☆KA BEISEINA☆ - 19 By Dingdi Pachuau

☆KA BEISEINA☆ - 19 By Dingdi Pachuau

A hnu lamah erawh ka hlauhthàwn ang êm chuan ka nu chuan zawhna chhàn harsa a tih tùr chu a zâwt chhunzawm ta bîk lo va, rawngbàwlna lam chungchâng an sawi ta deuh ber a, ka rilru pawh a lo hahdam viau hman tawh; mahse, an ngawih deuh lai chuan," In nute kha khawiah nge an awm kha? Mizoramah chuan a ni lo tiraw?" a rawn tih leh tâkah chuan a rûkin ka țang leh nghâl at mai.

"Aw, Mizoramah chuan awm lo ve," a lo ti ve mai a, ka nu chuan," A lung a lèn ve viau țhin dâwn chu a; mahse, hmeichhiate hi chu kan mak khawp a, nu leh pa leh chhûngkhatte hmuh phâk lohah pawh hian pasal hi kan nei vang vang thei mai a, kan chhel viau asin," tiin a han nui deuh a, kei erawh chuan a nupui chungchâng a zâwt leh ang tih hlauin," Nu, mimal chanchin lam hlïr chu zâwt lo la, chhan nuam lo tur thilte kha i lo zâwt palh ang e," ka lo ti ta vat a, a nupui chanchin sawi chu nuam a ti vak lo maithei si a, Pu Hruaia tân a hrehawm dâwn êm asin.

Mahse, Pu Hruaia zâwk chuan," A, eng mah a pawina a awm lo, min zâwt bawrh bawrh rawh," a lo ti a, ka rin loh deuhin amah zâwk chuan a nupui chanchin chu a sawi chhuak ta vek a, a sawi dàn ațang chuan a nupui chu dem deuh leh thiam loh pe angin a chhuah miah lo thung, ka lo ngawi reng a, chutiang bawkin ka nu pawh a ni tho, a hmain a nupui chanchin a zâwt a zâwt kha a nia, tunah chuan ngawi a dawh a ni ta ber mai. A hnu deuhah erawh chuan," A pawi hlê mai!" a rawn ti chhuak phawt a, a chàwl det a, sawi zawm leh nghâlin," Mihring kan la ni miau mai a, thlèmna tâwk thei leh thil ti sual thei kan la ni miau si a ni. Pathian hian kan hmaah thlemna hi a lo la dah vek mai a, kan châkna leh kan duhna hmang ngei hian thlem chhuah kan ni țhin, i rilru a hrehawm dâwn tih ka hre reng mai," a ti a, Bawiha nèn kan hriata a sawi chhuah ngai loh ka pa chanchin chu a sawi zui ve ta nghâl a. An thil tawn a lo inang viau mai a lo ni, an rilru puthmang pawh an inhre thiam tawn khawpin ka ring, kawppuite'n an kalsan ve ve, dinhmun inanga ding an ni si a.

Ka nu nèn chuan an inkàwm rei zêk mai a, tawn inang an ni bawk a, an inhre thiam tawn khawpin ka hria. A haw dâwn chuan," Ka thâwl huai mai, zanin chu ka rawn lêng lo ang tih ka hlau hlê a ni; mahse, ka men hrep ta si che u a, a thlahrunawm, chanchin ngaihnawm loh tak in la ngaithla zui a," a ti a, ka nu chuan," E, i thâwl huai chu a làwmawm a nih chu, a inthlahrunawm hauh loh a nia, kei pawhin ka hrilh țeuh che kha maw, kan lo țawngțaipui reng dâwn che nia," tiin a thlah a, kei erawh chuan 'Mang țha le' ti bâkin ka thlah lo, ka rilruah erawh thil tam tak a awm thung.

A nupuiin mipa dang pansanin a tlàn bosan a ni a, chuti chung chung pawh chuan a nupui chu thiam loh a la chantîr miah lo a nia, a țawng dànah kha chuan. Amah kha thiam loh a inchantîr deuh lek lek zâwk hial a nih kha, a rilru a va țha tak! Chhûngril takah chuan a rilru a nâin hrehawm a ti ngawt ang, sawi chhuah thiam hleih theih loh hialin a nâ ang, ka khawngaih tak zet a ni. Mihring tung chhoa kal mipa, nupui nei tawh zîngah a nupui, a hmangaih ngawih ngawihin mipa dang pansan ta se la, tu nge rilru nâa hrehawm ti lo awm ang? An thinrim ang a, an rilru pawh a na ngei ang a, a țhente phei chuan depression an neih phah hial ang.

