☆KA BEISEINA☆ - 21 By Dingdi Pachuau

☆KA BEISEINA☆ - 21 By Dingdi Pachuau

Krismas chu hlim takin kan hmang a, hmun hrana awm țhiante an rawn haw khâwm ve bawk a, kei pawh ka hlim viau mai. Joshua erawh ka hre reng a, a thlànah kalin pangpâr pawh ka dah nghe nghe. A chhûngte pawhin an tlawh a ni tih hriat tak hian pangpâr mawi tak leh tharlâm tak hi hmun thumah a lo  inkhâwi a, a mawi tak zet, ka en deuh reng a, hei tê mai hi a tâna kan tih theih tâwk chu a ni tawh mai si a,  Joshua thlànlung dum tliang hlarh vuan chung chuan ka tlawh khàt avàngin thupha ka han châwi a, a hmêl țha tak leh hlim taka a nui lai hmêl te chu ka mitthlain ka hmu vawng vawng a.

Tlaivàr hi taksain a tawrh duh bîk avàngin kumhlui thlah zàn pawh chuan ka tlaivár ngam lo va, zîng lam dâr 2 erawh ka meng thleng ve tho. Biak in lamah hun kan hmang a, a hma deuhin Remite inah kan țhianhoin hun kan hmang ve phawt a, hlim pawh kan hlim dar dar viau. Lalkâwnga a che lehpek a, a nuih loh theih loh.

Ka mumangah Joshua ka lo hmu a, ka hmu khât deuh bawk nèn, ka lo kuah vang vang a, ani pawh chuan duat taka min kuahin," Anne, hlim taka awm tùrin ka duh che tih i hria tiraw? Ka hmangaih che, i kiangah awm thei lo mah ila hlim taka nun hman hi i phû ve tawh a ni, kei chu ka rawn lêt thei tawh lo va; mahse, ka rawn thlîr reng thung che. Hlim taka i awm chuan kei pawh ka lo hlim ang a, hlim lo rêng rênga hun i hman chuan hrehawm ti rêng rêngin hun ka lo hmang ve ang, chu vàng chuan hlim takin hun hmang la, i hlimna lam kawng apiang chu zawh zêl ang che," a ti sap sap a. Chhâng lét lovin min kalsan hlau tak hian ka kuah nghet sauh sauh a, chutih lai tak chuan eng emaw hi a ri deuh dawp a, ka harh nghâl zawk mai, eng thil nge maw ni? Khumah muin nghet zetin ka rizai sin lai chu ka lo kuah niin, ka mumangah Joshua ka lo hmu a nih kha, maimichhîngin ka ngaihtuah lêt vang vang a, ka hmu khât tawh sia, ka va ngai roh tak!

Ka thawh chhuah chuan ka nuin," Ka tiharh che a ni maw?" a lo ti vat a, kei chuan," Ti harh êm êm lo ve, eng thil nge ni a?" tiin ka zâwt a, chhuar chung lama mutpuan kan dah țhatna bag chu dawhkàn chungah a ti tla a lo ni, a rit ve deuh bawk a, ri deuh dawpa ka hria pawh pawh kha a àwm ve viau.

Ka nu chawhmeh siam ka en dan dan lai chuan a phone chu a rawn ri ral ral a, ani bathroom-ah a awm a," Lo chhâng mai rawh," a rawn ti a, ka lâk hma chuan rawn phone-tu hming chu ka han en phawt a, Pu Hruaia hming ka hmuh chuan," Nu, Pu Hruaia a nih hi," tiin ka han au a, ani lah chuan," Aw, lo chhâng rawh," a rawn ti leh a.

Kan chhûngkua chu Kum thar chibai min rawn bûk phawt a, ka nu emaw min tiin min be luam reng a; mahse, a hnuah ka nu ka ni lo tih a hriat chuan," Ta mai mai chuan aw!! Ka'n hriat loh dâwn che chu le! A àwm ve tho mai, in aw a inang ve êm bawk a ni," a rawn ti a, chutah," Ti ta daih ila, Remi nèn in rawn kal lai khân rawmawl in theihnghilh em? Tu emaw zâwk zâwk theihnghilh a ni lo maw? A vâr a nia," a rawn ti leh a, ka han ngaihtuah lêt a, ni dâwn tak e, ka hre chhuak ta chiah! Rawmawl hi ka hmang khât a, ka keng chhuak khât bawk a, ka theihnghilh a ni tih pawh ka hriat chhuah miah loh hi!

