☆KA BEISEINA☆ - 22 By Dingdi Pachuau

☆KA BEISEINA☆ - 22 By Dingdi Pachuau

Hruaia

~~~~~

He nu, mitmeng fiah leh zahawm ru tak si, kum lamah pawh la upa lo tih hriat leh nui hmêl duhawm zet têin ka rilru a la tlat mai hi ka hre thiam lo. Setana thlèmna hmanrua mai nge ni dâwn? Irene-i'n min kalsan ațang khân ka tân nun hi a ho zo a, hmeichhia rêng rêng (nula a ni deuh ang chu) phei chu hnaih loh bur hi ka tum dàn a ni tawp mai; mahse, he nu hi chu a danglam tlat, min hîp ni berin ka hria. Hnaih loh ka duh a; mahse, ka ngai ru tlat si, hmu thei lova inthiar fihlìmsan ka duh laiin hmuh châkin ka za zek zek a, a nui hmêl duhawm tak leh pawi sawi lo zet hmuh châkin ka phî ruai a ni ber mai. 

Hetiang hian ka awm khât asin, Irene-i kha ka duhin engtiklai pawha a bula awm kha ka duh țhìn a, min kalsan pawh khân hrehawm tàwpin ka awm rêng a nih kha. Mahni ka inmawhchhiat rualin Pathian ka mawhchhiat tel lo thei lo va, ka țawngțai pawhin ka hul vek a, țawngțai e ti lo chuan dìlna ka thlen lo, ka chhuahchhàl a ni ber zâwk.

"I rawngbâwltu niin theihtâwp chhuahin i tân ka thawk a, min hringtu ka nu duh dàn pawh zàwm thei lovin i duh dàn ka zàwm hial a, ka hming ni se 'Vanlalhruaitluanga' ti hiala sak a ni; mahse, min hruai dàn hi ka hre thiam lo, min hruai tluang ka ti thei lo, hetianga zahna leh hrehawmna min thlen mai mai tùr hian engati nge ka nu chhùl ațang khân min pian chhuahtîr ni? Ka țawngțaina ni se min chhànna ka hmu thei si lo, i awm tih ka hria, min chhâng lul rawh, ka beidawn êm hi. I rawngbâwltu hi ka chak zo lo, min chhàn ka ngai, a hma ang khân min chhângin min hruai leh rawh, keimah mai chuan he kawng hi ka zawh chhuak zo ngang lo a ni, he thil hian min ti chau zo tawh," ka ti tlawk tlawk mai a, ka insûm thei lo, ka țap zawih zawih a, bawk khup meuhin ka țawngțai a ni.

Hemi zàna ka țawngțaina hi min rawn chhâng ta ngei a," Ka fa i ni a, ka kalsan ngai lo che, ka tân ka serh hrang tawh che a, ka hruai zêl ang che," tiin, ka thinlungah chiang êm êm hian thu a rawn sawi a, ka rilru hrehawmna pawh paih bo ang hmak a rawn ni zui bawk. Làwm avàngin ka țap chhunzawm leh a, làwmthu ka sawi mawlh mawlh bawk a, hemi zàn ațang hian min awmpuina ka hre chiang thar leh a, ka nun pawh a pângngai chho leh ta a ni.

Irene-i ka ngaihna pawh mak takin a reh hmak a, Ahlutei'n a thuamhnaw leh a thil hrim hrim chu ka hmuh theih ata a la bo vek tawh bawk nèn, ka ngaihtuah chhuak zauh zauh nain huatna ka nei zui chuang lo va, a tân rilru chhia pawh ka pu chuang lo bawk; mahse, inchhîrin rawn inlamlêt ta ang se la, ni lo, a rawn inlamlêt lo ang, kei pawhin ka lo pawm thei tawh lo ang a, a rawn lêt tawh lo bawk ang.

A chhûngte pawhin ngaihdam min rawn dîlin kan inbe fel vek tawh a, kei pawhin ka thlah fel diam tawh, ințhenna ni se a fel vek tawh bawk. A pu pastor pension rilru na lutuk kha ka khawngaih ber mai; mahse, a tân tih theih ka nei chuang lo. A tunu ûm tâk tlangvâl, a games khelhna ațanga a hriatpa chu a tunu tân a pawmpui thei thlâwt si lo va, a thin pawh a rim; mahse, tih theih a nei chuang lo, a pawmpui mai loh chuan. 

