☆KA BEISEINA☆ - 24 By Dingdi Pachuau

☆KA BEISEINA☆ - 24 By Dingdi Pachuau

A tûk chhùnah chuan dàwrah a rawn kal niin, a rawn kal ka ring pha lo hrim hrim a, chu vàng chuan ka lo ngaihven lo va, ka hmu lawk lo nghe nghe a. Ka va hmuh ve meuh chuan min lo en reng tawh niin, a lo nui suk nghe nghe, ka han lài êm êm khawp mai a; mahse, nuih lêt ve zauhin hmun dang ka hawi zui ta daih a, ka biang a sa hat hat mai. Ahlutei saw kan chanchin hi a hrilh tawh ang em? Hrilh rih lo se ka ti, a zahthlâk dâwn êm mai, min en dàn a dan vaih phei chuan...

Thuamhnaw khài dul kár ațangin ka melh phei ru leh zauh a, tuna a inthuamna ang saw a inhmeh tak zet a ni. Coat suit nèn smart taka a induan zaih khân a mawiin hmuh a nuam a, a lang zahawm viau bawk; mahse, tuna a inthuam dàn saw ka duh chi, ka ngaina, a lang zahawm khur lo va, inchei deuh angin a lang lo bawk a, a tân pawh chêtpui a nuam ang. A hmêl lah saw, a țha pà ve thlâwt bawk. Ka star tirh tê ațang khân vawi khat tê mah chhia ka la ti ngai lo va, ràlkhat ațanga thlìr kha ka theih tâwk leh chan tâwk a nih vàngin lungawi takin, duh takin ka thlír vawng vawng țhìn a nih kha, tunah chuan ka bul hnaiah, ka duh tâwka ka thlìr theih tùrin a awm ta a, nakinah phei chuan a hmêl țha tak pawh saw ka la chùlsak hial ang, ka thil ngaihtuah avàng chuan ka nui sak a.

"Ka nui ve duh!" 

Ka phu deuh zawk a, ka en hau nghâl bawk! Min rawn en ve reng a; mahse, min rawn din hnaih vak lo thung. Ka hawi kual a, kan țawng tu mahin an hre pha lo ang tih ka hriat chian hnu chuan nuih sakin," Eng nge i duh a, ka pu?" tiin ka be nghâl a. 

"Nula chhe lo deuh ka rawn zawng a, i ni mial lo maw?" Laih loh ka tum viau nain ka lài lutuk ringawt. Ka biang sa hat hat tuai pah chuan," Ni mial lo tlat, i rawn zawnna hmun hi a dik lo a ni ang," ka ti lêt ve ta tho a, ani lah chuan," Ka chhia leh țha hriatna thiangin he lama min rawn hruai tlat dànah hian a dik ngei ngei ang, nula hmêl țha tak leh fel tak ka rawn hmu zui bawk che a," a ti zui leh a, ka nui ta ringawt. Sawi tùr a haihchham si lo va, kei lah ka dang titih dèr tawh si, chhâng zui zêl tawh lo mai teh ang.

Min dàwr tùr chiauau an ngaih avàng chuan ka ngaihsak hman ta lo va; mahse, ka mitsìr ru pah tho. A phone la chhuakin a chhâng a, kan bul hnai takah awm chiah lo mah se a țawng thãwm chu ka hre thei a, a sawi tak erawh ka hre thei lo thung. Betu neuh neuh hi chu a nei deuh rengin ka ring, amah mi pawimawh tak a ni si a, ka tân hun insiam viau pawh a har dâwn a, ka hriat thiam a ngai viau ngei ang le.

A hnu deuha min rawn dàwrtute zîngah chuan Joshua ang ve deuh ka hmu tlat mai, ka han en nawn leh ngat a, an pian a lo inang viau a, an hmêl erawh a inang fahran lo thung. He pa hi chu a la naupan hmèl zual a, a hmêl pawh a țha lo zâwk. A sàn dàn leh a kekawr hâk dànah chuan Joshua ka hre chhuak zawr zawr lo thei lo, ka ngaihtuah zui phah nghe nghe.