"I sawi tâkah chuan ka hre chhuak chiah! Ka rawmawl a nih chiah chu, ka haihawt lutuk a, sawi lo la chuan ka theihnghilh tih pawh ka la hre tawp nâng!" ka han ti a, ka zak ru chem chem mai. Ani lah chuan," A lo ni maw? Chuti, ka kum zât ang kum i hman hunah meuh chuan i hming pawh i theihnghilh tawh mai ang a??" tiin min la rawn fiam zui a, a nui zui hawk hawk a.

Kan inbiak tàwp dâwnah chuan," I rawmawl chu ka dah țha reng a nia, a bo lo tùrah ngai ila, inpêkna hun remchâng a la awm thei mai ang chu maw, hlim takin vawiin chu in lo hmang dâwn nia," a rawn ti a, kei pawhin duhsakna ka hlàn a, kan inbe tàwp zui a ni deuh mai.

Kan inkhâwm a, Remite inah țhianho kan inhmu khâwm leh a. Lalkâwnga'n fiamthu a han thawh kual leh a, chutah, thu tak ve deuh thutin," Hun thar kan chuang kaiin kan nun hman dànah pawh bung thar kai tawh ila, kumina kan tum ber tùr chu 'single loh' ni tawp mai se, a țhain ka hria, kan zîngah single an awm chuan single lo tùra țan lâkpui a țha ang. Entîr nân, Anne-i a single a nih chuan Mapuia kan sawi rempui ang, khatiang khân, single nun nei lo tùrin kan ințanpui zêl ang," a rawn ti chhuak a, țhiante chu ka en kual a, an lo nui deuh țhâ tih ka hmuh chuan," Engah nge kei kher min rawn sawi chhuah a? Kei lo single pawh an awm ve tho a," ka lo ti vat a, Lalkâwnga lah chuan," I single rei tawh a, Mapuia ni se a lo single lai tak a nia, hmeh bel kha in rem êm alawm, bâkah, in inhmeh ber," a lo ti leh mai a.

Mapuia 'Smiley' chuan nui chung hian," Lehkha zir lo hian Match Making lam hi ti ta zâwk la, i hlâwk zâwk lo'ng maw?" a lo ti a, Jim-a pawh chuan," A țha ngawt tak ang! Youtube channel siamin i dah ve ang a, a nih loh pawhin Zonet emaw LPS lamah emaw tih chhuah ve i dîl ang a? Keini i țhiante tân lah celeb nih theihna chance țha lutuk a lo ni bawk ang a?" a lo ti ve a, ani lah chuan awlsam zet hian," Ka ti tak tak duh mai ang, sawi zêl teh u," thu tak zet hian a lo ti leh a, a nui hauh lo, mi dang erawh chu kan lo nui vek thung a.

Lalkâwnga fiamthu chu a ngai thu tak deuh nge nia ka ngaihbel deuh hlek zâwk, a awmna lama a kal leh hma chuan Mapuia chuan min ngaihven thar ta riauin ka hre pek a! Lalkâwnga sawi ang takin a bialnu a țhen lai a ni a, chu vàng chu em ni dâwn ni. Kan inkàwm nasa a, chhûngkaw khawsak harsa lo leh țhenrual pawh ngah tak an ni tih ka hria, tlangvâl hmêl chhe lo tak leh nula mî ve tak a ni tih thlengin, hmeichhe duh chî takin a chhe lo va, single lai a nei mang lo ţhìn pawh hi a hriat thiamawm viau. Hmeichhe lamin an birh tlut tlut tlat te chuan mipa tân zawng, a âwm nêm zâwk tih beidawn kha a nuam dâwn si lo va, hmeichhe inphal lutuk ngaihzàwn phei hi chuan fîmkhur sèn pawh a har ngawt ta ve ang.

