☆KA BEISEINA☆ - 23 By Dingdi Pachuau

☆KA BEISEINA☆ - 23 By Dingdi Pachuau

Ka muhìl thei rêng rêng lo!! A thil sawi khân min țhâwng lutuk a, mak ka tiin âwih harsa ka tih êm avàng leh chhàn mai ngaihna ka hriat loh vàngin chhâng lovin ka en reng ringawt a nih kha. Ani lah khân chhâng lo ta chu," Ka ti hrilhhai che niin ka hria, hun dangah ka rawn zâwt leh zâwk ang che aw, mang țha le," tiin a kal ta daih kha a nia, min țhâwng tê tê a, sawi nawn leh tawh lovin leh a kal leh daih si a, min ti buai ting tang a, ka tân chuan muthilh theih ngaihna a awm lo ve bawk a ni. Min tih der mai mai a nih ka'n ring deuh a; mahse, pastor lai a nia, dâwt sawia min tih der duh êm chu ka'n ring lo leh deuh ngawt a, bâkah, khatiang kha intih derna chî pawh a ni lo hrim hrim, zàn muthilh hunah pawh ka muthilh theih loh phah a nia, a sawi kha ka hre chiang lo em ni zâwk le? Mahse, a sawi ngei sî kha," Ka nupui ni rawh," a ti a nih kha, ka hre chiang viau. A, min ti buai, ka rilru a chàwl thei hlawl lo.

A tûka dàwr nghâk tùra luh pawh chu ka inthlahrung ta deuh tlat a nih chu, Ahlutei hian a nuțapa thil min hrilh kha a hriat rûk ve ka ring tlat a, min melh rúk hrek hrek ka ring tlat a, nuam ka ti thei miah lo. Unau inpawh tak an ni ngeiin a lang si a, Pu Hruaia khân a hrilh lo thei lo, ka chanchin pawh a zâwt nual maithei asin... A va zahthlâk tak! Nuam ka ti lo tak tak a ni, ka chê rêng rêng chu ka lài deuh hû mai a, engtin nge Ahlutei chuan min ngaih ang tih mawlh ka ngaihtuah a, a hnuaia a chhawr mai mai hi a nuțapa nupui ni tùr chuan a duh hauh lo ang le, anni phei chu an sângin Zoram mipui hriat khawpa lãr an ni a... A, thil ni thei leh thil pângngai a ni lo, engah nge ka lo suangtuah chiam chiam ni? Pu Hruaia nèn kan inkârah pawh eng mah a awm loh hi, vawi khat tê mah nula melhin min la melh ngai lo a nia, nupui pasal atâna insàwm te zawng tih namai a ni hleinem, dam chhûng daih tùr asin. Chu vàng tak chuan, a ti tak tak lo, min fiam mai mai a ni. A nupuiin a kalsanna a la rei lo va, a nupui a duhzia lah ka hre chiang ve bawk e.

Zàna Pu Hruaia'n min rawn biak chuan chhàn ka hreh khawp mai a; mahse, 'êm a' ka ti a, țang ru țeuhin ka chhâng a, rawn pehhêl kual chu a tum loh hmêl viau," Anne, tunah hian mipa kawp lai i nei lo tiraw?" a rawn ti nghâl vut mai. A thil min rawn zawh dàn lah chu, min hriat chian hmèl viau! Kan inkàwmin kan inhmu zut tawp si lo va, engtin nge maw a hriat ni?

"I nei lo tih ka hria. Nawr che chu ka duh hauh lo nain i lo inngaihtuah tawh em?" a rawn ti leh a, min rawn hmu thei hauh lo nain ka biang chu ka zah avàngin a sa hat hat mai, a rawn pehhêl mang bawk si lo nèn, han chhàn mai dàn tùr ka haihchham leh tâk hi.

"Anne... min chhâng teh!"

Ka hmui chu ka pet fan fan phawt a, chutah, ka chil lem leh khalhin," Pu Hruai, ka rin loh lutuk zawhnain min țhâwng thut a, a mak êm a ni. I ti tak tak lo tiraw?" ka ti lêt ve thung a, ka zawh tawp mai loh chuan a thil sawi khân min ti buai êm alawm.

