☆KA BEISEINA☆ - 20 By Dingdi Pachuau

☆KA BEISEINA☆ - 20 By Dingdi Pachuau

Ka nu chuan," A nuam bawk em maw chu, in puar viau ang maw?" a rawn ti a, Ahlutei a hmu chawpchilh ve nghâl a," E, i rawn thlah thlap a ni maw? I va fel ve! Hetah hian lo țhu rawh u, chaw ei kham thingpui háng pawh in la in ve àwm si lo va, ka lo thlit ang che u," tiin a rawn tho nghâl a, Ahlutei chuan," A ngai hleinem, ka puar viau bawk si a," a lo ti ve a; mahse, ka nu chuan a thli lui ta tho a, ka in châk lêm lo nain Ahlutei'n a in avàng chuan ka in lui ve ta tho a.

Vawiin khân ni dang zawng aiin dàwr kan khãr har a, inah pawh haw lovin hotel lam kan pan nghâl kha a ni a, tunah pawh hian a la tlai chhe hran viau lo. Thingpui in chhûng chuan an titi barh barh a, kei erawh chu ka țawng ve mang lo, an tìti chu ka lo ngaithla a, a chângin ka lo nui a, Ahlutei pawh hi a lo țawng duh ve viau a lo nih hi. Pu Hruaia erawh kei ang thovin a țawng tam hran lo va; mahse, ka nu leh a nau tìti-ah chuan a beng a dawh viau thung.

Chumi zàna a rawn lèn bâk chu a rawn lêng ta lo vang vang a, a zia lo leh deuh em ni chu aw ka tih laiin Ahlutei erawh dàwrah a rawn kal regular chho țan viau thung a, chu vàng chuan zia lam a pan tawh ang a, ka nu rawn kawm kher ngai a ti tawh lo zâwk a ni ang ka ti leh a. Ahlutei han zawh êm chu ka hreh ve deuh a, zâwt ila chuan țha taka min hrilh chu ka ring tho, a țha lamah ngai mai ang. Ni e, a țhat chhoh hi kan duh a, kan dîl a, kan dìlna kha chhànin a awm chho ve ta a ni ngei ang.

Hun a liam a, Pu Hruaia pawh zia chho zêlin tunah chuan a pângngai viau tawh niin an sawi a, Kolasib lamah a insawn leh tawh niin an sawi bawk. A țha chho chak viau chu ka lâwm tak zet a, a chhûngte tluk zetin ka lãwm ve hialin ka ring.

Krismas a rawn hnai chho a, kan lùn leh map map tawh viau mai, heti ang zêla lan lùn chho a nih chuan Krismas dâwnah phei chuan... ka ngaihtuah thui peih lo, chauh a na leh dâwn lutuk tlat; mahse, Ahlutei chuan ka rilru hria ni àwm tak hian," Kumin chu kum dang aiin chawlh kan nei hma dâwn nia, bazàr nân hun rei deuh zâwk te in duh tâkin! Zin chhuah ve zawk pawh in duh thei a," a ti hlauh mai a, thawhpuite nèn chuan kan nen kual a, kan hlim tlâng a ni tih kan hmêlah a lang, kan nui sâng hlawm a, a làwmawm ve êm bawk a ni. Ahlutei hi chu a fel ka ti ve thlâwt, mihring hi sum duh lo leh hlâwkna úm lo chu kan awmin ka ring lo va; mahse, ani hi chu a dang ve tlat, a hlâwk hun lai ber tùrah kan chàwl thei dâwn si a.

Chawlh kan nei hma dâwn tih Remi ka hrilh chuan," Yess..! Zinpui tùr ka nei hlauh! A va tihchi tak êm!" a lo ti vat a, nûr nâng chung hian ka melh a, min rawn melh ralhin," Eng nge i nùr kher a? A nawm dâwnzia chu a. Kan zin mah ang a, nuam i ti ngawt ang aw!" a ti leh a, kei chuan," Ka zin hman ve kher nâng, nang angin hun thâwl ka neih ve loh hi," ka lo ti thung a, ani lah chuan," Lungngai mah ta che, i nu ka dîl ang a, ka dîl a nih phawt chuan a phal dâwn tih ka hre sa a ni," inringtâwk tak hian a ti leh mai a.