Min rawn tlawh chhan tak nia a sawi kha, kan chhûngkaw dam leh dam loh hre duhin min rawn tlawh niin a sawi a nih kha. Ni e, vawiin khân chanchin inzâwt tùr pawhin min be hman lo va, ka nu nèn hian an inkàwm ngeih riau a, an titi pawh a rual, vêng khata lo awm țhìn kan nih bâkah tunah a nau dàwrah ka thawk a, kan inhre pawp ve laklawh tlat, ka nu nèn ni se tunah chuan an inkàwm ngeih lehzual ngei bawkin ka ring, an thil tawn a inang miau a, hnem pawh an inhnèm thiam deuh ang chu.

Ka țawngțai tam vàng chu nge ni, keimah lamah pawh hlâwkna tam tak ka hmu a, ka hlãwk hlê a ni. Pu Hruaia tân dìlsak tho mah ila kan tân, kan chhûngkaw tâna ka dìl a bâng chuang lo.  Kan chhûngkaw vànneihzia leh Pathian malsàwmna kan dawn tamziate chu ka hre chiang chho telh telh a, Zoram khawvêlah ringawt pawh keini chhûngkua aia rethei leh mihring ngaiha 'mi vànduai' kan tihte lo tamzia ni tinin chanchin tharah kan hmu chàmchî a, miin an țanpui mawlh mawlh bawk a nih hi. Chanchin thara chanchin țha lo lam leh làwmawm lo lam kan hriat rualin chanchin làwmawm, mi țanpui chungchâng chhiar tùr awm ve reng hian thinlung a ti hlimin mi țha lo la tamzia leh mite țanpui nâna ui an neih lohzia ka hre fiah telh telh a, chutih rualin ka tluk lohzia hriain ka inhmu tê reuh reuh tho bawk.

Pu Hruaia nupa chanchin pawh chu zêp bo reng theih ni lo le, miin an hre zêl lo thei lo va, Didiki pawhin a lo hre ve tawh a, mak a tih thu min hrilh nghe nghe. Kei pawh chuan," Ni e, he khawvêlah hi chuan thil mak hi a thleng fo a nih àwm hi, mihring kan la ni miau mai si a," ka ti ve a, ani pawh chuan," Ni e tiraw? Pu Hruaia chu a khawngaihthlâk hnûp hnûp mang tak e, hrehawm a ti dâwn êm mai, hmeichhia a ring thei tawh pawhin ka ring lo e a, ka khawngaih lutuk êm mai,"a lo ti ve leh a. 

A sârhù chho lai a la ni ve deuh bawk a, Ahlutei pawhin a u a awmpui deuh țhìn a ni ang, dàwrah a rawn lang khât deuh hlek, thawk senior ber ni lo mah ila min ring ve tawp mai a, a harsatna chu zêp lêm lo mah se min hrilh dap chuang lo va, kei lahin ka zâwt chiang chuang hek lo, ka hre thiam a, a awm loh chângin a ai ka lo awh mai țhin. Engkim a fel thei ang berin ka ti a, ka theihtâwpin ka uluk ve a ni, thil kan hralh chhuah leh a zât, a latu hming leh pawisa dawn zât fel takin ka ziak thlap a, a lo kal theih huna a en lêt ve theih nân ka ti a ni. Min rin ang taka thawh chu ka duh ber a, sum chungchâng a tel ve bawk si nèn, ka fïmkhur ve êm êm bawk a ni.

"Anne, i lo hah viau țhìn lo maw?" tia Ahlutei'n min zawh chuan," Hah lo ve. Hahna chhan tùr a awm hleinem," tiin ka lo chhâng vat a, ani chuan," I kutah engkim ka dah lo thei si lo va, min lo hre thiam hrâm hrâm mai dâwn nia aw. Mâma thil tawn i hre vek a, amah maia a awm tùr hi ka ngaihtuah êm a ni. Dàwr han khàr rih dâwn lahin min dàwr țhintute an zahawm si, kan dàwr bungrua ringa dàwr siam vete an ni nawk bawk si a, i hah phah deuh lo thei lo a nih hi," a ti leh sap sap a

"E, i u chu ngaihtuah ber rawh, he lam chu rawn ngaihtuah miah suh, kan theihtâwp kan lo chhuah zêl ang, țawngțaina lamah ni se kan lo țawngțaipui ve reng a nia," ka tih leh chuan," A làwmawm e. Ka lãwm tak zet a ni, ka chungah mai ni lovin ka u chungah pawh hriat thiamna thui tak neiin in lo țawngțaipui lehzêl bawk a, nangni hi awm lo ula chuan tûn dinhmun pawh hi kan thleng hauh lo ang le, in chungah ka lãwm tak zet a ni. Hun remchâng leh hun thâwl kan neih veleh làwmthu sawi nân kan 'dine out' ang," a han ti a, a hmêlah chuan a lãwm tak tak tih a lang chiang viau bawk.