"Anne, ka ti fiam mai mai lo asin. Ni e, mak i ti ang, a àwm reng mai. Ka zâwt thut bawk si che a tiraw? Âwih a har a nih pawhin ka hre thiam che. Mahse, ka ti tak tak! Infiamna chî pawh a ni lo bawk a," thu tak tih hriat tak, awki hniam zet hian hian a rawn ti leh dût dût a.

"Engati nge kei kher?!!" ka tih leh chuan ani chuan," Hmeichhe fel tak i ni tih ka hria alawm," a rawn ti leh mai a, min faknaah chuan ka lãwm viau a; mahse, ka la duh tâwk lo, fel min tih vàng ngawta a nupui ni tùra min sâwm teh ngawt kha, a la tâwk zo lo.

"Kei hi chu fel lul--" ka la sawi zawh hma chuan min rawn pawt chatin," I fel tih ka hria a, ka mit ngei pawhin ka hmu tawh bawk. Chu vàng chuan ka nupui ni tùrin ka duh che a ni," a rawn ti leh a, a inzêp miah lo. Min duh vàng pawh ni lovin fel min tih vàngin a nupui ni tùrin min duh tihna a nih chu. Ni e, a duh ber chu a nupui hlui kha a ni tlat; mahse, an inkâr kha, khati kha a ni tawh a, a duh ber mah ni se a tân a lo lét tawh dâwn lo, a duhna rilru hi a paih bo nghâl vut lo bawk ang, ka tân pawh min duh vànga a nupui ni tùra min sàwm kha chu beisei phâk a ni lo rêng rêng.

Nupui pasal inneihna hi chu dam chhûng daih tùr a ni a, innei tùr chuan mi pahnih inkârah induh tawnna leh inngaihzàwnna a awm pawh a ngai ve bawk ang chu. Chutiang awm hauh lova zàn khat thil thua thu tàwp siam nghâl ngawt zawng a fuh ber thei lo; mahse, ka sawi chhuak ngam hauh lo. Ani hi chu a sâng êm a, kei ang tân chuan ani hi hnial theiin min ring kher lo a ni maithei; mahse, dam chhûng daih thil kan sawi a ni a, ngaih dàn leh duh dàn inhriatsaktawn hi a pawimawh lutuk, duh dàn ka neih chuan sawi chhuak ve tùr ka ni alawm.

"Inngaihtuah nân hun i duh rih a nih chuan ka nghâk thei che, ka tur miah lo ang che."

He pa hi, a lo ti tak tak a nih dâwn hi! Engtin nge ka tih tâk ang? Ani pawh hi, min ngaizâwng îk bawk si lo, kan inkârah inngaihzàwnna  emaw induhtawnna emaw tal awm se chuan a la zia thei deuh ang a; mahse, chutiang chu a awm hauh bawk si lo.

Ahlutei hian a hre ve lo a nih ka ring ta, min en dàn a ngai reng a, eng emaw awm àwmin min en tlat lo. Pu Hruaia lunglêng awm ngaihna hre lo hian min neih a duh thu min hrilh ta ringawt a ni thei mai ang em? Nge a nupui kha ka rin ang ni lo deuh hian a lo duh tak tak chiah lo zâwk? Mahse, chu zawng ka âwih lo nasa.

Remi nèn kan inhmuh theih veleh ka hrilh ve ta chawt a, ani mak ti chuan țawng nachâng pawh hre lo chuan min en reng ringawt a! "Engtin nge ka tih dâwn? Ka rilru a ti buai zo vek tawh a nia," tiin a bánah chuan ka va tawk dè dé a, a mit a han khap sak sak a, hmun dang erawh a la en chuang lo.

"Nang meuhin min hrilh chuan i rilru a buai ve tak zet tih ka hre thei mai; mahse, ka hriat thiam tâk loh chu in inkârah eng nge awm chiah tih hi a ni," chîk zeta min en chung chuan a ti a, kei erawh chuan," Eng mah a awm lo," ka lo ti vat thung a. 

