, a rawn duh lo nasa! En teh, a rawn thutak sia, inbiain in-text zauh zauh țhìn kan ni bawk nèn, biak pawh ka hreh zo vek tawh ngei ang," a rawn ti leh a.

"A ho êm mai, be hreh miah suh," ka lo ti vat a, chutah," A nih leh, dik takin min chhâng la, amah hi i duh ve deuh rêng rêng em? Tlëm tal pawhin?" tiin ka han zâwt ve hrim hrim a, ani chuan," A... ngaihzâwng en hian ka en ngai lo hrim hrim a, min fiam châng pawh hian fiamthu bâkin ka chhâng ngai lo tih i hria ang a; mahse, min hrilh hnu ațang hian... ka hre thiam lo, ka duh ve deuh a ni ang, min rawn hrilh ațang khân amah chauh ka ngaihtuah nghâl char char a ni mai, ka thinphu pawh hi a dik thei lo," a rawn ti sar sar a, ani hi chuan zêp hi a nei ve lêm lo va, thu dik tak a sawiin ka ring nghâl thlap bawk.

"In induh tawn chuan a țha a ni mai, kan mi hriat chian a nia, a sual lo tih lah kan hria a, ruih theih thil ni se a ti bawk si lo," ka tih chuan ani thung chuan," Nia, sual lo ve, a ti tak tak a nih phei chuan kei hian ka phû lo lutuk zâwk maw le! Ka ning, min rawn biak ațang khân amah chauh ka ngaihtuah tlut tlut tawh a nia! Ka vei nghâl teh ngawt a ni ang," a rawn ti leh a, thâwk a la vei hap hap a, ka nuih a ti za angreng. Țawng tuma ka àn zuau lai chuan," Tunah amah ni se hmun dangah a awm daih lehnghâl a, hetiang hi ka duh lo, ka duh thu pawh ka hrilh hmain ka vei nghâl tlut tawh a nia, ka rilru a hrehawm rei dâwn êm asin," a rawn ti leh a. Țhiani hi chu aw... a inpuang nghâl vek alawm le, chhàn dàn tùr min rawn zâwt ve tak a, a chhàn dàn tùr lah chu a hriat nghâl vek si a.

Pathianniah kan inhmu a, inkhâwm bànah an inah ka pêng haw a, a room-ah awmin Lalkâwnga nèn an inbiak dàn chu min hrilh sap sap a, a hmêl ațang pawh chuan a rilru a hlim tih hre thei tho mah ila a zak pah tho tih a hriat theih a. 

"En teh, a sawi dàn chuan min duh thu min hrilh dawt ngam bîk lo va, kan inkàwm țhìn bawk sia; mahse, hmun danga a awm min hmu thei ta lo hian min ngai lutuk a, a hmaa hmaichhana min hrilh ngam chiah lo khân phone-ah chuan 'min hmu thei lo bawk a' tiin, min rawn hrilh ngam ta ni àwm a ni. Video call-a min rawn biaka min rawn hmuh theih ngei pawh a duh a; mahse, keiman ka duh lo thung a," a ti sar sar a.

"I zak a ni maw?" Nui chunga ka lo tih chuan," Zak e, ka hmu châk tho nain ka hmu zak thar tlat alawm," a ti mai a, phone chu hmet êngin," Min rawn be țêp tawh ang, i be ve dâwn nia aw," a ti sauh sauh a, a sawi ang deuh tak tak chuan a phone chu a rawn ri zui ta thuai a. Ka awm ve tih hrilh hre lo tùrin ka ti phawt a, an pahniha an inbia chu ka ngaithla duh rih a ni.

Tunah chuan Remi pawhin bialpa a nei ve ta a ni a, Lalkâwnga nèn an han inbia a, hlim taka an nui dùn leh an induatna țawngkamte han hriat chuan Joshua ka hre chhuak vawng vawng mai. Ani kha la dam ve se aw... mahse, ngaihtuah thui zêl duh lo chuan Lalkâwnga chu ka be ve ta zâwk a.