Dàwrah kan buai chho map map a, kan lùn a, kan hlâwk chho leh ta viau; mahse, a lo sawi lâwk tawh angin Ahlutei chuan chawlh min pe hma ta rêng a. Remi nèn chuan zin tùrin kan inbuatsaih nghâl a, ka nu hnênah a dîl fel diam tawh a, ani pawhin a lo phal ve mai bawk nèn, ka zin chhuak khât a, ka phûr ru viau a ni; mahse, Remi hriat leh hmuhah erawh chuan phûr tak anga lan ka duh hauh lo thung.

Kan zin tumna, Remi nîte awmna Bîlkhawthlìr lam pan chuan kan tlãn ta vang vang a, Bîlkhawthlìr lama an hmêl hriatpa motor-ah kan chuang ve a ni. A hmél hriat a ni bawk a, kawng tluanin an titi bawrh bawrh reng a, kei erawh zin chhuak ngai lo tih takah ka hawi kual nasa tawp thung a, ka hmuh vawi khatna a nih zêl avàngin khua kan pal tlang rêng rêng chu ka thlêk uluk thei viau, mi tâna eng mah ni tawh lo kha ka tân chuan a hlûin a hmuhnawm bîk hliah hliah.

Remi nî chu amah chauha khawsa a lo nia! Nula senior over, kum 50 deuhthaw zet a ni lo tawh! A khirh viau ka rin tehlul nèn, a khirh hran miah lo nia! Min lo làwm êm êm mai a, kan thlèn zàn ațangin," Châm deuh reng ang che u," min han ti sa nghâl pang a, Remi lah chuan," Puan min leisak ve ve la, chuan, rei deuh kan châm ang," a lo ti zat a, a nî chuan engto loh hmèl zet hian," Leisak ang chu, kha kha chu ka intiam tawh kha a ni hrim hrim bawk, bâkah, puan leh pawisa lam hi chu ka neih ve zâwng tak a nia, puan chu in la en chhin dâwn nia," a ti leh mai a, a nui pah huau huau a.

Nula senior, hlawh kham lutuk a ni bawk a, kan pahnih tân chuan ui a nei lo khawp mai. Remi sawi ang apiang chu a lei mai a, chawhmeh lam ni se a tui țha țha min hmehpui bawk a, amah a felin mitmei vèn tùr a awm bawk si lo va, kei pawhin nuam ka ti. Puan lah chu a sawi ang takin a lo ngah khawp mai; mahse, a àwm viau tho, kekawr ha ve ngai hek lo le. 

"Puan hi chu hmeichhe tân chuan ngah tluk a awm lo ve," a ti mai a, thla tin hlawh a lâk apiangin pahnih thum ang hi chu a lei zêl a, chutiang tân chuan ngah viau tùr a ni tlat a ni. Puan zuar hi a nih duh hmèl ka ti, puan a dahna bîk chhuarah chuan rem khat dul mai a, a tam ngang mai. Kan duh zâwng pahnih ve ve min thlantîr a, a la sin chhuah miah loh a thar hlak a la ni vek zui, lãwm viau mah ila nuam lo ka tiin ka inthlahrung ru ta khawp mai. Remi lah chuan," A phal mah te chuan nuam tih lohna tùr a awm lo,  a ngah êm kha maw, sin pawh a sin sêng nâng," a ti leh mai a; mahse, ka inthlahrung tho, a sawi dàn ang tak a nih phei chuan haw dâwnah puan bawk mi leisak leh a tum a ni àwm e. Remi hi chu a duh leh lei se kei chu a ngai ve tawh êm êm lo, ka phû loh puan tah țha leh mawi pahnih lai min pe tawh a nia, ka lâksak tawh miah lo ang, ka zin tel ve avànga a insèn viau chhan tùr a awm lo.

Remi nî chuan car a nei ve a, chu chuan a lo chéttlatna khua chu min fanpui a, a nuam ve reuh lutuk. Kut hnathawh an uar riau a lo nih àwm hi, an intodelh viau pawhin ka ring, hna thawh a nuam duh ngawt ang, sum chang thei chî hlîr mai an chíng hlawm si a, țhahnemngaih pawh a awl dâwn êm asin.