A ni tak tak! Boruak danglam chu a awm chiang a ni. Mapuia chu mi dang chhuk hnuah pawh chuan a la chhuk ve miah lo! A khawlai chhuak nèn hian kan la intawng fuh thei êm êm zui a. Kea a kal châng hian dàwr thlenga min thlah loh leh ka haw lam kan in thlengin min thlah ziah; mahse, kan kal dun châng pawh hian titi phunglêng bâk erawh kan sawi ngai lo, chu vàng tak chuan a hnu deuhah phei chuan a hawihhàwmna hi ka lo hre sual deuh em ni aw ka ti ta zâwk a. Ani pawh hian ngaihzâwng en chuan min enin ka hre lo, kei pawhin ka en hek lo; mahse, hetia min ngaihsak thar deuh thut hi nuam lo chu ka ti ve deuh, inkàwm reng reng kan ni bawk sia, țha tak leh nêl takin ka be bawrh bawrh reng tho a, ka awm dàn leh mitmeng pawh a hmuhah ka ti danglam ngai lo, a inthlahrun phah ka hlau a ni.

Mak deuh maiin Remi chuan a lo hre ve lêm lo a niang, eng mah a sawi chhuak ngai lo va, min dem bel pawh a tum chuang lo. Remi meuh pawhin a hriat loh chuan ka bula Mapuia awm dàn hi ka hre sualin ka puh sual ve a nih ka ring thar leh a, min ngaihsak thar ta deuh thut nia ka hria pawh hi kum dang aia a awm rei vàng a nih ka ring ta deuh, kum danga a chhuk ang hunah khân chhuk se, min ngaihsak thei bîk chuang nâng, a mal a, ka thil tawn a hre ve vek bawk a, chu vàng chuan min ngaihsakna a ti lang mai a ni, ka țhian a ni a, chutiang bawkin a țhian ka ni bawk, a țhian ka nihna angin min ngaihsak a, Aizâwlah min ngaihsak theiin a la awm a, a awm loh hunah chuan min rawn ngaihsak thei bîk tawh nâng.

Pu Hruaia pawh Aizâwlah rawn kalin ka rawmawl chu min rawn ken ta ngei a, rawmawl mai mai min rawn pe vang vang mai chu a inthlahrunawm ka ti ngei mai. Ani lah chuan," Rawmawl hlu tak pawh a ni thei sî a, leisaktu che azirin," nui chung hian a ti a, ka nui ve ringawt. Ka lei ve mai a nia, man to tak leh hlu tak pawh a ni chuang lo, rawmawl vár satliah mai a ni.

Kan titi hlut lai chuan Mapuia a rawn lang ve hlawl mai! Zànah a rawn lêng ngai hauh si lo va, mak tih loh rual a ni lo. Țhutna ka lo kawh hmuh vat a, Pu Hruaia a hmuh chuan," Pu Hruaia teh tlat chu! He lama i awm lai a ni maw?" a ti ve luam a, a țhu zui nghâl a, ani pawh chuan," A nih hi, khawpui lama rawn chuan chhuah hi a khât ve si a, rawn chhuah chhunah hi chuan hmêl hriatte hi chu tlawh chhuah vek ka duh țhìn a," tiin a han nui a, an inbe zui bawrh bawrh a.

Mapuia min ngaihsak kha nuam lo ti ru deuh mah ila ngaihsak loh nih ai chuan ngaihsak nih kha a lo nuam daih a ni tih a awm loh chiah ațang chuan ka hre chhuak. Phaiah a chhuk ve leh tawh a, ni tin deuhthawa inhmua kawnga min kalpui reng țhìn ta chu, a awm loh chiah chuan a reh vawng vawng mai a, țhian angin en mah ila a han awm lo chiah chu khua a har a, a ngaihawm vang vang mai, ngaihsak nih hlutzia leh min ngaihsaktute kan tâna an hlutzia ka hre chiang thar leh uar uar mai a ni.

Mahni buaina lam kan hna lamah kan rilru kan pe chho a, kan inhmu khât leh hlawm ta. Remi nèn pawh Pathiannîah kan inhmu țâwk a, a chângin zànah a rawn lêng ve zauh bawk. Țhianho group-ah inbe fo mah ila a hranpain Mapuia chuan min rawn be zauh zauh a, rinhlelhna chin nei ru mah ila chutiang lam chu a sawi chhuak ngai lo rêng rêng. Eng eng emaw mai mai sawiin min bia a, a hun hman dàn nuihzatthlâk tak takte min hrilh a, chutiang mai mai sawi chuan min rawn be țhìn. 

