☆KA BEISEINA☆ - 18 By Dingdi Pachuau

☆KA BEISEINA☆ - 18 By Dingdi Pachuau

Hruaia

~~~~

Ka thil tawn hi âwih har ka ti a, thil thleng thei tùr ni pawhin ka hre lo, ka la suangtuah chhin ngai lo hrim hrim bawk; mahse, ka suangtuah phâk loh thil râpthlâk chuan min thlenchilh ta rup a, ka taksa mai ni lo ka rilru thlengin min sawisa ta a nih hi.

Mi dang min pansan a ni tih ka hriat chhuahna chhan chu a lehkha min hnutchhiah ațangin a ni. Thawhțanni a ni a, thil pawimawhah ka chhuah a ngai a, hruai ve leh mai ka tum a; mahse, amah zâwkin," Honey, vawiin chu in lamah ka lo awm zâwk ang e, mutpuan sûk ka duh bawk nèn, in bula hnim te tak tê tê pawh hi pawh fai ka duh pah bawk a," a ti a, amah berin chutia a tih tâkah chuan tiin a peih vak lo a nih ka ring deuh a, nizàn lama games a khèl tui laklawh a meng rei deuh bawk nèn, a nguai deuh a nih pawhin ka hre thiam ve reng mai. Chawhnu dâr 2 pelhah ka haw a, ka haw hma hret pawhin amah ngei pawhin min rawn bia a, ka haw thuai tawh tùr thu pawh ka hrilh nghe nghe ; mahse, kawt ka thlen chuan a lo reh țhiap mai. Ko pahin in bul chu ka thlêk thuak thuak a, min chhàn loh avàngin phone ka la chhuak a, ka be tlang thei miah lo, ngaihțhat lohna pawh nei hran lovin, min fiam a nih ringin nui hmêl pu chung hian in chhûngah chuan lûtin ka zawng kual a, ka hmuh hunah chuan a châk lo viau ang le ka ti rilru sauh sauh a, amah zawnga kan room ka luh chuan khum chungah hian lehkha chu pharh dang hian a lo dah a, ka chhiar pawh chuan ka âwih thei chuang lo, min fiam a nih ka ring tho; mahse, zàn a lo niha mut dâwn hun thleng pawha a thãwm rîva hriat tùr a awm tâk lohah chuan a tak a nih ka ring ve ta deuh a, chumi zàn chuan chhìn khat pawh ka chhîng lo hrim hrim. 

Zàn nga zet chu a tel lovin hun ka hmang ta. Zànah ka muhìl thei lo va, chhùn lamah pawh ka muhìl thei chuang lo. Mak ka tiin ka zak a, hrehawm ka ti a, pasal nih tling lo hmuhin ka inhmu bawk. Ka lo ngaihtuah tâwk lovin kei hian khawhar takin mipa dang pan lo thei lovin ka lo siam em ni tih chu zawhna ka inzawh langsãr ber a ni. Ka nupuiin mipa dang min pansan tùr hian ka la ring chhin ngai lo, a thawi pawhin ka la ngaihtuah lo, chu vàng tak chuan he thil hian min ti nâ tak zet a, sawi chhuah thiam theih loh khawpin min ti nâ a ni. Pathian hnênah ka han vui ve a, vui lo thei niin ka inhre tlat lo, ka theihtâwpin a rawng ka bâwl vein ka hria asin. Ka rilru hrehawm lutuk chu ka han țawngțai ve țhìn bawk a, awmzia erawh a awm tam lo khawp mai thung, mihring rilru takin ka dawngsawng pawh a ni mahna; mahse, a rawngbâwltu mah ni ila mihring ka ni miau a, Ani lah thehmeh ang maiin a reh vung vung mai si. Mahni chauha han awm tâkah phei chuan ngaihtuahna a kal ding duh lehnghâl a, rilruin kil tin kiltang a dap a, mi min sawi dàn tùrte, thlèmna a dan zawh loh avànga Irene-i chanchin an sawi dàn tùr leh kei min sawi dàn tùrte chu a rawn lang zut zut a. Irene-i awm ve ta lo chu mi lo lêng ta se, a awmna min zâwt ta se engtin nge ka chhàn ang tih mawlh chuan min tibuai țhìn. Ka vànneih asiamin tu mahin min la zâwt lo hlauh zâwk a, ka hna hi bànsana tu ma hmuh loha inkhung bo daih ka châk hial mai.