Tuna ka awm dàn hi min lawmpui ve ang em? Hlim tùrin min duh a nih kha, tunah hian hlimna kawng ka zawh chho țan leh mêk a, min lawmpui ve ngei ang, ka hlim a duh alawm; mahse, amah ka ngaihtuah chhuak khât ta viau chu inthiam lohna chin ka nei ve thung a, ka hlim a nih pawhin ani kha ka theihnghilh tùr a ni lo, hmangaihna kawng min kawh hmuhtu a nih kha.

Zàna U Hruaia a rawn lèn chuan ka nu chuan a lo chiauau vat a, anni pahnih hi chu an inkàwm ngeih ve tlat. Bawiha erawh a lêng chhuak tawh a, a țhiante inah eng emaw tih lawk tùr neiin a insawi a ni. An țawng hlut hnu rei vak loah ka nu chuan chance min pêk a tum ve nge ni dâwn," Zanin chu ka'n mu hma teh ang, vawiin lamah kein ka kal thui deuh a, ka chau deuh tlat," a ti a, a tho zui nghâl a. U Hruaia chuan," A ni maw? A va zia lo ve aw,  kea kal hi țha viau mah se kal vak hi chu a chauhthlâk ve duh asin, kum upat tawh lamah phei chuan," a lo ti ve a.

Ka nu pindan lama a kal hnu chuan," Min hmu zut mai si a, min lo ning lo mai a ni ang chu, hun remchâng ka neih ve laia ka rawn lan zut mai loh chuan," a han ti sar sar a, kei chuan," Eng tikah nge i hàwn dâwn?" tiin ka lo zâwt vat a," Naktûk khian a ni mai ang chu Pathian zâra dam chuan," a tih chuan," Engati nge, Pathiannî i chàm thlen ka lo ring a," ka lo ti vat a.

"Pathiannî khian nau hlan tùr an awm a, ka haw ngei ngei a ngai a ni," a tih leh chuan ka en phei a, ani pawh chuan min lo en ve reng tho. Inhmachhawna țhu kan ni a, kan inhlat lo va, kan inhmu chiang viau bawk. Chutah, hma lama rawn ãwn hnaiin," Ka ngai ngawt ang che," a ti sup a, ka kut lam chu en thlain," I kut hi ka vuan thei ang em?" a ti leh sup a.

Min dìl kher a ngaih loh tehlul nèn, a duh chuan a vuan thei reng si a ka ti rilru neuh neuh a. Țawngkaa chhâng lo chuan ka kut chu a vawn theih tùr chuan ka phar chhuak a, vuan ta mai lo chuan ka bul hnaiah chuan a rawn insawn phawt a, chutah, ka kut chu a rawn vuan ta chat a. A kut lian leh nêm thup, lum ham ham deh chu a nuam kher asin, hna thawk ngai lo kut tih a hriat ngawih ngawih bawk.

"Hetia i kut vawnsak che hi ka châk a; mahse, ka tih hlauh che ka hlau tel bawk si, ka insûm țàng țáng a ni," tiin ka kut chu a chûl hoh hoh phawt a, ka kut a lian lêm lo bawk a, a hnu deuha a hùm chuan a hûm bo deuh vek thei hial mai.

"Kut vawn mai mai chu ka hlau bîk hleinem," nui chunga ka tih chuan a hûm nghet sawt a," Chuti, ka vuan reng dâwn che aw, nakzànah chuan ka vawnsak thei dâwn tawh si lo che a," a lo ti leh sup a, ka chhâng lo. Rei lo tê kan inhmu a, a haw leh daih dâwn a, ka ngai roh ngawt ang. 

A lêng ve reng a, kan țawng vak lo, ka kut a vuan a, kan inen a, ka nuih leh ringawt țhìn. Ka zak deuh hlek a, ka lài ru viau bawk. Kan ințhut hnaih ve tho bawk si nèn, a rimtui hman chuan min zèm chem chem ni berin ka hria. Bawiha lo haw hnuah erawh chuan," A tlai tawh i ti em? Ka haw ve tawh mai ang aw," a ti sup a, kei erawh chuan," A la hma alawm," ka ti ve thung a, min en vang vang pah chuan," I chau palh ang, zàn ka men hrep che chuan naktûkah i tho thei lo palh rêu rêu ang e," a ti leh a, nui sukin a ding zui ta nghâl a, ka kut a la chelh tlat avàng chuan ka ding lo thei bîk lo.