Ahlutei kâ ațangin Pu Hruaia pawh a dam țha tih ka hriat bâkah pastor pathlawi ni ta chu a luck ta phian ni àwm tak a ni, nula phone call a dawn țhin thu leh phone call mai ni lo lehkhathawn hial a dawn zauh zauh thu chu nui hak hak chung hian a sawi a, a sawitu ber chuan a làwm ni àwm a ni," Tlêm lai deuha a rawn kal lai pawh khân phone call chu a dawng zing khawp, ka nuih a zâ asin. Ka lo hre ve mang si lo va, number a hriat loh chu a lo chhâng țha duh lêm lo a lo ni a, hre ve hek lo chuan ka lo chhànsak pek a, mipa phone hmeichhia-ina chhâng ta chu a bialnu emaw min rawn ti a," a ti a, a nui hak hak reng a. A sawi chhuah chhan pawh hi kan thawhpui U Biaktei'n a u Pu Hruaia chanchin a zawh vàng a ni.

"A khawngaihthlâk ngawt mai, tu mah lah hian kan hma hun kan hre hauh si lo, hetia a mah maia a awm ta hi a malin a khua a har thei ngawtin ka ring, nupui hi nei leh thuai ta zâwk se te ka lo tihpui mai mai a, hmangaih deuh tawng leh thuai se," U Biaktei'n a tih leh chuan Didiki chuan," Nia... mahse, chutih rualin a tân nupui neih leh thuai chu a harsa duh ngawt ang," a lo ti ve vat a. Ahlutei pawh chuan," Ni e, hriat thiam hi a har. A rilru kan zuk hmuhsak thei si lo va, bâkah, hetiang lam hi a bulah kan sawi chhuak ngai lo tih theih a ni, a rilru a nat thar kan hlauh vàng pawh a ni ang chu," a ti ve mai a, an rilru put dàn chu keini ang mai bulah pawh a sawi hreh chuang lo.

Hun a liam leh hret a, Didiki'n palai hmêl a hmuh thu min hrilh chuan mak ka ti a, mak ka tih rualin ka làwmpui bawk a; mahse, pasal a han nei thuai mai tùr chu ka ui ru nghâl viau bawk, a chhan chu ka thawhpuite zînga ka kawm rual ber leh ka kawm ngeih ber a ni ve miau si a. Pasal neih chu a hmanhmawh vak lo nain a pasal tùr Vâla hi a upa ve țan tawh a, nupui neih hun ve tawh tak niin an chhûngkhur pawhin a mamawh ve tawh bawk si a ni, Didiki chhûngte lam pawhin Vâla mizia an hre chiang a, an fanu tân an duhpui bâkah sawrkár hna thawk a ni bawk a, an phû loh tawp a ni tih an hria, inupat hleih deuh mah se an induh tawn tho a, an induat thiam zâwk tùrah an ngai.

Rei an rial lo, inneihnî a lo inher chhuak thuai a. A thawhpuite min sâwmin Ahlutei pawh a sâwm a; mahse, dàwr kalsan vek ringawt chu fuh bera a lan loh avàngin kei, a țhian kawm hnai ber ka kal a, mi dang chuan inneih present tùr min thawn thung. 

Kan inkhâwm a, inkhâwm pawh kan țhahnem viau mai, Didiki pasal nei lawmpuiin a pasal nèn, anmahni vàng liau liauin an inkhâwm a nia, kei hian pasal nei ve ta ila hetianga tam mipui hi min lawmpui tùrin an rawn inkhâwm ve ang em tihte chu ka ngaihtuah daih mai a! A hnu deuhah erawh chuan ka inngaihtuah harh a, inkhâwm boruakah chuan ka chêng leh thei ta a. Didiki chu ka han en chiang a, a hlim hmêl vàng chu nge ni, ka hmu hmêl țha zualin ka hria, chei pawh an chei mawi viau a ni. Vâla nèn pawh chuan inupat hleih deuh pawhin an lang lo, an inàwm tâwk vêl viau a ni. Mi tam tak kârah chuan thlâ ka lâkpui ve a, rei inbiak theih pawh a ni lo, thla lâkpui duh an tam ve bawk si a, mi tam viau mah se Didiki chauh hmêl hriat nei ta chu ka mal rauh rauh khawp mai.

"Anne...??"