Zanin zet chu, hun kal tawh ka ngaihtuah lét nasa hlê a ni, ka ngaihtuah ngai tawh lo asin, he nu tê vàng vek hi, ani hian nimin khân ka thinlung ka hung phuina kawngkhàr a rawn su hawng tlat si a, a hmaifang dik zet leh mitmeng mi hîp thei tak chu ka en leh vang vang a, "Ka tân thlèmna mai mai i nih loh hrâm ka beisei," ka ti chhuak sap a. Ni e, ni lul suh se, harsatna nasa tak pal tlang ve tawh tho a ni a, a kum naupan ai hian a chhelin a ngaihtuahawm loh zêkin ka ring. Vawiin khân a kut tal vawnsak kha ka châk a; mahse, ka ti hlauin min ngai khawlo palh ang tih ka hlauh vàngin ka insûm hrâm hrâm kha a ni a, lo vawnsak ta ila...min hlau ang em? Bialpa a nei leh tawh ang em? Hmân zàna an ina lo lêng ve kha, kha kha a ni thei mai lo'ng maw? A, muthilh tum teh ang, naktûkah kan khua Kolasib-a ka haw a ngai leh tawh si a.

Ka chunga ka nu lungawi lo hi a la reh hlei thei lo va; mahse, tûn țuma ka haw hi chuan eng mah a la sawi chhuak miah lo. Ahlutei hlim takin a titi siam siam reng a, ani bulah hi chuan ngaih a ngam sârh a, rilru hrisêl lo pawh hi put a har a ni.

Ka phone a rawn rì a, ka en a, a pawimawh hran lo tih hriain ka hmet tàwp ta daih a, Ahlutei chuan," Mâma chu, i haw leh tawh dâwn sia, kawng lakah nula lo chãngtu che an lo awm palh ang a?" nui chung hian a ti a, chhâng lo chuan ka nui ve ringawt a, ka pa chuan," Nuih liam mai lovin ngun takin ngaihtuah teh, nangmah chauha i awm hi ka ngaihtuah țhìn che a, i nu leh i naute pawhin an ngaihtuah êm êm che a ni. Mipa mahni chauha khawsak hi a fuh lo, hmingchhiatna a hnai bîk bawk. Hun a liam tam ve tawh tho bawk a, kawppui tùr lam hi zawn chhoh tum ve tawh la a țha ka ti," a rawn ti chhuak ta charh charh a.

Anne-i ka mitthlaah ka hmu nghâl chat a, ani tê kha nupui țha tak a ni thei ngei ngei ang. Ka kàwm ve ta zauh zauh a, a nungchang tùr ni se, a hriat deuh ruak tawh a, chubâkah, a awm dàn leh a inchei dàn ațang pawhin a lérh lo tih a hriat a, a nu a zah thiam a, a awka a dam bawk, a pasal tùr chu mi vànnei tak a ni ngei ang.

"A la hma alawm," ka tih chuan Ahlutei pawh chuan," Nia, kum khat vêl âwrh chauh a la nia, mi ngaih dàn pawh thlìr ve a țha ang, tur hmanhmawh vak lo ila, Pa?" a lo ti ve vat a, ani erawh chuan," Ka tur hleinem, thu dik tak a ni ka sawi ni. Kum khat pawh chu a tâwk viau tawh a ni, hma lam i pan thei a, ani tel lo khân i chak tâwk a ni tih i lantîr a ngai, mipa i ni a, duh lova kalsantu che ngaia sûn tùr i ni lo, hun liamtîr leh hlek pawh a ngai lo rêng rêng, i hlimna i zawng ve ang chu, chumi ti tùr chuan tu mitmei mah vèn a ngai hauh lo, mi mitmei vèn, mi ngaih dàn thlìr tih mai mai a țûl lo lutuk!" a lo ti bur thung a.

Ka nu a zîng chhuah leh daih tawh a, Ahlutei erawh hi chu ka awm hi chuan a inthlahdah ve deuh, bâkah, chaw ei kham hma deuhah hian a chhuak tawh țhìn niin ka hre bawk. Ka nu awm ve ta se eng nge a sawi ve ang aw tih ka ngaihtuah rauh rauh a, Irene-i koh leh mai a duh thu a sawi chhuak leh maithei a ni, ani hi chuan Irene-i kha min duhpui ve êm mai a, chutiangin Nutei pawhin, ka thiam lo hran chuang lo, ka duhzia an hre chiang êm a ni. 