"I tih tlat chuan le, nang pawh i mu thuai dâwn nia, naktûkah i haw dâwn si a, i chau palh ang," ka ti ve a, a kal mai dâwn emaw ka tih lai chuan ka lam rawn hawiin a kut dinglam chuan ka biang dinglam chu a rawn dawm a," Ka ngai ngawt ang che, min ngai ve tho ang tiraw?" a ti leh sup a.

"Umm... ngai ang."

"Ngai viau ang ti tal la?" a rawn tih leh chuan," Ka ngai viau ang che," ka ti ve leh mai a, a mitah tak pawh en ngam lo chuan a khabe hmul țo ve hlek chu ka en daih a. A inhmeh viau asin, nakinah chuan hei pawh hi ka la khawihsak ngei ngei ang, tuaisak neuh neuh ka châk tlat.

"Ka fâwp dâwn che aw?" a tih leh chuan ka va han lài tak! Chhàn pawh ka chhâng ngam tawh lo, ka biang chu a sa hut hut mai a, ka sen nasa ngawt ang chu! Inngaizâwngte inkâra thil thleng tùr leh thil tih tùr chu ni mah se ani meuhin min han fâwp tùr chu...

"Min en phawt la? Min en hian nuam ka ti veng veng țhìn a ni."

Ka en chho leh ta a, a kut veilamin ka biang chu a rawn dawm ve leh a, chutah, tlêmin min kuai dâk deuh a, min en chhuk reng chung chuan a rawn kûn hniam ta riai riai a, min rawn fawh hma chiah chuan ka lo maimichhîng daih.

A haw hnu chuan ka rin loh deuhin ka ngai viau tak tak a!!! Ni tin min rawn be tho a, zînga min rawn biak châng pawhin zàn lamah min rawn be leh tho a nia; mahse, ka ngai tho. Rei tak tak erawh kan inbe ngai lo va, hei vàng hi a ni maithei, ka ngaih viau chhan hi.

Zanriah kîl laiin ka nuin kan unau chuan min zilhin thu țha min hrilh malh malh a, keimah chu min hrilh deuh bîk ka ti mai, a chhan chu U Hruaia'n min neih a duh thu kha ka hrilh miau si a, Pathian zârah pasal ka lo nei ve thei ngai a nih pawha awm dàn tùr, ka pasala chhûngte bul leh an ina awm dàn tùr chu min hrilh a ni ber. 

"Mahse, ani chu a vànnei alawm, a pasal tùr pastor a nia, a bulah a awm ve zêl ang chu. Aizâwla an inah hi chuan an awm khât ngawt ang," Bawiha chuan a lo ti khut a, ka nu chuan," Ni tho e; mahse, awm chin chu an nei ve dâwn tho alawm. Kan kawppui chhûngte hi an sual ngawt bîk lo tih hriat tùr a ni a, mi sawi leh benga kan hriat zawng zawng hi a dik ngei a ni tih kan hriat chian loh chuan âwih ngawt loh tùr a ni.  Țhat leh țhat a inlàwm chuan nunho hi a nuam țhìn a, mi sual nia an sawi pawh hi țhatnaa dàwr tlat chuan an sual rei thei hauh lo a nia. In hma lam hun atân, tuna kei min hmangaih ang hian in kawppuite nu leh pa leh chhûngte hmangaih in tum tùr a ni, tunah chuan kawppui in la nei lo; mahse, mi ang sa ang in niha in hmu zo a nih phawt chuan in la nei ngei ang, ka thil sawi hi in vawng reng dâwn nia. Kei hian eng thil dang mah pêk tùr che u ka nei lo, mite ang pawhin thil țha leh mawiin ka thuam thei lo che u; mahse, thu țha ka hrilh che u hi chu vawng reng ula ka duh a ni, sum tam takin a lei theih loh leh a pêk theih loh a ni a, thinlunga țhatna lo chhuak hi a hlû a, a mawi bawk. Mihring hi zawng, a enkawltu leh a chãwmtu azir hian a țhain a țha lo mai țhìn a ni," a ti leh malh malh a.