Chu aw lo rîkna lam chu ka hawi vat a, Pu Hruaia, a kekawr ipte zen chunga lo ding zân mai ka hmuh chuan ka en ta reng a, hetah eng nge a tih ve ni? Kolasib lamah daih awm tùra ngaih a ni. A nui ta suk a," Min hmuh i inring bîk chiah lo a ni maw? Kei pawh hmuh che ka lo inring bîk hauh lo a nia, hmeichhe lam hi in chhûngte an ni ang maw? Tu nèn nge in kal?" a rawn tih leh tákah chuan suangtuahna ațanga harh chhuakin ka hawi sawn ve ta chauh a, ka lo en rei viau em aw..?? Rei viau lo tùrah beisei ang.

"Keimah chauhin ka kal, hmeichhia hi ka țhiannu a nia, kan inchhùn phei chu ka hre lo," tiin ka chhâng phawt a, chutah, amah chu en lehin," In chhûngte an ni zâwk tihna em ni? Lo ni ta se, Ahlutei a kal ve mang si lo va... nang i kal bawk sia," ka ti leh a, ani chuan," Vâla hi ka țhianpa a nia," a lo ti ve leh a.

Hmêl hriat ka hmu fuh ta bawk a, ani pawhin rawn hruai leh rawn kalpui a nei bîk lo va, kan inzui kual ta char char mai, hmêl hriat ka nei lo bawk a, min betu pawh ka tawng lo, ani erawh chu hretu, rawn betu an awm zauh zauh reng a. Pastor lai a ni bawk a, a àwm ve reng, ani hi chuan a hre lêt vek kherin ka ring bîk lo; mahse, țha takin nui sângin a chhâng lêt vek thung a ni.

Chaw dawhnaah chuan a hma chiahah min dintîr a," La țeuh rawh aw, puar deuha ei tùr a nia," a ti a, kei pawh chuan," Aw le, ka ei țeuh dâwn, ka ril a țâm tawh alawm," ka ti ve a, ka dawh ve țeuh nghe nghe.

Chaw kan ei lai chuan Didiki'n min rawn hmu a," Ei țeuh r'u aw," a rawn ti lauh lauh a, kei pawh chuan," Kan ei țeuh tawh mai, chawhmeh a tui bawk si," ka lo ti ve a, chaw an lo la ei ve lo niin, inbiak rei hman ni hek lo le, a kal sawn zui ta nghâl a.

Chaw ei khamah chuan haw nghâl mai kan tum a; mahse, Vâla'n Pu Hruaia chu a rawn biak avàngin kan va hmu leh rih a, an inbiak chhûngin Didiki nèn pawh kan lo inbe ve a, ka hmêl a hmuh avànga a làwmzia thu chu min hrilh leh malh malh a, rei erawh kan inbe ta lo, mi dang an awm ve neuh neuh bawk sia, an buai ve bawk nèn, kan haw ta thuai a.

A car-a kan țhut luh hnu chuan kan tlãn mai si lo va, ka han en phei a, ani pawh chuan min lo en ve a, nui suk chung hian," Engtik kum nge ka hre ta lo, ka tleiràwl chhuah chhoh lai, inkhelh ka chìn deuh laia mual sîra vûr lo zuar kha i ni tiraw? I la hria em? I tui vâwt in pawh ka dìl nghe nghe che kha," a han ti a, chiang lehzualin, mit khap hauh lo chuan ka en a, chutiang chu ka hriat àwm pawh ka hre lo. Vûr zawrh maw? Ka têt deuh lai khân ka zuar ve zauh zauh a nih kha, engtik hun lai tak nge ni ang?

"A rei deuh tawh a, i hre chhuak thei tawh lo maithei; mahse, kei chuan chiang takin ka la hria a ni, a chhan pawh i hmai țhuangvuak kha, a mawi danglam ka ti a, khatiang kha ka la hmu ngai lo, inhmeh ka ti che a, chu vàng chuan ka la theihnghilh thei lo, tûn thleng pawh hian i la inhmehin i la màwipui reng tho a nih hi," a ti leh a, chu thu a sawi chhuah tâkah erawh chuan ka zak thar ta thut a, amah pawh en lo chuan hma lam chu ka en ta daih a, ka biang pawh a sa nghâl ham ham mai.