A hma aia nasain Pathian thu ka chhiar a, ka rilruah erawh a lût thei hlawl lo, ka han țawngțai leh ringawt a, chhànna lah chu ka dawng thei hauh bawk si lo. Ka hul ngawih ngawih a, a châng leh, ka thin a han rim deuh bawk a, a châng lahin keimah ka han inmawhchhiat thùl, engati nge hetiang lamah hian rinhlelhna ka lo neih ngai loh tiin ka han indem leh ringawt țhìn, a sâwt dèr bawk si lo. Tûn hnai ni thih thum chhûng hi chu ngaihtuahna fumfe tak pawh hmang thei lovin ka nung mãwlh mãwlh a ni ber mai.

Inrinni zîng tûkțhuan ei dâwnah  Ahlutei a rawn lang hlawl mai. Vawi khat mah kan chanchin hrilhin kan inbe hauh si lo va, eng vànga rawn lang hlawl nge a nih ni? A hria a ni ngei ang. Chuti ni lo se hetah eng nge a rawn tih ang? A rawn kal ngai hleinem.

In chhûnga a rawn luh veleh min rawn kuah a, a insût nghâl hlawp hlawp mai.  "Mâm, a pawi êm mai tiraw? Ka khawngaih lutuk che, a hrehawm dâwn êm mai," a tih tâk sapah chuan a lo hre ngei a ni tih ka chiang ta. Ka pa chauh ka hrilh a nia, ka pain a lo hrilh ve a ni ngei ang. Ni e, chhûngkua chu thu chhia a țha inhrilh tùr a ni ngai alawm, ani pawh hian hre lo se min rawn hnèm tùrin a rawn kal lo tawp ang le. Ani nèn hi chuan inchhang bung chiah mah ni ila kan inngeihin a rilru hi a puitling a, tluk lohna tam tak ka nei bawk a ni.

"Mâte, rawn kal kher a ngai hleinem, dàwr i khàr phah ngei àwm si a, pawisa tam tak i chân dâwn asin," ka han ti ve tak na a, a hnuah erawh a rawn kal lo ang tih ka hlau ta zâwk, nula țawng duh tak ni lo mah se a bula awm hi a hahdam a, a u hi min hmangaihin min khawngaih tih ka hria, hetia ka bula a awm hian nuam ka ti a, ka rilru kal ding tùr leh thil țangkai lo tam tak ka ngaihtuah tùr min vêng a ni.

Ina haw ka hreh viau nain ka pain haw tùra min tih avàngin thil țûl ti pah tùrin Ahlutei nèn chuan Aizawl lam panin kan inkhalh chhuak dùn a, kan tlàn lai chuan eng eng emaw sawiin a titi pah sap sap reng a, ka ngaithla mang lo. Duh lo viau mah ila Irene-i ka ngaihtuah chhuak lo thei lo, kan pahnihin helai kawngah pawh hian kan tlãn dùn fo a, nui har harin eng eng emaw a sawi a, ei tùr a ei pah a, kei pawh min pe ve ziah țhìn bawk a nih kha.

Thâwk ka la hawk a, ka hnênah a rawn kìr tawh dâwn lo tih ka hre chiang, amah ngeiin a sawi chiang alawm, amah ngaihtuah lo tùrin min ti bawk a nih kha; mahse, a va har si êm! Thinlung hi vawilehkhata tih danglam theih ni se chuan a duh ang tak hian ka ngaihtuah hauh lo ang; mahse, tûn atân chuan thil theih a ni rih tlat lo, ka thinlung ka thunun thei rih lo.

Ka bâna rawn chelhtu chu ka en vat a, ani pawh chuan min lo en ve reng niin," Zin ang ka tih chu, bungraw en pahin Nuteite kan tlawh ang a, kan inhmuh lohna pawh a rei tawh a, an lo lãwm ngawt ang," a ti a, kei erawh chuan," Mâte, ka duh duhna lamah ka thên thei ngawt hleinem, hotute thu hnuaia awm ka nih hi," tiin ka chhâng ve thung a.