"Eng emaw tak chu a awm a ni ang, bâkah, engah nge i rilru i tih buai viau? Nupui atâna a sàwm che chuan a duh che tihna a ni mai a, i rilru lam a pawimawh ta tihna a nih ber chu. Pathlawi mah ni se i vànnei dâwn a nia! A chhe lovin a fel a, a fel bâkah fapa mal niin a la hausa tel zui; mahse, ka rin aiin nupui a duh hma daih mai, a nupui hlui kha a lo duh tak tak lo tihna em maw ni le?" a ti ta duah a. Ani pawhin ka ngaihtuah ang kha a lo ngaihtuah thleng ve tho a lo nih hi.

Ka ngeizia mai chu, chuta țang chuan 'Pastor nupui' ti hlîrin min ko ta pek a nih chu! Ka star kumhlun a ni tih hi hrilh phei ila chuan aw...Min fiamna mah ni se nuam lo ka ti a, mi dangin an lo hre thiam ve ang tih ka hlau thei kher mai. A chimawm thiam ve si a,  a châng chuan ka lo hrilh ta kher kher kha ka inchhîr deuh rum rum a; mahse, ani bâk hrilh ngam ka nei si lo, ka nu hi hrilh ve ta ila engtin nge min lo chhàn ve ang?

Pu Hruaia chuan a khât tâwkin min rawn be reng reng a, a sawi ang takin min rawn tur miah lo, sawi pawh a sawi chhuak ngai hek lo, eng eng emaw mai mai sawiin a ngaihawm tâwk chauhin min bia ka ti mai, lo star rum rût țhìn ka ni bawk si a, min rawn be țhìn chu nuam ka ti telh telh a, min rawn biak loh hlek chuan ka ngai titih țan dèr mai, dik tak chuan kei hi chuan ka phû lo ngawih ngawih a, ka tân a țha lutuk tih pawh ka hria, pasal țha tak a nih ngei pawh ka ring; mahse, 'mahse' tih hi a awm tlat. 

Min rawn biak loh kárin ka nu a be zauh zauh bawk tih ka hria, an thu sawi ka han ngaihthlâk rûk ve deuh châng lah hian ka chanchin lam rêng rêng an sawi ngai miah lo, Pathian thu leh rawngbàwlna lam hlîr an sawi țhìn a ni si a, chu vàng chuan ka rilru a nuam lo leh deuh țhìn, min duh lêm lo hian a nupui thlâktu atân mai min duh a nih ka ring ta rum rum mai. Ahlutei'n a luck viau niin a sawi kha, Pathian rawngbâwltu tân chuan hmingchhiatna hi thil ho têah a ni țhìn si a, ani pawh hian hmingchhiat a hlauh vàngin nupui neih thuai a duh tihna a ni mai lo'ng maw?

Ka rilru a tih buai êm avàng leh eng thu tlûkna pawh lo siam ila ka tih sual ka hlauh ve tho avàng chuan a pawimawh ber ka nu ka hrilh ve ta a, ka hrilh har avàng erawh chuan thuphâ ka chawi thung. Mak a tih viau ka rin nèn, mak ti àwm pawhin a awm hauh lo nia," Bawihte, ngun taka ngaihtuahin Pathian râwn la, țawngțai tam la, a țha ber ang," a lo ti mai a, kei chuan," Nu, ka hre thiam lo a ni. Min ngaizâwngin min duh ni pawhin ka hre lo va, min duh ni se chuan ka hre thiam lutuk ang, hei hian min ti buai lo thei lo. A nupui nèn lah an ințhenna a la rei bawk si lo va, induhtawnna chhe tê tal awm lova inneih ngawt chu thil dik a ni thei dâwn em ni?" ka ti ve thung a.

Bawiha'n a lo hriat ve chuan," U, i duh a nih phawt chuan nei rawh, a sual miah lo ang," a ti ve thung a, ka nu chuan," Mi sual chu a ni hauh lo mai, a fel lutuk," a lo ti ve a. Ka rilru hi chuan 'ani meuhin a nupui atân min sâwm a nih chuan ka tân chuan ani tluk hi an awm lo ang' ka ti a; mahse, lehlam zâwnga ngaihtuah chuan min duh thu vawi khat tê pawh a la sawi lo va, ka tân rem thu han sawi ngawt pawh a risky viauin ka hre deuh bawk a, bâkah, a nupui hlui nèn an ințhenna a la rei lo êm êm bawk si, ka rilru a ti buai lo thei lo a ni e.