"He khawvêla kan dam chhûng hi chuan hna chu thawh tùr a ni a; mahse, a tâwk chin hriat reng tùr, kan thawk ang a, chawlh hun kan hriain intihhlimna hun pawh kan inpe ve ang, taksa hi a hah chawlh ve zauh zauh loh chuan rilru hrisêl a neih theih loh, hna thawh ngawt ngawt mai hi zawng a hrisêl lo a ni. Kan mamawh tùr thawh chhuah hi kan tihmâkmawh a ni a, mamawh thawk chhuakin hlimna hun leh chawlhna hun kan insiamsak ve bawk ang," a car khalh chuan Remi nî chuan a ti bawrh bawrh a, dik ka ti viau mai. Tunah hian Aizâwl lam panin kan tlãn mêk a, Sumo-a haw a phal tlat si lo va, ka zin chhuak ngai lo tih a hriat avàngin," Ka motor ngei hian ka thlah che u ang a, khua kan pal tlang apiangah in chhuk zêl ang a, in hawi khawthawng zêl dâwn nia," a ti a, Remi lah chu a lo phûr nasa mai a," E, chuti, Kolasib-ah chàwl rih ang u, ka kalna a rei tawh êm mai," a lo ti vat a, a nî lah chuan," E, in duh phawt chuan le, tlawh tùr pawh ka nei ve tak asin," a lo ti ve bawk a. 

Kolasib chu Pu Hruaia awmna hmun a ni tih ka ngaihtuah chhuak zawk a, ka la kal ngai lo va, eng ang khawpui nge a nih tih pawh hriat a châkawm ve alawm. Hun remchâng tak a niin ka hria, chawlh an ti chu pawi ka ti lo nasa mai a, tûn bâk hi kalna hun remchâng ka nei leh tawh àwm si lo.

Kolasib kan thlen chuan ka melh kual nasa mai a, Restaurant nawm hmèl takah hian kan chàwl phawt a, Remi nî chuan menu enin kan ei duh zâwng min han zâwt nghâl a," In duh tâwkin in ei dâwn nia, a man lamah kha chuan buai lo ula, pawisa hi chu ka neih ve zâwng ka tih tawh kha," nui deuh chung hian a ti a, ril a la țâm lutuk lo nain Remi lam ang chu ka lam ve a, kan thil ei man zawng zawng pawh chu a pe leh vek a, a inthlahrunawm duh tak tak a ni.

"An bazârahte in kal châk em? Rembawih, i kal tawh tiraw? Kawng kha i hria tiraw? Kal ula, in bazàr chhûngin keiin ka țhiante ka lo tlawh ang a?" A nîin a tih chuan Remi chuan," A pawi miah lo, kan bo êm lo tùrah ngai ang," nui chung hian a lo ti vat a, kan ințhen zui a ni deuh mai. K

Kan kal hran hnu chuan," Min bopui vaih!" Remi hnênah chuan ka ti a, ani lah chuan," Phone a awm a, Mizo țawng hmang vek kan ni bawk a, bona tùr a awm lo," a lo ti mai a, min kalpuina lamah chuan ka zui ve zêl a, ka ngaih erawh a ngam zân lo; mahse, a lo la hre ve reng chu a ni, kan tum hmun ber chu kan thleng ve thuai a. Thil lei pawh ka tum hran lo, kal kual vêl ka châk mai mai a, ka rin aiin a lo nuam phian zui.

"Anne, hei hi mawi i tih zâwng a ni em?" tiin Remi chuan sam țàwnna dum, puan hmul thiap leh tle neuh neuh chu min han hmuhtîr a, a nalh reuh êm avàng chuan," Nalh reuh lutuk!" ka lo ti vat a, ani chuan," Ka mamawh a, nalh i tih chuan ka'n lei teh ang," a ti a, a man an inpêk lai chuan dàwr lehlama makeup an zawrh inrem tuar chu ka lo en mai mai a.

"Anne...!!! I ni tiraw?!! I ni tak tak!"

Pu Hruaia nèn chuan kan inmelh kal mai! Hmuh ka inrin phâk loh tluk zetin ani pawhin min hmuh a ring bîk chiah lo tih a țawng dàn ațangin a hriat mai a, tunah chuan a hmêl leh mitmeng pawh a pângngai thlap tawh a, min hmu chu mak ti hmêl pu deuh mah se nui hmêl a pu tho a.

"Pu Hruaia ni rengin!"

"Eng nge i rawn tih ve teh nawlh a?!"

Kan țawng chhuak rual chiah a, a inrual êm avàng chuan kan nui leh ringawt bawk. Zahzèlah a kut lam ka en thla a, paper bag hian eng emaw hi a khai a, chhang a ni maithei. Tuna a inthuamna ang hian a inthuam ka hmuh vawi khatna, a hma kha chuan smart takin a inha deuh zaih reng kha a ni a, tunah hi chuan casual takin a ni a inthuam ni.