Biak ina inkhâwm tùra kan luh dâwn chuan Remi chuan," Hmuh che ka duh lutuk ringawt!" a rawn ti teh ngawt a, hei kan inhmu reng sia!  Engtia min hmuh nge maw a duh ni? "Hei min hmuh reng hi," ka tih chuan," Hmm... Pastor nupui nih dâwn vànga khatia min chhàn kher!" a ti hlak zui a, a lût zui nghâl daih a, ka melh zui reng a, inbiak zui zêl theih ni tawh hek lo le, ka lût ve nghâl a.

Inkhàwm bànah chuan," Ka rilru hi a hrehawm tawp a ni mai, nizàna kan inbiak laiin hmeichhe pakhat hian a rawn ko làwng láwng a,' Nunpui, no khat leh chiah aw' a rawn ti a, zu a in a nih ringin ka zâwt nghâl a, a lo ni chiah bawk a. A țhiante birthday party-ah a kal a, hetiangah hi chuan a kal zauh zauh a, thîkthu ti chhe viau duh lovin ka hre thiam ve mai zêl bawk, birthday party-ah hi chuan ham strict-sak viau ka tum hran lo ; mahse, nizàn kha chu ka thin a ti rim tlat, hmeichhia khân a hming ngeiin a rawn ko a, chutah, kan inbia tih hre reng chungin,' Lâm ang, Duat, chuti khati' tiin ka hriat theih ngei tùrin a rawn țawng deuh kher zêl a nih chu. Ka thin a rim a, ka phone ka off hmak a nih kha, vawiin lamah pawh min la rawn be lo, a thin a rim zâwk zawmah em maw ni," a ti nghâl bawrh bawrh a. Ani thinrim rilru hah leh ka rilru hah hi chu kan inang lo ve viau, ani hi chu a țawng bawrh bawrh thei a, keiin ka lo ngaihthlâksak kiau thung a.

"A rawn fiam ve che a niang," ka lo tih chuan," Fiam lo ang, a hma pawhin kan buai phah tawh, ka hrilh lo che a, i hre lo a nih kha. Lalkâwnga hi a ngaizawng ka ti mai, ani lah chuan 'Mizo kan tam vak lo va, Mizopui ni ta chu min ngaina der ve a' a ti mai a, chumi țum pawh chuan birthday party-ah bawk a nia kan buai ni. A phone kha a rawn chhànsak a, phone neitupa ka biak duh thu ka hrilh khân 'Hon, an be duh che' a ti kher pek a, kha nu ngei kha nizàna mi pawh kha a ni tih ka hria, engtin nge maw ka tih dâwn ni? Hmeichhia vànga buai hi ka peih lo, ka țhen vang vang mai dâwn em ni?" a ti leh barh barh a.

"A, thinrim laia thu tlûkna siam hi chu a fuh ber lo a nia. Lalkâwnga chu ka lo be chhin dâwn em ni ang? Ka lo zâwt chiang ve ang a?" ka tih chuan ani chuan," A ngai lo, ka zâwt chiang dâwn lo. Ka thin a rim tih a hria a, a hma pawha kan buaina a ni tawh a, a duh leh kawp vang vang rawh se. Min rawn biak loh chuan ka be dâwn hauh lo, thinrimna chhan tùr pawh a nei lo hrim hrim, keimah hi thinrim tùr dik tak chu ka ni, a rim rêng bawk a," a ti leh a.

"Mahse, chutiang ringawt chu a fuh nâng. In induhtawn viau kha, kárah eng eng emaw hi chu a thleng ve fo ngai a nia, nakina inchhìr ai chuan tuna chiang taka inbiak hi a țha, i zia hunah a rawn biak loh che pawhin i be dâwn nia, keimah anga awm ve tùr kha chuan ka duh lo che a nia," tiin a dam thei ang ber chuan ka sawi ve thung a, kawnga kalin kan țawng char char a nih ber chu.