Remi pawhin kan inhmuh leh veleh chuan," Inngaihtuah nân hun a pe che a, a sawi chhuah leh veleh i rem tih thu hrilh ang che. Ka ngaihtuah ka ngaihtuah hian nei tùrin ka duh tlat che a ni, han nei mah teh, i inchhîr hauhin ka ring lo," thu tak zet hian a ti ve leh a,  ani ka țhiannu ber leh ka chhûngte chuan an hnial lo tih ka hre chiang ta viau mai; mahse, keimah ber hi ka la chiang zân thei lo a nih hi.

Mapuia pawhin min la rawn be ve reng a, a châng chuan Pu Hruaia min rawn hun angah hian min rawn be ve zauh bawk a, ani hi chuan eng mah a sawi lo hrim hrim. Țhian țha biakin kan la inbe char char; mahse, a țha ka ti zâwk, ka buai lohna tùrah ka buai palh ang.

Ni khat chu dàwr lama kan buai deuh avàngin zanriah ei kham veleh khumah ka bawk mai mai a, ka lo chhîng sek a ni ngei ang chu, ka phone rîin min ti harh a, phak zet hian ka chhâng a, a rawn nui hawk mai.

"I mu tawh elo?" Nuihzat hmêl taka a rawn tih chuan," Ka lo chhîng sek a nih àwm hi," ka ti ve mai a, ka hàm zui leh bài bái a, ani chuan," I chau deuh a ni maw? Vawiin lamah in buai deuh a ni tih ka hre mai. Mu hma rawh khai, vawiinah ka la rawn be si lo che a, i aw dam zet hriat duh hrim hrim vàng leh ka biak loh che chuan kim lo tlata ka inhriat vàngin ka rawn bia che a nih hi," a rawn ti leh a, hei hi nulát tlangvàl lam hawi deuha min rawn biakna hmasa ber a ni. A nupui ni tùra min sàwm ațang khân thla khat chuang zet a liam tawh a, khami chhûnga kan inbiaknaah khân inlèmna țawngkam hi a hmang ngai lo hrim hrim a ni.

"Ka mut pawh a chhuak leh tawh lo," chu ka ti ve a, ka ti tak tak deuh tho nain nuam ka ti chiah lo. Ani chuan," Chuti, ka rawn ti harh ta sa sa che a, ka be leh lawk ang che aw. Ka thil sawi kha... i lo ngaihtuah tawh em? Ka nawr angah che lo ngai lo la, hei thla khat leh ni 12 lai a lo liam ta a," a rawn ti leh a.

Tûn hun hi sawi chhuah hun dik tak a ni, ka sawi chhuah hmasak pawh a ni lo va, ka insûm lo ang, sawi chhuak pawp ang.

"Um.. ka sawi ang. Chumi hma chuan ka zah êm êm che tih hre phawt la ka duh a; mahse, chutih rual chuan ka lo ngaihtuah ve a, mi pahnih an inneih dâwn hi chuan an inkârah induhtawnna emaw inngaihzàwnna emaw a awm țhìn, a dik tiraw? Mahse, chutiang chu kan inkârah a awm si lo va," ka ti chhuak ve ta phawng a, hei hi min ti buaitu kha a ni tlat si a ni.

A ngawih deuh vang vang hnu chuan," Ka thiam loh a ni, min ngaidam rawh," a rawn ti sup a, kei chuan," Chutiang lamin ka sawi lo a nia. Kei chu heti mai hi--," ka sawi zo hman leh lo," Anne, duh lo che ni ila ka nupui ni tùrin ka sâwm dâwn che em ni? Ka sawi chhuah kher loh pawhin i bula ka awm dàn ațang khân i hriat daih tawh ka ring a," a rawn ti leh a.

"Min duh... maw?!!" ka ti ban deuh chat a, ani lah chuan," Anne, ka nupui chu ni rawh aw, ka nupui i nih chuan inchhîrin ka siam ngai hauh lo ang che," a rawn ti leh mawlh mawlh a, ani meuh kâ ațanga chutiang thu chhuak ta chu mak ka ti a, làwmawm ka tiin ka âwih lo lek lek hial mai, ka thil zawh leh a thil sawi chu inchhâng lo viau mah se a thil sawi chuan min ti zãng hawk thung.