"Lo haw thuai rawh, hmaichhanah ngei i hmêl kan hmu châk tawh a nia," ka tih chuan," Ka lo haw thei țêp tawh a ni, tuna ka inhlawhna hi a laklawh reuh lutuk a, rei a ni tawh lo ang," tiin min rawn chhâng ve mai a, Remi chuan," Chhuanlam hi chu a awm ve thei zêl a nia," a lo ti sap a.

"Ka chhuanlam mai mai a ni lo aw,  ka lo ti ve laklawh tawh si a, rilru puitling lo deuha han bànsan thuai kha ka duh lo a ni, bâkah, nakina ka tâna țha tùr a nia, ka tâna țha chu i tân pawh a țha dâwn a," a rawn ti deuh hnâp a, Remi chuan," Nula an tam tal a ni ang," a ti leh țâlh a, min rawn enin a ţhen sak a, Lalkâwnga erawh chu a rawn nui hawk hawk a.

"Nula hmuh tùr an awm hlawl lo, kan hmuh ve chhun lah hi vainu dul kiar zet leh dum tliang hluau a ni mai a, ani lah hi pasal nei tawh niin an nupain kan cook an la ni zui, nula chungchângah kher hi chuan kha lam kha ka rawn ngaihtuah rauh rauh țhìn," a rawn tih leh chuan Remi chuan," Nula chungchângah chauh maw?" a lo ti leh nghat a, an inbiak dàn chuan ka nuih a ti za pha ve tlat. An inchhàn kual vêl dàn ațang chuan an inhaw lo tih a hriat tho bawk si a, eng emaw lai tê inkhersak mah se a hlimawm ve tlat, nuih a za lo thei lo a ni.

Didiki pawhin bialpa a nei ve tawh a, ani bialpa erawh chu zirtîrtu niin tlangvâl senior lam ve deuh tawh a ni daih thung a. A thlalâk min hmuh tirh phei chuan ka âwih lo lek lek hial; mahse, tlangvâl fel, inchãwm thei leh kohhranah pawh inhmang ve tâwk tak a nih thu min hrilhin," Pâwn lam lan dàna țha ringawt hi kan melh țhìn a; mahse, chu chuan rei a daih thei lo, pasal tùr atân phei chuan chhûngril lam țha leh belh chian dãwl hi a pawimawh viau a ni, pasal chu kan dam chhûng hun, a nuam leh a hrehawm hun pawha kan kawppui tùr a ni si a, pâwn lam lan dàna țha ngawt ai chuan belh chian dãwl nun nei leh Pathian țih mi hi an țha ber," a ti barh barh a, a thil thlìr dàn chu ka rin aiin daihin a lo puitling mai si a, kei lahin pâwn lam țha ka lo ngai pawimawh êm êm si nèn, ka zak ru chem chem mai.

"En teh, kan inupat hleih sia, eng angin nge i ngaih ve?" tia min zawh chuan ka en deuh hau a, a zawhna chu ka man lo țêp a ni; mahse, ka hre thiam leh a," A țha alawm, in induh tawn phawtte chuan lo sawi ve theih kan nei nâng!" nui deuh chung hian ka lo ti a, ka rilru dik tak a ni ka sawi ni.

"I ngaih dàn chu mi zawng zawng ngaih dàn ni thei se ka va ti tak! U Vâla nèn hetia kan inkawp hi min hre chiang lêm lo chuan hlawh a neih vànga duh leh a sum chauh ka ûm vàngah an ngai a, 'A senior tawh si, ani a la naupang si, sum bâk a ni lo ang', 'A țha nghah nân a ti a nih hi' min tih loh leh 'Hlawh nei lo se chuan a duh teuh lo ang' min ti țhìn rêng a ni, engtin pawhin min lo sawi mah se pawi ka ti lêm lo, hre chiang lovin an rin thu an sawi ve mai a nia. A, a țha vek mai," nui deuh chung hian a ti a, a thil sawi chuan Mapuia 'Smiley-a' min dem hun laia mi min sawina kha min ti hre chhuak zawk nghe nghe.