A ngawi ta vang vang a, a hnu deuhah zàwi deuh hian," An hre thiam tho ang che chu," a ti ta sap a, min ngaihtuah vàngin zinpuiah min sâwm a ni tih ka hria, lãwm pawh ka lãwm khawp mai; mahse, ka zin hman ka ring chiah lo thung.

"Ka hre lo le, hun ka neih phawt chuan kan zin ngei dâwn nia," tiin ka chhâng leh ta a, zin chu ka peih lêm lo nain han chhàn hlawhchham țhak chu nuam ka ti bîk lo a ni.

Aizawl kan han thleng a kan ina kan han lût chu ka kim lo ta hûih mai.  Ka chhuah ruala chhuaka ka luh ruala lût ve țhìn ka nupui duh tak kha ka bulah a awm ve ta tlat si lo va, tunah chuan ka nau nèn kan lût ta thung. Ka pain min lo làwm vat nain mahni in chhûngah ngei pawh ka inthlahrung deuh dûk mai ka ti.

Mahni inthiam lohna neih sa tawh nèn, zanriah ei laiin ka nuin min han belh zui sak a," A tìr ațang rêngin a dik lo sa tawh tlat a ni. Pastor ni lovin hna sâng tak kha thawk ni ta la chuan hetiang hi i tawng miah lo  ang. I hna vàngin duh angin i nupui i ngaihtuah theih loh vàng a ni ka ti lo thei lo, Irene-i hetia a han awm hi ka dem dâwn viau a; mahse, dem lohna chin ka nei leh tlat, khawi kipah i hruai thei lo va, a khua a har ru ngawih ngawih dâwn tih ka hre tlat a ni. Han ngaihtuah vang vang teh, duh dàn dána awm thei khân a han nei chat che a, duh hlê lo che se la chuan a nei miah lo ang che, i hnà vàng liau liau hian a duh dàn angin nangin i ngaihsak tâwk lo tih a lang a, hei hi chu i thiam lohna chin a awm ve tlat a ni," tiin min han zilh a, min hau pah bawk a, chaw ei tui loh nèn, ka thil ei chhun pawh chu ka hrawkah a tâng leh tlat mai. Ka pa erawh chuan," Duh tâwk phawt teh!" a lo ti sup thung a, Ahlutei pawh chuan," Nu...!!!" a lo ti ve bawk a.

A la duh tâwk chiah lo a nih hmèl," A zahthlâk alawm! Mi hriat kan hlawh a, hmêl hriat hnaite'n zawhna mit meng tih hriat taka min en hian a hrehawm ve alawm. Tunah phei chuan mi zawng zawngin an hre tawh ngei ang, koh lêt leh dàn te hi a awm lo maw? Ngaihdam dîl ta ila a lo lêt leh duh mai lo'ng maw?" a rawn tih leh chuan ka pa chuan thawh hluai pah hian," A tâwk! Ka kham ta viau mai, sawi tawh lo teh!" a ti ta țhawt a, ka pa chuan a sawi mai mai lo tih a hre thiam ve a ni ang, ka nu pawh chu a ngawi zui ve ta mai a. Kei erawh chuan nuam lo ka ti tak zet, ka thinlung chu a hma aiin a tâwt zual sawt bawk. Ka chunga thil thleng hian kan chhûngkua a nghawng lo thei lo si lo va, hei tak hian min tihrehawm zual a ni.

Ka engtih mah a phûr hlawl lo. Ka room-ah ka lût a, hei pawh hi Irene-i nèna kan room bawk kha a ni, a thuamhnaw leh a sùlhnu hmuh tùr awm lo mah se kan pahniha room kha a ni miau a, hawina lam apiangah a hmêl ka hmu zut zut lo thei lo. Engati nge a tân pasal țha tak ka lo nih loh le? Ka nu sawi pawh kha a dik alawm, inthiam lohna leh mahni indemna ka nei thar leh a; mahse, ka theihtâwp ka chhuah ve chuan ka inhria asin, ka theihtâwp ka chhuah nia ka hriat kha a tân a lo tâwk zo lo tihna a ni ngei ang, ka hmangaih a, ka duh êm êm a, dam chhûng kawppui atân ka thlang hial bawk a. Ka duh lutukna khân ka mit a lo ti del nasa a, a tâna ninawm leh hnèawm mai ka nihna ka lo hmu thiam lovin ka lo hre thiam lo a ni, hrehawm a lo va ti dâwn êm!!!