*******

Pu Hruaia

~~~~~~

Heti tak maia ka vei leh ka duh ta ngawih ngawih mai hi kei pawhin mak ka ti hial a ni! Ka duh dàn hi chuan awm thei ila ka pan ruak ruak ngei ang le; mahse, chu chu thil theih a nih loh bâkah mawi pawh a mawi lo, "Ka nawr lo ang che," kha ka ti zet a; mahse, ka sawi chhuah loh chuan a sawi chhuak dâwn lo tih ka hre chiang a, nupuia sâwmtu ka ni bawk a, sawi chhuak hmasatu ka ni lo thei lo a ni. Ka belh chian telh telh hian nupui țha tak tùr leh pastor nupui ni àwm ngawih ngawih hian ka hmu tlat a, a nungchang dam raih leh a chezia nu zâm mai hian min hîp nghet telh telh bawk a, chu vàng tak chuan eng ang pawhin min lo ngai mah se ka tlai hma ngeia țan ka lâk a ngai tih ka hria, ka ûm zui ta chat rêng a ni.

Hmeichhiain min phatsan a, ka ngaihtuah leh theih pawh ka inrin loh laiin ani hi ka tawng a, ka tâna Pathian ruat a ni ang em ka ti hial, ka vei ta tlut erawh Setana thlèmna a nih ka ring mah zâwk. Engtin nge min chhàn ang tih mawlh mai chuan ka ngaihtuahna a luah a, a thil rawn sawi chuan min ti harh chhuak zawk mai. Ka duh leh ka vei thu chiang takin ka la hrilh hauh lo a ni tih chu a tân ka tlai luat ka hlauh lutuk vàngin ka lo la hrilh miah lo a ni, a tân chhàn ka har dàn tùrzia chu, ka rilru hmu tlang sa vek angin ka hria em maw ni teh rêng ni, ka khawngaih reuh zâwk! 

Ka hmuh leh phawt a ngai a ni, heti ringawt chu a fuh lo, dinhmun khirh takah ka dah reng asin. Ràlkhat ațanga dam chhûng daih thil indàwr chu a fuh lo hrim hrim, ka hmuh thuai a ngai, ka tlai hma hian. Zànah kha chuan kan sawi tawh chiang mai a; mahse, hmuh ngei ka duh, a hmél ngei hmuh ka duh, ka ngai tawh a, ani pawhin min lo ngai tawh ngei ang.

Chhuanlam remchâng ka dap a, dap dap na nâ nâ chuan kár tàwp lamah ka hmu ta mai rêng a, phûr takin ka insiam a, Aizâwl ka pan leh ta vang vang a. Ka phûr tak zet a, tleirãwl ngaihzâwng nei thar hlawt ang maiin ka helhhawlh bawk, tuna ka awm dàn hi ka kum nèn hi chuan a inhmeh tawh lo asin le. 

Zanriah ei laiin Ahlutei'n," Eng maw i rawn tih dâwn a?" tia min zawh chuan," Ka bialnu ka rawn rîm dâwn maw le," tiin ka chhâng a, ka pa a lo nui huk a. Ahlutei chuan mitko sàn ãk chung hian," Uai!! Tak tak pawh va ni suh! Kei aia neih har chu i hlau hle mai maw?!!" a lo ti leh hlak a, kei chuan," Nang aia hmain ka nei dâwn maw le," ka ti leh a, ka nu chuan," In ninawm mai mai mang e! Dâwt hian infiam infiam suh u, chaw ei lai lehnghâlin," a lo ti hluk a, ka pa ve thung chuan," Tu mawng ben pawh a châkawm tawh alawm, han țang tak tak teh u," nui tawh hauh lo hian a lo ti ve thung a.

Ka chhuah dâwn chuan Ahlutei chuan," Khawiah nge maw i lèn dâwn tak tak ni?" min en deuh hâ pah chuan a ti a," Ka bialnu ka rîm dâwn maw le," tia ka chhàn chuan," Pawimawhah bâk va chhuak suh, nula rìm te chu khawi lam, nang aiin ka nei hmasa dâwn tih hi pawm thlap mai rawh," a ti leh barh barh a, kei lah chuan," Kan hria ang chu," ti chauhin ka chhâng a, in ațang chuan ka chhuak zui ta nghâl a.