"Um.. tunah rih hi chuan ka be dâwn lo a ni tawp mai, min rawn bia a nih pawhin ka chhâng kher lo ang, ka thin a rim rih êm mai a, ka be châk hlawl lo a ni," a ti leh a, ka hre thiam reng mai. Lalkâwnga pawh chu a ti ang lo ve rêng rêng ka ti, a hma pawha an buaina a lo nih tawh phei chuan Remi hriat laia chu nu biak theih pawha awm loh ve mai tùr a nia, phone ațangin a țawng a hriattîr leh kher bawk a, ràlkhat ațang chuan inrinhlelhna a na duh zual a, rilru a hah hma a, a hrehawm duh tehlul nèn.

"Zû a in țhìn tih ka lo hre miah lo," ka ti sap a, ani chu a lo thawk hak phawt a, chutah," In ngai lo ve, ka zâwt chîk nasa țhìn alawm kei pawhin. A sawi dàn chuan a țhiante birthday party-ah pawh hian beer bâk a in ngai lo, in lo bîka a awm kha an ngai thiam lo țhìn ni àwm tak a ni. Beer ațangin zu pângngaiah a kai chho ta a ni ang, ka hrilh ve nasa a, hetiang nikhuaa a kal châng tih lohah chuan a in ngai bîk loh thu pawh a sawi nghe nghe, âwih tùr nge âwih loh tùr pawh ka hre thiam tawh lo," a ti leh malh malh a.

A rilru a hrehawm ve reuh sia, ka khawngaih reuh mang e. Ina ka haw hnu chuan Lalkâwnga chu biak ka tum deuh thut thut a; mahse, Remi khân a phal meuh si lo va, ka țhulh leh ta rih a; mahse, mut dâwn hnaihah amah Lalkâwnga zâwk chuan min rawn be ta a, Remi a biak tlang theih loh thu a rawn sawi hmasa ber nghe nghe. Thil awmzia ka zâwt phawt a, ani pawh chuan min hrilh ve mai bawk a, beer a in thu pawh a zêp hran lo. Rei fê kan inbia a, U Hruaia pawhin min rawn biak a tum tih ka hria; mahse, anni pahnih buaina hi chin felpui phawt ka duh si a, ani chu nakinah ka be mai ang.

Mahse, Lalkâwnga nèn kan inbe zo chiah tihah chuan min rawn phone leh chiah a," Kan inang lo ngei mai, kan in-luck hleih teh mang e," a rawn ti nghâl a, fiamthu lovin thil awm dàn chu ka hrilh ve nghâl zat a, ani pawh chuan," A nih tak chu, i buaipui a ngai ve bawk a nih tak chu. Hetiang hunah hian țhiante an pawimawh țhìn rêng a ni," a rawn ti ve luam a, chutah," I aw hriat ka duh vàng hrim hrimin ka rawn bia che a nih hi, i ngaihawm hnûp hnûp bawk sia, min ngai ve tho... tiraw?" a rawn ti leh a.

"Ngai e, min ngaih aia lêt hnihin ka ngai ang che," tia ka chhan chuan a rawn nui hawk a," A khaih, i uar mah mah a nih ka ring, ka ngaihzia che hi chu țawngkaa sawi fiah thiam chi pawh a ni lo. Hmu che ila a fiah ber ang. Vawiina ka hun hmanna lamah pawh ka lo ngaihtuah leh vung vung țhìn che a, mi min biakna pawh ka hrechang lo lek lek hial a ni, ka chhâwt hnan dâwn che a nih hi," a rawn ti leh a, ka nuih a zat rualin ka khawngaih hnûp hnûp roh mang e, min ngai ve tak tak a nih pawh ka ringhlel lo, kei pawhin ka ngai alawm.

Thawhțanni tlai thim thet theta in ka thlen chuan chaw ei dawhkàn chunga parcel lian lutuk lo, uk deuh khak lo awm vàng chuan ka mit a la nghâl chat mai. Ka hming leh ka address kimchang tak a lo chuang kalh lehnghâl a, ka nu chu ka ko vat a. Ani chuan chu thil chu vawiin chawhnua lo thleng a nih thu min hrilhin," Eng thil nge pawh ka hre lo, min rawn pe sia, ka lo la ve mai, i hming a chuang kalh bawk si a," a lo ti mai a. 