"Ka hre miah lo a nih chu," ka ti chhuak sap a, ka hre lo tak tak alawm. Ani pawh chuan," A rei tawh ka tih kha, nang pawh naupang tê chauh i la ni," a lo ti ve a, an inkhelhna lai leh min hmuhna laite chu a sawi țha leh a; mahse, chuti chung pawh chuan ka hre chhuak chuang lo. A hnuah erawh chuan a tét laia lehkha a zir chhoh dànte chu a sawi chho ta zâwk a, ngaihnawm ti takin ka lo ngaithla doh doh a, kan haw kawng pawh chu tãwi ta riauin ka hriat phah a ni.

Kan in bul kan thlena ka chhuk dâwn chuan làwmthu ka hrilh leh rih a, chutih pah chuan," Lo lût la, ka nu pawhin a lo ngai tawh viau ang che," nui chung hian ka ti a, ani erawh chuan," Ka lo pêng rih lo zâwk ang e, hawa inbual phawt ka duh tlat, zànah tha tharin ka rawn tlawh zâwk ang e," a lo ti thung a, kei pawh chuan," I tih dàn dàn le," ka ti ve mai a.

Zànah chuan a rawn lêng leh ta ngei a, thuamhnaw pângngai tak a rawn ha a, a inhmeh lehpek kher mai. A lang zahawm khup tawh bîk lo va, pastor ni lovin tlangvâl pângngai tak pawh a ang ve alawm. Ka nu nèn an titi bawrh bawrh lai chuan vawiin lama a thil sawi kha ka lo ngaihtuah thung a, vûr zuarin min hmuh thu a sawi a nih kha. Min hmuhna hmun nia a sawite chu ka han ngaihtuah lét a, mitthlaa hmuh tumin ka maimichhîng vang vang a, chutah, mengin a hmêl chu ka en phei leh a, țawng paha a lo nui sak lai hmêl ka hmuh chiah chuan ka hre chhuak ta uai uai mai! Amah hi a lo ni maw, mipa hmêl chhe lo deuh ka tih, ka tui in min dîltu kha. A hmêl țha ka tih êm vàng khân ka phal lo ngam lo a nih kha. A lo ni chiah mai, a sawi ang chiah khân a rei tawh lutuk! Naupan laia hmêl țha ka hmuh hmasak ber kha ani ngei hi a lo ni; mahse, ka hmu zui ta miah lo va, ka tleiràwl chhoh ve deuh hnuah Pu Hruaia hi ka hmu a, ka star țan ta nghâl a nih kha.

*Vawiina i thla ka hmehsak che a nih kha, a mawi riau asin*  tiin ka mut dâwn chuan Pu Hruaia chuan thlalâk pakhat hi min rawn thawn a, ka en chuan a lo mawi viau tak tak a! Thlalâkah chuan ka nui chiah lo nain nui hmêl deuhin ka lang, ka hmai țhuangvuak erawh a lang chiang ngang mai.

*Engtik laiin nge i lo hmeh a? Ka hmai lah chu, a lang chiang ngang mai😶*  tiin ka chhâng lét a, ani chuan *I hriat loh lai tak khân maw le😊A mawi ka ti teh a nia, thlalâk ka hmeh tawh azawnga mawi ber a la ni ka ti ngam sak* tiin min rawn chhâng leh a.

*Ka hmai mawlh hi*  ka tih leh chuan *Kha tak kha a ni mawi ka tihna chhan chu, a lang natural a, edit hauh loh a ni bawk nèn, a mawi thlâwt a ni. I hmai țhuangvuak kha a mawi danglam tih ka hrilh tawh che kha, chhinchhiah pawh i awl phah a, zahpui ngai hauh suh aw*  a rawn ti leh a. 

Ani hi Joshua tih loha ka hmai țhuangvuak mawi titu a ni leh ta. Engtin nge mawi an tih tlat ni? Tho chhuakin dârthlalangah chuan ka va inen leh ngat a, mawi an tih vàng nge ni zanin chu ka hmu chiang lo deuh tlat, a lo reh deuh hlawm tawh em maw ni? Mahse, tukin kha chuan a la chian viau kha.

*KAN THUNUN THEIH BÂK THIL ȚHA LO NGAIHTUAHA LUNGNGAIH HIAN SÂWTNA PAKHATMAH A NEI LO, RILRU EI CHHETU DIK TAK A NI*