Boruak a dai nuam a, mi țhenkhat chuan a dai mah mah an ti maithei a ni. Anne-i chu ka be lâwk hauh lo a, Aizâwlah ka awm tih pawh a hre kher lo ang, zanin hian engkim sawi felpui ka duh, a zawng zawngin.

Hla zirin a lo chhuak daih niin, tum loh deuhin a nu nèn zâwk chuan kan inkàwm ta reng a, a fel dànah hian fanu nei fel àwm rêng a ni. Nu ka hriat tawhah chuan a la fel ber àwm mang e aw ka ti hial țhìn nghe nghe, min hringtu nèn ka han khaikhin a, duh lo teh mah ila ka nu hi chuan a tluk lo mang e tih châng ka ngah a ni. A bula titi hi a nuam a, Pathian rawngbàwlna lam ni se a tui bawk si, a thu lam ni se a zàwm țha tih a chezia ațangin a hriat êm êm bawk si, a fate tân chuan innghahna tlâk nu dik tak chu a ni chiang alawm.

Ka lèn chhan ber a lo haw har deuh avàng chuan nakzàn lama lèn leh mai ka rilrûk a, ka lo be pawp hmasa lo chu a rûkin ka inchhîr ta viau mai, hmuh ka châk asin le.

Ka haw tùr car-a ka lût deuh chiah tihah chuan a rawn haw ve ta chiah a. Amah chauhin a la ni zui, he laiah tak hi chuan mi veivâk an awm lêm lo va, dàwr pawh a inkhãr vek tawh ang, a hla zirpuite'n an rawn thlah lo em maw ni, tûn ang zàn rei lam tawhah mahni chauh lehnghâlin... rawn thlah tùr an ni asin, ani ang hmeichhe âwmnêm chu thlahthlam tùr a ni hleinem.

Min pèl tùr chu ring lo tê hian ka lo ko vat a, a ding ve chawt mai. An ina ka zui luh leh chuan a fuh chiah lo ang, mawi pawh a mawi lo, a nu nèn kan inmang țha nasat tawh kha.

"Pu Hruaia ni rengin, i lo kal a ni maw?" tiin hawihhâwm tak chuan min bia a, kei erawh chuan," Tu mahin an rawn thlah haw na che nge?" ka lo ti ve thung a, ka lungawi chiah lohna erawh ka thup hrâm hrâm a, ani erawh chuan," Remite'n min rawn thlah a," a ti leh mai a, anni chu ka hmu hauh lo; mahse, an rawn thlah chuan a țha a nih chu. 

Pâwnlèra ka ti ding reng chu ka inthiam lo deuh a, car chhûnga țhu lût lawk tùra ka sàwm chuan," A tlai tawh êm mai," a ti ta reuh a, a ding ngal mai. He nú tê hi, a va danglam reuh tak! Ngam taka duh duh dàna tih theih a ni hauh lo ang le.

"Rei lo tê chauh a ni ang," ka tih pawh chuan rawn țhut luh chu a hreh hmèl reuh khawp mai a," Rei lo tê chauh tak tak a ni ang," ka tih leh hnuah erawh chuan bet zân lo tih hriat tak hian a rawn țhu lût ve ta a. A țhu ngîl auh mai a, a kut vawnsak pawh duh viau mah ila ka ngam lo, ka ti hlau ang tih ka hlau.

"Innei tawh ang. Palai ka rawn tîr tawh mai dâwn aw," ka tih chuan phâwk zet hian min rawn en a," Pu Hruai, i va hmanhmawh ve! Hun hi han liam leh hret phawt se i ti lo em ni?" a ti chhuak sap a, zahah la duh bîk lo chuan," Ka tlai chhiat ka hlau alawm," ka lo ti ve thung a. A la upa lo tih chu ka hria; mahse, nghah ka duh chuang lo, nghah ai chuan neih thuai ka duh zâwk. Neih thuai ka duh a ni tawp mai, ka hmanhmawh viau chhan pawh ka hre chuang lo, Ahlutei nèn 'tu nei hmasa sa' kan tih vàng kha chu a ni kher lo tih ka hria, nei ta thuai ila a sawi ang hian miin min dem maithei; mahse, ka pawisa chuang lo. Ka duh thu ka hrilh tawh a, ani hi chuan min duh thu a la sawi ve miah lo; mahse, pawi ka ti chuang lo, min haw lo tih ka hria a, ka duhnain ka hneh ngei ang tih ka ring bur a ni. Palai han tirh thâwr mai pawh ka ngaihtuah rum rum tawh a; mahse, amah râwn hauh lova han tirh tawp mai kha chu thil tih àwm a ni mang meuh bîk si lo va.