*******

Pu Hruaia chanchin chu ka hriat belh tawh lo va, Remi lahin a hriat belh tawh lo nge ni, min hrilh belh tawh miah lo. Thu dik chu a nih ngei ka ring ve tawh a; mahse, ka hriata miin an sawi leh erawh ka la hre lo, Didiki pawhin a la hre lo a ni ang, a sawi chhuak miah lo; mahse, sawi chhuak kher lo pawhin a lo hre kar ve thei tho bawk a, miin an sawi chhuah kher loh avàng hian an hre lo tihna pawh a ni chuang lo nèn; mahse, an sawi loh hi chuan sawi lo ve phawt ila a țha ber, chanchin țha leh hlimawm lam lah a ni hauh si lo.

Pu Hruaia chu ka theihtâwpin ka țawngțaipui ve a, amah vàng liau liauin ka țawngțai tam phah nghe nghe. A hmain kan chhûngkaw tân liau liau Pathian hnênah min dìlsak ve tawh bawk a nih kha, chu vàng chuan a tâna dìlsak hi ka bat a ni. A hming lam meuhin, a tawrh hrehawm lutuk loh nân ka dìlpui a, chubâkah, he thil hian a rilru a ti hrehawm dâwn si a, Pathian hnaihtîr zual sauh se ka duh tak zet bawk a ni. Mihring rilru taka a dawnsawn chuan a tuar dâwn lutuk, a nupui kha a duh êm kha, a duh hlum lo chauh ni khân a lang bawk si a, hrehawm a ti dâwn êm asin. Ka khawngaih phâk chu ni hauh lo mah se ka khawngaih êm êm a ni, mi fel tak a ni si a. Joshua thi kha ka tuar viau a nih kha, nâ ka tiin thihna hi zawng a tàwp chiang ve êm bawk a, Pu Hruaia thil tawn ve thung hi chu a dang deuh hlek a, thihna lam chu ni ve lo mah se a nat dàn a danglam ang, a duh ngawih ngawih a nupui  chuan mi dang lakah a phatsan a nia, a zahthlâkin a hmingchhiatthlâk dâwn lutuk! Mi hriat làr an ni bawk nèn, an nupa inkâr chu hre ve vek lo mah ila Pu Hruaia kher hi chuan a nupui kha mi dang a melhsan ve ka ring hlawl lo, a theih loh hi a ni tawp mai.

Nilaini a ni a, Thingsûlthliah lama kan customer hlun ti tawh mai ang, Nu Hlani bungraw lâk tùr chu ka buaipui mawlh mawlh a, ani hian a hlãwma a lâk țhin avàngin buaipui deuh hlek hi a ngai țhìn a, a rawn kal zing a, nèl pawh kan innêl viau tawh nghe nghe a ni. Nu thau lam deuh, țawng duh deuh mai leh kuhva duh ve tak mai a ni a, a rawn kal azát hian," I duh ve em?" min la ti ziah zui, nui pah hian ka lu ka thing mai țhìn.

Kan inbuaipui zawha a bungraw hawn tùr ka khai chhuahpui chu kawngkaah Pu Hruaia nèn kan intâwk hlawl mai! Mak ka tih avàng chuan ka en deuh hau a, ani erawh chuan min nuih sak a, kawng min kian zui ta nghâl a, min la hria a ni ngei ang. 

Nu Hlani tlàn liam hnu chuan ka lût a, Ahlutei chu a u nèn chuan an lo inbia a, ka hawi phei lai tak chuan Pu Hruaia pawh chuan min lo en ve chiah a, ka nuih ve sak a, ka awmna lamah ka kal zui ta nghâl a. A hma kha chuan an nu nèn an rawn kal țhìn a nih kha, tunah erawh chuan amah chauhin a rawn kal ta chu a ni si a, a khua a har ngawt ang chu. A chan leh ka chan chu inang ka ti a, a khawhar tùrzia leh hrehawm a tih tùrzia chu ka hre thiam pha ve dét dét si a, ka khawngaih lo thei lo.