Eng thil mah ka chah lo tih ka hre chiang a, tu min rawn thawn tak ni ang maw ka ti rilru rauh rauh a. A lan dànah chuan Amazon ațanga thil chah rawn thleng ni àwm tak a ni si a, mak ka ti viau lo thei lo. Chutih rualin eng thil nge tih ka hre châk viau tho bawk a, pheikhawk ni chuan a lang a, inthlâk pawh inthlâk hmasa lo chuan ka han hawng zui nghâl a.

Pheikhawk a lo ni ngei mai a, kawr pawh a lo la tel zui!! A mawi dùn êm êm lehnghâl a, ka nu pawh chuan," Bawihte, a va mawi ve!!" a rawn ti hial nghe nghe a, ka chah ni hauh lo kan ina rawn thleng nawlh bawk si chu a mak ta a ni.

Mahse, U Hruaia'n ka tân liau liau min chahsak a ni tih min rawn biakna ațanga ka hriat chuan ka lãwm viau tho nain ka zak a, ka duh lo viau bawk. Ka nu ka zah a, chutih rualin ka mihring chapona a ti tlâwm ka ti dâwn nge ni, U Hruaia bulah pawh chuan ka sawi chhuak ta nghe nghe a, ani chuan," Anne, i pawi ka sawi a nih chuan ka tih palh tak zet zet; mahse, i tân ka awt êm a ni, i lei thei lo ang ka tih vàng a ni lo, ka hmuh chiah khân i inhmeh dâwn tih ka hria a, ka mitthlaah i lo lang hmasa ber bawk a, chu vàng chu a ni e. Bâkah, ka bialnu i nia, thil pêk che pawh ka duh ve alawm," a rawn ti a.

"U Hruai, làwm loah min ngai suh aw, a làwmawm lutuk! Ka phû loh thil mawi, changkãng leh țha a ni a; mahse, a thlàwna thil dawn ngawt hi ka nu min zilh dàn nèn a inmil lo a ni, chu vàng chu a nia, i hre tgiam dâwn nia," ka ti ve thung a, ani erawh chuan," A dik reng mai; mahse, nang ka pêk loh che chuan tu nge ka pêk ang? Ka bialnu i ni a, ka pêk che hian ka hlim asin, thil pe thei chea ka awm hi ka hlim tak zet a ni. Chu vàng chuan, ka hlimna chu i hlimna ni ve thei se ka ti, ka hlimna min siamsak chu i duh ang tiraw?" a rawn ti leh a.

Ta tlat mai a! Hei chu, a har ta țalh mai.

"Duh teh rêng mai; mahse, hetiang zâwng lo hian ti tal la? Pawisa hek zâwng ni lovin," ka tih chuan," Tak tak maw!?" a rawn ti leh a, kei pawh chuan," Tak tak e," ka lo ti leh a.

"Chuti chu, ka nupui ni tawh mai rawh, innei tawh mai ang, ka bialnu i nih chhûng chuan ka duh pêk che ka duh zêl dâwn si a," a rawn ti ta! A khirh leh ta hlak mai, kum lam tam tawh deuh na nâ nâ chu a hriat deuh e. 'Pathlawi tawhkhirh chin' ka ti rilru sap a. 

"Kan la inkawp chho țan dâwn chauh emaw ka ti," tiin ka chhâng a, ani lah chuan," Innei tùrin inkawp rei kher a ngai chuang hleinem. Ka hre chiang ve tâwk chein ka hria, palai lo kal tawh mai rawh se aw, ka pa pawh ka hrilh diam tawh kha, i la inpeih lo a nih pawhin hlawhchham tùr tal pawhin rawn kal tho rawh se," a rawn ti leh a.

Mi nèk chêp dàn a va thiam tak!

*IN INLAICHÌNNA KHÂN HUN REI TAK A DAIH VÀNG MAI KHÂN A DIKIN A NGHET TIHNA A NI LO AW, A TÀWPA AWMZE AWM LO A NI THEI THO*