Hetia min ring viau hi a châng chuan thawhpuite chungah nuam lo tih rûkna deuh ka nei lek lek, a chhan chu kei aia thawk rei tawh vek an ni a, mi dang zawng ai hian min ring ber ni hian a lang ve thei tlat si a; mahse, chutiang lama țawng cheh leh min han melh râng deuh pawh chu an awm chuang lo, keima rilru mai mai chu a ni a, Ahlutei hriatah pawh ka sawi chuang lo.

Pu Hruaia'n ka nu a rawn biak zauh zauh dàn leh an inchhàn dàn ațang chuan a rilru a hah chàwl lo viau a ni tih ka hre thei mai a, a nupuiin a phatsan ațangin thla hnih zet chu a ral ve leh tawh a nia; mahse, Ahlutei dàwr rawn kal khàt dàn ațang pawh hian a u hian hun harsa a la hmang chho zêl a ni tih a lang thei reng mai si a, chu vàng chuan a hma aia nasain ka țawngțai a, Pathianni tlai lamah pawh chawngheia țawngțaiin Pu Hruaia tân liau liau ka dîl țhìn.

Mahse, Pathian hian min chhàn a la rem ti ngang lo a ni ang, a hnu deuhah phei chuan Ahlutei chuan Aizâwlah a rawn hruai haw ta hial nghe nghe a, a nupui awm dàn vàngin amahah inthiam lohna neiin, depression a lo nei nasa viau a ni àwm e, mahni chauha a awm chuan a chungah thil țha lo tak a thleng ang tih a hlauh vàngin Ahlutei'n a rawn hruai haw a, Pu Hrekima a panpui tawp a ni.

Chu thu ka han hre zet chu, ka rilru a na kher mai. Ka hriatna chhan pawh Pu Hrekima hnên an pan lai Remi hmêl hriatte'n an lo hmu a ni àwm a, chu chu Remi'n min hrilh ve a ni. Pu Hruaia a khawngaih thu leh a nupui a dem viau thu a sawi ve niap niap nghe nghe a, kei chuan eng mah ka sawi thei lo, ka khawngaih lutuk a, ka rilru pawh a kal thui viau a ni. Ani Pastor meuh pawhin depression a neih phah thei a nih chuan a rilru a hrehawmin chu chuan amahah nghawng țha lo tak a nei a ni tih chu a hriat reng mai si a, țanpui theih dàn awm se ka ti tak zet a ni; mahse, ka hre hlawl lo, țawngțaipui bâk tih theih ka neih ka hre lo.

A u chutiang dinhmuna a din avàng chuan hun remchâng leh hun thâwl a la nei hlei thei tlat lo; mahse, a taksa Aizawla a awm tawh avàng erawh chuan dàwrah a rawn lang zing ve thei ta deuh a, ni khata vawi hnih a rawn lan châng pawh a awm. A u a ngaihtuah lo thei lo va, chutih rualin dàwr thlahthlam ngawt chi a ni bawk si lo, a rilru a hrehawm ve țhìn ngawt ang chu.

Chutih laiin lo sawisêl bàwng báwng tâwk lah bo lo, lo rêl chiam chiam pâwl ni se an lo awm tho bawk a, mizote hi chu kan lo indaih teh tak e. 'Pastor a ni ve sia, hetiang êm êmte chu thil mawi pawh a ni lo' an ti a, 'Pathian thu-ah a inchiah nasa lo tawp a nih hi, Pathian thu-ah khat viau ni se chuan hetiang hi a ni lo ang ' an ti bawk a, 'Mahni nupuite khamkhawp pawh pe zo lo, mipa chu a inti ve àwm si a, a lo nêp êm mai' ti pâwl an lo awm bawk a, a thinrimthlâk ka tiin kei phei chu ka thin a lo rim ve țûn thei, a nupuiin mi dang a ûmsan avànga a pasal zâwk demna tùr lo zawn chiama lo sèl ve chiam kha a ho ka ti a, sawisèlna tùr a hriat lohthlâk ka ti dâwn nge ni, a hriatthlâk ka ti dâwn zâwk; mahse, han thinrim ve viau mah ila eng han tih theih vak erawh a vâng viau thung.