Haw hmaa Anne-i hmuh leh ka duh vàng chuan Ahlutei dàwr lamah ka kal leh rih a, ka va thlen chuan a dinna lam ka hawi nghâl vat a, a lo buai khawp mai niin,  hmuh pawh min rawn hmu lo ang. Ahlutei chuan min lo làwm vat a," I lo kal ka lo ring pha miah lo va, nula tu emaw kawr tùr min rawn dàwr dâwn em ni?" a lo ti a, a lo nui sâng a. Kei pawh chuan," Ni mai e, țan lâk chhoh nasat ka ngai si a, kawr leisak ațanga ka țan mai loh chuan," ka ti lêt ve a, kan nui dùn hawk hawk a.

 

"La haw rih lo la, nupui tùr chu ka zawnpui ang che," a rawn tih leh chuan," E khai! Mahni tâ tùr pawh zawng hmu thei lovin min zawnpui i han tum a nia! Khuarei nghah a ngai palh ang, ka nu leh pate'n tu mawng pawh an bêng hman nâng!" ka ti ve thung a, a nuih a za deuh si, ka chhàn dàn chu a run deuh bawk si, nui deuh chung hian min melh rum a.

"I va sual tak! Chutiang tea min han tih chuh, nupui i neih hmain pasal ka nei sak ang, tu nei hmasa sa ti ila?" a ti ta sak sak a, kei chuan nui chung hian," Teh rêng mai! A țha ka ti lutuk tlat. Chuan, inzawnpui âwih loh ti bawk ila?" ka lo ti a, ani lah chuan," Ka zawnpui dâwn teuh lo mai che! Kei chuan ka hmu sa reng a, kumin Krismas hma hian ka nei ang, ka neihsan dâwn che," a ti ve leh a, kut bêngin," A làwmawm nasa a nih chu, kei aiin ka nu leh pate an lãwm zual ngei bawk ang," ka tih leh phei chuan a ner nâng nâng a, a'n tûm zui nghâl hmak bawk a, ka nuih a ti za reuh lutuk. Ani nèn hi chuan tûn hnaia ka chunga thil thleng vàng khân kan inpawh zual a, min ngaihsakzia leh min hmangaihzia pawh ka hre chiang zual a ni.

*******

Ka nu chawhmeh zuar chhuakin ruah a lo innantîr pek a, zànah a khua a sik phah a, damdawite eia a dam chhoh mai kan rin laiin reh lam pan ahnêkin a zual zêl em maw ni tih tùrin a khawsik chu a ngawrh a, inentîr mai kan rawt ta a. Ahlutei hnênah inthlahrung takin thil awm dàn chu hrilhin chawlh ka dîl a, ani pawh chuan min lo hre thiamin ka nu damlo chu zia lo a tih thu min lo hrilh ve a, dik tak chuan chawlh dìl ka ngai ve ziah hi ka inthlahrungin hrehawm ka ti tak zet a ni.

Civil Hospital-a ka nu entîra ka hruai chuan doctor chuan ngun takin a lo en a, admit a ngaih thu a han sawi chuan ka rilru a hrehawm kher mai. Damdawi in lama ka blind-zia chu thuhranah lo dah ta ila, ka awmpui ngei a ngai dâwn a, Ahlutei chawlh dîl a ngai ang a, pawisa tam tak sèn a ngai bawk ang; mahse, dam kan duh chuan hei hi chu ngei ngei tùr a ni a, chawlh dìl ngai mawlh chu, ka inthlahrung a ni.

Ka han awmpui ve ta lauh lauh a, engkim mai chu ka tân thil thar vek a ni. Ka hriat loh chu ka zâwt chawp zêl a, a ni khatna ațangin mite lo felzia ka hriat phah a, dam hlutzia leh damdawi ina awm ngai miah lova hrisel taka kan duh duh titheia kan awm kan vànneihzia ka hre chiang viau bawk a ni. Kan bul vêlah damlo na tak tak an awm ve reng si a, chu erawh hrehawm ka ti ru viau thung, an thi mai ang tih ka lo hlau a, ka nu lah a khawsik a reh mai thei bawk si lo nèn, rilruin ka țawngțai mawlh mawlh reng mai a ni. 

A zàn khatnaah Remi'n min riahpui a, ti dam theitu ni lo mah se min riahpui hrim hrim chu ka lãwm a ni tawp mai, ka thlâ a ti muang a, mal tak leh mikhual riaua ka inhriatna a reh phah deuh bawk. A tûk lamah erawh ka mal leh ta deuh a, chhùn lamah chuan Remi a hman tawh bîk si lo va; mahse, chutih lai chuan Didiki a rawn lang ve leh nawlh mai a. Ka phù hauh loha țhian min ngaihtuahtu ka nei a, hetiang hunah phei hi chuan a làwmawm zual ka ti, min rawn tlawh hrim hrim chu ka làwm tawh tehlul nèn, ka nu tân ei tùr a rawn keng țeuh zui bawk a, a ti làwmawm tak zet a ni.