Engati nge mi chanchin hi kan sawi peih êm êm mai ni ka ti țhìn. Kan hman lutuk vàng a ni ang te ka ti a, a chângin 'Mihring kan ni miau mai a' ka ti leh ringawt țhìn bawk. Rilru chhe lutuk mihring hi kan lo tam êm mai a, mahni sualna leh tlin lohna hre thei miah lo, inhmu țha êm êm hian mi tlin lohna leh mawi lohna kan sawi a, nuam kan tiin a hre ber nih kan la châk zui a, kan rilru hi a hrisêl lo tlâng hlawm chu a lo ni. Mahni hnaah buai êm êm mai ila, mi chanchin chhe lai buaipui hman lêk lo hian buai ila mi chanchin kan sawi peih pawh hi a zia deuh te hian ka ring ringawt a, a sâwt viau ang em tih phei chu ka hre hauh lo; mahse, mi chanchin sawi hman lo lêka kan buai chuan sâwtna chin chu a awm dâwn hrim hrim ka ti ve tlat.

Zirtàwpni a ni a, dàn pângngaiin kan buai lehpek khawp mai a, mawng pawh kan hûng hman lo hrim hrim; mahse, hetia buai hi ngaiah ka nei titih tawh a, hei hi dàwr neitu hlâwkna a ni a, dàwr neitu a hlâwk miau chuan keini a thawkate tân pawh a nuam ve a, inhralh theih loh ai chuan hah deuh mah ila rilru a hlim lo thei lo, bâkah, Ahlutei hi a fel a, kan hah ve tih hi a hre chiang a, ei tùr lamah pawh min duhsakin kan hah phûin ei tùr min hlui țhìn a, kan ei tùr atân chuan sum a ui ngai bîk lo.

Tlai lama dàwr kan khàr hma deuh, dàwr khàr nân dârkâr chanve zet a la awm ang tihah chuan phone call a dawng tih ka hmu a, a chhan chu amah hnaih berah ka ding țhìn miau a ni. A hnu deuh lawkah chuan min rawn ko a, ka pan vat a, a che deuh sek a, a awm mai mai thei lo a nih hmêl, phone call a dawn kha thil țha lo a ni tihna em ni ang? A hmêl leh mit mengah chhiar ka tum deuh nain ka hre thiam mai lo, eng emaw chu a awm a ni.

"Anne, dàwr hi kan khàr hma mai dâwn em ni ang?"

Mak ti ru tak chuan ka en reng a, ka lu ka bu nghat ringawt. Kha maw, eng emaw chu a thleng a ni chiang mai. Dàwr chu kan khãr ta thuai a, kan haw dâwn chuan Ahlutei vêk chuan," Naktûk lam chu chawlh la vek mai ang u aw, hun ãwl kan nei tihna a ni mai, chawlh pawh in neih ngai loh hi," a ti leh a, mi dang chuan," Yess...!! " tiin an inen kual a, an hlim hmêl a hmuh chuan nui hmël chu a pu deuh a, kei pawh chu ka nui  ve deuh tho nain a mitmei ka vëng deuh hlek thung. Chawlh kan nei thei tur chu ka lãwm lo a ni bîk lo, chawlh kan nei tur làwm lutuk anga lan kha ka inthlahrung deuh a ni.

Hmanhmawh taka a haw chu ka en zui deuh reng a, Didiki nèn tàwi khawmuang deuh rihin kan chàwl tùr a làwmzia chu a sawi sârh sârh a, kei chuan a thil sawi chu ka lo ngaithla thung a, chumi pah chuan kan chawlh chhan tùr àwm ka ngaihtuah ve bawk a.