Zàn khat chu thlalâk ka en kual mai mai a, Joshua thlalâk ka hmuh fuh tâkah chuan ka ngaihtuah chhuah khàtzia ka hre ve chiah! Joshua hre chhuak lo leh ngaihtuah chhuak miah lova hun ka hmang thei chu mak ka inti kher asin! Pu Hruaia chanchin hian min lo dêng na deuh a ni ngei ang; mahse, chhûngril lamah erawh ka inthiam lo viau thung, ngaihtuahawm ni tawh lo mah se amah ngaihtuah chhuak hauh lova hun ka hmang thei chu phatsan ta riakah ka inchan a, ani pawh a lung a âwi kher lo maithei a ni, a thlalâk chu enin ngaihdam ka dîl mawlh mawlh a.

Pathianni chawhnuah Remi nèn a khuma țhuin kan titi a, Lalkâwnga ațangin Joshua chungchângah kan lût a, ka ngaihtuah chhuah khàt tâkzia ka sawi lai chuan," A tihzia hlauh chu!" a lo ti daih pek a! Ka melh hrâw mai. Ani lah chuan min en duh hauh lo hian," Min melh rum kher suh, ka duhsak vàng che a nih hi. Hei, hun pawh a liam ve nual ta a, hma lam pana i kal zêl hi a țha, i țhian ka nihna ațang pawhin duhsak tùr che ka ni, ka duhsak hlê bawk che. Ani chuan mual a liam tawh a, ani pawhin amah ngaituaha hun hmang reng tùrin a duh lo ang che, hlim tùrin a duh ang che tih ka hria a ni," a lo ti leh a, ka rilru leh a thil sawi chu a inan loh êm avàng chuan chhâng lêt lovin ka en reng ringawt. 

"Tunah bialpa nei nghâl rawh ka ti hauh lo che; mahse, i rilru hi i thlâk ve hret hret a ngai a ni. Ani kha i rinawm lohsan ta tihna a ni dâwn lo, la dam se chu thuhran, a liam tawh a, nang i la dam a, hlim taka hun i hman a ngai a, a țha bawk a, chu chu a Pathian thu êm êm bawk a ni," a tih leh duah chuan ," Bialpa dang neih ka duh hleinem," ka lo ti ve ta thung a.

"I rilru la thlâk hek lo che maw le! Tum hret hret rawh ka ti rêng a ni, i heti kumkhua thei dâwn lo, nakinah pasal pawh i la mamawh dâwn a, chu vàng chuan i rilru kha thlâk tum hret hret la, hlim taka hun hmana hma lam pan zêl hi dam reina a ni bawk," tiin min zilh zui leh ta mawlh mawlh a. Remi hi a sual lo, ka chungah ni se rilru chhia a pu lo tih pawh ka hria, min duhsak êm êm a, ka hlim theih nân a theihtâwp a chhuah a, rilru dang put tum rih lo mah ila a thil sawi erawh chu ngun takin ka ngaithla kar tho.

Ahlutei pawhin min lo tiam tawh angin a ho ngeiin kan 'dine-out' ta a, a u a zia deuh a ni maithei, kan kalna lah chu a'n changkângin a'n nuam khawp mai a, keini tân chuan a chhûnga luh ringawt pawh a inthlahrunawm thei dâwn hial mai! Hetianga hotel nuam hi Aizâwlah hian a lo awm a ni tih ka hre ve chauh, Didiki erawh chuan a lo hre tawh thung a; mahse, a lo la lût bîk lo thung. Chawhmeh tuizia lah chu, ka nu leh Bawiha'n ei ve se ka ti kher mai, a tui hlawm êm mai a, ei man pawh a to ngawt ang.

Kan haw lam chu min thlah kual vek a, a tàwp berah min thlah a, kan in ka thlena in ka luh chuan ka rin loh deuhin Pu Hruaia a lo awm reng mai! Ka nu nèn chuan lo hawiin min rawn en a, mak ka ti viau mai a, sawi mai tùr pawh ka hre lo, chutah ka hnungah Ahlutei a lo lût zui ve leh bawk a, lài deuh taka dingin mak ti takin ka en hâ ringawt, a tlãn haw nghâl mai tùrah ka ring a nia.

*THIL TIH SUAL I NEIHA I KAWPPUI NÈN INLAICHÌNNA ȚHA SIAM I DUH SI CHUAN A HARSA A NIH PAWHIN I TIH SUAL KHA I PAWM NGAM NGEI A NGAI, CHHUANLAM DAWRÂWM HMANG NGAI SUH*