"I hmanhmawh viau chuan miin an sawi duh mai ang che," a ti leh sep a, kei chuan," Mi sawi engah mah ka ngai lo, nang ber ka bula i awm tawh chuan," ka lo ti ve thung a, ka ti tak tak rêng a ni. Ka pa sawi vàng kha ni kher lovin mi sawi dàwn leh lutuk pawh hi thil țha a ni lêm lo, mi rilru leh hmui kan va thunun thei lo va, an duh chu an sawi mai ang, mi ngaih dàn ngaihchàn leh lutuk pawh hi hun khawh ralna mai a ni.

"Pu Hruai, ka sawi tawh kha--" a lam hawi vat pah chuan," Min 'pu' kher lo la?" ka lo ti vut a, ani chuan inthiam loh hmêl deuh hlek hian," A, ka tih țhan tawh a nia, ka thlâk nghâl thut thei kher lo ang," a ti niah niah a, kei chuan," Min ko min ko la, i thiam mai ang. Tunah pawh hian min han ko chhin la?" ka ti a, ani chu a lo nui sak a.

A nui hmêl chu a rawn thu tak tial tial a, min en ràn chung hian," U Hruai... miin an sawi chhiat che ka duh tawh lo a ni, ka rem ti thei lo, khatiang dinhmun kha chu pal tlang leh tawh lo la ka duh tak zet bawk. A râpthlâk êm mai. Chu vàng chuan min neih i duh phawt chuan nghâk leh hret la ka ti a ni, ka hnial dâwn che tihna lam a ni lo a nia, hun hi han ral deuh se ka ti mai a ni e. Chuan..." tiin a ngawi deuh dat a, min en tawh lo chuan," Inngaizâwng ve phawt ila?" a rawn ti leh sap a, ka en reng ringawt. A țawng chhúng zawng chuan ka mit pawh ka khap phal lo, a hmêl leh a țawngkam dam dap leh a thil sawi khân min hneh tak zet, he nu tê hi a tê hauh lo, a naupan anga teh chi lah a ni miah lo bawk. A țawngkam tin mai khân min hneh êm êm vek mai a ni. Ka hmâ ngaiin min ngaihtuah a ni tih hriat tluka thil hriat nuam chu zaninah hi chuan a awm thei tawh lo ang. A thil sawi tàwp ber erawh chuan ka nuih a ti za deuh a, a sawi dik thlap bawk si. A țawngkam tin hian min țhâwng dawt dawt a, min ti harh kâwk kâwk a ni ber. A sawi dik thlap, a kum level ka lo ngaihtuah lo va, ka kum chauh ka lo ngaihtuah vàng a ni, mahni hma ka sialna chuan min tih zah lek lek rualin a duh min hriattîr si a, mipa vànnei tàwpkhâwk tùr chu ka ni dâwn chiang e.

'Rei lo tê chauh' ka tih vàng khân ka chelh rei duh lo va, bâkah, a nute pawhin an lo ngaihtuah tawh ngei ang. A chhuah dâwn chuan a kut chu ka en vang vang ringawt a, rei lo tê chhûng chauh tal pawh vawnsak ka châk alawm; mahse, ka tih thlabàr ka hlau a, ka vawnsak ngam lo a ni, ka duh dàn ang chuan awm ila chuan tlaivár țhak pawhin ka vawnsak duh hial ang! A kut vawnsak mai duh tâwk lovin, fawh hial pawh ka duh ngei ang.

*PHUBÂ LÂK LAM RÊNG RÊNG NGAIHSAK I NGAIH TAWH HAUH LOHNA HMUNA NANGMAH NGEI I INDAH THEIH CHUAN, CHU TLUKA PHUBA LÂK DÀN ȚHA CHU A AWM LO*