Biak ka châk a, 'engkim a țha leh vek mai ang' tia hnem pawh ka châk; mahse, ka ngam lo ang, a nèl leh a țhian kawm hnai tak pawh ka ni lo va, kei ve mai, ani tân lah hmêl hriat satliah lehnghâl maiin lo biaka chutiang lo sawipui ve chu a zahthlâk zâwk, bâkah, chutiang sawipui chu a duh kher lo maithei a ni. Biakna hun neiin min rawn be ta se, engtin nge ka biak țan ang, eng lam hawiin nge ka biak phawt ang tihte chu ka ngaihtuah kual a, a nupui chanchin lam han sawipui nghâl chu a tihchi dâwn miah si loh, bâkah, lo hre sa vek anga lan phei chu a fuh vak lo maithei lehnghâl.

A awm ve deuh reng a, a hnuah phei chuan ka lam panin a rawn phei ta nghe nghe, min rawn pan a ni ngei mai, engtin nge ka lo biak ang aw tih ka lo ngaihtuah rauh rauh lai chuan min rawn dàwr tùr pakhat hian," Mami, hei hi eng zât man nge?" tiin min rawn zâwt ta hlauh a, chu lamah chuan ka inher ta vat a. A thil en chu enpuiin a man zâtte min zâwt a, ka hrilh dan dan a, mi duh khirh tak a ni ve a ni ang, a zawng kual rei ve khawp mai. A duh a hmuha a kal sawn hnuah meuh chuan Pu Hruaia hmuh tùr a lo awm tawh lo, ani kha chu mi khirh tak a nih hmel loh a, a duh a hmu ang a, a la nghâl tawp a ni ngei ang.

Zanriah kan ei tlai deuh hlek a, kan ei khama thlèng ka sil laiin kawngkhàr chu an rawn kik kárh kárh a, a hre hnai ber ka nih avàng chuan," Lo lüt rawh u," tiin ka lo chhâng vat a, Pu Hruaia lo lût ka hmuh chuan," E, Pu Hruaia teh tlat chu, lo lêng rawh khai, lo țhu rawh," ka ti leh vat a, ka nuin a lo hriat chuan," Pu Hruaia ni reng chuan! Lo lêng țhu rawh, inhmuh a va khât ve le, in dam țha maw?" tiin a lo be thuai thuai a, ani pawh chuan," Dam țha e, in lo dam țha zâwk maw?" tiin ka nu ţhutna lamah chuan a țhu zui ve nghâl a.

Ka nu chuan an nu chanchin lam a zâwt ang tih ka lo hlau ru kher mai, an ţawng chu thlèng sil pah chuan ka ngaithla ru reng a; mahse, a la zâwt bïk miah lo, an nupa chanchin ka la hrilh miah lo va, a hria pawhin ka ring lo, a zawh chhuah loh hrâm ka beisei bawk; mahse, thlèng ka sil zo kut ka hrûk hul lai chuan," In nu hi hmuh ka châk ngawt mai, hmaichhanah ka la hmu miah lo va, in pahnihin in ni ang maw?" tiin a zâwt ta pek a, ka lo îp zawr thei!

"Ni lo ve, tûn țum chu keimah chauhin ka ni e," tiin a lo chhâng mai a, ka nu chuan," A nih tak chu. Fa kha in nei tawh em kha?" a ti leh a, Pu Hruaia'n nui deuh chunga," La nei lo deuh," tia a chhàn chuan," Ka zawhna ngaih loh lamah lo ngai lo la, tûnlai mîte hi fa neih lamah hian in hmanhmawh lo mah mah ka lo ti ve țhìn a, chàwm zawh loh thu a awm lo va, neih theih lai, hrisèl țhat laia neih vat vat hi a țha ber asin. In fate lah chuan an rawn chhùn che u ang a, an hmêl a țha hlawm dâwn bawk si a," ka nu chuan a ti leh ta bawrh bawrh a, hrehawm ka lo ti ru kher asin. A sawi chhunzawm leh hlau chuan," Nu, thingpui hâng ka rawn siam ang aw," tiin ka lo inrawlh ta vat a, ani pawh chuan," E, lo siam rawh khai, Pu Hruaia pawh a lo lêng khât alawm, tui tak khân han siam rawh khai," a rawn ti ve mai a.

*MI DANGIN I HRINGNUN KAWNG KHA AN ZAWHIN AN ZIAHSAK DÂWN LO CHE, NANGMAH NGEI KHA ȚHA TAKA ZIAKTU TÙR CHU I NI*