Ka nu chuan damdawi in awm chu a ngeih phian a ni ang, a khawsik reh hlei thei lo pawh chu zàn hnih kan riahna zànah chuan a reh ve thei ta hlauh a, ka làwmzia mai chu, ka rilruin làwmthu ka sawi mawlh mawlh mai a ni. Kan bul chiaha a pa awmpui ve nula pakhat, thingtlâng lam ațanga rawn kal Duhi pawh chuan chutia ka nu khawsik reh thei ta chu min lawmpui thu a lo sawi ve bawk a, anni hi keini aiin ni khatin an lût hmasa zâwk a, a pa hi a kal lamah thil fel lo a awm ni àwm tak a ni a, chu lo pawh chu natna dang a nei nual bawk a, an awm rei deuhin ka ring.

A tûk lamah pawh chuan ka nu chu a khua a sik ta miah lo va, a reh hlen dâwnah ka ngai a, heti a nih chuan vawiinah doctor be chhin ila, naktûk lama chhuah a phal chuan chhuak daih ila ka ti rilru a, ka nu pawh a dam chho zél tùrah ngai ila...

Mahse, doctor chuan a lo la rem ti chiah lo niin, ni khat tal nghah leh deuh a duh thu min hrilh chuan ka lu ka bu ringawt a, ka rilru erawh a hnîm nghâl deuh rawih mai; mahse, inngaihtuah harh leh thuaiin kei aiin doctor hian ka nu tâna țha tùr chu a hre daih zâwk dâwn a, a thu anga awm leh rih mai hi a țha a ni ka ti leh ta zâwk a.

Khuma țhua ka nu ke ka hmehsak lai chuan ka nuin," A, Pu Hruaiate ni reng chuan!" a tih ri hria chuan ka inher vat a, Pu Hruaia leh Ahlutei lo nui sâng chu ka hmu zui ta nghâl a. Ka tho vat a, ka sam chu huih țhain ka kawr hâk pawh chu ka pawt mar zui a, ka lan thû viau loh ka beisei.

An va fel unau tak! An țawng bawrh bawrh a, ka nu pawh a khawsik a awm loh avàng chuan a țawng ve bawrh bawrh mai, Pu Hruaia chuan chanchin a hriat lawk loh avàngin ka nu hnênah chuan ngaihdam a díl pah a, a hriat veleh rawn tlãn vatin Ahlutei a rawn sâwm a lo ni. Ei tùr lah chu an rawn keng tam viau mai lehnghâl a, an insêng țeuh ngei ang le. Ahlutei rawn kal ve chu, hun nei lo tak a ni tih ka hre ve reng si a, a làwmawm rual rualin a lakah inthlahrun a na duh khawp mai..

"Hrehawm i tiin i hlauthãwng viau lo maw?" Pu Hruaia'n a tih chuan ka nu leh Ahlutei lam chu ka en vat a, anni pahnih lah chu an lo la titi bawrh bawrh a, chutah, amah chu en chhoin," Dik taka sawi chuan hlauthãwng teh rêng mai. A khawsik kha a reh har bawk sia, damdawi ina ka riah vawi khatna a ni bawk nèn, hlauhthàwnna nèn, zànah pawh ka muhìl thei lo, ka țawngțai reng ringawt mai a ni," ka ti sap sap a, ani chuan," Ka lo hriat har avàngin a pawi ka ti tak zet a ni. I nu ai mahin ka lo ngaihtuah zâwk che a, i hlauhthàwn kha ka ring rêng a ni; mahse, tunah chuan a khawsik a awm tawh lo bawk a, i rilru pawh a zãng huai tawh ang chu," a ti ve leh a, doctor thil sawite chu ka hrilh chuan," Ni e, han ngaihchàn ve rih a duh a nih chu, i ngaih ti țha lo duh suh, in chhuak thei thuai mai ang," a ti leh a, a aw dam tak chuan mi a hnèm ngawih ngawih bîkin ka hria. Mi dang dang pawhin min țawng thlamuanin min hnèm ve tho a; mahse, ani țawng hi chu a danglam tlat, a ngaihțhatthlâk bîk.