"U Vâla nèn kan chhuak dùn thei dâwn hlauh a, a tihzia ka ti tak tak a ni, chawlh ka neih theih loh avàngin chhuah dunna hun remchâng kan nei thei ngai lo va," a tih chuan," Eu, va nihlawh bîk ve! A nuam ngawt ang chu," ka lo ti ve a, ani pawh chuan," Nia, min sàwmna a rei ve tawh bawk a, ka ti hlawhtling thei tùr hi ka lãwm khawp mai," a ti ve bawk a.

Zànah Remi nèn kan inbia a, chawlh ka neih tùr thu ka hrilh chuan," Yes! ka rawn lêng ang," a eawn ti zat a, ka nuih a tiza angreng khawp mai. Kan han awm dùn ang a, Lalkâwnga chanchin kan han sawi leh ang a... mahse, a nuam ve alawm, heti tak hian a lo duh chho ve thei ta a nia, pakhata lahin a hèlnaa rei ve tawh a, rem takin han inkawp se, induh hluah hluah se a țha alawm. Induh loh ai chuan induh tawnte chu a țha daih zâwk si a.

A tûkah chuan ka insûk laiin a rawn thleng a, chhùna thingpui hmeh tùr ni ngei tùr hi polythene-in a rawn khai bawk a, ani hi chu a heti thlap zél. Ei leh in hi a uar ve a, kamram thil hi a ei nasa viau bawk, thau pawh a thau thei lo.

"En teh, thil mak deuh ka hria asin, a mak ka ti râp mai!"

Thil mak deuh lah hi a hre thei bawk sia... mahse, kei ai thlâwt chuan țhenrual a kàwm tam deuh bawk a, thil mak a hre thei viau pawh hi a mawh lo ve; mahse, a thil mak hriat zawng zawng hi belh chian dãwl tak a nih vek kher chu ka ring lo, ka țhiannu mah ni se.

Ka insûk ka pho zawh hnua a bula ka va țhut chuan a thil lei chu min lo pe vat a," Thil hi a mak thei a nia aw, ka thil hriat thar pawh hi a mak asin! Mak i ti ve ngawt ang," a lo ti vat a, sawi zawm lehin," Ti ila khawvêlah hian thil mak pawh hi a awm tawh lo zâwk ni àwm a ni, thil thleng thei lo pawh hi a awm tawh lo, thil mak pawh hi a mak tawh lo va, thil mak lo hi a mak tawh zâwk niin ka hria," a lo ti leh lawi a, a sawi thutak bawk si a, a thil sawi awmzia chu ka man lo țêp a ni.

"Fiah deuhin sawi mai la," ka tih chuan," Pastor Hruaia kha i hria tiraw?" tiin min han zâwt leh phawt a, Pu Hruaia hming a sawi rîk chuan ka beng a verh nghâl zar mai! Ka en vat a, ani chuan," Aw, amah ngei kha. A nupui khân tlangvâl dang a ûmsan an ti a nih chu, mak i ti em?" a rawn ti ta a nih chu!!

Ka en hau ringawt a, chhàn pawh ka chhâng lo! Dâwt a ni ngei ngei ang, thu dik a ni lo ang. Remi chu mit khap hauh lo chuan ka en reng a, ka âwih deuh hlek a, thu dik ni tûrin ka âwih phal chiah bawk si lo. Nupa inngeih leh inhmeh lutuk an nia, thil thleng thei niin ka ngai thei lo a ni, ni lo, ka ngai phal lo zâwk a ni mah ang chu.

*INHNIALNA ÂTTHLÂK PUMPELH TUM HRÂM ANG CHE, INHNIAL ZÎNGA 99% TE HIAN AN INHNIAL TÀWP HIAN DIK ZÂWK NIIN AN IN HRE VE VE THO*