"Eng nge i rawn tih dâwn?  In dam tlâng maw?" tia min biak leh tâkah chuan ka en chho leh vat a, ka chhàn hma chuan," A, Pu Hruaia ni rengin! I dam maw? Inhmuh a va khât ve?!" Remi chuan a rawn ti a, chibai tumin a kut a rawn phar chhuak bawk a, ani pawh chuan a lo vuan vat a. Kei ve hi, chibai nachâng pawh ka hre lo, ka han chibai ve leh hnuhnawh a.

"In hmanhmawh loh chuan min rawn tlawh ve rêng rêng ula? A nih loh pawhin chawhlui pawh kan kîl tlâng ang chu. In rawn zin khât si, in rawn kal chhunah chuan min rawn tlawh ngei ka beisei tlat a ni," Pu Hruaia'n a tih chuan Remi chuan," Ni ngawt mai tiraw?" tiin min rawn en a," Thil lei tùr țûl tak i nei em?" a ti leh a, țawngkaa chhâng lo chuan ka lú ka lo thing ringawt a.

"Hmm...kan rawn tlawh hman ang che, ka nî chu kan phone mai dâwn nia," awlsam zet hian a ti leh a, Pu Hruaia chuan," A làwmawm nasat chu, kan kal nghâl mai dâwn em ni ang?" a lo ti vut a, kan inzui chu a ni nghâl dèr mai.

Pastor quarter nawm reuhzia chu, a hma khân ka mitthla chhin ngai loh bâkah ka mitthla thiam hauh lo va; mahse, lo mitthla chhin pawh ni ila a inang chuang hauh lo ang, ka rin aiin a lo nuam daih si a.

"Zàn khat tal riak ula?"

Remi nèn chuan kan nui ringawt a, țhutna dûp nuam takah chuan kan țhu a, ani mipa ber chuan thingpui a lum rak rak a, lum a ngaih loh thu kan sawi pawhin," Engah maw? In lo kal vawi khatna a nih hi, lum ngei ngei a ngai," a ti tlat a, kan hnial zui duh ta lo a ni.

"Haw tum tawh kan nia, Anne-i hi a la rawn kal ngai si lo va, kan rawn chàwl rih lawk a ni, riah êm êm chu kan hman lovin ka ring," tiin Remi chuan a chhâng a, ani lah chuan," A nih loh tal pawhin zanriah tal ei ula, hma deuh takah kan ei mai ang a?" a lo ti leh a, kei chu ka ngawi reng tawp, chhàn ngaihna ka hre ve lo.

"Ka nî motor-a rawn kal kan nia, a thu thuin kan awm a," nui deuh chunga Remi'n a tih leh chuan," A nih tak chu, biak theih ni se biak ka duh hle mai," a lo ti sup a, thingpui no thum hi tray-in a rawn chawi phei a, kan lo pui vat a. A thingpui siam tui hmèlzia mai chu, chhang a va la leh vat a, kan ep chiah țhutnaah chuan a rawn țhu ve nghâl zat a.

Ka theihtâwp chuan ka lo chîk ru ve a, a țawngkam chhuak leh a awm dàn hrim hrimah chuan a pângngai thlap tawhin ka hria, Ahlutei pawhin a awmpui tawh lo a nia, pângngai thlap chu a la ni chiah lo deuh a nih pawhin ngaihtuahawm a ni tawh lo a ni ngei mai. Ni e, pângngai tawh rawh se, a khawngaihthlâk.

Remi phone chu a rawn rì a, a han chhâng a, a rawn betu țawng chu hre thei lo mah ila Remi'n a chhàn dàn ațang chuan a nî a nih ka ring nghâl a, a lo la dik chiah zui.

"Ka nî chu a țhiante'n chaw eiah an sâwm tlat a nih àwm chu, keini pahnih pawh min sawi tel nghál a, kan tum aiin kan thleng tlai deuh hret dâwn a nih tâk chu!" an inbiak zawh chuan a rawn ti chhuak hliai a, Pu Hruaia chuan," A țhat hlauh chu, nangni pahnih chu hetah in ei thung ang, hmun dangah ei a ngai lo," a lo ti thung a. Remi chuan min rawn en a," I lungnih loh hrâm ka beisei, ka nî hi chu a heti thut thut zêl a, hriat thiam hi a ngai a nia," a ti sap a, kei chuan," A, a ho êm mai, a fel êm kha, keini chu a thu hnuaia kûn mai alawm kan nih, 'Riak ang u' pawh ti se kan riak mai ang chu," nui chung hian ka lo ti a.