An awm rei ve viau, an haw dâwnah a țawngțai thlap a, motor an dahna thleng ka thlah ve bawk. Ei tùr min rawn pêk chu kan bula mite kan sem ve diat diat a, chuti chung pawh chuan kan la nei nual mai. Duhite chu ka duhsak deuh hlek a, khawsak inang khat deuh kan niin ka hria a, kan thil neih apiang hi chu ka pe ve zêl a ni. Keini chu khawpui chhûngah kan awm a, anni phei chuan an sawi dànin Aizawlah hian chhúnglehkhat hnai pawh an nei si lo va, kan chhuah theih hnuah pawh han tlawh ve zauh zauh an ngai ngei ang.

A tûkah pawh chuan Pu Hruaia chu a rawn kal leh a, a hma ang bawkin ei tùr a rawn keng leh țeuh bawk a, ka nuin," Kan ei sèn loh tùr min rawn kensak tawh suh, i insêng nasa dâwn êm mai," a tih chuan ani chuan," Ei tùr țha i ei vat vat loh chuan i chak chhuak har palh ang, ei țeuh țeuh mai rawh," a lo ti thung a. A tûka damdawi in ațanga kan chhuah pawhin a car-in min hruai haw thlap mai a, han hnial viau chî lah a ni meuh si lo, kan tâna a inpêkna leh a insènna chu a lêt tam takin Pathianin malsàwmnain vûr țeuh mai teh se.

Zànah Remi leh a nu an rawn lêng a, Pu Hruaia pawh a rawn lang leh a, in chungte pawh an pa ber a rawn chhuk ve zawk bawk. Tlaiah khân an nu nèn an rawn chhuk tawh a, an ti țha khawp mai. In chung leh in hnuai luaha awm e ti lo hian ka tlawh khât viau mai a, ka hriat loh laia ka nuin a han tlawh ve țhìn a nih loh phei chuan kei chuan ka tlawh mang lo, awm pawh an awm khât. An zin chhuak deuh reng maiin ka hria a, bâkah, an inlár chhuak lo hi a ni tawp mai.

In chungpa chhoh hnu chuan Remi pek chuan Pu Hruaia chu an nu hlui chanchin a zâwt ta pek a nih chu! Ka va melh nasa mai a, ani lah chuan min rawn en duh hauh bawk si lo. Ani erawh chuan țha takin a lo chhâng ve mai a, ka zawh ngam miah loh thil a nia, hrehawm ti rilru tak chuan ka lo ngaihven ve tho, ka hre châk ve tho miau alawm. A sawi dàn chuan Irene-i leh a tlangvâlpa chu chêng dùn zuiin an innei zui nghâl ni àwm tak a ni. Kum 25 mi niin games khelh thiam tak a ni a, hna thawh êm êm pawh a nei lo, games khelh chu a hna a ni mai. 

A hnua thingpui kan siam lai chuan ka'n kamkhat hlak a, ani lah chuan," Eng nge, thil pawi tak pawh ni hlei lo, ho lutuk! I ngaihthlâk ve dâwk dâwk tho kha," a lo ti hluk thung a, a ti dik ve leh viau bawk si, ka ngawi ta daih a. Chutah, Remi chuan min rawn nghawk deuh salh pah hian," A rawn ti țha riau mai, eng emaw a awm a ni lo maw?! Mâkpa interview lam te?" a rawn ti sar sar a, a hmêl ka en chuan a lo nui sûng a.

"Mai mai a che! Thil ni lo lo sawi suh, âwihawm lo lutuk mai! Kha, no dang kha rawn keng phei ang che," tiin thingpui no hnih chu ka keng a, ka kalsan zui ta nghâl a. 

An lêng rei lutuk lo va. Remi leh a nu haw hnu lawkah Pu Hruaia pawh chu haw tumin a ding zui ve zat a," A la hma alawm, âwihawm loh e," ka lo ti vat a, ani chuan," A, mu hma rawh u, damdawi inah rilru nuam leh thlamuang takin in mu thei àwm si lo va, tunah chuan mahni in lumah ngei awmin in mu thei tawh a, tui takin in mu dâwn nia," a lo ti ve thung a. Hàwn a tum tâk tlatah chuan veranda thlengin ka thlah a, a kal mai dâwn emaw ka tih lai chuan a rawn inher a," Anne...?" a tih sup chuan mak tiin ka en vat a, kan inen dùn ta ràn mai.

"Anne, ka nupui ni rawh."

*DÂWT A SAWI NIA I HRIAT CHU ENG MAH SAWI LOVIN A MITAH TAK EN RENG RINGAWT RAWH*