Pu Hruaia'n hmun danga ei sawn phal hek lo le, Remi chuan a nî chu a be leh a, Pu Hruaia'n a be bawk a, hma takah zanriah ei tùr chu kan buatsaih a, fridge chu chawhmeh leh thei chi hrang, kan ei phâk hauh loh tùr hian a lo khat dul mai a, a inlei a nih pawh ka ring lo, Ahlutei thawn a nih loh pawhin a chhûngte tu emaw ber leisak a nih ka ring. Ka rin phâk hauh loha Pu Hruaia ina chaw kan han ei mai tùr chu mak ka ti a, tak tak a nih loh te ka ring hial bawk a; mahse, a tak ngei a ni bawk si.

Zànriah ei hmain a țawngțai a, làwmthu a sawi rualin keini pahnih tân malsàwmna min dìlsak a, haw mai tùr kan nih avàngin A vènhimna min dìlsak bawk a, kan hma lam hun tùr pawh min dìlsak bawk. A, a chham kim khawp mai a, a dìlna hi a hlawhtlin ngei lawh ka beisei.

Hma takah zanriah chu kan ei a, kan pathumin eirawng kha kan bâwl ho vek kha a ni a, arsa erawh amahin a kang thung a, a kang tui khawp mai. A sa țha lai deuh nia a hriat chu min suah a, Remi a suah ve bawk a, ei țeuh tùr chuan min hrilh pah reng a. Remi bai siam ni se a tuiin dãl kan chhum hàn pawh a tui khawp mai, ka ei tam ka rin vak loh nèn, ka duh aiin ka puar daih mai.

Kan haw dâwn hnaihah chuan Pu Hruaia chuan," I nu tân," tiin Shawl leh Apple min pe țeuh a, ka han hnial ve a; mahse," La mai teh, a tam lutuk,  keimah chauh chuan ka ei sêng lo, a chhe mai ang," a ti tlat a, chutia kan inhnawn deuh lai chuan quarter kawtah chuan car a rawn tlãn lût a, Remi ní car emaw ka lo ti a; mahse, car ațanga Ahlutei lo chhuak ka hmuh tâkah chuan ka meng phâwk nasa mai!

"Anne...!! He laiah ka hmuh nawlh che chu! Eng nge in tih a?" a rawn tih chuan Bilkhawthlìr lama ka țhiannu Remi nèn kan zin thu leh kan haw lam Kolasib-a kan chawlh haw lawk thu chuan ka chhâng a, ani chuan," A nih tak chu. A nuam bawk ang chu maw?" tiin a nui a, chutah," Engtin nge in haw dâwn? Hei tlai lam a ni tawh bawk sia," a ti zawm leh zat a, Remi nî car-a kan haw dâwn thu ka hrilh chuan," He tah zanriah kîl tlàn a rem tehlul nèn, a nih loh tal pawhin riak ve leh rih ula?" a lo ti leh a.

Remi nî a rawn tlàn tâk hnu chuan haw tùrin kan inbuatsaih nghâl a, Pu Hruaia'n a han bia a, ani, mi țawng duh tih takah chutia biak a han nih chuan a han țawng duah leh rih a, Remi nèn chuan kan inen a, kan nui leh ringawt a, a hnu deuhah chuan Remi chuan," Kan tlai lutuk palh ang e," tiin a nî țawng loh kârah tak chuan a lo inrawlh ta zauh a, a nî pawh chuan," Ni dâwn tak e! A... ka titi a kal tawh vêk vêk hi chuan hun ngaihtuah lêk lo hian ka lo țawng leh duah țhìn, kan kal tawh mai ang e, anni pahnih lah hi, an lung a lêng riau tawh mai si a, ngaih an lo nei țha viau tawh a ni maithei a ni," nui huau huau chung hian a ti a. 

Kan kal dâwn chuan kan inchibai țha leh hlawm a, Pathian zârah dam taka inhmuh leh beiseina nèn kan inmang țha liam ta a. Kan bân kan vai lauh lauh a, kan hmuh theih loh tâk hnuah chuan Remi nî chuan," Kha, a fel hmèl viau kha maw, a nupui khân a uirèsan an ti em kha?" a rawn ti chhuak ta a.

*INHNIALNAAH RÊNG RÊNG, I AW KÎ SÀN MIAH LO LA, DAM DAPIN ȚAWNG TUM TLAT ANG CHE. CHU CHUAN I INBAKKAIHPUI LAKAH KHÂN HNEHTU I NIHNA A LANTÎR THEI ANG*